အခန်း ၆၀ - ဂျက် ဟန်းစ်

"ဒါက ဘာကြီးလဲ" သူ့ရှေ့ရှိ အနက်ရောင်အရည်များကို မြင်လိုက်ရသောအခါ မိုင်ယာဆန်က မျက်မှောင်ကြုတ်လျက် မေးလိုက်သည်။

"ဝိညာဉ်လူသားတစ်ယောက် ဖြစ်လာဖို့ဆိုရင် ပထမဆုံး မင်းရဲ့ခန္ဓာကိုယ်ကို သေခြင်းမဲ့သတ္တဝါတစ်ကောင်ရဲ့ ဖွဲ့စည်းပုံမျိုးရရှိအောင် ပြုပြင်ပြောင်းလဲဖို့ လိုအပ်တယ်" နောဧက ရှင်းပြလိုက်သည်။ "ဒီပန်းကန်လုံးထဲမှာ မင်းကို သေလုမျောပါးအခြေအနေဆီ ရောက်သွားစေမယ့် ထူးခြားတဲ့ ပိုးမွှားတစ်မျိုး ပါဝင်တယ်၊ အဲဒီအခြေအနေက မင်းကို သေခြင်းမဲ့သတ္တဝါတစ်ကောင်အဖြစ် ပြုပြင်ပြောင်းလဲဖို့ ပိုမိုကောင်းမွန်စေလိမ့်မယ်။ စိတ်မပူပါနဲ့၊ ဒီအသွင်ပြောင်းလဲခြင်းက ခက်ခဲမှာမဟုတ်ပါဘူး"

"နားလည်ပါပြီ" မိုင်ယာဆန်တွင် ရွေးချယ်စရာမရှိပေ။ ပို၍တိကျစွာဆိုရလျှင် ဤသည်မှာ သူ၏ ယခင်ရွေးချယ်မှုမှ အစိတ်အပိုင်းတစ်ခုသာ ဖြစ်သည်။

ပန်းကန်လုံးထဲမှ အနက်ရောင်အရည်များကို မျိုချလိုက်သည်နှင့် တစ်ပြိုင်နက် သူ၏ လည်ချောင်းမှသည် အစာအိမ်အထိ လောင်ကျွမ်းသွားသည့်အလား ပူလောင်မှုကို ခံစားလိုက်ရပြီး သူ၏ အတွင်းကလီစာများ အရည်ပျော်ကျသွားသကဲ့သို့ အသက်ရှူရ ခက်ခဲလာခဲ့သည်။

ထို့နောက် နောဧသည် တောက်ပနေသော ရွှေရောင်ဓားမြှောင်တစ်လက်ကို ဆွဲထုတ်လိုက်ပြီး ရိုးသားသော မျက်နှာအမူအရာဖြင့် ပြောလိုက်သည်။ "ဒါက ရိုးရာဓားမြှောင်ပဲ။ သေလုမျောပါး ဖြစ်နေတဲ့လူတစ်ယောက်ရဲ့ နှလုံးသားကို ဒီဓားမြှောင်နဲ့ ထိုးစိုက်လိုက်တဲ့အခါ သေခြင်းမဲ့သတ္တဝါတစ်ကောင် ဖြစ်လာလိမ့်မယ်၊ သဘာဝကျကျပဲ တွဲဖက်ဆေးဝါးတွေ မပါဝင်ဘူးဆိုရင် ဒီဖြစ်စဉ်က အလွန်အမင်း ခံစားရခက်ခဲစေလိမ့်မယ်"

ရိုးရာဓားမြှောင်သည် သူ၏ နှလုံးသားအတွင်းသို့ ထိုးစိုက်ဝင်ရောက်သွားချိန်တွင် မိုင်ယာဆန်သည် တစ်ကမ္ဘာလုံး ပြောင်းလဲသွားသကဲ့သို့ ခံစားလိုက်ရသည်။ အကယ်၍ ယခင်က သူ့ပတ်ဝန်းကျင်ရှိ ကမ္ဘာကြီးသည် သက်ဝင်လှုပ်ရှားနေခဲ့လျှင် ယခုအခါ လုံးဝတိတ်ဆိတ်သွားခဲ့ပြီဖြစ်သည်။ ကမ္ဘာကြီးနှင့် သူ့အကြားတွင် တားဆီးထားသော အတားအဆီးတစ်ခု ရှိနေသကဲ့သို့ပင်။

