အခန်း (၆၄) ငါထိန်းထားလို့ မရတော့ဘူး

ရှယောင်ယောင်သည် ဝမ်မု၏ ရှင်းပြချက်ကို အပြည့်အဝ မယုံကြည်သော်လည်း သူမ၏ သဘောထားမှာ သိသိသာသာ ပြောင်းလဲသွားခဲ့သည်။

ဝမ်မုအတွက်မူ ထိုမျှနှင့်တင် လုံလောက်ပြီဖြစ်ကာ သူ၏ လှည့်ကွက်မှာအောင်မြင်သွားကြောင်း သိလိုက်သည်။ သူသည် ကျောက်စိမ်းပြားကို ရတနာတစ်ခုလို သိမ်းဆည်းလိုက်ပြီး လက်ဝှေ့ယမ်းကာ - "ကဲ... ပစ္စည်းတွေကို စစ်ဆေးကြရအောင်"

"နင် တောင်းဆိုထားတဲ့အတိုင်း ဆက်သွယ်ရေး အဆောင်တစ်သန်းကို ဒီဇိုင်းလေးမျိုးနဲ့ လုပ်ပေးထားတယ်- နဂါးပြာ ၊ ကျားဖြူ ၊ ငှက်နီ နဲ့ လိပ်နက်ဆိုပြီးတော့ပေါ့။"

"ဒီဇိုင်း တစ်ခုစီမှာ အဆင့်လေးမျိုး ရှိတယ်။ ကြယ်တာရာအဆင့်ခုနစ်သိန်း၊ လရောင်အဆင့် နှစ်သိန်း၊ နေရောင်အဆင့် ရှစ်သောင်းနဲ့ ကမ္ဘာ့အဆင့်နှစ်သောင်း"

"လုပ်ဆောင်ချက်ပိုင်းကတော့ သာမန်ဆက်သွယ်ရေးအဆောင်တွေနဲ့ အတူတူပါပဲ ဒါပေမဲ့ ငါတို့က အကောင်းဆုံး ကုန်ကြမ်းတွေကို ရွေးသုံးထားတယ်၊ ပုံရိပ်ဖော်အစီအရင်တွေကို အဆင့်မြှင့်ထားသလို ထိတွေ့မှု အာရုံခံစနစ်လေးတွေလည်း ထည့်ပေးထားတယ်။"

ဝမ်မုသည် ရှယောင်ယောင်ထံမှ ဟင်းလင်းပြင်လက်စွပ်တစ်ကွင်းကို ယူလိုက်သည်။

သူ့လက်ကို တစ်ချက်ဝှေ့ယမ်းလိုက်ရာ ပုံစံနှင့် အရွယ်အစား မတူညီသော ဆက်သွယ်ရေး အဆောင်လေးခုသည် သူ့ရှေ့တွင် ပျံဝဲနေသည်။

၎င်းတို့အားလုံးမှာ အပြားများထွင်းထုထားပြီး ကျောဘက်တွင်ခွေပတ်နေသော နဂါးရုပ်များကို တန်ဖိုးကြီး လျှို့ဝှက်ရွှေများဖြင့် သွန်းလုပ်ထားသဖြင့် ခန့်ညားထည်ဝါလှသည်။

ပထမဆုံး ကွာခြားချက်မှာ အရောင်ပင် ဖြစ်သည်။

 * ကြယ်တာရာအဆင့်မှာ ကြေးနီရောင်၊

 * လရောင်အဆင့်မှာ ငွေရောင်၊

 * နေရောင်အဆင့်မှာ ရွှေရောင် နဲ့

 * ကမ္ဘာ့အဆင့်မှာမူ အလှဆုံးဖြစ်သည် ခရမ်းရောင်နှင့် အနက်ရောင်ကို ရောစပ်ထားပြီး နဂါး၏ မျက်လုံးများမှာ အနီရောင် ပုလဲများဖြင့် စီခြယ်ထားသဖြင့် မြင့်မြတ်သောအသွင်ကို ဆောင်သည်။

ရှေ့မျက်နှာပြင်မှာမူ ပင်လယ်နက်လျှို့ဝှက်ရွှေများဖြင့် ပြုလုပ်ထားသဖြင့် မှန်တစ်ချပ်ကဲ့သို့ ချောမွေ့နေသည်။ ဝမ်မုသည် အလွန်ကျေနပ်သွားသည်။ ဤဒီဇိုင်းကို မြင်မြင်ချင်း သူသဘောကျသွားတော့သည်။ လက်နက်သန့်စင်ရေးနန်းဆောင်ကို လာခဲ့မိသည်မှာ မှန်ကန်သော ဆုံးဖြတ်ချက်ပင်။

