အခန်း (၄၀) နှစ်ပေါင်းထောင်ချီ စုစည်းလာခဲ့သော ဉာဏ်ပညာ
... “အရှင်ရွှမ်တယ်... အရှင်တိုက်ခိုက်ရေးအင်အားက နည်းနည်းနည်းမနေဘူးလား” ချန်းရှီက နောက်ပြောင်ကျီစယ်သော လေသံဖြင့် ပြောလိုက်သည် ။ “လက်ရှိကမ္ဘာပေါ်မှာ ဘယ်တပ်က အသန်မာဆုံး အထူးတပ်လဲဆိုတာ ကျွန်တော်တို့အားလုံး သိကြတာပဲ။ သူတစ်ပါးရဲ့ အင်အားကို ငှားရမ်းနေမယ့်အစား ကိုယ့်အင်အားကိုယ် တောင့်တင်းအောင် လုပ်တာက ပိုမိုကောင်းမွန်ပါလိမ့်မယ်”
“ဒါပေမဲ့လည်း ငါတို့က အမြစ်မရှိတဲ့ သစ်ပင်တစ်ပင်လို ဖြစ်နေတာပဲလေ။ ဒီလောက်အင်အားရှိတာတောင် ကောင်းကင်ဘုံက သနားညှာတာလို့ပဲ။ ဇီချွမ် ပြောချင်တာက ကမ္ဘာပေါ်မှာ အသန်မာဆုံး အထူးတပ်ဆိုတာ ရှီးလျှောင်အထူးမြင်းစီးတပ်ကို ဆိုလိုတာလား” လျှိုပေ့၏ မျက်ဝန်းများတွင် အရောင်အဝါများ လင်းလက်သွားသည် ။
“မှန်ပါတယ်... ဒါက အရှင်တိုက်ခိုက်ဖို့အတွက် ကျွန်တော် ပြင်ဆင်ပေးထားတဲ့ လက်ဆောင်ပဲ။ အခုအချိန်က ဒီနေရာကနေ ထွက်ခွာရမယ့်အချိန်ပဲ၊ သွားရင်းနဲ့ သူတို့ကိုပါ တစ်ပါတည်း သိမ်းပိုက်ခေါ်ဆောင်သွားရမယ်။ အကယ်၍ ဟွာရှုံအနေနဲ့ ရှီးလျှောင်ရဲ့ ထိပ်သီးစစ်သည်တော်တစ်ဦးရဲ့ ကွပ်ကဲမှုစွမ်းရည်ကို ပြသနိုင်မယ်ဆိုရင် ဒီတစ်ကြိမ်မှာ ရှီးလျှောင်အထူးမြင်းစီးတပ် အင်အားတစ်သောင်းလောက်ကို သိမ်းသွင်းဖို့ ပြဿနာရှိမယ်မထင်ဘူး” ချန်းရှီက ရယ်မောရင်း ဟွာရှုံကို လက်ဟန်ခြေဟန်ဖြင့် အချက်ပြလိုက်သည် ။ “အခုတော့ အားလုံးက မင်းအပေါ်မှာပဲ မူတည်တော့တယ်နော်။ မင်းက ရှီးလျှောင်မှာ နေခဲ့တာ ကြာပြီပဲ။ မင်းမှာ လုံလောက်တဲ့ ကျော်ကြားမှုရှိရင် ရှေ့ဆက်ရမယ့်လမ်းက အများကြီး ပိုလွယ်ကူသွားလိမ့်မယ်”
“လွီပု မရောက်ခင်တုန်းက ရှီးလျှောင်ရဲ့ ထိပ်သီးစစ်ဗိုလ်ချုပ်က ငါပဲ၊ သူ ရောက်လာပြီးတဲ့နောက်မှာလည်း ငါက ထိပ်သီးပဲ။ သူကတော့ စစ်နတ်ဘုရားပေါ့... ဘယ်သူမှ မယှဉ်နိုင်တဲ့ စစ်နတ်ဘုရား” ဟွာရှုံက ခါးသက်သက် အပြုံးဖြင့် ပြောလိုက်သည် ။ သူ၏ ကျော်ကြားမှုကို အသုံးပြုပြီး ရှီးလျှောင်အထူးမြင်းစီးတပ်ကြားမှာ စည်းရုံးလှုံ့ဆော်ရုံသက်သက်ဆိုလျှင် ပြဿနာမရှိနိုင်ကြောင်း ပြသလိုက်ခြင်းပင် ဖြစ်သည် ။ “ဒါပေမဲ့ ဇီချွမ်... မင်းက ရှီးလျှောင်အထူးမြင်းစီးတပ် အများကြီးကို ဖမ်းဆီးနိုင်ဖို့ ဒီလောက်တောင် ယုံကြည်မှု ရှိနေတာလား။ သူတို့က ကမ္ဘာပေါ်မှာ အသန်မာဆုံးတပ်လို့ သတ်မှတ်ခံထားရတာကို မင်းသိသင့်တယ်”
“ဒါက ဘာမှမဟုတ်ပါဘူး။ ကျွန်တော်တို့က အဲဒီကို သွားပြီးတော့ လွှဲပြောင်းယူရုံသက်သက်ပါပဲ။ ရှီးလျှောင်အထူးမြင်းစီးတပ်ရဲ့ နောက်တန်းကို အကာအကွယ်ပေးမယ့်သူက လွီပု ဖြစ်ဖို့ ရာခိုင်နှုန်းများတယ်၊ ပြီးတော့ သူက ချောင်းချောင်းကို အနိုင်တိုက်ပြီးခါစ ဖြစ်လိမ့်မယ်။ အခုအချိန်က သူ့စိတ်ထဲမှာ သံသယတွေ အများဆုံး ဖြစ်နေမယ့် အချိန်ပဲ။ ကျွန်တော်တို့ ရောက်လာတာကို မြင်ရင် သူ့ခေါင်းထဲကို ပထမဆုံး ဝင်လာမှာက ကျွန်တော် ရေးလိုက်တဲ့ စာထဲက စကားလုံးတွေပဲ၊ အဲဒီအခါ သူက နောက်လှည့်ပြီး ထွက်သွားလိမ့်မယ်။ ကျန်တာကတော့ မင်းအပေါ်မှာပဲ မူတည်တယ်” ချန်းရှီက ဂရုမစိုက်ဟန်ဖြင့် ပြောလိုက်သည် ။
လူစုလူဝေး၏ မျက်နှာတွင် ဇဝေဇဝါ ဖြစ်နေသည်ကို မြင်သောအခါ ချန်းရှီက အကြောင်းအရင်းကို ဖြည်းဖြည်းချင်း ရှင်းပြလိုက်သည် ။ “ကျွန်တော် လွီပုဆီ ရေးလိုက်တဲ့စာက သူ့ကို စည်းရုံးဖို့ ရေးတာမဟုတ်ဘူး။ ကျွန်တော်က လွီပုရဲ့ ကျေးဇူးကို ခံစားခဲ့ဖူးတဲ့ ပင်းကျိုးသားတစ်ယောက်အနေနဲ့ သူ့ကို အရိပ်အမြွက် တချို့ ပေးခဲ့တာ။ လီရူးက သူ့ကို တော်ဝင်ဂူသင်္ချိုင်းတွေကို လုယက်ခိုင်းလိမ့်မယ်၊ ဒါက သူ့ကို ဘယ်လို ထိခိုက်စေနိုင်တယ်၊ နောက်ပြီး လော့ယန်ကို မီးရှို့လိမ့်မယ်ဆိုတာတွေကို သတိပေးခဲ့ပြီး မဟာမိတ်တပ်တွေကို နောက်ကနေ ခြုံခိုတိုက်ခိုက်ဖို့ အကြံပြုခဲ့တာ”
“အင်... ဇီချွမ်... ဒါက လွီပုအတွက် စစ်ဗျူဟာ ခင်းကျင်းပေးလိုက်တာ မဟုတ်ဘူးလား” လျှိုပေ့က နားမလည်နိုင်ဘဲ မေးလိုက်သည် ။
