အခန်း (၇) ဘက်စုံအခြေအနေကို အပိုင်ချုပ်ကိုင်နိုင်သည့် ချန်းဇီချွမ်

ကျန်းဖေးတစ်ယောက် ရှေ့တန်း စစ်စခန်းဆီသို့ လုံးဝကြီး စိတ်ဓာတ်ကျဆင်းပြီး ပြန်လည်ရောက်ရှိလာခဲ့သည်။ သူသည် မိမိ၏ မူလရည်ရွယ်ချက်ကိုပင် လုံးဝမေ့လျော့သွားခဲ့ရချေပြီ။ အဘယ်ကြောင့်ဆိုသော် ချန်းရှီ၏ စည်းချက်မရှိသော စကားလုံးလက်သီးချက်များအောက်တွင် သူတစ်ယောက် မျက်စိလည်လမ်းမှားလုနီးပါး ဖြစ်သွားခဲ့ရသောကြောင့် ဖြစ်သည်။ နောက်ရက်များတွင် ကျန်းဖေးတစ်ယောက် ထပ်မံပေါ်မလာတော့သဖြင့် ချန်းရှီလည်း မိမိ၏ အနာဂတ်ဦးတည်ချက်ကို ဆက်လက်တွေးတောနေခဲ့သည်။

အမှန်အတိုင်းပြောရလျှင် လျှိုပေ့ အာဏာအရှိန်အဝါ အထွတ်အထိပ်သို့ ရောက်ရှိနေချိန်တွင် ဝေ၊ ရှု၊ ဝူ သုံးပြည်ထောင်ခေတ်ကြီးထဲ၌ မည်သူက အသာစီးရမည်ဆိုသည်မှာ မရေရာခဲ့ပေ။ အထူးသဖြင့် ဒုတိယအစ်ကိုတော် ဝေဝေဝါးဝါး မဖြစ်ခဲ့လျှင် ပို၍ပင် သေချာလှသည်။ ဤပုံမှန်မဟုတ်သော သမိုင်းနောက်ခံအခြေအနေအောက်တွင် ရှုပြည်ထောင်၏ စစ်ရေးအင်အားမှာ လျှော့တွက်၍မရနိုင်ချေ။

ကျန်းဖေးကို ကိုယ်တိုင်မြင်တွေ့ပြီးနောက် ချန်းရှီသည် ငါးဦးသော ကျားသစ်ဗိုလ်ချုပ်ကြီးများ၏ စွမ်းဆောင်ရည်ကို အနည်းနဲ့အများ နားလည်သွားခဲ့သည်။ လူတစ်သောင်းကို ယှဉ်နိုင်သည်ဆိုခြင်းမှာ အလွန်အကျွံ ကြွားဝါခြင်းမဟုတ်ဘဲ ဤလူငါးယောက်တည်းနှင့်တင် စစ်သည်ငါးသောင်းကို ကလေးကစားစရာပမာ ချေမှုန်းနိုင်စွမ်း ရှိကြသည်။ ဤအချက်ကို ထည့်တွေးကြည့်လျှင် လျှိုပေ့နှင့် မဟာမိတ်ဖွဲ့ခြင်းက သင့်တော်သလိုရှိသော်လည်း တဖန်ပြန်တွေးကြည့်ပြန်တော့ လျှိုပေ့သည် အရေးပါသော စစ်ဗျူဟာမှူးတစ်ဦး ဆုံးရှုံးရတိုင်း ဘယ်တုန်းကမှ ကောင်းကျိုးမခံစားခဲ့ရပေ။ တော်ကြာ ကံဆိုးမိုးမှောင်ကျပြီး နောက်ထပ်အလှည့်ကျသူက မိမိသာဖြစ်သွားခဲ့လျှင် မသက်သာလှချေ။

