အခန်း (၈၅) ပထမအဆင့် အင်အားစု!

"အင်အားစုစွမ်းအင်ဟင်းလင်းပြင် ကို ဖွင့်စမ်း!"

အောင်မြင်စွာ အသက်ဝင်သွားသည်နှင့်တစ်ပြိုင်နက် ကျောက်ဖုန်းက ချက်ချင်း အမိန့်ပေးလိုက်သည်။ ဤ အရာက အမှန်တကယ် ဘာတွေလုပ်နိုင်သလဲဆိုသည်ကို သူ သိချင်ဇော ပြင်းပြနေသည်။ ဤသည်မှာ သူ၏ အနာဂတ်နှင့် တိုက်ရိုက် သက်ဆိုင်နေသည် မဟုတ်ပါလား။

• ကျင့်စဉ်တစ်ခုကို လည်းအဓိကကျင့်စဉ်အဖြစ် ရွေးချယ်၍ကျင့်ကြံရပေလိမ့်မည်

• အဆင့်: ၁

  (အဖွဲ့ဝင် ၅၀၀ ကျော် စုဆောင်းနိုင်ပါက အဆင့် ၂ အင်အားစုအဖြစ် မြှင့်တင်နိုင်မည်။)

[အထူး အာနိသင်များ:]

• "ဝိညာဉ်စွမ်းအင် ရှိသော ပစ္စည်းများကို ကျင့်ကြံမှု အရှိန်မြှင့်တင်ရန် လဲလှယ်အသုံးပြုနိုင်ပါသည်။"

• "လက်အောက်ငယ်သားများ၏ သစ္စာရှိမှု တန်ဖိုး ကို ကြည့်ရှုနိုင်ပါသည်။"

• "အဆင့် ၁ အင်အားစုသည် လက်အောက်ငယ်သားများအား ခွဲဝေပေးရန် တစ်လလျှင် အခမဲ့ အစွမ်းမှတ် ၁၀၀ လဲရရှိပါမည်။"

• "အဆင့် ၁ အင်အားစု၏ ခေါင်းဆောင်သည် ကျင့်ကြံမှုအရှိန် ၁၀၀ ရာခိုင်နှုန်း (၂ ဆ) ပိုမို လျင်မြန်ပါမည်။"

• သစ္စာရှိမှု တန်ဖိုး ၈၀ နှင့်အထက် ရှိသူများကိုသာ အစွမ်းမှတ်များ ခွဲဝေပေးနိုင်သည်!

အင်အားစု စွမ်းအင်ဟင်းလင်းပြင် ပွင့်သွားသည်နှင့် အသိပေးချက်များစွာ ကျောက်ဖုန်းရှေ့တွင် ပေါ်လာတော့သည်။

"သစ္စာရှိမှု တန်ဖိုးတွေကို ကြည့်မယ်"

ကျောက်ဖုန်း ချက်ချင်း စစ်ဆေးလိုက်သည်။ သူ မြင်လိုက်ရသည်မှာ-

• ဝေ့ချွမ်: သစ္စာရှိမှု ၉၀

• ကျန်းဟန်: သစ္စာရှိမှု ၈၅

• လော့ဟွာ: သစ္စာရှိမှု ၈၁

• လျိုဝမ်: သစ္စာရှိမှု ၈၂

• ကျွမ်းဝေ: သစ္စာရှိမှု ၈၃

ဒါတွေဟာ ငါနဲ့အတူ သေတွင်းထဲ ဆင်းခဲ့တဲ့ ညီအစ်ကိုတွေပဲ။ သူတို့ရဲ့ သစ္စာတရားက အစစ်အမှန်ပဲ။

ဤကိန်းဂဏန်းများကို မြင်ရသောအခါ ကျောက်ဖုန်း၏ စိတ်မှာ တည်ငြိမ်သွားသည်။ ဤတပ်မှူး ၅ ဦးမှာ သူနှင့်အတူ တိုက်ပွဲပေါင်းများစွာကို ဖြတ်ကျော်ခဲ့သည့် သစ္စာရှိ ညီအစ်ကိုများ ဖြစ်ကြရာ ထိုသံယောဇဉ်မှာ စကားလုံးဖြင့် ဖော်ပြရန်ပင် မလိုပေ။