“မဟုတ်ပါဘူး။ ဒါက လွီပုရဲ့ ယုံကြည်မှုကို ရအောင်ယူပြီး အခြေအနေကို ပိုနားလည်သွားအောင် ဘေးကနေ အရိပ်အမြွက် ပြလိုက်တာပဲ။ ဘာပဲဖြစ်ဖြစ် လီရူးက သူ့ကို မဟာမိတ်တပ်တွေကို ခြုံခိုတိုက်ဖို့ ညွှန်ကြားမှာပဲလေ။ ဒါပေမဲ့ ကျွန်တော်က တမင်တကာ အရိပ်အမြွက် ပေးလိုက်တာ။ လီရူးက ခြုံခိုတိုက်ဖို့ပဲ ပြောလိမ့်မယ်၊ နောက်ကနေ လိုက်လံတိုက်ခိုက်ရမယ့် အကြိမ်ရေကို ပြောမှာမဟုတ်ဘူး၊ ပြီးတော့ ပထမဆုံး လိုက်လံတိုက်ခိုက်မှုက မဟာမိတ်တပ်တွေရဲ့ အစာကျွေးတဲ့ ထောင်ချောက် ဖြစ်နိုင်တယ်လို့ ရေးလိုက်တယ်။ အကယ်၍ သူက နက်နက်ရှိုင်းရှိုင်း လိုက်လံတိုက်ခိုက်မိရင် သူကိုယ်တိုင် ခြုံခိုတိုက်ခိုက်ခံရပြီး ကိုယ့်ထောင်ချောက်ထဲကိုယ် ပြန်ပိတ်မိသွားနိုင်တယ်လို့ သတိပေးခဲ့တာ” ချန်းရှီက အေးအေးလူလူ ဆိုသည် ။
“ဇီချွမ်... မင်း ဒီလိုလုပ်လိုက်ရင် လွီပုက ဒုတိယအကြိမ် ခြုံခိုတိုက်ခိုက်ဖို့ကိုကောအကွက်မဆင်လောက်ဘူးလား” ကျောက်ယွင်က မျက်မှောင်ကုပ်လျက် မေးလိုက်သည် ။
“လွီပုမှာ အဲဒီအတွက် အချိန်မရှိပါဘူး။ ပြီးတော့ သူက သူ့ကိုယ်သူ အန္တရာယ်ထဲ ဘယ်တော့မှ တွန်းမပို့ဘူး။ ကျွန်တော် အရင်က ပြောခဲ့တာတွေအားလုံးက အမှန်တွေချည်းပဲ။ လွီပုက နောက်ဆုံး အရိပ်အမြွက်ကို သေချာပေါက် အာရုံစိုက်လိမ့်မယ်၊ အထူးသဖြင့် သူနဲ့ယှဉ်တိုက်နိုင်တဲ့ ကွမ်းယု၊ ကျန်းဖေးနဲ့ ကျောက်ယွင်တို့အားလုံး ရှိနေတာကို မြင်ရင် သူက နောက်လှည့်ပြီး ထွက်သွားဖို့ ဝေခွဲမနေတော့ဘူး။ သူ့အောက်က ရှီးလျှောင်စစ်သည်တွေအတွက်တော့ သူက လုံးဝ ဂရုစိုက်မှာ မဟုတ်ဘူး၊ အဲဒီတပ်က ပင်းကျိုးတပ် မဟုတ်သရွေ့ပေါ့။ ဒါကိုတော့ ဗိုလ်ချုပ်ဟွာနဲ့ ကျွန်တော် အတည်ပြုပြီးပြီ” ချန်းရှီက ကျောက်ယွင်ကို ပြုံးပြရင်း ရှင်းပြလိုက်သည် ။ သူက ဤကိစ္စရပ်များတွင် အလွန် ကျွမ်းကျင်လှသည် ။
“ဒါ အမှန်ပဲ” ဟွာရှုံက ခါးသက်သက် ပြုံးရင်း ပြောလိုက်သည် ။ “ပင်းကျိုး ဇာတိသားတွေကလွဲရင် လွီပုက ရှီးလျှောင်စစ်သည်တွေရဲ့ အသေအပျောက်ကို ဘယ်တုန်းကမှ ဂရုမစိုက်ခဲ့ဘူး။ ဒါကြောင့်လည်း ပင်းကျိုးဝံပုလွေမြင်းစီးတပ်နဲ့ ရှီးလျှောင်အထူးမြင်းစီးတပ်က အခုထက်ထိ တစ်ဖက်နဲ့တစ်ဖက် အဆင်မပြေဘဲ ဖြစ်နေကြတာ”
