လူကာအတွက် စိတ်ပျက်စရာကောင်းသည်မှာ တတိယပတ်နှင့် စတုတ္ထပတ်တစ်လျှောက်လုံး သူသည် အဆင့် ၅ နေရာတွင်သာ ဆက်ရှိနေခဲ့သည်။ အဆင့် ၆ ထက် အနည်းငယ်သာ ရှေ့ရောက်နေပြီး အဆင့် ၄ ၏နောက်တွင်တော့ ပြတ်ကျန်နေဆဲဖြစ်ကာ ပုံမှန်အမြန်နှုန်းတစ်ခုကိုသာ ထိန်းထားနိုင်ခဲ့သည်။

[အချိန်နှင့်တစ်ပြေးညီ ပြသနေသော အချက်အလက်များ:

ယာဉ်အမြန်နှုန်း: 180 km/h

နှလုံးခုန်နှုန်း: 140 bpm

လုပ်ဆောင်နိုင်စွမ်း အခြေအနေ: 85% (ကောင်းမွန်)

အသက်ရှူနှုန်း: အနည်းငယ် မြန်ဆန်နေသည်

ဖြတ်သန်းပြီးသော အကွာအဝေး: 14200မီတာ

အချိန်: 4 မိနစ် 15 စက္ကန့် ]

သူက ကားဘီးများကို အနေအထားပြင်လိုက်ပြီး ပြိုင်လမ်းပေါ်တွင် အရှိန်တင်ကာ ဖြတ်သန်းသွားသည်။ သူ၏အကြည့်များက အဝေးဆီတွင် လွင့်မျောနေသည့် ဟိုလိုဂရမ် နံပါတ် ၄ ဆိုင်းဘုတ်ထံ စူးစိုက်ထားပြီး၊ ထိုဆိုင်းဘုတ်က သူ့ကို ကား၏စွမ်းအင်အပြည့်သုံးရန် ဖိတ်ခေါ်နေသယောင် ရှိသည်။ ဆဋ္ဌမမြောက်အပတ်သို့ ရောက်သောအခါ အခွင့်အရေးတစ်ခု ပေါ်လာခဲ့သည်။ လူကာသည် သူ၏ တစ်ယောက်စီးပြိုင်ကားလေး နံပါတ် ၄ ၏ကားနှင့် နီးကပ်လာပြီဖြစ်ကြောင်း ခံစားလိုက်ရ၏။ ထိုကားသည် စောစောက သူ နောက်ကလိုက်နေခဲ့သည့်ကား မဟုတ်တော့ကြောင်း သိလိုက်ရချိန်တွင် သူ၏နှုတ်ခမ်းထက်၌ အပြုံးတစ်ခု ပေါ်လာခဲ့သည်။ ယခုမှသာ အမှန်တကယ် ပြိုင်ပွဲတစ်ခုနှင့် တူလာတော့သည်။

ပြိုင်လမ်း၏ သိမ်မွေ့သော အကွေ့တစ်ခုဆီသို့ ချဉ်းကပ်လာချိန်တွင် လူကာက စောင်းနေသော ကတ္တရာလမ်းပေါ်၌ ချောမွေ့စွာ လျှောတိုက်ဖြတ်သန်းနိုင်ရန် စတီယာရင်ကို အနည်းငယ် စောင်းလိုက်သည်။ ပြင်းထန်သော အရှိန်ကြောင့် ပူကျက်နေသော ကားဘီးများက လမ်းမကို မြဲမြံစွာ ဆုပ်ကိုင်ထားပြီး ကွေ့ကို တိကျစွာ ဖြတ်သန်းနိုင်ခဲ့သည်။ ၎င်းက သူ့ရှေ့ရှိ ခိုင်မာတည်ငြိမ်စွာ ပြေးနေသော ဟွန်ဒါကား (နံပါတ် ၄) နှင့် သူ၏ကြားရှိ ကွာဟချက်ကို ကျဉ်းမြောင်းသွားစေသည်။ လူကာက ဟွန်ဒါကား၏ အနောက်ပိုင်းကိုသာ စူးစိုက်ကြည့်နေပြီး ၎င်းနှင့်အမီ လိုက်နိုင်ရန် အမြန်နှုန်းကို ပုံမှန်ထိန်းထားလိုက်သည်။

တောက်! ငါ သူ့နောက်ကပ်ပါလာတာကို သူ သိနေတယ်။ ကောင်းပြီလေ၊ ရှေ့မှာ အကွေ့တစ်ခုရှိတယ်၊ အဲဒီကနေ ငါ ဖြတ်ဝင်လို့ရတယ် ဟု သူက အကွက်ချလိုက်သည်။ ဟာကွက်တစ်ခုကို ရှာဖွေရင်း သူ၏လက်များက စတီယာရင်ကို အလိုအလျောက် ချောမွေ့စွာ ထိန်းကျောင်းနေခဲ့သည်။

သို့သော် နံပါတ် ၄ သည် ကျွမ်းကျင်လှသည်။ ဝင်နိုင်မည့် ဟာကွက်တိုင်းကို ပိတ်ဆို့ထားပြီး လူကာ အဆုံးအဖြတ်ပေးမည့် လှုပ်ရှားမှုမျိုး မလုပ်နိုင်အောင် ကျွမ်းကျင်စွာ ကာကွယ်နေခဲ့သည်။ ကွေ့က တဖြည်းဖြည်း နီးကပ်လာပြီး လူကာ ဆုံးဖြတ်ချက်ချလိုက်သည်။ အခုမှ မလုပ်ရင် ဘယ်တော့မှ လုပ်နိုင်မှာမဟုတ်ဘူး။ သူက သွားကိုကြိတ်ကာ လီဗာကို ဖိနင်းလိုက်သည်။

