အပိုင်း (၄၁) - အပြင်စည်းတပည့် အရည်အချင်းစစ် စာမေးပွဲ

​ဝတုတ်ဖူသည် အလွန်အမင်း တုန်လှုပ်ခြောက်ခြားဖွယ်ကောင်းသော သတင်းတစ်ခုကို ယခုလေးတင် ဖွင့်ဟပြောကြားလိုက်ခြင်း ဖြစ်သည်။

​အကယ်၍ အပြင်စည်းတပည့် စာမေးပွဲကြီး ရှိနေပြီး ၎င်းက လူတိုင်းသိထားသည့် 'လျှို့ဝှက်ချက်' တစ်ခု ဖြစ်နေမည်ဆိုပါက... ရွှန်လုံအနေဖြင့် ထိုအကြောင်းကို ဘာကြောင့် တစ်လုံးတစ်ပါဒမျှ မကြားမိခဲ့ရသနည်း။

​ဝတုတ်ဖူသည် ရွှန်လုံ တစ်ချက်မျှ ငြိမ်သက်သွားသည်ကို မြင်လိုက်ရသဖြင့် ဆက်လက်ရှင်းပြခဲ့သည်။

"ဒါက လူတိုင်းသိတဲ့ လျှို့ဝှက်ချက်လို့ ဆိုရတာက... ဂိုဏ်းထဲမှာ ၃ နှစ်ထက်မနည်း ရှိနေခဲ့တဲ့သူတွေပဲ သိကြလို့ဗျ။ ဒီစာမေးပွဲက များသောအားဖြင့် ၃ နှစ်တစ်ကြိမ် ဂိုဏ်းထဲကို အသစ်ဝင်လာကြတဲ့ တပည့်အသစ် အယောက် ၆ သောင်းနဲ့ပဲ သက်ဆိုင်တာလေ၊ အဲဒီတော့ ဂိုဏ်းမှာ ကြာနေပြီဖြစ်တဲ့ စီနီယာတပည့်တွေက ဘာအကြောင်းပြချက်နဲ့ ဂိုဏ်းတွင်းစာမေးပွဲ သတင်းကို လျှောက်ဖြန့်နေကြမှာလဲ?"

​ဝတုတ်ဖူ၏ စကားမှာ အလွန်ပင် ယုတ္တိရှိကြောင်း ရွှန်လုံ နားလည်လိုက်သည်။ စီနီယာတပည့်များက ဘာအကြောင်းပြချက်ကြောင့် တပည့်အသစ်များကို အလကားသက်သက် ကူညီပေးကြမည်နည်း။

​'တပည့်အသစ်တွေထဲမှာ ဂိုဏ်းတွင်းစာမေးပွဲအကြောင်း သိတဲ့သူအချို့ ရှိနေနိုင်ရင်တောင်မှ အဲဒီလူ အရေအတွက်က သိပ်မများနိုင်ဘူး။ ဂိုဏ်းထဲမှာ စီနီယာအစ်ကိုရှိတဲ့ ရှောင်ရှီတိုလိုမျိုး လူစားမျိုးတွေပဲ သိနိုင်လိမ့်မယ်။ ကျန်တဲ့တပည့်တွေကတော့ စာမေးပွဲ အမှန်တကယ် စတင်တော့မယ့်အချိန်အထိ ဘာမှမသိဘဲ အမှောင်ချခံထားရတာ ဖြစ်ဖို့များတယ်' ရွှန်လုံသည် စိတ်ထဲမှ တွေးတောလိုက်ပြီး မိမိ၏ ခန့်မှန်းချက်က ရာနှုန်းပြည့် မမှန်ကန်ရင်တောင်မှ အမှန်တရားနှင့် သိပ်ပြီး ကွာဝေးလိမ့်မည်မဟုတ်ကြောင်း သဘောပေါက်လိုက်သည်။

​လုဝမ်သည် ဂိုဏ်းမှ ပေးအပ်မည့် ဆုလာဘ်များအကြောင်းကို တွေးတောမိသောအခါ သူ၏ မျက်ဝန်းများ အရောင်တောက်သွားရင်း ပြောလိုက်သည်။

"ညီအစ်ကိုရွှန်... ဂိုဏ်းတွင်းစာမေးပွဲကို ပေါ့ပေါ့တန်တန် သဘောမထားပါနဲ့ဗျာ။ ထိပ်တန်း ၃ ယောက်... မဟုတ်ဘူး၊ ထိပ်တန်း ၁၀ ယောက်အတွင်း ရမယ့် ဆုလာဘ်တွေကတင် ငါ့ကိုတောင် မနာလိုဖြစ်မိစေဖို့ လုံလောက်တယ်ဗျ"

​ရွှန်လုံသည် စိတ်မထိန်းနိုင်ဘဲ လှမ်းမေးလိုက်သည်။

"ဝတုတ်ဖူ... မင်း အဲဒီဆုလာဘ်တွေက ဘာတွေလဲဆိုတာ သိလား?"

