အခန်း [၁၀၈] : ကီရီကို အောင်နိုင်ခြင်း

ရှင်း၏ အဆမတန်ကြီးမားလှသော ချက္ကရာ ဖိအားကြောင့် ကီရီနင်ဂျာများမှာ ရှေ့မတိုးဝံ့ဘဲ ဖြစ်နေကြသည်။ သူတို့တစ်သက်တွင် ဝိညာဉ်သားရဲတစ်ကောင်ထံမှပင် ဤမျှပြင်းထန်သော ဖိအားမျိုးကို တစ်ခါမျှ မခံစားခဲ့ဖူးချေ။

"သူ့မှာ ဘယ်လိုလုပ် ဒီလောက်တောင် ချက္ကရာတွေ ရှိနေနိုင်ရတာလဲ?"

တတိယမြောက် မီဇူကာဂဲမှာ အံ့အားသင့်လွန်း၍ ဆွံ့အသွားမိသည်။

"ချက္ကရာ များတာက အဲ့လောက် ထူးဆန်းလို့လား?" ဟု ရှင်းက ခပ်အေးအေးပင် ပြန်ပြောလိုက်သည်။

ထိုအခါမှ သူတို့သည် ရှင်း၏ နီမြန်းသော ဆံပင်များကို သတိထားမိသွားကြသည်။ သူသည် အူဇူမာကီးမျိုးနွယ်စုဝင် တစ်ဦးဖြစ်သည်။ သို့သော် သူက ရှာရင်ဂန်ကို ဘယ်ကရလာသနည်း?

ရှင်း၏ မျက်လုံးထဲရှိ တိုမိုးအဲသုံးခုပါသော ရှာရင်ဂန်ကို ကြည့်ပြီး မီဇူကာဂဲမှာ ဝေခွဲမရ ဖြစ်နေတော့သည်။

"အူဇူမာကီးမျိုးနွယ်စုကို အစုလိုက်အပြုံလိုက် သတ်ဖြတ်တုန်းက ကီရီဂါကူရီလည်း ပါခဲ့တယ် မဟုတ်လား?" ရှင်း၏ မေးခွန်းက ရေခဲတမျှ အေးစက်လှသည်။

မီဇူကာဂဲ၏ ရင်ခုန်သံမှာ တစ်ချက်မျှ တုံ့ခနဲ ဖြစ်သွားသည်။

၎င်းမှာ အမှန်တရားပင် ဖြစ်သည်။ ကီရီသည် တိမ်နိုင်ငံ (ကူမို) နှင့် ပူးပေါင်းကာ အူဇူမာကီးတို့၏ တံဆိပ်ခတ်ခြင်း အတတ်များကို လိုချင်သဖြင့် တိုက်ခိုက်ခဲ့ခြင်းဖြစ်သည်။

သို့သော် သူတို့ ဘာပညာရပ်မှ မရခဲ့ချေ။ အူဇူမာကီး မျိုးနွယ်စုခေါင်းဆောင်က သူတို့ လက်ထဲမပါသွားစေရန် ပညာရပ်အားလုံးကို ကြိုတင်ဖျက်ဆီးခဲ့သောကြောင့် ဖြစ်သည်။

"ဒါကို ငါ့ရဲ့ ကလဲ့စားချေမှုလို့ပဲ သဘောထားလိုက်တော့။"

ရှင်း၏ ပုံရိပ်မှာ ဝေဝါးသွားပြီး ရုတ်ခြည်း ပျောက်ကွယ်သွားသည်။ ကီရီနင်ဂျာတစ်ဦးမှာမူ သူ၏ရင်ဘတ်ကို ဆုပ်ကိုင်ရင်း လဲကျသွားသည်။ သူ၏နှလုံးသားတွင် ကူနိုင်းတစ်ခု စိုက်ဝင်နေပြီဖြစ်သည်။

"မီးဓာတ်: နဂါးမီးတောက်ကြီး အတတ် (Great Dragon Fire Jutsu)!"

