ပြိုင်ပွဲအစပိုင်းမှာပင် လူကာတစ်ယောက် ကားအုပ်စုကြီးထဲ ပါဝင်သွားခဲ့သည်။ မီးပွိုင့်ငြိမ်းသွားသည်နှင့်တစ်ပြိုင်နက် သူ၏ရင်ခုန်သံတို့ကလည်း အပြိုင်မြန်ဆန်လာသည်။ ပတ်ဝန်းကျင်တစ်ခုလုံး စိတ်လှုပ်ရှားဖွယ်အတိ ဖြစ်နေပြီး ရှေ့သို့ပြေးထွက်သွားကြသည့် ကားအင်ဂျင်သံကြီးများက လေထုထဲတွင် ဟိန်းညံသွားတော့သည်။ စတင်ထွက်ခွာရာ လမ်းကြောင်းဖြောင့်ပေါ်တွင် နေရာလုနေကြသော ကားများဖြင့် ပြည့်ကျပ်နေသည်။ လူကာသည် ရှေ့ရှိပြိုင်လမ်းပေါ်သို့သာ အာရုံစူးစိုက်ထားပြီး ကသောင်းကနင်းအခြေအနေကြားမှ ဟာကွက်တစ်ခုရှာကာ ကျွမ်းကျင်ပိုင်နိုင်စွာ မောင်းနှင်ရှောင်တိမ်းခဲ့သည်။ ပထမဆုံးအကွေ့သို့ ရောက်ချိန်တွင်တော့ သူသည် အဆင့် (၁၀) နေရာသို့ ရောက်ရှိလာခဲ့ပြီဖြစ်သည်။

"ပြိုင်ပွဲစပြီ။ ပြီးခဲ့တဲ့ရက်တွေက ငါတို့လေ့ကျင့်ထားတာတွေကို မှတ်ထားပါ။ အဲဒီအတိုင်း အသုံးချလိုက်"

ရေဒီယိုမှတစ်ဆင့် မစ္စတာမိုရစ်ဇ်၏ အသံထွက်ပေါ်လာသည်။ လူကာက ချက်ချင်းပင် သဘောပေါက်ကြောင်း အသိအမှတ်ပြု တုံ့ပြန်လိုက်ပြီး စတီယာရင်ကို တင်းကြပ်စွာ ဆုပ်ကိုင်လိုက်သည်။ သူက ဘရိတ်ကိုအသာလျှော့လိုက်ကာ အကွေ့နှင့်အံဝင်ခွင်ကျဖြစ်စေရန် ကားကို ညင်သာစွာစောင်းလိုက်သည်။ သို့သော် သူ၏နေရာကို ထိန်းထားနိုင်ပြီဟု ထင်လိုက်ချိန်မှာပင် နောက်ဘက်မှ ကားခြောက်စီးခန့်က အရှိန်တင်ကာ ကွေ့ပတ်ကျော်တက်သွားကြသဖြင့်၊ မျက်စိတစ်မှိတ်အတွင်းမှာပင် လူကာသည် အဆင့် (၁၆) သို့ ကျဆင်းသွားတော့သည်။

"...အက်ဒမ်စ်ကတော့ ဦးဆောင်နေရာကို ကျွမ်းကျင်စွာ ထိန်းထားနိုင်ပြီး သူ့နောက်မှာတော့ ဟန်က ကပ်ပါလာပါတယ်။ အာရွန်ဆန်က ဟန်ရဲ့ လေခုခံမှုကင်းမဲ့ဇုန်ကနေ စောစောစီးစီး ဖြတ်တက်ဖို့ ကြိုးစားနေပေမဲ့၊ ဒါစတက်ပန်ကလည်း စောင့်ကြည့်ရမယ့် အနေအထားမှာ ရှိနေပါတယ်...!"

ကားတာယာများ ပွတ်တိုက်သံက နားထဲတွင် ဆူညံနေပြီး ကားအရောင်အသွေးစုံတို့ သူ့ဘေးမှ ဖြတ်ပြေးသွားချိန်၌ လူကာက အသက်ပြင်းပြင်းတစ်ချက်ရှူကာ စတီယာရင်ကို တည်ငြိမ်စွာ ဆုပ်ကိုင်ထားလိုက်သည်။ 'ပထမတစ်ပတ်ပဲ ရှိသေးတာကို၊ ဘာလို့ ဒီလောက်လောနေကြတာလဲကွ'။ သူက ဘေးကြည့်မှန်ကို လှမ်းကြည့်လိုက်ရာ ပြိုင်ဘက်အသင်းမှ အနီရောင်ကားတစ်စီးကို တွေ့လိုက်ရသည်။ သူ့ထံမှ ဟာကွက်တစ်ခုခုပေါ်လာမည့်အချိန်ကို အမိအရဆုပ်ကိုင်ရန် အသင့်စောင့်နေသော ကြမ်းတမ်းသည့် ပြိုင်ကားမောင်းသူတစ်ဦးက ကပ်လာခြင်းဖြစ်သည်။ သူ့အနေဖြင့် တည်တည်ငြိမ်ငြိမ်ထားရန် လိုအပ်ကြောင်း သူသိသည်။ ပြိုင်လမ်းနှင့် ပြိုင်ပွဲက အစပဲရှိသေးပြီး ရှေ့တွင် နောက်ထပ် အပတ် ၅၀ ကျန်သေးသည်။ လူကာသည် ဘာ့ဂ်ဝေါလ်ဒရင်းကွင်းထဲတွင် မိနစ် ၉၀ တိုင်တိုင် အချိန်ဖြုန်းနိုင်သေးသည်။

