အခန်း (၃၇) - ငါ့ရှေ့မှာ စည်းကမ်းမဖောက်နဲ့

"ဒါက စတုတ္ထမြောက် မီဇူကာဂဲ နေထိုင်တဲ့နေရာလား။"

အူဟာရာနာရာကူနှင့် ဟိုရှီဂါကီကီဆာမဲတို့ စတုတ္ထမြောက် မီဇူကာဂဲ၏ ကန်ဘောင်ဘေးရှိ နေအိမ်သို့ ရောက်ရှိလာသောအခါ ကမ်းစပ်တစ်လျှောက်တွင် ပြန့်ကျဲနေသည့် မြူပုန်းရွာမှ နင်ဂျာအလောင်းများကိုသာ တွေ့လိုက်ရသည်။ ကြည်လင်နေသည့် ကန်ရေပြင်မှာလည်း သွေးရောင်လွှမ်းနေသည်။ ဟိုရှီဂါကီကီဆာမဲ ခေါင်းညိတ်လိုက်ပြီး ပတ်ဝန်းကျင်ကို လေ့လာကာ အံ့ဩတကြီးဖြင့် လျှာသပ်လိုက်သည်။

"ဇာဘူဇာဆိုတဲ့ကောင်က မီဇူကာဂဲရဲ့ အစောင့်နင်ဂျာတွေကို ဒီလောက်အများကြီး သတ်နိုင်ခဲ့တာပဲ။ သူ ဒီကိစ္စကို ကြိုတင်စီစဉ်ထားတာ ကြာပြီထင်တယ်!"

တိုက်ပွဲဖြစ်ပွားခဲ့သည့် အခြေအနေနှင့် သွေး၏ အပူချိန်ကို ကြည့်ခြင်းအားဖြင့် မိုမိုချီဇာဘူဇာက စတုတ္ထမြောက် မီဇူကာဂဲ ကို လုပ်ကြံရန် ကြိုးပမ်းပြီးနောက် အချိန်သိပ်မကြာသေးကြောင်း သိသာသည်။ သူ အနီးအနားတွင် ပုန်းအောင်းနေကောင်း နေလိမ့်မည်။ တိုက်ပွဲ၏ ရလဒ်နှင့် ပတ်သက်၍ မိုမိုချီဇာဘူဇာသည်မီဇူကာဂဲ ကို သတ်နိုင်လိမ့်မည်ဟု အူဟာရာနာရာကူရော၊ ဟိုရှီဂါကီကီဆာမဲပါ ယုံကြည်မှု မရှိကြပေ။ သုံးမြီးဂျင်ချူရီကီဆိုသည်မှာ လုပ်ကြံခြင်းနည်းဗျူဟာများဖြင့် အလွယ်တကူ ကိုင်တွယ်နိုင်မည့်သူ မဟုတ်ချေ။

ရုတ်တရက် ရေပြင်ပေါ်တွင် လှိုင်းထလာသည်။ ကျောဘက်ရှိ ဆူးတောင်များမှ ရေစက်များ တောက်ပြောင်နေသည့် ရုပ်ဆိုးလှသော သားရဲကြီးတစ်ကောင် ပေါ်ထွက်လာသည်။ သံမဏိကဲ့သို့ မာကျောသည့် အမြီးသုံးချောင်းက သူ၏အနောက်ဘက်တွင် ယိမ်းနွဲ့နေပြီး ကြောက်မက်ဖွယ်ကောင်းသော မျက်လုံးတစ်စုံက ကမ်းစပ်တွင်ရှိနေသည့် လူနှစ်ဦးကို စိုက်ကြည့်နေသည်။

"အို..."

