အခန်း (၂၂) အမှန်တော့ ကျွန်တော်က ဗေဒင်အတတ်မှာ အတော်လေး ကျွမ်းကျင်တာဗျ...

"ကဲ... ကျွန်တော်တို့ စစ်ရေးကိစ္စတွေကို ပြန်လည်ပြင်ဆင်ဖို့ အမြန်ပြန်ကြတာ ပိုကောင်းမယ်ထင်တယ်"

ဟော်ပေဒေသရဲ့ အနာဂတ်အရှင်သခင်က သူ့ကို လျစ်လျူရှုပြီး ကွမ်းယု၊ ကျန်းဖေးနဲ့ ကျောက်ယွင်တို့ကို လှမ်းခေါ်နေသည်ကို မြင်သောအခါ ချန်းရှီက လက်နှစ်ဖက်ကို ဘေးသို့ဆန့်ထုတ်ကာ သက်ပြင်းချရင်း ပြောလိုက်သည်။

"ဩော်... ဒါနဲ့ မိတ်ဆက်ပေးရဦးမယ်၊ သူကတော့ ချန်ရှန်းပြည်နယ်က ကျောက်ယွင် ဖြစ်တယ်၊ အင်း... ကျွန်တော်တို့ရဲ့ မြင်းစီးတပ်မှူးပေါ့၊ မင်းတို့တွေ စကားများများပြောပြီး အတွေ့အကြုံတွေ ဖလှယ်ကြဦးလေ"

ချန်းရှီက အပြင်သို့ လျှောက်လှမ်းရင်း ကျောက်ယွင်ကို ကွမ်းယုနှင့် ကျန်းဖေးတို့ထံ မိတ်ဆက်ပေးလိုက်သည်။

"ဗိုလ်ချုပ်ကွမ်းနဲ့ ဗိုလ်ချုပ်ကျန်းတို့ကို ဂါရဝပြုပါတယ်"

ကျောက်ယွင်က လက်သီးဆုပ်ကာ အရိုအသေပေးလိုက်သည်။ ကွမ်းယုက မျက်မှောင်ကြုတ်လျက် ပြန်လည်အလေးပြုပြီး ကျန်းဖေးကမူ ဟက်ဟက်ပက်ပက် ရယ်မောကာ ၎င်း၏ ကျယ်လောင်လှသော အသံကြီးဖြင့် နှုတ်ဆက်လေသည်။

[ကျောက်ယွင်ရဲ့ စွမ်းအားက ကွမ်းယုနဲ့ ကျန်းဖေးထက် ပိုတောင် သန်မာနေဦးမယ့်ပုံပဲ၊ ဟုတ်တယ်မလား... ဒီလူနှစ်ယောက်က ကျောက်ယွင်ဟာ ထိပ်သီးပညာရှင်တစ်ယောက်ဆိုတာကို သတိမထားမိကြသေးဘူးပဲ]

ချန်းရှီက ခေါင်းကို စောင်းကာ စိတ်ထဲမှ တွေးတောနေသော်လည်း ထိုအကြောင်းကို ကွမ်းယုနှင့် ကျန်းဖေးအား ပြောပြရန် စိတ်ကူးမရှိချေ။

"အာ..."

ချန်းရှီက ဟွာရှုံကို ကြည့်ရင်း ခေါင်းကို ကုတ်လိုက်မိသည်။ သူတို့နှစ်ယောက် အပြင်ထွက်သွားပြီးနောက် အဖြူရောင်မြင်းစီးတပ်ကို ဟွာရှုံက ထိန်းချုပ်ထားခဲ့သည်ကို သတိပြုမိသွား၍ ဖြစ်သည်။ တောက်... ခက်တော့တာပဲ။

"ခင်ဗျားက ဘာလို့ ထွက်မပြေးတာလဲ၊ ဒီလောက် ကောင်းတဲ့အခွင့်အရေးမျိုးရတုန်း ကျွန်တော်သာဆိုရင် သေချာပေါက် ထွက်ပြေးမိမှာ"

ချန်းရှီက စပ်စုသောမျက်နှာဖြင့် မေးလိုက်သည်။ ဟွာရှုံသည် ဒုံကျွမ်စစ်တပ်၏ စခန်းသိမ်း အလစ်အငိုက်တိုက်ခိုက်မှုကိုပင် ခုခံတွန်းလှန်ပေးခဲ့ကြောင်း အဖြူရောင်မြင်းစီးတပ်သားများထံမှ သူ ကြားသိခဲ့ရသည်။ ဤအရာအားလုံးက မဖြစ်နိုင်သလို ထင်ရသဖြင့် သူက ဆက်မေးလိုက်သည်။

