အခန်း (၄၂) စစ်သည်ရဲမက်အင်အားရှိသော စစ်သူကြီးသာလျှင် စစ်သူကြီးစစ်စစ် ဖြစ်သည်

"ဒီရန်ကြွေးကို ငါမှတ်ထားမယ်။ တစ်နေ့ကျရင် ဆယ်ဆပြန်ဆပ်စေရမယ်။"

လွီပုသည် နောက်သို့လှည့်မကြည့်ဘဲ အော်ဟစ်လိုက်ရင်း အခြားအရပ်မျက်နှာတစ်ခုသို့ ဒုန်းစိုင်းမောင်းနှင်သွားတော့သည်။ အနီရောင်စစ်မြင်းကို အရှိန်ပြင်းစွာ စီးနင်းသွားခြင်းဖြစ်ရာ တစ်မိနစ်မပြည့်မီအချိန်အတွင်း၌ပင် ပုံရိပ်ငယ်လေးတစ်ခုအဖြစ် ပြောင်းလဲကာ ပျောက်ကွယ်သွားခဲ့သည်။

လွီပု ထွက်ခွာသွားပြီး မကြာမီမှာပင် ရှမားဟိုညီအစ်ကိုနှင့် ချောင်းဟုန်ကို တွဲခေါ်လာသော လ်ောကျင်းတို့သည် ကမူးရှူးတိုး ရောက်ရှိလာကြသည်။ ကွမ်းယု၊ ကျန်းဖေးနှင့် ကျောက်ယွင်တို့ စောင့်ကြပ်နေသည်ကို မြင်လိုက်ရမှသာ သက်ပြင်းချနိုင်ကြတော့သည်။

"ကျေးဇူးတင်ပါတယ် ကွမ်းယု၊ ကျန်းဖေး၊ ကျောက်ယွင်။"

ရှမားညီအစ်ကိုက လက်နှစ်ဖက်ဆုပ်ကာ အရိုအသေပေးရင်း ပြောလိုက်ကြသည်။

"ဒုံကျွမ်နောက်ကို တစ်ကိုယ်တော် လိုက်လံတိုက်ခိုက်နေတဲ့ အရှင်ချောင်း အန္တရာယ်ကြုံတွေ့ရမှာ စိုးရိမ်လို့... ကျွန်တော်တို့ သုံးယောက်ကို အရှင်က ကြိုတင်လွှတ်လိုက်တာပါ။"

ကျောက်ယွင်သည် မိမိအား ကြည့်နေသော ကွမ်းယုနှင့် ကျန်းဖေးတို့ကို မြင်သဖြင့် လက်ဆုပ်လျက် အခြေအနေကို ရှင်းပြလိုက်သည်။

"ခင်ဗျားတို့ လေးယောက်လည်း အရှင်ချောင်းကို ခြံရံပြီး ပင်မတပ်စခန်းကို ဘေးကင်းကင်း ပြန်နိုင်ဖို့အတွက် ကွဲပြားနေတဲ့ စစ်သည်တွေကို အမြန်ဆုံး သွားရောက်စုစည်းသင့်တယ်။ ဒီနေရာက အကြာကြီး နေဖို့မသင့်ဘူး။ ကျွန်တော်တို့ သုံးယောက်လည်း အရှင် ခေါင်းဆောင်တဲ့ တပ်ဖွဲ့ကို ကူညီပြီး ရှီးလျှောင်အထူးမြင်းစီးတပ်ကို ချေမှုန်းရဦးမယ်။"

"ကူညီပေးတဲ့အတွက် အရှင်ရွှမ်တယ်ကို ကျေးဇူးတင်ကြောင်း ပြောပေးပါဦး။"

ချောင်းချောင်းသည် စိတ်ပျက်လက်ပျက် ဖြစ်နေသော်လည်း တည်ငြိမ်မှုကို ထိန်းသိမ်းထားဆဲဖြစ်ကာ သုံးယောက်လုံးကို ဦးညွှတ်အရိုအသေပေးပြီးနောက် ထွက်ခွာသွားခဲ့သည်။