ရှင်းသည် နောက်ထပ် ကီရီနင်ဂျာတစ်ဦးကို ကန်ထုတ်ကာ သတ်ဖြတ်လိုက်ပြီးနောက် လျှပ်စီးကဲ့သို့ မြန်ဆန်သော အရှိန်ဖြင့် လက်ဟန်များကို ပြုလုပ်လိုက်သည်။

ဧရာမ မီးနဂါးတစ်ကောင် ပေါ်ထွက်လာပြီး နင်ဂျာအများအပြားကို ဝါးမြိုသွားသည်။ အသားလောင်ကျွမ်းသည့် အနံ့ဆိုးများမှာ လေထဲတွင် ပြန့်လွင့်လာတော့သည်။ ကီရီနင်ဂျာတချို့မှာ အန်ချင်စိတ်ကိုပင် မနည်းအောင့်ထားရသည်။

ရှင်းအတွက်မူ သူတို့ကို သတ်ဖြတ်ရခြင်းမှာ အလွန်လွယ်ကူလှသည်။ နည်းစနစ်တစ်ခုတည်းနှင့်ပင် လူပေါင်းများစွာကို အပြတ်ရှင်းနိုင်စွမ်းရှိသည်။

ဤအတိုင်း ဆက်သွား၍ မဖြစ်တော့မှန်း မီဇူကာဂဲ သိလိုက်သည်။ သူတို့ဘက်က လူအင်အား မည်မျှပင် များပြားနေပါစေ နိုင်ရန် အလားအလာ မရှိချေ။

"ဂျိုးနင်တွေကလွဲရင် ကျန်တဲ့သူတွေ အကုန်လုံး ဆုတ်ခွာကြ!" ဟု သူ အမိန့်ပေးလိုက်သည်။

ဂျိုးနင်အဆင့်အောက်ရှိ သူများမှာ ဤနေရာတွင် အသုံးမဝင်တော့ပေ။ သူတို့သည် အနှောင့်အယှက်သာ ဖြစ်လိမ့်မည်။ ကီရီနင်ဂျာများမှာ ဘေးလွတ်ရာသို့ ထွက်ပြေးကြတော့သည်။ သူတို့သည် ဆုတ်ခွာချင်နေသည်မှာ ကြာပြီဖြစ်သော်လည်း မီဇူကာဂဲ၏ အမိန့်မရှိဘဲ မပြေးရဲကြခြင်းဖြစ်သည်။

ယခုမူ ဂျိုးနင်အဆင့်ရှိသည့် ကီရီရွာ၏ အထူးတပ်ဖွဲ့ဝင် အယောက်တစ်ရာခန့်သာ ကျန်ရစ်တော့သည်။

"ငါးကြီးရွာတစ်ရွာဆိုတော့လည်း လူအင်အားက မဆိုးဘူးပဲ" ဟု ရှင်းက ထိုအရေအတွက်ကို ကြည့်ကာ ချီးကျူးလိုက်သည်။

အူဇူမာကီးမျိုးနွယ်စုသည် အထွတ်အထိပ် ရောက်ချိန်၌ပင် နင်ဂျာအင်အား နှစ်ရာမပြည့်ခဲ့သလို ဂျိုးနင်မှာလည်း တစ်ဒါဇင်ခန့်သာ ရှိခဲ့သည်။ ကီရီမှာမူ ဂျိုးနင်အရေအတွက်က ထိုထက် ဆယ်ဆမျှ ပိုများသည်။ ဤသည်မှာ သူတို့၏ အင်အားအားလုံးပင် မဟုတ်သေးချေ။ ရွာထဲတွင်လည်း ကျန်ရှိနေဦးမည်ဖြစ်သည်။ မျိုးနွယ်စုတစ်ခုမှာ နင်ဂျာရွာကြီးတစ်ရွာကို မယှဉ်နိုင်ခြင်းကြောင့်ပင် အူဇူမာကီးမျိုးနွယ်စု ပျက်စီးခဲ့ရခြင်း ဖြစ်သည်။

"ဒါပေမဲ့ မင်းတို့အတွက် ကံဆိုးတာကတော့ ဒီနေ့ မင်းတို့အားလုံး သေရမှာပဲ။"

ရှင်း၏ သတ်ဖြတ်လိုသော အရှိန်အဝါများက သူတို့အပေါ် လွှမ်းခြုံသွားသည်။ သူသည် လူများစွာကို သတ်ဖြတ်ခဲ့ပြီးပြီ ဖြစ်ရာ သူ၏ သွေးဆာနေသော အရှိန်အဝါမှာ သိသိသာသာ ပြင်းထန်နေသည်။ ကီရီ ဂျိုးနင်များမှာ ချမ်းစိမ့်သွားပြီး စိတ်ဓာတ်များပင် ယိမ်းယိုင်လာကြသည်။

"တိုက်ကြစမ်း!"

