အခန်း (၇၆)  ငါတို့ကုန်သည်အဖွဲ့မှာတော့ သခင်လေးစကားက အတည်ပဲ

ရက်အနည်းငယ် ကြာလာသည်နှင့်အမျှ ဆက်သွယ်ရေးအဆောင်အသစ်အပေါ် ကျင့်ကြံသူများ၏ စိတ်အားထက်သန်မှုမှာ လျော့ကျမသွားသည့်အပြင် ပို၍ပင်ပြင်းထန်လာခဲ့သည်။

အခြားနည်းလမ်းမရှိပေ သူတို့သည် ဤလှုံ့ဆော်မှုဒဏ်ကို မကြာခဏဆိုသလို ပြင်းပြင်းထန်ထန် ခံစားနေရသောကြောင့် ဖြစ်သည်။ မိမိကိုယ်မိမိ ခိုင်မာသော ကျင့်ကြံခြင်းစိတ်ဓာတ်ရှိသည်ဟု ယူဆကာ ပြင်ပအရာများကို ဂရုမစိုက်ဟု ဆိုကြသော ကျင့်ကြံသူများပင်လျှင်.မိမိထက် ကျင့်ကြံခြင်းအဆင့် နိမ့်ပါးသူများက တောက်ပပြီး ဆွဲဆောင်မှုရှိသော ဆက်သွယ်ရေးအဆောင်များကို ကိုင်ဆောင်ကာ သွားလေရာရာ၌ အားကျသည့် အကြည့်များကို ခံနေရသည်ကို မြင်သောအခါ သူတို့၏စိတ်အခြေခံမှာ စတင်တုန်လှုပ်လာတော့သည်။

ကျင့်ကြံခြင်းဆိုသည်မှာ ဘာအတွက်နည်း

အသက်ရှည်ဖို့လား ၎င်းမှာတစ်ပိုင်းဖြစ်သော်လည်း အမှန်တကယ် အောင်မြင်သူမှာ အလွန်နည်းပါးသည်။ နှစ်ပေါင်း ရာချီ အသက်ရှည်နေရခြင်းကိုလည်း အစစ်အမှန် ထာဝရအသက်ရှင်ခြင်းဟု မခေါ်ဆိုနိုင်ပေ။

ထို့အပြင် ဝေဝါးလှသော ထာဝရအသက်ရှင်ခြင်း ယုံကြည်ချက်တစ်ခုတည်းအတွက်နှင့် ခိုင်ခိုင်မာမာ ကျင့်ကြံနိုင်သူမှာ အလွန်နည်းပါးလှသည်။

အဆင့်နိမ့်ကျင့်ကြံသူ အများစုအတွက်မူ ကျင့်ကြံခြင်း၏ရည်ရွယ်ချက်မှာ ရိုးရှင်းပါသည် မိမိကိုယ်မိမိ သန်မာအောင်လုပ်ရန်၊ သူတစ်ပါး၏ အနိုင်ကျင့်ခြင်းကို မခံရစေရန်နှင့် ထို့နောက်တွင် မိမိက ပြန်လည်အနိုင်ကျင့် လွှမ်းမိုးနိုင်ရန် ဖြစ်သည်။ အနိုင်မကျင့်လျှင်တောင်မှ အားနည်းသူများ၏အထက်တွင် ရပ်တည်ကာ လူအများ၏ကိုးကွယ်ဆည်းကပ်မှုကို ခံယူပြီး လူတိုင်း၏အာရုံစိုက်ရာ ဗဟိုချက် ဖြစ်လိုကြသည်မှာ လက်တွေ့ဘဝပင် ဖြစ်သည်။ ၎င်းမှာ ထိတွေ့နိုင်သော ပျော်ရွှင်မှုနှင့် စိတ်လှုပ်ရှားမှုလည်း ဖြစ်သည်။

ယခုမူ မိမိထက်အဆင့်နိမ့်သူများက ဆက်သွယ်ရေး အဆောင်တစ်ခုဝယ်ရုံဖြင့် ထိုသို့သော အခွင့်အရေးမျိုးကို ရရှိနေကြသည်။