နောက်ထပ် လမ်းကြောင်းဖြောင့်တစ်ခုသို့ ရောက်ချိန်တွင် သူက ပြိုင်လမ်းပေါ်သို့ အာရုံပြန်လွှဲလိုက်သည်။ နိုင်ငံ့တစ်လံ နေရာရရန် ကားများ ရှေ့ထွက်နောက်ဆုတ် လုယက်မောင်းနှင်နေကြသော ရှေ့မှရှုပ်ထွေးနေသည့် မြင်ကွင်းက သူ့အတွက်တော့ ရယ်ချင်စရာပင်။ ရူးသွပ်ဖွယ် အလုအယက်တိုက်ပွဲဖြစ်ပြီး အဆင့်သတ်မှတ်ချက်စာရင်းကို ယုံကြည်ရန် စောလွန်းနေသေးသည်ကတော့ သေချာသည်။ ပထမအပတ်ဆုံးသွားချိန်တွင် လူကာသည် ထိုင်ခုံပေါ်၌ ကိုယ်နေဟန်ထားကို ပြင်လိုက်ပြီး အားပေးသံများ ရပ်တန့်သွားမည်မထင်ရသော ပရိသတ်ကြီးရှေ့မှ အရှိန်ဖြင့် ဖြတ်သန်းသွားသည်။ လမ်းကြောင်းကို အနည်းငယ်ပြင်လိုက်ပြီးနောက် ကြိုတင်ရည်ရွယ်မထားဘဲ ပြိုင်ဘက်တစ်ဦးကို ချောမွေ့စွာ ကျော်တက်သွားမိသည်။ ယခုအခါ အဆင့် (၁၅) နေရာသို့ ရောက်ရှိသွားသော လူကာသည် အင်ဂျင်သံများ ဟိန်းထွက်ကာ ရှေ့သို့ပြေးဝင်လာစဉ် ရှေ့မှအကွေ့အတွက် ပြင်ဆင်လိုက်သည်။

ရှေ့နားလေးတွင် အန်ဆဲလ်၏ အနက်နှင့်အနီရောင်စပ် တစ်ယောက်စီးပြိုင်ကားကို သူလှမ်းမြင်လိုက်ရသည်။ ၎င်းမှာ အန်ဆဲလ်သည် ဒုတိယနေရာမှ နောက်ဘက်တစ်နေရာသို့ ကျဆင်းသွားပြီဆိုသည့် သိသာသော လက္ခဏာပင်။ လူကာက နောက်တစ်ကွေ့သို့ ဝင်လိုက်ရင်း ကျိန်ဆဲလိုက်သည်။ ရှေ့မှကားသမားက ဘရိတ်အုပ်နောက်ကျသွားသဖြင့် ကားနောက်ပိုင်း လျှောထွက်သွားသည်ကို သတိပြုမိလိုက်ချိန်တွင်တော့ သူ၏မျက်လုံးများက အရောင်လက်သွားသည်။ လူကာက အခွင့်အရေးကို အရယူကာ စတီယာရင်ကို တိကျစွာ လှည့်လိုက်သည်။ ယာဉ်မောင်းခန်းအတွင်းမှ သူ၏ကိုယ်ခန္ဓာကပင် ကား၏ရွေ့လျားမှုကို ထိန်းကျောင်းပေးနိုင်သယောင် ကားကိုယ်ထည်နှင့် သူ့ကိုယ်ခန္ဓာကို အလိုအလျောက် ယိမ်းလိုက်ချိန်တွင်၊ တာယာများက ချက်ချင်းတုံ့ပြန်ကာ ကတ္တရာလမ်းပြင်ကို မြဲမြံစွာ ဆုပ်ကိုင်ထားသည်။ APX အသင်းမှ ကားနံပါတ် ၇၈ သည် ဘာမှမလုပ်နိုင်လိုက်ဘဲ လူကာက သူ့ဘေးမှ ထွက်လာကာ အကွေ့ကို အမိအရအသုံးချပြီး နောက်ထပ်လမ်းကြောင်းဖြောင့်တစ်ခုသို့ ရောက်ရှိသွားသည်။ ကားများအားလုံး အရှိန်တင်လိုက်သည်နှင့်အမျှ သူတို့ကြားရှိ ကွာဟချက်များလည်း ပိုမိုကျယ်ပြန့်လာသည်။

