အခန်း (၉၅) ဒီအစေခံအိုကြီးမှာ သူငယ်ချင်းတစ်ယောက်ရှိပါတယ်

“ဝမ်သခင်လေးက ငယ်ငယ်ရွယ်ရွယ်နဲ့ လောကကြီးအပေါ် ဒီလောက်တောင် သနားညှာတာစိတ် ရှိတာ... တကယ့်ကို မျိုးရိုးဂုဏ်နဲ့ ညီပါပေတယ်”

အကြီးအကဲထျန်းတန်းက ပြုံးလျက် ပြောသည် - “ဒီအဘိုးကြီးကတော့ အသက်ရှင်ခဲ့တဲ့ သက်တမ်းတစ်လျှောက် အတွေ့အကြုံ အနည်းငယ် ရှိထားပါတယ်။ သခင်လေးကသာ အထင်မသေးဘူးဆိုရင် ကျွန်တော် ကူညီပေးပါ့မယ်။”

ထိုစကားကို ကြားသောအခါ အခြားအကြီးအကဲများမှာ မျက်နှာပျက်သွားကြသည်။

ဒီမြေခွေးအိုကြီးကတော့ စကားကို အချိုသတ်ပြောနိုင်လွန်းလှသည်။ ဝမ်မျိုးနွယ်စုမှာ ဘယ်တုန်းက သနားညှာတာစိတ်ရှိခဲ့ဖူးလို့လဲ ဝမ်မု၏ ဖခင်ဖြစ်သူလူသတ်သမားဟု နာမည်ကြီးသူကို ထားလိုက်ဦး၊ မြောက်ပိုင်းအမှောင်ထု သန့်စင်ရာနယ်မြေ အရှင်သခင်ဖြစ်သူ လော့ရွှမ်ရွှမ်ကိုယ်တိုင်ပင်လျှင် သူမ၏ ဝေလငါးအေးမြ နတ်မင်းဓားအောက်တွင် လူပေါင်းများစွာကို သတ်ဖြတ်ခဲ့သူ မဟုတ်ပါလား။

အမှန်စင်စစ် ကျင့်ကြံသူများထဲတွင် အဆင့်မြင့်နယ်ပယ်သို့ ရောက်ရှိလာသူတိုင်းမှာ ပြတ်သားရက်စက်ကြသူများသာဖြစ်သည်။

  ဤသခင်လေးမှာ ယခင်ကကဲ့သို့ မဟုတ်တော့သော်လည်း မျိုးနွယ်စု၏ အကာအကွယ်အောက်တွင် အလွန်အမင်း နေသားကျနေသဖြင့် အလွန်ပင် ရိုးအလွန်းနေသည်ဟု သူတို့ ထင်မြင်နေကြသည်။

သို့သော်လည်း သန့်စင်ရာနယ်မြေ အရှင်သခင်၏မျက်နှာကို ထောက်ထား၍ သူတို့အားလုံးမှာ ဝမ်မုကို ကူညီရန် သဘောတူလိုက်ကြသည်။

ဝမ်ရှုက ကျေးဇူးတင်စကား ပြောကြားရင်း တစ်ချက် သတိပေးလိုက်သည်  “အကြီးအကဲတို့... အတွေ့အကြုံတွေကို ရေးတဲ့အခါ အဆင့်နိမ့်ကျင့်ကြံသူတွေရဲ့ရှုထောင့်ကနေ ရေးပေးစေချင်ပါတယ်။ သူတို့ရဲ့ ကျင့်ကြံမှုက အနိမ့်ပိုင်းမှာပဲ ရှိသေးတာဆိုတော့ အရေးအသားတွေ အရမ်းနက်နဲနေရင် သူတို့ နားလည်မှာ မဟုတ်လို့ပါ။”

ဝမ်မုသည် သန့်စင်ရာနယ်မြေတွင် နှစ်ရက်ခန့် နေထိုင်ခဲ့သည်။ ထိုအချိန်အတွင်း သူသည် ဆက်သွယ်ရေးအဆောင်မှတစ်ဆင့် လီယွမ်ဟွားကို ဆက်သွယ်ကာ အခြားဝိညာဉ်အသွင်ပြောင်းခြင်းအဆင့် ကျင့်ကြံသူများထံမှ အတွေ့အကြုံများကို စုဆောင်းခိုင်းထားခဲ့သည်။

