အခန်း ၄၀။ လန်ယာခန်းမနှင့် ထျန်တင်းမြို့တို့ လက်ပြောင်းလက်လွှဲဖြစ်ခြင်း
"နောက်ထပ် အရေးကြီးတဲ့ မေးခွန်းတစ်ခု ရှိသေးတယ်။"
မင်းသမီးစူးချန်က ပြောလိုက်သည်။
"အခုလက်ရှိ ငါတို့ရထားတဲ့ သတင်းအချက်အလက်တွေ အားလုံးက လန်ယာခန်းမ ဂိုဏ်းချုပ်ဆီကပဲ ရတာ။ ဒါပေမဲ့ သူကိုယ်တိုင်တောင် အဲဒီကျောင်းတော်အကြောင်း ဘာသဲလွန်စမှ မသိဘူး။ သူက ကျောင်းတော် တည်ရှိနေတယ်ဆိုတာကိုပဲ အတည်ပြုနိုင်ခဲ့တာ။ တိုက်ကြီးပေါ်မှာ ဒီအကြောင်းနဲ့ပတ်သက်တဲ့ ကောလာဟလတွေက ကြာမြင့်စွာကတည်းက ရှိနေခဲ့တာပဲ။ အခု ဒီသတင်းအချက်အလက်ကို ဖြန့်လိုက်ခြင်းအားဖြင့် သခင်က ဒီကောလာဟလတွေကို ပိုပြီး ကြီးမားလာအောင် လုပ်လိုက်တာပဲ ရှိတယ်"
"ဒါဆိုရင် သာမန်ကောလာဟလတစ်ခုနဲ့ လူတိုင်း လာရောက်လိမ့်မယ်ဆိုတာ ဘယ်လိုအာမခံမလဲ"
လင်းရှူးက ညင်သာစွာ ပြုံးလိုက်သည်။
"ကောလာဟလဆိုတာ လုံလောက်ပါတယ်။ ဘာပဲပြောပြော မင်းတို့ အရင်ကြားခဲ့ဖူးတာတွေက ဝါးတားတားနဲ့ အခြေအမြစ်မရှိတာတွေပဲ အဲဒါတွေက ဒဏ္ဍာရီသက်သက်ပဲ"
"ဒါ့အပြင် အရင်က ဒဏ္ဍာရီအကြောင်းကို လူနည်းစုပဲ သိကြတယ်။ အခု ဒီသတင်း ဖြန့်လိုက်ပြီဆိုတော့ တစ်တိုက်ကြီးလုံး သိသွားလိမ့်မယ်။ အဲဒီသတင်းရဲ့ ပျံ့နှံ့မှုက အရင်ကထက် အဆပေါင်းများစွာ ပိုကြီးမားတယ်"
"တိုက်ကြီးပေါ်မှာ လူတွေက မရေမတွက်နိုင်အောင် ရှိတယ်။ ကောလာဟလဆိုရင်တောင် ကောလာဟလ ရှိနေသရွေ့ လာရောက်လိုတဲ့သူတွေ အများကြီးပဲ။ အဆိုးဆုံးဖြစ်ခဲ့ရင်တောင် သူတို့ လက်ဗလာနဲ့ ပြန်သွားကြမှာပေါ့။ မတွေ့ရင် ဘာမှ ဆုံးရှုံးမှာမဟုတ်ဘူး။ ဒါပေမဲ့ တကယ်တွေ့ခဲ့ရင်တော့ သူတို့အတွက် လာဘ်ကြီးပဲ။ ဒီအကြံအစည်ရှိတဲ့သူတွေ သေချာပေါက် အများကြီးပဲ။ ရာခိုင်နှုန်း တစ်ရာစု သို့မဟုတ် တစ်ထောင်စုပဲ လာရင်တောင်မှ ချင်းကျိုးရဲ့ လက်မတိုင်းကို ရှင်းရှင်းလင်းလင်း ရှာဖွေဖို့ လုံလောက်ပါတယ်။ အဲဒီအချိန်ကျရင် ကျောင်းတော်ကို ဘယ်လောက်ပဲ ကောင်းကောင်း ဖွက်ထားပါစေ သေချာပေါက် ရှာတွေ့လိမ့်မယ်"
မင်းသမီးစူးချန်လည်း အားကိုးရာမဲ့သွားသည်။