သားရဲကြီးကို မြင်လိုက်ရသော်လည်း ဟိုရှီဂါကီကီဆာမဲ၏ မျက်နှာတွင် ကြောက်ရွံ့မှုမရှိဘဲ အပြုံးတစ်ခုသာ ပေါ်လာသည်။

"မီဇူကာဂဲ-ဆာမကို သားရဲပုံစံပြောင်းလဲခြင်းအထိ ဖိအားပေးနိုင်ခဲ့တာကို ကြည့်ရင် ဇာဘူဇာဆိုတဲ့ကောင်ကို လျှော့တွက်လို့မရဘူးပဲ!"

ဤသားရဲကြီးမှာ မြူပုန်းရွာ၏ သုံးမြီးအီဆိုဘုပင် ဖြစ်သည်။ နောက်တစ်ခဏတွင် လိပ်နှင့်တူသော သားရဲကြီးသည် ဟိုရှီဂါကီကီဆာမဲကို တစ်ချက်ကြည့်လိုက်ပြီးနောက် မီးခိုးငွေ့အဖြစ် ပြောင်းလဲသွားကာ သူတို့၏ အမြင်အာရုံမှ ပျောက်ကွယ်သွားသည်။ မီးခိုးငွေ့ထဲမှ မျက်နှာပေါ်တွင် ချုပ်ရိုးပါရှိသော လူငယ်နင်ဂျာတစ်ဦး ထွက်လာသည်။ သူ၏ရုပ်ရည်မှာ ကြောက်စရာကောင်းသည်ထက် ချစ်စရာကောင်းနေသယောင် ရှိသည်။ သူကား အခြားသူမဟုတ်၊ စတုတ္ထမြောက် မီဇူကာဂဲ ကာရာတာချီယားဂူရပင် ဖြစ်သည်။ သူက အေးစက်သော အသံဖြင့် ဆိုသည်။

"ဟမ့်၊ ဇာဘူဇာဆိုတဲ့ကောင်က သူရဲဘောကြောင်တဲ့ကောင်ပဲ။ ငါက အီဆိုဘုရဲ့ စွမ်းအားကို လုံးဝသုံးစရာမလိုပါဘူး။ သူ့ကို လေကောင်းလေသန့်ရအောင် ခဏထုတ်ပေးလိုက်ရုံပါ..."

ဟိုရှီဂါကီကီဆာမဲ လက်ဝါးကို ဖွင့်လိုက်ပြီး အူဟာရာနာရာကူကို ကြည့်ကာ သက်သောင့်သက်သာဖြင့် ရယ်မောပြောဆိုလိုက်သည်။

"အကယ်၍ ခင်ဗျားက အူဟာရာ-ဆာမကို ရင်ဆိုင်ရတော့မယ်ဆိုရင် သုံးမြီးအီဆိုဘုရဲ့ စွမ်းအားကို မချန်ထားဘဲ သုံးဖို့ မီဇူကာဂဲ-ဆာမကို တိုက်တွန်းချင်ပါတယ်။ မဟုတ်ရင် အူဟာရာ-ဆာမအတွက် အဆင်မပြေဖြစ်သွားလိမ့်မယ်!"

"အဲ့ဒီလိုလား။" မီဇူကာဂဲ က အူဟာရာနာရာကူကို တစ်ချက်ကြည့်လိုက်ပြီး အံ့အားသင့်စရာကောင်းလောက်အောင်ပင် လေးလေးနက်နက် ခေါင်းညိတ်သည်။

"နားလည်ပြီ၊ ငါ လုံးဝမချန်ထားတော့ဘူး။"

"ဟေ့၊ ဟေ့၊ ဟေ့၊ ကီဆာမဲရဲ့ အရူးစကားတွေကို နားမယောင်ပါနဲ့!" အူဟာရာနာရာကူ သူ့၏ လက်အောက်ငယ်သားကို မျက်စောင်းထိုးလိုက်ပြီးမီဇူကာဂဲ ဘက်သို့ လှည့်ကာ ဆိုသည်။

"ဘယ်လိုပဲဖြစ်ဖြစ်၊ ခင်ဗျားက သုံးမြီးအီဆိုဘုရဲ့ စွမ်းအားကို သုံးလိုက်ရင် ခင်ဗျား နာကျင်စွာ သေဆုံးသွားလိမ့်မယ်... ခင်ဗျားကို ဒီပုံစံအတိုင်းပဲ အဆုံးသတ်လိုက်ရင် ပိုပြီး အဆင်ပြေမယ်ထင်တယ်။"

"..."