 ဤသည်ကို သူတို့မည်သို့ လက်ခံနိုင်ပါ့မည်နည်း နှစ်ပေါင်းများစွာ ခက်ခက်ခဲခဲ ကျင့်ကြံလာခဲ့သမျှမှာ ဟာသတစ်ခုဖြစ်သွားပြီလား။

ထို့ကြောင့် စိတ်ထဲတွင် အတန်ကြာ ရုန်းကန်ပြီးနောက် ကျင့်ကြံသူများစွာမှာအဆောင်အသစ်ကို ဝယ်ယူရန် ကြိုးပမ်းသူများထဲသို့ ပါဝင်လာကြတော့သည်။

ဘာလဲ လန်ယာကုန်သည်အဖွဲ့အခွဲတွေမှာ ပစ္စည်းပြတ်နေတယ် ဟုတ်လား ကြိုတင်မှာယူဖို့လိုတယ် ဟုတ်လား။

ဒါဆိုရင် တခြားလူတွေဆီကနေ တိုက်ရိုက်ဝယ်မယ်။

မင်း ဝိညာဉ်ကျောက်တုံး ၁၈၈ တုံးနဲ့ ဝယ်ထားတာကို ငါ ၅၀၀ ပေးမယ် ရောင်းမလား။

မင်း ဝိညာဉ်ကျောက်တုံး တစ်ထောင်ကျော်နဲ့ ဝယ်ထားတာကို ငါ တစ်သောင်းပေးမယ် မင်းကို ရောင်းမလား။

တစ်သောင်းကျော်ပေးရင် နေရောင်အဆင့် တစ်ခု ဝယ်လို့ရတယ်လို့ ပြောချင်တာလား။

စိတ်မရှိပါနဲ့ အဲဒီပစ္စည်းကို အခုတစ်သောင်းကျော်နဲ့ ဝယ်လို့မရတော့ဘူး။ အနည်းဆုံး ဝိညာဉ်ကျောက်တုံး ငါးသောင်း၊ ခြောက်သောင်းလောက် ပေးရမယ် အဲဒါတောင် အသုံး​ပြုပြီးသား ဖြစ်နေလိမ့်ဦးမယ်။

ရှေးစကားအတိုင်းပင် ကျင့်ကြံသူတစ်ဦး၏ အဆင့်တစ်ခုတိုးတက်သွားတိုင်း သူပိုင်ဆိုင်သည့် အခွင့်အရေးနှင့် သုံးစွဲနိုင်သော အရင်းအမြစ်မှာ မိုးနှင့်မြေလို ကွာခြားသွားတတ်သည်။ အဆင့်မြင့် ကျင့်ကြံသူများသည် အဆင့်နိမ့်ကျင့်ကြံသူများထက် ဝိညာဉ်ကျောက်တုံး ရာချီ၊ ထောင်ချီကို ပို၍ လွယ်လွယ်ကူကူ ရှာဖွေနိုင်ကြသည်။

ထို့ကြောင့် ဤဆိုးဝါးလှသော အခြေအနေအောက်တွင် လန်ယာအမှတ်တံဆိပ် ဆက်သွယ်ရေးအဆောင် အမျိုးအစားအားလုံး၏ စျေးနှုန်းမှာ ထိုးတက်ကုန်တော့သည်။

အထူးသဖြင့် မှောင်ခိုစျေးကွက်တွင် စျေးနှုန်းမှာ လန်ယာ၏သတ်မှတ်စျေးထက် ဆယ်ဆမက မြင့်တက်နေပြီး တားဆီး၍မရနိုင်တော့ပေ။

အဆိုးဝါးဆုံးမှာ ကမ္ဘာ့အဆင့်ဆက်သွယ်ရေး အဆောင်ဖြစ်သည်။ ဤပစ္စည်း၏ အရေအတွက်မှာ အစကတည်းက နည်းပါးလှသည်။ ၎င်းကို လန်ယာကုန်သည်အဖွဲ့ ရုံးချုပ်ကသာ တိုက်ရိုက်ထိန်းချုပ်ထားပြီး အစောပိုင်း ရောင်းချချိန်တွင် အခွဲများ၌ တစ်ခါမျှ မပေါ်ဖူးပေ။ စရန်ငွေပေးကာ ကြိုတင်မှာယူထားသည့် ပထမအသုတ်လူများသာ ပစ္စည်းရရန် သေချာသည်။

