​အခန်း (၆၅)  ဒါက ရွှေအမြုတေဖြစ်တည်တာလား

​လက်နက်သွန်းလုပ်နန်း​ဆောင်၏ မြေပြင်နှင့် ကောင်းကင်တို့သည် အရောင်အသွေး ပြောင်းလဲသွားကြသည်။

​မျက်စိဖြင့် မြင်နိုင်သော ဝိညာဉ်စွမ်းအင် အမြောက်အမြားသည် ဒီရေလှိုင်းတစ်ခုကဲ့သို့ ပြောင်းလဲသွားကာ အရပ်မျက်နှာအသီးသီးမှ စုပြုံလာကြသည်။ အဝေးမှ ကြည့်လျှင် ကောင်းကင်ယံ၌ ကန့်လန့်ဖြတ်ချိတ်ဆွဲထားသော နတ်ဘုရားမြစ်ကြီးတစ်ခုနှင့်ပင် ဆင်တူနေသည်။

​မိုင် ၁၀၀ ပတ်လည်အတွင်းရှိ ဝိညာဉ်စွမ်းအင်အားလုံးသည် ဤအခိုက်အတန့်တွင် လှုပ်ခတ်သွားခဲ့သည်။

​သိပ်သည်းလှသော ဝိညာဉ်စွမ်းအင်များသည် အဆက်မပြတ် ဖိသိပ်ခံရပြီး မြူခိုးများအဖြစ် ပြောင်းလဲသွားကာ ကြီးမားသော ကန့်လန့်ဖြတ် ဝဲဂယက်ကြီးတစ်ခုကဲ့သို့ ဖြည်းညှင်းစွာနှင့် တည်ငြိမ်စွာ လည်ပတ်နေတော့သည်။

​ဤအခိုက်အတန့်တွင်... လက်နက်နန်းဆောင်တွင်သာမကဘဲ ​ဘေးပတ်ပတ်လည်ရှိ ကျွန်းများပေါ်မှ မြောက်ပိုင်းအမှောင်သန့်စင်ရာမြေမှတပည့်များနှင့် အကြီးအကဲများအားလုံးသည် ကောင်းကင်သို့ တစ်ပြိုင်နက် မော့ကြည့်လိုက်ကြကာ အံ့ဩတုန်လှုပ်မှုများဖြင့် ပြည့်နှက်သွားကြသည်။

​"ဟင်း... ဘယ်လိုတောင် အစွမ်းထက်တဲ့ ဝိညာဉ်ဖိအားလဲ"

​"ဒီလှုပ်ခတ်မှုက လက်နက်နန်းဆောင်ဆီက လာတာပဲ။ သူတို့တွေ တစ်စုံတစ်ခုသော နတ်ဘုရားလက်နက် ဒါမှမဟုတ် နတ်ဆေးလုံးကို သန့်စင်လိုက်လို့ ဒီလို ထူးခြားတဲ့ ကောင်းကင်ဖြစ်စဉ် ဖြစ်ပေါ်လာတာလား။"

​"မှော်ရတနာ ဒါမှမဟုတ် ဆေးလုံးတစ်ခုက ဒီလောက်အထိ ကောင်းကင်နဲ့ ဟန်ချက်ညီတဲ့ ဖြစ်စဉ်မျိုး ဖြစ်ပေါ်စေဖို့ဆိုရင် အနည်းဆုံး နတ်အဆင့်ရှိရမယ် ဒီအဖိုးကြီး အထင်အရဆိုရင်တော့ ဒါက ကျင့်ကြံသူတစ်ယောက် အဆင့်တက် တာကြောင့် ဖြစ်တဲ့ ဖြစ်စဉ်နဲ့ ပိုတူတယ်"

​"အကြီးအကဲ တစ်ယောက်ယောက် ဘေးဒုက္ခကို ရင်ဆိုင်နေရတာလား။"

​"ဘေးဒုက္ခကို ရင်ဆိုင်နေရတာဆိုရင် ကမ္ဘာပျက်မတတ် ကောင်းကင်လျှပ်စီးတွေပါရမှာလေ အခုတော့ ထူးခြားတဲ့ဖြစ်စဉ်ပဲ ရှိပြီး ဘေးဒုက္ခလျှပ်စီးရဲ့ အရိပ်အယောင်တောင် မတွေ့ရဘူး..."

