အခန်း (၃၂) ကျောက်ယွင်ပါ တက်တိုက်ရပြီ

... ကိုယ်တွင်းအသက်ရှုဓာတ် ကို အားမကိုးဘဲ ပေါင်ရှစ်ဆယ်ကျော် လေးလံလှသည့် နဂါးစိမ်းလခြမ်းဓားကြီး  ကို ဝှေ့ယမ်းနိုင်သူ ကွမ်းယု ကဲ့သို့ မွေးရာပါ နတ်ဘုရားအလား ခွန်အား  ရှိသူများကို မြင်ဖူးထားသဖြင့် ထိုအရာကို မွေးရာပါနတ်ဘုရားအလား ခွန်အားဟု သတ်မှတ်၍ ရနိုင်သည်မှာ သေချာလှသည်။ ထို့အတူ ကိုယ်တွင်းအသက်ရှုဓာတ်ကို အားကိုးပြီး ပေါင် ရာချီလေးသော တူကြီးကို ကိုင်တွယ်သည့် ဝူအန်းကော် သည်လည်း မွေးရာပါနတ်ဘုရားအလား ခွန်အား ရှိသော်လည်း ထိုခွန်အားတွင်လည်း အကန့်အသတ်တော့ ရှိရမည် မဟုတ်ပါလော။ လွီပု ကိုယ်တိုင်လည်း မွေးရာပါနတ်ဘုရားအလား ခွန်အားနှင့် ပြည့်စုံသူ ဖြစ်သည်။ သို့မဟုတ်ပါက ဥက္ကာခဲသံရိုင်းဖြင့် သွန်းလုပ်ထားသည့် စက္ခုဝေဟင်ထိုးခွင်းလှံ  ကို ကျွမ်းကျင်စွာ ကိုင်တွယ်နိုင်လိမ့်မည် မဟုတ်ပေ။ သို့သော် ယခု ကျန်းဖေး၏ ခွန်အားက သူ့ကို တုန်လှုပ်သွားစေသည်။

သည်အရာက အမှန်တကယ်ပဲ လူသားတစ်ယောက်ရဲ့ ခွန်အားဖြစ်နိုင်ပါ့မလား။

လွီပု သည် သုတေသနပြုလုပ်ရန် စိတ်ဝင်စားလာကြောင်း ဖော်ပြလိုက်သည်။ သူသည် သည်လူကို ဖမ်းဆီးကာ အရသာရှိသော စားသောက်ဖွယ်ရာများနှင့် ဝိုင်ကောင်းများ တိုက်ကျွေးပြီး ထူးခြားဆန်းပြားစွာ သန်မာလာစေရန် မည်သည့်အရာများ ကျွေးမွေးထားသနည်းဆိုသည်ကို သေချာ စုံစမ်းစစ်ဆေးရန် စီစဉ်လိုက်သည်။

ကျန်းဖေး၏ ခွန်အားမှာ လွီပု၏ ကိုယ်တွင်းအသက်ရှုဓာတ်ကဲ့သို့ပင် ဆက်တိုက် တိုးပွားနေပြီး အဆို့ရှင် ပွင့်သွားသည်နှင့် တစ်ပြိုင်နက် ရပ်တန့်သွားသည်ကို မမြင်ရတော့ပေ။ သူ၏ ခွန်အားက ပိုမိုတိုးပွားလာပြီး ဗလာကျင်းနေသော အသားစိုင်ပေါ်ရှိ ကြွက်သားများပင် တုန်ခါလျက် ဖြည်းညှင်းစွာ ဖောင်းကားလာသည်ကို မြင်တွေ့ရသည်။ မူလက ကြွက်သားတုံးများဖြင့် ဖုံးလွှမ်းနေသော ကျန်းဖေး၏ လက်မောင်းများသည် ယခုအခါ ချပ်ဝတ်တန်ဆာထဲမှပင် ပေါက်ထွက်လုမတတ် ဖြစ်နေပြီ။

