အခန်း (၆၉) - အရောင်းဖွင့်ပြီ

မန်နေဂျာ ဆုန့်သည် မော့ကြည့်လိုက်သည်။

ကျားဖြူကြီးသည် ၎င်း၏ ကြီးမားသော လက်သည်းကို မြှောက်လိုက်ရာ ဟင်းလင်းပြင်တွင် ဂယက်များ ထွက်ပေါ်လာပြီး ပုံရိပ်တစ်ခု ပေါ်လာသည်။ ထိုပုံရိပ်ထဲတွင် ပြုံးဖြီးနေသော မန်နေဂျာဝမ်၏ မျက်နှာကို တွေ့လိုက်ရသည်။

"မန်နေဂျာဆုန့်... ဒါက အလင်းနဲ့ အရိပ် လှည့်ကွက်လေးပါပဲ၊ ခင်ဗျား ကြောက်သွားတာ ကြည့်ရတာ တကယ် ရယ်ရတယ်"

မန်နေဂျာ ဆုန့် : "....."

မန်နေဂျာဆုန့်၏ မျက်နှာမှာ စိမ်းဖန့်သွားသည်။

လက်စားချေတာပဲ ဒါက အထင်အရှားကို လက်စားချေလိုက်တာပဲ။

လက်နက်သန့်စင်ရေးနန်းဆောင်၏ လက်ရာမှာ ကမ္ဘာ့အဆင့်မီသည်ဟု ဆိုရမည်။ ဤကျားဖြူ ပုံရိပ်ယောင်မှာ ပုံရိပ်ယောင်သာ ဖြစ်သော်လည်း ရုပ်ပိုင်းဆိုင်ရာရော စိတ်ဝိညာဉ်ပိုင်းပါ ပြည့်စုံလွန်းလှသဖြင့် အစစ်နှင့် ခွဲခြားရန်ပင် ခက်ခဲလှသည်။

မန်နေဂျာဆုန့်သည် ၎င်းမှာ အတုမှန်း သိသော်လည်း ထိုပြင်းထန်သော စွမ်းအားကို ခံစားနေရဆဲ ဖြစ်သည်။ ဆက်သွယ်ရေးအဆောင်တစ်ခုတည်းက သူ့ကိုဖိနှိပ်ထားသလို ခံစားရသဖြင့် သူသည် စိတ်လှုပ်ရှားမှုကိုမနည်း ထိန်းထားရသည်။ သူသည် နှုတ်ခမ်းကိုတင်းတင်းစေ့ကာ စကားတစ်လုံးမှ မပြောဘဲ လက်ကို ဝှေ့ယမ်း၍ ရှေ့မှ ပုံရိပ်ကို ဖြိုခွဲလိုက်သည်။ ၎င်းမှာ အဆက်အသွယ် ဖြတ်တောက်လိုက်ခြင်းပင်။

ကျင့်ကြံခြင်းလောကရှိ ဆက်သွယ်ရေးအဆောင်များ၏ အလုပ်လုပ်ပုံမှာ ယခင်ကမ္ဘာမှ ဖုန်းများနှင့် မတူချေ။ ၎င်းသည် နှစ်ဖက်စလုံးတွင် ကိရိယာရှိရန် မလိုပေ။ အရှိန်အဝါအစအနတစ်ခုကို မှတ်တမ်းတင်ထားသရွေ့ သတ်မှတ်ထားသော အကွာအဝေးအတွင်းရှိ ပစ်မှတ်ကို ရှာဖွေနိုင်သည်။

သတင်းပို့ရာတွင် နည်းလမ်းနှစ်မျိုး ရှိတတ်သည်။

၁။ အခုနကကဲ့သို့ တိုက်ရိုက် စကားပြောခြင်း။

၂။ စာတိုပို့သကဲ့သို့ အချက်အလက်များကိုပို့ခြင်း။ တစ်ဖက်လူက လက်ခံရရှိသောအခါ သူ၏ ဝိညာဉ်အာရုံဖြင့် တစ်ချက် စစ်ဆေးလိုက်ရုံနှင့် အဓိပ္ပာယ်ကို နားလည်နိုင်သည်။

လူတို့သတင်းအချက်အလက် ဖလှယ်ရန် လိုအပ်ပုံမှာ ကမ္ဘာတိုင်းတွင် ပုံစံတူပင် ဖြစ်သည်။ ၎င်းမှာ လမ်းစဉ်များကွဲပြားသော်လည်း ပန်းတိုင်မှာ တူညီခြင်းပင် ဖြစ်ကောင်းဖြစ်နိုင်သည်။