"သေခြင်းမဲ့သတ္တဝါတွေဆိုတာ တကယ်တော့ အထူးနည်းစနစ်တစ်ခုကတစ်ဆင့် သူတို့ရဲ့ သေဆုံးလုဆဲဆဲ ဝိညာဉ်တွေကို ခန္ဓာကိုယ်နဲ့ ကွဲကွာလုနီးပါး အခြေအနေတစ်ခုမှာ အမြဲတမ်း ထိန်းသိမ်းထားခြင်းခံရတဲ့ လူတွေပဲ။ ဒီသေလုမျောပါးအခြေအနေမှာ ခန္ဓာကိုယ်ရဲ့ အရေးပါမှုက လျင်မြန်စွာ ကျဆင်းသွားတဲ့အတွက် လူ့ခန္ဓာကိုယ်ရဲ့ သာမန်သေစေနိုင်တဲ့ အားနည်းချက်တွေ ဖယ်ရှားခံလိုက်ရတယ်"

"ပြီးတော့ မင်းရဲ့ဝိညာဉ်ကို ခန္ဓာကိုယ်နဲ့ ချိတ်ဆက်ပေးထားတဲ့ တစ်ခုတည်းသော အရာကတော့ ဒီရိုးရာဓားမြှောင်ပေါ်မှာရှိတဲ့ ငါ့အရှင်သခင်ရဲ့ တည်ရှိမှုပဲ" နောဧသည် ရိုးရာဓားမြှောင်ကို ဂရုတစိုက် သိမ်းဆည်းလိုက်ပြီးနောက် မိုင်ယာဆန်အား ခရစ်၏ ဝိညာဉ်အပိုင်းအစကို ထည့်သွင်းပေးရန် ပြင်ဆင်လိုက်သည်။

သက်ရှိလူတစ်ဦး၏ ခန္ဓာကိုယ်သည် ဝိညာဉ်နှစ်ခုကို လက်ခံထားနိုင်စွမ်း မရှိပေ။ ထိုကဲ့သို့သော အခြေအနေမျိုးသည် ပုံမှန်အားဖြင့် ဝိညာဉ်နှစ်ခုကို အချင်းချင်း ညစ်ညမ်းစေရန်သာ ဖြစ်ပေါ်စေလိမ့်မည်။ လက်ခံသူ၏ ဝိညာဉ်သည် ကျူးကျော်ဝင်ရောက်လာသော ဝိညာဉ်အပိုင်းအစကြောင့် ညစ်ညမ်းသွားကာ ၎င်းတို့၏ ဝိညာဉ်မှာ ကြီးမားစွာ ပြောင်းလဲသွားနိုင်သည်၊ သို့မဟုတ်ပါကလည်း ဝိညာဉ်အပိုင်းအစသည် လက်ခံသူ၏ ဝိညာဉ်ကို လုံးဝ ဝါးမျိုသွားပြီး ၎င်းတို့၏ စစ်မှန်သော ဝိညာဉ်စွမ်းအင်ကို သိမ်းပိုက်သွားလိမ့်မည်။

သို့သော် သေခြင်းမဲ့သတ္တဝါတစ်ဦး ဖြစ်လာပြီးနောက် နေဂါရီ၏ ဝိညာဉ်သွေး တည်ရှိနေမှုကြောင့် ထိုဝိညာဉ်နှစ်ခုသည် အတူတကွ ငြိမ်းချမ်းစွာ ယှဉ်တွဲနေထိုင်နိုင်မည်ဖြစ်သည်။

"ဆိုးရွားတဲ့ ဝိညာဉ်အများစုဟာ စိတ်ကင်းမဲ့ပြီး ဆင်ခြင်တုံတရားမရှိကြဘူး။ ဒါကြောင့် သူတို့ရဲ့ ကိုယ်ပိုင်စွမ်းအားကန့်သတ်ချက်ကို အပြည့်အဝ အသုံးမချနိုင်ကြဘူး။ အဲဒီရည်ရွယ်ချက်အတွက် ဝိညာဉ်လူသားတွေကို ဖန်တီးခဲ့တာပဲ" ဟု နောဧက ရှင်းပြလိုက်သည်။ ထို့နောက် သူ၏ ကိုယ်ရောင်ကိုယ်ဝါမှာ ရုတ်တရက် ပြောင်းလဲသွားပြီး လူသားမဆန်သော မကောင်းသည့် အငွေ့အသက်များကို ထုတ်လွှတ်လိုက်သည်။ "ပြီးတော့ ဒီနေ့ကစပြီး မင်းဟာ ဝိညာဉ်လူသားတွေရဲ့ ခေါင်းဆောင်ပဲ"

