ပြိုင်ပွဲ၏ ပြင်းထန်မှုက စက္ကန့်နှင့်အမျှ ပိုမိုမြင့်တက်လာနေသည်။ ကားပြိုင်ပွဲဟူသည် ခရီးစဉ်တစ်လျှောက်လုံး အမြန်နှုန်းနှင့် စွမ်းဆောင်ရည်ကို တည်ငြိမ်စွာ ထိန်းသိမ်းထားနိုင်ခြင်းပင် ဖြစ်ရာ၊ ထိုအချက်ကို လူကာကွင်းပတ်တိုင်းတွင် ခံစားသိရှိနေသည်။ နားကွဲမတတ် ဆူညံနေသော အင်ဂျင်သံများနှင့် ပရိသတ်များ၏ အားပေးသံများက တစ်ပတ်ပြီးတစ်ပတ် ရောယှက်နေကာ သူ့အတွက်တော့ ဤပြိုင်ပွဲကြီးသည် အဆုံးမရှိလည်ပတ်နေသော စက်ဝိုင်းတစ်ခုလိုပင်။ ကျော်တက်သွားတိုင်း ထွက်ပေါ်လာသော ပရိသတ်များ၏ ဟစ်ကြွေးသံများသည် အခြားပြိုင်ကားမောင်းသူများကိုသာမက သူ့အပေါ်တွင်လည်း လွှမ်းမိုးမှုရှိနေကြောင်း လူကာ သတိပြုမိလိုက်သည်။ ပထမနေရာရရန်သာမက ပရိသတ်များကိုပါ စိတ်လှုပ်ရှားစေရန်နှင့် နိုင်ပွဲရသလိုမျိုး ဖျော်ဖြေတင်ဆက်လိုသော ထူးဆန်းသည့် စိတ်ဆန္ဒတစ်ခုက သူ့အထဲတွင် ပေါ်ပေါက်လာခဲ့သည်။ သူက ထိုထူးဆန်းသည့် ခံစားချက်ကို ဖယ်ရှားလိုက်ပြီး သူ့ကားဆီသို့သာ အာရုံပြန်စိုက်လိုက်သည်။ အကြိမ် (၂၀) မြောက် ကွင်းပတ် ပြီးဆုံးတော့မည်ဖြစ်သော်လည်း ထိပ်ဆုံးသုံးဦးက အဝေးကြီးတွင် ကျန်ရစ်နေဆဲပင်။

[ ကိုယ်ခံစွမ်းအား +1 ]

နေရာချထားသည့် မျဉ်းကွက်ပေါ်မှ အရှိန်ဖြင့် ဖြတ်သန်းသွားရင်း လူကာသည် စတီယာရင်ကို တင်းတင်းကျပ်ကျပ် ဆုပ်ကိုင်ထားကာ ရှေ့ရှိ ပြောင်လက်နေသော အနက်နှင့်အပြာရောင် ကားကို ကျော်တက်ရန် နည်းလမ်းပေါင်းစုံကို စိတ်ထဲတွင် စဉ်းစားနေခဲ့သည်။

(၁၁) နေရာက ငါ့အတွက်ပဲ! ဟု သူ ပြင်းပြင်းထန်ထန် တွေးလိုက်သည်။

"ငါ့ပြိုင်ဘက် ဘယ်ဘက်ကို ကွေ့မလဲဆိုတာ ကြိုသိနိုင်တဲ့ စွမ်းရည်လေးများ ရှိရင် သိပ်ကောင်းမှာပဲ" ဟု သူ တိုးတိုးလေး ရေရွတ်လိုက်သည်။

[ ပိုင်ရှင်သည် ပြိုင်ဘက်၏ လှုပ်ရှားမှုများကို ခန့်မှန်းနိုင်သော စွမ်းရည်များကို ဖွင့်မထားသေးပါ ]

