အခန်း (၈၈)  ဒါက ရိုးသားတဲ့သူတွေကို အနိုင်ကျင့်တာ မဟုတ်ဘူးလား

နာကျည်းမှု၏စွမ်းအားမှာ အလွန်ပင် ကြီးမားလှသည်။ ဤနာကျည်းမှုမှာ လုရှင်းအတွက် တရားမျှတမှု ရှာပေးချင်သည့် စိတ်တစ်ခုတည်းကြောင့် မဟုတ်ပေ။

ကုန်သည်ကြီးသုံးဖွဲ့သည် အရည်အသွေးညံ့ဖျင်းပြီး အန္တရာယ်ရှိသော ပစ္စည်းများကို စျေးနှုန်းကြီးမြင့်စွာဖြင့် ရောင်းချခဲ့ရုံသာမက ပြဿနာဖြစ်ပွားပြီးနောက်တွင်လည်း သူတို့ကို လုံးဝအရေးမစိုက်ဘဲ မောက်မာစွာ တုံ့ပြန်ခဲ့ကြသည်။

ထိုကဲ့သို့ အထက်စီးဆန်သော အမူအရာမှာပင် လင်းကျယ် နှင့် ကျင့်ကြံသူတစ်စုကို လက်စားချေလိုစိတ် ပြင်းပြလာစေသည့် အဓိက တွန်းအားဖြစ်လာခဲ့သည်။

ထို့ကြောင့်နောက်ရက်များတွင် သူတို့သည် ကျင့်ကြံသူလောကအတွင်းရှိ သူတို့သိသမျှ လူတိုင်းထံသို့ အဆက်မပြတ် ဆက်သွယ်အကြောင်းကြားကြတော့သည်။

ရင်းနှီးသည်ဖြစ်စေ မရင်းနှီးသည်ဖြစ်စေ တစ်ဖက်လူက ဖုန်းကိုင်သည်နှင့် ဤအကြောင်းကို ပြောပြကြသည်။ ကျင့်ကြံသူ အများအပြားမှာ ထိုပြဿနာကို မသိသေးသော်လည်း သတိပေးခံရပြီးနောက် ကိုယ်တိုင်စမ်းသပ်ကြည့်ရာတွင် ဘုရားရေ... တကယ်ပဲ ဟု ထိတ်လန့်သွားကြသည်။

သူတို့သည် ကြောက်ရွံ့စိတ်ဖြင့် ချွေးစေးများ ထွက်လာကြပြီး ဒေါသတကြီးဖြင့် သူတို့၏အဆောင်များကို ကိုင်ကာကုန်သည်ကြီး သုံးဖွဲ့ကို အကျင့်ပျက်စီးပွားရေးသမားများ ဟု ကျိန်ဆဲကြတော့သည်။ ထို့နောက် သူတို့သည်လည်း ဘေးနားရှိ လူများကို ထပ်ဆင့် သတိပေးကြပြန်သည်။

"တောက်... ငါတော့ မရတော့ဘူး ခဏနားဦးမှ"

ဂူဗိမာန်တစ်ခုအတွင်း၌ လင်းကျယ်နှင့် အခြားကျင့်ကြံသူအချို့ ဝိုင်းဖွဲ့ထိုင်နေကြသည်။ သူတို့အားလုံးသည် သူတို့၏ ဆက်သွယ်ရေးအဆောင်များကို စားပွဲပေါ်သို့ ပြိုင်တူ ပစ်တင်လိုက်ကြသည်။

"ငါ ဆယ်ခါလောက်ဆက်တိုက် ဆက်သွယ်ပြီးတာနဲ့ ဒီအဆောက်က ပူကျစ်နေတာပဲ ပေါက်ကွဲတော့မယ် ထင်တယ်"

"အရင်ကသုံးတဲ့ စက္ကူအဆောင်တွေကိုပဲ ပြန်သုံးကြရအောင်။ အဲဒါတွေက နည်းနည်း ရုပ်ဆိုးပေမဲ့ အနည်းဆုံးတော့ ဘေးကင်းတယ်"