အဆင့် ၁ အင်အားစုကတင် တစ်လကို အစွမ်းမှတ် ၁၀၀ ပေးတာလား။ ဒါ အံ့ဩစရာပဲ။

ကျောက်ဖုန်း၏ မျက်နှာတွင် အပြုံးတစ်ခု ပေါ်လာသည်။ ဤသည်မှာ အဆင့် ၁ မျှသာ ရှိသေးသည်။ အဆင့် ၂၊ အဆင့် ၃ ဆိုလျှင် မည်မျှအထိ စွမ်းအားကြီးမားလာမည်နည်း။ကျောက်ဖုန်းသည် သူ၏အင်အားစုစွမ်းအင်ဟင်းလင်းပြင်ကိုကြည့်ရှုနေရာမှ အာရုံများကိုပြန်လည်စုစည်းကာ

"မင်းတို့ ငါ့အပေါ် သစ္စာဆိုခဲ့ကြပြီ" ကျောက်ဖုန်းက ကြေညာလိုက်သည်။ "ငါ မင်းတို့ကို နန်းတွင်းကပေးတဲ့ လစာအပြင် ရွှေတွေ၊ ငွေတွေ ပေးဦးမယ်။ မင်းတို့ရဲ့ မိသားစုတွေ ချမ်းသာကြွယ်ဝဖို့ ငါ တာဝန်ယူတယ်"

သူ လက်ဝှေ့ယမ်းလိုက်ရုံဖြင့် သေတ္တာငါးလုံးမှာ သူတို့ရှေ့တွင် ဘွားခနဲ ပေါ်လာသည်။ သေတ္တာတစ်လုံးစီတွင် အနည်းဆုံး ရွှေသပြာ ငါးဆယ်ခန့် ရှိနေသည်ကို တွေ့ရသည်။ သို့သော် ထိုသူ ၅ ဦးမှာ ရွှေငွေများကြောင့် မျက်စိကျိန်းသွားခြင်းထက် အရာဝတ္ထုများ လေထဲမှ ရုတ်တရက် ပေါ်လာခြင်းကြောင့် အလွန်အမင်း ထိတ်လန့်သွားကြသည်။

"သခင်ကြီး..." ဝေ့ချွမ်၏ အသံမှာ တုန်ရီနေသည်။ "သခင်ကြီးက တကယ်ပဲ နတ်ဘုရားတစ်ပါးလား? ဘာမှမရှိတဲ့နေရာကနေ အရာတွေကို ဖန်တီးနိုင်တာလား?"

ကျန်သူများကလည်း ကျောက်ဖုန်းကို နတ်ဘုရားတစ်ပါးကို ကြည့်သကဲ့သို့ အံ့သြတကြီး ငေးကြည့်နေကြသည်။ နတ်ဘုရား မဟုတ်လျှင် ဤသို့ လုပ်ဆောင်နိုင်ရန် မည်သို့ ဖြစ်နိုင်ပါမည်နည်း။ ကျောက်ဖုန်းကမူ သူတို့၏ အံ့ဩမှုကို လျစ်လျူရှုထားလိုက်သည်။ သူက ပို၍ ထူးခြားဆန်းပြားပြီး အစွမ်းထက်လေ၊ သူတို့၏ သစ္စာတရားမှာ ပို၍ ခိုင်မြဲလေ ဖြစ်မည်။

ဝိညာဉ်စွမ်းအင် ရှိတဲ့ ပစ္စည်းတွေက ကျင့်ကြံမှု အရှိန်မြှင့်နိုင်တယ်ဆိုတော့... ကျောက်စိမ်းတွေကရော အကျုံးဝင်မလား? ကျောက်ဖုန်း စဉ်းစားလိုက်သည်။ သူသည် သူ၏ သိုလှောင်အိတ် ထဲမှ ကျောက်စိမ်းထည် အချို့ကို ထုတ်ယူလိုက်သည်။

[ဝိညာဉ်စွမ်းအင်ရှိသော ပစ္စည်းဖြစ်ပေသည်။ ထိုအရာက လက်အောက်ငယ်သားများ၏ ကျင့်ကြံမှုအရှိန်ကို မြှင့်တင်ရန် အသုံးပြုနိုင်ပေသည်]

ဟန်ဘုရင် ထွက်ပြေးတုန်းက ထားခဲ့တဲ့ ဒီကျောက်စိမ်းတွေက ငါ့အင်အားစု တည်ဆောက်ဖို့ ရတနာတွေ ဖြစ်လာပြီပေါ့။ ကျောက်ဖုန်း တွေးလိုက်သည်။

ယခုအချိန်တွင် ကျောက်ဖုန်းသည် ထိုသူ ၅ ဦးကို ပိုမိုကြီးမားသော ဆုလာဘ်တစ်ခု ပေးရန် ဆုံးဖြတ်လိုက်သည်။

"ရွှေငွေတွေအပြင်... သာမန်လူတွေထက် သာလွန်တဲ့ ခွန်အားကိုလည်း ငါ မင်းတို့ကို ပေးသနားမယ်" ကျောက်ဖုန်းက လေးနက်သော အသံဖြင့် ဆိုသည်။