“ဇီချွမ်က တကယ်ကို ထူးခြားပြောင်မြောက်တဲ့ ပါရမီရှင်ပဲ” လျှိုပေ့က ချန်းရှီကို ကြည့်ကာ ဝမ်းသာအားရ ချီးမွမ်းလိုက်သည် ။
“ဒီလိုလည်း မဟုတ်ပါဘူး” ချန်းရှီက လက်နှစ်ဖက်ကို ဖြန့်ကာ သက်ပြင်းချဟန်ဖြင့် ပြောလိုက်သည် ။ “ဒီကိစ္စပြီးရင် လွီပု၊ ဒုံကျွမ်နဲ့ လီရူးတို့ကြားက ဆက်ဆံရေးက အရင်လို ကောင်းတော့မှာ မဟုတ်ဘူး။ သူက လီရူးနဲ့ ဒုံကျွမ်တို့က သူ့ကို ဖယ်ရှားချင်နေတာလို့ အမြဲတမ်း သံသယဝင်နေလိမ့်မယ်။ ဒီဆူးက တစ်ဖက်ဖက်က မလဲမချင်း သူ့စိတ်ထဲမှာ စူးနေတော့မှာ။ ဒါပေမဲ့ ကျွန်တော်ကတော့ ဒုံကျွမ်ကို အထင်မကြီးဘူး၊ သူ့မှာ အရင်ကလို ရည်မှန်းချက်တွေ မရှိတော့ဘူး၊ ရည်မှန်းချက်မရှိတဲ့ ဒုံကျွမ်ကို လီရူးက ဆက်ပြီး ကူညီချင်တော့မယ်မထင်ဘူး”
“ရက်စက်လိုက်တာ” ကွမ်းယုနှင့် ကျန်းဖေးက တစ်ပြိုင်နက်တည်း ပြောလိုက်ကြသည် ။
“ရက်စက်တာ ဘာမှမရှိပါဘူး။ ကျွန်တော် ဘယ်သူ့ကိုမှလည်း မသတ်ခဲ့ဘူး၊ သူတို့ကိုလည်း အချင်းချင်း သတ်ဖို့ မခိုင်းခဲ့ဘူး။ ကျွန်တော် ပြောခဲ့တာတွေအားလုံးက အမှန်တရားတွေချည်းပဲ၊ တစ်လုံးမှ မလိမ်ထားဘူး” ချန်းရှီက မျက်လုံးပင့်လျက် သူ့ကိုယ်သူ ပြန်လည်ကာကွယ် ပြောဆိုလိုက်သည် ။ “ဒါ့အပြင် ကြည့်ဦးလေ... ကျွန်တော် ရန်တိုက်ပေးခဲ့တာလည်း မဟုတ်ဘူး။ နယ်ခံအချင်းချင်းပဲမို့ ကိုယ့်လူအချင်းချင်းအတွက် စဉ်းစားပေးတာ သဘာဝကျပါတယ်။ အကယ်၍ လွီပုက လီရူးကို တကယ် ယုံကြည်ခဲ့ရင် ဒီလိုမျိုးတွေ ဖြစ်လာစရာ အကြောင်းမရှိဘူး”
ကွမ်းယု၊ ကျန်းဖေးနှင့် ကျောက်ယွင်တို့သည် ဆွံ့အသွားကြသော်လည်း ချန်းရှီ ပြောသည့်စကားမှာ အလွန် တိကျမှန်ကန်နေသဖြင့် မငြင်းဆန်နိုင်ကြပေ။ စာတစ်စောင်လုံးတွင် မလိုမုန်းထားစိတ် အနည်းငယ်မျှ မပါဝင်ဘဲ စေတနာသက်သက်သာ ဖြစ်သော်လည်း ထိုစေတနာသည် လွီပုအတွက်တော့ အကြီးမားဆုံးသော မကောင်းကြံစည်မှုကြီး ဖြစ်သွားရသည် ။
“ကဲ... တော်လောက်ပြီ။ အခုအချိန်က ကျွန်တော်တို့ သွားပြီးတော့ တပ်ဖွဲ့တွေကို သိမ်းပိုက်ရမယ့်အချိန်ပဲ။ သူတို့က ကျွန်တော်တို့ရဲ့ အနာဂတ် အခြေခံအုတ်မြစ်တွေပဲ၊ ဒါကြောင့် မသတ်ဘဲ ရှောင်လွှဲလို့ရရင် မသတ်မိအောင် ကြိုးစားကြတာပေါ့” ချန်းရှီက လူတိုင်းကို ပြုံးလျက် အားပေးစကား ပြောလိုက်သည် ။
