အခန်း ၆၃ - ဖုံးကွယ်ရန် မစွမ်းသာခြင်း
"ဗဟိုတောင်တန်းရဲ့ ပတ်ပတ်လည်မှာ တခြားတောင်တန်းတွေ အများကြီးရှိပြီး အဲဒီတောင်တန်းအများစုမှာ အဖိုးမဖြတ်နိုင်တဲ့ ရတနာတွေ ပြည့်နှံ့နေတာဗျ" ဟု ယုံရုက လောဘစိတ်အပြည့်ရှိသော လေသံဖြင့် ပြောလိုက်သည်။
ရွှန်လုံသည် တစ်စုံတစ်ခု မှားယွင်းနေသည်ဟု ခံစားမိသဖြင့် မေးမြန်းလိုက်သည်။
"ဗဟိုတောင်တန်းပတ်ပတ်လည်မှာ ရတနာတွေ အဲဒီလောက်အများကြီး ရှိနေတယ်ဆိုရင်၊ ဂိုဏ်းအသီးသီးက အကြီးအကဲတွေ ဒါမှမဟုတ် အနည်းဆုံးတော့ အရင်အကြိမ် ဂိုဏ်းအရွေးချယ်ခံပွဲတုန်းက တပည့်တွေက ဘာလို့ အဲဒါတွေကို အကုန်လုံး လာမခူးသွားကြတာလဲ"
ယုံရုက ခေါင်းခါယမ်းကာ ပြောသည်။
"အစ်ကိုရွှန်ရဲ့ အပြောက နည်းနည်းလေး မှားနေတယ်ဗျ။ အမှန်တော့ ဒါက ကျွန်တော့်ရဲ့ အဖိုးဖြစ်သူ ပြောပြခဲ့တဲ့ လျှို့ဝှက်ချက်အကြီးကြီးတစ်ခုနဲ့ ပတ်သက်နေတာ။ ကျွန်တော့်အဖိုးက 'ဟောက်မြည်သောလေညင်းဂိုဏ်း' ရဲ့ အကြီးအကဲတစ်ယောက်ပါ။ လွန်ခဲ့တဲ့အချိန်တုန်းက သူနဲ့ တခြားအကြီးအကဲတချို့ဟာ ဂိုဏ်းချုပ်ရဲ့နောက်ကိုလိုက်ပြီး ဒီရတနာတွေကို ခူးယူဖို့ ဒေမွန်နီကာတောင်တန်းထဲကို ဝင်ခဲ့ကြဖူးတယ်။ အဲဒီနေ့မှာ ဗဟိုတောင်တန်းဆီကနေ အဆင့် (၄) အထွတ်အထိပ်ရှိတဲ့ ကြောက်စရာကောင်းတဲ့ မိစ္ဆာသားရဲတစ်ကောင် ထွက်လာပြီး သူတို့ကို တိုက်ခိုက်ခဲ့လို့ အဲဒီနေ့က သူတို့အဖွဲ့ရဲ့ ထက်ဝက်လောက်ပဲ သီသီလေး လွတ်မြောက်ခဲ့ပြီး ကျန်တဲ့လူတွေကတော့ အသက်ဆုံးရှုံးခဲ့ရတယ်"
"အဲဒီနေ့ကစပြီး မြေကမ္ဘာအဆင့်ထက်မြင့်တဲ့ ဘယ်သူမှ ထိုမိစ္ဆာသားရဲရဲ့ တိုက်ခိုက်ခြင်းကို ခံရမှာကြောက်လို့ ဒေမွန်နီကာတောင်တန်းထဲကို ခြေမချရဲကြတော့ဘူး။ ဒါကြောင့်လည်း ဒီဒေသကို အခုအခါ ကျွန်တော်တို့ဂိုဏ်းတွေရဲ့ စာမေးပွဲကွင်းပြင်အဖြစ် အသုံးပြုနေကြတာပေါ့။ ဗဟိုတောင်တန်းပတ်ပတ်လည်က အဖိုးမဖြတ်နိုင်တဲ့ ရတနာတွေရှိတဲ့ တောင်တန်းတွေ ဆိုတာလား... အဲဒီတောင်တန်းအားလုံးကို အနည်းဆုံး အဆင့် (၃) အလယ်ပိုင်း ဒါမှမဟုတ် ထိုထက်မြင့်တဲ့ မိစ္ဆာသားရဲတွေက စောင့်ကြပ်နေကြတာဗျ။ ဒါကြောင့် ဘယ်သူမှ ရတနာတွေကို မရရှိနိုင်ခဲ့ကြတာပေါ့"
