အခန်း (၉၆) တကယ့်ကို ကောင်းကင်ကို ဆန့်ကျင်နေတာပဲ
နောက်တစ်နေ့ နံနက်စောစောတွင်...
လန်ယာဆက်သွယ်ရေးအဆောင် ပိုင်ရှင်တိုင်းထံသို့ တစ်ချိန်တည်းမှာပင် အကြောင်းကြားစာတစ်ခု ရောက်ရှိလာခဲ့သည်။
လန်ယာဖိုရမ် ကျင့်ကြံသူတိုင်းအတွက် ဝိညာဉ်ရေးရာ အိမ်ဂေဟာ။
“လန်ယာဖိုရမ် အဲဒါက ဘာလဲ”
“မသိဘူး၊ ကြည့်ရအောင်”
“မင်းတို့လည်း ရတာပဲလား ဒါက ဘာလဲ၊ ဘယ်သူ ပို့တာလဲ”
စာ၏ အကြောင်းအရာမှာ ရိုးရှင်းပါသည်။
ကျင့်ကြံသူအားလုံးထံ ရေးသားထားသော ပေးစာတစ်စောင်ကဲ့သို့ ဖြစ်သည်။
“ကျွန်ုပ်တို့သည် ကျင့်ကြံသူအားလုံးနှင့် သက်ဆိုင်သော ဝိညာဉ်ရေးရာလောကနှင့် အွန်လိုင်းအစီအရင်ပုံစံတစ်ခုကို ဖန်တီးရန် ရည်ရွယ်ပါသည်။
ဤနေရာတွင် လူတိုင်း လွတ်လပ်စွာ ပြောဆိုနိုင်ပါသည်။ ဤလောက၏ လျှို့ဝှက်ချက်အားလုံးသည် သင်တို့အတွက် တံခါးဖွင့်ပေးထားပါလိမ့်မည်။ သင် သိချင်သမျှ အရာအားလုံး ဤနေရာတွင် ရှိပါသည်။”
စာ၏အောက်တွင် “လန်ယာဖိုရမ် စီမံကိန်းအဖွဲ့” ဟု လက်မှတ်ရေးထိုးထားသည်။ထိုသတင်းစကားကြောင့် ကျင့်ကြံသူလောက၏ အောက်ခြေလူတန်းစားများကြားတွင် အကြီးအကျယ် လှုပ်ခတ်သွားခဲ့သည်။
တစ်ဖက်တွင်... ပန်လိုင်ကုန်သည်အဖွဲ့၌။
ထန်ချန်သည် ကျင့်ကြံခြင်းခန်းမမှ ချွေးဒုဒုဖြင့် ထွက်လာခဲ့သည်။
“မြောက်ပိုင်းပင်လယ်ဘက်က သတင်းထူးရှိလား” ဟု သူက မေးလိုက်သည်။
အစေခံက ဦးညွှတ်ကာ - “ဟုတ်ကဲ့ လန်ယာကုန်သည်အဖွဲ့က လန်ယာဖိုရမ်ဆိုတဲ့အရာကို အသစ်ထုတ်လိုက်လို့ လူပြောများနေပါတယ် သခင်လေး”
“ဖိုရမ် အဲဒါက ဘာလုပ်တာလဲ”
“သေချာတော့ မသိရသေးပါဘူး... ဒါပေမဲ့ သူတို့ပြောတာကတော့ သိချင်တာမှန်သမျှ အဲဒီထဲမှာ ရှာလို့ရတယ်လို့ ဆိုပါတယ်။”
ထန်ချန်က မျက်မှောင်ကြုတ်လိုက်ကာ “ကြွားလိုက်တာ အဲဒီဖိုရမ်ဆိုတာကို ဝိညာဉ်ကျောက်တုံး ဘယ်လောက်နဲ့ ရောင်းတာလဲ”
“အဲဒါ... သူတို့က မရောင်းပါဘူး၊ အလကား ပေးတာပါ”
ထန်ချန် ခဏမျှ ဆွံ့အသွားတော့သည်။ ဝမ်မု၏ အတွေးကို သူ ခန့်မှန်းရ ခက်ခဲလွန်းလှသည်။
နောက်ဆုံးတွင် အားလုံး မျှော်လင့်နေသည့်အတိုင်း ညတစ်ည၌ အဆောင်အသုံးပြုသူအားလုံးထံ အဆောင်ကိုအဆင့်မြှင့်တင်ပေးနေတဲ့ အကြောင်းကြားစာ ရောက်လာခဲ့သည်။