အခြားတစ်ဖက်တွင်မူ ချန်းရှီသည် လွင်ပြင်ကျယ်ကြီးတစ်ခွင် အစီအစဉ်မရှိ တန်းစီနေသော မြင်းစီးတပ်ကို ကြည့်ကာ သက်ပြင်းချမိသည်။

'ဒါက နာမည်ကျော် ရှီးလျှောင်အထူးမြင်းစီးတပ်ပေါ့လေ။ နာမည်ကောင်းရချင်ဇောနဲ့ စစ်ဗျူဟာအစီရင်တွေ ပျက်ပြားတဲ့အထိ လုတိုက်နေကြတာ... ဒါက သေတွင်းတူးနေတာပဲ မဟုတ်လား။'

"ဒါက ရှီးလျှောင်အထူးမြင်းစီးတပ် ဟုတ်ရဲ့လား။"

ချန်းရှီက ဟွာရှုံကို လှမ်းမေးလိုက်သည်။

"အဲဒီကောင်စုတ် လွီပုက ဒါကို တမင်တကာ လုပ်တာပဲ။ သူ ဘယ်တုန်းက ပင်းကျိုးဝံပုလွေမြင်းစီးတပ်ကို ဒီလိုမျိုး ဦးဆောင်ဖူးလို့လဲ။"

ဟွာရှုံက ဒေါသတကြီး ဆဲရေးတိုင်းထွာလိုက်သည်။

ချန်းရှီသည် ပခုံးတွန့်ပြရုံသာ တုံ့ပြန်ပြီး ဘာမှမပြောတော့ပေ။ ယခုကမ္ဘာသို့ ရောက်ရှိလာခဲ့သည်မှာ ကြာပြီဖြစ်၍ အချက်တစ်ခုကိုမူ သူ သေသေချာချာ နားလည်ထားသည်။ ဤကမ္ဘာတွင် ထူးချွန်ပြောင်မြောက်သော ပါရမီရှင်များ ရှိသည်မှာ အမှန်ပင်ဖြစ်သော်လည်း သာမန်လူတန်းစားများက ပို၍များပြားလှသည်။ စားစရာပင် ဝဝလင်လင်မရှိသော အခြေအနေတွင် အစားအစာမှတစ်ဆင့် စွမ်းအင်များ ရရှိလိမ့်မည်ဟု မျှော်လင့်နေခြင်းမှာ ရယ်စရာပင် ကောင်းလှပေသည်။

ထို့ကြောင့် ဤကမ္ဘာရှိ သာမန်လူများ၏ ရုပ်ပိုင်းဆိုင်ရာ ကြံ့ခိုင်မှုသည် သန်မာသည်ဟု ဆိုနိုင်သော်လည်း နောင်အနာဂတ်ခေတ်မှ အထူးကွန်မန်ဒိုတပ်ဖွဲ့ဝင်များ၏ ကြံ့ခိုင်မှုအဆင့်ကိုသာ မီရုံမျှရှိသည်။ ကိုယ်တွင်းအသက်ရှုဓာတ် အနေဖြင့်မူ မရှိသလောက်ပင် ရှားပါးလှသော်လည်း ကံကောင်းသည်မှာ အလားအလာ ကောင်းမွန်ကြခြင်းပင် ဖြစ်သည်။ စနစ်တကျ လေ့ကျင့်ပေးပြီး ဝဝလင်လင် ကျွေးမွေးထားပါက ကိုယ်တွင်းအသက်ရှုဓာတ်ကို အနည်းငယ် မျှလောက်တော့ ပျိုးထောင်နိုင်ပေသည်။