တွေဝေနေ၍ မဖြစ်တော့မှန်း မီဇူကာဂဲ သိသည်။ ရှင်း၏ သတ်ဖြတ်လိုသော အရှိန်အဝါက သူတို့၏ စိတ်ဓာတ်ကို တိုက်စားနေသည်။ ဤအတိုင်းဆိုလျှင် ရှင်း လက်ဖျားနှင့်ပင် မတို့ရသေးဘဲ သူတို့ဘာသာ ရှုံးနိမ့်သွားနိုင်ခြေ ရှိသည်။

"သတိထားကြ! သူ့မျက်လုံးတွေကို မကြည့်နဲ့! သူ့ရဲ့ ရှာရင်ဂန် ကိုယ်ယောင်ပြအတတ် (Genjutsu) ကို သတိထား!" ဟု မီဇူကာဂဲက သတိပေးလိုက်သည်။ သူတို့သည် ရှာရင်ဂန်၏ ကိုယ်ယောင်ပြအတတ်ကို အထူးဂရုစိုက်ရမည်ဖြစ်သည်။

"အဲ့ဒါနဲ့တင် ရမယ်ထင်လို့လား? ကိုယ်ယောင်ပြအတတ်: ခရိုကာ ဆူအီဂဲဆု (Kyōka Suigetsu)"

ရှင်းက ပြုံးလိုက်ပြီး သူ၏ အာရုံငါးပါး ထိန်းချုပ်မှုကို ထုတ်လွှတ်လိုက်သည်။

ကီရီ ဂျိုးနင်များ တစ်ဦးကိုတစ်ဦး ပြန်လည်တိုက်ခိုက်နေကြသည်ကို ရှင်း ကြည့်နေလိုက်သည်။ မီဇူကာဂဲကိုယ်တိုင်ပင် သူ၏ တပည့်များကို ပြန်လည်တိုက်ခိုက်နေတော့သည်။ ရှင်းသည် သူတို့၏ အာရုံခံစားမှုများကို လှည့်စားလိုက်ခြင်းဖြစ်ကာ သူတို့၏ ရဲဘော်များကို ရန်သူအဖြစ် မြင်အောင် ပြုလုပ်လိုက်ခြင်းဖြစ်သည်။

ကုရာမမျိုးနွယ်စု၏ သွေးပါနတ်ပညာ (Kekkei Genkai) မှာ တကယ့်ကို ထိတ်လန့်စရာကောင်းလှသည်။ ၎င်းသည် အိုင်ဇန်၏ ခရိုကာ ဆူအီဂဲဆု လောက် မပြင်းထန်သော်လည်း ထိုအဆင့်ကို နီးပါး ရောက်ရှိနေပြီဖြစ်သည်။

သို့သော် ချက္ကရာ ကုန်ဆုံးမှုမှာ အလွန်များပြားသည်။ မီဇူကာဂဲ အပါအဝင် ဂျိုးနင် အယောက်တစ်ရာ၏ အာရုံငါးပါးကို ထိန်းချုပ်ရခြင်းမှာ ရာဆန်ရှုရီကန် (Rasenshuriken) ဆယ်ခု ပစ်လွှတ်လိုက်ရသည်နှင့် အတူတူပင်ဖြစ်သည်။

ထို့ပြင် ထိုအတတ်ကို အကြာကြီး မထိန်းထားနိုင်ချေ။ နောက် ၁၀ မိနစ်ခန့်တွင် သူတို့ သတိပြန်ရလာကြလိမ့်မည်။ ထို့ကြောင့်လည်း ၎င်းမှာ အိုင်ဇန်၏ အတတ်ထက် အားနည်းနေခြင်းဖြစ်သည်။

၁၀ မိနစ်အကြာတွင် ကိုယ်ယောင်ပြအတတ် ပျက်ပြယ်သွားသည်။ ကီရီနင်ဂျာများမှာ ထိတ်လန့်တကြား ပတ်ဝန်းကျင်ကို ကြည့်လိုက်ကြသည်။ သူတို့၏ ထက်ဝက်ကျော်မှာ သေဆုံးကုန်ကြပြီဖြစ်သည်။ အများစုမှာ မီဇူကာဂဲကိုယ်တိုင် သတ်ဖြတ်မိခဲ့ခြင်းဖြစ်သည်။

အသက်ရှင်ကျန်ရစ်သူ အများစုမှာလည်း အထူးဂျိုးနင်များသာ ဖြစ်ကြသည်။ သူတို့မှာ သန်မာသောကြောင့်သာ အသက်ဘေးမှ လွတ်မြောက်ခဲ့ခြင်းဖြစ်သည်။

"ဘာတွေဖြစ်ကုန်တာလဲ?" မီဇူကာဂဲမှာ ဖြစ်ပျက်သွားသော မြင်ကွင်းကို ကြည့်ကာ ဝေခွဲမရ ဖြစ်နေသည်။ သူတို့ ရှင်းကို တိုက်ခိုက်နေခြင်း မဟုတ်ပါလား? အခု ဘာကြောင့် သူတို့လူတွေ အကုန်သေကုန်ရသနည်း?

