အခန်း (၈၀)  ကောင်းကင်ခွန်းပန် နဂါးအသွင်ပြောင်းလက်ဝါး

"လန်ယာမော ဟုတ်လား"

"ဟုတ်တယ်။ တစ်ခုလုံးကို အကြမ်းဖျင်းအားဖြင့် အပိုင်းသုံးပိုင်း ခွဲထားမယ်"

"ပထမက ဈေးဝယ်တဲ့အပိုင်း။ နေ့စဉ်ဘဝအတွက် လိုအပ်တဲ့ ကျင့်ကြံခြင်း အထောက်အကူပြုပစ္စည်းတွေ ဒါမှမဟုတ် အပန်းဖြေဖို့ပစ္စည်းတွေအားလုံးကို အစီအရင်မှာ စာရင်းတင်ထားမယ်။ လန်ယာဆက်သွယ်ရေးအဆောင်ကို ကိုင်ထားတဲ့သူတွေက ဒီအစီအရင်ကို ဖွင့်ပြီး စိတ်ကြိုက်ဝယ်ယူနိုင်မယ်"

"ဒုတိယက ကုန်သည်အပိုင်း။ ကုန်သည်တွေအားလုံးက သူတို့ဆိုင်ရဲ့နာမည်ကြီး ပစ္စည်းတွေကို ဒီအစီအရင်မှာ တင်ရောင်းလို့ရမယ်"

"တတိယက ပစ္စည်းပို့တဲ့အပိုင်း။ ဧည့်သည်က ဝယ်ယူပြီးလို့ ကုန်သည်က ပစ္စည်းပြင်ဆင်ပြီးတာနဲ့ အထူးဝန်ထမ်းတစ်ယောက်က ပစ္စည်းကို သွားယူပြီး ဝယ်သူရဲ့ လိပ်စာအတိုင်း အိမ်ကိုအရောက် ပို့ဆောင်ပေးမယ့် ဝန်ဆောင်မှုမျိုးပေါ့"

ဝမ်မု၏ရှင်းပြချက်ကို နားထောင်ပြီးနောက် ရှယောင်ယောင်က ခေတ္တစဉ်းစားပြီး - "ဒါက ပစ္စည်းပို့ဆောင်ရေးဆိုင်တွေနဲ့ တူတာပဲလား"

ဝမ်မုအနည်းငယ် ကြောင်သွားပြီးမှ ခေါင်းညိတ်လိုက်သည် - "အတိအကျပါပဲ"

ဤခေတ်တွင် "ပါဆယ်" ဝန်ဆောင်မှုမျိုး ရှိသော်လည်း ၎င်းမှာ ကြီးမားသော စားသောက်ဆိုင်ကြီးအချို့တွင်သာ ရှိတတ်သည်။

အကယ်၍ ဧည့်သည်က အပြင်ထွက်မစားချင်ပါက အစေခံများကို ဆိုင်သို့လွှတ်၍ မှာယူစေပြီး ပို့ဆောင်ပေးရမည့် အချိန်ကို ပြောခဲ့ရသည်။ ထိုအခါမှ ဆိုင်က လူလွှတ်၍ အိမ်အရောက်ပို့ပေးခြင်း ဖြစ်သည်။

"ဒါပေမဲ့ ပစ္စည်းပို့ဆောင်ရေးဆိုင်တွေမှာ ကန့်သတ်ချက်တွေ အများကြီး ရှိတယ်။ စည်းကမ်းတွေကလည်း ရှုပ်ထွေးတယ်၊ ဝန်ဆောင်မှု ပေးနိုင်တဲ့ နယ်မြေကလည်း ကျဉ်းပြီး အကွာအဝေးကလည်း နီးလွန်းတယ်"

"ကျွန်တော် တည်ဆောက်ချင်တာက မြောက်ပိုင်းပင်လယ် တစ်ခုလုံး ဒါမှမဟုတ် မြောက်ပိုင်းဒေသရဲ့ အခြားနယ်မြေတွေအထိပါ လွှမ်းခြုံနိုင်တဲ့ အကြီးစား အွန်လိုင်း ဈေးဝယ်အစီအရင်ကြီးတစ်ခုလုပ်ချင်တာ"