သူ့ကဲ့သို့ ချောမောခန့်ညားပြီးစံပြဖြစ်သောလူငယ်တစ်ဦးအတွက် ဤမျှလှပသော အဆောင်များကို မည်သူက ငြင်းပယ်နိုင်ပါ့မနည်း။ အလှပြရန်အတွက်သာ ထားလျှင်ပင် အလွန်ခန့်ညားလှပေသည်။ ၎င်းမှာ စူပါဟီးရိုးများ အသွင်ပြောင်းသည့် ကိရိယာနှင့်ပင် ဆင်တူနေသည်။ သို့သော် အဆင့်မြင့် ကုန်ကြမ်းများကြောင့် ရရှိသည့် အလေးချိန်နှင့် ခန့်ညားမှုမှာအပြင်လောကမှ စျေးပေါသော ပစ္စည်းများကဲ့သို့ မဟုတ်ချေ။

ကောင်းပြီ။ သူ လိုချင်သည့် ပထမဆုံး အချက်မှာ သူ၏ပစ္စည်းနှင့် အပြင်စျေးကွက်ရှိ ပစ္စည်းများကြား သိသိသာသာ ကွာခြားနေရန် ဖြစ်သည်။

အနိမ့်ဆုံး ကြယ်တာရာအဆင့်နှင့် သာမန်အဆောင်များကို ယှဉ်ကြည့်လျှင်ပင် အဆင့်ချင်း လုံးဝ မတူတော့ချေ။ ၎င်းမှာ သံတိုသံစနှင့် ရွှေထည်ပစ္စည်းကို ယှဉ်နေသကဲ့သို့ပင်။

ကျင့်ကြံခြင်းလောကရှိ လက်နက်သန့်စင်သူ အများစုမှာ လက်တွေ့ဆန်ကြသည်။ သူတို့အတွက် ပစ္စည်းတစ်ခုမှာ အသုံးဝင်လျှင် လုံလောက်ပြီဟု ယူဆကြသည်။ ၎င်းမှာလည်း မမှားပေ အန္တရာယ်များသော လောကတွင် အသွင်အပြင်ထက် အကြမ်းခံမှုက ပိုအရေးကြီးသည်မဟုတ်ပါလား။ ထို့ကြောင့် မည်သူကမျှ ဆက်သွယ်ရေးအဆောင်၏ အလှအပကို ဂရုမစိုက်ကြချေ။ အာနိသင်ချင်း အတူတူကို အပင်ပန်းခံ အလှဆင်နေရန် မလိုဟု သူတို့ တွေးကြသည်။

သို့သော် ဝမ်မုမှာစီးပွားရေး ထွန်းကားသော ခေတ်မှလာသူဖြစ်သဖြင့် ဟောင်းနွမ်းနေသော ပစ္စည်းတစ်ခုကို မည်သို့ဆွဲဆောင်မှုရှိအောင် လုပ်ရမည်ကို သိသည်။ အသွင်အပြင်မှာ ပထမဆုံး အဆင့်ပင်။

ဝမ်မုသည် ကြယ်တာရာအဆင့် နဂါးပြာအဆောင် တစ်ခုကို ကောက်ယူလိုက်သည်။ ရှယောင်ယောင်၏လမ်းညွှန်မှုဖြင့် ဝိညာဉ်စွမ်းအား အနည်းငယ် ထည့်သွင်းလိုက်ရာ မှန်ပြင်မှ အလင်းများ တောက်ပလာပြီး နဂါးပုံရိပ်တစ်ခု ဟိန်းဟောက်ကာ ထွက်ပေါ်လာသည်။ ထို့နောက် ထိုနဂါးပုံရိပ်မှာလေထဲတွင် ကခုန်ရင်း ခွေပတ်နေသော နဂါးအမှတ်တံဆိပ်အဖြစ် ပြောင်းလဲသွားသည်။ 