ကျင့်ကြံသူများမှာ မီးပိတ်သွားပြီး ပြန်ပွင့်လာမည့်အဆောင်ကို စိတ်မရှည်စွာ စောင့်ဆိုင်းနေကြသည်။ အဆင့်မြှင့်တင်မှု ပြီးဆုံးသွားသောအခါ ဆက်သွယ်ရေးခလုတ်ဘေးတွင် လန်ယာဖိုရမ်ဆိုတဲ့ ခလုတ်လေးတစ်ခု ပေါ်လာခဲ့သည်။
လူတိုင်း နှိပ်ဝင်လိုက်ကြသည်။ ရိုးရှင်းသော မျက်နှာပြင်ပေါ်တွင် ကဏ္ဍကြီး ၅ ခုကို တွေ့လိုက်ရသည် - ကျင့်ကြံခြင်း၊ စွယ်စုံကျမ်း၊ ထူးဆန်းဖွယ်ရာများ၊ အာဘော်များ နှင့် နတ်မင်းလက်ရာ။
သို့သော် သူတို့ကို အံ့အားသင့်သွားစေသည်မှာ ဖိုရမ်၏ ပင်မစာမျက်နှာတွင် ချိတ်ဆွဲထားသော သတင်းအချက်အလက်များ ဖြစ်သည်။
“ဘုရားရေ ငါ ဘာတွေ မြင်နေရတာလဲ”
“မြောက်ပိုင်းအမှောင်ထု ဓားနတ်မင်းကြီးရဲ့ ဓားလမ်းစဉ်အခြေခံပိုင်း ဆန်းစစ်ချက်တဲ့”
“နတ်မင်းလက်ရာနန်းဆောင် အကြီးအကဲရဲ့ လက်နက်သန့်စင်သူအသစ်များအတွက် အရေးကြီးသော အကြံပြုချက် ၃ ချက်”
“‘အခြေခံအုတ်မြစ် တည်ဆောက်ခြင်းအဆင့်မှာ သွေးလေချောက်ချားတာ မကြောက်ပါနဲ့ ဖြေရှင်းနည်း ၈၈ မျိုး ရှိပါတယ်တဲ့”
“အဂ္ဂိရတ်ပညာ- မင်းရောက်ပြီလား ထျန်းတန်း”
တစ်ခဏအတွင်း ပတ်ဝန်းကျင်တစ်ခုလုံး တိတ်ဆိတ်သွားပြီးမှ ဟိုးဟိုးကျော်ကျော် ဖြစ်ကုန်တော့သည်။
“လန်ယာကုန်သည်အဖွဲ့တော့ ရူးသွားပြီ ထင်တယ်”
“ဒါတွေက တကယ်ကြီးလား ငါအိမ်မက်မက်နေတာ မဟုတ်ဘူးမလား”
“ဓားနတ်မင်းကြီးဆိုတာ မြေကမ္ဘာနတ်မင်း နယ်ပယ်က ပုဂ္ဂိုလ်ကြီးလေ။ သူ့ဆီက လမ်းညွှန်ချက် တစ်ခွန်းရဖို့တောင် မလွယ်တာကို အခု စာလုံးရေ နှစ်ထောင်ကျော်တောင် ရေးထားတာပဲ”
ထိုစဉ်မှာပင် ကျင့်ကြံသူတစ်ဦးမှာ ခန္ဓာကိုယ်ကို ဖိုရမ်ပါ နည်းလမ်းအတိုင်း စမ်းသပ်ကြည့်ရာ ချက်ချင်းပင် အဆင့်တက်သွားသဖြင့် ပတ်ဝန်းကျင်ရှိလူများမှာ ပို၍ပင် ရူးသွပ်သွားကြတော့သည်။
ဤအတွေ့အကြုံများသည် အောက်ခြေကျင့်ကြံသူများအတွက် အိပ်မက်ထဲမှာတောင် မမက်ဖူးသည့် အဖိုးတန် ရတနာများ ဖြစ်သည်။
ဤအရာများကို လေလံတင်မည်ဆိုလျှင် သူတို့တစ်သက်လုံး ရှာသမျှငွေဖြင့်ပင် ဝယ်နိုင်မည်မဟုတ်ပေ။
ယခုမူ ထိုအရာများက သူတို့၏ လက်ဖဝါးပေါ်တွင် အခမဲ့ရောက်ရှိနေပြီ ဖြစ်သည်။