အခန်း ၉၄ - စစ်မှန်သောမီးနှင့် ဧကရာဇ်အမိန့်တော်များ

ညဉ့်နက်သန်းခေါင်အချိန်တွင် မြေစောင့်နတ်သည်လည်း သူ၏နတ်စင်ငယ်အတွင်းသို့ ပြန်လည်ဝင်ရောက်ကာ တရားမှတ်နေပြီဖြစ်သည်။ ကျိယွမ်သည်လည်း ကျောက်တုန်းလျန်၏ ခြံဝင်းအတွင်းရှိ အဆောင်ခန်းသို့ ပြန်လာခဲ့သည်။

သို့သော် ကျိယွမ်သည် ချက်ချင်းအိပ်မပျော်သေးဘဲ အခန်းထဲရှိ စားပွဲတွင် ငြိမ်သက်စွာ ထိုင်နေမိသည်။ မြစိမ်းနွယ်ဓားကို စားပွဲပေါ်တွင် တင်ထား၏။ သူ၏မျက်လုံးများကို အသာမှိတ်ထားကာ နိုးတစ်ဝက် ပျော်တစ်ဝက် အခြေအနေဖြင့် သူ၏အတွင်းစိတ်အာရုံထဲရှိ ကြီးမားသော ဆေမီးဖိုကြီးကို ပုံဖော်ကြည့်နေသည်။

သူ၏စိတ်အာရုံထဲမှ ဆေမီးဖိုကြီးကိုယ်ထည်ပေါ်တွင် ရွှေ၊ ရေ၊ သစ်၊ မီး၊ မြေ ဟူသော ဓာတ်ငါးပါးနှင့် သက်ဆိုင်သည့် အရောင်ငါးမျိုးတို့မှာ ပေါ်လာလိုက်၊ ပျောက်သွားလိုက်နှင့် ပြောင်းလဲနေကြသည်။ ဆေးမီးဖိုကြီးဗဟိုချက်တွင် ယင်နှင့်ယန် စွမ်းအင်တို့မှာ အစဉ်မပြတ် ထွက်ပေါ်နေပြီး မူလကရှိနေသည့် အမြုတေမီးနှင့် ရောယှက်ကာ တဖြည်းဖြည်း ပေါင်းစည်းသွားကြသည်။ မီးတောက်များထဲမှ တိုးထွက်လာသော အလင်းရောင်သည် ထူးဆန်းစွာပင် ထိန်းချုပ်ခံထားရပုံပေါ်ပြီး တဟုန်းဟုန်းတောက်လောင်နေသော မီးတောက်များကြားတွင် ယင်နှင့်ယန်တို့ အပြန်အလှန် ကူးပြောင်းနေမှုကြောင့် မီးအရောင်မှာ မီးခိုးရောင်မှ အညိုရောင်သို့ ပြောင်းလဲနေသည်။

ဆေးမီးဖိုအတွင်းရှိ မူလအမြုတေမီးကို 'ထက်မြက်သော မဟာဗျူဟာများ' ကျမ်းစာထဲတွင် 'ဘုရားပေးဆန္ဒမီး' ဟု ဖော်ပြထားသည်။ အဖြူနှင့် အနက်ရောင် စွမ်းအင်များမှာ ယင်မီးနှင့် ယန်မီးအဖြစ်သို့ အသီးသီး ပြောင်းလဲသွားကြပြီး ထိုသုံးမျိုးပေါင်းစပ်လိုက်သောအခါ အဆုံးမဲ့တန်ခိုးအာနုဘော်ရှိသော မီးတောက်တစ်ခု ဖြစ်လာသည်။

ဤသည်မှာ ကျိယွမ်၏ ပင်ကိုသိစိတ်မှ သိရှိလာခြင်းဖြစ်သည်။ ဆေးမီးဖိုအတွင်းရှိမူလက စိတ်ကူးဖြင့်သာရှိသော အမြုတေမီးမှာ ယခုအခါ လက်ဆုပ်လက်ကိုင်ပြနိုင်သော တံတားတစ်ခုသဖွယ် ဖြစ်တည်လာသည်ကိုပင် သူ မရေမရာ ခံစားနေရသည်။

