အပိုင်း (၃၀) - ဧကရာဇ်၏ ထာဝရခန္ဓာ

​'ဧကရာဇ်၏ ထာဝရခန္ဓာ' 

​ထိုပုံရိပ်များ သူ၏ စိတ်အာရုံထဲတွင် ဖျတ်ခနဲ ဖြတ်သန်းသွားပြီးနောက် ရွှန်လုံသည် အရာအားလုံးကို ချက်ချင်း သဘောပေါက်သွားခဲ့သည်။ 'ဧကရာဇ်၏ ထာဝရခန္ဓာ' ဆိုသည်မှာ 'ဧကရာဇ်၏ နာရီမှန်' နည်းစနစ်ကဲ့သို့ပင် ကောင်းကင်ဘုံကို ဆန့်ကျင်နိုင်စွမ်းရှိသည့် ထူးခြားဆန်းပြားသော နည်းစနစ်တစ်ခု ဖြစ်ပေသည်။

​သို့သော်လည်း 'ဧကရာဇ်၏ ထာဝရခန္ဓာ' သည် 'ဧကရာဇ်၏ နာရီမှန်' နှင့် လုံးဝ ကွဲပြားခြားနားလှသည်။ ဤအရာက ခန္ဓာကိုယ်ကျင့်ကြံခြင်း အတတ်ပညာ  ဖြစ်သည်။

​ရွှန်လုံသည် လုဝမ်ပေးထားသော စာအုပ်များထဲမှနေ၍ ကျင့်ကြံသူ အမျိုးအစား ၂ မျိုး ရှိကြောင်း စောစောပိုင်းက လေ့လာသိရှိထားခဲ့ပြီး ဖြစ်သည်။ ၎င်းတို့မှာ -

​ချီကျင့်ကျံသူများ နှင့်

​ခန္ဓာကိုယ်ကျင့်ကြံသူများ  တို့ ဖြစ်ကြသည်။

​ချီကျင့်ကြံသူများသည် ကျင့်စဉ်များကို လှည့်ပတ်ခြင်းဖြင့် သူတို့၏ ခန္ဓာကိုယ်အတွင်းသို့ သဘာဝတရား၏ ချီစွမ်းအင်များကို စုစည်းကြသူများ ဖြစ်ပြီး၊ ခန္ဓာကိုယ်ကျင့်ကြံသူများကမူ ချီစွမ်းအင်အစား သူတို့၏ ရုပ်ပိုင်းဆိုင်ရာ ခန္ဓာကိုယ်ကိုသာ သန့်စင်အောင် အဓိက ကျင့်ကြံကြသူများ ဖြစ်သည်။

​ရွှန်လုံ 'ကောင်းကင်ကံကြမ္မာနိုင်ငံ' ၌ ရှိနေစဉ်က ခန္ဓာကိုယ်ကျင့်ကြံသူများအကြောင်းကို လုံးဝ မကြားဖူးခဲ့ချေ။ ခန္ဓာကိုယ်ကျင့်ကြံခြင်း လမ်းစဉ်သည် ချီကျင့်ကြံခြင်းထက် အဆပေါင်း ၁၀၀ မက ပိုမိုခက်ခဲသည်ဟု ဆိုကြသဖြင့် သာမန်လူသားကမ္ဘာ မှနေ၍ ထိုကျင့်စဉ်မှာ လုံးဝ ပျောက်ကွယ်သွားခဲ့ပြီ ဖြစ်သည်။ သို့သော်လည်း ထိုမျှ ခက်ခဲလှသော်လည်း အဆင့်မြင့်လှသည့် ကျင့်ကြံခြင်းလောက တွင်မူ ခန္ဓာကိုယ်ကျင့်ကြံခြင်းကိုသာ အဓိက အလေးပေးသည့် ကျင့်ကြံသူ အမြောက်အမြား ရှိနေဆဲ ဖြစ်သည်။

