အခန်း (၇၇)  ရွှေအမြုတေအဆင့်မှာ ရှိတာတွေ ငါ့မှာမရှိဘူးလား။

ဝူး

တစ်ခမ်းနားလုံး ရုတ်ရုတ်သဲသဲ ဖြစ်သွားသည်။ စကားပြောသံများ အားလုံးမှာ တစ်ခဏအတွင်း ပျောက်ကွယ်သွားပြီး ၎င်း၏အစား အံ့ဩမှင်သက်သံများနှင့် အသက်ရှူမှားသံများသာ ဟိန်းထွက်လာတော့သည်။

"ဒီလို ဖြစ်ရပ်မျိုးက... ဒဏ္ဍာရီထဲက ကမ္ဘာ့အဆင့်ဆက်သွယ်ရေးအဆောင်လား"

"တကယ့်ကို နေရောင်အဆင့်ထက် အများကြီး ပိုပြီးတောက်ပတာပဲ"

"အဲဒါ... ချင်းယွန်းကျွန်းစုက လျိုမျိုးနွယ်စု ရဲ့ ဘိုးဘေး မဟုတ်လား နတ်သားအဆင့်မျိုးနွယ်စုတစ်ခုက ကမ္ဘာ့အဆင့် ဆက်သွယ်ရေး အဆောင်ကို တကယ်ပဲ ရထားတာလား"

"ကံကောင်းလို့ စောစောဝယ်မှီတာ ဖြစ်မှာပါ"

"တောက်... ဒီလူကတော့ အမြင်မရှိလိုက်တာ။ ဆရာကြီးရွှမ်ကုန်းကတောင် တစ်ခုမှ မရသေးဘူးလို့ အခုလေးတင် ပြောထားတာကို သူက အခုမှထုတ်ပြတာက ဆရာကြီးရဲ့ မျက်နှာကို ဖြတ်ရိုက်လိုက်သလို ဖြစ်မနေဘူးလား"

"ချင်းယွန်းက လျိုမျိုးနွယ်စုတော့... သိပ်မကြာတော့ဘူး ထင်တယ်"

လူအများက လျိုယင်ကို ကြည့်ကာ သနားသလိုလို လှောင်ပြောင်သလိုလိုဖြင့် ခေါင်းခါ သက်ပြင်းချနေကြသည်။

ရှရွှန်းထျန်းဂိုဏ်း၏ အရှိန်အဝါဖြင့်ဆိုလျှင် ဆရာကြီးရွှမ်ကုန်းက အမိန့်ပေးစရာပင် မလိုဘဲ ဆရာကြီး၏မျက်နှာသာရရန်အတွက် ကျင့်ကြံသူများစွာက လျိုမျိုးနွယ်စုကို ပစ်မှတ်ထား တိုက်ခိုက်ကြပေလိမ့်မည်။

လျိုမျိုးနွယ်စုမှာ ချင်းယွန်းကျွန်းစုတွင် ထိပ်တန်းအင်အားစုဖြစ်သော်လည်း ရှရွှန်းထျန်းဂိုဏ်း၏ရှေ့တွင်မူ ဘာမျှမဟုတ်ချေ။

လျိုယင်၏မျက်နှာမှာ အလွန်ပင် ဆိုးဝါးနေသည်။ ထိုအဘိုးကြီး ရှီဖန့်က အခွင့်အရေးကို အသုံးချပြီး သူ့ကို ဒုက္ခပေးလိုက်ခြင်း ဖြစ်သည်။

ပြီးခဲ့သည့်အပတ်က သူတို့နှစ်ဦး ဆက်သွယ်ရေးအဆောင်ဖြင့် စကားပြောစဉ်က အချက်တစ်ခုကို သတိထားမိခဲ့ကြသည်။

နှစ်ဖက်စလုံးက လန်ယာအမှတ်တံဆိပ်အဆောင်များကို ကိုင်ထားပါက တစ်ဖက်မှ စတင်ခေါ်ဆိုလျှင် အခြားတစ်ဖက်၏အဆောင်တွင်လည်း အလိုအလျောက် အထူးဖြစ်ရပ်များ ပေါ်ပေါက်လာပြီး တစ်ဦးနှင့်တစ်ဦး အပြန်အလှန် တုံ့ပြန်သည့် မြင်ကွင်းများ ဖြစ်ပေါ်လာတတ်သည်။