ယခင်ဘဝက အမှတ်သညာများကြောင့် ကျိယွမ်သည် ဤအပြောင်းအလဲအတွက် စိတ်လှုပ်ရှားမိသည်။ ဤသည်မှာ ဒဏ္ဍာရီလာ 'သမာဓိအမြုတေမီး'များလားဟုပင် သူ တွေးတောနေမိသည်။

ယခင်ဘဝတွင် သမာဓိအမြုတေမီးဟူသည် အဘယ်နည်းဟု ရှာဖွေဖူးခြင်း မရှိသော်လည်း၊ ဤဘဝရှိ 'ထက်မြက်သော မဟာဗျူဟာများ' ကျမ်းစာထဲတွင် သမာဓိမီးနှင့် ပတ်သက်သည့် ဖော်ပြချက်မျိုးကို သူ မြင်ဖူးသည်။ ထိုကျမ်းစာတွင် လူ့ခန္ဓာကိုယ်အတွင်း ထွက်ပေါ်လာသော မီးလေးမျိုးအကြောင်း ဖော်ပြထားသည်။ ၎င်းတို့မှာ အထက်ပိုင်းရှိ 'သမာဓိနှလုံးသားမီး'၊ အလယ်ပိုင်းရှိ 'သမာဓိကျောက်ကပ်မီး'၊ အောက်ပိုင်းရှိ 'ချီစွမ်းအင်ပင်လယ်မီး' နှင့် နောက်ဆုံးတွင် ဆေးမီးဖိုကြီးအတွင်းရှိ စစ်မှန်သောမီးဖြစ်သော နက်နဲလှသည့် 'လျှို့ဝှက်နတ်မီး' တို့ ဖြစ်ကြသည်။

သို့သော် 'ထက်မြက်သော မဟာဗျူဟာများ' ကျမ်းတွင် သမာဓိမီးအကြောင်း ဖော်ပြထားသော်လည်း 'သမာဓိအမြုတေမီး' ဟူ၍တော့ မရှိပေ။ သမာဓိမီးလေးမျိုးမှာလည်း သီးခြားစီသာ ဖြစ်ပြီး 'အမြုတေမီး' ဟူသော စကားလုံးမှာ အလွန်ပင် အဓိပ္ပာယ်လေးနက်လှသည်။ ကျင့်ကြံသူတိုင်း၏ အသက်နှင့် ကျင့်ကြံမှုတို့နှင့် ဆက်စပ်နေသော ဆေးမီးဖိုကြီးအတွင်းရှိ နတ်မီးမှလွဲ၍ ကျန်ရှိသော အမြုတေမီးများအကြောင်းကိုမူ သိပ်မသိကြပေ။

"ဒါပေမဲ့ ငါ့အခြေအနေအရဆိုရင်တော့ 'သမာဓိအမြုတေမီး' လို့ ခေါ်ဖို့ လုံလောက်ပါတယ်!"

အဆုံးတွင်တော့ သူပိုင်ဆိုင်ထားသောအရာမှာ အခြားသူများ၌ မရှိသည့်အရာဖြစ်ရာ ၎င်း၏ ထူးခြားချက်များအပေါ် မူတည်ပြီး အမည်ပေးခြင်းကလည်း မမှားနိုင်သည် မဟုတ်ပါလား။ မိမိကိုယ်ကိုယ် ထူးခြားသူဟု မှတ်ယူခြင်းမှာ မောက်မာရာကျသည်ဟု ထင်ရသော်လည်း၊ အခြားတစ်မျိုး တွေးကြည့်မည်ဆိုလျှင် ကျင့်ကြံသူများ၏ ကိုးဆယ့်ကိုးရာခိုင်နှုန်းမှာ ဤအရာမျိုး မရှိသည်မှာ သေချာလှသည်။