သူ့အတွက်မူ ဤကိစ္စမျိုးက အလွန် ရိုးအီနေပြီ ဖြစ်သည် - တချို့အချိန်များတွင် မသင့်တော်သောနေရာ၌ ပြသလိုက်သည့် စေတနာသည် အမှန်စင်စစ်အားဖြင့် အကြီးမားဆုံးသော ကောက်ကျစ်မှု ဖြစ်သွားတတ်သည် မဟုတ်ပါလား။
ကွမ်းယု၊ ကျန်းဖေးနှင့် ကျောက်ယွင်တို့သည် တိုက်ပွဲကြီးအတွက် အသင့်ပြင်ရန် ကိုယ်ပိုင်တပ်ဖွဲ့များကို ဦးဆောင်ဖို့ မိမိတို့ စခန်းအသီးသီးသို့ ပြန်သွားကြသည် ။ ချန်းရှီ၏ စကားအရ ရှီးလျှောင်အထူးမြင်းစီးတပ် ရှစ်ထောင်မှ တစ်သောင်းခန့်ကို ရရှိရန် သေချာသလောက် ရှိနေပြီဖြစ်ကြောင်း သူတို့ နားလည်ထားကြသည် ။ ချန်းရှီက ကိုယ်တိုင် ကွပ်ကဲရန် အစီအစဉ်မရှိသဖြင့် သဘာဝကျကျပင် ထိုတပ်ဖွဲ့များကို သူတို့လေးဦးကြား ခွဲဝေယူကြရမည် ဖြစ်သည် ။ မျှော်လင့်ထားသည့်အတိုင်း အဓိက အစိတ်အပိုင်းကြီးကို လျှိုပေ့က ရရှိမည်ဖြစ်သော်လည်း ကျန်ရှိသောအင်အားကို သူတို့အချင်းချင်း ခွဲဝေယူကြမည် ဖြစ်ရာ ခေါင်းဆောင်လေးဦးစလုံးသည် အနည်းဆုံး စစ်သည်တစ်ထောင်စီ ရရှိနိုင်ကြမည် ဖြစ်သည် ။
“အရှင်ရွှမ်တယ်... အရှင်မင်းကြီးရဲ့ ရည်မှန်းချက်က ဘာလဲဆိုတာ ကျွန်တော် သိခွင့်ရမလား” ချန်းရှီက ဟွာရှုံကို ဘေးသို့ ပို့ပြီးနောက် တည်ကြည်သောအမူအရာဖြင့် မေးလိုက်သော်လည်း သူ၏ မျက်ဝန်းထဲက အရွှန်းဖောက်လိုသော အရိပ်အယောင်ကိုမူ ဖုံးကွယ်ထားနိုင်ခြင်း မရှိပေ။
လျှိုပေ့ မည်သို့ပင် ဖြေဆိုပါစေ သူ ဂရုမစိုက်ပါ။ သူ လိုအပ်သည်က ယုံကြည်စိတ်ချရသော အုပ်ချုပ်သူတစ်ဦးသာ ဖြစ်ပြီး ကြီးမားသော ရည်မှန်းချက်များနှင့် ရက်စက်တတ်သူမျိုး မဟုတ်ပေ။ ချန်းရှီ အလိုရှိသည်က တည်ငြိမ်မှုသာ ဖြစ်သည် ။ ဤကဲ့သို့သော ဖရိုဖရဲဖြစ်နေသည့် စစ်မက်ခေတ်ကြီးတွင် မည်သည့် ရည်မှန်းချက်မဆို ကိုယ့်အသက်ကိုယ် အသက်ရှင်အောင် စောင့်ရှောက်နိုင်မှသာ အကောင်အထည်ဖော်နိုင်မည် ဖြစ်သည် ။ ဟန်မင်းဆက်ကို ပြန်လည်ထူထောင်ရန် ဖြစ်စေ၊ ဟွာရှစစ်ဝိညာဉ်ကို ပြန်လည်ရှင်သန်စေရန် ဖြစ်စေ၊ သို့မဟုတ် စစ်ရေးစွမ်းရည် သတ္တိကို ပြန်လည်တည်ဆောက်ရန် ဖြစ်စေ ဤအရာအားလုံးအတွက် ချန်းရှီ အသက်ရှင်နေဖို့ လိုအပ်သည် ။