​ရွှန်လုံသည် သူ၏ ဦးနှောက်ထဲရှိ ပုံရိပ်များမှတစ်ဆင့် 'ဧကရာဇ်၏ ထာဝရခန္ဓာ' က မည်ကဲ့သို့သော ခန္ဓာကိုယ်ကျင့်စဉ်မျိုး ဖြစ်သည်ကို နားလည်သွားခဲ့သည်။ ၎င်းသည် ခန္ဓာကိုယ်၏ စွမ်းအားကို အဆမတန် မြှင့်တင်ပေးပြီး ကျင့်ကြံသူအား မိမိ၏ လက်ဗလာဖြင့်ပင် ဟင်းလင်းပြင် ကို ဆွဲဖြဲပစ်နိုင်စွမ်း ရှိစေသည့် အတတ်ပညာ ဖြစ်ပေသည်။

​ရွှန်လုံသည် မိမိ၏ ပတ်ဝန်းကျင်ရှိ 'အချိန်'  ကို လွှမ်းမိုးနိုင်သည့် ကျင့်စဉ်တစ်ခုကို ပိုင်ဆိုင်ထားပြီးဖြစ်ကြောင်း သိသော်လည်း ယခုလောလောဆယ်တွင် ထိုအရာကို ကောင်းမွန်စွာ အသုံးပြုရန် သူ အလွန် အားနည်းလွန်းနေသေးသည်။ ယခုမူ ဟင်းလင်းပြင်ကို ဆွဲဖြဲနိုင်စွမ်းရှိမည့် ခန္ဓာကိုယ်ကျင့်စဉ်ကိုပါ ထပ်မံရရှိလိုက်ပြီ ဖြစ်ရာ သူက -

'ငါသာ ဒီကျင့်စဉ်ကို အောင်အောင်မြင်မြင် ကျင့်ကြံနိုင်ရင်... အဲဒီအချိန်ကျရင် ငါ ဘယ်လောက်တောင် သန်မာလာမလဲ?' ဟု တွေးတောမိလိုက်သည်။

​သူသည် မိမိ၏ အခန်းထဲတွင် တင်ပလ္လင်ခွေ ထိုင်လိုက်ပြီး ဤခန္ဓာကိုယ်ကျင့်စဉ်ကို သေချာစွာ စတင်လေ့လာတော့သည်။

​ကျင့်ကြံခြင်းလောကတွင် လူသားများအနေဖြင့် ချီကျင့်ကြံခြင်းနှင့် ခန္ဓာကိုယ်ကျင့်ကြံခြင်း လမ်းစဉ်နှစ်ခုလုံးကို တစ်ပြိုင်နက်တည်း လျှောက်လှမ်းရန်မှာ မယုံနိုင်လောက်အောင် ခက်ခဲလှပေသည်၊ အဘယ်ကြောင့်ဆိုသော် ၎င်းတို့မှာ လုံးဝ ကွဲပြားခြားနားသော လမ်းစဉ်နှစ်ခု ဖြစ်သောကြောင့် ဖြစ်သည်။ ချီကျင့်ကြံသူတစ်ဦး ဖြစ်လာရန်အတွက် သဘာဝတရားမှ စုပ်ယူလိုက်သော ချီစွမ်းအင်များသည် မိမိ၏ သွေးကြောမျှင်များ  ကို ဖြတ်သန်းကာ ခန္ဓာကိုယ်အနှံ့ လှည့်ပတ်ပြီးနောက်မှသာ မိမိ စိတ်ကြိုက်အသုံးပြုနိုင်သည့် စွမ်းအင် ဖြစ်လာသည်။