ထို့နောက် 'အမိန့်တော်' ဟူသော စကားလုံး၏ လွှမ်းမိုးမှုမှာ ကျန်ရှိနေဆဲဖြစ်သည်။ သူ၏အတွင်းစိတ်အာရုံထဲတွင် ထိုစကားလုံးများ ရှိနေသေးကြောင်း သတိပေးနေသကဲ့သို့ ကျိယွမ်၏ ကိုယ်ပိုင်အသံမှာ ပဲ့တင်ထပ်နေသည်။

ထိုစကားလုံးများ၏ အသံထွက်မှာ ရှင်းလင်းလာသည့်အခါတိုင်း၊ ကျိယွမ်သည် သူ၏ စိတ်အာရုံထဲမှ ဆေးမီးဖိုကြီး၏ အပြင်ဘက်တွင် ရစ်ခွေနေသော နက်နဲသည့် ဝါဝင်းသောစွမ်းအင်လွှာပါးလေးကို မရေမရာ မြင်တွေ့နေရသည်။

'ဒီနက်နဲတဲ့ ဝါဝင်းတဲ့ ချီစွမ်းအင်က တကယ့်ကို ကုသိုလ်အရှိန်အဝါရဲ့ အငွေ့အသက်တွေများလား'

ဤစကားလုံးများသည် ယနေ့ညတွင် သူ့အတွက် ရရှိလာသော အရေးကြီးသည့် အခွင့်အလမ်းတစ်ခုဖြစ်ကြောင်း ကျိယွမ် နားလည်သည်။ ထိုစကားလုံးများကို ကြားရသည့်အခါတိုင်း ၎င်းတို့၏ အဓိပ္ပာယ်နှင့် အနှစ်သာရကို သူ တဖြည်းဖြည်း နားလည်လာသည်။ သူ၏ နားလည်မှုကို အတည်ပြုလိုပါက ယခုအချိန်သည် စမ်းသပ်ကြည့်ရန် အသင့်တော်ဆုံး အခွင့်အရေးပင် ဖြစ်သည်။

ထိုသို့တွေးလိုက်သည်နှင့် ကျိယွမ်သည် မျက်လုံးများကို ဖွင့်လိုက်ပြီး စားပွဲပေါ်ရှိ ဓားကို တည့်တည့်ကြည့်ကာ သူ၏ လက်ညှိုးနှင့် လက်ခလယ်ကို စု၍ ဓားသွားဦးဆီသို့ ချိန်ရွယ်လိုက်သည်။

စိတ်ကူးနှင့် ခန္ဓာကိုယ် ဟန်ချက်ညီသွားသည့် ခဏတွင် ကျိယွမ်က မြစိမ်းနွယ်ဓားဆီသို့ ညွှန်ပြလိုက်သည်နှင့် စိမ်းရောင်စွမ်းအင်များ ဝင်းခနဲ လက်သွားပြီး ယင်နှင့်ယန် အရောင်များ စီးဆင်းလာသည်။ သူ၏ စိတ်ထဲရှိ ဆေးမီးဖိုကြီးအတွင်းမှ နက်နဲလှသော ဝါဝင်းသည့် စွမ်းအင်အနည်းငယ်သည်လည်း သူ၏ လက်ထိပ်များဆီသို့ စုစည်းရောက်ရှိလာသည်။

"ငါ့အမိန့်အရ... ဝိညာဉ်သက်ဝင်စေ!"

မဟိတ်ဟန်ပါသော အမိန့်သံတစ်ခု ထွက်ပေါ်လာသည်။

"ဝုန်း..."

ဓားကိုယ်ထည်ပေါ်ရှိ သံချေးများမှာ ချက်ချင်းပင် ခါထွက်သွားပြီး သုံးပေခွဲခန့် ရှည်လျားသော ဓားမှာ စားပွဲပေါ်မှ နှစ်လက်မခန့် အလိုတွင် ပျံတက်သွားသည်။ ဓားကိုယ်ထည်မှ ခပ်တိုးတိုး အသံတစ်ခု ထွက်ပေါ်လာပြီး အေးမြသော အလင်းတန်းများ အဆက်မပြတ် စီးဆင်းနေသည်။