"ဒါပေမဲ့ ဗဟိုတောင်တန်းကနေ ထွက်ပေါ်လာတဲ့ အတွင်းအားတွေက ကျွန်တော်တို့ ဂိုဏ်းကြီး (၄) ဂိုဏ်းထဲက ဘယ်ဂိုဏ်းထက်မဆို ပိုပြီးတော့ ထူထဲသိပ်သည်းလှတယ်။ အဲဒါကြောင့် ဗဟိုတောင်တန်းရဲ့အတွင်းထဲမှာ ကြီးမားတဲ့ လျှို့ဝှက်ချက်တစ်ခု ရှိနေတယ်လို့ ဂိုဏ်းတိုင်းက ယုံကြည်နေကြတာ။ ဒါပေမဲ့ အဆင့် (၄) အထွတ်အထိပ် မိစ္ဆာသားရဲတစ်ကောင်က စောင့်ကြပ်နေတော့..."
ယုံရုသည် စကားပြောခြင်းကို အဆုံးသတ်လိုက်ရင်း ၎င်းတို့လက်လှမ်းမမီနိုင်သော ရတနာအမြောက်အမြားကို တွေးတောကာ သက်ပြင်းချလိုက်သည်။
"ဒါပေမဲ့ ကျွန်တော်တို့အတွက်လည်း ကံကောင်းခြင်းတစ်ခု ရှိပါသေးတယ်ဗျ။ အနှစ် ၃၀ တိုင်းမှာ ဗဟိုတောင်တန်းကနေ သန့်စင်တဲ့ အတွင်းအားတွေ မှုတ်ထုတ်လေ့ရှိပြီး အဲဒီအတွင်းအားတွေက ဒေမွန်နီကာတောင်တန်းရဲ့ လေထုကို ပိုမို ကြွယ်ဝစေပါတယ်။ အဲဒီလို အတွင်းအား မှုတ်ထုတ်နေတဲ့အချိန်မှာ ဗဟိုတန်းတောင်တန်းနဲ့ ပိုပြီး နီးကပ်လေလေ၊ သန့်စင်တဲ့အတွင်းအားတွေကို အမိအရ စုပ်ယူနိုင်ရင် ပိုပြီးတော့ အကျိုးကျေးဇူးတွေ ရရှိလေလေပါပဲ"
ယုံရု စကားပြောပြီးသွားသောအခါ ရွှန်လုံက ဆိုသည်။
"ဒါပေမဲ့ ဗဟိုတောင်တန်းနဲ့ နီးကပ်လေလေ၊ အဆင့်မြင့် မိစ္ဆာသားရဲတွေနဲ့ တွေ့ဆုံဖို့ အန္တရာယ်က ပိုပြီးကြီးမားလေလေ မဟုတ်ဘူးလား"
"ဒါကြောင့်မို့လို့လည်း ကျွန်တော်က အစ်ကိုရွှန်ကို ကျွန်တော်တို့နဲ့အတူ လိုက်ခဲ့မလားလို့ မေးရတာပေါ့ဗျာ။ ကျွန်တော်တို့ အတွင်းအားမှုတ်ထုတ်မှု စတင်တာကို စောင့်ဆိုင်းရင်း ဗဟိုတောင်တန်းအနီးမှာ ပုန်းအောင်းဖို့ နေရာတစ်ခု မတွေ့မချင်း တစ်ဦးကိုတစ်ဦး ပိုပြီးတော့ ကာကွယ်ပေးနိုင်မှာပါ"