"ဟုတ်တယ်ဗျာ ဒါနဲ့ အစ်ကိုလင်း... ခင်ဗျားက လူပေါင်းနှစ်ဆယ်ကျော်ကို ဆက်သွယ်နေတာ ဘာမှ မဖြစ်ဘူးလား"

လင်းကျယ်က သူ၏ နက္ခတ်အဆင့် နဂါးပြာ အဆောင်ကို ကြည့်ပြီး ခေါင်းခါပြလိုက်သည်  "နည်းနည်းပဲ နွေးတာပါ။ ကုန်သည်ကြီး သုံးဖွဲ့ကဟာတွေလိုမျိုး ပူကျစ်နေတဲ့ ခံစားချက်မျိုး မရှိဘူး"

"တကယ်ကိုအံ့ဩဖို့ကောင်းတာပဲ အစ်ကိုလင်းရဲ့အဆောင်က ဝိညာဉ်ကျောက်တုံး တစ်ရာကျော်ပဲပေးရတာကို ငါ့ရဲ့လရောင်အဆင့်ထက်တောင် အများကြီး ပိုကောင်းနေသေးတယ်"

"ဒါက လန်ယာကုန်သည်အဖွဲ့ မို့လို့လေ။ အသုံးပြုတဲ့ ကုန်ကြမ်းတွေကော လက်ရာပိုင်းမှာကော အဲဒီ အမြတ်ကြီးစား ကုန်သည်ကြီး သုံးဖွဲ့နဲ့ ယှဉ်လို့မရဘူး"

"တကယ့်ကိုစေတနာရှိတဲ့ ကုန်သည်အဖွဲ့ပဲ။ ငါတော့ နောင်တရလို့ မဆုံးတော့ဘူး နောက်တစ်ခါကုန်သည်ကြီးသုံးဖွဲ့ဆီက ပစ္စည်းဝယ်ရင် ငါ့ကိုယ်ငါ ခွေးလို့ပဲခေါ်လိုက်တော့မယ်"

ကုန်သည်ကြီးသုံးဖွဲ့၏ ဆက်သွယ်ရေးအဆောင်မှာ အပူလွန်ကဲပြီး ပေါက်ကွဲတတ်သည်ဟူသောသတင်းမှာ မြောက်ပိုင်းပင်လယ် တစ်ခုလုံးသို့ အံ့ဩဖွယ် အရှိန်အဝါဖြင့် ပျံ့နှံ့သွားခဲ့သည်။ ကျွန်းအသီးသီးတွင် လူတိုင်းက ဤအကြောင်းကိုသာ ဆွေးနွေးနေကြသည်။

မြောင်ယင်းအဆောက်အအုံအတွင်းရှိ သီးသန့်ခန်းတစ်ခုတွင်...

အရှိန်အဝါကြီးမားသော ကျင့်ကြံသူအချို့မှာ သီချင်းနားထောင်ရင်း ဤအကြောင်းကို ပြောနေကြသည်။

"ကုန်သည်ကြီးသုံးဖွဲ့ရဲ့အဆောင်တွေက အရည်အသွေးတကယ် ညံ့တာဗျ။ ပြီးခဲ့တဲ့ အခေါက်က ကျုပ်မိန်းမတိုက်ပွဲဖြစ်တုန်းက နည်းနည်းလေး ပွတ်တိုက်မိတာနဲ့အဆောင်က တစ်စစီဖြစ်သွားတယ်" ဟု ခရမ်းရောင်ဝတ်စုံနှင့် ကျင့်ကြံသူတစ်ဦးက သက်ပြင်းချရင်း ပြောသည်။

ဘေးနားရှိ ကျင့်ကြံသူက နှုတ်ခမ်းတွန့်လိုက်ကာ "မိတ်ဆွေယန်... ခင်ဗျား ပြောတာကတော့ နည်းနည်း မတရားဘူးထင်တယ်။ ဆက်သွယ်ရေးအဆောင်ဆိုတာ ဝိညာဉ်လက်နက်မှ မဟုတ်တာ။ တိုက်ပွဲရဲ့ရိုက်ခတ်မှုကြောင့် ပျက်စီးတာက ပုံမှန်ပဲ မဟုတ်လား"

