အခန်း ၆၈ - မိစ္ဆာကျမ်းစာအုပ်

နာလာသည် သူမ၏ နိုက်ဓားကို ကျစ်ကျစ်ပါအောင် ဆုပ်ကိုင်ထားပြီး ရှေ့မှ အလောင်းကောင်ကို သတိကြီးစွာဖြင့် စောင့်ကြည့်နေသည်။

ရုတ်တရက်ဆိုသလို ထိုလမ်းလျှောက်နေသော အလောင်းကောင်သည် သူမထံသို့ ပြေးဝင်လာတော့သည်။ သူမသည် သူမ၏ နိုက်ဓားကို တိကျစွာဖြင့် ရှေ့သို့ ထိုးသွင်းလိုက်ရာ ဓားသွားမှာ အလောင်းကောင်၏ နှလုံးသားကို ဖောက်ဝင်သွားသည်။ သို့သော် ထိုအရာမှာ ပုံမှန်အတိုင်း ဆက်လက် လှုပ်ရှားနေဆဲ ဖြစ်ပြီး နာလာကို အောက်သို့ ဆွဲလှဲရန် ၎င်း၏ လက်သည်းများဖြင့် ကုတ်ခြစ်ရန် ကြိုးပမ်းနေသည်။ နာလာသည် မျက်မှောင်ကြုတ်လိုက်ပြီး သူမ၏ ဓားကို တစ်ချက် ထပ်မံ ဝှေ့ယမ်းလိုက်ရာ ထိုမိစ္ဆာ၏ ခေါင်းမှာ ပြတ်ကျသွားတော့သည်။

"သူတို့ကို ထာဝရ အိပ်စက်ခွင့် ပေးနိုင်ဖို့ဆိုရင် သူတို့ရဲ့ ခေါင်းကို ဖြတ်ပစ်မှပဲ ရမှာပေါ့" ထိုသို့ တွေးတောရင်း နာလာသည် မြေပြင်ပေါ်တွင် လဲကျနေသော သားကောင်ဖြစ်သူထံသို့ အပြန်အမြန် ပြေးသွားခဲ့သည်။

ထိုလူ၏ လည်ပင်းမှာ ဆုတ်ဖြဲခံထားရပြီး သွေးများမှာလည်း မရပ်မနား စီးကျနေသဖြင့် မည်သို့မျှ ကယ်တင်၍ မရနိုင်တော့သည်မှာ ထင်ရှားလှသည်။ သူ၏ မျက်လုံးများသည် ကောင်းကင်သို့ မော့ကြည့်နေပြီး အထက်မှ တစ်စုံတစ်ရာကို အပြစ်တင်နေသကဲ့သို့ပင်။

နာလာသည် သူမ၏ နိုက်ဓားကို ချထားလိုက်ပြီး ထိုလူ၏ လက်များကို ကိုင်ကာ သူ၏ ဝိညာဉ် ကောင်းကင်ဘုံသို့ ရောက်ရှိပြီး ထာဝရ ငြိမ်းချမ်းမှု ရရှိပါစေကြောင်း ဆုတောင်းပေးလိုက်သည်။

မီးတုတ်များ ကိုင်ဆောင်ထားသော မြင်းစီးစစ်သည်များမှာလည်း သူမ၏ နောက်သို့ အလျင်အမြန် ရောက်ရှိလာကြသည်။

"မင်းသမီး၊ ဘာများ အမိန့်ပေးမလို့လဲ" မြေပြင်ပေါ်တွင် ပုပ်သိုးနေသော အလောင်းကောင်ကို ကြည့်ပြီး ဇဝေဇဝါ ဖြစ်နေကြသော်လည်း စစ်သည်အားလုံးမှာ သူတို့၏ လက်နက်များကို အသင့် ဆွဲထုတ်ထားကြသည်။