ကျောက်ယွင် သည် ကျန်းဖေးကို စပ်စုသော မျက်လုံးများဖြင့် ကြည့်နေမိသည်။ သူသည် ယခင်က သည်လူကို အတော်အတန် သန်မာသည်ဟုသာ တွေးခဲ့သော်လည်း ယခု မြင်တွေ့နေရသည်မှာ သာမန်ခွန်အားထက် ကျော်လွန်နေပြီ ဖြစ်သည်။ ကျန်းဖေး၏ လက်မောင်းပေါ်တွင် လှိုင်းထနေသော ကြွက်သားများသည် သူ၏ ပေါင်လုံးအရွယ်အစားနီးပါး ဖြစ်နေသည်။

"ဇီချွမ် ရေ... စိတ်ပူစရာ မလိုတော့ဘူးနော်။ အကယ်၍ ဗိုလ်ချုပ်ကျန်းက ယခုလက်ရှိ ခွန်အားကို ဆက်ထိန်းထားနိုင်ရင် လွီပုအနေနဲ့ ဗိုလ်ချုပ်ကျန်းကို အချိန်တိုအတွင်း အနိုင်ယူဖို့ မလွယ်ကူတော့ဘူး။ သည်လို ခွန်အားမျိုးက နည်းစနစ် အများစုကို လျစ်လျူရှုထားဖို့ လုံလောက်တယ်။ အခုအချိန်မှာ လွီပုက သာမန်ကာလျှံကာ အလင်းဓားကွက်ကို သုံးရဲရင် သူ့ရဲ့ စက္ခုဝေဟင်ထိုးခွင်းလှံက သေချာပေါက် လွင့်ထွက်သွားလိမ့်မယ်"

ကျောက်ယွင် က စိုးရိမ်ပူပန်နေသော ချန်းရှီ  ကို ပြုံးလျက် ရှင်းပြလိုက်သည်။

"မဖြစ်နိုင်လောက်ဘူး... တတိယအစ်ကို ဘာဖြစ်နေလဲဆိုတာ ငါ နားလည်သွားပြီ ထင်တယ်။ အသင့်ပြင်ထားပါ အစ်ကိုယွင်"

ချန်းရှီ က မချိပြုံး ပြုံးရင်း ပြောလိုက်သည်။

ကျန်းဖေးက သူနှင့် ဒုတိယအစ်ကိုတွင် ထူးခြားသော အကွက်အချို့ ရှိသည်ဟု တစ်ခါက ပြောခဲ့ဖူးသည်ကို သူ သတိရသွားသည်။ ပုံမှန်မဟုတ်သော ခွန်အားတိုးပွားလာမှုသည် ကျန်းဖေး၏ ဝှက်ဖဲဖြစ်နိုင်ခြေ အများဆုံးပင်။

ကျန်းဖေးသည် ထုံကျင်လာပြီး နည်းစနစ်များကို ဂရုမစိုက်တော့ပေ။ လွီပုအတွက်မူ သူ၏ နည်းစနစ်အားလုံးမှာ အမှိုက်များသာဖြစ်ကြောင်း သူ သဘောပေါက်သွားခဲ့သည်။ သူ လွီပုနှင့် နှိုင်းယှဉ်နိုင်သည့် အရာတစ်ခုသာ ရှိပြီး ထိုအရာမှာ ခွန်အားပင် ဖြစ်သည်။ သူ၏ ခွန်အားက လွီပုထက် သာလွန်နေသည်။ သည်အသိဖြင့် သူ ယုံကြည်မှု ရလာခဲ့သည်။

'တိုက်ပွဲတစ်ခုမှာ ခွန်အားနည်းရင် နည်းစနစ်ကို သုံး၊ နည်းစနစ် အားနည်းရင် မြန်နှုန်းကို သုံး' ဟု သူ့ဖခင်က ပြောခဲ့ဖူးသည်။ ထိုသုံးခုအနက် တစ်ခုခုတွင် အားသာချက်ရှိနေသရွေ့ တိုက်ပွဲတွင် မနိုင်ပါက ထွက်ပြေးနိုင်သည်။ အကယ်၍ သုံးခုစလုံးတွင် နိမ့်ကျနေပါက အဝေးတွင်သာ နေခြင်းက အကောင်းဆုံး ဖြစ်လိမ့်မည်။ အကယ်၍ မလွဲမသွေ တိုက်ခိုက်ရမည်ဆိုပါက အသက်ရှင်ရန် မမျှော်လင့်နှင့်၊ သေချာပေါက် သေရမည်ဟူသော စိတ်ပိုင်းဖြတ်မှုဖြင့် တိုက်ခိုက်မှသာ ရှင်သန်ခြင်း လမ်းစကို ရှာဖွေနိုင်မည် ဖြစ်သည်။