"မှန်တယ် ဘယ်သူ့အဆောင်ပဲ ဖြစ်ဖြစ် အတူတူပဲဖြစ်မှာပါ"

"လုံးဝ မတူဘူး" ကျင့်ကြံသူယန်က တည်ကြည်စွာဖြင့် - "ကျုပ်ရဲ့နေမင်းအဆင့်အဆောင်ကတော့ အဲဒီလို မဟုတ်ဘူး"

"ခင်ဗျားတို့သိတဲ့အတိုင်း လွန်ခဲ့တဲ့ ရက်ပိုင်းက ကျုပ်ရဲ့ဂိုဏ်းက လူကြီးတွေနဲ့အတူ မိစ္ဆာကျင့်ကြံသူတွေကို သွားနှိမ်နင်းခဲ့ကြတယ်။ တိုက်ပွဲအတွင်းမှာ ကျုပ် ခဏလေး သတိလွတ်သွားတုန်း မိစ္ဆာလက်နက်တစ်ခုက ကျုပ်ရဲ့ရင်ဘတ်ကို တည့်တည့်ထိမှန်ခဲ့တယ်။ ငါတော့ သေပြီလို့ ထင်လိုက်တာ... ဒါပေမဲ့..."

"ကျုပ်ရဲ့ သက်တမ်း မကုန်သေးလို့ထင်ပါရဲ့။ အဲဒီမိစ္ဆာကျင့်ကြံသူရဲ့ အပြင်းထန်ဆုံး တိုက်ခိုက်မှုက ကျုပ်ရဲ့ ဆက်သွယ်ရေးအဆောင်ကို သွားထိတာ။ အဲဒါက ကျုပ်ရဲ့ အသက်ကို ကယ်လိုက်တာပဲ"

အခန်းတစ်ခုလုံး တိတ်ဆိတ်သွားပြီးနောက် လူတိုင်း အံ့ဩတကြီး ရေရွတ်လိုက်ကြသည်။

"မိတ်ဆွေယန်... ဒါ တကယ်လား"

"ကျုပ်က ဘာလို့ လိမ်ပြောရမှာလဲ" ကျင့်ကြံသူယန်က သူ၏အဆောင်ကို စားပွဲပေါ်သို့ တင်လိုက်သည် - "မယုံရင် ကိုယ်တိုင် စစ်ဆေးကြည့်ကြလေ"

လူတိုင်းက ဝိညာဉ်အာရုံဖြင့် စစ်ဆေးကြည့်ရာ အပြင်ပန်းတွင် အသစ်အတိုင်း ဖြစ်နေသော်လည်း အနောက်ဘက်ရှိ နဂါးပြာပုံရိပ်တွင် သေးငယ်သော ချိုင့်ခွက်လေးတစ်ခု ရှိနေပြီး ထိုနေရာတွင် မိစ္ဆာစွမ်းအား အကြွင်းအကျန်အချို့ ရှိနေသည်ကို တွေ့ရသည်။

"ဒါ တကယ်ကြီးလား"

"ဒါက တကယ့်ကို ထူးဆန်းတာပဲ ဆက်သွယ်ရေးအဆောင်ကို ခုခံရေး ဝိညာဉ်လက်နက်အဖြစ်တောင် သုံးလို့ရတယ်ပေါ့"

သူတို့၏မျက်နှာတွင် မယုံကြည်နိုင်မှုများ ပြည့်နှက်နေသည်။ ထို့နောက် သူတို့လက်ထဲရှိ စျေးကြီးပေးဝယ်ထားရသော ကုန်သည်ကြီး သုံးဖွဲ့၏အဆောင်များကိုကြည့်ပြီး လွှင့်ပစ်ချင်စိတ်များ ပေါက်လာကြသည်။

သူတို့ဟာက ပွတ်တိုက်မိရုံနှင့် ပျက်စီးနိုင်သော်လည်း လန်ယာ၏ပစ္စည်းမှာမူ အသက်ဘေးမှ ကယ်တင်နိုင်သည့်အပြင် ပုံမှန်အတိုင်း ပြန်သုံးနိုင်သေးသည်။