ယုံရု၏ စကားများကို ရွှန်လုံ ခေါင်းညိတ်ထောက်ခံလိုက်ရင်း ပြောလိုက်သည်။
"အတူတူ ခရီးသွားရတာ မဆိုးပါဘူး။ အနည်းဆုံးတော့ ဗဟိုတောင်တန်းရဲ့ အနားသတ်ဒေသကို မရောက်မချင်း ငါတို့ အတူတူ သွားကြတာပေါ့"
ရွှန်လုံ ၎င်းတို့နှင့် ပူးပေါင်းမည်ကို ကြားလိုက်ရသဖြင့် အဖွဲ့ထဲမှ လူတိုင်း အလွန်စိတ်လှုပ်ရှားသွားကြသည်။ ယခုအခါ ၎င်းတို့တွင် အားကိုးရမည့် သန်မာသောလူတစ်ယောက် ထပ်မံရှိလာခဲ့ပြီ ဖြစ်သည်။
"ဟာဟာ... ကျေးဇူးတင်ပါတယ် အစ်ကိုရွှန်။ အစ်ကိုသာ ကျွန်တော်တို့အဖွဲ့ထဲမှာ ရှိနေရင် ဒါက ပိုပြီးတော့ ပျော်စရာကောင်းတဲ့ ခရီးစဉ် ဖြစ်လာမှာပါ!"
ရွှန်လုံ ပြုံးလိုက်သည်။ သူသည် ယုံရုအပေါ် စောစောကတည်းက ကောင်းမွန်သော အမြင်တစ်ခု ရှိထားခဲ့ပြီး ဖြစ်သဖြင့် ယခုအခါ သူက လှမ်းမေးလိုက်သည်။
"ဒါနဲ့... ငါ့မှာ မေးစရာတစ်ခု ရှိသေးတယ်။ အကယ်၍ တပည့်တစ်ယောက်ယောက်က ဗဟိုတောင်တန်းအနီးမှာ အဖိုးမဖြတ်နိုင်တဲ့ ရတနာတစ်ခုခုကို ကံကောင်းထောက်မစွာ ရှာတွေ့ခဲ့ရင် ဂိုဏ်းတွေက ဂရုစိုက်မှာ မဟုတ်ဘူးလား"
ယုံရုက ခေါင်းခါလျက် ဆိုသည်။
"သူတို့က ဘယ်လိုလုပ် ဂရုမစိုက်ဘဲ နေမှာလဲဗျာ။ တပည့်တစ်ယောက်က အဖိုးတန်အရာတစ်ခုခုကို ရှာတွေ့ခဲ့ရင်တောင် ဟင်းလင်းပြင်လက်စွပ် (Spatial Ring) မရှိဘဲနဲ့ အဲဒါကို ဘယ်လိုလုပ် ဖုံးကွယ်ထားနိုင်မှာလဲ။ ကျွန်တော်တို့ ဒေမွန်နီကာတောင်တန်းကနေ ထွက်ခွာတဲ့အခါ အကြီးအကဲတွေက တပည့်တွေအားလုံးမှာ ရတနာတွေ ပါလာသလားဆိုတာကို စစ်ဆေးကြလိမ့်မယ်။ ပြီးတော့ တန်ဖိုးရှိတဲ့ အရာတစ်ခုခုကို ရှာဖွေတွေ့ရှိခဲ့ရင် တပည့်တွေကို ဂိုဏ်းအမှတ် (Sect Points) တွေနဲ့ ပြန်လည် အလျော်အစားပေးဖို့ ကမ်းလှမ်းကြမှာပေါ့"