ထပ်ဖန်တလဲလဲ စဉ်းစားပြီးနောက်တွင်တောင် ချန်းရှီတစ်ယောက် ရှင်းလင်းပြတ်သားသော အစီအစဉ် မချနိုင်သေးသဖြင့် အခြေအနေကိုကြည့်ကာ တစ်လှမ်းချင်းသာ ရှေ့ဆက်ရန် ဆုံးဖြတ်လိုက်တော့သည်။ ဤသို့တွေးတောရင်း ချန်းရှီသည် အဌာရသ(၁၈) ပါးသော စစ်ပွဲသခင်များ၏ ဗဟိုစစ်စခန်းကြီးထဲသို့ မည်သို့ဝင်ရောက်ရမည်ကို ကြံဆနေမိသည်။ သို့သော် လျှိုပေ့က ဤကိစ္စတွင် မကူညီနိုင်ချေ။ အဘယ်ကြောင့်ဆိုသော် သူသည် စစ်ပွဲသခင်များစာရင်းတွင် မပါဝင်သေးသလို၊ နောက်ပိုင်းတွင် နေရာတစ်နေရာ ရရှိခဲ့လျှင်ပင် အခြားသူတစ်ဦးကို ခေါ်ဆောင်လာနိုင်လောက်သည့် အရည်အချင်းမျိုး ရှိမနေသေးသောကြောင့် ဖြစ်သည်။

ကုန်းစွန်းဆန် တစ်ဦးတည်းသာ ဤအလုပ်ကို လုပ်နိုင်စွမ်းရှိသော်လည်း ပြဿနာမှာ ချန်းရှီနှင့် ကုန်းစွန်းဆန်ကြားတွင် မည်သည့်ပတ်သက်မှုမှ မရှိခြင်းပင်။ ချန်းရှီတစ်ယောက် မည်သို့ခိုးဝင်ရမည်ကို တွေးတောနေစဉ် ကျန်းဖေးက ထပ်မံရောက်ရှိလာပြီး သူ၏ ပြူးကျယ်လှသော မျက်လုံးကြီးများဖြင့် ချန်းရှီကို ဘာတစ်ခွန်းမှမပြောဘဲ စိုက်ကြည့်နေပြန်ရာ ချန်းရှီမှာ တော်တော်လေး စိတ်အနှောင့်အယှက် ဖြစ်ရသည်။

"ယီတယ်... တို့တွေ ဒီလောက်တောင် ရင်းနှီးနေကြပြီပဲ၊ ဒီလို ကစားပွဲတွေ ဆော့မနေပါနဲ့တော့။ ဘာကိစ္စပဲဖြစ်ဖြစ် ပွင့်ပွင့်လင်းလင်းသာ ပြောစမ်းပါ။ ငါ ကူညီနိုင်တာဆိုရင် အစွမ်းကုန် ကူညီပေးပါ့မယ်"

ချန်းရှီက စိတ်မသက်မသာဖြင့် ပြောလိုက်သည်။

"ငါ့အစ်ကိုကြီးက မင်းနဲ့ တွေ့ချင်လို့တဲ့"

"ကောင်းပြီလေ၊ ငါလည်း ဗဟိုစစ်စခန်းထဲ ဘယ်လိုဝင်ရမလဲ တွေးနေတာနဲ့ အတော်ပဲ။ ဒါက ငါ့ကို အလုပ်ရှုပ် သက်သာစေတာပေါ့"

ချန်းရှီက တိုးတိုးရေရွတ်လိုက်သည်။ လွန်ခဲ့သည့် ရက်ပိုင်းက ကျန်းဖေး၏ စိတ်ဓာတ်ကျနေသော အမူအရာကိုကြည့်ပြီး လျှိုပေ့က တစ်ခုခုကို အရိပ်အမြွက် သိရှိသွားကာ ချန်းရှီကို မိမိဘက်ပါအောင် ဆွဲဆောင်ရန် ရည်ရွယ်ချက်ဖြင့် ခေါ်ခိုင်းခြင်းဖြစ်မှန်း သူ ရိပ်မိလိုက်သည်။

ချန်းရှီကို ကျန်းဖေးက ဗဟိုရဲမက်စခန်းကြီးထဲသို့ ဆွဲခေါ်လာခဲ့ရာ ဂွမ်ယုသည် ဘယ်ဘက်ခြမ်း၏ အမွန်မြတ်ဆုံးနေရာတွင် ထိုင်နေသည်ကို တွေ့ရသည်။ ချန်းရှီကို ခေါ်ဆောင်လာပြီးနောက် ကျန်းဖေးက ဘယ်ဘက်၏ ဒုတိယနေရာတွင် ဝင်ထိုင်လိုက်ပြီး လျှိုပေ့ကတော့ အဓိက အထက်ခေါင်းဆောင်နေရာတွင် ထိုင်နေသည်။ ညာဘက်ခြမ်းတစ်ခုလုံးကတော့ လုံးဝလွတ်နေချေသည်။