အင်ဂျင်က တုံ့ပြန်သည့်အနေဖြင့် ဟိန်းဟောက်သွားပြီး နက်ရှိုင်းသော အသံကြီးက ယာဉ်မောင်းခန်းအတွင်း ပြည့်နှံ့သွား၏။ ရင်တဒိတ်ဒိတ်ခုန်လျက် သူသည် ကွေ့မရောက်မီ ဖြောင့်တန်းသောလမ်း၌ အရှိန်ပိုရစေရန် ရည်ရွယ်ကာ DRS (လေခွင်းအား လျှော့ချရေးစနစ်) ခလုတ်ကို ဖွင့်လိုက်သည်။ သူ၏ လက်မများက စတီယာရင်ကို တင်းတင်းကျပ်ကျပ် ဆုပ်ကိုင်ထားစဉ် ကြီးမားလှသော ဆွဲငင်အား အဟုန်က သူ့ကို ဆောင့်ဝင်လာပြီး ကားရှေ့သို့ ထိုးထွက်သွားချိန်တွင် သူ၏ခန္ဓာကိုယ်ကို တူနှင့်ထုခံလိုက်ရသလို ထိုင်ခုံနှင့် ပူးကပ်သွားစေသည်။

[ခွန်အား +1]

[သင်သည် အမြန်နှုန်း 240 km/h သို့ တိုးမြှင့်လိုက်ပါပြီ]

လူကာ၏ R.S.11 ကားလေးသည် ရှေ့သို့ ရုန်းထွက်သွားပြီး လေထုကို ခွဲထွက်သွားစဉ် လေခွင်းအားက ကားကိုယ်ထည်ကို ဆွဲယူသွားကာ နံပါတ် ၄ ၏ ဘယ်ဘက်သို့ ကပ်သွားသည်။ ဟွန်ဒါကား၏ အနောက်တောင်ပံသည် လူကာ့ကား၏ နှာခေါင်းပိုင်းနှင့် လက်မအနည်းငယ်သာ ကွာဝေးတော့သည်။ ကွေ့က ပိုမို ကြမ်းတမ်းလာသော်လည်း လူကာက နောက်ဆုတ်မသွားဘဲ အရှိန်တင်ကာ ရှေ့သို့ ထိုးဖောက်လာသဖြင့် ယခုအခါ နံပါတ် ၄ နှင့် အပြိုင်ဖြစ်နေပြီဖြစ်သည်။

နံပါတ် ၄ ကားမောင်းသူ ကျိန်ဆဲလိုက်သံကိုပင် ကြားလိုက်ရသည်ဟု လူကာ ကျိန်တွယ်ပြောရဲသော်လည်း ထိုဘက်သို့ လှည့်ကြည့်ရန် အချိန်မရှိပေ။ အမှန်တကယ်ပင် နံပါတ် ၄ က သူ့ကို ပြိုင်လမ်း၏ အပြင်ဘက်အစွန်း သတိပေးဇုန်ဆီသို့ တွန်းထုတ်ဖိညှစ်နေခြင်းဖြစ်သည်။

မင်း မလုပ်ရဲပါဘူး လူကာက စိတ်ထဲမှ ကြိမ်းဝါးလိုက်ပြီး စင်တီမီတာအနည်းငယ်သာ လိုတော့သည့် သတိပေးဇုန်အစွန်းကို ရင်တမမဖြင့် ကြည့်ရင်း ကားဘီးများ စူးရှစွာ အော်မြည်နေချိန်တွင် စတီယာရင်ကို ပို၍ တင်းကျပ်စွာ ဆုပ်ကိုင်လိုက်သည်။

စနစ်? ဒီအခြေအနေကနေ လွတ်မြောက်ဖို့ ငါ့မှာ ကျွမ်းကျင်မှု တစ်ခုမှ မရှိဘူးလား? သူက ငါ့အရှိန်နဲ့အပြိုင် မောင်းနေတယ်၊ ငါ ဖြတ်ဝင်လို့မရဘူး။

[စိတ်မကောင်းပါဘူး လက်ခံသူ။ သင့်ရဲ့ ကျွမ်းကျင်မှုတွေက F-အဆင့်မှာပဲ ရှိနေတုန်းပါ၊ ဒါက ဖော်မြူလာဝမ်း ပြိုင်ကားမောင်းသူတိုင်းမှာ ရှိတတ်တဲ့ အခြေခံကျွမ်းကျင်မှုတွေပါ။ D-အဆင့်နဲ့ C-အဆင့် ကျွမ်းကျင်မှုတွေကို လေ့လာနိုင်မှသာ သင့်မှာ ရွေးချယ်စရာလမ်းကြောင်းတွေ ရှိလာမှာပါ။]

[ဒါပေမဲ့ သင့်ဆီမှာရှိတဲ့ အရာတွေကိုပဲ သင် အသုံးပြုနိုင်ပါတယ်။ 'ကျော်တက်ခြင်း ကျွမ်းကျင်မှု'ကို သုံးဖို့ ကျွန်ုပ် အကြံပြုချင်ပါတယ်၊ ဒါပေမဲ့ ဟွန်ဒါကားရဲ့ အမြန်နှုန်းက လန့်စရာကောင်းနေပါတယ်။ အရှိန်လျှော့ဖို့ဆိုတာကတော့ ရွေးချယ်စရာထဲမှာ မရှိပါဘူး လက်ခံသူ။]