ချန်းရှီ၏ ခန့်မှန်းချက်မှာ မှန်ကန်ပေသည်။ ကျန်းဖေးသည် သူ၏ ဝှက်ဖဲနည်းစနစ်ကို အမှန်တကယ် အသုံးပြုနေခြင်း ဖြစ်သည်။ ကွမ်းယုက သူ့အား တိုက်ကွက်အသစ်တစ်ခု ဖော်ထုတ်ခြင်းအကြောင်း ပြောပြခဲ့သည့် အချိန်မှစ၍ ကျန်းဖေးကလည်း သူ့တွင် တစ်ခု လိုအပ်သည်ဟု ခံစားခဲ့ရသည်။ ထို့ကြောင့် သူသည် ပိုမိုကြီးမားသော ခွန်အားကို ထုတ်လွှတ်ရန်အတွက် ကြွက်သားများကို ချီ ဖြင့် လှုံ့ဆော်ပေးသည့် သည်နည်းစနစ်ကို စဉ်းစားမိခဲ့ခြင်း ဖြစ်သော်လည်း ယခင်က ၎င်းကို ဝက်များပေါ်တွင်သာ အသုံးပြုခဲ့ဖူးသည်။

ကျန်းဖေးကိုယ်တိုင် မသုံးဖူးသော်လည်း သူ သုတေသနပြုလုပ်ခဲ့သည့် ဝက်များသည် ခေတ္တမျှ သူနှင့်မပြတ် သန်မာလာခဲ့သည်။ ဟုတ်ပါသည်။ ကျန်းဖေးက သူ၏ နည်းစနစ်ကို အောင်မြင်စွာ သုတေသနပြုနိုင်ခဲ့ပြီဟု ယုံကြည်သဖြင့် ဝက်ကို သတ်ကာ စားပစ်လိုက်သည်။

နောက်ပိုင်းတွင် ကွမ်းယုအား ကြွားဝါသောအခါတွင်လည်း သူသည် အဆုံးစွန်သော အတတ်ပညာတစ်ခုကို ဖော်ထုတ်နိုင်ခဲ့ပြီဟု အခိုင်အမာ ပြောခဲ့သော်လည်း ကွမ်းယုကမူ ကျန်းဖေး၏ တိုက်ကွက်မှာ ဘာလဲဆိုသည်ကို လုံးဝ မသိရှိခဲ့ပေ။ ကျန်းဖေးကိုယ်တိုင်လည်း သူ၏ နည်းစနစ်က မည်မျှ ပြင်းထန်သည်ကို မသိခဲ့ပါ။ ၎င်းသည် ကြွက်သားခွန်အားကို အပြည့်အဝ ညှစ်ထုတ်ပြီး အာရုံကြော ပို့လွှတ်မှုအချို့ကို ကန့်သတ်ကာ ခန္ဓာကိုယ်၏ သဘာဝ ကာကွယ်ရေးစနစ်များကို ဖျက်ဆီးပစ်သည်။ ထို့ကြောင့်ပင် ကျန်းဖေး၏ ခွန်အားက အကန့်အသတ်မရှိ တိုးပွားနေခြင်း ဖြစ်သည်။ ခန္ဓာကိုယ်၏ သဘာဝ ကာကွယ်ရေးစနစ် လုံးဝ ပျောက်ကွယ်သွားပါက ကိုယ်တွင်းအသက်ရှုဓာတ် မရှိသော သာမန်လူတစ်ယောက်ပင် တန်နှင့်ချီသော ခွန်အားကို ထုတ်လုပ်နိုင်သည်။

"ဝုန်း"