မြစိမ်းနွယ်ဓားမှ မွေးဖွားလာသော ဝိညာဉ်မှာ ဓားဝိညာဉ်အဖြစ် တိုက်ရိုက် ပြောင်းလဲသွားသည်။ ၎င်းသည် 'နတ်ဓား' တစ်စင်းဟု အခေါ်ခံရရန် အမှန်တကယ် ထိုက်တန်လှပေသည်။ ကျိယွမ်သည် လက်ရှိတွင် အနည်းငယ် မူးဝေနေသော်လည်း သူ၏မျက်နှာထက်မှ အံ့အားသင့်မှုကိုမူ ဖုံးကွယ်မထားနိုင်ပေ။

ဒဏ္ဍာရီလာ အစစ်အမှန်များနှင့် နှိုင်းယှဉ်လျှင် အလှမ်းဝေးနေဦးမည် ဖြစ်သော်လည်း၊ သူကိုယ်တိုင် အရာဝတ္ထုများကို အသက်သွင်းနိုင်သည့် အဆင့်သို့ ရောက်ရှိသွားသကဲ့သို့ ကျိယွမ် ခံစားနေရသည်။

"တောက်... တောက်..." ကျိယွမ် ငုံ့ကြည့်လိုက်သည့်အခါ စားပွဲပေါ်သို့ သွေးစက်အချို့ ကျနေသည်ကို တွေ့လိုက်ရသည်။ ထို့နောက် သူ၏မျက်လုံးနှင့် နှာခေါင်းတစ်ဝိုက်တွင် အနည်းငယ် ယားယံလာသလို ခံစားလိုက်ရသည်။

ဘာဖြစ်တာလဲ။

ကျိယွမ်က သူ၏နှာခေါင်းနှင့် မျက်လုံးထောင့်များကို စမ်းကြည့်လိုက်ရာ အမှန်တကယ်ပင် သွေးထွက်နေသည်ကို တွေ့ရသည်။ ကံကောင်းထောက်မစွာဖြင့် သွေးအနည်းငယ်သာ ထွက်ခြင်းဖြစ်ပြီး ချက်ချင်းပင် ပြန်တိတ်သွားသည်။

'ဒီအမိန့်တော်တွေကို အလွယ်တကူ သုံးလို့မရဘူးပဲ၊ ဒါပေမဲ့ ဒီတစ်ခါတော့ တကယ့်ကို ထိုက်တန်ပါတယ်!'

ကျိယွမ်က လက်ကို ဝှေ့ယမ်းလိုက်ရာ သွေးစက်အချို့မှာ စားပွဲပေါ်ရှိ ဆီမီးခွက်ထဲသို့ တည့်တည့်ဝင်သွားသည်။ ထို့နောက် သူသည် ကစားစရာအသစ်ရသော ကလေးငယ်တစ်ဦးကဲ့သို့ မြစိမ်းနွယ်ဓားကို ပွတ်သပ်နေမိရာ ဓားမှာလည်း ဟိုဘက်ဒီဘက် ကခုန်နေပြီး တစ်ခါတစ်ရံ တုန်ခါနေတတ်သည်။ ဓား၏ အထက်ပိုင်းတွင် ယင်နှင့်ယန် ပုံရိပ်များရှိနေပြီး ၎င်းသည် ဝိညာဉ်စွမ်းအင်များကို သူ့အလိုလို ဆွဲဆောင်နေသည်။

သာမန်လူများ၏ အမြင်တွင်မူ တရားကျင့်ကြံသူ 'နတ်ဘုရား' များ အသုံးပြုသည့် မည်သည့်အရာမဆို 'နတ်လက်နက်' များသာ ဖြစ်သည်။ သို့သော် ကျိယွမ်ကဲ့သို့သော ကျွမ်းကျင်သူတစ်ပိုင်း၏ အမြင်တွင်မူ 'ထက်မြက်သော မဟာဗျူဟာများ' ထဲ၌ ဖော်ပြထားသည့်အတိုင်း 'နတ်' ဟူသော စကားလုံးကို အလွယ်တကူ မသုံးနှုန်းသင့်ပေ။ သို့သော်လည်း မြစိမ်းနွယ်ဓားမှာ သာမန်သံဖြင့် ပြုလုပ်ထားခြင်း ဖြစ်သော်လည်း ယခုအခါတွင်မူ ၎င်းကို နတ်ဓားတစ်စင်းဟု ခေါ်ဆိုရန် ကျိယွမ် ဝံ့ရဲနေပြီဖြစ်သည်။

"ဟေး... ဒီနေ့ညကတော့ တကယ့်ကို ကံကောင်းတဲ့ညပဲ!"