အူဟာရာနာရာကူ၏ စကားတစ်ခွန်းတည်းကမီဇူကာဂဲ ၏ မျက်နှာကို မည်းမှောင်သွားစေသည်။ ဒီကောင်လေးက ဘာလို့ ဒီလောက်တောင် မောက်မာနေရတာလဲ။ စတုတ္ထမြောက် မီဇူကာဂဲမှာ သူ့ကို မကြည့်တော့ဘဲ ငါးမန်းမျက်နှာနှင့် နင်ဂျာဆီသို့ လှည့်လိုက်သည်။

"ဟိုရှီဂါကီကီဆာမဲ၊ မင်းလည်း ငါ့ကို လုပ်ကြံချင်နေတာလား။ ဒီကောင်လေးကို မင်းရဲ့ လက်ထောက်အဖြစ် ခေါ်လာတာလား။"

"မဟုတ်ရပါဘူး၊ မီဇူကာဂဲ-ဆာမ၊ အထင်မလွဲပါနဲ့။" ဟိုရှီဂါကီကီဆာမဲ ခေါင်းခါလိုက်ပြီး ယားဂူရ၏ စွပ်စွဲချက်ကို ငြင်းဆန်ကာ အပြုံးနှင့်ပင် ဆက်ပြောသည်။

"ကျွန်တော် ဒီတိုက်ပွဲမှာ ဝင်မပါဘူး။ ဘာလို့လဲဆိုတော့ အခုလောလောဆယ်မှာ ကျွန်တော်က မီဇူကာဂဲ-ဆာမကို လုပ်ကြံတဲ့ကိစ္စမှာ ပါဝင်ပတ်သက်မိသွားတဲ့ အပြစ်မဲ့တဲ့ ကြည့်ရှုသူတစ်ယောက်သာ ဖြစ်လို့ပါ!"

သူနှင့် အူဟာရာနာရာကူတို့၏ အစီအစဉ်အရ သူသည် ဤတိုက်ပွဲတွင် ပါဝင်မည်မဟုတ်ပေ။ အူဟာရာ၏ စွမ်းအားကိုလည်း သူ ကိုယ်တိုင် မြင်တွေ့လိုသေးသည်။ ကာဂဲအဆင့်ရှိသူတစ်ဦးကို အနိုင်ယူခြင်း သို့မဟုတ် သတ်ဖြတ်ခြင်းမှာ စွမ်းအားကို တိုင်းတာနိုင်မည့် အကောင်းဆုံးနည်းလမ်းပင် ဖြစ်သည်။

"ဒါဆိုရင် သူ့ကို ငါသတ်ပြီးရင်၊ မင်းကို ဆက်ပြီး ရှင်းပစ်မယ်!"

မီဇူကာဂဲ ကအူဟာရာနာရာကူကို ကြည့်လိုက်ပြီး ရုတ်တရက် လက်ဝါးကို လှည့်လိုက်သည်။ သူ့နောက်တွင်ရှိသော အစိမ်းရောင်ပန်းပွင့်ပုံစံ သံတုတ်လက်နက်မှာ သူ့လက်ထဲသို့ ရောက်ရှိလာပြီး အူဟာရာနာရာကူကို တိုက်ခိုက်ရန် ဦးစွာ အရှိန်ယူလိုက်သည်။