နေပါဦး၊ အဲဒီလို စွမ်းရည်မျိုး တကယ်ရှိတယ်ပေါ့လေ။ မိုက်တာပေါ့။

[ အဆင့် (၁၃) မှ ကပ်လာနေပြီ ]

[ ပိုင်ရှင်သည် ပြိုင်ဘက်၏ အချက်အလက်များကို ဖော်ထုတ်နိုင်သော စွမ်းရည်များကို ဖွင့်မထားသေးပါ ]

လူကာ၏ မျက်လုံးများက ဘေးကြည့်မှန်ဆီသို့ အမြန်ရောက်သွားရာ၊ တောက်ပသော အနက်နှင့်ခရမ်းရောင် ကားတစ်စီးက ပြင်းထန်သော စိတ်ပိုင်းဖြတ်မှုဖြင့် သူ့ဆီသို့ အရှိန်ပြင်းပြင်းဖြင့် ဦးတည်လာနေသည်ကို တွေ့လိုက်ရသည်။ လေထုကို ခွင်းကာ ထွက်ပေါ်လာသော အင်ဂျင်အရှိန်တင်သံနှင့်အတူ ပရိသတ်များ၏ ဟစ်ကြွေးသံများက ရူးသွပ်စွာ ပေါက်ကွဲထွက်လာသည်။

လူကာ တိုးတိုးလေး ကျိန်ဆဲလိုက်သည်။ လုံးဝ မမှားနိုင်ဘူး— ဟိုလူက DRS စနစ်ကို ဖွင့်လိုက်ပြီပဲ။

အနက်နှင့်ခရမ်းရောင်ကား၏ နောက်ဘက်တောင်ပံက ပွင့်သွားရာ ဖြောင့်တန်းသောလမ်းတွင် အလွန်အရေးပါသော အရှိန်တစ်ခုကို ရရှိသွားစေသည်။ ထိုကားမောင်းသူ၏ ရည်ရွယ်ချက်က အကွေ့အကောက်များဆီသို့ မရောက်မီ သူ့ကို အမြန်ကျော်တက်သွားရန် ဖြစ်ကြောင်း လူကာ သိထားသည်။ သပ်ရပ်မှုနှင့် တိကျမှုမရှိပါက ကြမ်းတမ်းသော အရှိန်သက်သက်မျှဖြင့် အသုံးမဝင်တော့သည့် ဘယ်ညာကွေ့ရမည့် အကွေ့အကောက်များဆီသို့ ရောက်သည်အထိ သူ့ကို တားဆီးထားရန်သာ လူကာ လိုအပ်သည်။

လူကာသည် သူ၏ အဆင့် (၁၂) နေရာကို ကာကွယ်ရန် ကားလမ်း၏ အလယ်ဗဟိုဆီသို့ အလိုလို ရွှေ့လိုက်ပြီး၊ တရှိန်ထိုး လာနေသော ကား ဝင်တိုးရန် နေရာလပ် လုံးဝမကျန်အောင် ပိတ်ဆို့လိုက်သည်။ အနက်နှင့်ခရမ်းရောင်ကားက ပိုမိုနီးကပ်လာကာ ဘယ်ဘက်သို့ ကွေ့တော့မယောင် ဟန်ပြလိုက်သော်လည်း၊ လူကာက ရှေ့ဆက်တိုးလာမှုကို တားဆီးနိုင်ရုံမျှ အနည်းငယ် ရွှေ့ကာ ပိတ်လိုက်သည်။ စက်ရုပ်ကြီးနှစ်ခုက တစ်ခုနှင့်တစ်ခု ကစားနေသကဲ့သို့ ရှိရာ ပရိသတ်များမှာလည်း ရူးသွပ်မတတ် အော်ဟစ်အားပေးနေကြသည်။