"တစ်နည်းအားဖြင့် ပြောရရင် မင်း အဖိုးတန်အရာတစ်ခုခု ရှာတွေ့ခဲ့ရင် အဲဒါကို ဂိုဏ်းရဲ့ မျက်စိအောက်ကနေ ဖုံးကွယ်ထားဖို့ အခွင့်အရေး မရှိတဲ့အပြင်၊ လက်တွေ့မှာ အဲဒီအရာကို ဂိုဏ်းအမှတ်တွေနဲ့ လဲလှယ်ဖို့ အတင်းအကျပ် ဖိအားပေးခံရမှာ ဖြစ်တယ်။ ဟုတ်ပါတယ်... တပည့်တစ်ယောက်ယောက်မှာ ဟင်းလင်းပြင်လက်စွပ် ရှိနေရင်တော့ တစ်မျိုးပေါ့။ မြေကမ္ဘာအဆင့်ဦးပိုင်းမှာတင် ဟင်းလင်းပြင်လက်စွပ် ရှိနေတဲ့ တပည့်တွေကတော့ များသောအားဖြင့် မိသားစုကြီးတွေက ဖြစ်ကြပြီး ဂိုဏ်းတွေအနေနဲ့ ခိုင်လုံတဲ့ အကြောင်းပြချက်မရှိရင် အဲဒီမိသားစုတွေနဲ့ ဆက်ဆံရေး ပျက်ပြားအောင် လုပ်မှာမဟုတ်ဘူး။ ဒါပေမဲ့ အဲဒီရတနာက အလွန်အမင်း အရေးကြီးနေမယ်ဆိုရင်တော့ ဘာမဆို ဖြစ်သွားနိုင်တာပေါ့"
ရွှန်လုံသည် ပြုံးလျက် လက်အုပ်ချီကာ ယုံရုကို ကျေးဇူးတင်လိုက်သော်လည်း၊ သူ၏ စိတ်နှလုံးအတွင်း၌မူ ထိုဂိုဏ်းကြီး (၄) ဂိုဏ်းကို စတင်ရွံရှာ စက်ဆုပ်မိသွားခဲ့သည်။
'ဒါဆို တပည့်တွေက ဒီ 'အပြင်စည်းတပည့် အရွေးချယ်ခံပွဲ' မှာ သူတို့ရဲ့ အသက်တွေကို စွန့်စားရတာပေါ့။ ဒါပေမဲ့ အရာတစ်ခုခုကို ရှာတွေ့ခဲ့ရင် သူတို့ သဘောတူသည်ဖြစ်စေ၊ မတူသည်ဖြစ်စေ ဂိုဏ်းအမှတ်တွေနဲ့ လဲလှယ်ဖို့ ဂိုဏ်းကို ပေးအပ်ရမယ်ပေါ့လေ။ ဂိုဏ်းကလည်း တပည့်တွေ အရာတစ်ခုခုကို ဖုံးကွယ်ထားဖို့ ကြိုးစားရင် မိမိတို့ဆီကနေ ရှာဖွေစစ်ဆေးတာကို သေချာပေါက် လုပ်မှာပေါ့ဟုတ်လား။'
ရွှန်လုံ ဤသို့ တွေးမိလိုက်သောအခါ 'မိုးတိမ်လွင့်ဂိုဏ်း' အပေါ် ထားရှိသော သူ၏ အမြင်မှာ ဆိုးရွားစွာ ကျဆင်းသွားခဲ့တော့သည်။
ယခုအခါ ညအချိန်သို့ ရောက်ရှိနေပြီ ဖြစ်သောကြောင့် ၎င်းတို့အဖွဲ့သည် ဗဟိုတောင်တန်းဆီသို့ မနက်ခင်းတွင် မဦးတည်မီ ယနေ့ညအတွက် ဤနေရာ၌ပင် စခန်းချရန် ဆုံးဖြတ်လိုက်ကြသည်။
၎င်းတို့အဖွဲ့သည် လူစုစုဝိုင်းဖွဲ့ကာ ယုံရုက မီးပုံအသေးစားလေးတစ်ခုကို မွေးလိုက်ပြီးနောက် 'သွေးဆာဝံပုလွေ' များ၏ အသားကို စတင်ချက်ပြုတ်ကြတော့သည်။
"စီနီယာအစ်ကို... ကျွန်မတို့ရဲ့ ပတ်ပတ်လည်မှာရှိတဲ့ မိစ္ဆာသားရဲတွေက ဒီမီးပုံကြောင့် ဆွဲဆောင်ခံရမှာ မဟုတ်ဘူးလားဟင်" ခုနက ဝတ်စုံ ဆုတ်ဖြဲခံရပြီး ယခုအခါ ဝတ်စုံအသစ် လဲလှယ်ဝတ်ဆင်ထားသည့် မိန်းကလေးက ယုံရုကို စိုးရိမ်တကြီးဖြင့် လှမ်းမေးလိုက်သည်။