"လန်ယာခန်းမ ဂိုဏ်းချုပ်တော့ နောင်တနဲ့ သေရတော့မှာပဲ။ သခင်က ကျောင်းတော်ကို စိတ်မဝင်စားတဲ့အပြင် ကျောင်းတော်သတင်းကိုပါ တိုက်ကြီးတစ်ခွင် ဖြန့်လိုက်မယ်လို့ သူ တစ်ခါမှ မထင်ထားမိရှာဘူး။ သူ သေခါနီးအချိန်မှာ အကွက်ဆင်ခဲ့တဲ့ အစီအစဉ်က သခင်ကြောင့် အလွယ်တကူပဲ ပျက်စီးသွားရတော့တယ်"
"မဟုတ်ရင် သခင်က အနည်းငယ်မျှသော ရည်မှန်းချက်ထားပြီး သတင်းကို ဖုံးကွယ်ထားခဲ့ရင် ကျောင်းတော်စောင့်ရှောက်ရေးအင်အားစုတွေနဲ့ မလွဲမသွေ ထိပ်တိုက်တွေ့မှာပဲ။ သူတို့ကို တားဆီးနိုင်ခဲ့ရင်တောင်မှ မူလအစစွမ်းအားတွေ အများကြီး ဆုံးရှုံးနိုင်တယ်"
"ဒါပေမဲ့ ဒီတိုက်ကြီးပေါ်မှာ ကျောင်းတော်ကို စိတ်မဝင်စားဘဲနဲ့ ဒီလောက်ခိုင်မာတဲ့ အခြေခံအုတ်မြစ်ကို ပိုင်ဆိုင်ထားပြီး ယှဉ်ပြိုင်နိုင်တဲ့ စွမ်းအားရှိလျက်နဲ့ မယှဉ်ပြိုင်ဖို့ ရွေးချယ်တဲ့သူဆိုရင် သခင်က ပထမဆုံး ဖြစ်လိမ့်မယ်"
"သာမန်လူသာဆိုရင်တော့ နတ်ဘုရား ဖြစ်လာဖို့ သွေးဆောင်မှုကို ဘယ်သူမှ မတောင့်ခံနိုင်ဘူး"
လင်းရှူး ဘာမှ ပြန်မပြောတော့ပေ။ လန်ယာခန်းမ ဂိုဏ်းချုပ်နှင့် အခြားသူများကို ဖြေရှင်းပြီးနောက်တွင် သူသည် ထျန်ယွီ လွန်ပျံပေါ်မှ ဆင်းလာခဲ့သည်။
လန်ယာခန်းမ ဂိုဏ်းချုပ်ရုံးသို့ ရောက်ရှိသွားသည်။
ထိုအချိန်တွင် လန်ယာခန်းမအတွင်းရှိ အခြားသော လူအများစုကိုလည်း ရှင်းလင်းပြီး ဖြစ်သည်။
တိုက်တန်တုန့်လော့များစွာ၏ ကွပ်ကဲမှုအောက်တွင် လန်ယာခန်းမ၏ အဖွဲ့ဝင်များသည် ခုခံနိုင်စွမ်း မရှိကြပေ။ သူတို့၏ စွမ်းရည် ကွာဟချက်မှာ အလွန်ပင် ကြီးမားလှသည်။
လင်းရှူးသည် လန်ယာခန်းမ ဂိုဏ်းချုပ်ရုံးကို တစ်ချက် ကြည့်လိုက်သည်။ ထိပ်တန်းအင်အားစုတစ်ခုအနေဖြင့် ဤနေရာသည် အလွန်ပင် ကျယ်ဝန်းလှသည်။
ဤကျယ်ဝန်းလှသော နေရာသည် လန်ယာလေလံရုံ၏ နေအိမ်အဖြစ် အသုံးပြုရန် အလွန်ပင် သင့်တော်လှသည်။
ခဏမျှ တွေးတောပြီးနောက် လင်းရှူးက ဦးလေး လင်းရီကို ပြောလိုက်သည်။
"ဦးလေး လင်းရီ ဒီလန်ယာခန်းမက အခုကစပြီး ငါတို့ရဲ့ အိမ်ပဲ"
"ဒီလန်ယာခန်းမ ဆိုင်းဘုတ်ကို ဖြုတ်ချပြီး ထျန်ခန်းမလို့ ပြောင်းလဲပေးပါ"