ဖြောင့်တန်းသောလမ်းက ကုန်ဆုံးသွားပြီဖြစ်ပြီး၊ ရှောင်လွှဲ၍မရသော ထက်မြက်သည့် အကွေ့များက မြင်ကွင်းထဲသို့ ဝင်လာသည်။ လူကာသည် ဘရိတ်မနင်းသေးဘဲ အနောက်မှ ကားမောင်းသူက အရင်စတင်လှုပ်ရှားလာသည်အထိ စောင့်ဆိုင်းနေခဲ့သည်။ တင်းမာမှုများ လျော့ကျသွားသည်ကို ခံစားလိုက်ရသည်နှင့်၊ လူကာသည် လီဗာကို ဖြည်းညှင်းစွာ လျှော့ချလိုက်ပြီး အန္တရာယ်ကြီးလှသော အကွေ့နှင့် လိုက်လျောညီထွေဖြစ်စေရန် စတီယာရင်ကို ရုတ်တရက် ချိုးကွေ့လိုက်သည်။

သူ့ကို အံ့အားသင့်စေသည်မှာ၊ အနောက်မှ ကား၏ ဟိန်းဟောက်သံနှင့် အရှိန်တင်သံက ဆူညံနေဆဲပင် — အလွန်ဆူညံလွန်းနေသည်။ သူ၏ မျက်လုံးများက မှန်ဆီသို့ ချက်ချင်း ရောက်သွားသည်။

ဘာ... ဒီအရူးက ဘာတွေလုပ်နေတာလဲ။

အနက်နှင့်ခရမ်းရောင်ကားသည် ပြင်းထန်သော အကွေ့အတွက် အရှိန်ကို ကောင်းစွာ မလျှော့ဘဲ၊ လူကာ အရှိန်ခေတ္တလျှော့လိုက်ချိန်ကို အခွင့်ကောင်းယူရန် ရှင်းလင်းစွာ ရည်ရွယ်ထားသည်။ မဆင်မခြင် အရှိန်ဖြင့် ရှေ့သို့ ထိုးထွက်လာသော ရဲတင်းလွန်းသည့် လုပ်ရပ်ကြောင့် ပရိသတ်များမှာ အသက်ရှုမှားသွားကြသည်။

လူကာ မယုံနိုင်အောင် ဖြစ်သွားသည်။ သူက ချက်ချင်း တုံ့ပြန်ရန် အတင်းအကျပ် ဖိအားပေးခံရပြီး၊ အလွန်အမင်း ဂနာမငြိမ်ဖြစ်မနေဘဲ တွက်ချက်ထားသည့်အတိုင်း ပြိုင်ဘက်ကို နောက်ဆုတ်စဉ်းစားသွားစေရန် လုံလောက်ရုံမျှသာ သူ၏ ကားကို ထောင့်ချိုးကာ လမ်းကြောင်းကို ပိတ်လိုက်သည်။ လူကာ၏ သိမ်မွေ့သော ကိုယ်ထည်ရွေ့လျားမှုက ပြိုင်ဘက်၏ လမ်းကြောင်းကို ပြီးပြည့်စုံစွာ ပိတ်ဆို့သွားပြီး၊ အထင်ရှားဆုံး ထောင့်ကို ဖြတ်တောက်လိုက်သည်။

အနက်နှင့်ခရမ်းရောင် ကားမောင်းသူသည် ဘရိတ်ကို ပြင်းပြင်းထန်ထန် နင်းချလိုက်ရာ၊ အကွေ့ကို လုံးဝမပိတ်မီ အခြား ဟာကွက်တစ်ခုထဲသို့ တိုးဝင်ရန် ကြိုးပမ်းရင်း ကားမှာ ပြင်းထန်စွာ တုန်ခါသွားသည်။ သို့သော် လူကာက မည်သည့် အခွင့်အရေးမျှ ချန်မထားခဲ့ပေ။ နေရာလပ်က အလွန်ကျပ်တည်းနေပြီး၊ ကျန်ရှိနေသော တစ်ခုတည်းသော ရွေးချယ်စရာမှာ အကွေ့၏ တစ်ဖက်ခြမ်းရှိ သေးငယ်သော လမ်းကြောင်းလေးထဲမှ အသည်းအသန် တိုးထွက်ရန်သာ ဖြစ်သည်။