သူ ထပ်မံ လက်ဝှေ့ယမ်းလိုက်ပြီး အခမဲ့ အစွမ်းမှတ်များကို အသုံးပြုကာ တစ်ဦးလျှင် 'ကိုယ်ခန္ဓာကြံ့ခိုင်မှု' ၂၀ မှတ်စီ ခွဲဝေပေးလိုက်သည်။ ကိုယ်ခန္ဓာ ပြောင်းလဲမှုကို ခံစားရရန် အလွယ်ကူဆုံး ဖြစ်သောကြောင့်ပင်။

ထိုသူ ၅ ဦး ကြည့်နေစဉ်မှာပင် အလင်းတန်း ၅ ခုမှာ သူတို့၏ ကိုယ်ထဲသို့ ငုပ်လျှိုးဝင်ရောက်သွားသည်။

"ကျွန်တော့်ရဲ့ မြားဒဏ်ရာ... ပျောက်ကွယ်သွားပြီ!" ကျန်းဟန်က သူ၏ ရင်ဘတ်ကို အံ့သြတကြီး ကိုင်ကြည့်ရင်း အော်လိုက်သည်။ ဒဏ်ရာဟောင်းရှိသော နေရာတွင် နွေးထွေးသော ခံစားချက်တစ်ခု ပေါ်လာပြီး ပြန်လည် ကုသသွားသကဲ့သို့ ခံစားလိုက်ရသည်။

"ကျွန်တော်လည်း အတူတူပဲ! ဒဏ်ရာဟောင်းတွေ အကုန် သက်သာသွားသလိုပဲ!" လော့ဟွာက စိတ်လှုပ်ရှားစွာ ဆိုသည်။

"ငါ မင်းတို့ရဲ့ ကိုယ်ခန္ဓာကို အနည်းငယ် ပြုပြင်ပေးလိုက်တာပါ။ ဒါဟာ ပထမဆုံးအကြိမ်ပဲ ရှိသေးတယ်။ နောင်ဆိုရင် လစဉ်လတိုင်း ငါ့ဆီကနေ ဒီလို တိုးမြှင့်မှုတွေ ရလိမ့်မယ်။ ကိုယ်ခန္ဓာအပြင် ခွန်အားနဲ့ အလျင်ကိုလည်း ငါ မြှင့်ပေးဦးမယ်" ကျောက်ဖုန်းက ပြုံးလျက် ရှင်းပြသည်။

ထိုစကားကို ကြားသောအခါ ထိုသူ ၅ ဦးမှာ တုန်လှုပ်စွာဖြင့် ထပ်မံ ဒူးထောက်ကြပြန်သည်။ "ကျွန်တော်မျိုးတို့ သခင်ကြီးအတွက် အသက်ပေးဖို့ အသင့်ပါပဲ!"

"ဒါ့အပြင်... မင်းတို့ကို ကျင့်ကြံမှုကနေတစ်ဆင့် ခွန်အားတိုးအောင် လုပ်ပေးနိုင်မယ့် 'ကျင့်စဉ်' တစ်ခုကိုလည်း ငါ ပေးဦးမယ်"

"ကျင့်စဉ် ဟုတ်လား?" ထိုသူများမှာ ကျောက်ဖုန်းကို မယုံနိုင်သလို ငေးကြည့်နေကြသည်။

"[အလယ်အလတ် အတွင်းအားကျင့်စဉ်] ကို အင်အားစုရဲ့ အဓိကကျင့်စဉ်အဖြစ် သတ်မှတ်မယ်" ကျောက်ဖုန်းက သူစွမ်းအင်၏စနစ်ကို အမိန့်ပေးလိုက်သည်။

သူ့တွင် လက်ရှိ၌ ကျင့်စဉ် နှစ်ခုရှိသည် - သူကိုယ်တိုင် ကျင့်ကြံနေသည့် [နဂါးဆင်ခွန်အားကျင့်စဉ်] နှင့် ဤ [အလယ်အလတ် အတွင်းအားကျင့်စဉ်] တို့ ဖြစ်သည်။ ရှေ့ကျင့်စဉ်မှာ အလွန် အစွမ်းထက်လှသဖြင့် ကျောက်ဖုန်းက ၎င်းကို လျှို့ဝှက်ချက်အဖြစ် သိမ်းဆည်းထားပြီး ဒုတိယ ကျင့်စဉ်ကိုသာ ပေးလိုက်ခြင်း ဖြစ်သည်။

"ကျင့်စဉ်ရဲ့ ပထမအဆင့်ကို လွှဲပြောင်းပေးလိုက်မယ်"

ကျောက်ဖုန်းသည် ကျင့်စဉ်ကို သူတို့ ၅ ဦးထံ ချက်ချင်း ပို့လွှတ်လိုက်သည်။ မျက်တောင်တခတ်အတွင်းမှာပင် သူတို့အားလုံး၏ ဦးနှောက်ထဲတွင် ဗဟုသုတအသစ်များ ရောက်ရှိလာပြီး ကျင့်စဉ်၏ နည်းစနစ်များကို မှတ်မိသွားကြသည်။

"ဒါ... ဒါ တကယ့် ကျင့်စဉ်ပဲ!"

