အခန်း (၆၂) မဟာဗျူဟာအမြင်ချင်း ကွာခြားမှု

ကုန်သည်အဖွဲ့သုံးဖွဲ့၏ ကမ်းလှမ်းမှုများမှာ တကယ့်ကို ရက်ရောလှသည်။

ရေတွက်မရနိုင်သော ကျင့်ကြံသူများသည် လျှို့ဝှက်နယ်မြေများနှင့် ရှေးဟောင်းနေရာများအကြောင်း သူတို့သိသမျှ သတင်းအချက်အလက် အစအနမှန်သမျှကို ဝိညာဉ်ကျောက်တုံးများနှင့် လဲလှယ်ရန် ရောင်းချခဲ့ကြသည်။

တိကျမှု မသေချာသော သတင်းလေးတစ်ခုကပင် အနည်းဆုံး ဝိညာဉ်ကျောက်တုံး ငါးထောင် ရရှိစေသည်။ အကယ်၍ ခိုင်လုံသော အထောက်အထားပြနိုင်ပြီး ယုံကြည်လောက်စရာ ဇာတ်လမ်းမျိုးဆိုလျှင် ဆုကြေးမှာ သောင်းဂဏန်းမှ သိန်းဂဏန်းအထိ ထိုးတက်သွားတတ်သည်။

ခဏအတွင်းမှာပင် တစ်နိုင်ငံလုံးရှိ ပိန့်လိုင် ၊ စီဟိုင်နှင့် ယွန်းကုန်းကုန်သည်အဖွဲ့ခွဲများမှာ လူများဖြင့် ပြည့်နှက်သွားတော့သည်။

ဝန်ခံရမည်မှာ... ထိုကဲ့သို့သော ငွေပုံကြီးများဖြင့် ဆွဲဆောင်ခြင်းက ကုန်သည်အဖွဲ့ သုံးဖွဲ့အတွက် အကျိုးရလဒ်များကို အမြန်ဆုံး ဖြစ်ထွန်းစေခဲ့သည်။ အဆုံးတွင် မြောက်ပိုင်းပင်လယ်မှာ ကျယ်ဝန်းလှသည်မဟုတ်ပါလား။ အဆင့်မြင့် ရှေးဟောင်းနေရာများမှာ ရှားပါးသော်လည်း၊ အသေးစားနေရာများနှင့် လျှို့ဝှက်နယ်မြေများကို ရှာဖွေရန်မှာ မခက်ခဲလှပေ။

ကိုးဝိညာဉ်ကျွန်း၏ အနောက်ဘက် မိုင်ပေါင်း ၄၀၀ အကွာတွင် ကျွန်းငယ်လေးတစ်ခု၏ တောင်တန်းများအတွင်းမှ ပန်းရောင်အလင်းတန်းတစ်ခုရုတ်တရက် ကောင်းကင်သို့ ထိုးတက်သွားပြီး ဝိညာဉ်အရှိန်အဝါများမှာ တောအုပ်တစ်ခုလုံးကို လွှမ်းခြုံသွားသည်။

ခဏချင်းမှာပင် အနီးနားရှိ ကျွန်းများမှ ကျင့်ကြံသူများသည် လေထဲသို့ ပျံတက်ကာ ထိုနေရာသို့ အပြေးအလွှား ရောက်ရှိလာကြသည်။

"ဒါ ကောင်းကင်နှင့်မြေပြင်ရတနာ တစ်ခု ပေါ်လာတာလား"

"ဒီအရှိန်အဝါအရဆိုရင် အနည်းဆုံး ထိပ်တန်းအဆင့်မှော်ရတနာတစ်ခု ပေါ်ထွန်းလာမှ ဒီလောက်အထိ လှုပ်ခတ်မှု ဖြစ်မှာ"

"မှော်ရတနာ မဟုတ်လောက်ဘူး လျှို့ဝှက်နယ်မြေတစ်ခုခုနဲ့ ပိုတူတယ်"

"..."

ရောက်ရှိလာသော တစ်ကိုယ်တော် ကျင့်ကြံသူ များစွာမှာ စိတ်လှုပ်ရှားမှုဖြင့် မျက်နှာများ ဝင်းပနေကြသည်။ သို့သော် ထိုနေရာကို တစ်စုံတစ်ယောက်က ဦးအောင် သိမ်းပိုက်ထားသည်ကို တွေ့လိုက်ရသည်။

"ဒီနေရာက ကုန်သည်အဖွဲ့ သုံးဖွဲ့ ပိုင်ဆိုင်တဲ့ နေရာပဲ မသက်ဆိုင်တဲ့သူတွေ အကုန် အခုချက်ချင်း ထွက်သွားကြ"

အပြာရောင်ဝတ်စုံဝတ်ထားသူ တစ်ဦးသည် ဟင်းလင်းပြင်တွင် လက်ပိုက်ရပ်ကာ လူတိုင်း၏ လမ်းကို ပိတ်ဆို့ထားပြီး အေးစက်သော မျက်နှာထားဖြင့် ပြောလိုက်သည်။

"ဘာအကြောင်းနဲ့လဲ"