ထိုမျှ ပြောပြီးနောက်။
လင်းရှူး ရုတ်တရက် ရပ်တန့်လိုက်သည်။
"ခဏလေး ထျန်ခန်းမလို့ ပြောင်းလိုက်ရင် လန်ယာခန်းမရဲ့ အရိပ်အောက်မှာပဲ နေနေရတယ်လို့ လူတွေ ပြောကြလိမ့်မယ်။ ပြောင်းမှာဖြင့် အကုန်ပြောင်းလိုက်တာမှ"
"အဲဒါကို ထျန်ခန်းမလို့ပဲ အမည်ပေးမယ်"
"လန်ယာလေလံရုံကို အခုကစပြီး ထျန်ခန်းမလက်အောက်ခံ လေလံရုံအဖြစ် သတ်မှတ်မယ်။ ဦးလေး လင်းရီကပဲ အုပ်ချုပ်သွားပါ"
"ကြေညာချက် လန်ယာလေလံရုံသည် တစ်ပတ်အတွင်းမှာပဲ လန်ယာခန်းမဟောင်း အခု ထျန်ခန်းမ၌ လေလံပွဲ ကျင်းပမည်"
"အဲဒီအချိန်ကျရင် စတုတ္ထအဆင့် ဝိညာဉ်စွမ်းအားဆေး ဆေးနည်းသုံးမျိုးအပြင် တိုက်တန်တုန့်လော့တွေအတွက် သင့်တော်တဲ့ ထိပ်တန်းဝိညာဉ်ကွင်းတွေ နှစ်တစ်သိန်းသက်တမ်းရှိတဲ့ ဝိညာဉ်အရိုးစတာတွေကို လေလံတင်ရောင်းချသွားမယ်"
ဦးလေး လင်းရီက ခေါင်းညိတ်လိုက်သည်။
"ဟုတ်ကဲ့ပါ လူငယ်သခင်"
"ဒီနေ့ကစပြီး ငါ့ကို လူငယ်သခင်လို့ မခေါ်နဲ့တော့ ခန်းမသခင်လို့ ခေါ်ပါ။ ငါက ထျန်ခန်းမရဲ့ ခန်းမသခင်ပဲ"
"ဟုတ်ကဲ့ပါ သခင်"
လင်းရှူး၏ အမိန့်ကို လက်ခံရရှိပြီးနောက် ဦးလေး လင်းရီသည် ချက်ချင်းပင် ပြင်ဆင်ရန် ထွက်ခွာသွားသည်။
လင်းရှူးမှာမူ ယခု ထျန်ခန်းမ ဖြစ်လာပြီဖြစ်သော လန်ယာခန်းမကို ဆက်လက် စူးစမ်းလိုက်သည်။
မကြာမီတွင် လင်းရှူးသည် ထျန်ခန်းမ၏ ပင်မခန်းမကို သူ၏ ဂိုဏ်းချုပ်ရုံးနှင့် နေထိုင်ရာနေရာအဖြစ် သတ်မှတ်လိုက်သည်။
သူ့လက်အောက်ခံ စူပါတုန့်လော့များမှာမူ ပင်မခန်းမပတ်လည်ရှိ ဘေးခန်းမများတွင် နေထိုင်ကြသည်။
ဤသို့ဖြင့် မည်သူမဆို ထျန်ခန်းမထဲသို့ ခိုးဝင်လာပြီး လင်းရှူးအနားသို့ ချဉ်းကပ်လာပါက ချက်ချင်းပင် သိရှိနိုင်ပြီး နှိမ်နင်းနိုင်ပေမည်။
မင်းသမီးစူးချန်မှာမူ အပြင်ဘက်ပိုင်းတွင် နေထိုင်သည်။
သူမသည် လန်ယာလေလံရုံ၏ အဓိကလေလံတင်သူ ဖြစ်သော်လည်း လင်းရှူး၏ အဓိကအဖွဲ့ထဲသို့ မဝင်ရောက်ရသေးသည့်အတွက် အတွင်းပိုင်းတွင် နေထိုင်ခွင့်မရှိသေးပေ။
သူမကို အပြည့်အဝ ယုံကြည်လာမှသာ တခြားကိစ္စများကို စဉ်းစားပေးမည် ဖြစ်သည်။