"အင်း... ကောင်းပြီလေ" လူကာက ပြန်ဖြေလိုက်သည်။ သူ အရှိန်ဖြင့် ဖြတ်သန်းသွားစဉ် သူ၏ဘယ်ဘက်ရှိ မြက်ခင်းပြင်မှာ ဝေဝါးနေပြီး ဟွန်ဒါကားကလည်း ထိခိုက်မိခြင်းမရှိဘဲ သူ့ကို အောက်ဘက်သို့ ဆက်လက်ဖိညှစ်ထားဆဲဖြစ်သည်။ ရှေ့တည့်တည့်သို့ ကြည့်လိုက်ရာ အဆုံးမဲ့သည်ဟု ထင်ရသော အကွေ့က နောက်ဆုံးတွင် ဖြောင့်တန်းသွားသည်ကို သိလိုက်ရသဖြင့် လူကာ သက်ပြင်းချနိုင်ခဲ့သည်။

နံပါတ် ၁၊ ၂ နှင့် ၃ ကားများကို မတွေ့ရတော့ဘဲ နံပါတ် ၃ သည် အရှေ့ကအရှိန်ပြင်းပြင်းဖြင့် ထွက်ခွာသွားပြီဖြစ်သည်။ လူကာနှင့် အဆင့် ၄ နေရာမှ ဦးဆောင်နေဆဲဖြစ်သော ဟွန်ဒါကားတို့အတွက် ကံဆိုးစွာပင်၊ သူတို့နှစ်ဦးသည် ပြိုင်လမ်း၏ တစ်ဖက်စွန်းသို့ ဖိညှစ်မောင်းနှင်နေခဲ့မိသဖြင့် နောက်တွင်ကျန်နေသော ပြိုင်ပွဲဝင်များအတွက် ရှင်းလင်းနေသော အရှိန်တင်လမ်းကြောင်းကို မရည်ရွယ်ဘဲ ဖွင့်ပေးလိုက်သလို ဖြစ်သွားခဲ့သည်။ သူတို့ သတိမထားမိလိုက်ခင်မှာပင် တစ်ယောက်စီးပြိုင်ကား သုံးစီးက သူတို့ကို လျှပ်တစ်ပြက် ကျော်တက်သွားကြပြီး အဆင့် ၄၊ ၅ နှင့် ၆ နေရာ အသီးသီးကို ရယူသွားကြသည်။ ထို့နောက် လမ်းမပေါ်တွင် အချင်းချင်း နောက်ကောက်ချရင်း အဆင့် ၃ ဆီသို့ အရှိန်မလျှော့ဘဲ ပြေးထွက်သွားကြသည်။

[အဆင့် ၈]

သူ့ရှေ့ရှိ ဒစ်ဂျစ်တယ်မျက်နှာပြင်တွင် သူ အဆင့် ၈ သို့ ကျဆင်းသွားကြောင်း ပြသနေသဖြင့် လူကာက လေသံတိုးတိုးဖြင့် ဆဲရေးတိုင်းထွာလိုက်ပြီး စိတ်ပျက်ဒေါသထွက်မှုများ ပွက်ပွက်ဆူလာခဲ့သည်။ အဆင့် ၇ မှ ယာဉ်မောင်းမှာ သူတို့၏အမှားကို ယခုမှ သတိထားမိသွားပြီး ပြိုင်လမ်းအစွန်းမှ စတင်ခွာပေးလိုက်သဖြင့် လူကာအတွက် သူ၏နေရာကို ပြန်လည်ရယူနိုင်မည့် အခွင့်အရေး ရသွားသည်။

ခွေးကောင် သူက ခါးသီးစွာ တွေးလိုက်ရင်း သူ၏ကားကို ပင်မလမ်းကြောင်းပေါ်သို့ ရည်ရွယ်ချက်ရှိရှိ ပြန်လည် ဆွဲသွင်းလိုက်သည်။

ပြင်းပြသော စိတ်ပိုင်းဖြတ်မှုနှင့်အတူ လူကာက လီဗာကို ဖိနင်းလိုက်ရာ ထိန်းချုပ်မှုများကို ပြောင်းလဲလိုက်သည်နှင့် အင်ဂျင်က ဟိန်းဟောက်တုံ့ပြန်လာသည်။ ကား၏အခြေအနေကို မျက်လုံးတစ်ချက်ဝေ့ကြည့်လိုက်ရာ အားလုံး အစိမ်းရောင်ပြနေဆဲဖြစ်ကြောင်း အတည်ပြုနိုင်ခဲ့သည်။ သူက လက်ကောက်ဝတ်ကို ကျွမ်းကျင်စွာ လှည့်လိုက်ပြီး ရှေ့သို့ ရုန်းထွက်ကာ ဟွန်ဒါကားကို အလွယ်တကူ ကျော်တက်လျက် အဆင့် ၇ နေရာကို ရယူလိုက်သည်။

[အဆင့် ၇]

[ကျော်တက်ခြင်း ကျွမ်းကျင်မှု +1]

[ခံနိုင်ရည်စွမ်းအား +1]

[တုံ့ပြန်နိုင်စွမ်း +1]

[ပေါင်းစပ်မှုဘား : 37.5%]