"ဒါဆို... ခင်ဗျားက ကျွန်တော်တို့နဲ့ ပူးပေါင်းဖို့ ရည်ရွယ်ချက်ရှိနေတာလား"

"မဟုတ်ဘူး၊ ငါ ကျန်းရီတယ်ကို မကြည်လို့"

ဟွာရှုံက ချန်းရှီကို တစ်ချက်ကြည့်ကာ ပြောလိုက်သည်။

"ဩော်... သဘောပေါက်ပြီ၊ ခင်ဗျားရဲ့ စံနှုန်းတွေ လျှော့ချလိုက်တာ ကျွန်တော် သတိထားမိသားပဲ၊ အရင်က လွီပုကို ရည်မှန်းထားပြီးတော့ အခုကျ သူ့ရဲ့ လက်အောက်ခံဗိုလ်ချုပ်တွေကိုပဲ စိတ်တိုနေရတယ်လို့၊ ခင်ဗျား တန်ဖိုးကျသွားပြီ သူငယ်ချင်းကြီး"

ချန်းရှီ၏ နောက်ပြောင်စကားကြောင့် ဟွာရှုံတစ်ယောက် သီးမတတ် ဖြစ်သွားရသည်။

"ဒါနဲ့ အတည်ပြောတာပါ၊ ကျွန်တော် မထွက်ခွာခင်က ကင်းလှည့်ဖို့ စီစဉ်ထားခဲ့တယ် မဟုတ်လား၊ ပြီးတော့ ကျွန်တော်တို့ တပ်ဖွဲ့တွေကလည်း လုံးဝ ထိတ်လန့်တုန်လှုပ်ခြင်း မရှိကြဘူး၊ အဲဒါကို သူတို့က ဘယ်လိုလုပ်ပြီး အရေးနိမ့်သွားရတာလဲ"

"အဲဒါက ရန်သူ့ဗိုလ်ချုပ် ဟာ အရှင်ရွှမ်တယ်က စစ်အင်အားတွေကို စဉ်ဆက်မပြတ် စုစည်းပြီး စစ်သည်တွေရဲ့ စိတ်ဓာတ်ကို တည်ငြိမ်အောင် လုပ်နေတာကို ရိပ်မိသွားလို့ပဲ၊ အဲဒါကြောင့် သူကိုယ်တိုင် ပင်မစခန်းကို တိုက်ခိုက်ခဲ့တာ"

ဟွာရှုံက စကားမပြောချင်သကဲ့သို့ မကျေမနပ်ဖြစ်နေသော မျက်နှာပေးကို မြင်သောအခါ တပ်မှူးတစ်ဦးက ဝင်ရောက်ရှင်းပြလိုက်သည်။

"ဩော်... အဲဒီလိုကိုး၊ ဒါပေမဲ့ သူက အရှင်ရွှမ်တယ်ကို ဘယ်လိုလုပ် သိပြီး ကျွန်တော်တို့စခန်းဘယ်မှာလဲဆိုတာကိုတောင် ဘယ်လိုသိသွားတာလဲ၊ ကျွန်တော်လည်း တကယ်ကို ဘာပြောရမှန်း မသိတော့ဘူး"

ချန်းရှီက မတတ်သာဘဲ သက်ပြင်းချလိုက်သည်။ မဟာမိတ်တပ်မတော်ရဲ့ လုံခြုံရေးအစီအမံတွေကတော့ တကယ်ကို စိတ်ပျက်စရာကောင်းလှသည်။

"ထားလိုက်ပါတော့... အဲဒီကိစ္စကို မေ့ပစ်လိုက်ကြရအောင်၊ ဟွာရှုံ... ခင်ဗျားလည်း လွီပုအကြောင်း ဆွေးနွေးဖို့ ကျွန်တော်တို့နဲ့အတူ လိုက်ခဲ့ပါ၊ ခင်ဗျားက ပြင်ပလူတစ်ယောက်ဖြစ်ပေမဲ့ ပြဿနာမရှာသရွေ့တော့ ခင်ဗျား သဘောရှိသလို နေနိုင်ပါတယ်"