သို့သော်လည်း ဤကိုယ်တွင်းအသက်ရှုဓာတ် အနည်းငယ်မျှသည် အသုံးမဝင်လှပေ။ ယခင်ကထက် အနည်းငယ် ပိုမိုသန်မာလာစေရုံသာ ရှိပြီး ကွမ်းယု၊ ကျန်းဖေးနှင့် ကျောက်ယွင်တို့ကဲ့သို့သော လူများနှင့် ရင်ဆိုင်ရပါက မည်သို့မျှ အရာထင်မည်မဟုတ်ပေ။

ဤသို့ တွေးကြည့်မည်ဆိုလျှင် လူဦးရေ မည်မျှပင် များပြားစေကာမူ ထိပ်တန်းစစ်သူကြီးတစ်ဦးလောက် အရေးမပါဟု ထင်မှတ်စရာရှိသည်။ သို့သော် ၎င်းက အလွန်ကြီးမားသော အမှားတစ်ခု ဖြစ်ပေလိမ့်မည်။ အဘယ်ကြောင့်ဆိုသော် စစ်သည်များ စစ်ခင်းကြသောအခါ ၎င်းတို့၏ ချီစွမ်းအင်များသည် တစ်သားတည်း ပေါင်းစည်းသွားပြီး ပြင်ပမှ လွင့်ပြယ်နေသော ချီစွမ်းအင်များကို ချေဖျက်ပစ်နိုင်သောကြောင့် ဖြစ်သည်။ ဆိုလိုသည်မှာ စစ်ဗျူဟာအစီရင်များကို ထိန်းသိမ်းထားနိုင်ခြင်းဖြင့် စစ်သည်တော်များသည် စစ်သူကြီးများကို ရင်ဆိုင်ရာတွင် အားနည်းချက် သိပ်မရှိနိုင်တော့ဘဲ အသက်စွန့် တိုက်ခိုက်မည်ဆိုပါက စစ်သူကြီးတစ်ဦးကိုပင် သတ်ဖြတ်နိုင်စွမ်း ရှိသွားကြသည်။

ထို့ကြောင့် စစ်တပ်တစ်ခုအတွက် စစ်ဗျူဟာအစီရင်များသည် အလွန်အရေးကြီးလှပေသည်။ အကယ်၍ ၎င်းတို့သည် ဝက်အုပ်များကဲ့သို့ ဖရိုဖရဲ ဝင်ရောက်တိုက်ခိုက်ကြမည်ဆိုပါက စစ်သည် သောင်းပေါင်းများစွာ ရှိနေပါစေဦးတော့ စနစ်တကျရှိသော စစ်သည်အနည်းငယ်၏ ချေမှုန်းခြင်းကို ခံရမည်သာ ဖြစ်သည်။

လက်ရှိအခြေအနေမှာမူ ရှီးလျှောင်အထူးမြင်းစီးတပ်သည် ၎င်းတို့၏ ကောင်းမွန်လှသော လှံဖျားစစ်ဗျူဟာအစီရင်ကို ဖရိုဖရဲနှင့် အဆမတန် ရှည်လျားသော ပုံစံအဖြစ် ပြောင်းလဲလိုက်မိသဖြင့် ယခင်က ရှိခဲ့ဖူးသော အရှိန်အဟုန်များ ဆုံးရှုံးသွားခဲ့ရသည်။ ၎င်းတို့၏ ခေါင်းပေါ်ရှိ ချီစွမ်းအင်များသည်လည်း ဖရိုဖရဲ ဖြစ်လာကာ တစ်စစချင်း ပျောက်ကွယ်နေပြီ ဖြစ်သည်။

ဒါက ကမ္ဘာပေါ်မှာ အကောင်းဆုံးဆိုတဲ့ အထူးတပ်ဖွဲ့ တကယ်ပဲ ဟုတ်ရဲ့လား။ ဘာလို့ မြင်းဖြူတပ်သားတွေထက် အဆပေါင်းများစွာ ညံ့ဖျင်းနေရတာလဲ။