နောက်မှ ဝယ်ယူသူများအတွက်မူ ပိုက်ဆံပေးခြင်းသည် နံပါတ်တစ်ခုဝယ်ယူခြင်းသာရှိတော့သည် "ကမ္ဘာ့အဆင့်ငှက်နီဆက်သွယ်ရေးအဆောင်အတွက် ကြိုတင်မှာယူမှု နံပါတ်ပြားအမှတ်စဉ် ၈၆,၀၀၀... ဝိညာဉ်ကျောက်တုံး သုံးသောင်းပါ"

အရောင်းအဝယ် ဈေးကွက်တစ်ခုတွင် ကျင့်ကြံသူတစ်ဦးသည် ဆိုင်းဘုတ်ကို မြှောက်ကာ အော်ဟစ်ရောင်းချနေသည်။ မကြာမီ လူအုပ်ကြီး ဝိုင်းလာတော့သည်။

"မိတ်ဆွေ... မင်းရဲ့နံပါတ်က ငါးသောင်းအတွင်းတောင် မရှိဘဲနဲ့ ဒါက အရမ်း စျေးမကြီးလွန်းဘူးလား" ကျင့်ကြံသူ အမျိုးသမီးတစ်ဦးက မျက်မှောင်ကြုတ်ကာ မေးလိုက်သည်။

"စျေးကြီးတယ်ဟုတ်လား အစ်မတော် သေသေချာချာ စုံစမ်းကြည့်ပါဦး အခု နံပါတ်တွေက တစ်သိန်းခွဲနှစ်သိန်းနား ရောက်နေပြီ။

ကျွန်တော့်ရဲ့ ရှစ်သောင်းကျော်ဆိုတာ အစောကြီး ရှိပါသေးတယ်"

"စျေးလျှော့ပေးပါဦး ကျွန်မတို့ရဲ့ဆရာသခင်က နောက်နှစ်နှစ်ဆိုရင် အသက်တစ်ထောင်ပြည့်တော့မှာ အဲဒါကြောင့် ဒါကို မွေးနေ့လက်ဆောင်အဖြစ် ဝယ်ပေးချင်လို့ပါ။ စျေးလျှော့ပေးမယ်ဆိုရင် အခုချက်ချင်း ယူလိုက်မယ်"

"တကယ် လျှော့လို့မရလို့ပါ အစ်မတော်ရယ်၊ ဒီနံပါတ်ရဖို့ ကျွန်တော် တော်တော် ကြိုးစားခဲ့ရတာ စရန်ငွေတင် ဝိညာဉ်ကျောက်တုံး ငါးထောင် ပေးထားရတာလေ စျေးလျှော့ရောင်းရင် ကျွန်တော့်အတွက် မကိုက်တော့ဘူး"

ဤကဲ့သို့သော မြင်ကွင်းများကို နေရာအနှံ့ တွေ့နေရသည်။ ဆက်သွယ်ရေးအဆောင်မှာ ထိုမျှအထိ ခေတ်စားနေခြင်း ဖြစ်သည်။

ကြိုတင်မှာယူမှု နံပါတ်ပြားလေး တစ်ခုတည်းဖြင့်ပင် စျေးကြီးပေးနေရသည်။ အမှတ်စဉ် စောလေ စျေးကြီးလေပင်။ အကယ်၍ အမှတ်စဉ် နှစ်သောင်းအတွင်း ဖြစ်ပါက ဝိညာဉ်ကျောက်တုံး သိန်းချီ၍ပင်ရောင်းချနိုင်သည်။

ဘာကြောင့်လဲဆိုသော် ပထမအသုတ် နှစ်သောင်းမှာ လက်ရှိပစ္စည်းရှိနေပြီး အမြန်ရရှိနိုင်သောကြောင့် ဖြစ်သည်။ ကျန်ရှိသူများမှာမူ အနည်းဆုံး တစ်လ၊ သို့မဟုတ် နှစ်ပေါင်းများစွာ စောင့်ရပေလိမ့်မည်။ ကျင့်ကြံသူများအတွက် အချိန်ပေါများသော်လည်း စောင့်ဆိုင်းရသည့် လုပ်ငန်းစဉ်မှာ အမြဲတမ်း ခက်ခဲလှသည်။ မိမိလိုချင်သော အဆောင်ကို မရသေးသရွေ့ တည်ငြိမ်စွာ တရားမှတ်ရန်ပင် ခက်ခဲနေတော့သည်။