​သို့သော် ခန္ဓာကိုယ်ကျင့်ကြံခြင်း လမ်းစဉ်မှာမူ လုံးဝ ဆန့်ကျင်ဘက် ဖြစ်သည်။ အသုံးအများဆုံး ခန္ဓာကိုယ်ကျင့်ကြံနည်းမှာ မိမိ၏ ခန္ဓာကိုယ်ကို နှစ်ပေါင်းများစွာကြာအောင် ပြင်းထန်စွာ လေ့ကျင့်ခန်းလုပ်ခြင်း၊ အကြိမ်တိုင်းတွင် မိမိကိုယ်ကိုယ် ဒဏ်ရာရအောင် ပြုလုပ်ပြီးနောက်မှ ခန္ဓာကိုယ်ကို ပြန်လည်ကုသရန်နှင့် ပိုမိုသန်မာလာစေရန် ဆေးလုံးများ သောက်သုံးခြင်း (သို့မဟုတ်) ဆေးဖက်ဝင်အကူးအသန်းများ ပြုလုပ်ခြင်းတို့ ဖြစ်သည်။

​ရွှန်လုံကမူ သူသည် ထိုကဲ့သို့သော သာမန်ခန္ဓာကိုယ်ကျင့်ကြံခြင်း လမ်းစဉ်ကို မလိုက်လျှောက်နိုင်ကြောင်း သိသည်။ ပထမအချက်မှာ ထိုသို့ အောင်မြင်ရန် နှစ်ပေါင်းများစွာ အချိန်ယူရမည်ဖြစ်သဖြင့် သူ့တွင် ထိုမျှ အချိန်မရှိခြင်းဖြစ်ပြီး၊ ဒုတိယအချက်မှာ 'ဧကရာဇ်၏ ထာဝရခန္ဓာ' ကျင့်စဉ်သည် လုံးဝ ထူးခြားဆန်းပြားလွန်းသဖြင့် ထိုကဲ့သို့သော နည်းလမ်းမျိုးဖြင့် လေ့ကျင့်၍ မရနိုင်ခြင်းကြောင့် ဖြစ်သည်။

​ဤကျင့်စဉ်သည် ရွှန်လုံအား သီးသန့်ဆေးလုံးအချို့ကို ဖော်စပ်ရန် တောင်းဆိုထားပြီး ထိုဆေးလုံးများတွင် ပါဝင်သည့် အတိုင်းအဆမဲ့ ကြီးမားလှသော စွမ်းအင်များကို အသုံးပြုကာ သူ၏ ခန္ဓာကိုယ်ကို အတွင်းပိုင်းမှနေ၍ ဖျက်ဆီးပြီးနောက် ပြန်လည်တည်ဆောက်ရန် လိုအပ်သည်။

​သို့သော်လည်း လမ်းစဉ်တိုင်းတွင် ၎င်းတို့၏ အားနည်းချက်များ ရှိစမြေ ဖြစ်သည်။ ရွှန်လုံအနေဖြင့် မိမိ၏ ခန္ဓာကိုယ်ကို နှစ်ပေါင်းများစွာ လေ့ကျင့်နေခဲ့ကြသည့် အခြားသော ခန္ဓာကိုယ်ကျင့်ကြံသူများနှင့် ယှဉ်လျှင် ခန္ဓာကိုယ်ကျင့်စဉ်တွင် အဆင့်တက်ရန် ပိုမိုမြန်ဆန်မည် ဖြစ်သော်လည်း သူသည် ၎င်းနှင့် ထိုက်တန်သော တန်ဖိုးကို ပြန်လည်ပေးဆပ်ရမည် ဖြစ်သည်။

​ခန္ဓာကိုယ်ကျင့်ကြံစဉ်အတွင်း ကိုယ့်ရဲ့ အရိုးများ၊ အကြောများနှင့် အတွင်းကလီစာများက ပုံမှန်အားဖြင့် တဖြည်းဖြည်းချင်း သန်မာလာမည့်အစား၊ ဤ 'ဧကရာဇ်၏ ထာဝရခန္ဓာ' ကျင့်စဉ်သည် ထိုအရာအားလုံးကို အတွင်းပိုင်းမှနေ၍ အစအနမကျန် လုံးဝ ချေမှုန်းပစ်ပြီးမှ ပိုမိုပြီးပြည့်စုံသော ပုံစံဖြင့် ပြန်လည်ဖွဲ့စည်းပေးမည် ဖြစ်သည်။ ဤသည်မှာ သာမန် 'စူးရှပြင်းထန်သော နာကျင်မှု' ဆိုသည့် စကားလုံးမျှဖြင့် ဖော်ပြ၍မရနိုင်သည့် ကြောက်မက်ဖွယ် ဝေဒနာမျိုး ဖြစ်သည်။