"ဟုတ်ကဲ့ပါ အရှင်နေဂါရီ" မိုင်ယာဆန်သည် သူ၏ကိုယ်တွင်း၌ စီးဆင်းနေသော စွမ်းအားများကို ခံစားလိုက်ရပြီး နာခံမှုရှိစွာဖြင့် ဒူးထောက်ချလိုက်သည်။

"စောစောက အရှင်နောဧက ဝိညာဉ်လူသားအဖွဲ့မှာ ကျွန်တော်အပါအဝင် လေးယောက်ပဲ ရှိတယ်လို့ ပြောခဲ့တယ်။ ဒါဆိုရင် ကာဒစ် မိုရက်ဂ်နဲ့ ကော်နာ ကင်းဝေးတို့အပြင် ဝိညာဉ်လူသားအဖွဲ့ရဲ့ နောက်ဆုံးအဖွဲ့ဝင်က ဘယ်သူလဲ"

"ယုံကြည်အားထားလို့မရတဲ့ ကောင်တစ်ကောင်ပေါ့"

...

"လူသတ်သမား ဂျက် ဒီမှာရှိပါတယ် ပိုမိုသိရှိလိုပါက ဆက်သွယ်လိုက်ပါ" ရီယာတွင် အရုဏ်တက်ချိန်ရောက်လာသည်နှင့်အမျှ ဖော်ရွေသော မျက်နှာသွင်ပြင်ရှိသည့် အဖြူရောင် ခေါင်းစွပ်ဝတ်ရုံနှင့် အမျိုးသားတစ်ဦးသည် မြို့တွင်းသို့ လာရောက်လည်ပတ်ကြသော ကုန်သည်များအား လက်ကမ်းစာစောင်များကို စတင်ဝေငှနေပြီဖြစ်သည်။ အကယ်၍ သူ၏စကားများနှင့် သူ၏ လက်ကမ်းစာစောင်ပေါ်တွင် ရေးသားထားသောအရာများကိုသာ လျစ်လျူရှုထားမည်ဆိုလျှင် သူ့ကို ကျေးဇူးတော် ဘုရားကျောင်းမှ ဘုန်းတော်ကြီးတစ်ပါးဟု သင် အထင်မှားသွားပေလိမ့်မည်။

"အဖြူရောင် ဝတ်ရုံဝတ်ထားတာက ငါနဲ့ မလိုက်ဖက်ဘူးလို့ ဘာလို့များ ခံစားနေရတာလဲ။ ခါးပတ်တွေ၊ မျက်နှာဖုံးတွေနဲ့ အနက်ရောင်ဝတ်စုံ အပြည့်အစုံကို ဝတ်ဆင်သင့်တာလား။ ထားပါတော့လေ ဘယ်သူက ဂရုစိုက်မှာမို့လို့လဲ" ဂျက်သည် သံသယဝင်စွာဖြင့် သူ့ဘာသာ ရေရွတ်လိုက်ပြီးနောက် အစားအသောက်များ သယ်ဆောင်လာသော အဒေါ်ကြီးတစ်ဦးထံသို့ သူ၏ လက်ကမ်းစာစောင်ကို ကမ်းပေးလိုက်သည်။ "အစ်မကြီး.. လူသတ်သမား ဂျက်ပါ.. အသေးစိတ် သိချင်ရင် ဖတ်ကြည့်ပါဦး"

"ငါ စာမဖတ်တတ်ဘူး၊ ပြီးတော့ လူသတ်သမား ငှားဖို့လည်း မလိုဘူး" ဟု အဒေါ်ကြီးက ပြန်ဖြေလိုက်သည်။

"ဒါက အစ်မကြီး နားမလည်လို့ပါ" ဂျက်က သူမအား သူ၏ လက်ကမ်းစာစောင်ကို ယူရန် အတင်းအကြပ် တိုက်တွန်းလိုက်သည်။ "လုပ်ကြံသတ်ဖြတ်သူတစ်ယောက်ကို ငှားရမ်းဖို့ လိုအပ်ချက်က ယောက်ျား၊ မိန်းမ၊ အသက်ကြီး၊ အသက်ငယ် ခွဲခြားမနေဘူး။ တစ်နေ့နေ့မှာ အစ်မကြီးရဲ့ ကလေး အသက်ဆုံးရှုံးသွားနိုင်တယ်၊ အဲဒီအခါကျရင် ကျွန်တော့်ကို လိုအပ်လာလိမ့်မယ်"