"နောက်ဆုတ်လိုက်စမ်းပါကွာ" လူကာက စတီယာရင်ကို တင်းကြပ်စွာ ဆုပ်ကိုင်ရင်း တစ်ဖက်လူ ကြားနိုင်စေရန် ဆန္ဒပြုလျက် လေချွန်သံဖြင့် ပြောလိုက်သည်။

ယခုအခါ သူတို့သည် ဘယ်ညာ အကွေ့များမှ ထွက်ခွာလာကြပြီဖြစ်ပြီး အဆင့် (၁၂) နေရာက သူနှင့် ဝေးကွာသွားတော့မည်ကို လူကာ သိနေသည်။ ဖြောင့်တန်းသော လမ်းပေါ်ရောက်သည်နှင့်၊ အနက်နှင့်ခရမ်းရောင် 'ဒယ်လာရာ' ကားသည် DRS စနစ်ဖြင့် ၎င်း၏ အရှိန်ကို သေချာပေါက် ထုတ်လွှတ်တော့မည် ဖြစ်သည်။

နောက်မှကားက အင်အားသုံး၍ ဖြတ်ကျော်ရန် ကြိုးပမ်းနေစဉ်မှာပင်၊ အဆင့် (၁၄) နှင့် (၁၅) ရှိ စိန်ခေါ်သူ နောက်ထပ်နှစ်ဦးက အမဲလိုက်ကောင်များ သားကောင်ထံသို့ ရောက်လာသကဲ့သို့ ပြင်းထန်သော အရှိန်ဖြင့် ကွာဟချက်ကို ပိတ်လိုက်ကြသည်။ အသစ်ရောက်လာသော ပြိုင်ဘက်များသည် ယခင်အကွေ့ကို ပြီးပြည့်စုံစွာ အသုံးချခဲ့ပြီး၊ နေရာလုရန် ဆာလောင်မွတ်သိပ်နေကြသည်။

ဟိန်းဟောက်နေသော စက်ရုပ်ကြီး သုံးခု ပြည့်နှက်နေသည့် ဘေးကြည့်မှန်ကို တစ်ချက်အကြည့်တွင် လူကာ၏ နှလုံးခုန်နှုန်းက ချက်ချင်း မြင့်တက်သွားသည်။ ပရိသတ်များ၏ နားကွဲမတတ် ဆူညံသံများက တင်းမာမှုကို ပိုမိုဆိုးရွားစေရုံသာ။

"... အိုး.. ဂျွန်ရေ၊ ကျွန်တော်တို့ အလယ်အလတ်အဆင့်ရဲ့ အထက်ပိုင်းကို အာရုံပြန်ပြောင်းကြည့်ရအောင်ဗျာ။ အဲဒီမှာ အရမ်းကို ကျပ်တည်းနေပြီ။ ရီတိုနာ ပြိုင်ကားအဖွဲ့က မောင်းသူက ထရမ်ပိုစ့်လူသစ်လေးရဲ့ ဂုတ်ကို ဖိထားပြီဗျ။ နေပါဦး— သူ့ဘေးက ကပ်လာတာ အသင်းဖော် နှစ်ယောက်လား။ ဝါး.. ဂျွန်ရေ.. ခရစ္စတင်ဆင် ရဲ့ အသင်းဖော် ဗိုလင်စကီး တော့ အခက်တွေ့နေပြီ။ သူတော့ အလယ်မှာ အညှပ်ခံလိုက်ရပြီ။ မြန်မြန်မလှုပ်ရှားရင် သူတော့ ဒုက္ခလှလှတွေ့တော့မယ်လို့ ထင်တယ်...!"