အူဟာရာနာရာကူ သူ့၏လက်နက်ကို အလွယ်တကူပင် ဖမ်းဆုပ်လိုက်သည်။ သူ၏ အသက်စွမ်းအင်မှာ (3000) ကျော်လွန်သွားပြီးနောက်ပိုင်းတွင် သူ၏ ခွန်အားနှင့် အရှိန်နှုန်းမှာ အဆမတန် တိုးတက်လာခဲ့ပြီး မီဇူကာဂဲ ၏ တိုက်ခိုက်မှုကို ပိတ်ဆို့ရန်မှာ အလွယ်လေးပင်။

"ခွန်အားကတော့... မဆိုးပါဘူး။" အူဟာရာနာရာကူ လျှာသပ်လိုက်သည်။ သူကိုယ်တိုင်ကို ချီးကျူးနေတာလား၊ မီဇူကာဂဲ ကို ချီးကျူးနေတာလား မသိရသော်လည်း သူ၏စကားကတော့ မီဇူကာဂဲကို ဒေါသထွက်စေသည်မှာ အမှန်ပင်။

မီဇူကာဂဲ ၏ လက်ဝါးမှာ ရုတ်တရက် သွေးရောင်လွှမ်းသွားပြီး အူဟာရာနာရာကူ၏ ရင်ဘတ်ကို ပြင်းပြင်းထန်ထန် ရိုက်ချလိုက်သည်။ သန္တာကျောက်တုံးများက အူဟာရာ၏ ခန္ဓာကိုယ်ပေါ်တွင် ချက်ချင်းဆိုသလို တည်ဆောက်သွားသည်။ ဤသည်မှာ သုံးမြီးအီဆိုဘု၏ စွမ်းအားဖြစ်သည့် သန္တာလက်ဝါးပင် ဖြစ်သည်။ သုံးမြီး၏ စွမ်းအားကို အသုံးပြုနိုင်သည့် ဂျင်ချူရီကီမှသာလျှင် သန္တာလက်ဝါးကို သုံးနိုင်မည်ဖြစ်သည်။ တစ်ခါတည်းထိမှန်ရုံဖြင့် ခန္ဓာကိုယ်ပေါ်တွင် သန္တာကျောက်တုံးများ လျင်မြန်စွာ ပေါက်ဖွားလာမည် ဖြစ်သည်။ ပြည့်စုံသော ဂျင်ချူရီကီတစ်ဦးဖြစ်သည့် မီဇူကာဂဲ သည် သုံးမြီးအီဆိုဘု၏ စွမ်းအားကို ငှားယူကာ တစ်ပိုင်းသားရဲပုံစံအဖြစ် အချိန်မရွေး ပြောင်းလဲနိုင်သည်။ ဤဂျူဆုမှာ ခုခံရန် မဖြစ်နိုင်သလောက်ဖြစ်ပြီး နင်ဂျာအများအပြားမှာ ဤနင်ဂျူဆုနှင့် တိုင်းဂျူဆု ပေါင်းစပ်ထားသည့်အတတ်ကို ခံခဲ့ကြရသည်။ စတုတ္ထမြောက် မီဇူကာဂဲမှာ သူပေးထားသော ကတိအတိုင်းပင် မချန်ထားတော့ဘဲ အူဟာရာနာရာကူကို ဆန့်ကျင်ရန် သုံးမြီး၏ စွမ်းအားကို ချက်ချင်းပင် အသုံးပြုလိုက်သည်။

"တော်တော်လေး ရှုပ်ထွေးတာပဲ..."

အူဟာရာနာရာကူ သူ၏ခန္ဓာကိုယ်ပေါ်တွင် ဆက်တိုက်ပေါက်ဖွားနေသည့် သန္တာကျောက်တုံးများကို ကြည့်လိုက်သည်။ ၎င်းတို့မှာ သူ့ကို ချက်ချင်းဆိုသလိုပင် ဖုံးလွှမ်းသွားတော့မည်ဖြစ်သည်။ သူက တိုးညင်းစွာ ရေရွတ်သည်။

"တွေ့တွေ့ချင်းပဲ ဒီလိုစွမ်းအားမျိုးကို သုံးတော့တာပဲလား?"