[အဆင့် (၁၄) နေရာ]

"လုပ်ပါဦး၊ ခုနက ကျော်တက်သွားတာလေ စနစ်ရဲ့။ ငါ့ရဲ့ အမှတ် +1 က ဘယ်မှာလဲ" လူကာက ညည်းတွားလိုက်ပြီး အဆင့် (၁၃) နှင့် အကွာအဝေးကို ကျဉ်းမြောင်းစေရန် လီဗာကို ပိုမိုဖိနင်းလိုက်သည်။

[လက်ခံသူ အတွက် စားသောက်မှုပုံစံသစ် တစ်ခု အကြံပြုရလိမ့်မယ်ထင်တယ်။ အတိတ်မေ့ရောဂါကို ပျောက်ကင်းစေမယ့်ဟာမျိုးပေါ့— သင်ဟာ အလယ်အလတ်အဆင့် အစုအဝေး အောက်မှာ ရောက်နေတယ်ဆိုတာကို လုံးဝမေ့နေပုံရတယ်]

"အေးပါကွာ" လူကာက မျက်လုံးလှန်ကာ သက်ပြင်းချလိုက်သည်။ ဒုတိယအပတ် ပြီးဆုံးသွားချိန်တွင် အဆင့် (၁၃) ၏ ဘေးကြည့်မှန်မှတစ်ဆင့် ထိတ်လန့်သွားစေရန် လုံလောက်ရုံမျှ အနီးကပ် ခြိမ်းခြောက်လိုက်သော်လည်း ကျော်တက်ရန်တော့ မလုံလောက်ခဲ့ပေ။

[အချိန်နှင့်တစ်ပြေးညီ ဖော်ပြချက် အချက်အလက်များ -

• ကားအမြန်နှုန်း - 200 km/h

• နှလုံးခုန်နှုန်း - 110 bpm

• လုပ်ငန်းဆောင်ရွက်မှု အခြေအနေ - 85% (ကောင်းမွန်သည်)

• အသက်ရှူနှုန်း - တည်ငြိမ်အေးဆေးသည်

• ရောက်ရှိသည့်အကွာအဝေး - 10000 မီတာ

• ကြာချိန် - ၄ မိနစ်]

"တည်တည်ငြိမ်ငြိမ်ထားကြကွ" မစ္စတာမိုရစ်ဇ်၏အသံက ရေဒီယိုမှတစ်ဆင့် ဟိန်းထွက်လာသည်။ "ပြိုင်လမ်းရဲ့ ရစ်သမ် အတိုင်း ထိန်းမောင်းပါ။ ပွဲတစ်ဝက်လောက်မှာ အခွင့်အရေးတွေ ပေါ်လာလိမ့်မယ်—အဲဒီအခါကျ တိတိကျကျ အရယူကြ။ နောက်မကျစေနဲ့"

"နားလည်ပါပြီ"

[ကိုယ်ခံစွမ်းအား +1]

[(၁၂) ပတ်မြောက်]

[အဆင့် (၁၄) နေရာ]

[တာယာများ ကောင်းမွန်သောအခြေအနေတွင် ရှိပါသည်။ လောင်စာဆီပမာဏ ၆၅% ရှိပါသည်။ ယခု DRS စနစ်ကို အသုံးပြုနိုင်ပါပြီ။ အင်ဂျင်အပူချိန် တည်ငြိမ်ပါသည်။ ဘရိတ်စားသွားမှု ၁၈% ရှိပါသည်။]

[တယ်လီမီထရီ မှတ်တမ်းများအရ ချောမွေ့စွာ ထိန်းချုပ်မောင်းနှင်နေကြောင်း တွေ့ရပါသည်။ လေခွင်းစွမ်းရည် အကောင်းဆုံးအခြေအနေတွင် ရှိပါသည်။ လက်ရှိအရှိန်အတိုင်း ထိန်းသိမ်းမောင်းနှင်ရန် အကြံပြုအပ်ပါသည်။]

"အချက်အလက်တွေပေးတဲ့အတွက် ကျေးဇူးပဲ" လူကာက ရေရွတ်လိုက်ပြီး ကားများ အကွေ့ကျယ်ကြီးတစ်ခုကို ဖြတ်သန်းကာ လမ်းကြောင်းဖြောင့်ရှည်ကြီးတစ်ခုပေါ်သို့ တန်းစီရောက်ရှိသွားချိန်တွင် သူ၏မျက်လုံးများက ရှေ့မှကားဆီသို့ စိုက်ကြည့်နေသည်။ သွေးကြောများထဲတွင် အက်ဒရီနယ်လင်းများ ဆူပွက်လာပြီး စတီယာရင်ပေါ်မှ သူ၏ဆုပ်ကိုင်မှုက ပိုမိုတင်းကျပ်လာသည်။ (၁၂) ပတ်မြောက် ပြီးဆုံးချိန်အထိ သူ့အနေဖြင့် အဆင့် (၁၄) နေရာတွင် ဆက်လက်တစ်ဆို့ခံနေမည် မဟုတ်ပေ။