ရက်စက်ကြမ်းကြုတ်စွာ ရောက်ရှိလာသော ထိုကားနှစ်စီးမှာ အမှန်တကယ်ပင် အသင်းဖော်များဖြစ်ကြပြီး၊ ၎င်းတို့က ရီတိုနာကားကို တစ်စီးက ဘယ်ဘက်မှ၊ နောက်တစ်စီးက ညာဘက်မှနေ၍ တမင်သက်သက် ညှပ်ပိတ်လိုက်ကြသည်။

"မဖြစ်နိုင်တာ"

မှန်ထဲတွင် ဖြစ်ပေါ်လာသော ပရမ်းပတာအခြေအနေကို ကြည့်ရင်း လူကာ တိုးတိုးလေး ရေရွတ်လိုက်သည်။ သူ့အနောက်တွင် အပြင်းအထန် တိုက်ပွဲကြီးတစ်ခု ဖြစ်ပွားလာတော့သည်။

ကားသုံးစီးသည် ဖြောင့်တန်းသောလမ်းတစ်လျှောက် အော်ဟစ်မောင်းနှင်လာကြရာ၊ သူတို့၏ ပြောင်လက်နေသော ဒယ်လာရာ ကိုယ်ထည်များသည် တစ်စီးနှင့်တစ်စီး လက်မအနည်းငယ်သာ ကွာဝေးပြီး တာယာများမှာလည်း နမ်းရှိုက်မိမတတ် နီးကပ်နေကြသည်။ ရန်လိုနေသော နောက်ကလိုက်သူများကြားတွင် အညှပ်ခံထားရသည့် အနက်နှင့်ခရမ်းရောင်ကားမှာ လမ်းကြောင်းပေါ်တွင် နေနိုင်ရန် ရုန်းကန်နေရသည်။ ဗိုလင်စကီးသည် အသည်းအသန် ရုန်းကန်ကာ ထိန်းချုပ်မှု ပြန်ရရန် စတီယာရင်ကို ဆွဲလှည့်ခဲ့သော်လည်း၊ ဖိအားများက အလွန်များပြားလွန်းနေသည်။

ကားမှာ ပြင်းထန်စွာ ချော်ထွက်သွားပြီး၊ ထိန်းချုပ်မှုမဲ့ကာ လည်ထွက်သွားချိန်တွင် တာယာများ ပွတ်တိုက်သံက စူးရှစွာ ထွက်ပေါ်လာသည်။ ပြောင်လက်နေသော ကိုယ်ထည်သည် ခရမ်းရောင်ဝေဝါးဝါးအဖြစ် လိမ်ကောက်သွားကာ ကားလမ်းကြောင်းပေါ်မှ ကယ်ရာမဲ့စွာ လွင့်စင်သွားခဲ့သည်။ ရင်ထိတ်ဖွယ် ကျယ်လောင်သော ဆောင့်အောင့်သံကြီးနှင့်အတူ ဘယ်ဘက်ရှိ အတားအဆီးကို ဝင်တိုက်မိသွားရာ၊ မီးပွားများ လွင့်စင်ထွက်လာပြီး ကျိုးပဲ့သွားသော အပိုင်းအစများမှာ ကားလမ်းတစ်လျှောက် ပြန့်ကျဲသွားသည်။

ပြိုင်ပွဲက ၎င်း၏ ပထမဆုံးသော ထိခိုက်ပျက်စီးမှုကို ကြုံတွေ့လိုက်ရချိန်တွင် ပရိသတ်များမှာ တုန်လှုပ်ချောက်ချားစွာ အော်ဟစ်လိုက်ကြပြီး၊ သူတို့၏ အသက်ရှုမှားသံများက လေထုထဲတွင် ပြည့်နှက်သွားသည်။