မျက်နှာပြင်ပေါ်တွင် "ဆက်သွယ်ရန်"ဆိုသည့် ခလုတ်ပုံစံလေးတစ်ခုတည်းသာ ရှိသည်။ ၎င်းကို နှိပ်လိုက်လျှင် ဆက်သွယ်ရမည့်သူများ စာရင်း ပေါ်လာမည်ဖြစ်သည်။ ဤခေတ်တွင် ဖုန်းနံပါတ်များမရှိကြသဖြင့် ကျင့်ကြံသူများသည် သူတို့၏ ကိုယ်ပိုင် အရှိန်အဝါအစအနများကို ဖလှယ်ကြရပြီး ဆက်သွယ်ရေးအဆောင်က ထိုအရှိန်အဝါမှတစ်ဆင့် အဝေးသို့သတင်းပို့ပေးခြင်း ဖြစ်သည်။

သေချာပေါက် ဤနည်းလမ်းတွင် အားနည်းချက်များ ရှိသည်။ အကယ်၍ အကွာအဝေး ဝေးလွန်းလျှင် သို့မဟုတ် ကျင့်ကြံသူက အားနည်းလျှင် သတင်း ပို့၍မရတော့ချေ။ ထို့ပြင် လမ်းကြောင်းတွင် တားမြစ်နယ်မြေတစ်ခုခု ရှိနေပါက အဆက်အသွယ် ပြတ်တောက်သွားတတ်သည်။

ထို့ကြောင့် လက်ရှိဆက်သွယ်ရေးအဆောင်များသည် အနီးအနားတွင်ရှိပြီး လျှောက်မသွားသော ကျင့်ကြံသူများအတွက်သာ အလုပ်ဖြစ်ပေသည်။

ဝမ်မုတွင် ၎င်းအတွက် အဖြေရှိပြီးသား ဖြစ်သည်။

"ငါ မှာထားတဲ့ ဆက်သွယ်ရေး ဗဟိုချက်တွေရော ပြီးပြီလား"

"ဗဟိုချက် ဪ... အစီအရင်အပြားတွေကို ပြောတာလား..." ရှယောင်ယောင် မျက်တောင်ခတ်လိုက်သည်  "အဲဒါတွေလည်း လက်စွပ်ထဲမှာ ပါတယ် သေချာရှာကြည့်လိုက်ဦး အောက်နားမှာ ရောက်နေတာနေမှာ။"

ဆက်သွယ်ရေးအဆောင်တစ်သန်းနှင့် ပြည့်နေသော လက်စွပ်ထဲတွင် ပစ္စည်းရှာရသည်မှာ မလွယ်လှပေ။ ခဏရှာဖွေပြီးနောက် ဝမ်မုသည် အစီအရင်အပြား ၁၀၀ နှင့် ခေါင်းအရွယ်အစားရှိသော ကိုးရောင်ခြယ် ပုလဲတစ်လုံးကို တွေ့လိုက်ရသည်။

"နင် တောင်းဆိုထားတဲ့အတိုင်း အဆောင်တိုင်းမှာ သီးသန့်အမှတ်အသား ပါဝင်တယ်။ ဖွင့်လိုက်တာနဲ့ သူ့ရဲ့အရှိန်အဝါကို အနီးဆုံး အစီအရင်အပြားဆီ ပို့ပေးမယ် အဲဒီကနေတစ်ဆင့် ကောင်းကင်နှလုံးသားကျောက်တုံးဆီကို ရောက်သွားလိမ့်မယ်။ အဲဒီကျောက်တုံးကို ထိန်းချုပ်ထားတဲ့သူက  ဆက်သွယ်ရေးအဆောင်တိုင်းရဲ့တည်နေရာကို သိနိုင်လိမ့်မယ်။ ဒါပေမဲ့ အကွာအဝေးတော့ ကန့်သတ်ချက် ရှိတယ် အခုလောလောဆယ် မြောက်ပိုင်းပင်လယ်ဒေသအထိပဲ ရဦးမယ်။"

ဝမ်မုသည် ဝိညာဉ်အာရုံဖြင့် စစ်ဆေးကြည့်ပြီး ပို၍ကျေနပ်သွားသည် - "ကောင်းတယ်၊ တကယ်ကို ကောင်းတယ်။"

သူ၏ရည်မှန်းချက်မှာရိုးရှင်းသည် တစ်ဦးနှင့်တစ်ဦး တိုက်ရိုက်သတင်းပို့ခြင်းမှာ အဆက်အသွယ် ပြတ်တောက်ရန် လွယ်ကူလွန်းသဖြင့် သူက ဆက်သွယ်ရေး ကွန်ရက်ကြီးတစ်ခု တည်ဆောက်ရန် ကြံစည်နေခြင်း ဖြစ်သည်။