လမ်းကြောင်းဖြောင့် ပေါ်လာသည်နှင့် လူကာ အခွင့်အရေးကို မြင်လိုက်သည်။ သူက DRS ခလုတ်ကို နှိပ်လိုက်ရာ လေခုခံမှုကို လျှော့ချရန် ကားနောက်ပိုင်းတောင်ပံ ချိန်ညှိသွားသည်ကို ခံစားလိုက်ရသည်။ တုံ့ပြန်မှုက ချက်ချင်းပင်—ကားသည် အသက်ဝင်လာကာ ရင်ခုန်စိတ်လှုပ်ရှားဖွယ် အမြန်နှုန်းဖြင့် ရှေ့သို့ အရှိန်ဟုန်ပြင်းစွာ ထိုးထွက်သွားသည်။ လူကာက ရှေ့ကားမှ လေတိုးအားကိုခွဲပေးသော လေခုခံမှုကင်းမဲ့ဇုန်အတွင်းသို့ ဝင်ရောက်လိုက်သည်။ ထို့နောက် တိကျသေချာစွာပင် သူက ကားကို ဘေးသို့ဆွဲထုတ်လိုက်ပြီး နောက်အကွေ့သို့ မရောက်မီလေးတွင် ပြိုင်ဘက်၏ကားနောက်မှ ရုန်းထွက်လိုက်သည်။ (၁၃) ပတ်မြောက် စတင်ချိန် နောက်တစ်ကွေ့အတွက် စတီယာရင်ကို လှည့်လိုက်သည်နှင့်အမျှ၊ လူကာအတွက် အဆင့် (၁၄) ဆိုသည်မှာ အတိတ်တစ်ခုသာ ဖြစ်သွားခဲ့ပြီး အဆင့် (၁၃) သို့ နေရာယူလိုက်ပြီဖြစ်သည်။

[ကျော်တက်နိုင်စွမ်း +1]

[တုံ့ပြန်နိုင်စွမ်း +1]

[ပေါင်းစပ်မှုဘား : ၂၅%]

သူယခုလေးတင် ကျော်တက်ခဲ့သော ကားမောင်းသမားအတွက် လူကာ အပြစ်မကင်းသလို ခံစားလိုက်ရသည်။ သူ၏မောင်းနှင်မှုက တစ်ဖက်ပြိုင်ဘက်ကို အကာအကွယ်မဲ့သွားစေပြီး၊ ထိုသူ ကားကို ပြန်လည်မထိန်းကျောင်းနိုင်မီမှာပင် လေးကြိုးမှလွတ်ထွက်သွားသော မြှားများကဲ့သို့ ပြိုင်ဘက်လေးဦးက ကျော်တက်သွားကြသည်။ ယခုအခါ ကားလေးစီးသည် အစုလိုက်အပြုံလိုက်ဖြစ်နေပြီး သူတို့အတွက် အဖိုးမဖြတ်နိုင်သော နေရာတစ်ခုအတွက် ပြင်းထန်စွာ ယှဉ်ပြိုင်နေကြသည်—ထိုသို့ယှဉ်ပြိုင်နေစဉ်တွင် လူကာ့နောက်သို့လည်း လိုက်နေကြဆဲဖြစ်သည်။

ရှေ့ရှိ ပြိုင်လမ်းပေါ်သို့ အာရုံပြန်စုစည်းလိုက်ချိန်တွင်၊ လူကာ၏ စနစ်မျက်နှာပြင်က သူ့အမြင်အာရုံထဲသို့ ထင်ဟပ်လာပြီး၊ ရှေ့တွင် အရှိန်ဖြင့်ပြေးနေသော ကားများ၏ အချိန်နှင့်တစ်ပြေးညီ အချက်အလက်များကို လျင်မြန်စွာ ဖော်ပြပေးနေကာ ၎င်းတို့၏ နေရာအဆင့်များကို အလွယ်တကူ သိနိုင်စေရန် ကားများပေါ်တွင် ဟိုလိုဂရမ် ဂဏန်းများ လွင့်မျောနေသည်။ အခြားကားများထံမှ ရရှိသော ဤအချိန်နှင့်တစ်ပြေးညီ အချက်အလက်များက လူကာအတွက် အားသာချက်တစ်ခု ဖြစ်စေသည်—သူနှင့် သူ၏ Dallaraပြိုင်ကားအနီးသို့ သိသိသာသာ ကပ်လာသရွေ့ မည်သူက အရှိန်လျော့ကျနေသည်၊ မည်သူ့ကားက ချွတ်ယွင်းချက်ရှိနေပြီး အခွင့်ကောင်းယူနိုင်သည် စသည်တို့ကို ခွဲခြားသိမြင်နိုင်စေသည်။