စိတ်လှုပ်ရှားမှုများ ကြွင်းကျန်နေဆဲဖြစ်သော်လည်း ကျိယွမ်သည် ကုတင်ပေါ်တွင် အိပ်ပျော်သွားခဲ့သည်။ ထိုအချိန်တစ်လျှောက်လုံးတွင် မြစိမ်းနွယ်ဓားသည် သံချေးများ မရှိတော့သည်မှအပ ယခင်ကအတိုင်းပင် စားပွဲပေါ်တွင် ငြိမ်သက်စွာ လဲလျောင်းနေခဲ့သည်။

. . .

ကြက်တွန်သံနှင့်အတူ နံနက်ခင်းသို့ ရောက်ရှိလာသည်။ ကျောက်ကျားရွာလေးမှာ အေးချမ်းသာယာနေပြီး မင်္ဂလာဦးဇနီးမောင်နှံတို့၏ ပျော်ရွှင်စရာ အငွေ့အသက်များမှာ လွှမ်းမိုးနေဆဲဖြစ်သည်။

ကျိယွမ်သည် ယနေ့တွင် အနည်းငယ် နောက်ကျမှ နိုးသည်။ သူ နိုးလာသည့်အခါ အပြင်ဘက်တွင် ရွာသားများ အလုပ်လုပ်နေကြသော အသံများကို ကြားနေရသည်။

တံခါးမှာ ကျွီခနဲ အသံနှင့်အတူ ပွင့်သွားပြီး ကျောက်တုန်းလျန်က သူ့ကို စောင့်နေသကဲ့သို့ အလောတကြီး နှုတ်ဆက်လာသည်။

"ဆရာကြီးကျိ! ကျွန်တော့်မိသားစုက ဆန်ပြုတ် ပြုတ်ထားပါတယ်၊ ပူပူလေး ရှိသေးတယ်ဗျ!"

"ကောင်းပါပြီ၊ ကျေးဇူးတင်ပါတယ်။ ညီအစ်ကိုကျောက်၊ လယ်ထဲကို အလုပ်သွားမကူဘူးလား။"

"ဟားဟား၊ ပေါင်းသင်ရာကနေ အခုတင် ပြန်ရောက်တာပါဗျာ။"

စကားပြောရင်းနှင့်ပင် ကျောက်တုန်းလျန်က ပန်းကန်လုံးကြီးတစ်လုံး ရှာဖွေကာ မီးဖိုချောင်ထဲသို့ဝင်၍ ကျိယွမ်အတွက် ဆန်ပြုတ်သွားခပ်ပေးသည်။ ဆန်ပြုတ်ပေါ်တွင် အချဉ်တစ်ချို့ တင်ပေးကာ ကျိယွမ်ထံသို့ ယူဆောင်လာခဲ့သည်။

ကျိယွမ်သည် မဆိုင်းမတွပင် စားသောက်လိုက်သည်။ သူ အနည်းငယ် နောက်ကျမှ နိုးသော်လည်း ရာသီဥတုမှာ ပူနွေးလာပြီဖြစ်ရာ ဆန်ပြုတ်မှာ အငွေ့တထောင်းထောင်း ထနေသော်လည်း အလွန်မပူဘဲ စား၍ အကောင်းဆုံး အနေအထားတွင် ရှိနေသည်။