"ကျွန်တော်မျိုး အရှင်ရွှမ်တယ်ကို ဂါရဝပြုပါတယ်"

ချန်းရှီက ဦးညွှတ်နှုတ်ဆက်လိုက်သည်။

"ထိုင်ပါ... ထိုင်ပါ။ သီးသန့်တွေ့ဆုံတာပဲ ဓလေ့ထုံးစံတွေ သိပ်လုပ်မနေပါနဲ့။ မကြာခင်မှာ တို့တွေ ဆွမ်းကျူး ကို ရောက်တော့မယ်။ အခုဆိုရင် စစ်တပ်ပေါင်း တစ်ဒါဇင်ကျော်က ဆွမ်းကျူးမဟာမိတ်အဖွဲ့ကြီးအဖြစ် စုရုံးရောက်ရှိနေကြပြီ။ စစ်တန်းလျားကြီးက မိုင်ပေါင်းများစွာ ရှည်လျားနေတာ တကယ့်ကို အားရစရာကြီးပဲ ဇီချွမ်"

လျှိုပေ့က ပြုံးရွှင်စွာဖြင့် အခြေအနေကို ရှင်းပြသည်။

"မကြာခင် တို့တွေ ဆွမ်းကျူးထဲ ဝင်တော့မယ်၊ မင်းအနေနဲ့ သတိထားဖို့ လိုလိမ့်မယ် ဇီချွမ်။ မင်းကတော့ သစ္စာရှိတဲ့ သူရဲကောင်းတွေနဲ့ တွေ့ဆုံချင်တယ်ဆိုတာ ငါနားလည်ပါတယ်။ ဒါပေမဲ့ လက်ရှိဖြစ်ပေါ်နေတဲ့ ရှုပ်ထွေးမှုတွေအရ မင်းအနေနဲ့ သေသေချာချာ စဉ်းစားသင့်တယ်လို့ ငါ ထင်တယ်"

ချန်းရှီတစ်ယောက် အနည်းငယ် သက်ပြင်းချမိသည်။ လူနှစ်ထောင်ရှိသော စစ်တပ်ထဲသို့ နောက်ထပ်တစ်ယောက်၊ နှစ်ယောက် တိုးလာခြင်းက မသိသာသလို၊ လူသိန်းချီရှိသော စစ်တပ်ကြီးထဲတွင်လည်း သူကဲ့သို့ လူတစ်ယောက် တိုးလာခြင်းက အရေးတကြီး ကိစ္စမဟုတ်ချေ။ သို့သော် လျှိုပေ့၏ စကားများက သေသေချာချာ စဉ်းစားစရာ ဖြစ်နေပြီး သွယ်ဝိုက်သော အဓိပ္ပာယ်မှာ အလွန် ရှင်းလင်းလှသည်။

"အရှင်ရွှမ်တယ်... ကျွန်တော်မျိုးကို လမ်းညွှန်ပေးပါဦး"

ချန်းရှီက မတတ်သာဘဲ ပြောလိုက်ရသည်။ သူ ဘာလုပ်ရမည်ကို သိသလို၊ လျှိုပေ့လည်း သိသည်။ သို့သော် ဤအချိန်တွင် လျှိုပေ့ကိုသာ ပွင့်ပွင့်လင်းလင်း ပြောခိုင်းလိုက်ခြင်းက ပို၍ ကောင်းမွန်ပေလိမ့်မည်။ မိမိက အရင်ပြောမိလျှင် လှည့်ပြန်ရန် လမ်းရှိတော့မည်မဟုတ်။

"အထွေထွေဗိုလ်ချုပ်ကြီး ကုန်းစွန်းဆီမှာ စစ်ဖက်ဆိုင်ရာ အတွင်းရေးမှူးချုပ် တစ်နေရာ လွတ်နေတာနဲ့ အတော်ပဲ။ ဇီချွမ်ရဲ့ ပါရမီနဲ့ဆိုရင် ဒီရာထူးကို သေချာပေါက် ထမ်းဆောင်နိုင်လိမ့်မယ်လို့ ငါ ယုံကြည်တယ်"

