အခန်း (၇၀)  ရည်မှန်းချက်ကြီးမားသော သခင်လေးရှီ

လူအုပ်ကြီးသည် ခန့်ညားထည်ဝါစွာဝတ်ဆင်ထားပြီး မေးစေ့ကိုပင့်တင်ကာ လက်ထဲတွင် ယပ်တောင်ကိုကိုင်ထားသော လူငယ်တစ်ဦး လူအုပ်ကြားမှ တိုးထွက်လာသည်ကို တွေ့လိုက်ရသည်။

"ဒါ... ရှီမျိုးနွယ်စုက သခင်လေး ရှီယီမင်မဟုတ်လား"

"နတ်ဘုရားသန္ဓေသားအဆင့်ဘိုးဘေးပိုင်ဆိုင်ပြီး ရွှေငွေတွေ မကုန်ခန်းနိုင်အောင် ချမ်းသာတဲ့ မျိုးနွယ်စုကြီးလေ"

"သူက ပိန့်လိုင် မိုးတိမ်ပင်လယ်ကုန်သွယ်ရေးအဖွဲ့မှာ ရင်းနှီးမြှုပ်နှံပြီး ဒုက္ခသည်တွေ ဝိုင်းရိုက်တာ ခံရတယ်လို့ ကြားတယ် အခုတော့ ဒဏ်ရာတွေ ပျောက်သွားပုံရတယ်ပဲ။"

"..."

ရှီယီမင်၏နှုတ်ခမ်းမှာ တွန့်သွားသည်။ သူသည် နောက်ကွယ်မှ အတင်းအဖျင်းများကို မကြားချင်ယောင်ဆောင်နေလိုက်သော်လည်း သူ၏တစ်ကိုယ်လုံးမှာမူ ထိုစဉ်က ရရှိခဲ့သော နာကျင်မှုများကို ပြန်လည် ခံစားနေရဆဲ ဖြစ်သည်။

သူသည် ပိန့်လိုင်မိုးတိမ်ပင်လယ်ဆိုသည့် စကားလုံးနှင့်ပင် ဓာတ်မတည့်သလို ဖြစ်နေပြီ။

ထိုအမည်ကို ကြားလိုက်ရုံနှင့်ပင် စိတ်တိုလာတတ်သည်။ ယနေ့တွင်မူ သူသည် ထိုအရှက်ရစရာများကို ဆေးကြောပြီး အကြီးအကျယ်... ဟိုဟာ... ဟိတ်ဟန်ထုတ်ပြရမည်။

"နေရောင်အဆင့်ဆက်သွယ်ရေး အဆောင်လား သခင်လေးရှီ ဘယ်ဒီဇိုင်းကို လိုချင်လို့လဲ"

"နဂါးပြာ"

"အခုချက်ချင်း လာပါပြီ" မန်နေဂျာဝမ် က ပြုံးရွှင်စွာဖြင့် တခြားအရာများထက် ပို၍ တန်ဖိုးကြီးသော သေတ္တာထဲမှအဆောင်ကို ထုတ်ယူကာ ရှီယီမင်ထံသို့ ကမ်းပေးလိုက်သည်။

လူအုပ်ကြီး၏ရှေ့တွင် ရှီယီမင်သည် သေတ္တာကို ဖွင့်လိုက်သည်။ အတွင်း၌ တောက်ပသော ရွှေရောင်အဆောင်တစ်ခု ရှိနေသည်။ ၎င်းမှာ နေရောင်အောက်တွင် ရှေးဟောင်းနတ်ဘုရားလက်နက်တစ်ခုကဲ့သို့ တောက်ပနေပြီး ခန့်ညားထည်ဝါသော အရှိန်အဝါများ ထွက်ပေါ်နေသည်။