[(၁၅) ပတ်မြောက်]

[ကိုယ်ခံစွမ်းအား +1]

[တာယာများ ကျေနပ်ဖွယ် အခြေအနေတွင် ရှိပါသည်။ လောင်စာဆီပမာဏ ၆၅% ရှိပါသည်။ ယခု DRS စနစ်ကို အသုံးပြုနိုင်ပါပြီ။ အင်ဂျင်အပူချိန် တည်ငြိမ်ပါသည်။ ဘရိတ်စားသွားမှု ၁၈% ရှိပါသည်။]

[တယ်လီမီထရီ မှတ်တမ်းများအရ ချောမွေ့စွာ ထိန်းချုပ်မောင်းနှင်နေကြောင်း တွေ့ရပါသည်။ လေခွင်းစွမ်းရည် အကောင်းဆုံးအခြေအနေတွင် ရှိပါသည်။ သို့သော်လည်း လက်ရှိ သင်သည် (၁၅) ပတ်မြောက်သို့ ရောက်ရှိနေပြီဖြစ်သဖြင့်၊ ကျန်ရှိနေသေးသော ပြိုင်ပွဲအတွက် စွမ်းဆောင်ရည်ကို ထိန်းသိမ်းထားရန်နှင့် တာယာများလဲလှယ်ရန် လာမည့်အပတ် အနည်းငယ်အတွင်း ကားရပ်နားတဲ့နေရာ ဝင်ရန် အကြံပြုအပ်ပါသည်။]

'ကောင်းပြီလေ၊ အဲဒါက ယုတ္တိရှိပါတယ်။ အပတ် (၂၀) ရောက်ရင် ငါတို့ဘယ်နေရာရောက်နေမလဲဆိုတာ ကြည့်ရသေးတာပေါ့'။ သူ၏အကြည့်များက အဆင့် (၁၂) နေရာဆီသို့ ရည်ရွယ်လိုက်ချိန်မှာပင် ရေဒီယိုမှတစ်ဆင့် အသံတစ်သံ ထွက်ပေါ်လာသည်။

"လူကာ၊ မင်း အနည်းဆုံး အဆင့် (၁၀) မှာ ရှိနေတယ်လို့ ငါ့ကို ပြောစမ်းပါ"

၎င်းမှာ အန်ဆဲလ်ဖြစ်ပြီး သူ၏အသင်းဖော်ကို လှမ်း၍ အခြေအနေမေးနေခြင်းဖြစ်သည်။ လူကာက မော့ကြည့်လိုက်ရာ အန်ဆဲလ်၏ အနက်နှင့်အနီရောင် ဒါလာရာပြိုင်ကားသည် ထိပ်ဆုံးကားအုပ်စုအတွင်း တင်းကြပ်စွာပါဝင်နေပြီး အဆင့် (၄) နေရာတွင် အထင်ကြီးဖွယ်ကောင်းလောက်အောင် တည်ငြိမ်စွာ နေရာယူထားသည်ကို မြင်လိုက်ရသည်။

"ငါ အဆင့် (၁၃) မှာပါ" ဟု လူကာက တိုးတိတ်စွာ ပြန်ဖြေလိုက်သည်။ အန်ဆဲလ်အတွက် သူ အမှန်တကယ် အသုံးမဝင်မည်ကို စိုးရိမ်မိသည်။ "မပူပါနဲ့၊ အပေါ်ကို ရောက်အောင် ငါတက်လာခဲ့ပါ့မယ်"

"ကျေးဇူးပြုပြီး တက်လာခဲ့ပါ"

နောက်တစ်ကွေ့သို့ ရောက်လာချိန်တွင် လူကာ သက်ပြင်းတစ်ချက်ချလိုက်သည်။ ပရိသတ်၏ ဩဘာပေးသံများက ဘာ့ဂ်ဝေါလ်ဒရင်း ပြိုင်ကွင်းကြီးတစ်ခုလုံးကို တုန်ခါသွားစေသည်။ မွန်းလွဲပိုင်း လေထုသည် အသက်ဝင်လှုပ်ရှားလျက်ရှိပြီး၊ ကြမ်းတမ်းသော အင်ဂျင်သံများက လေထုကို ခွင်း၍ထွက်ပေါ်နေသည်။ ကံကောင်းထောက်မစွာဖြင့်၊ ယနေ့သည် ရာသီဥတုသာယာပြီး နေသာသောနေ့တစ်နေ့ဖြစ်ရာ မော်တော်စပေါ့ ပြိုင်ပွဲများအတွက် အကောင်းဆုံးအခြေအနေပင် ဖြစ်သည်။