လျှိုပေ့က ပြုံးလျက် ပြောလိုက်သည်။

"အင်း... အရှင်ရွှမ်တယ်ရဲ့ အလေးအနက် ထားမှုကို ကျွန်တော်မျိုး အလွန်ပဲ ကျေးဇူးတင်မိပါတယ်။ စစ်ဖက်ဆိုင်ရာ အတွင်းရေးမှူးချုပ်အဖြစ် တာဝန်ထမ်းဆောင်ဖို့ သဘောတူပါတယ်"

ချန်းရှီက သက်ပြင်းချရင်း ဆိုလိုက်သည်။ သူ၏ အိမ်တွင်းရေးကိစ္စ နှစ်ခုကိုလည်း စီစဉ်ပြီးသား ဖြစ်လိမ့်မည်ဟု သူ တွေးလိုက်သည်။ စစ်တပ်ထဲတွင် အမျိုးသမီးများကို ပေးမဝင်သော်လည်း ဒုံကျွမ်ကို တိုက်ခိုက်သည့် စစ်ပွဲအတွင်း အဌ္ဌာရသ (၁၈) ပါးသော စစ်ပွဲသခင်များနောက်သို့ လိုက်ပါလာသည့် ကချေသည်နှင့် အဆိုတော် အမျိုးသမီးများစွာ ရှိနေသည်။ သေသေချာချာ ဂရုစိုက်နေသရွေ့တော့ ဒါက ကြီးမားသော ပြဿနာတစ်ခု ဖြစ်မလာနိုင်ချေ။

ဤသို့ဖြင့် ချန်းရှီသည် လျှိုပေ့လက်အောက်တွင် အမည်ခံ စစ်ဖက်ဆိုင်ရာ အတွင်းရေးမှူးချုပ်တစ်ဦး ဖြစ်လာခဲ့သည်။ အမှန်အတိုင်းပြောရလျှင် သူသည် ကုန်းစွန်းဆန်နှင့် တစ်ခါမျှပင် မဆုံဖူးဘဲ ရာထူးအမည်တစ်ခုသာ ရရှိထားခြင်း ဖြစ်သည်။ နေ့စဉ် လျှိုပေ့နှင့် စကားစမြည်ပြောရုံမှလွဲ၍ အခြားလုပ်စရာ ဘာမှမရှိချေ။ သို့သော် လျှိုရွှမ်တယ်က သူ့ကို ကြည့်သည့် အကြည့်များမှာ တစ်ရက်ထက်တစ်ရက် ပို၍ စိတ်အားထက်သန်လာသည်မှာ ထင်ရှားလှသည်။ မိမိကိုယ်ကို လျှို၊ ဂွမ်၊ ကျန်း တို့၏ အတွင်းစည်းအသိုင်းအဝိုင်းထဲသို့ သွတ်သွင်းခံလိုက်ရသလိုပင် ခံစားနေရသည်။ အထူးသဖြင့် ဤအချိန်တွင် လျှိုပေ့၌ စစ်ဗျူဟာမှူး ကျန့်ယုံ ပင် မရှိသေးချေ။

အကယ်၍ ချန်းရှီသာ သူ၏ ဗဟုသုတများကို အခြေခံပြီး သုံးပြည်ထောင်ခေတ်ကြီး၏ အနာဂတ် ဖြစ်နိုင်ခြေများကို ရှင်းပြခဲ့မည်ဆိုလျှင် ၎င်းသည် ဗေဒင်ဟောကိန်း ထုတ်နေခြင်းမဟုတ်ဘဲ အကြွင်းမဲ့ သေချာသော အမှန်တရားများကို ပြောပြနေခြင်းသာ ဖြစ်ပေလိမ့်မည်။ ဖြစ်ရပ်များ၏ ရလဒ်များနှင့် ဇာတ်ကောင်များ၏ စရိုက်လက္ခဏာများကို ကြိုတင်သိရှိထားသဖြင့် သူသည် လျှိုပေ့ကို အလွယ်တကူ လွှမ်းမိုးနိုင်သည်။ ထိုပြင် ကျူးခုံမင်း ကိုယ်တိုင် ဤနေရာတွင် ရှိနေလျှင်ပင် ချန်းရှီ၏ ကြီးကျယ်ခမ်းနားလှသော မဟာဗျူဟာမြောက် သုံးသပ်ချက်များကို အံ့ဩမှင်သက်သွားရပေလိမ့်မည်။