လွီပု နောက်သို့ ယိုင်လဲသွားသည်။ အနီရောင်စစ်မြင်း ကိုစီးနင်းထားစဉ် ပြင်းထန်သော ဓားကွက် ကို အသုံးပြုခဲ့သော်လည်း သူသည် ခြေတစ်လှမ်းမျှသာ ဖြစ်သော်လည်း နောက်သို့ ဆုတ်သွားခဲ့ရသည်။

ကျန်းဖေးသည် အောင်ပွဲ၏ အရိပ်အယောင်ကို မြင်နေရပြီ ဖြစ်သည်။ သူ၏ ခွန်အားများ ဆက်တိုက် တိုးပွားနေသည်ကို ခံစားနေရပြီး သည်နှုန်းအတိုင်းဆိုလျှင် လွီပုကို ချေမှုန်းရန်မှာ စိန်ခေါ်မှုတစ်ခု မဟုတ်တော့သလိုပင်။

လွီပု၏ မျက်နှာအမူအရာ ညှိုးမှိန်သွားသည်။ နောက်သို့ တွန်းပို့ခံရခြင်းမှာ သူ့အတွက် အသစ်အဆန်း ဖြစ်နေသည်။ သူက သူတစ်ပါးကိုသာ တွန်းပို့လေ့ရှိပြီး အခြားသူ၏ တွန်းပို့ခြင်းကို မခံဖူးချေ။ သည်လို အခြေအနေမျိုးနှင့် ပထမဆုံးအကြိမ် တွေ့ကြုံရသဖြင့် လွီပု အနည်းငယ် ကြောင်အမ်းသွားသည်။

"မင်း ငါ့ကို စိတ်တိုအောင် လုပ်လိုက်ပြီ"

လွီပု လက်တွေ့အခြေသို့ ပြန်လည်ရောက်ရှိလာပြီး သူ၏ မျက်လုံးများတွင် ဒေါသတကြီး သွေးရောင် လွှမ်းသွားသည်။ ရူးသွပ်သော ဟိန်းဟောက်သံနှင့်အတူ သူ၏ စွမ်းအားများက အင်အားတစ်ခုအဖြစ် စုစည်းသွားပြီး စက္ခုဝေဟင်ထိုးခွင်းလှံသည် ကောင်းကင်နှင့် မြေကြီး၏ အရှိန်အဝါကို ဆောင်ယူထားသကဲ့သို့ ပြင်းထန်စွာ ကျဆင်းလာခဲ့သည်။

"ဝုန်း"

ကျယ်လောင်သော အသံကြီး တစ်ချက် မြည်ဟည်းသွားပြီးနောက် ကြီးမားသော ချီလှိုင်းလုံးကြီးတစ်ခုက ဖုန်မှုန့်များကို ဝေဟင်သို့ လွင့်ပျံသွားစေသည်။ ဖုန်မှုန့်များ ငြိမ်သက်သွားသောအခါ လွီပုသည် အဝေးတစ်နေရာတွင် အနီရောင်စစ်မြင်း ပေါ်တွင် ထိုင်နေပြီး ကျန်းဖေးကို စောင့်ရှောက်နေသော ကွမ်းယုနှင့် မြင်းပေါ်တွင် ဒယိမ်းဒယိုင်ဖြစ်နေကာ သွေးချင်းချင်းနီနေသော ကျန်းဖေးကို ကြည့်ကာ လှောင်ပြုံး ပြုံးလိုက်သည်။

"မင်း တကယ်ပဲ အကန့်အသတ်မရှိတဲ့ ခွန်အားကို ရနေပြီလို့ ငါ ထင်ခဲ့တာ... ဒါပေမဲ့ ဒါက ရယ်စရာကောင်းတဲ့ ရလဒ်တစ်ခု ဖြစ်သွားတာပဲ။ မင်းရဲ့ ခန္ဓာကိုယ်က သည်လောက်ကြီးမားတဲ့ အင်အားကို မခံနိုင်ဘူး။ တကယ်ပါပဲ... တော်တော် ရယ်စရာကောင်းတာပဲ"

