အခန်း (၈၃) ကုန်သည်ကြီးသုံးဖွဲ့၏ ဆက်သွယ်ရေးအဆောင် ထွက်ပေါ်လာခြင်း

မိမိ၏ခန္ဓာကိုယ်အတွင်း၌ ရုတ်တရက် တိုးဝင်လာသော စွမ်းအားများနှင့် ဦးနှောက်ထဲသို့ အလိုအလျောက် ရောက်ရှိလာသော ဆန်းပြားလှသည့် အရာများကို ခံစားရင်း... ဝမ်မုတစ်ယောက် ဆွံ့အသွားရတော့သည်။

ထိုက်ရွှီမိစ္ဆာနှိမ်နင်းရေး မီးလျှံသည် ဝိညာဉ်မီးလျှံ အဆင့်သတ်မှတ်ချက်တွင် အဆင့် ၂၅ ရှိသည်။၎င်းသည် ပြင်းထန်သော စွမ်းအားကြောင့် ကျော်ကြားပြီး ယုတ်မာသော မိစ္ဆာအင်အားစုများကို သဘာဝအတိုင်း နှိမ်နင်းနိုင်စွမ်း ရှိသည်။ ထို့အပြင် ကျင့်ကြံသူ၏ တိုက်ခိုက်ရေး စွမ်းအားကိုလည်း အကြီးအကျယ် မြှင့်တင်ပေးနိုင်သည်။

ဤမီးလျှံ၏ရှားပါးမှုမှာ... ပင်လယ်ဝိညာဉ် မီးလျှံထက်ပင် ပိုမိုကြီးမားလှသည်။

လင်းယန်တစ်ယောက် ကောင်းကင်နဂါး အသွင်ပြောင်းကျင့်စဥ်ကို နားလည်သဘောပေါက်ခဲ့သည်မှာ မည်မျှကြာသေးသနည်း ယခုမူ ကောင်းကင်ဘုံက ပေးသနားသော အခွင့်အလမ်းကို ထပ်မံ ကြုံတွေ့ရပြန်ပြီ။ သူက တကယ့်ကို ကံကြမ္မာသားတော် ပီသပါပေသည်။

ဝမ်မုသည် လွန်ခဲ့သော ရက်အနည်းငယ်က လင်းယန်၏ရင်းနှီးမြှုပ်နှံမှု အဆင့်ကို တစ်ခါတည်း အဆုံးထိ မြှင့်တင်ထားခဲ့သည်မှာ တော်သေးသည်ဟု ခံစားလိုက်ရသည်။ မဟုတ်ပါက ယနေ့ကဲ့သို့ ရက်ရောလှသော အကျိုးကျေးဇူးများကို ရရှိနိုင်မည် မဟုတ်ပေ။ မီးအမျိုးအစားနတ်ဘုရားစွမ်းရည်များအပေါ် သူ၏ ထိန်းချုပ်နိုင်စွမ်းမှာ အဆမတန် တိုးတက်လာခဲ့ပြီး တိုက်ခိုက်ရေး စွမ်းအားမှာလည်း တစ်ဟုန်ထိုး မြင့်တက်သွားခဲ့သည်။

လင်းယန်ကဲ့သို့ပင် သူသည်လည်း ဧကရာဇ်မီးလျှံသန့်စင်ခန္ဓာကို ရရှိခဲ့သည်။ ထို့အပြင် မိစ္ဆာနှိမ်နင်းရေးမီးလျှံ၏ စွမ်းအားကြောင့် ထိုခန္ဓာကိုယ်မှာ အဆင့်ငယ်အောင်မြင်မှုသို့ တိုက်ရိုက် ရောက်ရှိသွားခဲ့သည်။

ဆိုလိုသည်မှာ ယခုအချိန်မှစ၍ သူသည်လည်း လင်းယန်ကဲ့သို့ပင် ကမ္ဘာပေါ်ရှိ ထူးခြားသော မီးလျှံများကို ရှာဖွေဝါးမြိုပြီး မိမိကိုယ်ကိုယ် သန်မာအောင် လုပ်နိုင်ပြီဖြစ်သည်။

သို့သော် ထိုကဲ့သို့ အချိန်ကုန် လူပန်းမည့် အလုပ်မျိုးကိုမူ. ဝီရိယကောင်းလှသော လင်းယန်ကိုသာ ဆက်လက် လုပ်ကိုင်ခိုင်းခြင်းက ပိုကောင်းပေလိမ့်မည်။ ရလဒ်ကတော့ အတူတူပင် ဖြစ်သည်မဟုတ်လား။