ချန်းယွဲ့ကျွန်း။

မြောက်ပိုင်းပင်လယ်ပြင်ရှိ ကျွန်းကြီးတစ်ကျွန်းဖြစ်ပြီး ဝိညာဉ်အသွင်ပြောင်းခြင်းအဆင့်အင်အားစုဖြစ်သော ရှရွှမ်ထျန်းဂိုဏ်းက အုပ်ချုပ်သည်။ ယနေ့ ကျွန်းပေါ်တွင် အလွန် စည်ကားနေသည်။ အကြောင်းမှာ ရှရွှမ်ထျန်းဂိုဏ်း၏ဂိုဏ်းချုပ် ရွှမ်ကုန်၏ အသက်နှစ်ထောင်ပြည့် မွေးနေ့ဖြစ်သောကြောင့် ဖြစ်သည်။

ဝိညာဉ်အသွင်ပြောင်းခြင်းအဆင့် ကျင့်ကြံသူများသည် နှစ်ပေါင်း သုံးထောင်အထိ အသက်ရှည်နိုင်ကြသည်။ ထို့ကြောင့် အသက်နှစ်ထောင်ပြည့်သည့်နေ့မှာ ထိုကဲ့သို့သော ပုဂ္ဂိုလ်များအတွက် အလွန်အမှတ်တရ ဖြစ်စေသော နေ့ဖြစ်သည်။

ထို့ကြောင့် ပတ်ဝန်းကျင် မိုင်ပေါင်း သိန်းချီအတွင်းရှိအင်အားစုများ၊ ကျွန်းသခင်များနှင့် နာမည်ကြီး ကျင့်ကြံသူများမှာ လာရောက် ဂုဏ်ပြုကြသည်။

ထိုစဉ် ကောင်းကင်ထက်၌ နတ်ဘုရားများ၏ ရောင်စဉ်တန်းများမှာ ကြယ်တံခွန်များကဲ့သို့ ဖြတ်သန်းသွားကြပြီး အလွန်ပင် ခမ်းနားလှသည်။ နတ်ဘုရားပေါင်း တစ်သောင်း လာရောက် ဂါရဝပြုနေသကဲ့သို့ပင်။

"ချင်းယွန်းယွိရှကျွန်းမှ လျိုမျိုးနွယ်စု ရဲ့ လျိုယင်လာရောက် ဂုဏ်ပြုပါတယ် ဆရာကြီး ရွှမ်ကုန်း အသက်ရာကျော် ရှည်ပါစေကြောင်းနဲ့ နတ်ဘုရားအဆင့်ကို အမြန်ဆုံး တက်လှမ်းနိုင်ပါစေကြောင်း ဆုတောင်းပေးလိုက်ပါတယ်"

လျိုယင်သည် သေသေချာချာ ပြင်ဆင်ထားသည့် လက်ဆောင်ကိုအပြင်ဘက်တွင် စောင့်နေသော တပည့်ထံသို့ ပေးအပ်လိုက်သည်။

ထို့နောက် လှပသောကျင့်ကြံသူ အမျိုးသမီးတစ်ဦး၏လမ်းပြမှုဖြင့် ခမ်းမအတွင်းသို့ ဝင်ကာ ရှေ့တန်းနေရာတစ်ခုတွင် ထိုင်လိုက်သည်။ သူသည် ဝါရင့် နတ်သားအဆင့် ကျင့်ကြံသူတစ်ဦး ဖြစ်သဖြင့် ဤကဲ့သို့သော ပွဲမျိုးတွင်လည်း နေရာကောင်းတစ်ခု ရရှိသည်။

ထိုစဉ် အသံတစ်ခု ထွက်ပေါ်လာသည် - "လန်ယာကုန်သည်အဖွဲ့ရဲ့ မန်နေဂျာချုပ် ကျိုး ရောက်ရှိလာပါပြီ"