ခေတ္တအကြာတွင် ကျိယွမ်သည် ဆန်ပြုတ်သောက်နေစဉ် ကျောက်တုန်းလျန်က သူ့ကို စိုက်ကြည့်နေသည်မှာ အနည်းငယ် နေရခက်စရာ ဖြစ်လာသည်။ သူက ထိုင်ခုံပုလေးပေါ်တွင် ထိုင်နေပြီး ကျောက်တုန်းလျန်မှာမူ မြေပြင်ပေါ်တွင် ဆောင့်ကြောင့်ထိုင်နေခြင်း ဖြစ်သည်။

"ညီအစ်ကိုကျောက်၊ ကျောက်ကျားရွာက မြေစောင့်နတ်အကြောင်း တစ်ခုခု သိသလား။"

ကျောက်တုန်းလျန်၏ မျက်လုံးများ ဝင်းလက်သွားသည်။ နောက်ဆုံးတော့ သူသည် ဆရာကြီးကျိနှင့် ရင်းနှီးခွင့်ရမည့် စကားဝိုင်းတစ်ခုကို ရရှိသွားပြီဖြစ်သည်။

"ဟုတ်ကဲ့၊ ကျွန်တော် အနည်းအကျဉ်းတော့ သိပါတယ်ဗျ။ ကျွန်တော် ငယ်ငယ်တုန်းက ရွာထဲက လူကြီးတွေ ပြောပြတာ ကြားဖူးတာကတော့ ကျွန်တော်တို့ ကျောက်ကျားရွာရဲ့ မြေစောင့်နတ်မှာ အမည်နာမ ရှိတယ်တဲ့။ နာမည်ကိုတော့ ကျွန်တော် မပြောဝံ့ပါဘူး၊ ဒါပေမဲ့ သူက ကျွန်တော်တို့ရွာရဲ့ ဘိုးဘေးတစ်ယောက် ဖြစ်ပါတယ်။ အဲဒီတုန်းက ဒီဘိုးဘေးဟာ သက်တော် အတိအကျ ၁၀၀ အထိ နေသွားခဲ့တာပါ။ သူက ခရိုင်အတွင်းမှာ နာမည်ကျော်တဲ့ သက်တော်ရှည်ကြီး ဖြစ်တဲ့အတွက် ခရိုင်ဝန်ကိုယ်တိုင်တောင် လာတွေ့ခဲ့ရတယ်ဗျ။ ရွာထဲက ဘိုးဘေးနတ်စင်မှာ ကမ္ပည်းစာချပ်တစ်ခု ရှိပါသေးတယ်။ အဲဒီနောက်မှာတော့ အဲဒီခေတ်က ဘိုးဘေးတွေက သူ့ကို ဂါရဝပြုချင်ကြတဲ့အတွက် မြေစောင့်နတ်အဖြစ် ကိုးကွယ်ခဲ့ကြတာပါ။"

"အော်... ဒါကြောင့်ကိုး!"

၎င်းမှာ စိတ်လှုပ်ရှားစရာ ဇာတ်လမ်းတစ်ခု မဟုတ်သော်လည်း ဖြစ်သင့်ဖြစ်ထိုက်သော အကြောင်းရင်းတစ်ခုပင်။

မြေစောင့်နတ်စင်လေးနှင့် မလှမ်းမကမ်းတွင် ရှိနေသော်လည်း ကျိယွမ်က ထိုအကြောင်းကို ပြောရန် ဝန်မလေးပေ။ အဘယ်ကြောင့်ဆိုသော် သူသည် မည်သူ့ကိုမျှ မကောင်းပြောနေခြင်း မဟုတ်သောကြောင့် ဖြစ်သည်။

ကျောက်တုန်းလျန်နှင့် ခေတ္တမျှ စကားစမြည်ပြောရင်း ကျိယွမ်သည် ကျောက်တုန်းလျန်၏ ပြင်ပကမ္ဘာအပေါ် သိလိုစိတ်များကို တတ်နိုင်သမျှ ဖြေကြားပေးခဲ့သည်။ ကျောက်တုန်းလျန်ကဲ့သို့သော ကျေးလက်ရွာသားတစ်ဦးအတွက် ဘာမှ ထူးထူးခြားခြား မဖြစ်ခဲ့လျှင် သူသည် ကျောက်ကျားရွာတွင်ပင် အိမ်ထောင်ပြု၊ သားသမီးမွေးကာ တစ်သက်လုံး အေးအေးချမ်းချမ်း နေသွားမည်မှာ အမှန်ပင်။ အမှန်အတိုင်းဆိုလျှင် ထိုသို့နေထိုင်ခြင်းကလည်း မဆိုးလှပေ။