သူသည် တင်းတင်းကို သူမ၏ အလုပ်များ ဆက်လုပ်ရန် လွှတ်လိုက်ပြီးနောက် နန်နန်လေးအကြောင်းကို တွေးမိသွားသည်။ သူသည် စနစ်မျက်နှာပြင်ကို ဖွင့်၍ နန်နန်လေးနှင့် ပတ်သက်သော သတိပေးချက်များကို ရှာဖွေကြည့်လိုက်သည်။

【ဂုဏ်ယူပါသည် သင် ရင်းနှီးမြှုပ်နှံထားသော နန်နန်လေးသည် ပင်လယ်နက် ဝိညာဉ်ရွှေကို စုပ်ယူနိုင်ခဲ့သည်။ သူမ၏ အခြေခံမှာ တိုးတက်သွားပြီး အလားအလာများ မြင့်မားလာခဲ့သည်】

【ဂုဏ်ယူပါသည် နန်နန်လေးထံမှ ကျင့်ကြံမှု အကျိုးကျေးဇူး ပြန်လည်ရရှိသည် - ပါရမီ  +၁၀】

【ဂုဏ်ယူပါတယ်  နန်နန်လေးသည် နဂါးသွေး ဂျင်ဆင်းကို စုပ်ယူနိုင်ခဲ့သည်။ သူမ၏ သွေးစွမ်းအင်ပါရမီမှာ တိုးတက်လာခဲ့သည်】

【ဂုဏ်ယူပါတယ် သင်သည် ကျင့်ကြံမှု အကျိုးကျေးဇူး ပြန်လည်ရရှိသည် - သွေးစွမ်းအင် +၁၀၊ ခန္ဓာကိုယ်ကျင့်ကြံသူပါရမီ +၁၀】

【ဂုဏ်ယူပါတယ်  နန်နန်လေးသည် လျှို့ဝှက်ဆန်းကြယ်အဝါရောင်ဆီးသီးကို စုပ်ယူနိုင်ခဲ့သည်။ သူမ၏ ဝိညာဉ်ပင်လယ်မှာ တိုးတက်လာခဲ့သည်】

【ဂုဏ်ယူပါတယ် နန်နန်လေးသည် ကောင်းကင်လုဖန်ဆင်းခြင်းကျင့်စဥ်ကို အောင်မြင်စွာ ကျင့်ကြံနိုင်ခဲ့သည်။ သူမ၏ ပါရမီမှာ  အဆင့်မြင့်သို့ ရောက်ရှိသွားပြီ ဖြစ်သည်】

【ဂုဏ်ယူပါတယ် သင်၏ဝိညာဉ်စွမ်းအင် ဆွဲဆောင်မှုနှုန်း၊ ကျင့်ကြံမှုနှုန်းနှင့် ထိန်းချုပ်မှုနှုန်းတို့ မြင့်တက်လာခဲ့သည်...】

နန်နန်လေးသည် လင်းယန်နှင့် မတူပေ။ သူမသည် ဝမ်မုက ကိုယ်တိုင် ပြုစုပျိုးထောင်နေသော ကံကြမ္မာသမီးတော်ဖြစ်သည်။

ထို့ကြောင့် သူမထံမှ ရုတ်တရက် ကြီးမားသော အံ့ဩစရာများ မလာတတ်သော်လည်း ဝမ်မုအတွက် ရရှိသော အကျိုးကျေးဇူးများမှာမူ နည်းပါးခြင်း မရှိပေ။

ဝမ်မုသည် သူမအား ကောင်းကင်လု ဖန်ဆင်းခြင်းကျင့်စဥ်ကို ကျင့်ကြံနိုင်ရန် ကောင်းကင်နှင့်မြေကြီး ရတနာများကို အကန့်အသတ်မရှိ ထောက်ပံ့ပေးထားသည်။ သူမ၏ ဝိညာဉ်အမြစ်ပါရမီမှာ အချိန်တိုအတွင်း အဆင့်နိမ့် မှ အဆင့်မြင့်သို့ ရောက်ရှိသွားခဲ့ပြီ ဖြစ်ရာ မကြာမီ အထွတ်အထိပ်အဆင့်သို့ ရောက်ရှိတော့မည်မှာ သေချာလှသည်။

ရက်အနည်းငယ် ထပ်မံကုန်ဆုံးသွားပြီးနောက်...