ချန်းရှီက သက်ပြင်းချရင်း ဖရိုဖရဲ ဖြစ်နေဆဲဖြစ်သော မဟာမိတ်တပ်မတော် စခန်းကို ကြည့်လိုက်သည်။ လျှိုပေ့ ရောက်လာဖို့ရန် အတော်ကြာဦးမည်ဟု သူ ခန့်မှန်းလိုက်မိသည်။

တဲနန်းအတွင်း၌ ထိုင်ကာ ကွမ်းယု၏ အမှန်အတိုင်း ပြောပြချက်ကို နားထောင်ပြီးနောက် ကျောက်ယွင်ပင်လျှင် တည်ကြည်လေးနက်သော မျက်နှာပေး ဖြစ်သွားရသည်။

"ဟားဟား... မုတ်ဆိတ်ရှည်ကြီး၊ အခုတော့ မင်း ယုံပြီ မဟုတ်လား"

ကွမ်းယုက ပထမဆုံးအကွက်ကတည်းက ပြန်လည်ချေပခြင်း ခံခဲ့ရသည်ကို ကြားသောအခါ ဟွာရှုံက လှောင်ပြုံးပြုံးရင်း ရယ်မောလိုက်သည်။

ကွမ်းယုက မျက်လုံးကို တစ်ဝက်ပိတ်လျက် ဟွာရှုံထံသို့ ၎င်း၏ လူသတ်ငွေ့အရှိန်အဝါကို ထပ်မံထုတ်ဖော်လိုက်ပြန်သည်။ ပုံမှန်ဆိုလျှင် ဟွာရှုံက ဤအချိန်၌ ဆက်လက်၍ အဓိပ္ပာယ်မရှိသော စကားများကို ပြောနေပါက ဟွာရှုံတစ်ယောက် ကြမ်းပြင်ပေါ်သို့ လဲကျသွားသည်အထိ သူတို့နှစ်ဦး အပြင်းအထန် လုံးထွေးသတ်ပုဒ်ကြမည် ဖြစ်သည်။

"ဟီးဟီး... ငါ စကားမပြောတော့ဘူး"

ဟွာရှုံက ကွမ်းယု စိတ်အခြေအနေ မကောင်းဖြစ်နေချိန်တွင် သွားရောက်မစိန်ခေါ်လိုသဖြင့် ပါးစပ်ကို လိမ္မာပါးနပ်စွာ ပိတ်လိုက်သည်။

"ဟေး... ချန်းရှီ၊ လွီပုအပေါ် မင်းရဲ့ နားလည်ထားမှုအရ ဆိုရင် တစ်ခုခု အကြံဉာဏ်ရှိလား"

ကွမ်းယု၏ ပြောပြချက်ကို ကြားပြီးနောက် ရှိနေသူအားလုံး တိတ်ဆိတ်သွားသည်ကို မြင်သောအခါ ချန်းရှီက မတတ်သာဘဲ

"အကယ်၍ နည်းလမ်းသာ ရှိမယ်ဆိုရင် ငါဘာလို့စိတ်အနှောင့်အယှက် ဖြစ်နေပါဦးမလား"

ဟွာရှုံကလည်းမတတ်သာသည့် လေသံဖြင့်ထပ်ပြောလိုက်သည်။

"မင်းတို့အားလုံး ဒီနေ့ လွီပုရဲ့ ကြောက်မက်ဖွယ်ကောင်းမှုကို ခံစားလိုက်ရတယ် မဟုတ်လား၊ အမှန်တော့ မင်းတို့ ဘာမှမသိသေးဘူး၊ တိုက်ပွဲဝင်နေတဲ့ လွီပုက ပိုလို့တောင် ကြောက်ဖို့ကောင်းသေးတယ်၊ ငါဆိုရင် အနီရောင်စစ်မြင်းက ငါ့ထက်တောင် ပိုပြီး တိုက်ခိုက်နိုင်စွမ်း ရှိမလားလို့ အမြဲတမ်း သံသယဝင်မိတယ်"

"..."

"..."

"..."