လက်ရှိတွင် လျှိုပေ့မှာ ချန်းရှီ သုံးသပ်ပြသော အနာဂတ်အခြေအနေများကြောင့် လုံးဝ တွေဝေ အံ့အားသင့်နေရသည်မှာ သိသာလှသည်။ စနစ်တကျရှိပြီး ခိုင်လုံလှသော သုံးသပ်ချက်များကြောင့် လျှိုပေ့အနေဖြင့် မယုံကြည်ဘဲ မနေနိုင်တော့ချေ။ တကယ့် ပါရမီရှင်တစ်ယောက်ပါတကား။ အသေးစိတ်အချက်အလက်များက အရေးကြီးသော်လည်း ရေရှည်မျှော်မှန်းချက် ရှိခြင်းက ပို၍ပင် အရေးကြီးလှသည်။ ချန်းရှီ၏ ဘက်စုံအခြေအနေအပေါ် သုံးသပ်ချက်များကြောင့် စစ်ဗျူဟာမှူးတစ်ဦး၏ အရေးပါပုံကို လျှိုပေ့ ပိုမို နက်နက်ရှိုင်းရှိုင်း နားလည်သွားခဲ့ရသည်။

ချန်းရှီ ရိုက်သွင်းပေးနေသော အနာဂတ် ဖြစ်ပျက်ပုံများကြောင့် အခြေအနေကို မည်သို့ ကြိုးကိုင်ရမည်ဟူသော တိကျသည့် ညွှန်ကြားချက်များ မပါဝင်သော်လည်း၊ ဦးတည်ချက်တစ်ခု ရှိသွားခြင်းကပင် လှုပ်ရှားရုန်းကန်ရန် အခွင့်အလမ်းများကို သဘာဝအတိုင်း ဖန်တီးပေးပြီးသား ဖြစ်သွားသည်။ လျှိုပေ့သည် မိမိ၏ အနာဂတ် ကြိုးပမ်းအားထုတ်မှုများအတွက် လမ်းစကိုပင် မြင်တွေ့သွားခဲ့ရချေပြီ။

သို့သော် လျှိုပေ့ စိတ်ပျက်ရသည်မှာ ချန်းရှီက သူ၏ အရိပ်အမြွက်ပြမှုများကို လုံးဝ သတိမပြုမိသလို ဟန်ဆောင်နေခြင်းပင်။ လွန်ခဲ့သည့်ရက်က သူ့ကို ဆွမ်းကျူးသို့ ခေါ်ဆောင်လာခဲ့သည့်အတွက် ကျေးဇူးဆပ်သည့်အနေဖြင့် ချန်းရှီက ဤအသိပညာများကို တမင်သက်သက် သင်ကြားပေးနေခြင်း ဖြစ်လိမ့်မည်ဟု လျှိုပေ့ ထင်မှတ်နေသည်။ အနာဂတ်ဖြစ်ရပ်များကို ကြိုတင်ချုပ်ကိုင်နိုင်သည့် ဤစွမ်းရည်သာ မှန်ကန်စွာ အသုံးချနိုင်လျှင် နှစ်အနည်းငယ်အတွင်း သူ့ကို စစ်ပွဲသခင်တစ်ဦးအဖြစ်သို့ မြှင့်တင်ပေးနိုင်မည်မှာ သေချာလှသည်။ သို့သော် ဤဗျူဟာများကို ကြံဆပေးသည့် လူသားကိုယ်တိုင်နှင့်တော့မည်သို့ နှိုင်းယှဉ်နိုင်ပါမည်နည်း။

လက်ရှိ လျှိုပေ့အတွက်တော့ ချန်းရှီ၏ ဘက်စုံအခြေအနေကို အပိုင်ချုပ်ကိုင်နိုင်စွမ်းက အလွန်အမင်း အရေးပါလှသည်။ သူ၏ လမ်းညွှန်မှုရှိလျှင် ဟန်မင်းဆက်ကို ပြန်လည်ထူထောင်ရေး ခရီးစဉ်သည် မြူနှင်းများကြားထဲမှ ပန်းပွင့်ကို လှမ်းကြည့်နေရသကဲ့သို့ ဝေဝေဝါးဝါး ဖြစ်မနေတော့ချေ။ အောင်မြင်မှုဆီသို့ သွားရာလမ်းက သူ့ရှေ့တည့်တည့်တွင် အထင်အရှား ရှိနေပြီ ဖြစ်သည်။ သို့သော် လျှိုပေ့က သူ့ထံတွင် အမှုထမ်းရန် အရိပ်အမြွက် ပြလိုက်တိုင်း ချန်းရှီက လူအုန်းသီးလေးလို ဟန်ဆောင်နေခဲ့သည်။ သူ တကယ်ပဲ နားမလည်တာလား။ — လျှိုပေ့ကတော့ လုံးဝမယုံကြည်ချေ။ ဤမျှ အသိဉာဏ်ကြီးမားသူက ဘယ်လိုလုပ် နားမလည်ဘဲ နေပါ့မည်နည်း။