ကွမ်းယု၊ ကျန်းဖေးနှင့် ကျောက်ယွင်တို့သည် သိပ်မကြာခင်မှာပင် ပြန်လည်ရောက်ရှိလာကြသည်။ ရှီးလျှောင်အထူးမြင်းစီးတပ်သည် လုံးဝဥဿုံ ဖရိုဖရဲ ဖြစ်နေပြီဖြစ်ရာ ဖမ်းဆီးရန် အသင့်ဖြစ်နေပြီ ဖြစ်သည်။

"ကျောက်ယွင်... မင်းရဲ့ မြင်းဖြူတပ်သားတွေကို ဦးဆောင်ပြီး ဒီလူအုပ်စုကို သင်ခန်းစာတစ်ခု ပေးလိုက်စမ်း။"

ချန်းရှီက ထိုကဲ့သို့သော အမှိုက်များကို ကွပ်ကဲနေရသည့်အတွက် အနည်းငယ် ရှက်ရွံ့မိသဖြင့် ဒေါသတကြီး အမိန့်ပေးလိုက်သည်။

"ကွမ်းယု… စစ်သည်တွေကို ဦးဆောင်ပြီး သူတို့ရဲ့ ဗဟိုတပ်ကို တိုက်ခိုက်ပါ။ ကျန်းဖေး… မင်းရဲ့ စစ်သည်တွေကို ခေါ်ပြီး ရှေ့ပြေးတပ်ကို ပိတ်ဆို့ထား။ ရှီးလျှောင်အထူးမြင်းစီးတပ် တစ်ခုလုံးကို ငါတို့ ဝါးမြိုပစ်မယ်။"

ချန်းရှီသည် စိတ်လှုပ်ရှားစွာဖြင့် စစ်ရေးပြင်ဆင်လိုက်ပြီးနောက် -

"ဟွာရှုံ... မင်း အဆင်သင့်ပြင်ထားပါ။ အခြေအနေကို ထိန်းချုပ်နိုင်ပြီလို့ မင်းထင်တဲ့အချိန်ကျရင် ချက်ချင်း လှုပ်ရှားတော့။ မဟုတ်ရင် ငါ တိုက်ခိုက်နေတာကိုရပ်ဖို့အမိန့်ပေးမှာမဟုတ်ဘူး။”

ကျောက်ယွင်သည် မြင်းဖြူတပ်သား တစ်ထောင်သုံးရာကို ဦးဆောင်ကာ မြင်းပေါ်သို့ တက်လိုက်ကြသည်။ ထို့နောက် တပ်ဖွဲ့၏အထက်တွင် မြင်တွေ့နိုင်သော ဖြူလွလွ တိမ်တိုက်ချီစွမ်းအင်တစ်ခု ထွက်ပေါ်လာခဲ့သည်။ ကျောက်ယွင်၏ ချီစွမ်းအင်ကို ဗဟိုပြု၍ ၎င်းသည် လျင်မြန်စွာ ပေါင်းစည်းသွားပြီး တိုက်ခိုက်မှု မစတင်မီမှာပင် တစ်တပ်လုံးသည် တစ်သားတည်း ဖြစ်သွားခဲ့တော့သည်။

"မြင်းဖြူတပ်သားတို့။"

ကျောက်ယွင်သည် သူ၏ ငွေရောင်လှံရှည်ဖြင့် သူ၏ဦးထုပ်ဆောင်းကို အသာအယာ ပုတ်လိုက်ပြီးနောက် ရှီးလျှောင်အထူးမြင်းစီးတပ်ဆီသို့ ဦးဆောင်ကာ စတင်ထိုးဖောက် တိုက်ခိုက်လေတော့သည်။

"သတ်ကြဟေ့။"

ကွမ်းယုနှင့် ကျန်းဖေးတို့သည်လည်း ဒေါသတကြီး ကြုံးဝါးလိုက်ကြရင်း မိမိတို့၏ စစ်သည်များကို ခေါ်ဆောင်ကာ တိုက်ပွဲထဲသို့ ဝင်ရောက်သွားကြသည်။ ၎င်းတို့တစ်ဦးစီ၏ ခေါင်းပေါ်တွင် စိမ်းဖျော့ဖျော့ အလင်းတန်းတစ်ခုနှင့် နက်မှောင်သော အလင်းတန်းတစ်ခုတို့ ထွက်ပေါ်လာကာ တစ်တပ်လုံးကို လွှမ်းခြုံထားသည်။