​လူပေါင်းများစွာက အမျိုးမျိုး ခန့်မှန်းနေကြသော်လည်း အဖြေကိုမူ မသိရှိကြပေ။ သို့သော် မကြာမီမှာပင်... ကောင်းကင်ယံမှသက်တံတစ်ခု ဆင်းသက်လာကာ ထိုကြီးမားလှသော ဖြစ်စဉ်ကြီးသည် ရုတ်တရက် ပျောက်ကွယ်သွားတော့သည်။

​ရှယောင်ယောင်သည် ကြောင်အမ်းအမ်း ဖြစ်သွားသည်။ သူမ၏လှပတောက်ပသော မျက်လုံးများမှာ ဝိုင်းစက်သွားပြီး မျက်စိမှိတ်ကာ တရားထိုင်နေသော ဝမ်မုကို ကြည့်ရင်း ခေါင်းထဲတွင် အူသွားတော့သည်။

​ခုနလေးတင် သူတို့ စကားကောင်းကောင်း ပြောနေကြတာ မဟုတ်ပါလား။ လက်ကျန်ငွေ ပေးချေရမည့် အချိန်လည်း ရောက်နေပြီ။

​ဝမ်မုသည် ရုတ်တရက် မြေပြင်ပေါ်တွင် ထိုင်ချလိုက်ကာ မျက်နှာမှာ နီမြန်းလာပြီး ခန္ဓာကိုယ်တစ်ခုလုံး အလင်းများထွက်ပေါ်လာသည်။ သူ့ထံမှ ထွက်ပေါ်လာသော အားကောင်းလှသည့် အရှိန်အဝါလှိုင်းလုံးများကြောင့် ရှယောင်ယောင်မှာ နောက်သို့ ခြေလှမ်းအတော်များများ ဆုတ်လိုက်ရသည်။

​သူမသည် ကောင်းကင်ယံမှ ဖြစ်စဉ်ကို တစ်ချက်ကြည့် မျက်စိမှိတ်ကာ အာရုံစူးစိုက်နေသော ဝမ်မုကို တစ်ချက်ကြည့်လိုက်သည်။

​မဟုတ်မှလွဲရော... သူ ပိုက်ဆံမပေးချင်လို့ ဟန်ဆောင်နေတာလား နောက်ဆုံးလက်ကျန်ငွေကို မပေးချင်တာနဲ့ပဲ ဒီလောက်အထိ ဆူဆူပူပူ ဖြစ်အောင် လုပ်ရသလား။ ဘယ်သူ့ကို ပြချင်နေတာလဲ။

​မြောက်ပိုင်းဒေသတစ်ခုလုံးမှာ ဝမ်မျိုးနွယ်စု သခင်လေးဝမ်မုဟာ ငယ်စဉ်ကတည်းက ကျိန်စာသင့်နေလို့ ကျင့်ကြံလို့မရဘူးဆိုတာ ဘယ်သူက မသိဘဲနေမှာလဲ။ အခု ဒါတွေက ဘာတွေလဲ။

​သို့သော် မကြာမီမှာပင် သူမ တစ်ခုခု မှားနေသည်ကို သတိပြုမိသွားသည်။ ထိုအားကောင်းလှသော အရှိန်အဝါမှာ ဝမ်မုထံမှ အမှန်တကယ် အဆက်မပြတ် ထွက်ပေါ်နေခြင်း ဖြစ်သည်။