​ရွှန်လုံ စိတ်ထဲတွင် အနည်းငယ် ကြောက်ရွံ့မိသွားသည်။ အနည်းငယ်မျှ မှားယွင်းသွားရုံဖြင့် ယခုတစ်ကြိမ်တွင် သူ သေဆုံးသွားနိုင်သောကြောင့် ဖြစ်သည်။

​သူသည် အသက်ကို ပြင်းပြင်းရှူလိုက်ပြီးနောက် တစ်စုံတစ်ခုကို သဘောပေါက်သွားသည့်အလား ရေရွတ်လိုက်သည်။

'အခု ပြန်တွေးကြည့်တော့ ဒါတွေအားလုံးက ပိုပြီး ကြီးမားတဲ့ အစီအစဉ်တစ်ခုရဲ့ အစိတ်အပိုင်းတွေ ဖြစ်နေသလိုပဲ'

​'ပထမဆုံး ငါ့ခန္ဓာကိုယ်ထဲမှာ လုံလောက်တဲ့ ချီစွမ်းအင် ရှိလာဖို့နဲ့ ချီကျင့်ကြံသူတစ်ဦး ဖြစ်လာဖို့ 'ဧကရာဇ်၏ နာရီမှန်' ကို ငါ အရင်ဆုံး ကျင့်ကြံခဲ့ရတယ်'

'နောက်ပြီး ငါ့ရဲ့ ချီစွမ်းအင်က အဆင့်တစ်ခုကို ရောက်တဲ့အခါ ရွှေရောင်စာအုပ်က ငါ့ကို အတွင်းထဲ ဆွဲသွင်းပြီး အသိပညာ ဗဟုသုတတွေအပြည့်နဲ့ ငါ့ကို သေလုနီးပါး ဖြစ်အောင် လုပ်ခဲ့တယ်'

'အခုတော့ ငါ့မှာ ဆေးဖက်ဝင်အပင်တွေ၊ မှော်သားရဲတွေနဲ့ လူသားခန္ဓာကိုယ်အကြောင်း လိုအပ်တဲ့ အသိပညာတွေ ရှိလာပြီဆိုတော့ ငါ လိုအပ်တဲ့ ဆေးလုံးတွေကို ဖော်စပ်ပြီး 'ဧကရာဇ်၏ ထာဝရခန္ဓာ' ကို ကျင့်ကြံနိုင်ပြီပေါ့'

​'ဒါဆို လိုက်လျှောက်ရမယ့် အကောင်းဆုံးလမ်းစဉ်က ချီကျင့်ကြံခြင်းနဲ့ ခန္ဓာကိုယ်ကျင့်ကြံခြင်း လမ်းစဉ်နှစ်ခုလုံးကို ပူးတွဲကျင့်ကြံရမယ့် ဒီလမ်းစဉ်ပဲလား? ... အဲဒီလို မဟုတ်ခဲ့ရင်တောင်မှ ငါကတော့ ဒီလို အခွင့်အရေးမျိုးကို အလွတ်ခံမှာ မဟုတ်ဘူး။ ငါ လိုအပ်တဲ့ ဆေးဖက်ဝင်အပင်တွေကို စုဆောင်းမိတာနဲ့ အမြန်ဆုံး 'ဧကရာဇ်၏ ထာဝရခန္ဓာ' ကို စတင် ကျင့်ကြံရမယ်။ ဒါပေမဲ့ အခုလောလောဆယ်တော့ ငါ ဆေးဖော်စပ်ခြင်း အတတ်ပညာမှာ ပိုပြီး ကျွမ်းကျင်လာအောင် အရင်ဆုံး စတင်ရလိမ့်မယ်'