ကွာခြားချက်မှာ သိသာလွန်းလှသည်။ စျေးနှုန်းချင်း အတူတူပေးရသော်လည်း အရည်အသွေးမှာ မိုးနှင့်မြေလို ကွာခြားနေခြင်းကြောင့် ကျင့်ကြံသူများမှာ ဒေါသထွက်လာကြပြီး ကုန်သည်ကြီး သုံးဖွဲ့ထံသွားရောက် ဖြေရှင်းရန် ပြင်ဆင်ကြတော့သည်။

အများပြည်သူ၏ဝေဖန်မှုများမှာ ပိုမိုပြင်းထန်လာသည်။ ကုန်သည်ကြီး သုံးဖွဲ့၏အဆောင်များတွင် ဝိညာဉ်ကျောက်တုံး ကုန်ဆုံးမှုနှုန်း အဆမတန် များပြားခြင်းနှင့် ဝိညာဉ်ကျောက်တုံး အဆင့်မြင့်တင်လိုက်ပါက ပေါက်ကွဲတတ်ခြင်း စသည့် အပြစ်အနာအဆာများမှာ တစ်ခုပြီးတစ်ခု ပေါ်ပေါက်လာသည်။

ကျင့်ကြံသူတစ်ဦးမှာ အဆင့်မြှင့်ဝိညာဉ်ကျောက်တုံးတစ်ခု ထည့်သွင်းလိုက်ရာ ပေါက်ကွဲသွားသဖြင့် လက်မောင်းတစ်ဖက် ဆုံးရှုံးသွားသည့် သွေးပျက်ဖွယ် ဖြစ်ရပ်ပင် ရှိခဲ့သည်။

ထိုအခြေအနေတွင် နောက်ထပ် သတင်းတစ်ခုက မီးလောင်ရာ လေပင့်လိုက်သကဲ့သို့ ဖြစ်သွားစေသည်။

မနေ့က... တာယွမ်ဂိုဏ်း၏ ဂိုဏ်းချုပ်ကိုယ်တိုင် လန်ယာကုန်သည်အဖွဲ့ခွဲသို့ သွားရောက်ကာ ဒုက္ခရောက်သူကိုကူညီသူ ဟူသော ဂုဏ်ပြုဆုတံဆိပ်ကို သွားရောက် ပေးအပ်ခဲ့သည်။

အကြောင်းမှာ သူတို့ဂိုဏ်းမှ တပည့်များ မိစ္ဆာများ၏တိုက်ခိုက်ခြင်း ခံရစဉ် ကုန်သည်ကြီး သုံးဖွဲ့၏အဆောင်များမှာ ပေါက်ကွဲပျက်စီးကုန်သော်လည်း လန်ယာ၏အဆောင်တစ်ခုတည်းကသာ ပိတ်ဆို့မှုကို ဖောက်ထွက်၍ အကူအညီ တောင်းခံနိုင်ခဲ့သောကြောင့် ဖြစ်သည်။

ဤသတင်း ထွက်လာသည်နှင့် ကျင့်ကြံသူအားလုံးမှာ ထိန်းမနိုင် သိမ်းမရ ဖြစ်ကုန်ကြသည်။

သူတို့ မူလက ထင်ထားသည်မှာ အရည်အသွေး အနည်းငယ် ကွာခြားနိုင်သော်လည်း အခြေခံဆက်သွယ်ရေး လုပ်ဆောင်ချက်တွင်တော့ အတူတူပင် ဖြစ်လိမ့်မည်ဟူ၍ ဖြစ်သည်။

သို့သော် အသက်အန္တရာယ်နှင့် ကြုံတွေ့ရချိန်တွင် အရေးအကြီးဆုံးဖြစ်သည့် ဆက်သွယ်ရေးစနစ်က အလုပ်မလုပ်တော့ပါက ထိုပစ္စည်းကို ဆောင်ထားရန် အကြောင်းမရှိတော့ပေ။

စျေးနှုန်းချင်း တူညီသော်လည်း အဘက်ဘက်မှ ညံ့ဖျင်းနေသော ပစ္စည်းများကို ရောင်းချခြင်းမှာ... "ဒါက ရိုးသားတဲ့သူတွေကို အနိုင်ကျင့်တာ မဟုတ်ဘူးလား"