ကွင်းပြင်တစ်ခုလုံး တုန်လှုပ်သွားကြသည်။ လွီပုနှင့် အမျှတိုက်ခိုက်နိုင်ခဲ့သော ကွမ်းယုနှင့် ကျန်းဖေးတို့အနက် ကျန်းဖေးသည် လွီပု၏ ဒေါသတကြီး တိုက်ခိုက်မှု တစ်ချက်တည်းဖြင့် မမျှော်လင့်ဘဲ ပြင်းထန်စွာ ဒဏ်ရာရရှိသွားခဲ့သည်။ လွီပုသည် သည်အချိန်တစ်လျှောက်လုံး သူတို့ကို ကစားနေခဲ့ခြင်း ဖြစ်နိုင်ပါသလား။

"မင်းတို့ နှစ်ယောက်လုံးကို ငါ အဆုံးစီရင်ပေးမယ်"

လွီပုက တဟားဟား ရယ်မောရင်း ကျန်းဖေး တိုက်ခိုက်နိုင်စွမ်း ဆုံးရှုံးသွားပြီဖြစ်ကြောင်း အတည်ပြုပြီးနောက် အဆုံးအဖြတ် တိုက်ကွက်တစ်ခုအတွက် ကွမ်းယုထံသို့ သူ၏ စက္ခုဝေဟင်ထိုးခွင်းလှံကို ဝှေ့ယမ်းလိုက်သည်။ ယခု သူ အလိုရှိသည်မှာ ရလဒ်ကို ရိတ်သိမ်းရန်သာ ဖြစ်သည်။ ကွမ်းယုနှင့် ကျန်းဖေးတို့၏ စွမ်းအားကို ကိုယ်တိုင် မြင်တွေ့ခဲ့ရပြီးပြီ ဖြစ်သည်။ သူတို့က သန်မာသော်လည်း သန်မာရုံမျှသာ ရှိသည်။

"ချန်းရှီက ကျောက်ယွင် ကျေးဇူးပြုပြီး ဝင်ကူပေးပါဦး”

ကျောက်ယွင် သည် သူ၏ လှံကို ကိုင်ဆောင်ကာ ရှေ့သို့ တက်လာခဲ့သည်။ သည်အကြိမ်သည် လူစုလူဝေးဖြင့် ဝိုင်းဝန်းတိုက်ခိုက်မှုတွင် သူ ပထမဆုံးအကြိမ် ပါဝင်ခြင်း ဖြစ်သည်။

လွီပုသည် သူ၏ နှုတ်ခမ်းကို လျှာဖြင့်သပ်ရင်း ကွမ်းယုနှင့် ကျန်းဖေးတို့ကို ပယ်ထုတ်ကာ ကျောက်ယွင်ထံသို့ တည့်တည့် ဦးတည် တိုက်ခိုက်လေသည်။ လူစုလူဝေးဖြင့် တိုက်ခိုက်ခြင်းနှင့် အလှည့်ကျ တိုက်ခိုက်ခြင်းတို့သည် လွီပုအတွက် ဘာမျှ မဟုတ်ပေ။ ပင်းကျိုးမှ လော့ယန် သို့၊ လော့ယန်မှသည် ယခု စစ်ပွဲသခင်များနှင့် တိုက်ပွဲများအထိ၊ မည်သူက သူ့ကို တစ်ဦးချင်း ရင်ဆိုင်ရဲသနည်း။ ကောင်းကင်အောက်တွင် ပြိုင်ဘက်ကင်းသူ ဖြစ်ရမည်၊ သတ်မည်ဆိုလျှင် စွမ်းအားကြီးသူကိုသာ သတ်ရမည်။ သည်အရာက အမြဲတမ်း သူ၏ မူဝါဒပင် ဖြစ်သည်။