​"ဟားဟား... မင်း စိတ်ဝင်စားလိမ့်မယ်ဆိုတာ ငါ သိသားပဲ။ ဒီနှစ်အတွက် ဆုလာဘ်တွေက ပြောင်းလဲသွားမလားတော့ ငါ မသိဘူး၊ ဒါပေမဲ့ လွန်ခဲ့တဲ့ ၃ နှစ်တုန်းကတော့ ပထမဆုရတဲ့သူက 'ဟင်းလင်းပြင်လက်စွပ်'  တစ်ကွင်း၊ အဆင့် ၁ ငွေရောင်အဆင့် ဓား တစ်ချောင်း နဲ့ ဂိုဏ်းအမှတ် ၁ သောင်း ရရှိခဲ့တယ်ဗျ"

​ဝတုတ်ဖူနှင့် လုဝမ်တို့နှစ်ဦးစလုံးသည် ဆုလာဘ်များအကြောင်း ပြောပြရင်း ရွှန်လုံ၏ စိတ်ဝင်စားမှုကို နှိုးဆွရန် ကြိုးစားနေကြခြင်း ဖြစ်ပြီး... ဝတုတ်ဖူက 'ဟင်းလင်းပြင်လက်စွပ်' ဟု မြွက်ဟလိုက်သည်နှင့် တစ်ပြိုင်နက် သူတို့၏ ရည်ရွယ်ချက်က သေချာပေါက် အောင်မြင်သွားခဲ့တော့သည်။

​ရွှန်လုံသည် ပြီးခဲ့သည့်ရက်က 'ရတနာဆောင်' သို့ သွားရောက်ခဲ့စဉ်က ဆေးဖက်ဝင်ပစ္စည်း ၄ ခြေစုံကို ဂေါ်ဖီထုပ်များကဲ့သို့ အိတ်ကြီးဖြင့် သောတောကောရော သယ်ဆောင်ခဲ့ရသည့် အဖြစ်အပျက်ကို ပြန်လည်တွေးတောမိကာ အနည်းငယ် အရှက်ရမိသွားသည်။

​သို့သော်လည်း လုဝမ်၏ နောက်ဆက်တွဲ စကားများမှာမူ ရွှန်လုံ၏အပေါ်သို့ ရေအေးဖြင့် ပက်ဖျန်းလိုက်သကဲ့သို့ ဖြစ်သွားခဲ့ရသည်။

"ထိပ်တန်း ၃ ယောက်အတွင်း ဝင်ဖို့ဆိုတာကတော့ မင်းအတွက် ဘယ်လိုမှ မဖြစ်နိုင်လောက်ဘူး ညီအစ်ကိုရွှန်၊ ဒါပေမဲ့ မင်းအနေနဲ့ တစ်နည်းနည်းနဲ့ ချီစုစည်းမှု အဆင့် ၈ အစောပိုင်းအဆင့်ကို ရောက်အောင် လုပ်နိုင်ခဲ့ရင်တော့ စာမေးပွဲမှာ ကောင်းမွန်တဲ့ အဆင့်တစ်ခုရဖို့ ကြိုးစားကြည့်လို့ ရနိုင်ပါတယ်"

​ရွှန်လုံက မိမိကို စိုက်ကြည့်နေသဖြင့် လုဝမ်က ဆက်လက်ပြောကြားခဲ့သည်။

"ငါက မင်းကို အထင်သေးလို့ ပြောတာမဟုတ်ပါဘူး ညီအစ်ကိုရွှန်၊ ဒါပေမဲ့ အဲဒီစာမေးပွဲမှာ မြေအဆင့် အဆင့် ၃ အထွတ်အထိပ်ကို ရောက်နေတဲ့ တပည့်တွေပါ ပါဝင်လာကြမှာလေ၊ မင်းကတော့ အခုထိ ချီစုစည်းမှု အဆင့် ၆ အထွတ်အထိပ်မှာပဲ ရှိသေးတာ။ မင်း ဘယ်လောက်ပဲ ပါရမီထူးခြားပါစေဦးတော့... မိမိထက် ကျင့်ကြံခြင်း နယ်ပယ်အဆင့်ငယ် ၆ ဆင့်မက မြင့်မားနေတဲ့သူတစ်ယောက်ကိုတော့ ယှဉ်ပြိုင်နိုင်မှာ မဟုတ်ဘူးဗျ"

​လုဝမ်သည် မိမိအပေါ် စေတနာထားပြီး လက်တွေ့ကျကျ အရှိကိုအရှိအတိုင်း သတိပေးနေခြင်းဖြစ်ကြောင်း ရွှန်လုံ နားလည်ပါသည်။ အမှန်တကယ်ပင် ယခုအချိန်အထိ ၅ လပင် မပြည့်သေးသော အချိန်ကာလမျှသာ ကျင့်ကြံအားထုတ်ထားရသေးသည့် လူတစ်ယောက်အနေဖြင့် မြေအဆင့် ကျင့်ကြံသူများကို မည်သို့ သွားရောက်ယှဉ်ပြိုင်နိုင်မည်နည်း။