ပရိသတ်ကြီး၏ အသံများက လူကာ့အတွင်းစိတ်မှ အက်ဒရီနယ်လင်းများကို ဆူပွက်လာစေသည်။ ဤအရာက ရာသီ၏ ပထမဆုံးသော F2 ပြိုင်ပွဲအပေါ် ကမ္ဘာတစ်ဝန်းက မျက်စိဒေါက်ထောက် စောင့်ကြည့်နေကြကြောင်း သူ့ကို သတိပေးနေသည်။ ထိပ်ဆုံးငါးနေရာနှင့် ဝေးကွာနေခြင်းက သူ့ကို စိတ်အနှောင့်အယှက်ဖြစ်စေပြီး ပိုမိုမြင့်မားသောနေရာသို့ တက်လှမ်းရန် သူ၏ဆုံးဖြတ်ချက်ကို ခိုင်မာစေသည်။ နောက်ထပ်အကွေ့တစ်ခုသို့ သူချိုးကွေ့လိုက်ချိန်တွင် စတီယာရင်ပေါ်ရှိ သူ၏လက်ချောင်းများ အနည်းငယ်တုန်ယင်နေသည်ကို ခံစားလိုက်ရသည်။ ရှေ့မှ အဆင့် (၁၂) ကား၏ ဆွဲခေါ်မှုနောက်သို့ ပါသွားသကဲ့သို့ ကပ်၍လိုက်ပါသွားသည်။

အကွေ့မှ အထွက်တွင် ကားများသည် လမ်းကြောင်းဖြောင့်ရှည်ကြီးတစ်ခုအတွင်းသို့ ဝင်ရောက်သွားကြသည်—အပတ်တိုင်း၏ အဆုံးသတ်ကို မှတ်သားထားသော အဆိုပါ လမ်းကြောင်းဖြောင့်ပင်ဖြစ်ပြီး၊ ဤသည်မှာ သူ၏အခွင့်အရေးဖြစ်ကြောင်း လူကာသိသည်။ အကွေ့မှအထွက် ကားသည် ပုံမှန်လေခွင်းစနစ်အနေအထားသို့ ပြန်လည်ရောက်ရှိချိန်တွင် သူက လီဗာကို နင်းကာ တိုးတိုးတိတ်တိတ် ရေရွတ်လိုက်သည်။ အဆင့် (၁၂) နေရာမှကား၏ တစ်ဖက်တစ်ချက်စီတွင် ဟာကွက်များကို မြင်လိုက်ရသော လူကာသည် ဘယ်ဘက်မှဝင်ရန် ဆုံးဖြတ်လိုက်ပြီး ပြိုင်ဘက်၏အမြင်အာရုံထဲသို့ သူ၏ကားဦးခေါင်းကို ထိုးထည့်ကာ ကျော်တက်ရန် ကြိုးစားလိုက်သည်။

DRS ခလုတ်ကို ဖွင့်လိုက်သည်နှင့် လူကာသည် နောက်တောင်ပံ၏ ရွေ့လျားသွားမှုကို ခံစားလိုက်ရပြီး၊ လေခုခံမှုကို ဖယ်ရှားပေးကာ သူ့အတွက်လိုအပ်နေသော တွန်းကန်အားကို ရရှိစေသည်။ DRS အလုပ်လုပ်လိုက်သည်နှင့် တစ်ပြိုင်နက် ဒြပ်ဆွဲအားတစ်ခု သူ့ကိုလာရိုက်ခတ်သွားပြီး ထိုခလုတ်ကိုမဖွင့်ဘဲ ကျော်တက်ရန် မကြိုးစားခဲ့မိသည့်အတွက် လူကာ သက်ပြင်းချနိုင်ခဲ့သည်။

[ခွန်အား +1]

ယာဉ်မောင်းခန်းအတွင်းမှ ပြိုင်ဘက် တွေဝေသွားသည့်အချိန်အထိ လူကာသည် ယင်ကောင်တစ်ကောင်ကဲ့သို့ ထိုကားနောက်မှ ကပ်လိုက်နေခဲ့သည်—ထိုစက္ကန့်ပိုင်းလေးကပင် လူကာ အခွင့်ကောင်းယူရန်အတွက် လုံလောက်ခဲ့သည်။ သူက လီဗာကို ပိုမိုပြင်းထန်စွာ နင်းချလိုက်ပြီး ဘယ်ဘက်သို့ ဒုံးပျံသဖွယ် ထိုးထွက်ကာ ပြိုင်ဘက်နှင့် ယှဉ်လျက်အနေအထားသို့ ရောက်သွားသည်။ ဆိုင်ကယ်ဦးထုပ်ကြောင့် မျက်နှာကို မမြင်ရသော်လည်း၊ ဦးထုပ်၏ မျက်မှန်ပြားမှတစ်ဆင့် တစ်ဖက်ယာဉ်မောင်း၏ ရန်လိုမှုနှင့် မုန်းတီးမှုအပြည့်ပါသော မျက်လုံးများကို လူကာ ရှင်းလင်းပြတ်သားစွာ မြင်လိုက်ရသည်။