လက်နက်သန့်စင်နန်းဆောင်မှ ထုတ်လုပ်သော ဒုတိယအသုတ် ဆက်သွယ်ရေးအဆောင် ၁၀ သန်းမှာ အောင်မြင်စွာ ပြီးဆုံးသွားခဲ့သည်။ ဝမ်မုသည် အရည်အသွေးကို စစ်ဆေးရန် ကိုယ်တိုင် ရောက်ရှိလာခဲ့သည်။

“ကောင်းတယ်၊ တကယ်ကို ကောင်းတယ်" ဝမ်မုက အထပ်ထပ် ချီးကျူးလိုက်သည် - “မင်းတို့ကို ငါ ယုံကြည်ခဲ့တာ မမှားဘူး”

ရှယောင်ယောင်က ဂုဏ်ယူသော မျက်နှာဖြင့် - “ကျွန်မတို့ လက်နက်သန့်စင်နန်းဆောင်က လုပ်ပြီဆိုရင် ရှင် စိတ်ချထားလိုက်ပါ”

ဝမ်မုက အဆောင်များ ပြည့်နှက်နေသော လက်စွပ်ကို ယူလိုက်ပြီး လက်နက်သန့်စင်နန်းဆောင်မှ တပည့်များကို လှည့်ကြည့်ကာ အသံကျယ်ကျယ်ဖြင့် ပြောလိုက်သည် - “အစ်ကိုကြီးတို့၊ အစ်မတော်တို့... ဒီရက်ပိုင်းအတွင်းအားလုံး ပင်ပန်းသွားကြပြီ”

“ဒီည စားဖိုဆောင်မှာ ကျွန်တော် ဝယ်ကျွေးပါ့မယ်။ ကြိုက်တာ အကုန်မှာစားကြပါ”

“ဝိုး”

“သခင်လေးကတော့ တကယ့်ကို ရက်ရောတာပဲ”

ချက်ချင်းပင် တစ်ဆောင်လုံး၌ ပျော်ရွှင်စွာ အော်ဟစ်သံများဖြင့် ပြည့်နှက်သွားတော့သည်။

ညစာစားပွဲတွင် ရယ်မောသံများ၊ သောက်စားသံများဖြင့် စည်ကားနေသည်။ စားဖိုဆောင်မှ စားဖိုမှူးများ အစွမ်းကုန် ချက်ပြုတ်ထားသော ဝိညာဉ်ငါးနှင့် သားရဲသားဟင်းလျာများမှာ နတ်ဘုရားလောကမှ ဟင်းလျာများကဲ့သို့ပင် အလွန်အရသာရှိလှသည်။ ၎င်းတို့ကို စားသုံးခြင်းဖြင့် ကျင့်ကြံသူများအတွက်လည်း အကျိုးကျေးဇူးများစွာ ရရှိစေသည်။

ရှယောင်ယောင်သည်လည်း မနေနိုင်ဘဲ ဝိညာဉ်ဝိုင် အနည်းငယ် ပိုသောက်မိသဖြင့် သူမ၏ပါးပြင်လေးများမှာ ရဲတက်နေပြီး ကြည့်ရသည်မှာ ပို၍ ဆွဲဆောင်မှုရှိနေတော့သည်။

“အစ်မတော် ယောင်ယောင်... တစ်ခွက်လောက်” ဝမ်မုက ခွက်ကိုမြှောက်၍ ပြုံးကာ ပြောလိုက်သည် - “ဒီရက်ပိုင်း အရမ်း ပင်ပန်းသွားပြီနော်”

ရှယောင်ယောင်က ခွက်ချင်း တိုက်လိုက်ပြီး လက်ကို ဝေ့ယမ်းကာ ပြောလိုက်သည် - “ရှင်က ပိုက်ဆံပေးတယ်၊ ကျွန်မက အလုပ်လုပ်တယ်။ ဒါက ပင်ပန်းစရာ မဟုတ်ပါဘူး!”

“တကယ်တော့ ရှင့်ကို ကျေးဇူးတင်ရမှာပါ။ ရှင့်ရဲ့ဒီအော်ဒါကြီးနှစ်ခုသာ မရှိရင် ကျွန်မတို့ ဂိုဏ်းက လူတော်တော်များများ တောင့်ခံနိုင်ဖို့ မလွယ်ဘူး”

ဝမ်မုက ခေတ္တစဉ်းစားပြီးနောက် - “တကယ်တော့ ကျွန်တော် ထင်တာကတော့... လက်နက်သန့်စင်နန်းဆောင်ကမြင့်မားတဲ့ နည်းပညာတွေကို လိုက်စားတာ ကောင်းပေမဲ့ စည်းကမ်းတွေကို အရမ်းကြီး တင်းတင်းကျပ်ကျပ် ဆုပ်ကိုင်ထားစရာ မလိုဘူးလို့ ထင်တယ်...”