နောက်ထပ် ပတ်အနည်းငယ် ဝေဝါးစွာ ကုန်ဆုံးသွားချိန်တွင် လူကာက အပြင်းအထန် အာရုံစိုက်ထားခဲ့သည်။ သူ၏ R.S.11 ရှေ့မှကားသည် ပထမဆုံးအဖြစ် ကားရပ်နားတဲ့နေ‌ရာသို့ ဝင်ရောက်သွားသောအခါ သူ အလွန်လိုလားနေခဲ့သည့် အဆင့် ၆ နေရာကို အလွယ်တကူ ရရှိသွားခဲ့သည်။ ဟွန်ဒါကား ပြိုင်လမ်းပေါ်မှ ကွေ့ထွက်သွားချိန်တွင် သူက အခွင့်အရေးကို ဆုပ်ကိုင်လိုက်ပြီး အဒရီနယ်လင်းများ ပန်းထွက်လာမှုနှင့်အတူ အရှိန်တင်ကာ ကျော်တက်သွားပြီး သူကြိုးစားပမ်းစား ပြန်လည်ရယူချင်နေသည့် နေရာကို သိမ်းပိုက်လိုက်သည်။ အင်ဂျင်က တုံ့ပြန်ဟိန်းဟောက်သွားပြီး၊ အဆင့်စာရင်းတွင် တက်လာသည့်အတွက် ခဏတာမျှ စိတ်သက်သာရာရသွားသလို ခံစားလိုက်ရသည်။

[အဆင့် ၆]

[၁၀ ပတ်မြောက် ပြီးဆုံးပါပြီ လက်ခံသူ!]

[ကြံ့ခိုင်မှု +1]

[အချိန်နှင့်တစ်ပြေးညီ ပြသနေသော အချက်အလက်များ:

ယာဉ်အမြန်နှုန်း: 200 km/h

နှလုံးခုန်နှုန်း: 120 bpm

လုပ်ဆောင်နိုင်စွမ်း အခြေအနေ: 65% (သင့်တင့်)

အသက်ရှူနှုန်း: အနည်းငယ် မြန်ဆန်နေသည်

ဖြတ်သန်းပြီးသော အကွာအဝေး: 34 050မီတာ

အချိန်: 15 မိနစ် ]

လူကာသည် သူ၏အောက်တွင် အင်ဂျင်၏ ပိုမိုပြင်းထန်လာသော ညည်းညူသံကို ခံစားလိုက်ရပြီး ဤအပတ် သို့မဟုတ် နောက်တစ်ပတ်တွင် ကားရပ်နားစခန်းသို့ ဝင်သင့်မဝင်သင့် စဉ်းစားလာခဲ့သည်။

"စနစ်? မင်း ဘယ်လိုထင်လဲ။ စီမံခန့်ခွဲရေးအဖွဲ့က ငါ့ကို ပြောလာမယ့်အချိန်အထိ စောင့်သင့်လား" ဟု သူ၏နေရာကို ကာကွယ်ရင်း ရှေ့သို့ဆက်လက် ထိုးဖောက်မောင်းနှင်နေသည့် လူကာက မေးလိုက်သည်။

[တယ်လီမီထရီအဖွဲ့ရဲ့ အမိန့်ကို စောင့်တာက ပုံမှန်လုပ်ရိုးလုပ်စဉ် ဖြစ်ပေမဲ့၊ ပြိုင်လမ်းက အကောင်းဆုံးအပူချိန်မှာ ရှိနေတုန်း အခုပဲ ကားရပ်နားစခန်းကို ဝင်ဖို့ အကြံပြုချင်ပါတယ်။ ဒီအဆင့်က နောက်ပိုင်းအပတ်တွေမှာ ကားဘီးတွေ မြန်မြန်ပျက်စီးမလာခင် ကားဘီးစီမံခန့်ခွဲမှုကို ပိုကောင်းစေပါလိမ့်မယ်။]

လူကာက အသက်ပြင်းပြင်းတစ်ချက် ရှူသွင်းလိုက်ပြီး ကားရပ်နားစခန်းဆီသို့ ဖြောင့်တန်းသော အမြန်နှုန်းဖြင့် ချဉ်းကပ်လာချိန်တွင် အကွေ့တစ်ခုကို ညင်သာစွာ ဖြတ်သန်းလိုက်သည်။ သူ၏ဆုပ်ကိုင်မှုက စတီယာရင်ပေါ်တွင် တင်းကျပ်သွားပြီး အရှိန်ထိန်းညှိပေးတဲ့ခလုတ်ကို နှိပ်ကာ ကားရပ်နားတဲ့လမ်း ၏ အမြန်နှုန်းကန့်သတ်ချက်နှင့် ကိုက်ညီစေရန် ကားကို အရှိန်လျှော့လိုက်သည်။ အင်ဂျင်ဟိန်းဟောက်သံက တိုးဝင်သွားပြီး ထိန်းချုပ်ထားသော ညည်းသံလေးအဖြစ် ပြောင်းလဲသွားကာ ကားရပ်နားရာလမ်းကြောင်းအတွင်းသို့ စက္ကန့်အနည်းငယ်အတွင်း ချောမွေ့စွာ ဝင်ရောက်သွားသည်။ စကားစမြည်ပြောရင်း တန်းစီစောင့်ဆိုင်းနေကြသည့် အဖွဲ့သားများသည် ချက်ချင်း လှုပ်ရှားလာကြသည်။ ထိုအဖွဲ့ထဲတွင် လွန်ခဲ့သောရက်က သူစကားပြောခဲ့ဖူးသည့် အစ်ဇာဘဲလား ဆိုသောကောင်မလေး ပါဝင်နေသည်ဟု လူကာ ကျိန်တွယ်ပြောရဲသည်။