ထိုစကားကို ကြားသောအခါ ရှယောင်ယောင်နှင့် တင်းတင်းတို့၏ မျက်လုံးများမှာ တောက်ပသွားတော့သည်။

အထူးသဖြင့် တင်းတင်း ဖြစ်သည်။ သူမသည် ထက်မြက်သူဖြစ်ပြီး ငယ်စဉ်ကတည်းက စီးပွားရေးလောကတွင် ကျင်လည်ခဲ့သူဖြစ်သဖြင့် ဝမ်မု၏ ရည်ရွယ်ချက်ကို ချက်ချင်း ရိပ်မိလိုက်သည်။

စဉ်းစားကြည့်ပါ။ နောင်တွင် ကျွန်းတစ်ခုတွင် ကျင့်ကြံနေသော ကျင့်ကြံသူတစ်ဦးသည် ဆေးလုံးတစ်မျိုး ပြတ်လပ်သွားသော်လည်း ကျင့်ကြံမှုကို အနှောင့်အယှက်မဖြစ်စေရန် အပြင်မထွက်ချင်သည့်အခါ သူ၏ ဆက်သွယ်ရေးအဆောင်ကိုထုတ်၍ မှာယူလိုက်ရုံဖြင့် မိုင်ပေါင်း ထောင်ချီဝေးသော နေရာမှ တစ်စုံတစ်ယောက်က ပစ္စည်းကို အရောက်လာပို့ပေးမည်ဆိုလျှင် မည်မျှ အဆင်ပြေလိုက်မည်နည်း။

ဤသည်မှာ ခေတ်သစ်တစ်ခုကို စတင်လိုက်ခြင်း ဖြစ်သည်ဟု ပြောလျှင်ပင် မမှားပေ။

ဧည့်သည်များအနေဖြင့် ထိုကဲ့သို့ အဆင်ပြေသော ဝန်ဆောင်မှုကို တစ်ကြိမ် ခံစားဖူးသွားလျှင် ယခင်ကလို ဆိုင်များသို့ ကိုယ်တိုင်သွား၍ပင်ပင်ပန်းပန်း ရွေးချယ်ရသော နေ့ရက်များကို ပြန်သွားရန် အလွန်ခက်ခဲပေလိမ့်မည်။

အကယ်၍ သခင်လေး၏အစီအစဉ်သာ အောင်မြင်သွားပါက ဤလောကရှိ မည်သည့် ကုန်သည်အဖွဲ့ကမျှ လန်ယာကုန်သည်အဖွဲ့ကို ယှဉ်နိုင်တော့မည် မဟုတ်ပေ။

သို့သော် စိတ်ကူးမှာ လှပသော်လည်း လက်တွေ့ဖော်ဆောင်ရန်မှာမူ အလွန်ခက်ခဲပေလိမ့်မည်။ လိုအပ်သော လူအင်အားနှင့် ရင်းမြစ်များမှာ ကိန်းဂဏန်းများကဲ့သို့ များပြားပေလိမ့်မည်။

"ဆက်သွယ်ရေးအဆောင်တွေက ရောင်းပြီးသားတွေလေ။ တကယ်လို့ ဒီလို လုပ်ဆောင်ချက်မျိုး ဖန်တီးနိုင်ခဲ့ရင်တောင် ဝယ်ပြီးသား လူတွေဆီမှာပါ ဒီဝန်ဆောင်မှု ရအောင် ဘယ်လိုလုပ်မလဲ" ဟု တင်းတင်းက ဇဝေဇဝါဖြင့် မေးလိုက်သည်။

"အဲဒါအတွက် စိတ်မပူနဲ့" ရှယောင်ယောင်က သူမ၏နှုတ်ခမ်းကို စေ့လိုက်ပြီး မျက်လုံးများမှာ စိတ်လှုပ်ရှားမှုဖြင့် ပြည့်နေသည် - "သခင်လေးဝမ်က ကျွန်မကို ဆက်သွယ်ရေးအဆောင်တွေ အထူးလုပ်ခိုင်းတုန်းကအဆောင်တိုင်းပေါ်မှာ အမှတ်အသား တစ်ခုစီ ထည့်ခိုင်းထားခဲ့တယ်..."