သူသည် သွေးတစ်စက်ချကာ ပိုင်ရှင်အဖြစ် သတ်မှတ်လိုက်သည်။

နဂါးပြာတစ်ကောင်သည် အဆောင်ထဲမှ ဝုန်းခနဲ ထွက်ပေါ်လာပြီး လျှပ်စီးများ တဖျတ်ဖျတ် လက်နေသည်။ ၎င်းမှာ ကြယ်တာရာအဆင့်ကဲ့သို့ ဦးခေါင်းထက်တွင် ဝဲပျံနေရုံသာ မဟုတ်ဘဲ သက်ရှိခန္ဓာကိုယ်တစ်ခုကဲ့သို့ ဖြစ်ပေါ်လာကာ သူ့ကို ဝန်းရံထားသည်။ သားရဲဝိညာဉ်တစ်ကောင်နှင့် အလွန်တူလှသည်။

ပတ်ဝန်းကျင်မှာ တိတ်ဆိတ်သွားသည်။ ဒါက နေရောင်အဆင့်ဆက်သွယ်ရေးအဆောင်လား။ဤဖြစ်ရပ်ဆန်းမှာ တကယ့်အစစ်အမှန်နှင့် အလွန် နီးစပ်လှသည်။

ရှီယီမင်သည် မှင်သက်စွာ ကြည့်နေပြီးနောက် လက်ကို ဆန့်ထုတ်လိုက်ရာ နဂါးပြာကြီးက ဦးခေါင်းကို နှိမ့်ချပြီး သူ၏လက်ဖဝါးကို လာ၍ ပွတ်သပ်သည်။

ဘုရားရေ—

တကယ့်အထိအတွေ့ မဟုတ်သော်လည်း နဂါးတစ်ကောင်၏အသက်ရှူသံကဲ့သို့ ပူနွေးသော အငွေ့အသက်များက သူ၏အရေပြားကို ထိတွေ့သွားသည်။ စွဲမက်စရာ ကောင်းလှသည်။

ရှီယီမင်မှာ အလွန် စိတ်လှုပ်ရှားသွားသည် ဒါက တကယ့်ကို ခန့်ညားလွန်းလှတယ် နောက်ဆုံးတော့ ငါ့နဲ့တန်တာလေး တွေ့ပြီ။

သူသည် တံတွေးကို မျိုချလိုက်ပြီး ဝိညာဉ်စွမ်းအား အနည်းငယ် ထည့်သွင်းလိုက်ရာ အဆက်အသွယ်စာရင်းတွင် အမည်အသစ်တစ်ခု ပေါ်လာသည်။

 လျိုရို့အန်း ။

နဂါးပြာကြီးသည် ဟိန်းဟောက်လိုက်ပြီး ကောင်းကင်သို့ပျံတက်သွားကာ မိုးကြိုးသံများနှင့်အတူ ဟင်းလင်းပြင်ကို ဖြတ်ကျော်ကာ ပျောက်ကွယ်သွားသည်။ ၎င်းဖြတ်သန်းသွားသော လမ်းကြောင်းတွင် လေထုထဲ၌ ဂယက်များ ဖြစ်ပေါ်ကာ မျက်နှာပြင်တစ်ခုအဖြစ် ပုံပေါ်လာသည်။

သူသည် လျိုရို့အန်းကို ကြွားလုံးထုတ်ရန် မစောင့်နိုင်တော့ချေ။

ပြီးခဲ့သည့်အကြိမ်က လျိုရို့အန်းသည် လန်ယာ ဖောင်ဒေးရှင်းတွင် ရင်းနှီးမြှုပ်နှံခဲ့သောကြောင့် ဒုက္ခသည်များက သူ့ကို သူရဲကောင်းတစ်ဦးအဖြစ် ချီးကျူးခဲ့ကြသည်။ ထိုစဉ်က ရှီယီမင်မှာမူဖူးရောင်အောင် အရိုက်ခံခဲ့ရသူ ဖြစ်သည်။

ပိုဆိုးသည်မှာ လျိုရို့အန်းသည် သူချစ်မြတ်နိုးရသော မုန့်ချိုးယွဲ့၏ စိတ်ကိုပင် သိမ်းပိုက်နိုင်ခဲ့ခြင်းပင် ဤရန်ကြွေးကို ယနေ့တွင် ရှင်းရမည်။

အမြန်လုပ်ရမည်။ ဘာကြောင့်လဲဆိုသော် လျိုမျိုးနွယ်စုသည် ရှီမျိုးနွယ်စုနှင့် အင်အားချင်း တူညီသည်။ သူက နေရောင်အဆင့်ကို ဝယ်နိုင်လျှင် လျိုရို့အန်းလည်း ဝယ်နိုင်လိမ့်မည်။