မည်သူမျှ သူ့ကို အဖြေမပေးနိုင်ကြပေ။ အခြားဂျိုးနင်များမှာလည်း ကြောင်တောင်တောင် ဖြစ်နေကြသည်။ ရှင်းကမူ ရှင်းပြနေရန် အစီအစဉ်မရှိပေ။

"ဆူဆာနိုး (Susanoo)!"

အနက်ရောင် ဆူဆာနိုး တစ်ခု ပေါ်ထွက်လာသည်။ ၎င်းမှာ ဒုတိယပုံစံဖြစ်ပြီး ကြွက်သားနှင့် အကြောအမျှင်များပါသော အရိုးစုပုံစံသာ ဖြစ်သည်။ ချပ်ဝတ်တန်ဆာနှင့် ခြေထောက်များ မပါသေးပေ။ ဤပုံစံသည် ချက္ကရာ ကုန်ဆုံးမှု နည်းပါးသည်။ အူချီဟာ မာဒါရာကိုယ်တိုင်ပင် အားနည်းသော ရန်သူများကို ရင်ဆိုင်ရာတွင် ဤပုံစံကို အသုံးများလေ့ရှိသည်။

ဆူဆာနိုးသည် ချက္ကရာဓားကို ဆွဲထုတ်ကာ ပိုင်းချလိုက်ရာ မြေပြင်ကြီးမှာ အက်ကွဲကြောင်းကြီး ဖြစ်သွားသည်။

ဂျိုးနင်အတော်များများမှာထိုတိုက်ခိုက်မှုဒဏ်ကြောင့် အစအနပင် မကျန်တော့ဘဲ ပျောက်ကွယ်သွားကြတော့သည်။

"တောက်... မင်း... မန်ဂဲခရူး ရှာရင်ဂန်!"

မီဇူကာဂဲသည် ရှင်း၏ ထာဝရ မန်ဂဲခရူး ရှာရင်ဂန် ကို ဒေါသတကြီး စိုက်ကြည့်လိုက်သည်။

"မင်း မျက်လုံးတွေက တော်တော်နီနေတာပဲ။ မင်းလည်း ရှာရင်ဂန် လိုချင်လို့လား?" ဟု ရှင်းက လှောင်ပြောင်လိုက်သည်။

"ရေဓာတ်: ရေနဂါးကျည်ဆန် အတတ် (Water Dragon Bullet Jutsu)!"

မီဇူကာဂဲသည် အစွမ်းထက်သော ရေနဂါးတစ်ကောင်ကို ထုတ်လွှတ်လိုက်သည်။ ၎င်းမှာ B-အဆင့် နည်းစနစ် ဖြစ်သော်လည်း သူ၏လက်ထဲတွင်မူ A-အဆင့် အင်အားမျိုး ရှိနေသည်။

ယခု ရှင်း အသုံးပြုထားသော ဆူဆာနိုး ပုံစံမှာ အားအနည်းဆုံးဖြစ်ရာ ခုခံမှုမှာ ပုံမှန်သာ ရှိသည်။ သို့သော် ထိုမျှနှင့်ပင် ရေနဂါးကျည်ဆန် အတတ်ဖြင့် ဖျက်ဆီးနိုင်မည့်အရာ မဟုတ်ပေ။

ရေနဂါးမှာ ဆူဆာနိုးနှင့် ထိတွေ့ကာ အစအနပင် မကျန်အောင် ပျက်စီးသွားသော်လည်း ဆူဆာနိုးမှာမူ ဘာဒဏ်ရာမှ မရခဲ့ချေ။

"မီဇူကာဂဲ... မင်းမှာ ဒီလောက်ပဲ ရှိတာလား? ဒီလောက်နဲ့ မင်းကိုယ်မင်း 'ကာဂဲ' လို့ ခေါ်နေသေးတယ်ပေါ့။ ရာထူးကနေပဲ နုတ်ထွက်လိုက်ပါတော့လား" ဟု ရှင်းက သရော်လိုက်သည်။

"အားလုံး စုပေါင်းပြီး သူ့ကို တိုက်ကြစမ်း!"

မီဇူကာဂဲသည် အသက်ကို ပြင်းပြင်းရှူကာ အခြားဂျိုးနင်များကို အော်ဟစ်ခိုင်းစေလိုက်သည်။ သူသည် ရှင်း၏ လှောင်ပြောင်စကားများကို ဂရုမစိုက်နိုင်တော့ပေ။ 'ကာဂဲ' တစ်ယောက်အနေဖြင့်

သူသည် စကားလုံးများဖြင့် စိတ်ဓာတ်ကျမည့်သူ မဟုတ်ချေ။