"သေပြီးသား လူတွေက ပြန်ပြီး ရှင်သန်လာပုံရတယ်" နာလာသည် မတ်တတ်ရပ်လိုက်ပြီး အသက်လက္ခဏာ ကင်းမဲ့နေသော်လည်း သူမ၏ ခြေရင်းတွင် ပြန်လည် တွားသွားရန် ကြိုးစားနေသော အလောင်းကောင်ကို ငုံ့ကြည့်ကာ သူမ၏ ဓားကို ပြန်လည် ကောက်ယူလိုက်သည်။

"ဘုရားသခင်... အဲ့ဒါ ဘာကြီးလဲ" လည်ပင်း တစ်ခုလုံး ပျက်စီးနေသော်လည်း အသက်ရှင်နေဆဲ ဖြစ်သည့် လူတစ်ဦးကို တစ်ခါမျှ မမြင်ဖူးကြသဖြင့် စစ်သည်များသည် တုန်တုန်ရင်ရင် ဖြစ်နေသော အလောင်းကောင်ကို ကြည့်ကာ ထိတ်လန့်တကြားဖြင့် ဓားများကို အသင့်ပြင်လိုက်ကြသည်။ နာလာ၏ စကားများကြောင့် သူတို့အားလုံးမှာ ကြောက်ရွံ့မှုများဖြင့် ပြည့်နှက်သွားရသည်။

"စိတ်အေးအေး ထားကြစမ်း" နာလာသည် သူမ၏ ဓားကို ဝှေ့ယမ်းပြီး အသစ်တဖန် ပြန်လည် ရှင်သန်လာသော အလောင်းကောင်၏ ခေါင်းကို ဖြတ်ပစ်လိုက်သည်။ ထို့နောက် စစ်သည်များဘက်သို့ လှည့်ကာ "ဒီလူသေတွေကို ပြန်ပြီး ရှင်သန်လာအောင် လုပ်နေတဲ့ ယုတ်မာတဲ့ အင်အားတစ်ခု ရှိနေတယ်၊ အကိုက်ခံရတဲ့ လူတွေကလည်း ဒီလို မိစ္ဆာတွေ ဖြစ်သွားလိမ့်မယ်"

"လူနှစ်ယောက် စခန်းကို ပြန်ပြီး သတင်းပို့ပါ၊ ပြီးတော့ စစ်ကူတွေ လွှတ်ပေးဖို့ ပြောလိုက်။ ကျန်တဲ့လူတွေအတွက် တာဝန် တစ်ခုပဲ ရှိတယ်" ရွာတစ်ရွာလုံးမှ ကြောက်လန့်တကြား အော်ဟစ်သံများကို နာလာ ကြားနေရဆဲပင်။ "ဒီမိစ္ဆာတွေရဲ့ ခေါင်းကို ဖြတ်ပြီး သူတို့ကို ထာဝရ အိပ်စက်ခွင့် ပေးရမယ်၊ နားလည်လား"

"နား... နားလည်ပါပြီ" စစ်သည်များသည် ခဏမျှ တွန့်ဆုတ်သွားသော်လည်း ကျယ်လောင်စွာ ပြန်လည် ဖြေကြားခဲ့ကြသည်။

အမိန့်ပေးပြီးနောက် နာလာသည် အော်ဟစ်သံများ ထွက်ပေါ်လာရာသို့ အမြန် ပြေးသွားတော့သည်။ မင်းသမီးမှာ မည်သို့မျှ တွန့်ဆုတ်နေခြင်း မရှိဘဲ လှုပ်ရှားနေသည်ကို မြင်ရသောအခါ စစ်သည်များမှာလည်း သူတို့၏ ခန္ဓာကိုယ်ထဲတွင် ခွန်အားများ စီးဆင်းလာသကဲ့သို့ ခံစားလိုက်ရသည်။ မင်းသမီးမှာ ၁၇ နှစ်အရွယ် မိန်းကလေးငယ်တစ်ဦးသာ ဖြစ်သော်လည်း မတွန့်မဆုတ် တိုက်ခိုက်နေပါက သူတို့မှာ ငြင်းဆန်ရန် မည်သည့် အကြောင်းပြချက် ရှိပါမည်နည်း။