​"ပုံမှန်အားဖြင့်တော့... အပြင်စည်းတပည့် စာမေးပွဲကို 'မိစ္ဆာတောင်တန်းဒေသ' မှာ ကျင်းပလေ့ရှိတယ်၊ ဒါပေမဲ့ ထွက်ပေါ်နေတဲ့ ကောလာဟလအချို့အရဆိုရင်တော့... ဒီနှစ်ရဲ့ ဂိုဏ်းတွင်းစာမေးပွဲက ပြီးခဲ့တဲ့အကြိမ်တွေနဲ့ မတူဘဲ ကွဲပြားလိမ့်မယ်လို့ ကြားရတယ်ဗျာ"

​ဝတုတ်ဖူ စကားပြော၍ ပြီးဆုံးသွားပြီးနောက် သူသည် ရွှန်လုံနှင့် လုဝမ်တို့ကို 'မွှေးရနံ့ဆန်းဆောင်' သို့ ခေါ်ဆောင်သွားခဲ့ပြီး ၎င်းတို့သည် ထိုနေရာ၌ ၃ နာရီခန့် အချိန်ကုန်လွန်စေခဲ့ပြီးနောက်မှ အသီးသီး လမ်းခွဲခဲ့ကြတော့သည်။

​ရွှန်လုံသည် တည်းခိုခန်းသို့ ပြန်ရောက်သည်နှင့် တစ်ပြိုင်နက် သူ၏အခန်းတွင်းသို့ ဝင်ရောက်ကာ ယနေ့ ကြားသိခဲ့ရသည့် သတင်းအချက်အလက်များကို စတင်တွေးတော သုံးသပ်တော့သည်။

​'သတင်းက ဝတုတ်ဖူဆီက လာတာဆိုတော့ သေချာပေါက် မှန်ကန်လိမ့်မယ်။ အဲလိုဆိုရင်... ငါ့အနေနဲ့ အပြင်စည်းတပည့် စာမေးပွဲကြီး မစတင်ခင် ကိုယ့်ကိုယ်ကိုယ် သန်မာလာအောင် လုပ်ဖို့အတွက် အချိန် ၂ လပဲ ရှိတော့တာပေါ့။ ပြီးတော့ လေလံပွဲနေ့ မရောက်ခင်မှာ 'ရတနာဆောင်' ကနေ ဝယ်ယူခဲ့တဲ့ ဆေးဖက်ဝင်ပစ္စည်း ၄၀ စုံကို ဆေးလုံးတွေဖြစ်အောင် အရင်ဆုံး ဖော်စပ်ထားရမယ်၊ မဟုတ်ရင် လေလံပွဲမှာ 'မီးလျှံစိတ်ဝိညာဉ်သီး' နဲ့ 'ရေဓာတ်မြက်' ရဲ့ နောက်ဆုံးစျေးနှုန်းက ဘယ်လောက်အထိ မြင့်တက်သွားမလဲဆိုတာ ငါ မသိနိုင်တဲ့အတွက် ဆေးလုံးတွေ အဆင်သင့်မဖြစ်ရင် အခွင့်အရေး လွတ်သွားနိုင်တယ်'

​ရွှန်လုံသည် အသက်ကို ပြင်းပြင်းရှူလိုက်ပြီးနောက် သူ၏လက်ထဲတွင် ရှိနေသော အဆင့် ၁ ဆေးဖက်ဝင်ပစ္စည်း ၄၀ စုံကို 'ချီအတားအဆီးဖောက်ဖျက်ဆေးလုံး' များအဖြစ်သို့ အရင်ဆုံး ဖော်စပ်ရန် ဆုံးဖြတ်လိုက်သည်။

​သူသည် ကြမ်းပြင်ပေါ်၌ ထိုင်လိုက်ပြီး ဆေးပေါင်းအိုးကို အပူပေးကာ ဆေးလုံးများကို စတင်ဖော်စပ်တော့သည်။

​ဆေးဖက်ဝင်ပစ္စည်း ၄၀ စုံကို ဆေးလုံးဖြစ်အောင် မနားတမ်း ဖော်စပ်ရခြင်းမှာ ရွှန်လုံအတွက် အလွန်အမင်း ပင်ပန်းနွမ်းနယ်လှပေသည်။ ၁၄ ရက်တိုင်တိုင် တစ်စိုက်မတ်မတ် ဖော်စပ်ပြီးနောက်တွင်မှ သူသည် ဆေးပင်အားလုံးကို ဆေးလုံးများအဖြစ်သို့ အောင်မြင်စွာ ဖော်စပ်နိုင်ခဲ့တော့ရာ... ကံကောင်းထောက်မစွာဖြင့် လေလံပွဲကျင်းပမည့် နေ့ရက်မှာလည်း ယနေ့တွင်ပင် ကျရောက်လာခဲ့ပြီ ဖြစ်ပေသည်။