"ကျွန်တော့်ကို ယုံပါ အစ်မကြီးရယ်၊ မိန်းမတစ်ယောက်အနေနဲ့ လုပ်ကြံသတ်ဖြတ်သူ တစ်ယောက် နှစ်ယောက်လောက်ကိုတော့ သိထားဖို့ လိုတယ်။ ကျွန်တော့်ရဲ့ အပေါင်းအသင်း ဂျက် ဟန်းစ်ကို မေးကြည့်လို့ရတယ်၊ သူက မိန်းမပေါင်းများစွာက သူ့ကိုသတ်ချင်နေလောက်အောင် သူ့နာမည်နဲ့ လိုက်ဖက်တဲ့ စွမ်းဆောင်ရည်တွေကို ပြီးမြောက်ခဲ့သူလေ" ဂျက်သည် လေးနက်သော မျက်နှာအမူအရာဖြင့် ပြောလိုက်သည်။ "အောက်ပိုင်းနဲ့ စဉ်းစားတတ်တဲ့ တိရစ္ဆာန်တွေဖြစ်တဲ့ ဟန်းစ်အကြောင်းကို အစ်မကြီး သိပါတယ်"

"အရူးကောင်.. ထွက်သွားစမ်း။ ငါ့အလုပ်ကို လာမရှုပ်နဲ့.. မဟုတ်ရင် လုံခြုံရေးတပ်ဖွဲ့တွေကို ခေါ်လိုက်မယ်" ဟု အဒေါ်ကြီးက သူ့အား ကျိန်ဆဲလိုက်သည်။

"ဟား.. ဒီရက်ပိုင်း စီးပွားရေးလုပ်ရတာ သိပ်ခက်ခဲတာပဲ" ဂျက်သည် သူ၏ လက်ကမ်းစာစောင်ကို ပြန်လည်ရုပ်သိမ်းလိုက်ပြီး လမ်းမကြီးတစ်လျှောက် ဆက်လက်ဝေငှနေခဲ့သည်။

အနည်းငယ် အနေရခက်ပုံရသော ညစ်ပတ်နေသည့် လူလတ်ပိုင်းအရွယ် အမျိုးသားတစ်ဦးသည် အချိန်အတော်ကြာ တုံ့ဆိုင်းနေပြီးနောက် ဂျက်ထံသို့ လျှောက်လာကာ ရိုသေလေးစားစွာ ပြောလိုက်သည်။ "သခင်ဂျက်.. သူဌေးက အရေးကြီးတဲ့ အစည်းအဝေးတစ်ခု ရှိတယ်ဆိုပြီး သခင့်ကို လာခေါ်ခိုင်းလိုက်လို့ပါ"

"အာ.. ဘီလေး.. မင်းသူဌေးကို ငါအခု အရေးကြီးတာလေး လုပ်စရာရှိတယ်လို့ ပြန်ပြောလိုက်။ ဘာအစည်းအဝေးကိုမှ ငါမသွားဘူး" ဂျက်သည် အလွယ်တကူပင် ပယ်ချလိုက်သည်။

"သခင်ဂျက်.. ကျွန်တော့်နာမည်က ဘရောင်းပါ၊ ဘီလေး မဟုတ်ပါဘူး" ညစ်ပတ်နေသော လူလတ်ပိုင်း အမျိုးသားက အားနည်းစွာ ငြင်းဆန်လိုက်သည်။ "ဒါပေမဲ့ ဒီအစည်းအဝေးက တကယ် အရေးကြီးပါတယ်၊ သခင် မဖြစ်မနေ လာရမယ်လို့ သူဌေးက ပြောလိုက်တယ်"

"အာ.. ငါနားလည်ပြီ၊ နောက်ဆုံးတော့ ငါ စင်မြင့်ထက်ကို တက်ရမယ့်အလှည့် ရောက်လာပြီပေါ့။ ဒါဆိုရင် ဒီလက်ကမ်းစာစောင်တွေ ဝေတဲ့အလုပ်ကို မင်းဆီမှာပဲ ထားခဲ့တော့မယ်။ မပျင်းနဲ့နော် ဘီလေး" ဂျက်သည် ဘရောင်းအား လက်ကမ်းစာစောင်အထပ်လိုက်ကို ပေးလိုက်ပြီး လေးနက်စွာ ပြောလိုက်သည်။

...