"ဒီအမှတ်အသားတွေက အဆောင်တစ်ခုချင်းစီရဲ့ အချက်အလက်တွေကို သိမ်းထားပေးပြီး ဗဟိုထိန်းချုပ်စနစ်ဖြစ်တဲ့ ကောင်းကင်နှလုံးသားကျောက်တုံးနဲ့ ဆက်သွယ်ထားတာ"

"အရင်ကဆက်သွယ်ရေးအဆောင် လုပ်ရတာ ဘာလို့ဒီလောက် အလုပ်ရှုပ်ခံနေရတာလဲလို့ ကျွန်မစဉ်းစားနေတာ။ အခုမှပဲ ဒီအဆင့်အတွက်ဆိုတာ သိတော့တယ်"

"ကောင်းကင်နှလုံးသားကျောက်တုံးကို ကြားခံအဖြစ် သုံးပြီး အချောသတ်ထားတဲ့ ဝင်္ကပါအသီအရင်ကို အဲဒီပေါ်မှာ ထွင်းထုလိုက်တာနဲ့ ဆက်သွယ်ရေးအဆောင် အားလုံးမှာ တစ်ပြိုင်နက်တည်း အပြောင်းအလဲ ဖြစ်သွားမှာပဲ"

ဝမ်ရှို့က ခေါင်းညိတ်လိုက်သည် - "အဲဒါ ကျွန်တော် စဉ်းစားထားတဲ့ အချက်ပဲ"

"ထက်မြက်လိုက်တာ တကယ်ကိုထက်မြက်လွန်းတယ်။ ဒါက လုံးဝသစ်လွင်တဲ့ အတွေးအခေါ်ပဲ အရင်က တစ်ခါမှမရှိဖူးသေးတဲ့ပုံစံမျိုးပဲ" ရှယောင်ယောင်၏ အသက်ရှူသံများမှာ မြန်ဆန်လာပြီး ရင်ဘတ်မှာ နိမ့်ချည်မြင့်ချည် ဖြစ်လာတော့သည်။

သူမသည် မနေနိုင်တော့ဘဲ မတ်တပ်ရပ်ကာ အပြင်သို့ အမြန်ထွက်သွားတော့သည် "ကျွန်မဆီက သတင်းကို စောင့်နေလိုက်"

တင်းတင်းမှာ အလျင်အမြန် ထွက်သွားသော သူမ၏ကျောပြင်ကို ကြည့်ကာ ဇဝေဇဝါဖြင့် - "အစ်မတော် ရှ ဘာဖြစ်သွားတာလဲ"

ဝမ်မုက ပြုံးလိုက်သည် - "သူမ လမ်းသစ်တစ်ခုကို မြင်သွားလို့ ဖြစ်မှာပါ"

လန်ယာမော၏ ဒီဇိုင်းတစ်ခုတည်းနှင့် ရှယောင်ယောင်ကို ဤမျှအထိ စိတ်လှုပ်ရှားအောင် မလုပ်နိုင်ပေ။ သူမကို စိတ်ထိန်းနိုင်စွမ်း ကင်းမဲ့သွားစေသည်မှာ ဝမ်မု၏ ကောင်းကင်နှလုံးသားကျောက်တုံးကို အသုံးချပုံကို နားလည်သွားခြင်းကြောင့် ဖြစ်သည်။ ဤသည်မှာ သတင်းအချက်အလက် ကွန်ရက်တစ်ခု၏ အခြေခံအုတ်မြစ်ပင် ဖြစ်သည်။

၎င်းမှာ ဝမ်မု၏ နောက်ဆက်တွဲ စီးပွားရေး အစီအစဉ်များ၏ အဓိကအနှစ်သာရလည်း ဖြစ်သည်။ သူ၏စိတ်ကူးများစွာမှာ သတင်းအချက်အလက် ကွန်ရက်တစ်ခု ရှိမှသာ ဖော်ဆောင်နိုင်မည်ဖြစ်သည်။ ဤသည်မှာ ဤလောကရှိ ရိုးရာစီးပွားရေး ပုံစံများထက် သူ သာလွန်နေသော အချက်ပင် ဖြစ်သည်။