"ဟာ... ဒါက တကယ့်ကိုခန့်ညားလွန်းတယ်"

"မောင်... ကျွန်မ ဒါလေး လိုချင်တယ်။ ဒီလောက် မုန့်ဖိုး ပိုပေးနော်"

"အရမ်း အစွမ်းထက်တာပဲ၊ ငါတော့ မအောင့်နိုင်တော့ဘူး"

"မန်နေဂျာ... စျေးနှုန်းကိုပဲ ပြောပါတော့ ကျွန်တော့်ကို မျှော်လင့်ချက်တွေ မပေးပါနဲ့တော့"

"ဘာလို့လက်လျှော့ရမှာလဲ ငါ့ရဲ့ကျင့်ကြံမှု တစ်နှစ်လောက် ရပ်တန့်သွားရင်တောင် ဒါကို ဝယ်မယ်။ အဆိုးဆုံးကတော့ ဆေးလုံးတွေ မစားဘဲ နေလိုက်ရုံပေါ့"

ဤခေတ်ကြီးတွင် မိတ်ဆွေ သူငယ်ချင်း မရှိသူ မည်သူရှိပါ့မနည်း။

သူတို့သည် ဤပစ္စည်းကို ဝယ်ပြီးနောက် ဖြစ်လာမည့် မြင်ကွင်းကို တွေးကြည့်ရုံနှင့်တင် ကျေနပ်နေကြပြီ တစ်ဖက်လူထံသို့ ကျားဖြူကြီးတစ်ကောင် တိုက်ရိုက် လွှတ်လိုက်မည်၊ ထိုသူ တုန်လှုပ်သွားသည်ကို ကြည့်မည်၊ ထို့နောက် ထိုသူက မနာလိုစိတ်ဖြင့် သွားကြိတ်နေသည်ကို မြင်ရမည် ထိုသို့ လုပ်ရသည်မှာ မည်မျှအရသာ ရှိပါ့မနည်း။

အခြေအနေမှာ အလွန် အရှိန်တက်နေပြီ ဖြစ်သည်။ ကျင့်ကြံသူတိုင်း၏ မျက်နှာမှာ စိတ်လှုပ်ရှားမှုကြောင့် နီမြန်းနေပြီး မစောင့်နိုင်တော့ချေ။

မန်နေဂျာဝမ်သည်လည်း စိတ်လှုပ်ရှားနေသော်လည်း အထက်မှ ညွှန်ကြားချက်များမှာ အလွန်တင်းကျပ်သဖြင့် လုပ်ငန်းစဉ်အတိုင်း ဆက်သွားရသည်။ သူသည် စျေးနှုန်းကို ချက်ချင်း မကြေညာသေးဘဲ တခြားသောအဆောင် အမျိုးအစားများကို တစ်ခုချင်း ပြသလိုက်သည်။

 * ပထမဆုံးမှာ နဂါးပြာဖြစ်ပြီး လျှပ်စီးများ ထွက်ပေါ်နေကာ တိုက်ပွဲဝင်လိုစိတ် ပြင်းပြနေသည့်အသွင် ရှိသည်။

 * ထို့နောက် ငှက်နီ ဖြစ်ပြီး မီးကဲ့သို့ တောက်ပကာ ပန်းတစ်ပွင့်ကဲ့သို့ လှပလှသည်။ ကောင်းကင်ဘုံ ကိုးထပ်မှ ဖီးနစ်ငှက်ကဲ့သို့ ဖြစ်သဖြင့် အမျိုးသမီး ကျင့်ကြံသူများ၏ စိတ်ကို ချက်ချင်း ဖမ်းစားလိုက်သည်။

 * 

"ဝိုး—"

"အရမ်းလှတာပဲ ကျွန်မ ဒါလေး လိုချင်တယ်။ မောင်... ဝယ်ပေးနော်"

"အဲ... မိန်းမရယ်၊ ဒီလောက် မြန်မြန် ဆုံးဖြတ်ရမှာလား နည်းနည်း စဉ်းစားဦးလေ..."

"မြန်တယ် မောင့်ထက်မြန်တာ ဘာရှိလို့လဲ မောင့်ကို ကျွန်မ ဘာမှမပြောသေးဘူးနော်။ အခု ဒါဝယ်မပေးရင် ကျွန်မရဲ့ငယ်သူငယ်ချင်း စီနီယာအစ်ကိုဆီ သွားလိုက်မှာ..."