"သန့်ရှင်းသော တရားစီရင်ခြင်း၏ အချိန်အခါ!"

အူဟာရာ၏ ခန္ဓာကိုယ်မှ ရွှေရောင်အလင်းတန်းအကာအကွယ်တစ်ခု ထွက်ပေါ်လာပြီး သူ့ကိုယ်ပေါ်ရှိ သန္တာကျောက်တုံးများကို ချက်ချင်းပင် ဖယ်ရှားပစ်လိုက်သည်။ အူဟာရာ လက်ကို ဝှေ့ယမ်းလိုက်သည့်နှင့်အတူ ချာကရာအလင်းဓားတန်းများက မီဇူကာဂဲ ဆီသို့ ထိုးဖောက်ဝင်ရောက်သွားသည်။

မီဇူကာဂဲ ၏ သံတုတ်မှာ လည်ပတ်သွားပြီး သူ့၏အစိမ်းရောင်ပန်းပွင့်ပုံစံ လက်နက်မှ ရေစီးကြောင်းများ ကျဆင်းလာကာ သူတို့နှစ်ဦးကြားတွင် မှန်အဖြစ် ပြောင်းလဲသွားသည်။

"ရေစနစ် — ရေမှန်ဂျူဆု!"

မှန်ထဲမှ အူဟာရာနာရာကူနှင့် ပုံစံတူ နင်ဂျာတစ်ဦး ထွက်ပေါ်လာပြီး ချာကရာအလင်းဓားများမှာ အခြားသော ရေဖြင့်ပြုလုပ်ထားသည့် အူဟာရာအတုကို ချက်ချင်းပင် ထိုးဖောက်သွားသည်။ မီဇူကာဂဲ က အူဟာရာ၏ တိုက်ခိုက်မှုကို ရှောင်ရှားရန် လှည့်လိုက်ပြီး မျက်မှောင်ကြုတ်ကာ မကျေမနပ်ဖြင့် ဆိုသည်။

"ရေမှန်ဂျူဆုက ဘာလို့ ပုံတူမကူးနိုင်တာလဲ။"

ရေမှန်ဂျူဆုသည် ရန်သူနှင့် ပုံစံတူ နင်ဂျာတစ်ဦးကို ဖန်တီးပေးပြီး ရန်သူ၏ နင်ဂျူဆုကို အသုံးပြုနိုင်စွမ်းရှိသော်လည်း ပုံတူကူးခြင်းမှာ ထင်ရှားစွာပင် ကျရှုံးသွားသည်။ အူဟာရာနာရာကူ ကမီဇူကာဂဲ ၏ မေးစေ့ကို လက်သီးဖြင့် ထိုးလိုက်ရာ သူ လွင့်စင်သွားသည်။ ထို့နောက် အူဟာရာ လက်ကောက်ဝတ်ကို လှည့်လိုက်ပြီး ဆိုသည်။

"အင်း... ပုံတူကူးတာ ကျရှုံးသွားတာက ဒီလောကမှာ ကျွန်တော်တစ်ယောက်ပဲ ရှိလို့ ဖြစ်မယ်ထင်တယ်!"

"ကောင်လေး၊ မင်း တော်တော် မောက်မာတာပဲ!"

အူဟာရာနာရာကူ၏ ထိုးချက်ကြောင့် မြေပြင်ပေါ်သို့ လွင့်စင်သွားသော မီဇူကာဂဲ မှာ အလျင်အမြန်ပင် ပြန်ထလာပြီး လက်ကွက်များကို လျင်မြန်စွာ ဖော်လိုက်သည်။

"ရေစနစ် — ရေနဂါး...!"

