အခန်း [၁၀၉] : တတိယမြောက် မီဇူကာဂဲ၏ နိဂုံး

ကီရီ ဂျိုးနင်များသည် ရှင်း၏ ဆူဆာနိုးအရှိန်အဝါကြောင့် ထိတ်လန့်တုန်လှုပ်နေကြသော်လည်း မီဇူကာဂဲ၏ အမိန့်အရ ဝိုင်းဝန်းတိုက်ခိုက်ကြတော့သည်။

သူတို့ဘက်က လူအင်အား ဒီလောက်တောင် များပြားနေတာကြောင့် ဆူဆာနိုးရဲ့ ခုခံမှုကို ဖောက်ထွက်နိုင်လိမ့်ဦးမယ်လို့ ယုံကြည်နေကြဆဲပင်။ ဂျိုးနင် အယောက်လေးဆယ်ကျော်နှင့် မီဇူကာဂဲတို့ စုပေါင်းကာ အစွမ်းထက် နည်းစနစ်ပေါင်းစုံကို တပြိုင်နက်တည်း ထုတ်လွှတ်လိုက်ကြသည်။ ရှင်း၏ လက်ရှိ ဆူဆာနိုးပုံစံမှာ ထိုမျှပြင်းထန်လှသော အစုလိုက်အပြုံလိုက် တိုက်ခိုက်မှုကို တောင့်ခံနိုင်စွမ်း မရှိပေ။

သို့သော် သူက ငြိမ်ခံနေမည့်သူ မဟုတ်ချေ။

သူသည် ဆူဆာနိုးထဲသို့ ချက္ကရာနှင့် မျက်လုံးစွမ်းအားများကို အရှိန်အဟုန်ဖြင့် ထပ်မံဖြည့်တင်းလိုက်သည်။ ရုတ်ခြည်းပင် အရိုးစုပေါ်၌ ချပ်ဝတ်တန်ဆာများ ဖုံးလွှမ်းလာပြီး ၎င်း၏အရွယ်အစားမှာလည်း မိုးထိလောက်အောင် ကြီးမားလာခဲ့သည်။ ထို့နောက် ခြေထောက်များနှင့် တောင်ပံများပါ ပေါ်ထွက်လာပြီးနောက်တွင်မူ စစ်နတ်ဘုရားတစ်ပါးအလား ခန့်ညားထည်ဝါစွာ ပြည့်စုံသွားတော့သည်။

ပြီးပြည့်စုံသော ဆူဆာနိုး (Perfect Susanoo) သည် တောင်တစ်လုံးသဖွယ် သူတို့အပေါ်တွင် မိုးမောက်စွာ တည်ရှိနေပြီဖြစ်သည်။ ၎င်း၏ ဖျက်ဆီးအားမှာ အတိုင်းအဆမရှိလှရာ မီဇူကာဂဲအနေဖြင့် စိတ်ကူးနှင့်ပင် မှန်းဆရန် မဝံ့တော့ပေ။

"မီဇူကာဂဲ... ငါသာ တိုက်ခိုက်လိုက်ရင် မင်းတို့အားလုံး သေသွားလိမ့်မယ်။ မင်းလည်း အဲ့ဒါကို သဘောတူတယ် မဟုတ်လား?" ဟု ရှင်းက မေးလိုက်သည်။

"ဒါကြောင့် မင်းတို့ကို ထွက်ပြေးဖို့ အခွင့်အရေးတစ်ခု ပေးမယ်။ လွတ်အောင် ပြေးနိုင်မလား၊ မပြေးနိုင်ဘူးလားဆိုတာကတော့ မင်းတို့ရဲ့ အရည်အချင်းပေါ်မှာပဲ မူတည်လိမ့်မယ်။"

အနက်ရောင်မီးတောက်များ ဖြစ်သော အာမာတာရတ်ဆုသည် ဆူဆာနိုး၏ ဓားရှည်ပေါ်တွင် ဟုန်းဟုန်းတောက် စွဲငြိလာသည်။ အာမာတာရတ်ဆု နှင့် ကာဂူဆူချီ စွမ်းအားများကြောင့် ရှင်းသည် သူ၏ ဆူဆာနိုးလက်နက်များပေါ်တွင် ဘယ်တော့မှ မငြိမ်းသတ်နိုင်သော မီးတောက်များကို ပေါင်းစပ်နိုင်ပြီဖြစ်သည်။

အလွန်အမင်း အန္တရာယ်ရှိနေပြီဖြစ်ကြောင်း အာရုံခံမိလိုက်သည်နှင့် မီဇူကာဂဲမှာ တွေဝေမနေတော့ပေ။ "ဆုတ်ခွာကြ!!!" ဟု သူ အသည်းအသန် အော်ဟစ်လိုက်တော့သည်။