"ဝုန်း။"

ကွမ်းယုသည် အလွန်ပင် သက်သာချောင်ချိစွာ အားစိုက်ထုတ် တိုက်ခိုက်လိုက်သော်လည်း ယခင်က အားကုန်သုံး၍ တိုက်ခိုက်ခဲ့သော စွမ်းအားမျိုးနှင့် ညီမျှနေသည်။ စိမ်းလန်းသော အလင်းတန်းသည် ရှီးလျှောင်အထူးမြင်းစီးတပ်ကို ရက်ရက်စက်စက် ဖြတ်တောက်ခြေမှုန်းသွားခဲ့သည်။

"ဒါက စစ်သူကြီးတစ်ယောက်ရဲ့ အဓိပ္ပာယ်ပဲ။ စစ်သည်မရှိတဲ့ စစ်သူကြီးတစ်ယောက်ဟာ အားနည်းတဲ့ သာမန်လူတစ်ယောက်ထက် မပိုဘူး။"

ချန်းရှီသည် ကွမ်းယု၊ ကျန်းဖေးနှင့် ကျောက်ယွင်တို့၏ တိုက်ကွက်များကို ကြည့်ကာ စိတ်လှုပ်ရှားမှုကို မထိန်းနိုင်ဘဲ ရေရွတ်မိသည်။

စစ်သည်များ၏ အင်အားဖြည့်တင်းမှုကြောင့် စစ်သူကြီးတစ်ဦး၏ စွမ်းပကားသည် အဆမတန် တိုးတက်လာနိုင်သည်။ ထို့အတူ မိမိတို့ ထိန်းချုပ်နိုင်စွမ်းရှိသော အတိုင်းအတာအတွင်း စစ်သည်အရေအတွက် ပိုမိုများပြားလေလေ၊ ပိုမိုသန်မာလာလေလေ ဖြစ်သည်။ သို့သော်လည်း ထိုအတိုင်းအတာကို ကျော်လွန်သွားပါက ဝန်ထုပ်ဝန်ပိုး ဖြစ်လာတတ်ပြီး ပိုမိုသန်မာမလာသည့်အပြင် စစ်ဗျူဟာအစီရင်များကို ပျက်ပြားစေကာ ကွပ်ကဲမှု အားနည်းချက်ကြောင့် တစ်တပ်လုံး၏ အင်အားကိုပါ ကျဆင်းစေတတ်သည်။

တိုက်ကွက် သုံးကွက်အပြီးတွင် ရှီးလျှောင်အထူးမြင်းစီးတပ်သည် လုံးဝ ဝေခွဲမရ ဖြစ်သွားခဲ့ရသည်။ အကယ်၍ စစ်ဗျူဟာအစီရင်သာ ရှိနေသေးပါက ထိုတိုက်ကွက် သုံးကွက်ကြောင့် အလွန်ဆုံး လူတစ်ရာကျော်ခန့်သာ သေဆုံးနိုင်မည် ဖြစ်သည်။ သို့သော် ယခုမူ စစ်ဗျူဟာအစီရင် ပျက်ပြားနေပြီး ပျက်စီးဆုံးရှုံးမှုများကို ခွဲဝေခံယူပေးမည့် စုပေါင်းချီစွမ်းအင်လည်း မရှိတော့ပေ။ ကွမ်းယု၊ ကျန်းဖေးနှင့် ကျောက်ယွင်တို့သည် လူစုလူဝေး ထူထပ်သောနေရာများကို တမင်တကာ ရှောင်ကွင်းတိုက်ခိုက်ခဲ့သော်လည်း သေဆုံးသူ အရေအတွက်မှာ သုံးရာကျော်သွားခဲ့ပြီ ဖြစ်သည်။