ကွမ်းယု၊ ကျန်းဖေးနှင့် ကျောက်ယွင်တို့အားလုံးက ဟွာရှုံကို စိုက်ကြည့်လိုက်ကြသည်။ သာမန်ကိုယ်တွင်းအသက်ရှုဓာတ် ထုတ်ဖော်ခြင်း အဆင့်ရှိသော ဟွာရှုံထက်ပင် ပိုမိုပြင်းထန်လှသော မြင်းတစ်ကောင်... အဲဒါကို မြင်းတစ်ကောင်လို့ ယူဆနိုင်ပါဦးမည်လော။

"ငါ နောက်နေတာ မဟုတ်ဘူး"

ဟွာရှုံက လူလေးယောက်၏ ဖိအားပေးစိုက်ကြည့်မှုကို ခံနေရသဖြင့် ဆက်ပြောလိုက်သည်။

"နန်းတွင်းဝန်ကြီးချုပ်က အနီရောင်စစ်မြင်းကို ကယ်တင်ခဲ့လို့ အဲဒီမြင်းက သူ့ကို စီးနင်းခွင့်ပေးခဲ့တာ၊ ပြီးတော့ အနီရောင်စစ်မြင်းကို လွီပုဆီ ပေးလိုက်တဲ့အချိန်တုန်းက နန်းတွင်းဝန်ကြီးချုပ်ဟာ လွီပုက အဲဒီမြင်းကို ယဉ်ပါးအောင် လုပ်နိုင်လိမ့်မယ်လို့ ဘယ်တုန်းကမှ မထင်ခဲ့ဘူး"

"မင်းပြောချင်တာက အဲဒီမြင်းက လွှမ်းမိုးခြင်းချီအဆင့် ရှိနေနိုင်တယ်လို့ ပြောတာလား"

ကျောက်ယွင်က သူ့မျက်နှာ ကြွက်သားများ တုန်ခါသွားသလို ခံစားလိုက်ရသည်။ ဒါက မြင်းတစ်ကောင် ဟုတ်သေးရဲ့လား။ သူသည် လွှမ်းမိုးခြင်းချီအဆင့်သို့ ရောက်ရှိပြီးနောက် သူ့ဆရာ ထုံယွမ်က သူ့အတွက် ညဘက်အလင်းဆောင်တဲ့ ကျောက်စိမ်းခြင်္သေ့မြင်းကို ပြင်ဆင်ပေးခဲ့စဉ်က သူ မည်မျှ ဝမ်းသာပီတိဖြစ်ခဲ့ရသည်ကို ပြန်လည်အမှတ်ရမိသည်။ ကျောက်ယွင်၏ဆရာသည် ညဘက်အလင်းဆောင်တဲ့ ကျောက်စိမ်းခြင်္သေ့မြင်းကို ဖမ်းမိရန် လွင်ပြင်ကျယ်ကြီးပေါ်တွင် တစ်နှစ်ပတ်လုံး အချိန်ဖြုန်းခဲ့ရပြီး ကျောက်ယွင်ကိုယ်တိုင် လွှမ်းမိုးခြင်းချီအဆင့်သို့ စတင်ရောက်ရှိခါစ အချိန်၌ပင် ထိုမြင်းကို ယဉ်ပါးအောင် ပြုလုပ်ရန် အချိန်အတော်အတန် ယူခဲ့ရသည်ကို လူတိုင်း သိထားသင့်သည်။

အကယ်၍ ၎င်းက လွှမ်းမိုးခြင်းချီအဆင့်ရှိသော မြင်းတစ်ကောင်သာ ဖြစ်ပါက ကျောက်ယွင်အနေဖြင့် သူ့လက်ရှိ စွမ်းအားနှင့်ပင် ၎င်းကို ယဉ်ပါးအောင် ပြုလုပ်ရန် အနည်းဆုံး ရက်ဝက်ခန့် လိုအပ်မည်ဟု တွေးမိသည်။ လွှမ်းမိုးခြင်းချီအဆင့်ရှိသော ညဘက်အလင်းဆောင်တဲ့ ကျောက်စိမ်းခြင်္သေ့မြင်းသည် ကျောက်ယွင်၏ ကနဦး လွှမ်းမိုးခြင်းချီအဆင့်ထက် မနိမ့်ကျခဲ့လျှင် အနီရောင်စစ်မြင်းက မည်မျှအထိ ကြောက်မက်ဖွယ်ကောင်းနေမည်နည်း။

"ဖြစ်နိုင်တယ်"