ရွှန်လုံက ခေါင်းခါပြလိုက်စဉ် ယုံရုက ပြုံးလျက် ပြန်လည်ဖြေကြားသည်။
"သွေးဆာဝံပုလွေတွေ သေဆုံးသွားတဲ့အခါ သူတို့ရဲ့ ခန္ဓာကိုယ်တွေကနေ အဆိပ်အတောက် ဖြစ်စေတဲ့ ဒြပ်ပစ္စည်းတစ်မျိုး ထုတ်လွှတ်တယ်ဗျ။ အကယ်၍ အဆင့် (၃) အောက်မှာရှိတဲ့ တခြားမိစ္ဆာသားရဲတစ်ကောင်က ၎င်းတို့ကို စားသုံးမိရင် အဲဒီအဆိပ်ကြောင့် သေဆုံးသွားနိုင်ခြေ အများကြီး ရှိတယ်။ ဒါပေမဲ့ ဝံပုလွေအသားကို ချက်ပြုတ်လိုက်တဲ့အခါမှာ အဆိပ်တွေက ဝံပုလွေရဲ့ အဆီတွေနဲ့အတူ ပြင်ပကို စစ်ထုတ်သွားပြီး အသန့်စင်ဆုံး အသားတွေကိုပဲ ချန်ထားရစ်ခဲ့တယ်။ ဒါကြောင့် အဆင့် (၂) အောက်မှာရှိတဲ့ ဘယ်သားရဲမှ 'သွေးဆာဝံပုလွေ' ရဲ့ သွေးညှီနံ့ကို ရပြီးတဲ့နောက် အနားကို ကပ်ရဲမှာ မဟုတ်ဘူး။ ဒါကြောင့် ဒါက ကျွန်တော်တို့အတွက် အကောင်းဆုံး ကာကွယ်မှုပုံစံတစ်ခုလို့လည်း သတ်မှတ်နိုင်တာပေါ့"
ယုံရု၏ ရှင်းပြချက်ကို ရွှန်လုံ ခေါင်းညိတ်ထောက်ခံလိုက်သည်။ သူ ပြောခဲ့သမျှ အရာအားလုံးနီးပါး မှန်ကန်နေသဖြင့် ရွှန်လုံ အထင်ကြီးသွားခဲ့သည်။ ယုံရုသည် ဤဂိုဏ်းစာမေးပွဲအတွက် အလွန် ကောင်းမွန်စွာ ပြင်ဆင်လာခဲ့ပုံရသည်။
"ဒါပေမဲ့ စီနီယာအစ်ကို... အကယ်၍ အဆင့် (၃) မိစ္ဆာသားရဲတစ်ကောင်က ကျွန်မတို့ကို မြင်သွားရင်ကော ဘယ်လိုလုပ်မလဲ"
"အဆင့် (၃) မိစ္ဆာသားရဲတွေက အကြောင်းပြချက်မရှိဘဲ သူတို့ရဲ့ နယ်မြေပြင်ပမှာ ဒီအတိုင်း လျှောက်သွားနေရလောက်အောင် အားနေကြလို့လား"
ယုံရုက ပြန်လည်မေးခွန်းထုတ်လိုက်စဉ်မှာပင်၊ ရုတ်တရက် ၎င်းတို့အဖွဲ့နှင့် မီတာ ၁၀၀ ခန့်အကွာမှ အမျိုးသားတစ်ဦး၏ စိတ်လှုပ်ရှားနေသော အော်ဟစ်သံတစ်ခု ထွက်ပေါ်လာခဲ့သည်။
"ခေါင်းဆောင်ကြီး... ကျွန်တော်တို့ နောက်ထပ် သားကောင်တချို့ကို ရှာတွေ့ပြန်ပြီဗျ!"