မင်းသမီးစူးချန်လည်း ၎င်းကို သိရှိပုံရပြီး သူမ၏ အဆင့်အတန်းအရ လင်းရှူး အပြည့်အဝ မယုံကြည်နိုင်သေးသည်ကို နားလည်သောကြောင့် ဂရုမစိုက်ပေ။
သူမသည် ဤနေရာသို့ လှပသော နန်းတော်တွင် နေချင်၍ လာခြင်းမဟုတ်ဘဲ ဤနေရာ၌ ရတနာများစွာ ရှိသဖြင့် သူမ၏ ပစ္စည်းအကဲဖြတ်ခြင်း စွမ်းရည်ကို ပိုမိုတိုးတက်အောင် လုပ်ဆောင်နိုင်မည်ဟု ယူဆ၍ လာခြင်းဖြစ်သည်။
သူမ၏ အကဲဖြတ်ခြင်း စွမ်းရည် အဆင့်ကိုးအထိ ရောက်ရှိသွားပါက သူမ၏ ညီမကို ကူညီရန် အင်ပါယာသို့ ပြန်သွားပေလိမ့်မည်။
...
လန်ယာခန်းမတွင် ဖြစ်ပျက်ခဲ့သော သတင်းများသည် ထျန်တင်းမြို့အတွင်းသို့ လျင်မြန်စွာ ပျံ့နှံ့သွားသည်။
ထျန်ယွီ လွန်ပျံသည် မြို့တွင်းသို့ တိမ်တိုက်များအထက်မှ လျှို့ဝှက်စွာ ဝင်ရောက်လာခဲ့သော်လည်း လန်ယာခန်းမဆီသို့ ရောက်ရှိချိန်တွင်မူ တိမ်တိုက်များအောက်သို့ ဆင်းသက်ရပေမည်။
ဆင်းသက်လိုက်သည်နှင့် ထျန်တင်းမြို့သူမြို့သားများသည် တစ်စုံတစ်ယောက် ရောက်ရှိလာကြောင်း သိရှိသွားကြသည်။
စိတ်ဝင်စားသော လူအချို့သည် မည်သူရောက်လာသလဲဟု သွားရောက်ကြည့်ရှုကြသည်။
သူတို့သည် လျှို့ဝှက်စွာ သတင်းစုံစမ်းရန် ကြိုးစားချိန်တွင် လန်ယာခန်းမ၏ အခြေအနေကို မြင်လိုက်ရသောအခါ အလွန်ပင် တုန်လှုပ်သွားကြသည်။
လန်ယာခန်းမသည် အမှန်တကယ်ပင် ပျက်စီးသွားခဲ့ပြီ ဖြစ်သည်။
လန်ယာခန်းမ ဂိုဏ်းချုပ်နှင့် အကြီးအကဲများစွာမှာလည်း လျှို့ဝှက်ဆန်းကြယ်သော စွမ်းအားရှင်များ၏ ဖမ်းဆီးခြင်းကို ခံလိုက်ရပြီး ကောင်းကင်ယံရှိ ပျံသန်းရေး ဝိညာဉ်ကိရိယာထဲတွင် ချုပ်နှောင်ခံထားရသည်။
ထို့နောက်တွင် လန်ယာခန်းမ ဂိုဏ်းချုပ်နှင့် အခြားသူများမှာ ပြန်မပေါ်လာတော့ပေ။
ဆက်လက်၍ အသက်အရွယ်ကြီးရင့်သော လူတစ်ယောက်သည် လန်ယာခန်းမ၏ ဆိုင်းဘုတ်ကို ဖယ်ရှားပြီး ထျန်ခန်းမဟု ပြောင်းလဲ တပ်ဆင်လိုက်သည်။
ဤမြင်ကွင်းကို မြင်လိုက်ရသောအခါ လျှို့ဝှက်စွာ စုံစမ်းရန် လာရောက်သူများသည် လန်ယာခန်းမသည် အင်အားကြီးရန်သူတစ်ဦးကို ရန်စမိပြီး တိုက်ခိုက်ခံရခြင်းဖြစ်ကြောင်း သိလိုက်ရသည်။
ဤသတင်းသည် ထျန်တင်းမြို့တစ်မြို့လုံးသို့ ပျံ့နှံ့သွားသည်။