ယခုအချိန်သည် သတ္တိပြနေရမည့် အချိန်မဟုတ်။ သူ၏ အသက်ကို ဂရုမစိုက်လျှင်ပင် ကီရီဂါကူရီ၏ အနာဂတ်ကို ထည့်သွင်းစဉ်းစားရမည်ဖြစ်သည်။ အကယ်၍ သူသာ သေဆုံးသွားပါက ရွာမှာ ဖရိုဖရဲ ဖြစ်သွားလိမ့်မည်။ ဟိုဇူကီ နှင့် ကုဂုယ မျိုးနွယ်စုများသည် အခွင့်အရေးကို ချောင်းနေကြသူများ ဖြစ်ရာ သူ မရှိတော့လျှင် ပုန်ကန်ကြပေလိမ့်မည်။

မီဇူကာဂဲနှင့် ကီရီ ဂျိုးနင်များမှာ အသက်လုကာ ထွက်ပြေးကြသည်။ သို့သော် ရှင်းကမူ ညှာတာမနေခဲ့ပေ။ သူသည် ဧရာမဓားကြီးကို ဝှေ့ယမ်းကာ ပိုင်းချလိုက်သည်။ မြေကမ္ဘာကြီး တုန်ခဲသွားပြီး ဧရာမ မြေက်ကွဲကြောင်းကြီး ဖြစ်ပေါ်သွားကာ ထိုထဲတွင် အနက်ရောင်မီးတောက်များ ဟုန်းဟုန်းတောက်လောင်နေသည်။

မီဇူကာဂဲနှင့် အထူးဂျိုးနင် အယောက်လေးဆယ်မှာမူ အစအနပင် မကျန်တော့ဘဲ ပြာအဖြစ်သို့ ပြောင်းလဲသွားကြတော့သည်။

"ငါ အခွင့်အရေး မပေးဘူးလို့ မပြောနဲ့နော်။ မင်းတို့ကမှ မရှောင်နိုင်တာ။" ရှင်းသည် သူဖန်တီးလိုက်သော ပျက်စီးမှုများကို ကြည့်ကာ အေးစက်စွာ ဆိုလိုက်သည်။

မီဇူကာဂဲသည် ဓားချက်ကို ရှောင်နိုင်ခဲ့သော်လည်း အာမာတာရတ်ဆု မီးတောက်ကိုမူ မရှောင်နိုင်ခဲ့ခြင်းဖြစ်သည်။ ရှင်းသည် နောက်ဆုံးတွင် အာမာတာရတ်ဆုဖြင့် လူသတ်နိုင်ခဲ့ပြီဖြစ်သည်။ ၎င်းမှာ ဝမ်းမြောက်စရာ ကိစ္စပင်။ အာမာတာရတ်ဆုသည် သူ၏လက်ထဲတွင်မှသာ တကယ့်အစွမ်းကို ပြသနိုင်ပုံရသည်

တိုက်ခိုက်မှု၏ တုန်ခါမှုလှိုင်းများမှာ ဝေးလံသောနေရာအထိ ပြန့်နှံ့သွားပြီး ဆုတ်ခွာနေသော ကီရီနင်ဂျာများကိုပါ ရိုက်ခတ်ကာ အကျအဆုံး များပြားစေခဲ့သည်။ ထာဝရ မန်ဂဲခရူး ရှာရင်ဂန်၏ အစွမ်းဖြင့် ရှင်းသည် ဝေးလံသောနေရာသို့ ထွက်ပြေးနေသည့် ကီရီနင်ဂျာများကို အတိုင်းသား မြင်နေရသည်။

မီဇူကာဂဲသည် နင်ဂျာအင်အား သုံးထောင်ကျော် ခေါ်ဆောင်လာခဲ့သော်လည်း ယခုမူ ထက်ဝက်ကျော်မှာ သေဆုံးခဲ့ပြီဖြစ်ကာ အများစုမှာ ရှင်း၏လက်ချက်ဖြင့်ပင် ဖြစ်သည်။ ဤသည်မှာ ကီရီဂါကူရီသမိုင်းတွင် အကြီးမားဆုံးသော ဆုံးရှုံးမှုပင် ဖြစ်သည်။ တတိယမြောက် မီဇူကာဂဲမှာလည်း သမိုင်းတစ်လျှောက် အရှက်ရဆုံးသော ခေါင်းဆောင်အဖြစ် မှတ်တမ်းဝင်ပေတော့မည်။