ကျင့်ကြံခြင်းလောကတွင် ရိုးရာအတိုင်း ပညာသင်ကြားလာသော ရှယောင်ယောင်ကဲ့သို့ ကျင့်ကြံသူတစ်ဦးအတွက် ဤပုံစံမျိုးမှာ တစ်ခါမျှမကြုံဖူးသော အရာဖြစ်သည်။

တံခါးအသစ်တစ်ခု ပွင့်သွားသလိုပင်။ အက်ကြောင်းကလေး တစ်ခုစာလောက်သာ မြင်ရသေးလျှင်ပင် ထိုအက်ကြောင်းမှတစ်ဆင့် မဟာစကြာဝဠာကြီးကို မြင်လိုက်ရသလိုပင် အမှန်တကယ်တော့ ဝမ်မုကိုယ်တိုင်လည်း သတင်းအချက်အလက် နည်းပညာအကြောင်းကို သာမန်လောက်သာ သိခြင်း ဖြစ်သည်။

သို့သော် ကိစ္စမရှိပေ။ ဤသည်မှာ ကျင့်ကြံခြင်းလောကဖြစ်သဖြင့် သူ၏ယခင်ဘဝက စနစ်ကို ပုံတူကူးရန် မလိုအပ်ပေ။ ဝမ်မု လိုချင်သောရလဒ် ရနိုင်လျှင် မည်သည့်နည်းလမ်းမျိုးနှင့် ဖြစ်ဖြစ် ရပါသည်။

ထို့အပြင် ကျင့်ကြံခြင်းလောကရှိ ပါရမီရှင်များ၏နားလည်နိုင်စွမ်းဖြင့်ဆိုလျှင် မဟာတာအိုကဲ့သို့ ရှုပ်ထွေးသော အရာကိုပင် နားလည်နိုင်သေးလျှင် ကျန်သည့်အရာများမှာ ပြောနေစရာပင် မလိုတော့ပေ။

ကောင်းကင်မှာ တဖြည်းဖြည်း မှောင်လာသည်။ အေးမြသော လေပြေမှာ သူ၏ မျက်နှာကို လာရောက် ပွတ်သပ်သွားသည်။ ရင်ပြင်အတွင်း၌ ကြွေကျနေသော သစ်ရွက်များမှာ လေနှင့်အတူ ဝဲလွင့်နေပြီး ဝင်လုဆဲဆဲ နေရောင်အောက်တွင် ရွှေရောင်နှင့် နီရောင်များ ရောယှက်နေကာ လှပသော မြင်ကွင်းတစ်ခု ဖြစ်နေသည်။

ဤမြင်ကွင်းကို ကြည့်ရင်း ဝမ်မုသည် ရုတ်တရက် ခံစားချက်တစ်ခု ရလာသည်။ သူသည် ရင်ပြင်၏ အလယ်သို့ ရောက်သွားပြီး အနေအထား တစ်ခုကို ပြင်လိုက်သည်။

ဝူး—

နဂါးဟိန်းသံ တစ်ခု ထွက်ပေါ်လာသည်။ ဝမ်မု၏တစ်ကိုယ်လုံးတွင် ဝိညာဉ်အလင်းများ တောက်ပနေသည်။ သူ လှုပ်ရှားလိုက်တိုင်း ကြီးမားသော နဂါးရိပ်ကြီး တစ်ခုက သူနှင့်အတူ လိုက်ပါလှုပ်ရှားနေပြီး သူ၏အရှိန်အဝါမှာ ကောင်းကင်နှင့် မြေကြီးကို ဖန်ဆင်းနေသကဲ့သို့ ခံ့ညားလှသည်။