အူဟာရာနာရာကူ မြေပြင်ကို အားပြင်းစွာ နင်းလိုက်ရာ ကျောက်ခဲများ လွင့်စင်ကုန်သည်။ အူဟာရာ၏ အရှိန်မှာ အလွန်လျင်မြန်လွန်းသဖြင့် မီဇူကာဂဲ မှာ လက်ကွက်ဖော်ခြင်းကို ရပ်တန့်လိုက်ရသည်။ သို့သော်လည်း ဤစတုတ္ထမြောက် မီဇူကာဂဲမှာ လုံးဝအံ့ဩဟန်မရှိပေ။ သူ့၏ကျောဘက်မှ ထူထဲသောအမြီးတစ်ခု ရုတ်တရက် ထွက်ပေါ်လာသည်။ သုံးမြီး၏ အမြီးပင် ဖြစ်သည်။ မီဇူကာဂဲ  အမြီးကို အားပြင်းစွာ လှည့်ပတ်လိုက်ပြီး အူဟာရာကို ပြင်းထန်စွာ ရိုက်ချလိုက်ရာ အူဟာရာ လွင့်စင်သွားသည်။ ဤကောင်မှာ လက်ကွက်ဖော်နေခြင်းဖြင့် အူဟာရာကို တိုက်ခိုက်ရန် ဆွဲဆောင်နေခြင်း ဖြစ်သည်။

အဝေးသို့ လွင့်စင်သွားသော အူဟာရာနာရာကူမှာ သူ့ကိုယ်ပေါ်မှ ဖုန်မှုန့်များကို ခါထုတ်လိုက်ပြီး ပြန်ထရပ်လိုက်သည်။ သူ၏ အသက်စွမ်းအင်မှာ (1000) ကျော် လျော့ကျသွားသည်ကို မြင်လိုက်ရသည်။ မီဇူကာဂဲ ၏ ယခင်တိုက်ခိုက်မှုမှာ သာမန်ဂျိုနင်တစ်ယောက်ကို အလွယ်တကူ သတ်ပစ်နိုင်လောက်သည်အထိ ပြင်းထန်ကြောင်း သိသာသည်။

တိုက်ပွဲကို လေ့လာနေသော ဟိုရှီဂါကီကီဆာမဲမှာ ခေါင်းခါလိုက်ပြီး အူဟာရာနာရာကူကို ကြည့်ကာ လျှာသပ်လိုက်သည်။

"လက်ကွက်ဖော်တာကို ဖြတ်တောက်ဖို့ နည်းလမ်းတွေ အများကြီးရှိတာကို အန္တရာယ်အများဆုံးနည်းလမ်းကို ရွေးလိုက်တာပဲ။ ဒါပေမဲ့ သုံးမြီးရဲ့ စွမ်းအားကို တိုက်ရိုက်ရင်ဆိုင်လိုက်တာ... သူ ဒီလောက်တောင် ယုံကြည်မှုရှိနေတာ မဆန်းပါဘူး။"

"ကျွန်တော်ကတော့ သာမန်နင်ဂျာတစ်ယောက်လိုပဲ ခင်ဗျားကို တိုက်ခိုက်ချင်ခဲ့တာ၊ ဒါပေမဲ့ ခင်ဗျားက သားရဲရဲ့စွမ်းအားကို သုံးလာတာပဲ..."

အူဟာရာနာရာကူ လက်ချောင်းများကို ဆုပ်လိုက်သည်။ သူ မီဇူကာဂဲ ကို ကြည့်လိုက်ပြီး တည်ငြိမ်စွာ လက်ကွက်များကို ဖော်လိုက်ကာ တိုးညင်းစွာ ဆိုသည်။

"စတုတ္ထမြောက် မီဇူကာဂဲ-ဆာမ၊ တစ်ခုပြောဖို့ မေ့နေတယ်၊ ကျွန်တော်ကတော့ ကျွန်တော့်ရှေ့မှာ စည်းကမ်းဖောက်တာကို တကယ်ကို မုန်းတာပဲ..."