ကောင်းကင်နှင့် မြေပြင်မှထူးခြားသော ဖြစ်စဉ်မှာလည်း ဝမ်မု၏ခန္ဓာကိုယ်မှ အရှိန်အဝါနှင့် ဟန်ချက်ညီနေသည်။ ၎င်းမှာ မှော်ရတနာ သို့မဟုတ် ဝိညာဉ်ပစ္စည်းတစ်ခုခုက ဖန်တီးထားသော ထင်ယောင်ထင်မှား မဟုတ်သည်မှာ သေချာလှသည်။

​ရုတ်တရက် အခန်းထဲတွင်လူရိပ်တစ်ခု ပေါ်လာသည်။ အေးစက်လှပကာ ခန့်ညားထည်ဝါပြီး မြင့်မြတ်သောအသွင်ရှိသူ... ဆန့်ကျင်ဘက် အရှိန်အဝါနှစ်ခုသည် သူမထံတွင် ပြည့်စုံစွာ ပေါင်းစပ်နေသည်။ နှစ်ပေါင်းသောင်းချီသော လျှို့ဝှက်ရေခဲများဖြင့် သွန်းလုပ်ထားသည့် နတ်ဓားတစ်စင်းကဲ့သို့ပင်။

​"တပည့်မက မြောက်ပိုင်းအမှောင် သန့်စင်ရာမြေ အရှင်သခင်ကို ဂါရဝပြုပါတယ်" ​ရှယောင်ယောင်သည် အလျင်အမြန် ဦးညွှတ်လိုက်သည်။

​လျိုရွှမ်းရွှမ်းသည် ဝမ်မုကို တစ်ချက် ကြည့်လိုက်ပြီးနောက်.ရှယောင်ယောင်ထံသို့ အကြည့်ကို လွှဲလိုက်သည်။ သူမသည် ခေတ္တစဉ်းစားပြီးနောက် လက်စွပ်ကိုအသာအယာ ဝှေ့ယမ်းလိုက်သည်။ ရှယောင်ယောင်သည် မျက်စိရှေ့တွင် ဝေဝါးသွားသလို ခံစားလိုက်ရသည်။ သူမပြန်ကြည့်လိုက်သောအခါ မြင့်မားလှသော ကျောက်ဆောင်ကြီးများ ကြားသို့ ရောက်ရှိနေကာ အောက်တွင် အဆုံးမရှိသော သမုဒ္ဒရာကြီး ရှိနေသည်။

​ကောင်းကင်ယံတွင်မူ... ဖြစ်စဉ်မှာ ဆက်ရှိနေဆဲဖြစ်ပြီး ကန့်လန့်ဖြတ်ဝဲဂယက်ကြီးမှာ ပို၍ သိပ်သည်းလာကာ တည်ငြိမ်စွာ လည်ပတ်နေသည်။ ဝမ်မုသည် မနီးမဝေးတွင် မျက်စိမှိတ်လျက် ထိုင်နေဆဲ ဖြစ်သည်။ လျိုရွှမ်းရွှမ်းသည် ဝမ်မု၏ဘေးတွင် ရပ်ကာသူ့ကို စိတ်သက်သာရာရမှုနှင့် ဝမ်းသာမှုများ ရောပြွမ်းနေသော အကြည့်များဖြင့် ကြည့်နေသည်။

​"မြောက်ပိုင်းအမှောင် သန့်စင်ရာမြေ အရှင်သခင်..."