ဥပမာအားဖြင့် နဂါးနှစ်ကောင် ရစ်ပတ်ခြင်း၊ နဂါးနှင့်ကျား တိုက်ခိုက်ခြင်း သို့မဟုတ် နဂါးနှင့် ဖီးနစ် တွဲကစားခြင်း စသည်တို့ ဖြစ်သည်။

အကယ်၍ တစ်ဖက်၏အဆင့်မှာ အခြားတစ်ဖက်ထက် မြင့်မားနေပါက အဆင့်ကွာခြားမှုကို အလွန်ပင် သိသာစွာ ပြသလိမ့်မည်။ ဤသည်မှာ ကျင့်ကြံသူများ၏ ပြိုင်ဆိုင်လိုစိတ်ကို လှုံ့ဆော်ရန်အတွက်အဆောင် ဒီဇိုင်းစဆွဲစဉ်ကတည်းက ထည့်သွင်းထားသော လုပ်ဆောင်ချက် ဖြစ်သည်။

ယခုမူ ရှီဖန့်သည် ထိုအချက်ကို အသုံးချကာ လျိုယင်၏ကမ္ဘာ့အဆင့် ဆက်သွယ်ရေး အဆောင်ကို ကျင့်ကြံသူအားလုံးရှေ့တွင် ဖော်ထုတ်လိုက်ခြင်း ဖြစ်သည်။

လျိုယင်သည် ပေါ်ပေါက်လာသော အလင်းတန်းများကို ပျာပျာသလဲ ဖယ်ရှားလိုက်ပြီး အဆောင်ကို သူ၏သိုလှောင်အိတ်ထဲသို့ အမြန်ထည့်ရန် ကြိုးစားသော်လည်း နောက်ကျသွားပြီ ဖြစ်သည်။

အထက်မှဆရာကြီး ရွှမ်ကုန်း၏ အကြည့်များ ကျရောက်လာသည်။ ထိုအကြည့်မှာ တိတ်ဆိတ်သော်လည်း ကောင်းကင်ဘုံ၏ အရှိန်အဝါကဲ့သို့ ပြင်းထန်လှသဖြင့် လျိုယင်တစ်ကိုယ်လုံး တုန်လှုပ်ကာ ချွေးစေးများ ထွက်လာပြီး မျက်နှာမှာ ဖြူလျော့သွားတော့သည်။

"မင်းက ဘယ်အင်အားစုက ကျင့်ကြံသူလဲ"

 ဆရာကြီးရွှမ်ကုန်းက အေးဆေးတည်ငြိမ်စွာ မေးလိုက်သော်လည်း ထိုအသံထဲတွင် မည်သည့် ခံစားချက်မျှ ပါမလာပေ။

လျိုယင်က အမြန် မတ်တပ်ရပ်ကာ အရိုအသေပေးလိုက်သည် - "ချင်းယွန်းကျွန်းစုက လျိုမျိုးနွယ်စုရဲ့ လျိုယင် ဆရာကြီးကို ဂါရဝပြုပါတယ်"

ဆရာကြီးရွှမ်ကုန်းက ထိုအမည်ကို မကြားဖူးသော်လည်းတည်ငြိမ်စွာပင် - "မင်းရဲ့ ကံတရားက တော်တော်ကောင်းတာပဲ ငါ့ထက်တောင် ပိုသာနေသလားလို့"

ထိုစကားကို ကြားသောအခါ လျိုယင် ပို၍ တုန်လှုပ်သွားပြီး နှုတ်ခမ်းများပင် ဖြူလာတော့သည်။ မည်သို့ရှင်းပြရမည်ကို သူမသိတော့ပေ။ ဤပစ္စည်းကို ဆရာကြီးအား လက်ဆောင်အဖြစ် ဆက်သလိုက်ရမလား။

အကယ်၍ ဆရာကြီးက ငါက သူတစ်ပါးရဲ့ အမြတ်နိုးဆုံးပစ္စည်းကို လုယူမယ့်သူလား ဟု ပြောလိုက်လျှင် ပို၍ဒုက္ခရောက်မည် မဟုတ်လား သို့သော် ဘာမျှမပြောဘဲ နေလျှင်လည်း သေလမ်းပင် ဖြစ်သည်။

သူ ဘာပြန်ပြောရမည်ကို အသည်းအသန် စဉ်းစားနေစဉ်မှာပင် ကျိုးဖင်း၏မျက်လုံးများက စူးရှသွားပြီး ဝင်ပြောလိုက်သည် - "မိတ်ဆွေရဲ့ ဆက်သွယ်ရေးအဆောင်ကို ကျွန်တော် ခဏလောက် ကြည့်လို့ ရမလား"