"ရွာသူရွာသားတို့၊ မထိတ်လန့်ကြပါနဲ့။ ကိုယ့်အိမ်ထဲမှာပဲ နေကြပါ။ အကယ်၍ လှုပ်ရှားနေတဲ့ လူသေတွေကို တွေ့ရင် တောင်ဘက်က စစ်စခန်းဆီကို ပြေးခဲ့ကြပါ" နာလာက ကျယ်လောင်စွာ အော်ပြောလိုက်သည်မှာ "ကျွန်မတို့ဟာ ဘုရင့်နိုင်ငံတော်ရဲ့ စစ်သည်တော်တွေပါ၊ သင်တို့ရဲ့ ဘေးကင်းလုံခြုံရေးကို ကျွန်မတို့ တာဝန်ယူပါတယ်"

လမ်းလျှောက်နေသော အလောင်းကောင် အမြောက်အမြားမှာ နာလာတို့ အဖွဲ့ရှိရာသို့ လှည့်၍ ပြေးဝင်လာကြသည်။ နာလာ၏ စိတ်ထဲတွင် ကြောက်ရွံ့မှု အစအနမျှ မရှိဘဲ သူမ၏ ဓားသွားမှာလည်း မည်သို့မျှ တွန့်ဆုတ်ခြင်း မရှိပေ။ သူမသည် မှန်ကန်သည်ဟု ဆုံးဖြတ်ပြီးပါက မည်သည့်အခါမျှ နောက်တွန့်ခြင်း မရှိသည့် လူစားမျိုး ဖြစ်သည်။

မိခင်ဖြစ်သူကို စိတ်ချမ်းသာစေရန်အတွက် သူမသည် 'ကယ်တင်ခြင်း သူတော်စင်မ' အဖြစ် ရှေ့သို့ တက်လှမ်းရန် ဆုံးဖြတ်ခဲ့ သကဲ့သို့ပင် ဖြစ်သည်။

ရုပ်ဆိုးလှသော အလောင်းကောင်များသည် နာလာ၏ လက်ချက်ဖြင့် တစ်ခုပြီးတစ်ခု လဲကျသွားကာ ငြိမ်းချမ်းစွာ အိပ်စက်ခွင့် ရသွားကြသည်။ ထို့အပြင် သတင်းပို့ချက် ရောက်ရှိသွားသောအခါ အခြေအနေကို ထိန်းချုပ်ထားနိုင်ပြီ ဖြစ်သော ရိုင်းစ်သည်လည်း လမ်းလျှောက် အလောင်းကောင်များကို ရှင်းလင်းရန် နာလာထံသို့ စစ်သည် အမြောက်အမြားကို စေလွှတ်ခဲ့သည်။

ခေတ္တမျှ ရုတ်ရုတ်သဲသဲ ဖြစ်သွားပြီးနောက် အခြေအနေမှာ ပြန်လည် တည်ငြိမ်သွားခဲ့သည်။ အကိုက်ခံရသော ရွာသားအချို့မှာ ရုတ်တရက် ရူးသွပ်သွားပြီး ပြဿနာ အနည်းငယ် ဖြစ်ခဲ့သော်လည်း အဆုံးတွင်မူ သူတို့သည် လက်နက်မဲ့ အလောင်းကောင်များသာ ဖြစ်ကြသည်။ လက်နက်အပြည့်အစုံနှင့် သံချပ်ကာ ဝတ်ဆင်ထားသော စစ်သည်များသည် လူသေများနှင့် တိုက်ခိုက်နေရသည်ဟူသော အချက်ကို လက်ခံနိုင်သွားသည်နှင့် တပြိုင်နက် ထိုမိစ္ဆာများကို လွယ်ကူစွာ အနိုင်ရရှိခဲ့ကြသည်။