"သခင်ကြီး! ဒီလောက် တန်ဖိုးရှိတဲ့ အရာကို ပေးသနားတဲ့အတွက် ကျေးဇူးတင်ပါတယ်!"

"ဒီကျင့်စဉ်အတိုင်း ကျင့်ကြံကြပါ။ နေ့စဉ်မပြတ် ကျင့်မယ်ဆိုရင် မင်းတို့ ခွန်အားတွေ တိုးလာလိမ့်မယ်။ ဒီကျင့်စဉ်ရဲ့ ပထမဆုံး အဆင့်က ပုတ္တန နယ်ပယ် ပဲ။ နားမလည်တာရှိရင် ငါ့ကို အချိန်မရွေး မေးနိုင်တယ်"

"ဟုတ်ကဲ့ပါ၊ သခင်ကြီး!"

သူတို့ကို ညွှန်ကြားပြီးနောက် ထိုသူများ ပြန်ထွက်သွားကြသည်။

သူတို့ရဲ့ သစ္စာရှိမှုက တကယ်မြင့်တယ်။ သမိုင်းတစ်လျှောက် ကိုယ်ပိုင်အင်အားစု တည်ထောင်နိုင်တဲ့ စစ်သူကြီးတွေ ဘာလို့ အလွယ်တကူ ပုန်ကန်နိုင်သလဲဆိုတာ အခုမှ ငါ နားလည်တော့တယ်။ စစ်သားတွေက သူတို့ရဲ့ စစ်သူကြီးကိုပဲ သိကြပြီး ဘုရင်ကို မသိကြတော့လို့ပဲ!

ကျောက်ဖုန်းသည် ယခုမှပင် ဘုရင်များက နယ်ဝေးရောက် စစ်သူကြီးများကို ဘာကြောင့် အမြဲ သံသယဝင်ရသလဲဆိုသည်ကို သဘောပေါက်သွားသည်။ အင်အားစုတစ်ခု တည်ဆောက်နိုင်ခြင်းက ဘုရင့်အာဏာထက်ပင် ပိုမိုခိုင်မာသော သံယောဇဉ်ကို ဖြစ်စေသည်။

ဒီည ကျင့်ကြံပြီးရင် ငါ့ရဲ့ အစွမ်းအားလုံး က ၁,၀၀၀ ကျော်သွားလိမ့်မယ်။

ယခုအချိန်အထိ ကျောက်ဖုန်း၏ ခွန်အားမှာ စံမ်းအင်စနစ်မှ အမှတ်များ စုဆောင်းခြင်းကြောင့်သာ ဖြစ်သည်။ သူ နဂါးဆင်ကျင့်စဉ်ကို ကျင့်နေသည်မှာ တစ်လပင် မပြည့်သေးပေ။ အစွမ်းမှတ် ၁,၀၀၀ ပြည့်သွားပါက နဂါးဆင်ကျင့်စဉ်၏ ပထမအဆင့်ကို အဆုံးထိ ကျွမ်းကျင်သွားမည်ဖြစ်ပြီး သူ၏ ခွန်အားမှာ ယခင်ကထက် အဆပေါင်းများစွာ ခုန်တက်သွားမည် ဖြစ်သည်။

ကျောက်ဖုန်း ကျင့်ကြံခြင်းကို စတင်လိုက်သည်။ သူသည် အင်အားစု ခေါင်းဆောင်ဖြစ်သည့်အတွက် ကျင့်ကြံမှု အရှိန်မှာ ပုံမှန်ထက် နှစ်ဆ မြန်နေသည်။

အရင်က တစ်ရက်ကျင့်ရင် အမှတ် ၁၀ ကျော် တက်တယ်၊ အခုဆိုရင်တော့ အဲဒီထက် အများကြီး ပိုတက်တော့မှာပဲ။

သူသည် အမှတ် ၁,၀၀၀ ပြည့်ရန်အတွက် အာရုံစိုက်ကာ ဆက်လက် ကျင့်ကြံနေတော့သည်။