"... မလုပ်ပါနဲ့ ဝယ်ပေးပါ့မယ် အခုချက်ချင်း ဝယ်ပေးပါ့မယ်"

.နောက်ဆုံးတွင် လိပ်နက်ပင် ဖြစ်သည်။ ၎င်းမှာ ပထမသုံးမျိုးကဲ့သို့ လှပတောက်ပခြင်း မရှိသော်လည်း အလွန် တည်ငြိမ် လေးနက်လှကာ ရှေးကျသော အရှိန်အဝါများ ပြည့်နှက်နေသည်။ လူတို့ကို အလိုလိုယုံကြည်အားကိုးစိတ် ဖြစ်ပေါ်စေသည်။ ဤပုံစံမှာ အသက်ရာချီရှိပြီး ရာထူးကြီးသူများ သို့မဟုတ် တည်ငြိမ်သော ကျင့်ကြံသူများအတွက် အကြိုက်ပင်။

ဒီဇိုင်းတစ်ခုစီတွင် သီးသန့် အကြိုက်ရှိသူများ ရှိကြသည်။ ထို့ပြင် အဆင့်များလည်း ကွဲပြားသည်။ အသုံးပြုထားသော ကုန်ကြမ်းများမှာလည်း များစွာ ကွာခြားလှသည်။

 *ကြယ်တာရာအဆင့်တွင် ပင်လယ်နက် လျှို့ဝှက်ရွှေနှင့် ရွှေမှုန်များကို ရောစပ် သုံးထားသည်။

 * လရောင်အဆင့်တွင်မူ ရှားပါးသတ္တု ခြောက်မျိုးဖြင့် သွန်းလုပ်ထားသော ကိုးကြိမ်သန့်စင်သံကို သုံးထားသဖြင့် အလွန် မာကျောကာ မှော်စွမ်းအား စီးဆင်းမှု ကောင်းမွန်သည်။

 * နေရောင်အဆင့်တွင်မူ ကြယ်မှုန်များကိုပါ ထည့်သွင်းထားသည်။ ၎င်းမှာ အလွန် ရှားပါးသော ကုန်ကြမ်းဖြစ်ပြီး မှော်လက်နက်များ၏ စွမ်းအားကို မြှင့်တင်ပေးနိုင်သည်။ ၎င်းသည် နေမင်းကဲ့သို့ ရွှေရောင်တောက်ပနေပြီး ၎င်းမှာ ဝိညာဉ်စွမ်းအားကြောင့် မဟုတ်ဘဲ ကုန်ကြမ်းကိုယ်တိုင်က တောက်ပနေခြင်း ဖြစ်သည်။

အမြင့်ဆုံးဖြစ်သော ကမ္ဘာ့အဆင့် ကိုမူလူအများ မမြင်ရသေးပေ။

ကျင့်ကြံသူများမှာ အလွန် စိတ်လှုပ်ရှားနေကြသည်။ အမှန်အတိုင်း ပြောရလျှင် ကြယ်တာရာအဆင့်မှာပင် အလွန် ကောင်းမွန်နေပြီ ဖြစ်သော်လည်း တခြားအဆင့်များနှင့် ယှဉ်လိုက်လျှင်မူ အရောင်မှိန်သွားရသည်။

ထိုအချိန်တွင်မှ မန်နေဂျာ ဝမ်သည် ပုံဆောင်ခဲလုံးတစ်ခုကို ထုတ်ယူကာ ဝိညာဉ်စွမ်းအား ထည့်သွင်းလိုက်ရာ လူတိုင်းရှေ့တွင် ကြီးမားသော အလင်းမျက်နှာပြင်တစ်ခု ပေါ်လာသည်။

> 【ကြယ်တာရာအဆင့်: စျေးနှုန်း - အဆင့်နိမ့် ဝိညာဉ်ကျောက်တုံး ၁၈၈ တုံး】

> 【လရောင်အဆင့် : စျေးနှုန်း - အဆင့်နိမ့် ဝိညာဉ်ကျောက်တုံး ၁,၈၈၈ တုံး】

> 【နေရောင်အဆင့်: စျေးနှုန်း - အဆင့်နိမ့် ဝိညာဉ်ကျောက်တုံး ၁၈,၈၈၈ တုံး】

> 【ကမ္ဘာ့အဆင့်: စျေးနှုန်း - အဆင့်နိမ့် ဝိညာဉ်ကျောက်တုံး ၁၀၈,၈၈၈ တုံး】

> 

"... ဟား"