"မင်းသမီး၊ ဘာတွေ ဖြစ်ပျက်ခဲ့သလဲဆိုတာ ရွာသားတွေကို မေးမြန်းခဲ့ပါတယ်" ဓားကို ကိုင်ဆောင်ကာ မီးပုံဘေးတွင် မတ်တတ်ရပ်နေသော နာလာထံသို့ ရိုင်းစ် လျှောက်လှမ်းလာပြီး လေးနက်သော အသံဖြင့် ပြောလိုက်သည်မှာ "ဒီအလောင်းတွေ အားလုံးဟာ ရွာသားတွေပဲ ဖြစ်ပါတယ်။ ဒါပေမဲ့ သူတို့အားလုံးဟာ ရွာရဲ့ သုသာန်မှာ မြှုပ်နှံထားပြီးသား လူတွေပါ"

"ဒါဆို လူအချို့နဲ့အတူ ကျွန်မနဲ့ သုသာန်ကို လိုက်ခဲ့ပါ၊ အဲ့ဒီက အခြေအနေကို သွားပြီး စစ်ဆေးရအောင်" ဟု နာလာက ဆိုသည်။ လူသေများ၏ ရုပ်အလောင်းများကို စော်ကားခြင်းမှာ မည်သည့်နေရာတွင်မဆို ယုတ်မာသော လုပ်ရပ်ဖြစ်ပြီး ဤအရာမှာ ရိုယပ်စ်၏ အကြံအစည် မဟုတ်ဟု ပြောရန် ခက်ခဲလှသည်။

ထိုလှုပ်ရှားနေသော အလောင်းကောင်များ၏ ကူးစက်နိုင်စွမ်းနှင့်ဆိုလျှင် အကယ်၍ ၎င်းတို့သည် အင်တာကမ်၏ ရိက္ခာလမ်းကြောင်းများသို့ ပြန့်နှံ့သွားပါက ရှေ့တန်း စစ်မျက်နှာမှာ ချက်ချင်းပင် ပြိုလဲသွားမည်ဖြစ်ပြီး သူတို့အနေဖြင့် ရှေ့တန်းသို့ သွားရန် အကြောင်းပြချက် ရှိတော့မည် မဟုတ်ပေ။

မှန်ပါသည်၊ ဤအရာမှာ ရိုယပ်စ်၏ အကြံအစည် ဖြစ်ရမည်ဟု လုံးဝ အာမမခံနိုင်ပေ။ အဘယ်ကြောင့်ဆိုသော် လက်ရှိ ရိုယပ်စ်၏ အင်အားမှာ ဤကဲ့သို့သော နည်းလမ်းများကို အသုံးမပြုဘဲနှင့်ပင် အင်တာကမ်ကို အနိုင်တိုက်နိုင်စွမ်း ရှိသောကြောင့် ဖြစ်သည်။

ဤကိစ္စမှာ နှောင့်နှေး၍ မရသောကြောင့် သူတို့အဖွဲ့သည် သုသာန်သို့ အမြန်ဆုံး သွားရောက်ခဲ့ကြရာ မြေမြှုပ်ထားသော အလောင်းများ ထွက်ခွာသွားသောကြောင့် ဂူဗိမာန်များ၏ နောက်ကွယ်တွင် လွတ်နေသော မြေကွက်လပ်များကိုသာ တွေ့ရှိခဲ့ရသည်။ နာလာသည် [အသက်ရှူခြင်းအတတ်] ကို အသုံးပြု၍ ပတ်ဝန်းကျင်ကို စဉ်ဆက်မပြတ် စစ်ဆေးခဲ့သော်လည်း ထူးခြားသော အချက်ကိုမူ မတွေ့ရှိခဲ့ပေ။

ရိုင်းစ်သည် ဓားကို ကိုင်စွဲကာ ပတ်ဝန်းကျင်ကို သတိထား စောင့်ကြည့်ရင်း ရှေ့သို့ တိုးသွားစဉ် ရုတ်တရက် ချုံပုတ်တစ်ခု နောက်ကွယ်မှ လမ်းလျှောက် အလောင်းကောင်တစ်ဦး ခုန်ထွက်လာပြီး ရိုင်းစ်ကို တိုက်ခိုက်တော့သည်။