"အားလုံးပဲ... လက်နက်တွေ ချလိုက်ကြစမ်း။"

ဟွာရှုံသည် လည်ဆံမွေး ဝါကျင်ကျင်ရှိသော မြင်းကို စီးနင်းကာ လူအုပ်ထဲမှ ခုန်ထွက်လာပြီး ကျယ်လောင်စွာ အော်ဟစ်လိုက်သည်။

"ငါက ဟွာရှုံပဲ။ အခြေအနေကို သိတဲ့ကောင်တွေ ငါ့အတွက် လက်နက်တွေ အမြန်ချကြ။ မင်းတို့အဖြစ်ကိုလည်း ကြည့်ကြဦး... ရယ်စရာကြီး။ ငါ ဒီမှာ ရှိနေတာတောင် မင်းတို့ ဘာဖြစ်သွားလဲ ကြည့်ဦး။ တောက်... စစ်ဗျူဟာအစီရင်တောင် ပျက်နေပြီ၊ သေချင်နေကြတာလား။ တောက် အားလုံး လက်နက်ချကြ၊ အားလုံး လက်နက်ချ။"

ဟွာရှုံ၏ အော်ဟစ်သံသည် မိမိ၏ နယ်ခံစစ်သည်များနှင့် စကားပြောနေခြင်းဖြစ်၍ နယ်သံဝဲဝဲဖြင့် ဆဲဆိုသံများအဖြစ်သို့ ပြောင်းလဲသွားသည်။

၎င်းတို့ကို ဆဲဆိုကြိမ်းမောင်းပြီးနောက် ရှီးလျှောင်အထူးမြင်းစီးတပ်သည် တစ်ခဲနက် လက်နက်ချကြတော့သည်။ ၎င်းတို့၏ စစ်သေနာပတိချုပ် ဖြစ်သော လွီပုလည်း မရှိတော့ဘဲ စစ်သည်များမှာလည်း လုံးဝ ဝေခွဲမရ ဖြစ်နေကြသည်။ ထို့ပြင် ရှီးလျှောင်၏ နံပါတ်တစ် အာဇာနည်စစ်သူကြီးဟောင်းနှင့် ယခင် တိုက်ရိုက်အထက်လူကြီး ဖြစ်ခဲ့ဖူးသော ဟွာရှုံကိုယ်တိုင်က လက်နက်ချရန် တောင်းဆိုနေခြင်းကြောင့် ဦးဆောင်သူတစ်ဦး၏ စကားနောက်သို့ စစ်သည်အားလုံး လိုက်နာရုံသာ ရှိတော့သည်။ အဆုံးစွန်၌မူ ၎င်းတို့အတွက် မည်သည့်နေရာတွင် စစ်မှုထမ်းပြီး ထမင်းစားရသည်က အရေးမကြီးလှပေ။ အကယ်၍ မနာခံဘဲ အသတ်ခံရလျှင် အားလုံး ပြီးဆုံးသွားမည် မဟုတ်ပါလား။

"ဟေးဝါး... မင်းက အရူးလား။"

ဟွာရှုံသည် ရှေ့သို့တက်ကာ ဦးဆောင်လာသော စစ်ဗိုလ်ကို ပါးရိုက်ချလိုက်ရာ ထိုလူမှာ မြင်းပေါ်မှ လွင့်စဉ်ကျသွားတော့သည်။ ထို့နောက် သူ့ကို ဆက်တိုက် ကန်ကျောက်ရင်း -

"ငါ မင်းကို အဲဒီတုန်းက ဘာတွေ သင်ပေးခဲ့လဲ၊ ခွေးကောင်ရဲ့။ အကုန်မေ့သွားပြီလား။ အာကော်... မင်းလည်း အတူတူပဲ။ သေချင်နေတာလား။ စစ်ဗျူဟာအစီရင် ပျက်နေတာတောင် ဇွတ်လိုက်နေသေးတယ်။ သေတွင်းရှာပြီး လူပြန်ဝင်စားချင်နေတာလားဟမ်။"