လျိုယင်မှာ အနည်းငယ် ကြောင်သွားပြီးမှအဆောင်ကို အမြန်ဖြုတ်ကာ လက်နှစ်ဖက်ဖြင့် ဆက်သလိုက်သည် - "ရပါတယ်... ရပါတယ် ခင်ဗျာ"

ကျိုးဖင်းက လက်ကိုဝှေ့ယမ်းလိုက်ရာအဆောင် သူ၏လက်ထဲသို့ ပျံဝင်လာသည်။

 ခဏမျှ သေသေချာချာ ကြည့်ပြီးနောက် သူက ခေါင်းညိတ်လိုက်သည် "ဒါကြောင့်ကိုး"

ဆရာကြီးရွှမ်ကုန်းက ဇဝေဇဝါဖြင့် - "မန်နေဂျာချုပ်ကျိုး... ဘာဖြစ်လို့လဲ"

ကျိုးဖင်းက ပြုံးကာ ပြောလိုက်သည် - "ဒီလျိုမျိုးနွယ်စုရဲ့ ကမ္ဘာ့အဆင့်ဆက်သွယ်ရေးအဆောင်က ဝိညာဉ်ကျောက်တုံးနဲ့ ဝယ်ထားတာ မဟုတ်ပါဘူး၊ ကျွန်တော်တို့ ကုန်သည်အဖွဲ့က လက်ဆောင်ပေးထားတာပါ"

"အော်... ဟုတ်လား"

"ဆရာကြီး ကျွန်တော်တို့ ကုန်သည်အဖွဲ့က တည်ထောင်ထားတဲ့ လန်ယာဖောင်ဒေးရှင်း အကြောင်း ကြားဖူးမှာပေါ့"

"ကြားဖူးပါတယ် မင်းတို့ ကုန်သည်အဖွဲ့က ကမ္ဘာပေါ်က ဒုက္ခတွေကို ကယ်တင်ဖို့ အရင်းအနှီး အများကြီး စိုက်ထုတ်ထားတယ်ဆိုတာ... ငါလည်း တကယ်ကို လေးစားမိပါတယ်" ဆရာကြီးရွှမ်ကုန်းက ခေါင်းညိတ်သည်။

"ဆက်သွယ်ရေးအဆောင်တွေ ထုတ်ရောင်းတဲ့အခါမှာ သခင်လေးက အထူးမှာကြားထားတာ ရှိပါတယ်။ ကမ္ဘာ့အဆင့်အဆောင် တစ်သုတ်ကို ဖယ်ထားပြီး နယ်မြေအသီးသီးမှာ ကံအကျိုး​ပေးအဆင့် သတ်မှတ်ချက် အမြင့်ဆုံးရထားတဲ့သူတွေကို လက်ဆောင်ပေးဖို့ပါ။ ဒါက လန်ယာဖောင်ဒေးရှင်းရဲ့ ကောင်းမှုကုသိုလ် လုပ်ငန်းတွေကို ဝိုင်းဝန်းကူညီပေးကြတဲ့ မိတ်ဆွေတွေကို ကျေးဇူးတင်တဲ့ အထိမ်းအမှတ်ပါပဲ"

ကျိုးဖင်းက ဆက်လက် ရှင်းပြသည် - "ဒီလို လက်ဆောင်ပေးတဲ့အဆောင်တွေပေါ်မှာ အထူးအမှတ်အသား ပါပါတယ်။ ဆရာကြီး ကြည့်ကြည့်ပါဦး"

ကျိုးဖင်း ညွှန်ပြသည့် နေရာကို ဆရာကြီး ရွှမ်ကုန်းက သူ၏ နတ်ဘုရားအာရုံဖြင့် ကြည့်လိုက်သောအခါ စာသားအချို့ကို မြင်လိုက်ရသည်။

ဖောင်ဒေးရှင်း၏ကုသိုလ်ရေး လုပ်ငန်းများကို ဝိုင်းဝန်းကူညီပေးသော ချင်းယွန်းမှ လျိုမျိုးနွယ်စုအား အထူးကျေးဇူးတင်ရှိလျက် လက်ဆောင်အဖြစ် ပေးအပ်ပါသည်။