သူတို့သည် ပရော်ဖက်ရှင်နယ် ကားရပ်နားစခန်းဝန်ထမ်းများလောက် မမြန်ဆန်သော်လည်း သူတို့၏လုပ်ဆောင်ချက်များကို လျှပ်တစ်ပြက်အတွင်း ပြီးစီးအောင် လုပ်ဆောင်နိုင်ခဲ့သည်။ ကားဘီးအသစ်များ၏ ကြမ်းပြင်သို့ ကျလာသော ဆောင့်သံနှင့်အတူ သွားရန်အချက်ပြမှုကို ရရှိသည်နှင့် လူကာသည် ကားရပ်နားရာလမ်းကြောင်းမှ ဒုံးကျည်တစ်စင်းလို ပြေးထွက်သွားပြီး ပြိုင်လမ်းပေါ်သို့ ပြန်လည်ဝင်ရောက်လာခဲ့သည်။ သူ၏ ရပ်နားချိန်အတွင်း မည်သူကမျှ ကျော်တက်မသွားဘူးဟု ထင်လိုက်ရသဖြင့် ဝမ်းသာမှုတိုတိုလေးတစ်ခု ရင်ထဲ လွှမ်းခြုံသွားသော်လည်း၊ သူ လမ်းကြောင်းပေါ် ပြန်လည်နေရာယူလိုက်သည်နှင့် ဟွန်ဒါကားနှင့် အခြားကားတစ်စီးက သူ့ကို အရှိန်ဖြင့် ကျော်ဖြတ်သွားခဲ့ကြသည်။

လူကာက ဆဲရေးလိုက်ပြီး ကားဘီးအသစ်များက ကတ္တရာလမ်းကို ယုံကြည်မှုရှိရှိ ဆုပ်ကိုင်ထားသည်ကို ခံစားရချိန်တွင် အရှိန်ကို ထပ်မံမြှင့်တင်လိုက်သည်။ သူ ၁၃ ပတ်မြောက်ကို အဆင့် ၉ နေရာဖြင့် ပြီးဆုံးချိန်တွင် နောက်ထပ် ကားရပ်နားတဲ့နေရာကိုမဝင်တော့ဘူးဟု မိမိကိုယ်ကိုယ် ကတိပေးလိုက်သည်။

အပတ်များစွာ ဆက်တိုက်ဆိုသလို လူကာသည် အရှိန်ကို ပိုမိုပြင်းပြင်း တင်ခဲ့သည်။ သူ၏ အောက်ဘက်ရှိ ဘီးများလောက်ပင် မြန်ဆန်စွာ ပြေးလွှားနေသည့် သူ၏ စိတ်ထဲမှ ကမောက်ကမဖြစ်မှုများနှင့် နှိုင်းယှဉ်လျှင် အင်ဂျင်၏ ရင်းနှီးကျွမ်းဝင်နေသော ဟိန်းဟောက်သံက ခပ်တိုးတိုး တီးတိုးသံလေးတစ်ခုလိုပင် ဖြစ်နေသည်။ သူ အကွေ့များကို ဖြတ်သန်းလိုက်ချိန်တွင် ကတ္တရာလမ်းက ဝေဝါးနေပြီး သူ၏ ခန္ဓာကိုယ်ကလည်း ကား၏ လှုပ်ရှားမှုတိုင်းနှင့်အတူ အလိုအလျောက် ယိမ်းနွဲ့နေသည်။ အဆင့် ၈၊ အဆင့် ၇... သို့တိုင်အောင် သူ့ရှေ့မှ ဦးဆောင်နေသူများနှင့် အကွာအဝေးမှာ ကျော်လွှား၍မရနိုင်လောက်အောင် ဝေးကွာနေဆဲဟု ခံစားရသည်။

[ကျော်တက်ခြင်း ကျွမ်းကျင်မှု +2]

[ပေါင်းစပ်မှုဘား : 50%]

[ကြံ့ခိုင်မှု +2]

[အရှိန်ကို ထိန်းညှိပါ လက်ခံသူ။ သင် နောက်ဆုံးအပတ်တွေနဲ့ အလှမ်းဝေးနေပါသေးတယ်၊ အခုမှ ဆယ့်ခုနစ်ပတ်မြောက်ပဲ ရှိပါသေးတယ်။]

လူကာက သူ၏စနစ် ဘာကိုဆိုလိုသလဲဆိုတာကို နားလည်သော်လည်း၊ သူက မည်သည့် အန္တရာယ်မှ အဖြစ်မခံရန် စိတ်ပိုင်းဖြတ်ထားသည်။ ၁၇ ပတ် ပြီးဆုံးသွားပြီဖြစ်ရာ ဂရေး-ဟူဆန်၏ နောက်ထပ် ၁၇ ပတ် ကျန်နေသေးသော်လည်း၊ ဦးဆောင်နေသူများက သူတို့ဘာသာမည်မျှ ပြီးစီးနေပြီဆိုသည်ကိုတော့ သေချာမသိပေ။

"ကျေးဇူးပြုပြီး သာမန်လုပ်ရပ်လေးတစ်ခုနဲ့ ဒီ‌ ပေါင်းစပ်မှုဘားကြီး ပြည့်မသွားဘူးလို့ ငါ့ကို ပြောစမ်းပါ" သူ၏ ခန္ဓာကိုယ်ထဲတွင် သေစေလောက်သော ဖိစီးမှုများ စီးဆင်းနေသည်ကို ခံစားရစဉ် လူကာက လေသံတိုးတိုးဖြင့် ရေရွတ်လိုက်သည်။ သူ၏ စနစ်မျက်နှာပြင် အပေါ်ညာဘက်ထောင့်တွင် လင်းလက်နေသော ပေါင်းစပ်မှုဘား ၏ အတုံးနှစ်တုံးသည် အစိမ်းရောင် ပြည့်နေပြီဖြစ်သည်။ သူ ကျွမ်းကျင်မှုများကို သုံးလေလေ ရာခိုင်နှုန်း တက်လာလေလေဖြစ်ပြီး နောက်ဆုံး တစ်ချိန်ချိန်တွင် ထိုဘား ပြည့်သွားလိမ့်မည်ကို လူကာ သတိပြုမိလိုက်သည်။