"လောလောဆယ်တော့ ဝိညာဉ်လူသားတွေရဲ့ တရားဝင်အဖွဲ့ဝင်ဆိုလို့ ငါတို့လေးယောက်ပဲ ရှိတယ်။ ကျန်တဲ့ မဟာမိတ်တပ်ဖွဲ့တွေက ငါ့ရဲ့ ပင်လယ်ဓားပြအဖွဲ့ဟောင်းက တစ်စိတ်တစ်ပိုင်း ပါဝင်သလို ရီယာမှာ ခိုလှုံဖို့ ရောက်လာတဲ့ ရာဇဝတ်ကောင်တွေလည်း တစ်စိတ်တစ်ပိုင်း ပါဝင်တယ်" ကာဒစ် မိုရက်ဂ်သည် တစ်ဖက်တွင်ထိုင်လျက် မိုင်ယာဆန်အား အခြေအနေများကို ရှင်းပြနေသည်။ သူသည် ဤလူက သူတို့၏ ခေါင်းဆောင်ဖြစ်လာခြင်းအပေါ် သိပ်ပြီး သဘောမကျလှသော်လည်း ထိုသူမှာ အရှင်နေဂါရီကိုယ်တိုင် ရွေးချယ်ထားသူဖြစ်သောကြောင့် သူ့အနေဖြင့် မကျေနပ်မှုများ ရှိနေလျှင်ပင် ယခုအချိန်သည် ၎င်းတို့ကို ထုတ်ဖော်ပြောဆိုရမည့်အချိန် မဟုတ်ပေ။

"ဂျက်ကို ရှာဖို့အတွက် ငါ လူတစ်ယောက် လွှတ်ထားပြီးပြီ၊ သူကလည်း လုပ်ကြံသတ်ဖြတ်သူအဖြစ် အလုပ်လုပ်နေတာဆိုတော့ ဘာမှမဖြစ်ဘူးဆိုရင် သူ မကြာခင် ရောက်လာပါလိမ့်မယ်" ဟု ကာဒစ်က ဆက်ပြောသည်။

"သေချာတဲ့ အကြောင်းပြချက်တစ်ခုကြောင့်သာ မဟုတ်ရင် ငါ ဒီကို လာတောင် မလာချင်ဘူး" အဖြူရောင်ဝတ်ရုံနှင့် ဂျက်သည် အရိုးတောကြီးကို ဖြတ်လျှောက်လာရင်း အပေါ်သို့ အဆက်မပြတ် မော့ကြည့်နေခဲ့သည်။

"အပေါ်မှာ ဘာရှိလို့လဲ" ဟု မိုင်ယာဆန်က မေးလိုက်သည်။

"ဘာမှမရှိပါဘူး၊ ကောင်းကင်ပေါ်ကနေ တူတစ်လက် ရုတ်တရက် ပြုတ်ကျလာမှာကို ငါ ကြောက်နေလို့ပါ" ဂျက်က တိုးတိုးလေး ရေရွတ်လိုက်သည်။ "လုပ်ကြံသတ်ဖြတ်သူတစ်ယောက်အနေနဲ့ အဲဒီနာမည်ကို ငါ့ကိုပေးသင့်တယ်လို့ ပြောရင် ငါက အကြောင်းပြချက်မဲ့လွန်းရာ ကျနေမလား။ ဘာလို့ ဝတုတ်ကြီးကို ပေးရတာလဲ။ ပထမဆုံးအနေနဲ့ လျှို့ဝှက်စွာ သွားလာလှုပ်ရှားတတ်ဖို့ ငါ ဘာလို့ သင်ယူခဲ့ရတာလဲ"

"သူ့ကို လျစ်လျူရှုထားလိုက်ပါ၊ သူ့ရဲ့ ဒုတိယဝိညာဉ်ကို ထည့်သွင်းတုန်းက မထင်မှတ်ထားတဲ့ အရာတစ်ခုခု ဖြစ်သွားပြီး သူ့ရဲ့ဝိညာဉ်ကို ကမောက်ကမ ဖြစ်သွားစေခဲ့တယ်။ သူက အမြဲတမ်း အရသာမရှိတဲ့ ဟာသတွေကို ပြောနေတတ်သလို ရှင်းပြလို့မရတဲ့ လုပ်ရပ်တွေကိုလည်း လုပ်လေ့ရှိတယ်" ကာဒစ်က ကူကယ်ရာမဲ့စွာဖြင့် သက်ပြင်းချလိုက်သည်။