ထို့ကြောင့် သူက အရင်ဦးအောင် လုပ်ပြီး နှိမ်ထားရမည်။

သို့သော် မမျှော်လင့်ထားသော မတော်တဆမှုတစ်ခု ဖြစ်ပွားခဲ့သည်။

နဂါးပြာကြီးသည် ဟင်းလင်းပြင်ကို ဖြတ်ကျော်သွားသော်လည်း အဝေးကြီးသို့ မရောက်သွားချေ။ ၎င်းသည် လူအုပ်ကြားထဲတွင် ပြန်လည်ပေါ်လာပြီး ၎င်း၏ ပုံရိပ်ကို ချက်ချင်း ပြသလိုက်ရာ လျိုရို့အန်း၏ ရှေ့တည့်တည့်တွင် ဖြစ်နေသည်။

လျိုရို့အန်းမှာ လန့်သွားသဖြင့် မျက်နှာဖြူလျော့သွားကာ - "ရှီယီမင်... မင်း ငါ့ဆီ ဘာလို့ မက်ဆေ့ခ်ျ ပို့နေတာလဲ" ဟု ဆဲရေးလိုက်သည်။

ရှီယီမင် : "..."

လျိုရို့အန်းက မုန့်ချိုးယွဲ့နှင့်အတူ ဤနေရာတွင် ရောက်နေလိမ့်မည်ဟု သူ မထင်ထားခဲ့ချေ။

သူ၏မျက်နှာ ပျက်သွားပြီး - "ဒီသခင်လေးက ပျင်းလို့လေ ဘာဖြစ်လဲ"

"အရူးပဲ" လျိုရို့အန်းက တံတွေးထွေးလိုက်ပြီး မန်နေဂျာ ဝမ်ထံသို့ လျှောက်သွားသည် "နေရောင်အဆင့်နှစ်ခုပေးပါ ကျားဖြူတစ်ခု၊ ငှက်နီတစ်ခု။"

မုန့်ချိုးယွဲ့၏မျက်လုံးများမှာ တောက်ပြောင်သွားသည်။ ငှက်နီမှာ သိသိသာသာပင် သူမအတွက် ဖြစ်သည်။

ဘေးမှ လူများက တိုးတိုးတိုးတိုး ပြောကြသည်။လျိုမျိုးနွယ်စု၏ဆက်ခံသူမှာ တကယ်ကို ချမ်းသာလှသည် ဝိညာဉ်ကျောက်တုံး လေးသောင်းနီးပါးကို မျက်တောင်တစ်ချက် မခတ်ဘဲ သုံးစွဲနိုင်သည်ဟု ဆိုကြသည်။ နတ်ဘုရားသန္ဓေသားအဆင့်မျိုးနွယ်စု၏ တိုက်ရိုက်မျိုးဆက် ဖြစ်သလို အစောပိုင်းက လန်ယာဖောင်ဒေးရှင်းတွင် ရင်းနှီးမြှုပ်နှံခဲ့မှုကြောင့် လျိုမျိုးနွယ်စု၏နာမည်ဂုဏ်သတင်းမှာလည်း မြင့်တက်ကာ စီးပွားရေးများမှာလည်း အောင်မြင်နေသည်။

မျိုးနွယ်စုအတွင်း သူ၏အဆင့်အတန်းမှာလည်း များစွာ မြင့်တက်လာပြီး ယခုအခါ နောက်ဆက်ခံမည့် မျိုးနွယ်စုခေါင်းဆောင်အဖြစ် လေ့ကျင့်ပေးခြင်း ခံနေရသည်။ သူ၏ အာဏာမှာ ရှီယီမင်ထက် များစွာ သာလွန်နေပြီ ဖြစ်သည်။