"... အိုး.. ဟိုမှာ ကြီးမားတဲ့ မတော်တဆမှုကြီး ဖြစ်သွားပြီ ဂျွန်။ ဗလက် ဗိုလင်စကီး က သူ့အသင်းအတွက် အရာအားလုံးကို လက်လွတ်ဆုံးရှုံးသွားခဲ့ပြီ— ကားလည်ထွက်သွားပြီး အတားအဆီးကို တိုက်ရိုက်ဝင်တိုက်သွားတာပဲ။ ဒါက အသက်အန္တရာယ် မရှိနိုင်ပေမယ့် ပြင်းထန်တဲ့ တိုက်မိမှုပါပဲ။ ပရိသတ်တွေကတော့ ပျော်ရွှင်စွာနဲ့ မတ်တပ်ထရပ်နေကြပြီ... အံ့ဩစရာ အလှည့်အပြောင်းပဲ။ ထရမ်ပိုစ့် လူသစ်လေးရဲ့ အနောက်က လိုက်လံဖမ်းဆီးမှုဟာ အလွန်ဆိုးရွားတဲ့ အဆုံးသတ်ကို ရောက်သွားပုံပါပဲ။ ဒါဟာ ကျွန်တော်တို့ လာကြည့်ချင်တဲ့ အရာပါပဲ...!"

"... တကယ့်ကို မှင်တက်စရာပါပဲဗျာ။ ဒါက ဒီရာသီရဲ့ ပထမဆုံး အဓိကပြိုင်ပွဲလေးပဲ ရှိပါသေးတယ်။ ယာဉ်တိုက်မှုစာရင်းက စတင်နေပြီဆိုတော့... ဩဂုတ်လရောက်ရင် ဒီအရေအတွက်က ဘယ်လောက်အထိ မြင့်တက်လာမလဲ ဆိုတာ စောင့်ကြည့်ရအောင် စတိဗ်..."

ဆိုးရွားသည့် ကိစ္စတစ်ခုခု ဖြစ်ပျက်သွားသည်ကို ဂရုမစိုက်သည့်အလား၊ ပရိသတ်များက စိတ်လှုပ်ရှားစွာဖြင့် အော်ဟစ်ဟိန်းဟောက်နေကြသည်။

အဆင့် (၃၀) ကား ဖြတ်သန်းသွားသည်နှင့်တပြိုင်နက် လမ်းကြောင်းထိန်းသိမ်းရေးဝန်ထမ်းများက ကားလမ်းပေါ်သို့ ပြေးဝင်လာကြပြီး၊ တစ်ဦးက လမ်းဘေးမှနေ၍ အဝါရောင်အလံကို ဝှေ့ယမ်းပြနေသည်။ ယာဉ်တိုက်မှုမှာ ဆိုးဆိုးရွားရွား ကြီးမားလှသည်မဟုတ်သော်လည်း၊ ရီတိုနာ ယာဉ်မောင်းအား ပြိုင်ပွဲမှ ထွက်ခွာသွားစေရန် လုံလောက်ခဲ့ပြီး၊ သူက စိတ်ပျက်လက်ပျက်ဖြင့် ခေါင်းခါရမ်းနေချိန်တွင် ကင်မရာများက သူ့ဆီသို့ အာရုံစိုက်လာကြသည်။ သူ၏ အနောက်တွင်၊ တစ်ယောက်စီးကားလေး၏ စက်ဖုံးမှ မီးခိုးငွေ့များ ထွက်ပေါ်နေသည်။

အခြေအနေကို ထိန်းချုပ်ထားနိုင်ဆဲဖြစ်ပြီး၊ လုံခြုံရေးကားကို ချက်ချင်းစေလွှတ်လိုက်သည်။ နောက်ထပ် ပြိုင်ကားများ အရှိန်ဖြင့် မရောက်လာမီ၊ ပျက်စီးသွားသောကားကို ပြိုင်ကွင်းထဲမှ အမြန်ဆွဲထုတ်သွားခဲ့သည်။ သို့တိုင်အောင်၊ ကားလမ်းပေါ်တွင် အပိုင်းအစအချို့ ပြန့်ကျဲနေသဖြင့် ဝန်ထမ်းတစ်ဦးက ထိုနေရာတွင် ကျန်ရစ်နေခဲ့ပြီး၊ နောက်တစ်ပတ် ပြန်ရောက်လာမည့် ဝင်လာသော ယာဉ်မောင်းများကို သတိပေးရန် အဝါရောင်အလံကို အားသွန်ခွန်စိုက် ဝှေ့ယမ်းပြနေသည်။