ဟွာရှုံက ဝန်ခံလိုက်သည်။

"ဘာပဲဖြစ်ဖြစ်... တစ်ခါတုန်းက နန်းတွင်းဝန်ကြီးချုပ် မရှိတဲ့အချိန်မှာ ငါ အဲဒီမြင်းကို ခိုးစီးဖို့ ကြိုးစားခဲ့ဖူးတယ်၊ ဒါပေမဲ့ အဲဒီမြင်းရဲ့ လှည့်စားမှုကို ခံလိုက်ရတယ်လေ"

ဟွာရှုံက သူ၏ ရှက်စရာကောင်းသော အတိတ်ကို မျှဝေလိုက်သည်။

"ကဲ... အဲဒီအချက်ကို စိတ်ထဲမှာထားပြီး လွီပုရဲ့ စွမ်းအားကို ဆန်းစစ်ကြည့်ရအောင်၊ ကောင်းပြီ... အင်အားများတာက ကျွန်တော့်ကို မကြောက်လန့်စေပါဘူး၊ အင်အားနည်းတာကသာ စိုးရိမ်စရာဖြစ်တာ၊ ဒါကြောင့် ပြောကြပါဦး... သူ့ကို ရင်ဆိုင်လို့ ရနိုင်မလား၊ မရဘူးလား"

ချန်းရှီက ဝိုင်တစ်ခွက်စီ လောင်းထည့်ပေးရင်း ပြောလိုက်သည်။ ချန်းရှီ၏ အမြင်အရ လျှိုပေ့သည် သူ ကယ်တင်ခဲ့သော စစ်ပွဲသခင်များ၏ စခန်းတွင် ပျော်ရွှင်နေဆဲ ဖြစ်နိုင်သည်။

"အကွက်တစ်ရာအတွင်းမှာ ငါ ခန့်မှန်းကြည့်တာကတော့..."

ကျန်းဖေးက စကားစလိုက်ပြီး ၎င်း၏ မျက်နှာက ညိုမှောင်သွားသည်။

"ငါ့အတွက်လည်း အတူတူပဲ ဖြစ်လိမ့်မယ်"

ကွမ်းယုက သက်ပြင်းချလိုက်သည်။

"မင်းကော ဘယ်လိုလဲ ဇီလုံ"

ချန်းရှီက ကျောက်ယွင်ဘက်သို့ လှည့်ကာ မေးလိုက်ရာ ကျောက်ယွင်က ပါးစပ်ကို ဟလိုက်သော်လည်း စကားမဆိုချေ။

"မင်း သူ့ကို အနိုင်ယူနိုင်မလား၊ ဒါမှမဟုတ်..."

ကျောက်ယွင်၏ မျက်နှာပေါ်တွင် စိတ်ပျက်လက်ပျက် အပြုံးတစ်ခု ဖြစ်ပေါ်လာပြီး ခေါင်းကို ခါယမ်းလိုက်သည်။

"အကယ်၍ သူ့မြင်းက နည်းနည်းလောက် ပိုပြီး အားနည်းမယ်ဆိုရင်တော့ မျှော်လင့်ချက် အနည်းငယ် ရှိနိုင်ပါတယ်၊ အခုတော့ အနီရောင်စစ်မြင်းက တကယ်ပဲ အဲဒီအဆင့်မှာ ရှိနေတယ်ဆိုရင်တော့ တိုက်ခိုက်နေဖို့ မလိုတော့ပါဘူး၊ နဂါးနက်မြင်းကို စီးနင်းထားတဲ့ အရှင်ရှောင်းယု ဝင်စားရင်တောင် အဲဒီအဆင့်မှာပဲ ရှိလိမ့်မယ်"

ကွမ်းယုနှင့် ကျန်းဖေးတို့က မျက်မှောင်ကြုတ်လျက် စကားကို အကြီးအကျယ် ကြွားဝါနေပြီး ခါးကျိုးလုနီးပါး ဖြစ်နေသော သူတို့ရှေ့မှ ချောမောလှပသည့် လူငယ်လေးကို စိုက်ကြည့်လိုက်ကြသည်။ အကယ်၍ ချန်းရှီသာ ထိုနေရာတွင် မရှိပါက ထိုလူနှစ်ယောက်သည် မည်သူက ပို၍ အရည်အချင်းရှိသည်ကို သိရန် သေချာပေါက် စိန်ခေါ်ကြပေလိမ့်မည်။