ဤခေတ်ကာလထက် နှစ်ပေါင်း ၁၈၀၀ ကျော် ပိုလွန်သော ဗဟုသုတများကို ပိုင်ဆိုင်ထားသဖြင့် ချန်းရှီသည် သာမန်ထက် ပိုမိုနက်ရှိုင်းသော အမြင်နှင့် ဉာဏ်ပညာကို ရရှိထားပြီး ဖြစ်သည် ။ ပင်ကိုယ်ဉာဏ်ရည်ဉာဏ်သွေးတွင် သဘာဝအလျောက် ကွာဟချက် ရှိနိုင်သော်လည်း ဉာဏ်ပညာဟူသည် အချိန်နှင့်အမျှ စုဆောင်းလာခဲ့သော အတွေ့အကြုံများသာ ဖြစ်သည် ။ ချန်းရှီသည် မိမိ၏ ဉာဏ်ရည်သည် အတိတ်ခေတ်က ကျော်ကြားခဲ့သော အမတ်ကြီးများကို မမှီနိုင်သော်လည်း မိမိ၏ အမြင်၊ ဗဟုသုတ သိုလှောင်မှုနှင့် ဉာဏ်ပညာပိုင်းတွင်မူ သူတို့ကို အပြတ်အသတ် သာလွန်နေမည်ကို ကောင်းစွာ သိရှိထားသည် ။
အရိုးရှင်းဆုံး ပြောရလျှင် ချန်းရှီသည် လက်ရှိအချိန်တွင် မည်သည့်မူဝါဒများကို အကောင်အထည်ဖော်ပါက အကျိုးရှိမည်၊ ရေရှည်တွင် မည်သည့်ဆိုးကျိုးများ ရှိလာမည်ကို အတိအကျ သိနေခြင်းပင် ဖြစ်သည် ။ သူသည် ဟာကွက်များကို လိုက်ဖာနေရန်ပင် မလိုပါ - ဤမူဝါဒများသည် နောင်ရာစုနှစ်များစွာအကြာတွင် မည်သို့သော သက်ရောက်မှုမျိုး ရှိလာမည်ကို သူ ကြိုတင်သိရှိနေသည် ။ ဤနေရာတွင် ကျူးခုံမင်း ရှိနေပါစေဦးတော့... သူက တန်မင်းဆက် သို့မဟုတ် ဆောင်မင်းဆက်အကြောင်းကို ဘယ်လိုလုပ် သိနိုင်ပါ့မလဲ။ ဒါက ရယ်စရာပဲ ဖြစ်လိမ့်မည် ။
ထို့ကြောင့် အနည်းငယ် ရင့်သီးစွာ ပြောရလျှင် ချန်းရှီအနေဖြင့် နိုင်ငံရေးနှင့် စီးပွားရေးဆိုင်ရာ အခြေအနေအရပ်ရပ်ကို ထိန်းချုပ်ထားနိုင်ပြီး၊ အရည်အချင်းရှိသော လက်အောက်ငယ်သား အနည်းငယ် ရှိကာ၊ သူ့ကို စိတ်ကြိုက် စီမံခွင့်ပေးမည့် အုပ်ချုပ်သူတစ်ဦးသာ ရှိမည်ဆိုပါက... တူညီသော အခြေအနေအောက်တွင် သူသည် သုံးပြည်ထောင်ခေတ်၏ ကျော်ကြားသော အမတ်ကြီးများကို အချိန်တိုအတွင်း အသာစီးရယူနိုင်မည်ဟု ယုံကြည်မှု ရှိနေသည် ။ ၎င်းသည် ဉာဏ်ရည်ပြိုင်ပွဲ မဟုတ်တော့ဘဲ ဗဟုသုတ သိုလှောင်မှုနှင့် အတွေ့အကြုံ သက်သက်သာ ဖြစ်ပေသည် ။