ဤရှုံးနိမ့်မှုက သူတို့ကို အကြီးအကျယ် ထိတ်လန့်သွားစေခဲ့ပြီ ဖြစ်သည်။ သူတို့ နောက်တစ်ကြိမ် ပြန်လာဝံ့မည် မဟုတ်တော့ချေ။ မီးနိုင်ငံသည် သူတို့အတွက် အိမ်မက်ဆိုးတစ်ခု ဖြစ်ကျန်ရစ်ပေတော့မည်။

"အကုန် ရှင်းလိုက်ပြီလား?" မီကိုတိုနှင့် ကူရှီးနားတို့က သူ့ကို အံ့သြတကြီး စိုက်ကြည့်နေကြသည်။ သူက ကီရီနင်ဂျာအချို့ကိုပဲ သတ်လိမ့်မည်ဟု သူတို့ ထင်ထားခဲ့ခြင်းဖြစ်သည်။

"အင်း... တတိယမြောက် မီဇူကာဂဲ သေသွားပြီ။ ဒါဆိုရင် 'ရှင်းလိုက်ပြီ' လို့ ပြောလို့ရတယ် မဟုတ်လား?"

မီဇူကာဂဲ မရှိတော့သည့်အတွက် ကီရီဂါကူရီမှာ ရွာတွင်းရေးပြဿနာများကို ဖြေရှင်းနေရသဖြင့် ကိုနိုဟာကို ထပ်မံတိုက်ခိုက်နိုင်မည် မဟုတ်တော့ပေ။ ကလဲ့စားချေဖို့လား? သူတို့ ဝံ့ရဲမည်ဟု ရှင်း မထင်ပေ။ အကယ်၍ သူတို့ တကယ်လာလျှင်လည်း သူက သတ်ပစ်ရုံသာရှိသည်။ သူ့ကို ဒေါသထွက်အောင် လုပ်လျှင်မူ ကီရီဂါကူရီရွာထဲအထိ သွားတိုက်ပြီး ရွာကိုပါ ဖျက်ဆီးပစ်ကောင်း ဖျက်ဆီးပစ်ပေလိမ့်မည်။

ကူရှီးနားနှင့် မီကိုတိုတို့မှာ မှင်တက်နေကြသည်။ တတိယမြောက် မီဇူကာဂဲ... သေသွားပြီတဲ့လား? သူတို့ မယုံနိုင်အောင် ဖြစ်နေရသည်။

"မင်းတို့က ငါ့ကို မလုပ်နိုင်ဘူးလို့ ထင်နေတာလား?"

"အဲ့လိုမဟုတ်ပါဘူး။ ဒါပေမဲ့... ယုံရခက်လို့ပါ။ 'ကာဂဲ' တစ်ယောက်က... သေသွားပြီဆိုတော့..." မီကိုတိုက ခေါင်းခါရင်း ဆိုသည်။ သူတို့သည် ရှင်း၏ အင်အားကို သံသယမရှိသော်လည်း 'ကာဂဲ' တစ်ဦး ကျဆုံးခြင်းမှာမူ ကြီးမားသော တုန်လှုပ်မှုတစ်ခုပင် ဖြစ်သည်။

"ယုံရခက်စရာ ဘာရှိလို့လဲ? မီဇူကာဂဲလည်း လူသားတစ်ယောက်ပဲဟာ။ သူ သေသွားတာ ဘာမှ ထူးဆန်းတာ မဟုတ်ဘူး။"

ရှင်းက ပခုံးတွန့်ရင်း ဆိုလိုက်သည်။ သူတစ်ယောက်တည်းသာ ဤစကားကို အေးအေးဆေးဆေး ပြောနိုင်ခြင်းဖြစ်သည်။ 'ကာဂဲ' ဆိုသည်မှာ ရွာတစ်ရွာ၏ အသန်မာဆုံး ပုဂ္ဂိုလ် မဟုတ်ပါလား။ အကယ်၍ မီဇူကာဂဲ သေဆုံးသည့် သတင်းသာ ပြန့်သွားလျှင် နင်ဂျာလောကတစ်ခုလုံး တုန်လှုပ်သွားပေလိမ့်မည်။

သို့သော် ရှင်းအတွက်မူ 'ကာဂဲ' များမှာ ထိုမျှအထင်ကြီးစရာ မကောင်းပေ။ အူချီဟာ မာဒါရာ နှင့် ဟာရှီရာမ ဆန်းဂျူး တို့ကဲ့သို့ လူမျိုးများသာလျှင် တကယ် အထင်ကြီးစရာ ကောင်းသူများဖြစ်သည်။