​ဤအခိုက်အတန့်တွင် ရှယောင်ယောင်သည် သူမသည် လျိုရွှမ်းရွှမ်း၏ကောင်းကင်ဘုံနယ်မြေအတွင်းသို့ ရောက်ရှိနေပြီ ဖြစ်ကြောင်း သိလိုက်သည်။

​လျိုရွှမ်းရွှမ်းက ပြောလိုက်သည် - "ဝမ်မု ကျင့်ကြံနိုင်တယ်ဆိုတဲ့ ကိစ္စကိုမင်း လျှို့ဝှက်ထားပေးနိုင်မယ်လို့ ငါ မျှော်လင့်တယ်"

​ရှယောင်ယောင်သည် အနည်းငယ် တုန်လှုပ်သွားကာ ခေါင်းညိတ်လိုက်သည်။ ကောင်းကင်သွန်းလုပ်ရေးအကြီးအကဲ၏တစ်ဦးတည်းသော အမွေဆက်ခံသူအနေဖြင့် မြောက်ပိုင်းအမှောင်ထုသန့်စင်ရာမြေ အရှင်သခင်နှင့် သူမ ပထမဆုံးအကြိမ် တွေ့ဖူးခြင်း မဟုတ်ပေ။ သို့သော် ယခု အခြေအနေမှာ ပုံမှန်နှင့် လုံးဝ ကွာခြားနေသည်။

​"နားလည်ပါပြီ" ရှယောင်ယောင်က လက်ကို အလျင်အမြန် မြှောက်ကာ - "တပည့်မ ဒါကို လုံးဝ လျှို့ဝှက်ထားပါ့မယ်" ဟု ကတိပေးလိုက်သည်။

​လျိုရွှမ်းရွှမ်းက ခေါင်းညိတ်သည်။ တစ်ဖက်လူမှာ အကြီးအကဲ၏တစ်ဦးတည်းသော အမွေဆက်ခံသူ ဖြစ်သဖြင့် အကြီးအကဲ၏ မျက်နှာကို ထောက်ထား၍ လီယွမ်ဟွာကို လုပ်ခဲ့သလိုမျိုး နှလုံးသားမိစ္ဆာသွေးသစ္စာဆိုခိုင်းရန် မသင့်တော်ပေ။ မည်သို့ပင်ဆိုစေ သူမ၏သားဖြစ်သူ ကျင့်ကြံနိုင်သည့် အချက်မှာ တစ်သက်လုံး လျှို့ဝှက်ထားနိုင်မည် မဟုတ်ကြောင်း သူမ သိသည်။ အနှေးနှင့်အမြန် လူတွေ သိလာကြမည်သာ။ လျှို့ဝှက်ထား၍ မရလျှင်ပင် ကိစ္စမရှိပါ၊ သူ့ကို ကာကွယ်ရန် ပိုမို အစွမ်းထက်သော ပညာရှင်များကို ထားရှိပေးရုံသာ ရှိသည်။

​လျိုရွှမ်းရွှမ်းသည် သူမကို ဆက်မကြည့်တော့ဘဲ ဝမ်မုထံသို့ ပြန်ကြည့်လိုက်သည်။ ရှယောင်ယောင်လည်း ဝမ်မုထံသို့ မသိစိတ်ဖြင့် လှမ်းကြည့်မိသည်။

​ဝမ်မု၏ ခန္ဓာကိုယ်မှ အနီ၊ အပြာ၊ အစိမ်း၊ ခရမ်း စသည့် ရောင်စုံ အလင်းတန်းများစွာ ထွက်ပေါ်နေသည်ကို သူမချက်ချင်း သတိပြုမိလိုက်သည်။

ထို့နောက် ဟင်းလင်းပြင်တွင် ရှေးဟောင်းစာလုံးများစွာ ပေါ်လာတော့သည်။ ထိုစာလုံးများမှာ ကျင့်စဉ်များနှင့် ကျမ်းစာများ ဖြစ်ကြသည်။

​သစ်သားမူလကျင့်စဉ်၊ ​

ရေမူလကျင့်စဉ်၊

​မြေမူလကျင့်စဉ်၊

​...