"ဇီလုံ... မင်းရဲ့ အကွက်တစ်ခုလောက် ပြပါဦး"

ကွမ်းယုနှင့် ကျန်းဖေးတို့၏ မျက်နှာပေါ်မှ မကျေနပ်မှုကို သတိပြုမိသဖြင့် ချန်းရှီက ပြောလိုက်သည်။ သို့သော်လည်း သူကိုယ်တိုင်သာ ထိုချောမောလှပသော လူငယ်လေး၏ ပြင်းထန်လှသော စွမ်းအားကို မသိခဲ့ပါက ဤသို့ တောင်းဆိုမိမည် မဟုတ်ချေ။

ကျောက်ယွင်က ခေါင်းကို ကုတ်ရင်း ပြန်လည်ဖြေကြားလိုက်သည်။

"ဇီချွမ်... မင်းက ငါ့ရဲ့ စွမ်းအားကို ဘာလို့ ဒီလောက်တောင် သေချာနေရတာလဲ၊ ငါ့ရဲ့ အရည်အချင်းတွေကိုလည်းမင်းကိုမပြသခဲ့ဖူးပါဘူး”

သူက ဤသို့ ပြောလိုက်သော်လည်း ကျောက်ယွင်က မြားတစ်စင်းကို ဆွဲလိုက်သကဲ့သို့ လှုပ်ရှားမှုတစ်ခု ပြုလုပ်လိုက်ရာ ၎င်း၏ လက်ထဲတွင် ငွေပြာရောင် မြားတစ်စင်း ပေါ်ပေါက်လာသည်။

ထိုအရာကို မြင်သောအခါ ကွမ်းယုနှင့် ကျန်းဖေးတို့က ချက်ချင်းပင် အရှုံးပေးလိုက်ကြသည်။ ထိုအကွက်သည် ယခင်က လွီပု အသုံးပြုခဲ့သော အကွက်နှင့် ထပ်တူပင် ဖြစ်သည်။ သူတို့သည် ထိုအကွက်ကို စမ်းသပ်ကြည့်ခဲ့ဖူးပြီး ၎င်းကို ကျွမ်းကျင်ရန် အလွန်ခက်ခဲကြောင်း တွေ့ရှိခဲ့ရသည်—ပုံသဏ္ဌာန် မရှိသော အရှုပ်အထွေးတစ်ခုကိုသာ ဖန်တီးနိုင်ခဲ့ပြီး စနစ်တကျ ပုံဖော်နိုင်ခြင်း မရှိခဲ့ချေ။

"ဟားဟား... အဲဒါလား"

ချန်းရှီက ရယ်မောလိုက်သည်။

"ကျွန်တော် အတိတ်တုန်းက အားလပ်တဲ့ အချိန်အနည်းငယ်ရှိလို့ ကမ္ဘာပေါ်က အရေးပါတဲ့ ပုဂ္ဂိုလ်တွေကို တွက်ချက်ဖို့ ဗေဒင်အတတ်ကို အသုံးပြုခဲ့ဖူးတယ်၊ အချို့နာမည်တွေကို ကျွန်တော် မသိနိုင်ခဲ့ပေမဲ့ သူတို့ ကျွန်တော့်ရှေ့ကို ရောက်လာတဲ့အခါမှာတော့ ကျွန်တော် မှတ်မိနိုင်ပါတယ်၊ ပြီးတော့ ခင်ဗျားတို့ လေးယောက်ကလည်း အဲဒီစာရင်းထဲမှာ သေချာပေါက် ပါဝင်နေတယ်လေ"

ချန်းရှီက အဓိပ္ပာယ်မရှိသော စကားအချို့ကို လျှောက်ပြောလိုက်သော်လည်း အခြားသူများ ယုံကြည်သည်ဖြစ်စေ၊ မယုံကြည်သည်ဖြစ်စေ သူကိုယ်တိုင်ကတော့ ယုံကြည်နေပုံရသည်။

"အာ... ဟုတ်လား"

လူလေးယောက်က လွီပု၏ ကိစ္စရပ်ကို ခေတ္တဘေးဖယ်ထားကာ ချန်းရှီကို စိတ်ဝင်တစား ကြည့်လိုက်ကြသည်။ ထိုလွီပု၏ ကိစ္စကတော့ လောလောဆယ် ဖြေရှင်းနိုင်မည့်ပုံ မပေါ်သေးချေ။