အလျှော့ပေးမည့်အစား ထိုပြိုင်ဘက်က ရိုင်းစိုင်းကြမ်းတမ်းစွာပင် ကားကို ချိုးကွေ့လိုက်ပြီး လူကာကို ပြိုင်လမ်းပေါ်မှ လွင့်စင်သွားစေရန် ပြင်းထန်စွာ တိုက်ထုတ်ဖို့ ကြိုးစားခဲ့သည်။ 'ခွေးကောင်' ဟု လူကာ ကျိန်ဆဲလိုက်သည်။ 'မင်းက နောက်ကကောင်တွေအတွက်ပဲ လမ်းဖယ်ပေးရလိမ့်မယ်'။ သူ၏ DRS မှာ အသက်ဝင်နေဆဲဖြစ်ပြီး ကျော်တက်နိုင်စွမ်း ၁၈ ရှိနေသည့်အပြင် လမ်းဖြောင့်ပေါ်တွင် ဖြစ်နေသောကြောင့် လူကာအတွက် သူရည်ရွယ်ထားသော ကျော်တက်မှုကို အလွယ်တကူပင် အပြီးသတ်နိုင်ခဲ့သည်။ (၁၅) ပတ်မြောက် ပြီးဆုံးသည်နှင့်တစ်ပြိုင်နက် အဆင့် (၁၂) နေရာသည် သူ၏အပိုင်ဖြစ်သွားတော့သည်။

"...ရှေ့ဆုံးမှာတော့ ရင်တမမစောင့်ကြည့်ရတဲ့ တိုက်ပွဲဖြစ်နေပါတယ်။ ဂျွန်၊ အလယ်အလတ်အုပ်စုမှာ ဘာတွေဖြစ်နေလဲဆိုတာ ကျွန်တော်တို့ နည်းနည်းလောက် ဆွေးနွေးကြရအောင်လား။ အိုး... ခုနက ကျော်တက်သွားတဲ့ပုံစံက ကမ္ဘာ့အဆင့်မီပဲဗျာ။ ထရမ်ပိုစ့် အသင်းတော့ ဒီတစ်ခါ သူတို့ရဲ့ မျိုးဆက်သစ်တစ်ယောက်ကို တကယ်ရှာတွေ့သွားပြီထင်ပါရဲ့..."

"...အာ... ဟုတ်တာပေါ့ စတိဗ်ရေ။ ဒါက ကျွန်တော်တို့ မတွေ့ရတာကြာပြီဖြစ်တဲ့ အကြိတ်အနယ်အရှိဆုံး ပြိုင်ပွဲတွေထဲက တစ်ခုဖြစ်လာတော့မှာပါ။ ကြည့်စမ်းပါ။ အဆင့် ၁၃ ကနေ ၂၅ အထိ ဘယ်သူကဘယ်နေရာဆိုတာတောင် သဲသဲကွဲကွဲ မသိရသေးဘူး။ အနောက်မှာ ပျားအုံကြီး ပေါက်ကွဲသွားသလိုပဲဗျာ...!"

"...ဟုတ်ပါတယ်။ ဒါပေမဲ့ ကျွန်တော်တို့ သေချာသိထားတာကတော့ ဘူဆီနို ဗယ်လိုချီတာ လူငယ်အသင်းရဲ့ ပြိုင်ကားမောင်းသမား မက်စ်အက်ဒမ်စ် က ဦးဆောင်နေပြီး၊ သူ့ရဲ့နောက်မှာရှိနေတာကတော့ တခြားသူမဟုတ်ပါဘူး။ ဂရေးဟတ်ဆန် ရဲ့ နောက်ထပ်ကျောင်းဆင်းတစ်ယောက်ဖြစ်သလို 'ခြင်္သေ့သုံးကောင်' ရဲ့ ဂုဏ်ယူဝင့်ကြွားစရာ မိုင်းလ်စ် ဘယ်လင်ဟမ် ပဲဖြစ်ပါတယ်။ ဒန်နီ အာရွန်ဆန် က လွန်ခဲ့တဲ့ခဏလေးကမှ တတိယနေရာကို လုယူသွားနိုင်ခဲ့ပေမဲ့ မကြာခင် ပြန်အလုခံရလိမ့်မယ်လို့ ကျွန်တော်လောင်းရဲပါတယ်။ ဂျွန် ဘယ်လိုထင်လဲဗျ..."