​ရှယောင်ယောင်၏မျက်လုံးများမှာ ဝိုင်းစက်သွားသည်။ ထိုကျင့်စဉ်များကို သူမသိသည်။ ၎င်းတို့မှာ အဆင့်မြင့်ကျင့်စဉ်များ မဟုတ်ဘဲ လမ်းဘေးတွင် တွေ့ရလေ့ရှိသော အခြေခံကျင့်စဉ်များထက် အနည်းငယ်သာ ပိုကောင်းသည့် ကျင့်စဉ်များ ဖြစ်ကြသည်။

​ဒါ ဘယ်လိုဖြစ်နိုင်မှာလဲ ဝမ်မုသည် ဝမ်မျိုးနွယ်စု၏သခင်လေး၊ မြောက်ပိုင်းအမှောင်ထုသန့်စင်ရာမြေ အရှင်သခင်၏တစ်ဦးတည်းသော သား မဟုတ်ပါလား။ သူက ဘာလို့ ဒီလိုအဆင့်နိမ့် ကျင့်စဉ်တွေကို ကျင့်ကြံနေရတာလဲ။

​ထို့ပြင်... တစ်ခုတည်းလည်း မဟုတ်ဘဲ အများကြီးကျင့်ကြံထားတာလား ဘာအတွက်လဲ ကျင့်စဉ်တွေ အများကြီး ကျင့်လေ စွမ်းအားတွေ နှစ်ဆတိုးလေမို့လို့လား ဒါက မဖြစ်နိုင်ဘူးလေ။

ကျင့်ကြံသူတစ်ယောက်မှာ စွမ်းအား အကန့်အသတ် ရှိတာပဲ တခြားဓာတ်တစ်ခုတိုးလာရင် မူလဓာတ်ကလျော့သွားမှာပဲ။ ကျင့်စဉ်ငါးခုကို ကျင့်တာက အားအင်ဖြုန်းတာကလွဲလို့ ဘာမှ ထူးမှာမဟုတ်ဘူး။ အပြင်လောကက ကျင့်ကြံခြင်း အခြေခံမရှိတဲ့ တစ်ကိုယ်တော် ကျင့်ကြံသူဆိုရင်တော့ ဒီလိုအမှားမျိုး လုပ်မိနိုင်ပေမဲ့ ဝမ်မျိုးနွယ်စု သခင်လေးကတော့ ဒါမျိုး လုပ်ပါ့မလား။

​ရှယောင်ယောင် ကြည့်လေလေ ပိုပြီး ထူးဆန်းလေလေ ဖြစ်လာသည်။ ဝမ်မုမှာ လျှို့ဝှက်ချက်တွေနဲ့ ပြည့်နေပြီး မြူခိုးတွေကြား ဖုံးကွယ်ထားသလို ဘာမှ ရှင်းရှင်းလင်းလင်း မသိရပေ။ မကြာမီမှာပင် သူမ တစ်ခုခုထပ်ပြီး ထူးဆန်းတာကို တွေ့လိုက်ရပြန်သည်။

​ဝမ်မု၏ခန္ဓာကိုယ်မှ အလင်းတန်းများ ပိုမိုထွက်ပေါ်လာသည်။ အရှိန်အဝါတစ်ခုချင်းစီမှာ မတူညီကြဘဲ မတူညီသောကျင့်စဉ်များမှ လာခြင်းမှာ ထင်ရှားလှသည်။

​သွေ့ခြောက်ခြင်းမူလကျင့်စဉ်၊

​မိုးကြိုးစာချွန်ကျင့်စဉ်၊

​လျှို့ဝှက်ရွှေကျင့်စဉ်၊

​ကျောက်စိမ်းကညာကျင့်စဉ်၊

​ရာ့ခ်ရှာဆာကျင့်စဉ် ......