ထိုစကားကို ကြားသည်နှင့် ခမ်းမတစ်ခုလုံး တိတ်ဆိတ်သွားပြီး ကျင့်ကြံသူ အားလုံးမှာ မတ်တပ်ရပ်ကာ ကြိုဆိုကြတော့သည်။ လန်ယာကုန်သည်အဖွဲ့၏မန်နေဂျာချုပ် ဆယ်ဦးမှာ နယ်မြေအုပ်ချုပ်ရေးမှူးများနှင့် တူညီသည်။ သူတို့ တစ်ဦးစီ၏ကျင့်ကြံခြင်းအဆင့်မှာ ဝိညာဉ်အသွင်ပြောင်းခြင်းအဆင့်ထက် မြင့်မားရုံသာမက ဂုဏ်သိက္ခာနှင့် အရှိန်အဝါမှာလည်း သာမန် ဝိညာဉ်အသွင်ပြောင်း ကျင့်ကြံသူများထက် အများကြီး သာလွန်သည်။

"မန်နေဂျာချုပ်ကျိုး ကိုယ်တိုင် ရောက်လာတာ ကျွန်တော့်ရဲ့ရှရွှမ်ထျန်းဂိုဏ်းအတွက် တကယ့်ကို ဂုဏ်ယူစရာပါပဲ" ခမ်းမအထက်မှ ရွှင်မြူးသော ရယ်သံတစ်ခု ထွက်ပေါ်လာသည်။ လူငယ်တစ်ဦးကဲ့သို့ မျက်နှာရှိသော်လည်း ဆံပင်ဖြူများဖြင့် လျှို့ဝှက်ဆန်းကြယ်သော အရှိန်အဝါ ရှိသူတစ်ဦးမှာ ဟင်းလင်းပြင်ကို ဖြတ်ကျော်ကာ ပေါ်လာသည်။ သူမှာ ဂိုဏ်းချုပ်ရွှမ်ကုန်း ပင် ဖြစ်သည်။

သာမန်ဧည့်သည်များမှာ သူကိုယ်တိုင်ထွက်ကြိုရန် မထိုက်တန်သော်လည်း လန်ယာကုန်သည်အဖွဲ့၏မန်နေဂျာချုပ် ဆိုသည်မှာမူ တစ်မျိုးပင်။

ကျိုးဖင်းက လက်အုပ်ချီကာ အသာအယာ ပြုံးလိုက်သည် - "ဆရာကြီးရဲ့ အသက်နှစ်ထောင်ပြည့် မွေးနေ့လို အရေးကြီးတဲ့ နေ့မျိုးမှာ ကျွန်တော်တို့ လာရောက် ဂုဏ်ပြုရမှာပေါ့"

သူက လက်ကိုမြှောက်လိုက်ရာ ရှေ့တွင် အလွန်တန်ဖိုးကြီးသော သွေးရောင်ရူယီတစ်ခု ပေါ်လာသည်။ ၎င်းကို မြင်သူတိုင်းက ၎င်းမှာ ထိပ်တန်း မှော်လက်နက်များ ပြုလုပ်ရာတွင် သုံးသည့် အဖိုးတန်နဂါးသွေးကျောက်စိမ်းဖြစ်ကြောင်း သိကြသည်။ လန်ယာကုန်သည်အဖွဲ့မှာ တကယ်ပင်ချမ်းသာကြွယ်ဝလှသည်။

"ဒါက ကျွန်တော့်ရဲ ဂါရဝပြု လက်ဆောင်လေးပါ ဆရာကြီး အသက်ရှည်ပြီး နတ်ဘုရားလမ်းစဉ်ကို အမြန်ဆုံးတက်လှမ်းနိုင်ပါစေ"

"မန်နေဂျာချုပ် ကျိုးက အရမ်း ယဉ်ကျေးတာပဲ၊ ကဲ... ကြွပါ၊ ထိုင်ပါဦး"

"ဆရာကြီးလည်း ကြွပါဦး"