လန်ယာခန်းမနှင့် အဆက်အသွယ်ရှိသော အင်အားကြီးသူများနှင့် အင်အားစုအချို့သည်လည်း ထိတ်လန့်သွားကြသည်။
ထိပ်တန်းအင်အားစုတစ်ခုဖြစ်သော လန်ယာခန်းမသည် ဤမျှ လျင်မြန်စွာ ပျက်စီးသွားရသည်မှာ မယုံနိုင်စရာ ဖြစ်သည်။
ထို့နောက်တွင် သူတို့သည် အထုပ်အပိုးများ ပြင်ဆင်ပြီး တွန့်ဆုတ်မနေဘဲ ထျန်တင်းမြို့မှ ထွက်ခွာသွားကြသည်။
နောက်ပြောင်နေတာလား။ လန်ယာခန်းမ ပျက်စီးသွားပြီဆိုမှတော့ သူတို့လို လန်ယာခန်းမနဲ့ အဆက်အသွယ်ရှိတဲ့ အင်အားစုတွေက ဘာကို ဆက်စောင့်နေရမှာလဲ။
လူတွေက ကိုယ့်အိမ်တံခါးဝကို လာပြီး မိသားစုလိုက် သတ်ဖြတ်ပစ်မှာကို စောင့်နေရမှာလား။
မဟုတ်ရင် လက်စားချေဖို့ ကြိုးစားရမှာလား။
နောက်ပြောင်မနေကြပါနဲ့။
လန်ယာခန်းမကို ဒီလောက် လွယ်လွယ်ကူကူ ဖျက်ဆီးပစ်လိုက်တာ လက်စားချေဖို့သွားရင် ကိုယ့်အသက်ကို အလကား ပေးလိုက်တာနဲ့ တူတူပဲ။
သူတို့နဲ့က အနည်းငယ်မျှသာ အဆက်အသွယ်ရှိတာ အရင်းနှီးဆုံး သူငယ်ချင်းတွေလည်း မဟုတ်ကြဘူး။
အချိန်တိုလေးအတွင်းမှာပင် ထျန်တင်းမြို့အတွင်းရှိ အင်အားစုများ၏ ၆၀ မှ ၇၀ ရာခိုင်နှုန်းသည် ထွက်ပြေးသွားကြပြီး မြို့မှာ လူသူကင်းမဲ့သလို ဖြစ်သွားသည်။
လင်းရှူးသည် ထျန်တင်းမြို့၌ ဖြစ်ပျက်သမျှကို သိရှိထားသည်။
သို့သော် လင်းရှူး ဂရုမစိုက်ပါ။
ဤအင်အားစုများသည် လန်ယာခန်းမ မဟုတ်ဘဲ အနည်းငယ်သာ ပတ်သက်မှုရှိသူများ ဖြစ်သည်။ သူတို့ကို ဖျက်ဆီးပစ်ရန် မလိုအပ်ပေ။
သူတို့က ကိုယ့်ကိုပါ ထိခိုက်မှာ ကြောက်ပြီး ထွက်ပြေးသွားခြင်းသည် လင်းရှူး၏ ဆန္ဒကို ပြည့်ဝစေသည်။
အနာဂတ်တွင် ထျန်တင်းမြို့ကို ထျန်ခန်းမအတွက်သာ သီးသန့် မြို့တစ်မြို့အဖြစ် ဖွံ့ဖြိုးတိုးတက်အောင် လုပ်ဆောင်နိုင်သည်။
နောက်မှ အတင်းအဓမ္မ နှင်ထုတ်ရတာထက် သူတို့ဘာသာ ထွက်သွားတာက လင်းရှူးအတွက် အလုပ်ရှုပ်သက်သာစေသည်။
မကြာမီ လင်းရှူးသည် ဦးလေး လင်းရီကို စေလွှတ်ကာ ထျန်တင်းမြို့တံခါးရှိ ဆိုင်းဘုတ်ကို အစားဂထိုးစေလိုက်သည်။
ထျန်တင်းမြို့ကို ထျန်မြို့ဟု ပြောင်းလဲခေါ်ဆိုလိုက်သည်။