မန်နေဂျာ ဝမ်က သူ့ကို တစ်ချက်ကြည့်လိုက်ပြီး "ခဏစောင့်ပါ" ဟု ပြောကာ အတွင်းသို့ ဝင်သွားသည်။ သူ ပြန်ထွက်လာသောအခါ တန်ဖိုးကြီး ကျောက်မျက်ရတနာများ စီခြယ်ထားသော ခရမ်းရွှေရောင် သေတ္တာတစ်လုံးကို ကိုင်လာသည်။ ၎င်းမှာ တခြားသော ထုပ်ပိုးမှုများထက် များစွာ ပို၍ ခန့်ညားထည်ဝါလှသည်။

"ဒါက ဘာလဲ" လျိုရို့အန်းက မျက်တောင်ခတ်ရင်း မေးလိုက်သည်။

"ဒါက ကမ္ဘာ့အဆင့်နဂါးပြာ ဆက်သွယ်ရေးအဆောင်ပါ" မန်နေဂျာ ဝမ်က ပြုံးလိုက်သည်။

တစ်ကွင်းလုံး တိတ်ဆိတ်သွားသည်။ ရှီယီမင်၏ မျက်လုံးများ ပြူးထွက်သွားသည်။ သူသည် ဒေါသတကြီးဖြင့် ရှေ့သို့ တိုးလာသည် - "မင်း ခုနကပဲ ကမ္ဘာ့အဆင့် ပစ္စည်းမရှိဘူးလို့ ပြောခဲ့တယ်မဟုတ်လား"

မန်နေဂျာမှာ တည်ငြိမ်နေဆဲ ဖြစ်သည် - "ခင်ဗျား မှားကြားတာနေမှာပါ သခင်လေးရှီ။ မရှိဘူးလို့ မပြောပါဘူး ရှားပါးပြီးတန်ဖိုးကြီးတယ်လို့ပဲ ပြောခဲ့တာပါ။ ကျွန်တော်တို့ အခွဲမှာ လက်ကျန်မရှိပါဘူး ဝယ်ချင်ရင် ကြိုတင်မှာယူရမယ်၊ တန်းစီရမယ်၊ ပြီးမှ ရုံးချုပ်က ပို့ပေးမှာပါ။"

ရှီယီမင်က သေတ္တာကို လက်ညှိုးထိုးပြသည် "ဒါဆို ဘာလို့ သူက ရတာလဲ"

မန်နေဂျာ ဝမ်က ရှင်းပြသည် - "လျိုမျိုးနွယ်စုဟာ ချင်းယွန်းကျွန်းစုရဲ့ ပထမဦးဆုံးသော လန်ယာဖောင်ဒေးရှင်း ကံတရား အဆင့်သတ်မှတ်ချက်မှာ ထိပ်ဆုံးကရှိနေလို့ပါ။ မြောက်ပိုင်းဒေသ ငြိမ်းချမ်းရေးအတွက် သူတို့ရဲ့ ရက်ရောတဲ့ လှူဒါန်းမှုတွေကို ကျေးဇူးတင်တဲ့အနေနဲ့ ကျွန်တော်တို့က ဒီကမ္ဘာ့အဆင့် အဆောင်ကို လက်ဆောင်ပေးတာ ဖြစ်ပါတယ်။"

ရှီယီမင် : "..."

လျိုရို့အန်း : "..."

လူတိုင်း : "..."

တကယ်ကြီးလား အဲဒီလိုလည်း ရတာလား။

သာမန်လူတွေက ဝယ်လို့တောင် မရတဲ့အရာကို ကံတရားအဆင့်သတ်မှတ်ချက်မှာ နိုင်တဲ့သူက အလကား ရတယ်လား။

လူအုပ်ကြီးမှာ မှင်သက်သွားကြပြီး အသက်ရှူသံများ ပြင်းထန်လာကြသည်။ လျိုရို့အန်း ကိုယ်တိုင်ပင်လျှင် မှင်သက်သွားသည် ၎င်းမှာ ကောင်းကင်မှ မုန့်ကျလာသကဲ့သို့ပင်။ ဤမျှ ကောင်းသော အရာ ရှိလိမ့်မည်ဟု မထင်ထားခဲ့ပေ။