အခြားတစ်ဖက်တွင်မူ ချန်းရှီသည် လျှိုပေ့၏ ရည်ရွယ်ချက်ကို တကယ်ကို နားမလည်ခဲ့ပေ။ ဖြစ်နိုင်သည်မှာ စကားလုံးများက သိပ်ပြီး သွယ်ဝိုက်လွန်းနေသောကြောင့်ဖြစ်လိမ့်မည်။ ၎င်းအပြင် အနာဂတ်အကြောင်းအရာများကို ဆွေးနွေးနေချိန်တွင် ချန်းရှီကဲ့သို့ လူမျိုးသည် သွယ်ဝိုက်သော အရိပ်အမြွက်များကို သေချာပေါက် မသိတတ်စမြဲဖြစ်သည်။

ကုန်းစွန်းဆန်သည် အခြားသော စစ်ပွဲသခင်များနှင့် နှိုင်းယှဉ်လျှင် နောက်ကျမှ ရောက်ရှိလာခြင်း ဖြစ်ရမည်။ လျှိုပေ့ ရောက်ရှိပြီး ငါးရက်အတွင်း အဌ္ဌာရသ (၁၈) ပါးသော စစ်ပွဲသခင်များ အားလုံး စုံညီစွာ ရောက်ရှိလာကြသည်။

ကုန်းစွန်းဆန်သည် ညီအစ်ကိုကောင်းတစ်ယောက် ဖြစ်သည်ဟုတော့ ပြောရပေမည်။ စရိုက်က အနည်းငယ် ဒုန်းတိဒုန်းချက်နိုင်သော်လည်း လျှိုပေ့အပေါ် အလွန် ကောင်းမွန်ရှာသည်။ ပထမဦးစွာ လျှိုပေ့ကို မျက်နှာပန်းလှစေရန် စစ်ပွဲသခင်များ၏ မဟာမိတ်အဖွဲ့ကြီးထဲသို့ ခေါ်ဆောင်လာခဲ့သည်။ ထို့နောက် လျှိုပေ့တွင် စစ်သည်ရဲမက်နှင့် ဗိုလ်ချုပ်များ မရှိသဖြင့် အစည်းအဝေးပွဲတွင် မျက်နှာငယ်နေမည်ကို စိုးရိမ်သောကြောင့် မိမိ၏ စခန်းဆီသို့ ပြန်မခေါ်ရသေးသော ခြေလျင်တပ်နှင့် မြင်းတပ် စစ်သည်နှစ်ထောင်ကို လျှိုပေ့ထံ ရက်ရက်ရောရော လွှဲပြောင်းပေးအပ်ကာ မျက်နှာပန်းလှအောင် လုပ်ပေးခဲ့သည်။

၎င်းထဲတွင် မြင်းစီးစစ်သည် သုံးရာကျော်ပင် ပါဝင်သေးသည်။ လျှောင်ရှီ မှ သူဌေးကြီး ကုန်းစွန်းဆန်တစ်ယောက်သာ ဤမြင်းများကို အလေးအနက်မထားဘဲ ပေးရဲခြင်း ဖြစ်သည်။ အကယ်၍ အခြား စစ်ပွဲသခင်တစ်ဦးဦးသာဆိုလျှင် အသေးစိတ်အချက်အလက်ကအစ ကပ်စေးနဲနေနိုင်သေးသည်။ ထိုခေတ်အခါက မြင်းဆိုသည်မှာလည်း အလွန်အရေးပါသော မဟာဗျူဟာမြောက် အရင်းအမြစ်တစ်ခု မဟုတ်ပါလား။