နှစ်ဖက်စလုံး နေရာယူပြီးနောက် ရင်းရင်းနှီးနှီး စကားပြောကြသည်။ စကားစပ်မိရာမှ ကိစ္စတစ်ခုပေါ်လာတော့သည်။

"မန်နေဂျာချုပ် ကျိုး... မကြာသေးခင်က လန်ယာကုန်သည်အဖွဲ့က ထုတ်လိုက်တဲ့ ဆက်သွယ်ရေး အဆောင်အသစ်တွေက တကယ်ကို ခေတ်စားနေတာပဲနော်" ရွှမ်ကုန်းက ဆိုလိုရင်းတစ်ခုဖြင့် ပြောလိုက်သည်။

"အော်..." ကျိုးဖင်းက အသာအယာ ပြုံးသည် - "ဆရာကြီးကလည်း ဒီလို အသေးအမွှားလေးကို စိတ်ဝင်စားလို့လား"

"စိတ်ဝင်စားရင်တောင် အလကားပါပဲ ကျွန်တော့်တပည့်တွေကို ကမ္ဘာ့အဆင့် တစ်ခုလောက် ကြိုမှာခိုင်းတာ... အမှတ်စဉ်က တစ်သိန်းကျော်မှာလေ တော်တော်လေး စောင့်ရဦးမယ်" ရွှမ်ကုန်းက ရယ်မောရင်းခေါင်းခါပြသည်။

ကျိုးဖင်းက ထိုစကား၏ ဆိုလိုရင်းကို နားလည်သွားပြီး ပြုံးလိုက်သည် - "ကျွန်တော်တို့ လန်ယာကုန်သည်အဖွဲ့ရဲ့ လုပ်ငန်းကို အခုလို အားပေးတဲ့အတွက် ဆရာကြီးကို အများကြီး ကျေးဇူးတင်ပါတယ်။ ဒါပေမဲ့ ကမ္ဘာ့အဆင့်အဆောင်တွေက အထူးကုန်ကြမ်းတွေနဲ့ လက်ရာတွေ သုံးထားတာမို့လို့ မြောက်ပိုင်းအမှောင်ထုသန့်စင်ရာမြေရဲ့ လက်နက်သန့်စင်နန်းဆောင်ကတောင် တစ်လကို အနည်းငယ်ပဲ ထုတ်နိုင်တာပါ။ မဟုတ်ရင်တော့ ဆရာကြီးရဲ့ မွေးနေ့မှာ တစ်ခုလောက် လက်ဆောင်ယူလာပေးမှာပေါ့"

ထိုစကားကို ကြားသောအခါ ရွှမ်ကုန်းက မျက်မှောင်ကြုတ်သွားသည် - "မန်နေဂျာချုပ် ကျိုးရဲ့အဆင့်အတန်းနဲ့တောင် ဒီအဆောင်တစ်ခုကို ဆုံးဖြတ်ပိုင်ခွင့်မရှိဘူးလား"

ကျိုးဖင်းက ရယ်မောကာ ခေါင်းခါပြသည် - "ကျွန်တော်လိုမန်နေဂျာချုပ် တစ်ယောက် မပြောနဲ့ ကုန်သည်အဖွဲ့ ခေါင်းဆောင်ကြီး ကိုယ်တိုင် ပြောရင်တောင် ဒီကိစ္စမှာ အာဏာမရှိပါဘူး"

"အဲဒါ ဘာကို ဆိုလိုတာလဲ"

"ဒီဆက်သွယ်ရေးအဆောင် နဲ့ ပတ်သက်သမျှ အကုန်လုံးကို ကျွန်တော်တို့ လန်ယာကုန်သည်အဖွဲ့ရဲ့သခင်လေး ကပဲ တာဝန်ယူတာပါ။ သခင်လေးက ဒီပစ္စည်းတွေကို ရောင်းတဲ့နေရာမှာ စည်းကမ်းအတိုင်းပဲ တိတိကျကျ လုပ်ရမယ်လို့ အမိန့်ထုတ်ထားတာလေ"