ဝိညာဉ်ကျောက်တုံးတစ်သိန်းဆိုသည်မှာ လျိုမျိုးနွယ်စုအတွက် ကြီးမားသော ပမာဏ မဟုတ်သော်လည်း ဤသည်မှာ ပိုက်ဆံကိစ္စ မဟုတ်ပေ။

၎င်းမှာ ဂုဏ်သိက္ခာ၊ မျက်နှာပွင့်လန်းမှုနှင့် ကြည်နူးမှုတို့ပင် ဖြစ်သည်။ လျိုရို့အန်းသည် လူတိုင်း၏ အားကျသော အကြည့်၊ မနာလိုသော အကြည့်များကို ခံစားနေရသည်။

သူသည် အလိုလို ရင်ဘတ်ကို ကော့လိုက်မိသည်။ သူ၏ရင်ဘတ်မှာ မုန့်ချိုးယွဲ့ထက်ပင် ပို၍ ကော့နေသကဲ့သို့ ဖြစ်နေသည်။ သူ၏ အပြုံးမှာ နားရွက်ချိတ်မတတ်ပင်။

"ဟမ်း... ခင်ဗျားတို့ ကုန်သည်အဖွဲ့က တကယ်ကို ရက်ရောတာပဲ ဟားဟားဟား" လျိုရို့အန်းသည် လက်ဝါးချင်း ပွတ်ကာ ရင်ခုန်နေသည်။

သူသည် ခရမ်းရွှေရောင်သေတ္တာကို လူတိုင်း မြင်အောင် အထူးသဖြင့် ရှီယီမင် မြင်အောင် မြှောက်ပင့်ပြလိုက်သည်။

နှုတ်ခမ်းလှုပ်ရုံဖြင့် - "ရှက်ဖို့ကောင်းလိုက်တာ အများကောင်းကျိုးကို ဆောင်ရွက်တာက ကျင့်ကြံသူတစ်ယောက်ရဲ့ တာဝန်ပဲလေ..." ဟု ဆိုနေသကဲ့သို့ပင်။

သူ့ဘေးတွင် မုန့်ချိုးယွဲ့က လျိုရို့အန်းကို ကြည့်နေသော အကြည့်မှာပို၍ နူးညံ့လာတော့သည်။

"ဒီကောင်စုတ်လေး" ရှီယီမင်သည် သွားကြိတ်ရင်း နောင်တကြောင့် ရင်ထဲမှာ သွေးထွက်မတတ် ခံစားနေရသည်။

လန်ယာ ကံတရားအဆင့်သတ်မှတ်ချက်မှာ ထိပ်ဆုံးက ရှိနေရင် ဒီလိုအခွင့်အရေးတွေ ရမယ်ဆိုတာ သိခဲ့ရင် သူသည် ပိန့်လိုင် မိုးတိမ်ပင်လယ်ထဲသို့ ထိုဝိညာဉ်ကျောက်တုံး တစ်သန်းကို ဘယ်တော့မှ ပစ်မထည့်ခဲ့ပေ။

တောက်... ပိန့်လိုင် မိုးတိမ်ပင်လယ် မင်းကြောင့် ငါ့အချစ်ကိုဆုံးရှုံးရတော့မယ်။

လျိုရို့အန်းက ကမ္ဘာ့အဆင့်အဆောင်ကို ချက်ချင်း မဖွင့်ပြခဲ့ပေ။ သူပြောပုံအရဆိုလျှင် တစ်စုံတစ်ယောက်က မနာလိုစိတ်ဖြင့် သူ့ကို လုယက်သွားမှာ ကြောက်လို့ပါတဲ့။

ထိုလှောင်ပြောင်သော လေသံကြောင့် ရှီယီမင်မှာ ဒေါသထွက်လွန်းသဖြင့် သွားကိုက်နေရသည်။ သူသည် ပို၍ကြိုးစားမည်ဟု ကျိန်ဆိုလိုက်သည် ကံတရား အဆင့်သတ်မှတ်ချက်မှာ သုံးလတစ်ကြိမ် ပြောင်းလဲတတ်သည်။ နောက်တစ်ကြိမ်တွင် ထိပ်ဆုံးနေရာက သူ့အတွက် ဖြစ်ရမည် ဖြစ်ကို ဖြစ်ရမည်။