ကျောက်ယွင်သည် သူ့အပြိုင် ဆရာတစ်ဦးဖြစ်ကြောင်း လွီပု ကောင်းစွာ သိသည်။ သို့သော် သူ့ကို ရင်ဆိုင်ရသည့် မည်သည့် ဆရာမဆို ဖုန်မှုန့်မျှသာ ဖြစ်သည်ကို သူ ပို၍ သေချာသည်။ ဟဲပေ့မှ ကျော်ကြားသော ဗိုလ်ချုပ်ကြီးဟု ဆိုကြသည့် ဝမ်ချို  ဖြစ်စေ၊ သူ အနိုင်ယူလုနီးပါးဖြစ်နေသော ကွမ်းယုနှင့် ကျန်းဖေး ဖြစ်စေ ကမ္ဘာပေါ်ရှိ ဆရာအားလုံးကို အနိုင်ယူနိုင်စွမ်းရှိကြောင်း သူ ယုံကြည်သည်။ သူတို့အားလုံးက ဆရာများ ဖြစ်ကြသော်လည်း သူတို့ ရင်ဆိုင်နေရသည်မှာ လွီပု ဖြစ်နေသည်။

ကျောက်ယွင်၏ လှံချက်က မယုံနိုင်လောက်အောင် မြန်ဆန်လှသည်။ လွီပု၏ ထက်မြက်သော အမြင်အာရုံဖြင့်ပင် တောက်ပသော ငွေရောင်အစင်းကြောင်းများကိုသာ မြင်နိုင်သည်။ တစ်စုံတစ်ဦး၏ လှံချက်က သည်မျှ မြန်ဆန်လိမ့်မည်ဟု သူ ဘယ်တုန်းကမှ မတွေးခဲ့ဖူးချေ။ ကောင်းကင်ယံတစ်ခုလုံး လှပစွာ ပျံဝဲနေသော လှံချက်ပန်းပွင့်များက သူ့ကို အမှန်တကယ် အံ့အားသင့်စေခဲ့သည်။ ၎င်းသည် ကျန်းဖေး၏ ခွန်အားကို ပထမဆုံးအကြိမ် မြင်တွေ့ခဲ့ရစဉ်ကကဲ့သို့ပင် တုန်လှုပ်စရာ ကောင်းလှသည်။

ငွေပြာရောင်နှင့် ရွှေနီရောင် အရှိန်အဝါ များသည် အပြန်အလှန် ပွတ်တိုက်ကာ ဆက်တိုက် ဖိသိပ်နေပြီး မည်သူမျှ တစ်ဖက်လူကို ဝါးမြိုနိုင်ခြင်း မရှိဘဲ တင်းမာသော အခြေအနေကို ခိုင်မာစွာ ထိန်းသိမ်းထားသည်။

လွီပုသည် သာမန်ကာလျှံကာ အလင်းနှင့် အလေးစား ဓားကွက် ဖြင့် ဆော့ကစားရန် မဝံ့ရဲတော့ပေ။ ထို ရုပ်ချောချောကောင်လေးသည် သူ နည်းစနစ်ကို စမ်းသပ်နေခြင်းကို အခွင့်ကောင်းယူကာ သူ့ကိုယ်ပေါ်တွင် အပေါက်တစ်ခု ဖြစ်လုနီးပါး လုပ်ခဲ့သဖြင့် လွီပု စိတ်ထဲမှ ကျိန်ဆဲမိသည်။ သည်နည်းစနစ်ကို သိုင်းပညာပါရမီရှင်တစ်ဦးသာ နားလည်နိုင်ပြီး ကျွမ်းကျင်ပိုင်နိုင်ရန် အနည်းဆုံး ဆယ်စုနှစ်တစ်ခုကြာ အာရုံစိုက်ရမည်ဟု ပြောခဲ့သည့် ထိုအဖိုးကြီး မဟုတ်ပါလော။ ၎င်းကို အပြစ်ဆိုဖွယ်မရှိ အသုံးပြုနိုင်သူများသည် အသက် ခုနစ်ဆယ်ကျော် အရွယ် အဖိုးအိုများသာ ဖြစ်ကြသည်။

သာမန်ကာလျှံကာ နည်းစနစ်ကို စွန့်ပယ်ပြီး လွီပုသည် တည်ငြိမ်ပြီး ခိုင်မာသော တိုက်ကွက်များဖြင့် စတင် တိုက်ခိုက်လေသည်။ ထိုရုပ်ချောချောကောင်လေးသည် ကြာရှည်စွာ မတုန်မလှုပ် ရှိနေနိုင်မည်မဟုတ်ကြောင်း သူ ယုံကြည်နေသည်။