အရိုက်ခံရသော စစ်ဗိုလ်များထဲမှ မည်သူမျှ ပြန်လည်ခုခံရန် မဝံ့ရဲကြဘဲ ဟွာရှုံ၏ အရိုက်အနှက်ကို ငြိမ်ခံနေကြသည်။

"ထကြစမ်း... အရှင်ရွှမ်တယ်နဲ့ တွေ့ဖို့ ငါ့နောက်ကို လိုက်ခဲ့ကြ။ ငါ ဒုံကျွမ်နောက်ကို ဆက်မလိုက်တော့ဘူး။ မင်းတို့ကော ဘယ်လိုလဲ။"

"ကျွန်တော်တို့ စစ်သူကြီးရဲ့ အမိန့်အတိုင်း လိုက်နာပါ့မယ်။"

စစ်ဗိုလ်များက ပျာပျာသလဲ ပြန်လည်ဖြေကြားခဲ့ကြသည်။

"သွားကြစို့။ ဒုံကျွမ်ဟာ ရှီးလျှောင်တုန်းက ငါတို့နဲ့ အတူတူ အရက်သောက်ဖူးတဲ့ စစ်သေနာပတိ မဟုတ်တော့ဘူး။ ငါတို့ သူ့အတွက် အသက်စွန့်စရာ မလိုတော့ဘူး။ ဒီနှစ်တွေထဲမှာ သူ့အပေါ် အကြွေးတင်သမျှကို ငါတို့ ပြန်ဆပ်ပြီးသွားပြီ။ အလွန်ဆုံးတော့ နောင်တစ်ချိန် စစ်မြေပြင်မှာ သူ့နဲ့ ရင်ဆိုင်ရရင် ငါတို့ ဝေးဝေးကပဲ ရှောင်သွားကြတာပေါ့။"

ဟွာရှုံက စစ်ဗိုလ်များကို တွဲထူပေးရင်း ပြောလိုက်သည်။

"အရှင်... ဒီလူတွေက တစ်ချိန်က ကျွန်တော့်ရဲ့ လက်အောက်ခံ စစ်ဗိုလ်တွေပါ။ အခု ရောက်လာတဲ့ ရှီးလျှောင်အထူးမြင်းစီးတပ်ထဲက အချို့ကလည်း အရင်က ကျွန်တော့်ရဲ့ ကိုယ်ရံတော်တပ်ဖွဲ့ဝင်တွေ ဖြစ်ခဲ့ကြဖူးပါတယ်။"

ဟွာရှုံသည် လျှိုပေ့ကို အရိုအသေပေးလိုက်ရင်း -

"သူတို့ရဲ့ စွမ်းဆောင်ရည်က အခုပြသခဲ့တဲ့အတိုင်း မဟုတ်ပါဘူး။ သူတို့ကို နောက်ထပ် အခွင့်အရေးတစ်ခုလောက် ပေးသနားတော်မူပါ အရှင်။"

"ဟွာရှုံ စိတ်အေးအေးထားပါ။ မင်းရဲ့ လက်အောက်ငယ်သားတွေ အခုလို ရှုံးနိမ့်ခဲ့ရတာဟာ လွီပုရဲ့ အောင်မြင်မှုကို လောဘကြီးခဲ့တဲ့ စိတ်ကြောင့်ပဲ ဖြစ်တယ်။ ဒါဟာ သူတို့နဲ့ ဘာမှမဆိုင်ပါဘူး။ စစ်သူကြီးရဲ့ အမိန့်ကို ပေးထားတာပဲ၊ ဒီလူတွေက ဘယ်လိုလုပ်ပြီး မနာခံဘဲ နေဝံ့မှာလဲ။"

လျှိုပေ့က ပြုံးလျက် ထိုကိစ္စကို စိတ်ထဲမထားကြောင်း ပြသလိုက်လေသည်။