ရိုင်းစ်သည် တိုက်ခိုက်ရေးသမား တစ်ဦးမဟုတ်သော်လည်း သူ၏ တုံ့ပြန်မှုမှာမူ နှေးကွေးခြင်း မရှိပေ။ ဤအရာမှာ သူ ယခုအချိန်အထိ ကြုံတွေ့ခဲ့ရသော 'မတော်တဆမှု' အမျိုးမျိုးမှ ရရှိခဲ့သော လေ့ကျင့်မှုများ၏ ရလဒ်ပင် ဖြစ်သည်။ ခြုံခိုတိုက်ခိုက်မှုကို သတိပြုမိသည်နှင့် တပြိုင်နက် သူသည် နောက်သို့ ခုန်ဆုတ်လိုက်ပြီး သူ၏ နိုက်ဓားကို ရှေ့သို့ ထိုးသွင်းလိုက်သည်။

သူ့ထံသို့ ပြေးဝင်လာသော လမ်းလျှောက် အလောင်းကောင်၏ ခေါင်းကို ဓားဖြင့် တိကျစွာ ထိုးစိုက်လိုက်သည်။ အလောင်းကောင်၏ သွေးများ ဖိတ်စင်သွားသောအခါ ထိုလူ၏ မျက်နှာကို ရိုင်းစ် မြင်လိုက်ရသည်။ ထိုလူမှာ ရိုးရှင်းသော မျက်နှာရှိသော်လည်း သေဆုံးသွားချိန်တွင်ပင် ကျေနပ်နေသော အပြုံးတစ်ခုကို ဆောင်ထားသည်။ သစ်ကိုင်းခြောက်ကဲ့သို့ ခြောက်ကပ်နေသော သူ၏ ညာလက်သည် လက်ဝါးခန့်သာရှိသော စာအုပ်ငယ်လေး တစ်အုပ်ကို ကျစ်ကျစ်ပါအောင် ဆုပ်ကိုင်ထားသည်။

"သွေးအနီရောင်လား... ဒီလူက အခုလေးတင် သေတာလား" ဟူသော အတွေးမှာ ရိုင်းစ်၏ စိတ်ထဲတွင် လျှပ်ခနဲ ပေါ်လာပြီး သူ၏ ဓားကို ပြန်ဆွဲလိုက်သောအခါ အလောင်းကောင်မှာ လုံးဝ ငြိမ်သက်သွားပြီး မြေပြင်ပေါ်သို့ လဲကျသွားတော့သည်။ ထိုစာအုပ်မှာလည်း သူ၏ လက်ထဲမှ လွတ်ကျသွားပြီး ရိုင်းစ်၏ ရှေ့တည့်တည့်သို့ ကျရောက်သွားခဲ့သည်။

ထိုစာအုပ်ကို မြင်လိုက်ရသည်နှင့် တပြိုင်နက် ရိုင်းစ်၏ စိတ်ထဲတွင် တစ်ခုခု ပြောင်းလဲသွားပြီး ၎င်းကို ဖုံးကွယ်ရန်အတွက် မရည်ရွယ်ဘဲ ရှေ့သို့ တစ်လှမ်း တိုးသွားမိသည်။

ဆူညံသံကို ကြားသောကြောင့် နာလာနှင့် အခြားသူများမှာ သူ့ထံသို့ အမြန် ပြေးလာကြသည်။ မြေပြင်ပေါ်ရှိ အလောင်းကောင်ကို မြင်သောအခါ သူတို့က ရိုင်းစ်အား စိတ်ပူစွာဖြင့် "ခင်ဗျား အဆင်ပြေရဲ့လား" ဟု မေးမြန်းကြသည်။