ဆရာကြီး ရွှမ်ကုန်းက အံ့ဩသွားသည့် အမူအရာဖြင့် - "ကံအကျိုး​ပေးအဆင့် သတ်မှတ်ချက်မှာ ထိပ်ဆုံးက ရှိရင် ဒီလို လက်ဆောင် ရနိုင်တာလား"

ကျိုးဖင်းက ခေါင်းညိတ်သည် - "အတိအကျပါပဲ"

ရွှမ်ကုန်းက ဆက်မေးသည် - "ဒါဆိုရင် အဲဒီ ထိပ်ဆုံးနေရာကိုရဖို့ လန်ယာဖောင်ဒေးရှင်းကို ငါ ဘယ်လောက် လှူရမလဲ"

ဤကဲ့သို့သော အဆင့်မြင့်ပုဂ္ဂိုလ်များသည် သာမန်အချိန်တွင် လောကီရေးရာများကို စိတ်မဝင်စားဘဲ တရားအားထုတ်ခြင်းဖြင့်သာ အချိန်ကုန်ဆုံးကြသူများ ဖြစ်သည်။

ထို့ကြောင့် မိမိနှင့် မပတ်သက်သော ဖောင်ဒေးရှင်းအကြောင်းကို သူ အသေးစိတ်မသိပေ။

ကျိုးဖင်းက စိတ်ရှည်စွာဖြင့် - "ကျွန်တော်တို့ ဖောင်ဒေးရှင်းက တိုက်ရိုက် အလှူငွေကို လက်မခံပါဘူး။ ဆရာကြီးက စိတ်ဝင်စားတယ်ဆိုရင်တော့ ဂိုဏ်းသားတွေကို ကျွန်တော်တို့ ကုန်သည်အဖွဲ့ရဲ့ ပစ္စည်းတွေကို ပိုပြီး အားပေးခိုင်းလို့ ရပါတယ်။ ပြီးတော့ ပစ္စည်းတွေ ဝယ်တဲ့အခါမှာ ဆရာကြီးရဲ့ အမည် ဒါမှမဟုတ် ဂိုဏ်းရဲ့အမည်နဲ့ ဝယ်ယူရုံပါပဲ နောက်တစ်ကြိမ် အဆင့်သတ်မှတ်ချက် ထုတ်ပြန်ဖို့ နှစ်လကျော် ကျန်ပါသေးတယ်၊ အချိန်မီပါသေးတယ်"

"ဒါဆိုရင်တော့ ဟုတ်ပြီ" ဆရာကြီးရွှမ်ကုန်းက နားလည်သွားပြီး ဘေးမှ လူများကို အမိန့်ပေးလိုက်သည် - "ဒီနေ့ကစပြီး ငါတို့ဂိုဏ်းက တပည့်တွေ ကျင့်ကြံခြင်းအတွက် လိုအပ်တဲ့ ပစ္စည်းတွေ ဝယ်ရင် လန်ယာကုန်သည်အဖွဲ့မှာပဲ သွားဝယ်ကြ ပြီးတော့ ဂိုဏ်းရဲ့အမည်ကိုပဲ စာရင်းပေးကြ"

"ဟုတ်ကဲ့ပါ ဆရာကြီး"

ဆရာကြီး ရွှမ်ကုန်း၏အကြည့်မှာ ကျိုးဖင်း လက်ထဲမှ ဆက်သွယ်ရေးအဆောင်ပေါ်သို့ တစ်ဖန် ရောက်သွားပြန်သည် - "မင်းတို့ ကုန်သည်အဖွဲ့ရဲ့အဆောင်အသစ်က တကယ်ကို ဆွဲဆောင်မှု ရှိတာပဲ အထူးသဖြင့် ဒီကမ္ဘာ့အဆင့်က ငါတို့လိုအဆင့်အတန်းနဲ့မှ လိုက်ဖက်မှာ"

ထိုစကားကို ကြားသောအခါ လျိုယင်က ချက်ချင်း တုံ့ပြန်လိုက်သည် - "ဆရာကြီး ကြိုက်တယ်ဆိုရင် ဒါကို ယူထားပြီး ကစားကြည့်ပါဦး။ ကျွန်တော့်လို လူငယ်အတွက်ကတော့ ဒါကသိပ်ပြီး သုံးစရာ မလိုပါဘူး"