“အနည်းဆုံးတော့ ကိုယ့်ခြေထောက်ပေါ်ကိုယ် ရပ်တည်နိုင်ဖို့နဲ့ သုတေသန ရန်ပုံငွေ ရှာနိုင်ဖို့ လမ်းစလေး တစ်ခုတော့ ထားသင့်တယ်လေ”

ရှယောင်ယောင်က ခေတ္တမျှ တိတ်ဆိတ်သွားသည်။ သူမသည် စံပြရည်မှန်းချက်နှင့် လက်တွေ့ဘဝကြားတွင် ရွေးချယ်ရခက်နေကြောင်း ဝမ်မုသိလိုက်သည်။

“ကျွန်တော့်မှာ အကြံတစ်ခု ရှိတယ်။”

“ဘာလဲ”

“ကျွန်တော်တို့ ကုန်သည်အဖွဲ့က ပိုပြီး ကြီးထွားလာဦးမှာပါ။ နောက်ပိုင်းမှာ ကျွမ်းကျင်တဲ့ လက်နက်ပန်းပဲဆရာတွေရဲ့ အကူအညီ လိုအပ်မယ့် ကိစ္စတွေ အများကြီး ရှိလာလိမ့်မယ်...”

ထိုစကားကို ကြားသောအခါ ရှယောင်ယောင်၏ အကြည့်မှာ အနည်းငယ် အန္တရာယ်ရှိသော အသွင်သို့ ပြောင်းသွားသည်။

 -“ရှင်က... လက်နက်သန့်စင်နန်းဆောင် တစ်ခုလုံးကို ရှင့်ရဲ့လန်ယာကုန်သည်အဖွဲ့အတွက် ပစ္စည်းထုတ်ပေးတဲ့ အလုပ်ရုံအဖြစ် ပြောင်းပစ်ဖို့ ကြံနေတာလား”

“အဲဒါ ဖြစ်နိုင်ပါ့မလား”

“မဖြစ်နိုင်ဘူး” ရှယောင်ယောင်က ချက်ချင်းပင် မတ်တပ်ရပ်လိုက်ရာ သူမ၏ ရင်ဘတ်မှာ ဝမ်မု၏မျက်နှာနှင့် ကပ်လုနီးပါး ဖြစ်သွားသည်။

ဝမ်မု၏ နှုတ်ခမ်းများ တွန့်သွားသည်။ သူက လက်ကို ဝေ့ယမ်းကာ သူမကို ပြန်ထိုင်ရန် အချက်ပြလိုက်သည် - “စတာပါ၊ အရမ်း စိတ်မလှုပ်ရှားပါနဲ့”

ရှယောင်ယောင်က ဝမ်မုကို သံသယဖြင့် ကြည့်ကာ ပြန်ထိုင်လိုက်သည်။

“ကျွန်တော် တကယ်ပြောချင်တာက... လက်နက်သန့်စင်နန်းဆောင်က ထိပ်တန်းဆရာ အချို့ကို လွှတ်ပြီး ကျွန်တော်တို့ ကုန်သည်အဖွဲ့က လက်နက်ဆရာတွေကို လေ့ကျင့်ပေးဖို့ပါ”

“ပြီးတော့ ရေရှည်နည်းပညာ အကြံပေးတွေအဖြစ် လုပ်ပေးဖို့ပေါ့။ ကျွန်တော်တို့ အခက်အခဲတွေ ကြုံတဲ့အခါ ကူညီပေးရုံပါပဲ။ ဂိုဏ်းရဲ့ လျှို့ဝှက်နည်းစနစ်တွေကို သင်ပေးဖို့ မလိုပါဘူး။ သူတို့ရဲ့ လက်ရာတွေက အပြင်က အလုပ်ရုံတွေထက် အများကြီး သာလွန်နေဖို့ပဲ အာမခံပေးရမှာ”

“အဲဒီအတွက် ကျွန်တော်တို့က အတိုင်ပင်ခံကြေးနဲ့ နည်းပညာ လမ်းညွှန်ခကြေးတွေကို မင်းတို့ ကျေနပ်လောက်တဲ့အထိ ပေးပါ့မယ်။

ဒီလိုဆိုရင် မင်းတို့ဂိုဏ်းက လူအများစုက သုတေသနကိုပဲ အာရုံစိုက်နိုင်ပြီး အားနေတဲ့လူ အနည်းငယ်က ပိုက်ဆံထွက်ရှာလို့ ရတာပေါ့။ နှစ်ဦးနှစ်ဖက် အဆင်မပြေဘူးလား”