ထိုကွင်းပတ် ပြီးဆုံးသွားသည်နှင့်၊ ကျန်ရှိနေသော အပိုင်းအစများကို ချက်ချင်း ရှင်းလင်းလိုက်ရာ၊ ကတ္တရာလမ်းမကြီးမှာ တစ်ဖန် ပြန်လည်ချောမွေ့ပြီး ရှင်းလင်းသွားသည်။ ထိုဖြစ်ရပ်ကြောင့် နောက်တွန့်သွားခြင်းမရှိသော ပရိသတ်များမှာ အတားအဆီးများကို ထုရိုက်ကာ၊ ဗုံများတီးလျက် အသံကုန်ဟစ်ကြွေးနေကြသည်။ ထိုသို့သော ပြဇာတ်ဆန်ဆန် အလှည့်အပြောင်းကို မျက်မြင်တွေ့လိုက်ရခြင်း၏ ရင်ခုန်စိတ်လှုပ်ရှားမှုက သူတို့၏ စိတ်ကို ပိုမိုနိုးကြွစေကာ၊ ပရမ်းပတာအခြေအနေတွင် ပျော်ရွှင်စွာ ပါဝင်ဆင်နွှဲရင်း သွေးကြောများထဲတွင် အက်ဒရီနယ်လင် (စိတ်ဓာတ်တတ်ကြွသောဟော်မုန်း) များ စီးဆင်းလာစေသည်။

"အနည်းဆုံးတော့ သူက မင်းအတွက် ပြဿနာ မဟုတ်တော့ဘူးလေ။ ရီတိုနာ ယာဉ်မောင်းတွေက တစ်ခါတလေတော့လည်း ကောင်းသားပဲ"

[ (၂၅) ကြိမ်မြောက် ကွင်းပတ် ]

[ အချိန်နှင့်တစ်ပြေးညီ ပြသထားသော အချက်အလက်များ:

• ယာဉ်အမြန်နှုန်း: 250 km/h

• နှလုံးခုန်နှုန်း: 140 bpm

• လုပ်ငန်းလည်ပတ်မှု အခြေအနေ: 80% (ကောင်းမွန်သည်)

• အသက်ရှုနှုန်း: မြင့်တက်နေသည်

• ဖြတ်သန်းပြီးသော အကွာအဝေး: 125000 မီတာ

• ကြာမြင့်ချိန်: 49 min ]

[ ကိုယ်ခံစွမ်းအား +1 ]

[ ခံနိုင်ရည် +1 ]

[ သွက်လက်မှု +1 ]

[ ခွန်အား +1 ]

[ ဉာဏ်ရည် +1 ]

လူကာ၏ စိတ်ထဲတွင် ယခုလေးတင် ဖြစ်ပျက်သွားခဲ့သည်များကို တွေးကာ ချာချာလည်နေဆဲပင်။ ထိုယာဉ်မောင်း၏ ပြိုင်ပွဲက ရုတ်တရက် အဆုံးသတ်သွားခဲ့ပြီ ဖြစ်ကြောင်း သိလိုက်ရခြင်းမှာ ခေါင်းထဲမှ မထွက်နိုင်လောက်အောင် အံ့မခန်းဖြစ်စေပြီး၊ အိပ်မက်တစ်ခုလိုပင်။ အကယ်၍ တစ်ယောက်ယောက်ကို အပြစ်တင်ရမည်ဆိုလျှင်လည်း၊ ထိုယာဉ်မောင်းကိုသာ အပြစ်တင်ရပေလိမ့်မည်။ ထိုအသင်းဖော်နှစ်ဦးသည် သေစေနိုင်လောက်သော်လည်း လုံးဝတရားဝင်သော လှည့်ကွက်တစ်ခုကို အသုံးပြုခဲ့ပြီး၊ ခွဲစိတ်ဆရာဝန်တစ်ဦး၏ တိကျမှုမျိုးဖြင့် သူ့ကို ထောင့်ကျပ်ရိုက် ညှပ်ပိတ်ခဲ့ခြင်းဖြစ်သည်။ ဖိအားများ မြင့်တက်လာချိန်တွင်၊ ယာဉ်မောင်း၏ အတွေ့အကြုံနုနယ်မှု သို့မဟုတ် ရုတ်တရက် ဆန့်ကျင်ဘက် အဟုန်ကြောင့် ထိတ်လန့်တုန်လှုပ်သွားကာ၊ ၎င်း၏ကားကို ပရမ်းပတာဖြစ်စေခဲ့ခြင်း ဖြစ်ရမည်။