ထိုစကားကို ကြားသောအခါ ရွှမ်ကုန်းမှာ ဆွံ့အသွားသည်။ ဝမ်မျိုးနွယ်စု သခင်လေးမှာ အလွန်အလိုလိုက်ခံရသည်ဟု ကြားဖူးသော်လည်း ဤသည်မှာအမှန်ပင် ဖြစ်ပုံရသည်။ လန်ယာကုန်သည်အဖွဲ့တွင် သူ၏ အရှိန်အဝါမှာ ကုန်သည်အဖွဲ့ ခေါင်းဆောင်ကြီးထက်ပင် ကြီးမားနေသလား။

သို့သော်လည်း စကားမှာ ဤမျှအထိ ရောက်လာပြီ ဖြစ်သဖြင့် ကျိုးဖင်းမှတစ်ဆင့် ကမ္ဘာ့အဆင့်တစ်ခုရရန် သူ၏ အကြံအစည်မှာ ပျက်ပြားသွားတော့သည်။

သူတို့၏စကားများကို ဖုံးကွယ်မထားသဖြင့် ပတ်ဝန်းကျင်ရှိ ကျင့်ကြံသူများမှာလည်း ကြားသွားကြပြီး အံ့ဩသွားကြသည်။ လန်ယာကုန်သည်အဖွဲ့၏ ကမ္ဘာ့အဆင့်အဆောင် မှာ တကယ်ကို တန်ဖိုးကြီးလှပေသည်။

ဂိုဏ်းချုပ်အဆင့် ပုဂ္ဂိုလ်တစ်ဦး ကိုယ်တိုင် အဆက်အသွယ်သုံးပြီး တောင်းဆိုတာတောင် ရဖို့ ခက်ခဲနေသည်။ ချက်ချင်းပင် သူတို့၏ ရင်ထဲတွင် တရားမျှတမှု ရှိသွားသလို ခံစားလိုက်ရသည်။ ဤမျှ စျေးကြီးပေးဝယ်ရခြင်းမှာ သဘာဝကျသည်ဟု ယူဆလိုက်ကြသည်။

လျိုယင်တစ်ယောက်သာ မျက်နှာထား ပျက်သွားသည်။ သူသည် ခါးတွင် ချိတ်ထားသော ကမ္ဘာ့အဆင့် နဂါးပြာဆက်သွယ်ရေးအဆောင်ကို မသိမသာ လက်ဖြင့် အုပ်ကာ သူ၏သိုလှောင်မှော်လက်နက်ထဲသို့ ထည့်ရန် ကြိုးစားလိုက်သည်။ ဤပစ္စည်းက တန်ဖိုးရှိမှန်း သူသိသော်လည်း ဤမျှအထိ တန်ဖိုးကြီးလိမ့်မည်ဟု မထင်ခဲ့ပေ။ ဝိညာဉ်အသွင်ပြောင်းအဆင့် ဆရာကြီးတစ်ယောက်တောင် မရနိုင်သည့် ပစ္စည်းကို သူက ထုတ်ပြလိုက်လျှင် ဘေးဒုက္ခ ရောက်နိုင်သည် မဟုတ်လား။

သို့သော်လည်း... ထိုစဉ်မှာပင်...

သူ၏ခါးမှ ဆက်သွယ်ရေးအဆောင်မှာ ရုတ်တရက် တောက်ပလာပြီး နဂါးပြာတစ်ကောင် ပျံထွက်လာကာ ခမ်းမအထက်တွင် ဟိန်းဟောက်ကခုန်ရင်း မိုးကြိုးများနှင့် နတ်ဘုရား အရှိန်အဝါများကို ထုတ်လွှတ်လိုက်တော့သည်။

လျိုယင်၏မျက်နှာမှာ ချက်ချင်းပင် ဖြူဖျော့သွားသည်။ တစ်စုံတစ်ခုကို သူ ခံစားလိုက်ရသည်။ သူနှင့် မလှမ်းမကမ်းတွင် ရှိနေသော ရှီမျိုးနွယ်စုမှ ဘိုးဘေးရှီဖန့် သည် သူ့ကို လှောင်ပြုံးဖြင့် စိုက်ကြည့်နေပြီး သူ၏လက်ထဲမှ ဆက်သွယ်ရေးအဆောင်ကို မြှောက်ပြနေသည်ကို မြင်လိုက်ရတော့သည်။