ဝမ်မု၏အသံမှာ ပင်လယ်လေပြေကဲ့သို့ နူးညံ့နေပြီး လူတိုင်း၏ နားထဲသို့ ရောက်ရှိသွားသည်။ ဆူညံနေသော ပွဲမှာ ငြိမ်ကျသွားပြီး လူတိုင်းက ထိုအဆိုပြုချက်ကို စဉ်းစားနေကြတော့သည်။

ဝမ်မုသည် သူတို့ကိုအနှောင့်အယှက် မပေးတော့ဘဲ ရှယောင်ယောင်၏ပုခုံးကို ပုတ်ကာ အပြင်သို့ ထွက်၍လေညင်းခံရင်း ငြိမ်သက်စွာ စောင့်နေလိုက်သည်။

လန်ယာကုန်သည်အဖွဲ့ ကြီးထွားလာသည်နှင့်အမျှ ကိုယ်ပိုင်စက်ရုံများ လိုအပ်လာမည်ကို သူ သိသည်။ သူ၏နောက်ထပ် စိတ်ကူးများအတွက် ကျွမ်းကျင်သောလက်နက်ဆရာများမှာ အခြေခံအုတ်မြစ်ပင် ဖြစ်သည်။

တော်တော်ကြာမှ... ရှယောင်ယောင်သည် တပည့်များနှင့် တိုင်ပင်ပြီးနောက် အပြင်သို့ ထွက်လာသည်။

“ကျွန်မတို့ ဆုံးဖြတ်လိုက်ပြီ”

ဝမ်ရှို့က သူမကို တည်ငြိမ်စွာ လှည့်ကြည့်လိုက်သည်။

“လက်ခံတယ်”

“အတူတူ အလုပ်လုပ်ရတာ ဝမ်းသာပါတယ်”

 ဝမ်မုက ပြုံးရင်း လက်ကမ်းလိုက်သည်။ ရှယောင်ယောင်က ခေတ္တ တွေဝေသွားပြီးမှ သူမ၏နူးညံ့လှသော လက်ကလေးကို ကမ်း၍ ဝမ်ရှို့နှင့် လက်ဆွဲနှုတ်ဆက်လိုက်တော့သည် - “ကျွန်မလည်း ဝမ်းသာပါတယ်...”

ထိုညမှာပင် ဆက်သွယ်ရေးအဆောင်များမှာ လန်ယာကုန်သည်အဖွဲ့ ရုံးချုပ်သို့ ရောက်ရှိသွားသည်။

“ရောက်ပြီ ရောက်ပြီ ဆက်သွယ်ရေးအဆောင်တွေ ရောက်ပါပြီ”

“နောက်ဆုံးတော့ ပစ္စည်းရောက်လာပြီပေါ့”

“တော်သေးတာပေါ့ မရောက်လာရင် ဟိုလူတွေက ငါတို့ကုန်သည်အဖွဲ့ကို ဖျက်ဆီးပစ်တော့မလားပဲ”

ဌာနတိုင်းမှာ အလုပ်များကုန်ကြသည်။ ပစ္စည်းခွဲဝေခြင်း၊ ပို့ဆောင်ခြင်း၊ အော်ဒါများ အတည်ပြုခြင်းတို့ဖြင့် မအားမလပ် ဖြစ်နေကြသော်လည်း ပျော်ရွှင်နေကြသည်။

နောက်ရက်ပိုင်းအတွင်း... မြောက်ပိုင်းပင်လယ် တစ်ခုလုံးမှာ ဆက်သွယ်ရေးအဆောင် ဂယက်က ထပ်မံ ထွက်ပေါ်လာပြန်သည်။ အဆောင်၁၀ သန်းမှာ စျေးကွက်ထဲသို့ စီးဝင်သွားသော်လည်း ကျင့်ကြံသူ အလွန်များပြားလှသော မြောက်ပိုင်းပင်လယ်အတွက်မူ သမုဒ္ဒရာထဲ ရေတစ်စက် ချလိုက်သလိုပင်။ လူအများအပြားမှာ ကြိုတင်မှာယူမှု စာရင်းထဲသို့ ထပ်မံ တိုးဝင်လာကြပြန်သည်။

အတိအကျ ထိုအချိန်မှာပင်...

ပန်လိုင်၊စီဟိုင်  နှင့်ယွန်းကုန်းကုန်သည်အဖွဲ့ကြီးသုံးခုကသူတို့၏ကိုယ်ပိုင်ဆက်သွယ်ရေးအဆောင်ပုံစံသစ်များကိုမကြာမီထုတ်ရောင်းတော့မည်ဖြစ်ကြောင်းကြေညာလိုက်တော့သည်။