​ထို့နောက် ရွှန်လုံသည် ဝတုတ်ဖူ၏ အကူအညီဖြင့် ဝယ်ယူခဲ့သည့် 'ပျားရည်သီး'၊ 'အပြာရောင်အစင်းကျားမြက်'၊ '၅ ရွက်ပါ ပန်းကြီး' နှင့် 'ကြောက်မက်ဖွယ်အမြစ်' ၃ စုံကို ထုတ်ယူကာ တင်ပလ္လင်ခွေ ထိုင်လိုက်သည်။ ပြီးနောက်တွင်မူ သူ 'အပြာရောင်သစ်တောမြို့တော်' မှ မထွက်ခွာမီ သူ၏ ဖခင်ဖြစ်သူ ပေးအပ်ခဲ့သည့် အဆင့် ၃ အထွတ်အထိပ် ကြေးဝါအဆင့် ဆေးဖိုအိုးကြီးကို ထုတ်လိုက်တော့သည်။

​ရွှန်လုံသည် အသက်ကို ပြင်းပြင်းရှူလိုက်ပြီး သူ၏ မျက်ဝန်းများကို ရှေ့တည့်တည့်သို့ အပြည့်အဝ အာရုံစိုက်ကာ ပြောလိုက်သည်။

"စတင်ရမယ့်အချိန် ရောက်ပြီ"

​သူ ပထမဆုံး လုပ်ဆောင်ရမည့်အရာမှာ သူ၏ ချီစွမ်းအင် အစိတ်အပိုင်းအချို့ကို 'မီးဓာတ်' အဖြစ်သို့ ပြောင်းလဲကာ ဆေးဖိုအိုးကို စတင် အပူပေးရခြင်း ဖြစ်သည်။ အကယ်၍ လူတစ်ဦးသည် အအေးဓာတ် (သို့မဟုတ်) ရေခဲဓာတ်ကိုသာ အထူးပြုသည့် ကျင့်စဉ်မျိုးကို သီးသန့် လေ့ကျင့်မထားခဲ့ပါက သူတို့၏ ချီစွမ်းအင်ကို မီးဓာတ်အဖြစ်သို့ လွယ်ကူစွာ ပြောင်းလဲနိုင်ကြသည်။

​အမွှေးတိုင်တစ်တိုင်စာခန့် အချိန်ကုန်လွန်သွားသောအခါ ဆေးဖိုအိုးမှာ လုံလောက်စွာ ပူနွေးလာခဲ့ပြီဖြစ်ရာ ရွှန်လုံသည် '၅ ရွက်ပါ ပန်းကြီး' ကို ထုတ်ယူလိုက်သည်။

​'လုဝမ်ရဲ့ စာအုပ်တွေအရဆိုရင် ငါက ပန်းပွင့်ဖတ်တွေကို အရင်ဆုံး ခြွေရမယ်၊ ပြီးမှ ပန်းပွင့်ရဲ့ ကိုယ်ထည်ကို ဆေးဖိုအိုးထဲ ထည့်ရမယ်။ အဲဒါက ဆေးဖက်ဝင် အဆီအနှစ်အဖြစ် လုံးဝ ပြောင်းလဲသွားပြီးတဲ့နောက်မှ 'ကြောက်မက်ဖွယ်အမြစ်' ရဲ့ တစ်ဝက်ကို ထည့်ရမယ်၊ ပြီးတော့မှ 'ပျားရည်သီး' နဲ့ 'အပြာရောင်အစင်းကျားမြက်' ကို ထပ်ထည့်ရမယ်လို့ ဆိုထားတယ်'

​'ဟင်း... ဒါပေမဲ့ ဒါက လုံးဝ ယုတ္တိမရှိဘူးပဲ'