နဂါးအကြေးခွံ သံချပ်ကာ တစ်ခုမှာ သူ၏ တစ်ကိုယ်လုံးကို ဖုံးလွှမ်းသွားသည်။ သူ၏ လက်သီးများမှာလည်း နဂါးလက်သည်း အရိပ်များဖြင့် ဝန်းရံထားသည်။ သူ၏ လှုပ်ရှားမှုတိုင်းမှာ နဂါးစစ်စစ် တစ်ကောင်ကဲ့သို့ ဖြစ်နေပြီး သူ ဟိန်းဟောက်လိုက်တိုင်း ကောင်းကင်နှင့် မြေကြီးမှာ တုန်ခါသွားကာ ဟင်းလင်းပြင်ကိုပင် ခွဲပစ်နိုင်မည့်အလား ဖြစ်နေသည်။

"ကောင်းကင်နဂါး အသွင်ပြောင်းကျင့်စဥ်"

ဤသည်မှာ လင်းယန်က ရှေးဟောင်း နဂါးမျိုးနွယ်စု ပျက်စီးခြင်း နယ်မြေတစ်ခုမှ ရရှိခဲ့သော ရှေးဟောင်း နတ်ဘုရားစွမ်းရည်  ဖြစ်သည်။ ၎င်းသည် ခန္ဓာကိုယ်ကို သန်မာစေပြီး အနီးကပ်တိုက်ခိုက်ရေး နည်းစနစ်များကို အစွမ်းကုန် မြှင့်တင်ပေးနိုင်သည်။

အထွတ်အထိပ်သို့ ရောက်ပါက ပြိုင်ဘက်ကင်းသူ ဖြစ်လာပေလိမ့်မည်။

လင်းယန်သည် မူလက  နဂါးသွေးတစ်စက်ကို သုံး၍ ဤကျင့်စဉ်၏ အခြေခံအဆင့်သို့ ဝင်ရောက်ရန် ရည်ရွယ်ခဲ့ခြင်း ဖြစ်သည်။

သို့သော် ဝမ်မုက လီယွမ်ဟွာကို လွှတ်၍ ပင်လယ်နဂါးပုလဲနှစ်လုံးကို ပို့ပေးခဲ့သည်။

 ဤသည်မှာ လင်းယန်၏ကျင့်စဉ်အတွက် ကျားမှာ အတောင်ပံ တပ်ပေးလိုက်သလို ဖြစ်သွားပြီး ၎င်း၏စွမ်းအားမှာ အဆပေါင်းများစွာ တိုးတက်သွားခဲ့သည်။

ဤအချိန်တွင် ဝမ်မုသည် နတ်ဘုရားစွမ်းရည် တစ်ခုတည်းနှင့် ကျေနပ်ခြင်း မရှိပေ။ သူ၏ မျက်လုံးများကို ဖွင့်လိုက် ပိတ်လိုက် လုပ်လိုက်သောအခါ.ဘယ်ဘက်မျက်လုံးမှာ စိမ်းရောင်၊ ညာဘက်မျက်လုံးမှာ ရွှေရောင် အလင်းများဖြင့် တောက်ပနေတော့သည်။

သူ၏ ကျောဘက်တွင် ကြီးမားသော ဝိညာဉ်ပုံရိပ်ကြီး နှစ်ခုပေါ်လာသည်။ ဘယ်ဘက်တွင် ကြီးမားသော နဂါးပြာနှင့် ညာဘက်တွင် အတောင်ပံဖြန့်ထားသော ကောင်းကင်ခွန်းပန် ငှက်ကြီး ဖြစ်သည်။ နှစ်ကောင်စလုံးမှာ ရှေးဟောင်းခေတ်က နာမည်ကြီးသော နတ်ဘုရား သားရဲများ ဖြစ်ကြသည်။

ယခုမူ သူတို့နှစ်ကောင်၏စွမ်းအားမှာ လူတစ်ယောက်တည်းဆီသို့ စုစည်းသွားခဲ့ပြီ။

ဘယ်လက်က - ကောင်းကင်နဂါး အသွင်ပြောင်းခြင်း ၊ ညာလက်က - ကောင်းကင်ခွန်းပန် နဂါးဖမ်းခြင်း 