[လက်ခံသူ၊ အဲဒါကို သင့်အတွက် အသာစီးရစေတဲ့ ဖော်မြူလာဝမ်း စနစ်ရဲ့ လုပ်ဆောင်ချက်တွေထဲက တစ်ခုလို့ပဲ မှတ်ယူလိုက်ပါ။]

[သင် အဆင့် ၆ နေရာကို ရောက်နေပြီလို့ ကြေညာရတဲ့အတွက် ဝမ်းသာပါတယ်။ အလွန်ကောင်းမွန်တဲ့ လုပ်ဆောင်ချက်ပါပဲ!]

အလွန်ကောင်းမွန်တဲ့ လုပ်ဆောင်ချက်တဲ့လား။ မယုံနိုင်စရာကောင်းတဲ့ လုပ်ဆောင်ချက်လို့ ပြောရင်ကော။ အဲဒီကောင်ကို ကျော်တက်ဖို့ ဘယ်လောက်တောင် ခက်ခဲခဲ့လဲဆိုတာ မင်း သိလို့လား။ လူကာက စတီယာရင်ကို တင်းကျပ်စွာ ဆုပ်ကိုင်လိုက်ပြီး နောက်ထပ် အကွေ့တစ်ခုသို့ ချဉ်းကပ်လာချိန်တွင် အဆင့် ၅ နေရာမှ ယာဉ်မောင်း၏နောက်သို့ ကပ်လိုက်သည်။

ဒါက ဖြတ်ဝင်ဖို့ အကောင်းဆုံးအချိန်ဟု သူ ယုံကြည်သည်—အတွင်းသို့ ဖြတ်ဝင်ရန် မဟုတ်ဘဲ အပြင်ဘက်သို့ ထွက်ရန်ဖြစ်သည်။ နောက်ကျမှ ဘရိတ်အုပ်မည်၊ လွတ်လွတ်လပ်လပ် ဖြတ်ထွက်မည်—ဒါက သူ၏ အစီအစဉ်ပင်ဖြစ်သည်။

အချိန်ကျရောက်လာသည်နှင့် လူကာ မျှော်လင့်ထားသည့်အတိုင်း အဆင့် ၅ နေရာမှ ယာဉ်မောင်းက ဒါကသာ နေရာယူဖို့ တစ်ခုတည်းသောလမ်းဟု ယုံကြည်ကာ အတွင်းသို့ ဖြတ်ဝင်လာသည်။ လူကာက မျက်တောင်တစ်ချက်ပင် မခတ်ဘဲ ကျယ်ဝန်းသော ဟာကွက်ကြီးထဲသို့ သူ၏ကားကို ထိုးသွင်းလိုက်ရာ ကွေ့ကို ဖြတ်သန်းချိန်တွင် ကားဘီးများ စူးရှစွာ အော်မြည်သွားပြီး ကားက ခိုင်မာစွာ ရပ်တည်နိုင်ခဲ့သည်။ လေပြင်းများက သူ့ပတ်လည်တွင် ကြမ်းတမ်းစွာ တိုက်ခတ်နေစဉ် အင်ဂျင်က သားရဲတစ်ကောင်လို ဟိန်းဟောက်မြည်ဟည်းသွားပြီး ကား၏ အရှိန်ရုန်းထွက်မှုကို သူ ခံစားလိုက်ရသည်။ သူ၏ R.S.11 ကားလေးကို အဆင့် ၇ နေရာမှ နောက်ကလိုက်လာသော ကားကို ပြသလိုက်နိုင်ပြီးနောက် လူကာ၏စိတ်က ရှေ့သို့ ရောက်နေပြီဖြစ်သည်။ နောက်ထပ် တစ်ယောက်စီးပြိုင်ကားတစ်စီးဆီသို့ပေါ့။

[အဆင့် ၅ နေရာသည် ၂.၂ စက္ကန့်အကွာတွင် ပေါ်လာပါသည်]

ရှေ့မှ ယာဉ်မောင်းသည် မည်သူပင်ဖြစ်စေ၊ သူသည် ကျွမ်းကျင်ပြီး သူ၏ လှုပ်ရှားမှုများတွင် ထက်မြက်တိကျသည်။ သို့သော် လူကာ့တွင် တခြားအရာတစ်ခု ရှိနေသည်—ဆာလောင်မွတ်သိပ်မှု၊ အရာများစွာအတွက် ဆာလောင်မွတ်သိပ်မှုဖြစ်ပြီး၊ အထူးသဖြင့် မကြာသေးမီက သူပြုလုပ်ထားသော သဘောတူညီချက်အချို့အတွက် ဖြစ်သည်။

ပြိုင်လမ်း၏ ထိပ်ဆုံးအမှတ်သို့ ချဉ်းကပ်လာသည်နှင့်အမျှ လူကာက လီဗာကို ဖိနင်းလိုက်ရင်း ပခုံးပေါ်မှ တင်းမာမှုများကို လျှော့ချလိုက်သည်။ လာမည့်အကွေ့ကို ရင်ဆိုင်ရန် အဆင်သင့်ဖြစ်နေသော သူ၏ ခန္ဓာကိုယ်ရှိ ကြွက်သားတိုင်းက တင်းမာနေပြီး လက်ချောင်းများက စတီယာရင်ပေါ်တွင် လှုပ်ရှားနေသည်။