​အရေအတွက်မှာ တစ်စထက်တစ်စ ပိုများလာသည်။ ထောင်ပေါင်း၊ သောင်းပေါင်းချီနေပြီ ဖြစ်သည်။ အရှိန်အဝါ အများစုမှာ အထိုင်ကျနေပြီ ဖြစ်သဖြင့် ဝမ်မုသည် ထိုကျင့်စဉ်များကို ပြီးပြည့်စုံခြင်းအဆင့်အထိ နားလည်သဘောပေါက်ထားကြောင်း ပြသနေသည်။

​"သွားပြီ... ငါညလုံးပေါက် လက်နက်တွေ သန့်စင်နေလို့ မျက်စိတွေ ဝေနေပြီ ထင်တယ်..." ရှယောင်ယောင်၏ လှပသော မျက်နှာတွင် မယုံကြည်နိုင်မှုများဖြင့် ပြည့်နှက်နေသည်။ သူမ၏ နှုတ်ခမ်းလေးမှာ ဟနေပြီး ကြောင်တောင်တောင် ဖြစ်နေသော ပုံစံမှာချစ်စရာပင် ကောင်းနေသည်။

​လူတစ်ယောက်က ဒီလောက်များပြားတဲ့ ကျင့်စဉ်တွေကို ကျင့်ကြံပြီး ပြီးပြည့်စုံအောင် လုပ်ဖို့ အားအင် ဘယ်ကရမှာလဲ သန့်စင်ရာမြေက သူတော်စင်အဆင့်ပုဂ္ဂိုလ်တွေတောင် ဘယ်လောက်ပဲပါရမီရှင်ဖြစ်ပါစေ အားအင်က အကန့်အသတ် ရှိတာပဲ။ အဲဒီကျင့်စဉ်တွေက အဆင့်မမြင့်ဘူးဆိုရင်တောင် ဒီလောက် အရေအတွက်များတာကို အကုန်လုံးပြီးပြည့်စုံအောင် လုပ်ဖို့ဆိုရင် အနည်းဆုံး နှစ်တစ်ရာလောက် ကြာမှာပဲ မဟုတ်လား ဒါက သဘာဝကို ဆန့်ကျင်နေတာပဲ။

​ထို့ပြင်... ကျင့်စဉ်တိုင်းက အတူတူသင်လို့ရတာ မဟုတ်ဘူး တချို့ကျင့်စဉ်တွေက တစ်ခုနဲ့တစ်ခု ဆန့်ကျင်ဘက်ဖြစ်နေပြီး ကျင့်ကြံသူရဲ့အခြေခံအုတ်မြစ်ကိုတောင် ပျက်စီးစေနိုင်တာလေ။ ဒါက အရိုးရှင်းဆုံး အခြေခံအသိပညာပဲ။ ဒါပေမဲ့ ဝမ်မုဆီမှာတော့ အဲဒီ အခြေခံတွေက မရှိသလိုပဲ။

​ရုတ်တရက် ဝမ်မု၏ခန္ဓာကိုယ်အတွင်းမှ စွမ်းအားများ ပေါက်ကွဲထွက်လာပြီး ထိုလှုပ်ခတ်မှုမှာ ကောင်းကင်သို့ထိုးတက်သွားကာ ဝဲဂယက်ကြီးကို ပြင်းထန်စွာ တုန်ခါသွားစေသည်။

​ရှယောင်ယောင်၏ မျက်လုံးများ ပြူးသွားပြန်သည်။

​"တောက်"

"ဒါက... အခြေခံတည်ဆောက်ခြင်းအဆင့် ကျင့်ကြံသူတစ်ယောက်မှာ ရှိရမယ့် စွမ်းအားမျိုးလား"

​သူမသိထားသည့် အသိပညာများ ထပ်မံ ချေဖျက်ခံလိုက်ရသဖြင့် သူမသည် တောက်တစ်ချက် ခေါက်လိုက်မိတော့သည်။ သူမ၏ရင်ဘတ်မှာလည်း စိတ်လှုပ်ရှားမှုကြောင့် နိမ့်ချည်မြင့်ချည် ဖြစ်နေတော့သည်။