"...အို... ခင်ဗျားပြောတာ ကွက်တိပဲ စတိဗ်။ အခုဆို ပြိုင်ပွဲရဲ့ လေးပုံတစ်ပုံကို ရောက်လာပြီ။ တတိယနေရာကို ကြမ်းကြမ်းတမ်းတမ်း လုယူခဲ့တာက အာရွန်ဆန်ရဲ့ကားကို ထိခိုက်မှုရှိစေနိုင်တယ်။ သူ့ရဲ့ တာယာပွန်းစားမှုက တခြားသူတွေထက် ပိုများလာမှာသေချာပြီး မကြာခင် ကားရပ်နားတဲ့နေရာဝင်ရဖို့ အသေအချာပဲ။ အဲဒီလိုဖြစ်လာရင်တော့ သူ့ရဲ့အရှိန်အဟုန်က ကျသွားလိမ့်မယ်။ သူက ကားကိုမြေပြင်နဲ့ဖိကပ်ထားတဲ့အားနည်းတဲ့ အနေအထားနဲ့ မောင်းနှင်နေတာဆိုတော့ လမ်းဖြောင့်တွေအတွက် ကောင်းပေမဲ့ ကျဉ်းမြောင်းတဲ့ အကွေ့တွေမှာတော့ လမ်းဆုပ်ကိုင်နိုင်စွမ်း လျော့ကျသွားစေတယ်။ သူ့အသင်းဘက်ကသာ မြန်မြန်ဆန်ဆန် မတုံ့ပြန်ဘူးဆိုရင် အကွေ့အကောက်တွေနဲ့ ဆံထုံးပုံအကွေ့တွေမှာ အချိန်အများကြီး ဆုံးရှုံးသွားနိုင်တယ်။ ဒီပြိုင်ကွင်းမှာရော၊ ဘယ်ပြိုင်ကွင်းမှာမဆို ဒီအကွေ့တွေက ဘယ်လောက်အရေးကြီးလဲဆိုတာ ကျွန်တော်တို့သိကြပါတယ်..."

[ကိုယ်ခံစွမ်းအား +1]

[ခံနိုင်ရည် +1]

[(၁၈) ပတ်မြောက်]

"ကားရပ်နားတဲ့နေရာ ဝင်ရမယ့်အချိန် ရောက်ပြီမလား"

[သေချာပါတယ် လက်ခံသူ။ သင့်အသင်းက အခုပဲ ဆက်သွယ်လာတော့မယ်လို့ ကျွန်တော်ယုံကြည်ပါတယ်]

"ဟေး... လူကာ၊ အချက်ပြတာတွေကို မမြင်ဘူးလား။ အခုချက်ချင်း ကားရပ်နားတဲ့နေရာ ဝင်တော့"

"ကြားပါပြီ" လူကာက စတီယာရင်ကို စောင်းလိုက်ရင်း ရေရွတ်လိုက်သည်။ ကားရပ်နားတဲ့နေရာ ဝင်ပြီးနောက် သူ့ကို ပြိုင်ဘက်ဘယ်နှစ်ယောက်လောက် ကျော်တက်သွားနိုင်သလဲဆိုတာကို ခန့်မှန်းရန် ဘေးကြည့်မှန်ကို အမြန်လှမ်းကြည့်လိုက်သည်။ သူက လီဗာကို နင်းချကာ ပြိုင်လမ်းအစွန်းဘက်သို့ ကပ်လိုက်ပြီး ပရိသတ်များနှင့် ပိုမိုနီးကပ်စွာ အရှိန်တင်ရင်း ထရမ်ပိုစ့် အသင်း၏ ကားဂိုဒေါင်ဘက်သို့ ဦးတည်သွားလေသည်။

လူကာသည် ယုံနိုင်ဖွယ်မရှိလောက်အောင် တိကျသည့် ဘရိတ်အုပ်မှုဖြင့် သူ၏ ကျွမ်းကျင်မှုအသစ်ဖြစ်သော 'ကားရပ်နားတဲ့နေရာ ပါရမီရှင်' စွမ်းရည်ကို အသုံးချလိုက်သည်။ ဒေါင်... ဂျလပ်... ဒုတ်... ဖတ်... ဇူးမ်! တွေဝေတုံ့ဆိုင်းနေခြင်း အလျဉ်းမရှိဘဲ လူကာသည် ပြိုင်ပွဲတွင်းသို့ ပြန်လည်ဝင်ရောက်လာကာ အလယ်လမ်းကြောင်းသို့ နေရာယူလိုက်ရင်း အဆင့် (၁၂) နေရာကို ဆက်လက်ထိန်းထားနိုင်ခဲ့သည်။

[ကားရပ်နားတဲ့နေရာ ပါရမီရှင် +1]

[ပေါင်းစပ်မှုဘား : ၃၇.၅%]

[အချိန်နှင့်တစ်ပြေးညီ ဖော်ပြချက် အချက်အလက်များ -

• ကားအမြန်နှုန်း - 170 km/h

• နှလုံးခုန်နှုန်း - 110 bpm

• လုပ်ငန်းဆောင်ရွက်မှု အခြေအနေ - 85% (ကောင်းမွန်သည်)

• အသက်ရှူနှုန်း - တည်ငြိမ်အေးဆေးသည်

• ရောက်ရှိသည့်အကွာအဝေး - 90000 မီတာ

• ကြာချိန် - ၃၄ မိနစ်]