အား... ငါ ထင်သားပဲ။ ဟွန်ဒါကားပဲ ဖြစ်နေပြန်သည်။ လူကာသည် အပြာရောင် ကိုယ်ထည်ကို ချက်ချင်း မှတ်မိလိုက်ပြီး သူတို့ နောက်ဆုံး တွေ့ဆုံခဲ့စဉ်က မှတ်တမ်းများ ပြန်ပေါ်လာသည်။

"ငါ လာနေပြီဆိုတာကို သူ သိတယ်" လူကာက ခပ်တိုးတိုး ရေရွတ်လိုက်ပြီး ရှေ့မှကားကိုသာ အပြည့်အဝ အာရုံစိုက်ထားလိုက်သည်။ သူတို့ကြားရှိ ကွာဟချက်က လျင်မြန်စွာ ကျဉ်းမြောင်းလာပြီး နောက်ထပ် ချွန်ထက်သော အကွေ့တစ်ခုသို့ ချဉ်းကပ်လာချိန်တွင် သူ ဆုံးဖြတ်ရမည်ကို သိလိုက်သည်—အရင်ကလိုပဲ ရုတ်တရက် အတွင်းသို့ ဖြတ်ဝင်မလား သို့မဟုတ် အပြင်ဘက်သို့ ကျယ်ကျယ်ဝန်းဝန်း ထွက်မလား။

ယခင်က ထိပ်တိုက်တွေ့ခဲ့ခြင်းကို သတိရလိုက်သဖြင့် ရုတ်တရက် ဖြတ်ဝင်ရန် တွေးတောမှုအပေါ် သံသယများ ဝင်ရောက်လာသည်။ သို့သော် ဤအကွေ့အမျိုးအစားက ၎င်းကို အားပေးနေပြီး သူ့အတွက် ရွေးချယ်စရာမရှိဘဲ ဒရစ်ဖ် ဆွဲရန်သာ ကျန်တော့သည်—၎င်းက သူ၏ ပထမဆုံးသော ဒရစ်ဖ် ဆွဲခြင်းဖြစ်သည်။

အကွေ့က ကြောက်မက်ဖွယ် အမြန်နှုန်းဖြင့် နီးကပ်လာပြီး လူကာသည် ကတ္တရာလမ်းပေါ်သို့ ဖိချနေသည့် သူ၏အောက်ရှိ စက်ယန္တရား၏ အကြမ်းစားစွမ်းအင်ကို ခံစားလိုက်ရသည်။ သူ လက်ကောက်ဝတ်များကို လှည့်ကာ စတီယာရင်ကို ညာဘက်သို့ ရုတ်တရက် ဆွဲချိုးလိုက်ပြီး ကားကို ထိန်းချုပ်နိုင်သော ဒရစ်ဖ် အခြေအနေသို့ ရောက်စေလိုက်သည်။ ကားကို ကန့်သတ်ချက်ထက် ကျော်လွန်၍ မောင်းနှင်လိုက်သဖြင့် ပြိုင်လမ်း၏ ဟိုးဘက်အစွန်း ပရိသတ်စင်မြင့်၏ အကာအရံကို ပွတ်တိုက်မိမတတ် ဖြစ်သွားချိန်တွင် ကားဘီးများက ဆန့်ကျင်ဘက် အသံပြဲကြီးဖြင့် အော်မြည်သွားသည်။

လူကာ၏ ကြိုးစားမှုကို မြင်သောအခါ ဟွန်ဒါယာဉ်မောင်းမှာ ဒေါသထွက်လာပြီး လူကာ၏လမ်းကြောင်းကို ပိတ်ဆို့ရန် ကြိုးစားကာ ရုတ်တရက် ဝင်လာသည်။ သို့သော် ဒရစ်ဖ် ဆွဲခြင်း၏ ကြိုတင်ခန့်မှန်း၍မရသော သဘာဝက လူကာအား မထင်မှတ်ထားသော လှည့်စားမှုများကို လုပ်ဆောင်နိုင်စေပြီး ကာကွယ်သူရော နောက်မှလိုက်လာသူများကိုပါ ဇဝေဇဝါဖြစ်စေမည့် ဟာကွက်များကို ဖန်တီးပေးခဲ့သည်။ R.S.11 ၏ အနောက်ပိုင်းက ငါးမြီးခတ်သလို ယိမ်းထိုးသွားပြီး အနီနှင့်အဖြူ အစွန်းအမှတ်အသားများအနီးသို့ အန္တရာယ်များလောက်အောင် လျှောတိုက်သွားသည်။ ကားဘီးရာများက အရှိန်ကို ခုခံရင်း လမ်းမကို ကိုက်ခဲနေသံကို လူကာ လုံးဝနီးပါး ကြားနေရသည်။ ဆွဲငင်အား အဟုန်က သူ့ကို ဖိသိပ်ထားစဉ် လောင်ကျွမ်းနေသော ရော်ဘာနံ့များက နှာခေါင်းထဲသို့ တိုးဝင်လာပြီး သူ၏နှလုံးခုန်နှုန်းများ မြန်ဆန်လာသည်။