ဤအချိန်တွင် ဂျက်သည် လူဝကြီး ကော်နာ ကင်းဝေးအနီးသို့ ချဉ်းကပ်သွားပြီး လေးနက်သော မျက်နှာအမူအရာဖြင့် ပြောလိုက်သည်။ "ဟေး.. ဝတုတ်ကြီး.. တူကို အသုံးပြုဖို့ မင်း ဘယ်လိုထင်လဲ။ ဒါမှမဟုတ် ဓားကြီးကိုရော။ ဒီရက်ပိုင်း လူသတ်တဲ့လုပ်ငန်းက အဆင်မပြေလှဘူးဆိုတော့ ပိုက်ဆံနည်းနည်းပါးပါး ရအောင် လက်နက်ဆိုင် တစ်ဆိုင်လောက် ဖွင့်ဖို့ ငါ စဉ်းစားထားတယ်။ တံဆိပ်တစ်ခုလောက် ကြိုတင်မှာထားချင်လား"

အရပ် ၅ မီတာခန့် မြင့်သော ကော်နာသည် ဂျက်၏ နောက်ပြောင်မှုများကို လုံးဝ လျစ်လျူရှုကာ မည်သည့်စကားမျှ မဆိုဘဲ တိတ်ဆိတ်နေခဲ့သည်။

"ဒါဆိုရင် မင်းက ငါတို့ရဲ့ ခေါင်းဆောင် ဖြစ်ရမယ်။ ငါကတော့ ဝိညာဉ်လူသား လူသတ်ဘုရင် ဂျက်ပဲ။ အခုကစပြီး ငါ့ကို စောင့်ရှောက်ပေးပါ။ မင်း သေတ္တာတစ်လုံး ဖြစ်မသွားမချင်း မင်းရဲ့အမိန့်တွေကို သေချာပေါက် နားထောင်ပေးပါ့မယ်" ဂျက်သည် အရှက်ကင်းမဲ့ကာ အန္တရာယ်များသော အပြုံးတစ်ခုကို ပြသလိုက်သည်။

မိုင်ယာဆန်သည် 'သေတ္တာတစ်လုံး ဖြစ်သွားသည်' ဟူသော စကား၏ အဓိပ္ပာယ်ကို သိပ်နားမလည်သော်လည်း အမိန့်များကို နားထောင်နေသရွေ့တော့ ကိစ္စမရှိပေ။ မိုင်ယာဆန်က ခေါင်းညိတ်လိုက်ပြီး အမိန့်များကို ပေါ့ပါးစွာ ပေးလိုက်သည်။ "အရှင်နေဂါရီက ငါတို့အတွက် ပထမဆုံး တာဝန်ကို ပေးအပ်လိုက်ပြီ။ ငါတို့ ဝိညာဉ်လူသားတွေဟာ ရီစထရိုမီယာအတွင်းမှာရှိတဲ့ တခြားအင်အားစုတွေကို ရှင်းလင်းဖို့အတွက် ခရစ်ရဲ့ ရဲဘော်ရဲဘက်တွေဖြစ်တဲ့ စမစ် လန်ချာ၊ လူးဝန် ဒေါန်နာနဲ့ ကျန်တဲ့လူတွေကို ရှာဖွေဖို့ဆိုတဲ့ အကြောင်းပြချက်ကို အသုံးပြုပြီး လှုပ်ရှားရလိမ့်မယ်"

"တစ်ချိန်တည်းမှာပဲ ငါတို့က ဝိညာဉ်လူသား မဟာမိတ်တပ်ဖွဲ့ဝင်တွေကို ပိုမိုစုဆောင်းသွားမယ်၊ သူတို့အားလုံးဟာ သေခြင်းမဲ့သတ္တဝါအသွင် ပြောင်းလဲခြင်းကို ခံယူရလိမ့်မယ်" သူ၏ ခန္ဓာကိုယ်ပေါ်တွင် မကောင်းသော အမှောင်အလင်းတန်းတစ်ခု ထွက်ပေါ်လာချိန်တွင် မိုင်ယာဆန်က ဖြည်းညှင်းစွာ ရှင်းပြလိုက်သည်။