"ကျွန်တော် အဆင်ပြေပါတယ်" ဟု ရိုင်းစ်က ခါးသက်သက် ပြုံးရင်း ပြန်ဖြေလိုက်သည်။ အကြောင်းပြချက် မရှိဘဲ သူသည် မြေပြင်ပေါ်ရှိ စာအုပ်ကို ထုတ်မပြရန် ဆုံးဖြတ်လိုက်ပြီး အခြားသူများ မသိအောင် ဟန်ဆောင်ကာ စာအုပ်ကို တိတ်တဆိတ် ကောက်ယူ သိမ်းဆည်းလိုက်သည်။

ရိုင်းစ်သည် ထိုစာအုပ်ထဲရှိ အကြောင်းအရာများကို အမြန် တစ်ချက် ကြည့်လိုက်ရုံဖြင့် ဤလမ်းလျှောက် အလောင်းကောင် ဖြစ်စဉ်၏ နောက်ကွယ်မှ အကြောင်းရင်းမှာ ဤစာအုပ်ပင် ဖြစ်ကြောင်း နားလည်သွားခဲ့သည်။ စာအုပ်တွင် စုစုပေါင်း ၉ မျက်နှာ ပါရှိပြီး မျက်နှာတစ်ခုချင်းစီတွင် မိစ္ဆာတစ်ကောင်ကို ဖန်တီးနည်း အသေးစိတ်ကို ဖော်ပြထားသည်။ ဥပမာအားဖြင့် ပထမစာမျက်နှာတွင် ဆေးဝါးအချို့နှင့် ခွဲစိတ် ပြုပြင်မှုများမှတစ်ဆင့် မိစ္ဆာတစ်ကောင် ဖန်တီးနည်းကို ပြသထားသည်။

ထိုမိစ္ဆာ တစ်ကောင်ချင်းစီတွင် ကိုယ်ပိုင် ပုံဖော်ချက်များ ပါရှိပြီး ရိုးရှင်းသော မျဉ်းနက်များဖြင့် ရေးဆွဲထားသော်လည်း စာအုပ်ထဲမှ ထွက်လာပြီး လက်တွေ့ဘဝတွင် အချိန်မရွေး ပေါ်ပေါက်လာနိုင်သကဲ့သို့ အသက်ဝင်လှသည်။

ပဉ္စမမြောက် စာမျက်နှာတွင်မူ သူတို့ ယခုလေးတင် တိုက်ခိုက်ခဲ့သော လမ်းလျှောက် အလောင်းကောင်များအကြောင်းကို ဖော်ပြထားသော်လည်း ထိုစာမျက်နှာတွင် ပုံတစ်ပုံမျှ မပါရှိပေ။ ရိုင်းစ်သည် အေးစက်သော မျက်နှာထားဖြင့် ထိုစာအုပ်ကို သေချာစွာ သိမ်းဆည်းလိုက်သည်။

ဤစာအုပ်ထဲတွင် သူတို့၏ စစ်ရေး ကြိုးပမ်းမှုများအတွက် များစွာ အကျိုးရှိစေမည့် မိစ္ဆာအမျိုးအစား တစ်မျိုး ပါဝင်သည်။ သို့သော် နာလာသည် စစ်ပွဲကို အနိုင်ရရန်အတွက် ဤနည်းလမ်းကို မည်သည့်အခါမျှ အသုံးပြုမည် မဟုတ်ကြောင်း မည်သူမဆို စဉ်းစားရုံဖြင့် သိနိုင်သည်။ အခြားတစ်ဖက်တွင်မူ ရိုင်းစ်သည် အလင်းရောင်ကို လိုလား တောင့်တသူ ဖြစ်သော်လည်း သူ၏ ရည်မှန်းချက် အောင်မြင်ရန်အတွက် မကောင်းသော နည်းလမ်းအချို့ကို အသုံးပြုရန် တွန့်ဆုတ်မည့်သူ မဟုတ်ပေ။

ရှာဖွေမှုမှ မည်သည့် ရလဒ်မျှ မရရှိတော့သဖြင့် သူတို့အဖွဲ့သည် စခန်းသို့သာ ပြန်ခဲ့ကြတော့သည်။