​'အကယ်၍ ငါက '၅ ရွက်ပါ ပန်းကြီး' ရဲ့ ပွင့်ဖတ်တွေအားလုံးကို ခြွေပစ်လိုက်ရင် ၎င်းရဲ့ စွမ်းအင်ကို ဆေးလုံးအဖြစ် ပြောင်းလဲဖို့ ပိုပြီး လွယ်ကူသွားမှာ မှန်ပေမဲ့၊ ဒါကြောင့်ပဲ ဆေးလုံးရဲ့ အာနိသင်က အနည်းဆုံး ၂၀ ရာခိုင်နှုန်းလောက် လျော့နည်းသွားလိမ့်မယ်။ ပြီးတော့ 'ကြောက်မက်ဖွယ်အမြစ်' ရဲ့ တစ်ဝက်တည်းကိုပဲ ထည့်မယ်ဆိုရင် ဆေးရဲ့ အာနိသင်က ပိုပြီးတော့တောင် ကျဆင်းသွားဦးမယ်။ ဒီအမြစ်က ကျောက်တုံးတွေရဲ့ အောက်မှာ ကြီးထွားတာဖြစ်ပြီး ရင့်မှည့်ဖို့အတွက် မြေကြီးရဲ့ စွမ်းအင်  ကို စုပ်ယူရတာ။ ဒါကို တစ်ဝက်ပဲ ထည့်တယ်ဆိုတာက '၅ ရွက်ပါ ပန်းကြီး' ရဲ့ သစ်သားဓာတ်  ကို 'ကြောက်မက်ဖွယ်အမြစ်' ရဲ့ မြေဓာတ်နဲ့ မျှခြေဖြစ်အောင် ညှိဖို့ သက်သက်ဆိုရင်တော့ ဒါက လုံးဝ အဓိပ္ပာယ်မရှိဘူး'

​ရွှန်လုံသည် ခေတ္တမျှ တွေးတောပြီးနောက် ဆုံးဖြတ်လိုက်သည်။

'ငါ အရင်ဆုံး 'အပြာရောင်အစင်းကျားမြက်' ကို ထည့်မယ်၊ ပြီးတော့မှ ၎င်းရဲ့ စွမ်းအင်ကို မျှခြေဖြစ်စေဖို့နဲ့ ပိုပြီး မြန်မြန် သန့်စင်နိုင်ဖို့ '၅ ရွက်ပါ ပန်းကြီး' ရဲ့ ဖက်တစ်ရွက်ကို ခြွေပြီး ထည့်မယ်။ အဲဒီနောက်မှ ပန်းပွင့်ရဲ့ ကျန်တဲ့ အစိတ်အပိုင်းတွေကို ကြောက်မက်ဖွယ်အမြစ်နဲ့အတူ တစ်ခါတည်း ထည့်ပြီး၊ 'ပျားရည်သီး' ကိုတော့ နောက်ဆုံးမှ ထည့်မယ်။ ဒီနည်းလမ်းအတိုင်းဆိုရင် ထွက်လာမယ့် 'ချီအတားအဆီးဖောက်ဖျက်ဆေးလုံး'  က စာအုပ်ထဲက နည်းလမ်းနဲ့ ယှဉ်ရင် အာနိသင်က အနည်းဆုံး ၆၀ ကနေ ၇၀ ရာခိုင်နှုန်းအထိ ပိုမို ထိရောက်လာလိမ့်မယ်'

​အကယ်၍ အရည်အချင်းရှိသော မည်သည့် ဆေးဆရာမဆို ရွှန်လုံ၏ ယခုအတွေးအမြင်ကိုသာ ကြားသိရပါက သူ၏ မျက်နှာကို တံတွေးဖြင့် သေချာပေါက် ထွေးကြလိမ့်မည် ဖြစ်သည်။ 'ဆေးလုံးဖော်စပ်နည်းတွေကို ပြုပြင်ပြောင်းလဲဖို့ကသာ ဒီလောက်အထိ လွယ်ကူနေမယ်ဆိုရင် လူတိုင်းက ဒါမျိုးပဲ လုပ်ကြမှာပေါ့ ဟုတ်စ' ။