အကြီးအကဲများမှာလည်း ကတိအတိုင်း သူတို့၏ အတွေ့အကြုံ မှတ်တမ်းများကို တပည့်များမှတစ်ဆင့် ပေးပို့လာကြသည်။

အကြီးအကဲ တစ်ဦးနှင့်တစ်ဦး အရေးအသားမှာ ကွဲပြားကြသည်။ အချို့က အသေးစိတ် ရှင်းပြထားပြီး.အချို့ကမူ ဂုဏ်ပကာသန ခံကာ နက်နဲသော ဘာသာစကားများဖြင့် ရေးသားထားကြသည်။ သို့သော် ဝမ်မုမှာ စိတ်မဆိုးဘဲ ပြုံးလိုက်သည် - ကွဲပြားမှုရှိခြင်းက ပို၍ ကောင်းမွန်ပါသည်။

နှစ်ရက်အကြာတွင် ဝမ်မုသည် ထျန်းကျွယ်ကျွန်းသို့ ပြန်ရောက်လာခဲ့သည်။

လီယွမ်ဟွားက လာရောက်ကြိုဆိုကာ ကျောက်စိမ်းပေလွှာတစ်ခုကို ကမ်းပေးသည်  “ဒါက သခင်လေး ခိုင်းထားတာတွေပါ။ စစ်ဆေးကြည့်ပေးပါ။”

ဝမ်မု စစ်ဆေးကြည့်ရာ အလွန်ပင် စုံလင်လှသည်။ လှုပ်ရှားမှု နည်းပညာများ၊ မန္တန်များမှစ၍ အရာအားလုံး ပါဝင်သည်။

ထို့နောက် လီယွမ်ဟွားက နောက်ထပ် ကျောက်စိမ်းပေလွှာတစ်ခုကို ထပ်ပေးပြန်သည်။

“ဒါကတော့ ဒီအစေခံအိုကြီးရဲ့ ကိုယ်ပိုင် အတွေ့အကြုံတွေပါ” ဟု လီယွမ်ဟွားက ဖော်လံဖားသော အပြုံးဖြင့် ပြောလိုက်သည်။

ဝမ်မု ကြည့်လိုက်ရာ အံ့ဩသွားတော့သည်။ လီယွမ်ဟွားသည် သူ၏ တစ်သက်တာ ကျင့်ကြံမှု အတွေ့အကြုံအားလုံးကို အသေးစိတ် မှတ်တမ်းတင်ထားခြင်း ဖြစ်သည်။

သွေးလေချောက်ချားခြင်း ဖြစ်နိုင်သည့် အခြေအနေ ၂၃ မျိုးနှင့် ၎င်းကို ဖြေရှင်းနိုင်မည့် နည်းလမ်း ၈၈ မျိုးကို အလွန်ပင် သေချာစွာ ရေးသားထားသည်။

ဝမ်မုက သဘောကျစွာဖြင့် လီယွမ်ဟွားကို ကြည့်ကာ မေးလိုက်သည် - “ဒါပေမဲ့ ငါ့မှာ မေးစရာတစ်ခု ရှိတယ်။ ဒီမှတ်တမ်းထဲမှာ ပါတဲ့... ရုပ်ရည်ချောမောတဲ့ကျင့်ကြံသူ အမျိုးသားတွေအနေနဲ့ မိစ္ဆာဂိုဏ်းက အမျိုးသမီးတွေရဲ့ယန်ဓာတ်ကို စုပ်ယူပြီး ယင်ဓာတ်ဖြည့်တင်းခြင်းကနေ အားအင်ကုန်ခမ်းမသွားအောင် ဘယ်လို ရှောင်ရှားရမလဲဆိုတာကို မင်းက ဘယ်လိုလုပ် သိနေတာလဲ”

လီယွမ်ဟွား၏မျက်နှာအိုကြီးမှာ တွန့်သွားကာ - “အဲဒါက... ဒီအစေခံအိုကြီးရဲ့ သူငယ်ချင်းတစ်ယောက်ရဲ့ အကြောင်းကနေ စတာပါ...” ဟု ပြန်လည်ဖြေကြားလိုက်တော့သည်။