သူ၏ စနစ်မျက်နှာပြင်ပေါ်ရှိ အမြန်နှုန်းပြဒိုင်ခွက်က အလျင်အမြန် မြင့်တက်လာပြီး ကွေ့ကို အပြည့်အဝ မထိန်းချုပ်နိုင်မီအထိ ဒရစ်ဖ် ကို ဆက်ထိန်းထားရန် ဆုံးဖြတ်ကာ စတီယာရင်ကို စောင်းထားလိုက်သည်။ ယခုအခါ သူ၏ ကားနှာခေါင်းပိုင်းသည် ဟွန်ဒါယာဉ်မောင်း၏ ကိုယ်ပိုင်နယ်မြေအတွင်းသို့ အောင်မြင်စွာ ထိုးဖောက်ဝင်ရောက်နိုင်ခဲ့ပြီဖြစ်သည်။ လူကာ၏ ကားဘီးများ စူးရှစွာ အော်မြည်နေမှု ရပ်တန့်သွားပြီး သူ၏ ဒရစ်ဖ် ဆွဲခြင်း အဆုံးသတ်သွားချိန်တွင် နားငြီးဖွယ်အသံများ ပျောက်ကွယ်သွားသည်။

နောက်တစ်ဆင့်မှာ လီဗာကို နင်းရန်ဖြစ်ပြီး၊ ဟွန်ဒါကားရှေ့သို့ ဒေါင့်ဖြတ်အနေအထားဖြင့် အရှိန်တင်ကာ ရုတ်တရက် လှုပ်ရှားမှုဖြင့် ယာဉ်မောင်းကို ခေတ္တမျှ မျက်စိလည်သွားစေခဲ့သည်။ သူသည် အကွေ့မှ ထွက်လာပြီး ဖြောင့်တန်းသော လမ်းပေါ်သို့ရောက်ကာ အရှိန်ကို ထပ်မံမြှင့်တင်လိုက်သည်။ လူကာ ကိုယ်တိုင်ပင် မယုံကြည်နိုင်ဖြစ်ရသည်။

[အဆင့် ၅]

[ကျော်တက်ခြင်း ကျွမ်းကျင်မှု +1]

[တုံ့ပြန်နိုင်စွမ်း +1]

[ပြိုင်လမ်းသတိပြုမိမှု +1]

[ပေါင်းစပ်မှုဘား (ပေါင်းစပ်မှုဘား : 87.5%]

[သင်သည် 260 km/h ဖြင့် မောင်းနှင်နေပါသည်]

[လက်ခံသူ, အချက်အလက်များကို ကြည့်ရှုလိုပါသလား။ ကြည့်ရှုရန် ကျွန်ုပ် အကြံပြုလိုပါသည်]

လူကာသည် ဆယ့်နှစ်ရက်ဆက်တိုက် မနားတမ်း ပြေးလွှားထားရသကဲ့သို့ သူ၏ ခန္ဓာကိုယ်တစ်ခုလုံးရှိ ကြွက်သားများ တင်းမာကာ ကိုက်ခဲလာသည်ကို ခံစားလိုက်ရသည်။ ယာဉ်မောင်းထိုင်ခုံပေါ်တွင် ထိုင်နေရုံသက်သက်ကဲ့သို့ ရိုးရှင်းပုံရသော အရာတစ်ခုသည် ခန္ဓာကိုယ်အပေါ် ဤမျှလောက်ပင် ဒဏ်ပိစေနိုင်သည်ဆိုသည်ကို သူ အံ့သြမိသည်။ ထိုသို့သော အမြန်နှုန်းများဖြင့် ပြိုင်ပွဲဝင်ရာတွင် အကွေ့များ၌ မြင့်မားသော ၏ ဖိအားကို ခံစားရခြင်းမှာ ဒုံးကျည်တစ်စင်းပေါ်တွင် ကြိုးနှင့်ချည်နှောင်ခံထားရစဉ် တစ်ကိုယ်လုံးလေ့ကျင့်ခန်း လုပ်ရသကဲ့သို့ ခံနိုင်ရည်ရှိရန် လိုအပ်သည်။ ရင်ဘတ်ထဲတွင် နှလုံးခုန်သံများ ဆောင့်ခုန်နေပြီး ပြိုင်ပွဲ၏ ရုပ်ပိုင်းဆိုင်ရာ ဖိစီးမှုဒဏ်ကို စတင်ခံစားလာရသည်နှင့်အမျှ သူ၏ မျက်နှာပေါ်တွင် ချွေးပေါက်များ စီးကျလာသည်။

အချိန်နှင့်တစ်ပြေးညီ ပြသနေသော အချက်အလက်များကို ကြည့်ရှုရန် စနစ်က ဘာကြောင့် အကြံပြုခဲ့သလဲဆိုသည်ကို သူ ချက်ချင်း နားလည်သွားသည်။ လူကာသည် ကျန်ရှိနေသည့် ပြိုင်ပွဲအတွက် သူ မည်မျှကြာအောင် တောင့်ခံနိုင်မည်ကို မသေချာတော့ဘဲ၊ တိုတောင်းသော ပြိုင်ပွဲ၏ နောက်ဆုံးအပတ်များသို့ ချဉ်းကပ်လာချိန်တွင် သူ၏ အခြေအနေကို အကဲဖြတ်ရန် အရေးတကြီး လိုအပ်လာကြောင်း ခံစားလိုက်ရသည်။

[အချိန်နှင့်တစ်ပြေးညီ ပြသနေသော အချက်အလက်များ:

ယာဉ်အမြန်နှုန်း: 250 km/h

နှလုံးခုန်နှုန်း: 140 bpm

လုပ်ဆောင်နိုင်စွမ်း အခြေအနေ: 70% (သင့်တင့်)

အသက်ရှူနှုန်း: အလွန်မြန်ဆန်နေသည်

ဖြတ်သန်းပြီးသော အကွာအဝေး: 71100မီတာ

အချိန်: 28 မိနစ် 10 စက္ကန့် ]