ကောင်းကင်နှလုံးသားကျောက်တုံးများကို ဂိုဏ်းကြီးများတွင် တပည့်များ၏အရှိန်အဝါကို မှတ်တမ်းတင်ရန် အသုံးပြုလေ့ရှိသည်။ တပည့်တစ်ဦး ဘေးဒုက္ခကြုံရလျှင် ထိုကျောက်တုံးက တုံ့ပြန်မှုပေးသဖြင့် သွားရောက် ကယ်ဆယ်နိုင်ခြင်း ဖြစ်သည်။ ဝမ်မုက ၎င်းကို ဗဟိုချက်အဖြစ် အသုံးပြုမည်ဖြစ်သည်။

အစီအရင်အပြားများကိုမူ အရေးပေါ်အချက်ပြကိရိယာများအဖြစ် အသုံးပြုမည်။ သူသည် မြောက်ပိုင်းပင်လယ်တစ်ခုလုံးရှိ လန်ယာကုန်သည်အဖွဲ့ အခွဲတိုင်းတွင် အစီအရင်အပြားတစ်ခုစီ ထားရှိရန် စီစဉ်ထားသည်။ ထိုအခါ သတင်းများသည် တားမြစ်နယ်မြေများကို ကျော်ဖြတ်ကာ ကွန်ရက်မှတစ်ဆင့် သွားနိုင်မည် ဖြစ်သည်။

ဝမ်မု ချီးကျူးသည်ကိုမြင်သောအခါ ရှယောင်ယောင်က ဂုဏ်ယူစွာဖြင့် ရင်ကို မော့လိုက်သည် - "လက်နက်သန့်စင်ရေးနန်းဆောင်က သာမန်ပစ္စည်းတွေ မလုပ်ဘူးလေ။ ဝမ်သခင်လေး... ပစ္စည်းတွေ စစ်ဆေးပြီးပြီဆိုတော့ နောက်ဆုံး လက်ကျန်ငွေ ပေးဖို့အချိန်တန်ပြီနော်။"

"သေချာပေါက် ပေးမှာပေါ့။"

ဝမ်မုက တွန့်ဆုတ်ခြင်းမရှိဘဲ ပြန်ဖြေကာ ငွေပေးရန် ပြင်လိုက်စဉ် စနစ်၏ အသိပေးချက်များ စိတ်ထဲတွင် မြည်လာသည်။

【တောင်】

【ဂုဏ်ယူပါသည် သင် ရင်းနှီးမြှုပ်နှံထားသော လင်းယန်သည် ပင်လယ်ငြိမ်သက် နဂါးပုလဲကို အောင်မြင်စွာစုပ်ယူနိုင်ခဲ့ပြီး အဆင့်မြင့် ကောင်းကင်ပြောင်းလဲခြင်း နဂါးကျင့်စဉ်သို့ တက်လှမ်းနိုင်ခဲ့ပါပြီ】

【ဂုဏ်ယူပါသည် သင်သည် လင်းယန်ထံမှ ကျင့်ကြံမှု အကျိုးကျေးဇူးများကို ရရှိခဲ့ပါပြီ】

ဝမ်မု၏ခန္ဓာကိုယ်အတွင်းသို့ အားအင်များ အရှိန်အဟုန်ဖြင့် စီးဝင်လာသောအခါ သူ၏ မျက်စိသူငယ်အိမ်များ ကျဉ်းမြောင်းသွားပြီး ခန္ဓာကိုယ် ပေါက်ကွဲထွက်တော့မလို ခံစားလိုက်ရသည်။ သူသည် အဆင့်တက်ရန် လက်တစ်ကမ်းအလိုသို့ ရောက်နေပြီးသား ဖြစ်သည်။ ယခု လင်းယန်ထံမှ ရရှိသော အကျိုးကျေးဇူးများက ထိုအတားအဆီးကို တိုက်ရိုက် ဖောက်ထွက်သွားတော့သည်။

သွားပြီ။

ငါ ထိန်းထားလို့ မရတော့ဘူး။

ငါ ရွှေအမြုတေအဆင့်ကို အခုချက်ချင်း တက်လှမ်းတော့မယ်။

_