"ဘုရားရေ... "စျေးကြီးလိုက်တာ

"စျေးမပေါဘူးဆိုတာ သိပေမဲ့ ဒီလောက်အထိ ဖြစ်လိမ့်မယ်လို့ မထင်ထားဘူး"

"တကယ်တော့ အဆင်ပြေပါတယ်။ တစ်သက်လုံး သုံးလို့ရမယ့်ဟာပဲလေ တန်ပါတယ် ဝိညာဉ်ကျောက်တုံး နှစ်ရာနီးပါးဆိုတာ သွားကြိတ်ပြီး စုလိုက်ရင် ရနိုင်ပါသေးတယ်"

"ဟုတ်တယ်၊ ကျားဖြူကြီး သူများရှေ့မှာ ပျံသွားတဲ့ အခိုက်အတန့်လေးအတွက်တင် တန်နေပြီ။"

"တောက်... ငါက နေရောင်အဆင့်ကို လိုချင်တာ၊ အခုတော့ လရောင်အဆင့်တောင် မနည်းဝယ်ရမယ့်ကိန်းပဲ"

လူအုပ်ကြီး၏ ဆွေးနွေးသံများကို နားထောင်ရင်း မန်နေဂျာဝမ်သည် အလွန် အံ့ဩနေမိသည်။

ဤမိတ်ဆက်ပုံနှင့် စကားပြောစနစ်များမှာ ရုံးချုပ်မှ ပေးပို့ထားခြင်း ဖြစ်ပြီး တိတိကျကျ လိုက်နာရန် ညွှန်ကြားထားခြင်း ဖြစ်သည်။ အစပိုင်းတွင် သူ သံသယရှိခဲ့သည်-ဤမျှ စျေးကြီးသော အဆောင်ကို စျေးနှုန်းကြားသည်နှင့် ကျင့်ကြံသူများ ထွက်ပြေးကုန်ကြမည် မဟုတ်ပါလား။

သို့သော်လည်း ဤစနစ်တွင် အစ၌ အားသာချက်များကို အရင်ပြပြီး စျေးနှုန်းကို နောက်ဆုံးမှ ပြောရန် ညွှန်ကြားထားသည်။ ၎င်းမှာ တကယ်ကို အလုပ်ဖြစ်သည် ဤအဆောင်များ၏ စျေးနှုန်းမှာ စျေးကွက်ပေါက်စျေးထက် ဆယ်ဆ၊ အဆတစ်ရာမက မြင့်မားသော်လည်း ကျင့်ကြံသူများမှာ ၎င်းကိုမြင်တွေ့ပြီးနောက် ပုံမှန်စျေးနှုန်းဟုသာ ခံစားနေရတော့သည်။

ဘယ်လို ပါရမီရှင်မျိုးက ဒါကိုစဉ်းစားခဲ့တာလဲ

သူသည် အတွေးများကို ဖျောက်ဖျက်လိုက်ပြီး အသံကျယ်ကျယ်ဖြင့် ကြေညာလိုက်သည်  "ကဲ... အခု အရောင်းစပါပြီ"

ဝုန်း

ကျင့်ကြံသူများမှာ ရူးသွပ်ကုန်ကြပြီး ဒီရေကဲ့သို့ တိုးဝှေ့လာကြသည်။ သူတို့မှာ နောက်ကျသွားပါက ပစ္စည်းကုန်သွားမည်ကို စိုးရိမ်နေကြသည်။

"ကျွန်တော့်ကို ကြယ်တာရာအဆင့် နဂါးပြာ တစ်ခုပေး"

"ကျွန်တော် နှစ်ခုယူမယ်၊ ကျားဖြူတစ်ခါ၊ ငှက်နီတစ်ခါ"

"ငါ ငါးခုယူမယ်..."

"ဒီကလူက လရောင်အဆင့် တစ်ခုယူမယ်"

"မတွန်းကြပါနဲ့၊ ဖြည်းဖြည်းချင်း လာပါ၊ တန်းစီကြပါဦး" မန်နေဂျာ ဝမ်မှာ လန့်သွားကာ အော်ဟစ်နေရသည်။ သူသည် ပင်ပန်းသော်လည်း ပျော်ရွှင်သော အခြေအနေသို့ ရောက်ရှိသွားသည်။

"ဒီသခင်လေးက နေရောင်အဆင့်တစ်ခု ယူမယ်"

ရုတ်တရက် ခန့်ညားသော အသံတစ်သံ ထွက်ပေါ်လာသဖြင့် ဆူညံနေသော မြင်ကွင်းမှာ အနည်းငယ် တိတ်ဆိတ်သွားတော့သည်။