နတ်ဘုရားစွမ်းရည်နှစ်ခုစလုံးမှာ ထိပ်တန်း အနီးကပ်တိုက်ခိုက်ရေး စွမ်းရည်များ ဖြစ်ကြသည်။ ယခု ဝမ်မုက တစ်ပြိုင်နက်တည်း အသုံးပြုလိုက်သောအခါ တစ်ခုနှင့်တစ်ခု ဆန့်ကျင်ခြင်းမရှိဘဲ တစ်သားတည်း ဖြစ်သွားသလိုပင် လိုက်ဖက်ညီစွာ ရောယှက်သွားတော့သည်။ ဤသည်မှာ ဝမ်မု၏ တာအိုသိ နတ်မင်းနှလုံးသား၏အစွမ်းပင် ဖြစ်သည်။

သူသည် နတ်ဘုရားစွမ်းရည်နှစ်ခုကို ပေါင်းစပ်ပြီးပို၍ ကြောက်မက်ဖွယ်ကောင်းသော တိုက်ခိုက်ရေး နည်းစနစ်သစ်တစ်ခုကို ဖန်တီးရန် ရည်ရွယ်လိုက်သည်။

ရင်ပြင်အတွင်း၌ နဂါးဟိန်းသံနှင့် ခွန်းပန်ငှက်တွန်သံများ အဆက်မပြတ် ပဲ့တင်ထပ်နေသည်။ ရှေးဟောင်း နတ်ဘုရား သားရဲကြီးများ တိုက်ခိုက်နေကြသလိုပင် ဖြစ်နေပြီး ထိုအရှိန်အဝါမှာ ကြည့်နေသူကိုပင် နှလုံးရပ်သွားစေနိုင်လောက်သည်။

တော်တော်ကြာမှ သူသည် လှုပ်ရှားမှုကို ရပ်လိုက်ပြီး ခံစားချက်အပြည့်ဖြင့်  "ဒီနတ်ဘုရားစွမ်းရည်နှစ်ခုစလုံးရဲ့ အဆင့်က တကယ်ကို မြင့်မားတာပဲ။ ကံကောင်းလို့ ငါ့ရဲ့ တာအိုသိ နတ်မင်းနှလုံးသားက အစွမ်းထက်နေလို့ပေါ့၊ မဟုတ်ရင်... ဒီနှစ်ခုကို ပေါင်းစပ်ဖို့ဆိုတာ လုံးဝ မဖြစ်နိုင်ဘူး"

ဝမ်မုသည် ပေါင်းစပ်လိုက်သော နတ်ဘုရားစွမ်းရည်သစ်ကို ကောင်းကင်ခွန်းပန် နဂါးအသွင်ပြောင်းလက်ဝါးဟု အမည်ပေးလိုက်သည်။

၎င်း၏ တိုက်ခိုက်ရေး စွမ်းအားမှာ ယခင်က တစ်ခုချင်းစီ အသုံးပြုသည်ထက် အဆပေါင်းများစွာ သာလွန်သွားခဲ့သည်။

"ငါ့ရဲ့ အခုတိုက်ခိုက်ရေး စွမ်းအားအရဆိုရင် သာမန် နတ်သားအဆင့်ကျင့်ကြံသူတစ်ယောက်က ငါ့ရဲ့တစ်ကွက်တည်းကိုတောင် ခံနိုင်မှာ မဟုတ်တော့ဘူး"

ပြိုင်ဘက်ကင်းသော ဆယ့်နှစ်ဆင့် ဖြစ်ရပ်ရှိ ရွှေအမြုတေနှင့် ခိုင်မာလှသော အခြေခံတို့ ပေါင်းစပ်လိုက်သောအခါ ဝမ်မုသည် အဆင့်တူ ကျင့်ကြံသူများထဲတွင် မော့ကြည့်ရန်ပင် မဖြစ်နိုင်သော အမြင့်သို့ ရောက်သွားခဲ့ပြီ ဖြစ်သည်။

သူသည် လက်ရှိတွင် ရွှေအမြုတေအဆင့်၏ ပထမအဆင့်တွင်သာ ရှိသေးသော်လည်း သူ၏တိုက်ခိုက်ရေး စွမ်းအားမှာ ထိုအဆင့်၏ ကန့်သတ်ချက်များကို ကျော်လွန်သွားခဲ့သည်မှာ ကြာလှပြီ ဖြစ်သည်။