ဆရာကြီး ရွှမ်ကုန်းက မျက်မှောင်ကြုတ်ကာ အနည်းငယ် စိတ်လှုပ်ရှားသွားသော်လည်း ခေါင်းခါလိုက်သည် - "ဒါက လန်ယာကုန်သည်အဖွဲ့က မင်းတို့ လျိုမျိုးနွယ်စုကို ပေးထားတဲ့ ရတနာပဲ ငါတို့ ရှရွှန်းထျန်းဂိုဏ်းက ဒါကို ဘယ်လိုလုပ် သိမ်းယူလို့ ဖြစ်ပါ့မလဲ"

အကယ်၍ ဤအဆောင်၏ရင်းမြစ်ကို သူ မသိခဲ့လျှင်တော့ တစ်မျိုးပေါ့။ သို့သော် ကျိုးဖင်းက ရှေ့တင် ရှင်းပြထားပြီး ဖြစ်သဖြင့် ၎င်းကို လက်ခံလိုက်ခြင်းမှာ ပူလောင်သော ခဲလုံးကို ကိုင်ထားသလို ဖြစ်နေပေလိမ့်မည်။

တစ်နည်းအားဖြင့် လန်ယာကုန်သည်အဖွဲ့က လျိုမျိုးနွယ်စုကို ဤအဆောင်ကိုလက်ဆောင် ပေးထားခြင်းမှာ လျိုမျိုးနွယ်စုကို သူတို့၏ အရေးကြီးသော ဖောက်သည်အဖြစ် သတ်မှတ်လိုက်ခြင်းပင်ဖြစ်သည်။ မည်သူကပင် ဤအဆောင်ကို လုယူရန် ကြိုးစားပါစေ ၎င်းမှာ လန်ယာကုန်သည်အဖွဲ့ကို ဂရုမစိုက်သလို ဖြစ်သွားပေလိမ့်မည်။

အတိုချုပ်ပြောရလျှင် လန်ယာကုန်သည်အဖွဲ့က ပေးသောရတနာကြောင့် လျိုမျိုးနွယ်စုမှာ အန္တရာယ်ဖြစ်သွားလျှင် သို့မဟုတ် ပျက်စီးသွားလျှင် လန်ယာကုန်သည်အဖွဲ့အတွက်လည်း မျက်နှာပျက်စရာဖြစ်သည်။

ကျင့်ကြံခြင်းဆိုသည်မှာ လောကီရေးရာများကို ကျော်လွန်ရန် ကြိုးစားခြင်း ဖြစ်သော်လည်း နတ်ဘုရားအဆင့်သို့ မရောက်သေးသရွေ့ လူမှုရေးနှင့် လောကဝတ်များကို နားလည်ထားရန် လိုအပ်သည်။

နှစ်ပေါင်းများစွာ အသက်ရှင်နေသော ကျင့်ကြံသူများမှာ အလွန်ပါးနပ်ကြသည်။

သူတို့ အနည်းငယ် စဉ်းစားလိုက်ရုံဖြင့် ဤအချက်ကို နားလည်ကြသည်။ ဆက်သွယ်ရေး အဆောင်တစ်ခုအတွက်နှင့် လန်ယာကုန်သည်အဖွဲ့ကို ရန်စရခြင်းမှာ မထိုက်တန်ပေ။

ရှရွှန်းထျန်းဂိုဏ်း၏မွေးနေ့ပွဲမှ ထိုကိစ္စမှာ သေးငယ်သော အဖြစ်အပျက်ကလေးတစ်ခုသာ ဖြစ်သော်လည်း ၎င်းမှာ မြောက်ပိုင်းပင်လယ် ကျင့်ကြံခြင်းလောကတစ်ခုလုံး၏ ပုံရိပ်လည်း ဖြစ်သည်။

နောက်ပိုင်းရက်များတွင် လန်ယာကုန်သည်အဖွဲ့၏အခွဲများမှာ ယခင်ကထက်ပင် ပိုမို စည်ကားလာတော့သည်။ အရင်က အလတ်စားနှင့် အငယ်စားဂိုဏ်းများသာ ဒေသတွင်း ကံအကျိုးပေးအဆင့် သတ်မှတ်ချက်အတွက် ပြိုင်ဆိုင်ခဲ့ကြသော်လည်း ယခုမူ ဝိညာဉ်အသွင်ပြောင်းခြင်းအဆင့် အင်အားစုများပင်လျှင် တစ်ဦးပြီးတစ်ဦး ဝင်ရောက် ယှဉ်ပြိုင်လာကြတော့သည်။