ဆန်ပြုတ်သောက်ပြီး ခေတ္တနားပြီးနောက် ကျိယွမ်သည် ကျောက်မိသားစုကို နှုတ်ဆက်သည်။ ကျောက်တုန်းလျန်က ကျိယွမ်၏ ထီးနှင့် အထုပ်အပိုးများကို ရွာထိပ်အထိ သယ်ပေးရန် စေတနာဖြင့် ကူညီပေးသည်။ ထိုအခါမှသာ ဆရာကြီးကျိ အလွယ်တကူ သယ်လာသော သေတ္တာမှာ အမှန်တကယ်တွင်မူ အလွန်လေးလံကြောင်း သူ သတိထားမိတော့သည်။

လမ်းခွဲခါနီးတွင် ကျိယွမ်သည် ကျောက်တုန်းလျန်ကို တစ်ခုခု လက်ဆောင်ပေးချင်သော်လည်း ပေးစရာ သင့်တော်သည့်အရာ မရှိပေ။ ပိုက်ဆံပေးခြင်းမှာလည်း အောက်တန်းကျလွန်းလှပြီး အနည်းအများမှာလည်း ပြောရခက်လှသည်။ ကိုယ်ခံပညာ လျှို့ဝှက်ကျမ်းများ ပေးခြင်းမှာလည်း မသင့်တော်သည့်အပြင် ဘေးဒုက္ခပင် သယ်ဆောင်လာနိုင်သေးသည်။

အဆုံးတွင် သူသည် နှုတ်ဆက်ပြီးနောက် ခပ်လှမ်းလှမ်းတွင် ရပ်ကာ ရွာထိပ်ရှိ နတ်စင်ငယ်လေးဆီသို့ ဦးညွှတ်လိုက်သည်။

"ဒီလူတွေကို စောင့်ရှောက်ပေးဖို့ ကျွန်တော် နှောင့်ယှက်ပါရစေဦး၊ မြေစောင့်နတ်မင်း!"

ကျောက်တုန်းလျန်သည် ရွာထိပ်တွင်ရပ်ကာ ကျိယွမ် ထွက်ခွာသွားသည်ကို ကြည့်နေစဉ်၊ ကျိယွမ်က ရုတ်တရက် လှည့်ကြည့်ကာ တစ်စုံတစ်ခုကို ရေရွတ်ရင်း ဦးညွှတ်လိုက်သည်ကို မြင်လိုက်ရသည်။ ကျောက်တုန်းလျန်က ထိုဦးညွှတ်မှုမှာ သူ့ကိုဟု ထင်မှတ်ကာ အလျင်အမြန်ပင် ပြန်လည် ဦးညွှတ်လိုက်သည်။

သို့သော် ကျိယွမ် ကြည့်နေသည့် လားရာမှာ မဟုတ်သကဲ့သို့ ခံစားရသဖြင့် ခေါင်းလှည့်ကြည့်လိုက်ရာ မြေစောင့်နတ်စင်ရှိရာဘက်မှ အဘိုးအိုတစ်ဦးက သူ့ကို ပြုံးလျက် ကြည့်နေသည်ကို မြင်လိုက်ရသည်။ သူ မျက်လုံးများကို ပွတ်သပ်ကာ ပြန်ကြည့်လိုက်သည့်အခါ နတ်စင်မှာ ရှိနေဆဲဖြစ်သော်လည်း ထိုလူမှာမူ ပျောက်ကွယ်သွားပြီ ဖြစ်သည်။

"အမလေး... နေ့ခင်းကြောင်တောင်ကြီး..."

ကျောက်တုန်းလျန်သည် ကျောချမ်းသွားကာ အိမ်သို့ အပြေးပြန်သွားတော့သည်။