အကယ်၍ ယာဉ်တိုက်မှုသာ ဒီထက်ပိုဆိုးရွားခဲ့လျှင် အခြေအနေတွေ ဘယ်လောက်တောင် ကွာခြားသွားမလဲဆိုတာကို လူကာ မတွေးဘဲ မနေနိုင်ခဲ့ပေ။ သူက ပခုံးကို အနည်းငယ် တွန့်လိုက်ပြီး၊ ထိုအတွေးကို စိတ်ထဲမှ အတင်းဖယ်ထုတ်လိုက်သည်။ လီဗာကို အဆုံးထိနင်းချလိုက်ချိန်တွင် ဆွဲငင်အား က သူ့ကို နောက်သို့ ဆွဲကပ်သွားစေပြီး ခန္ဓာကိုယ်မှာ ထိုင်ခုံနှင့် ပူးကပ်သွားကာ၊ တွက်ချက်ပိုင်းခြားထားသည့် ရှေ့မှ ကားလမ်းမဆီသို့သာ သူ၏ အာရုံကို စူးစိုက်ထားလိုက်သည်။

ထိုယာဉ်မောင်းအတွက် သူ စိတ်မကောင်းဖြစ်မိသည်မှာ သေချာပါသည်။ သို့သော် ဤနေရာတွင် သနားကြင်နာမှုအတွက် နေရာမရှိပေ။ ထိပ်ဆုံး ၃ နေရာစာအတွက် တိုက်ပွဲဝင်ရန် အခွင့်အရေး ရှိနေဆဲဖြစ်သည်။ ထိုသို့ဖြစ်လာစေရန် အချိန်လုံလောက်စွာ ရှိနေသေးသည်။

"... ကဲ.. ထရမ်ပိုစ့်က လူသစ်လေး သူ့ဘီးတွေကို သတိထားမှ ရတော့မယ် ဂျွန်ရေ။ အေပီအက်စ်က ကောင်လေးတွေ အရှိန်နဲ့ ကပ်လာနေပြီ။ ဟိုမှာ ကြည့်လိုက်စမ်းပါဦး— အဲဒါ စာအုပ်ထဲကအတိုင်း ကွက်တိဖြစ်နေတဲ့ ညှပ်ပိတ်တဲ့ ပုံစံပဲ။ သူတို့က သူ့ကို အရင်လိုပဲ အလယ်မှာညှပ်ဖို့ တန်းစီလာနေကြပြီ။ သူ့ကို ဒီလောက်လွယ်လွယ်နဲ့ လွှတ်ပေးလိမ့်မယ်လို့ ကျွန်တော် မထင်ဘူး...!"

ဘေးကြည့်မှန်ထဲတွင် ရပ်တန့်မှုမရှိသော ဆာလောင်မွတ်သိပ်မှုများဖြင့် နီးကပ်လာနေသည့် တောက်ပနေသော အေပီအက်စ် အစိမ်းနှင့်အနက်ရောင် ကားနှစ်စီးကို မြင်လိုက်ရသည်နှင့်တစ်ပြိုင်နက်၊ လူကာ၏ မျက်လုံးများ ပြူးကျယ်သွားကာ နှလုံးခုန်များ မြန်ဆန်လာတော့သည်။