တစ်ကိုယ်တော် ကျင့်ကြံသူတစ်ဦးက ဒေါသတကြီးပြောသည်  "ရှေးကတည်းက ကောင်းကင်နှင့်မြေပြင်ရတနာဆိုတာ ကံပါတဲ့သူ ပိုင်ဆိုင်ရစမြဲပဲ မင်းတို့ လုပ်နေတာက ဗြောင်ကျကျ ဓားပြတိုက်တာပဲ"

ထိုလူလတ်ပိုင်းအမျိုးသားက သူ့ကို ဂရုမစိုက်သလို ကြည့်ကာ နှာခေါင်းရှုံ့လိုက်သည်  "နုံအလိုက်တာ။"

သူ့လက်စွပ်ကို ဝှေ့ယမ်းလိုက်ရာ ဝိညာဉ်အလင်းတန်းတစ်ခု ကောင်းကင်သို့ ထိုးထွက်သွားပြီး ထိုကျင့်ကြံသူကို တည့်တည့်မှန်သွားသည်။

"အား"

အော်ဟစ်သံနှင့်အတူ ထိုလူ၏ ခန္ဓာကိုယ်မှာ ပျက်စီးသွားပြီး ဝိညာဉ်ပါချုပ်ငြိမ်းကာ ပင်လယ်ထဲသို့ ပြုတ်ကျသွားတော့သည်။

တစ်နေရာလုံး တိတ်ဆိတ်သွားသည်။ သေဆုံးသူ၏သူငယ်ချင်းများမှာ ဝမ်းနည်းပူဆွေးနေကြသော်လည်း စကားတစ်လုံးမှ မဟရဲကြချေ။ သူတို့သည် လက်သီးကို ကျစ်ကျစ်ပါအောင် ဆုပ်ကာ ဒေါသကို မျိုသိပ်ပြီး ဆုတ်ခွာသွားကြရသည်။

"ဟူး"

"ကုန်သည်အဖွဲ့ သုံးဖွဲ့က လွန်လွန်းတယ်"

"ဘာတတ်နိုင်မှာလဲ ဒါကျင့်ကြံခြင်းလောကလေအင်အားကြီးသူက အားနည်းသူကို အနိုင်ကျင့်တာ သဘာဝပဲ။"

"ငါ နားမလည်တာက ကုန်သည်အဖွဲ့ သုံးဖွဲ့မှာ ဘယ်လိုရတနာမျိုးမရှိလို့လဲ ဘာလို့ ငါတို့လို တစ်ကိုယ်တော် ကျင့်ကြံသူတွေရဲ့ အခွင့်အရေးလေးတွေကို လိုက်လုနေရတာလဲ"

"ဘယ်သူသိမှာလဲ သူတို့မှာ တခြားရည်ရွယ်ချက် မရှိဘဲနဲ့ ပျင်းလို့ ငါတို့တွေကို အခွင့်အရေး မရစေချင်တာလည်း ဖြစ်နိုင်တာပဲ။"

ဤကဲ့သို့သော မြင်ကွင်းများမှာ နေရာအနှံ့ ထပ်ခါတလဲလဲ ဖြစ်ပေါ်နေသည်။

ကုန်သည်အဖွဲ့ သုံးဖွဲ့သည် ရတနာများ၊ လျှို့ဝှက်နယ်မြေများနှင့် တခြားသော အခွင့်အရေးများအကြောင်း သတင်းများကို ပိုက်ဆံပုံပေး ဝယ်ယူနေကြသည်။ သတင်းရသည်နှင့် အစွမ်းထက်သော ပညာရှင်များကို ထိုနေရာသို့ ကြိုတင် လွှတ်ထားကြသည်။ အချိန်တန်၍ ရတနာများ ပေါ်လာလျှင် သူတို့က အကုန်လုံး သိမ်းယူသွားပြီး ဘာမှ ချန်မထားခဲ့ပေ။ ထို့ပြင် တခြားသူများ အနားမကပ်နိုင်ရန် ကင်းစောင့်များ ထားရှိကြသည်။

သူတို့နှင့်ရင်းနှီးသော ဂိုဏ်းကြီးများမှ တပည့်များကိုသာ အတူတူရတနာရှာရန် အတွင်းသို့ ခွင့်ပြုကြသည်။ ဤကဲ့သို့ အကြိမ်ကြိမ် ဖြစ်လာသောအခါ ကျင့်ကြံသူများကြားတွင် မကျေနပ်မှုများမှာ တစ်နေ့ထက်တစ်နေ့ ကြီးထွားလာတော့သည်။

သို့သော် ကုန်သည်အဖွဲ့ သုံးဖွဲ့အတွက်မူ ထိုသူတို့၏ဒေါသမှာ ကလေးကစားစရာကဲ့သို့ ဘာမှ အန္တရာယ် မရှိချေ။

"သခင်လေး ကုန်သည်အဖွဲ့သုံးဖွဲ့က နေရာတိုင်းကို ကျူးကျော်ပြီး လျှို့ဝှက်နယ်မြေတွေနဲ့ ရှေးဟောင်းနေရာတွေကို သိမ်းပိုက်နေကြတယ် ငါတို့ဆီကို ရောက်လာမယ့် သတင်းတွေ... ခန်းခြောက်နေပြီ"

လန်ယာဖောင်ဒေးရှင်းဌာနချုပ်။

နန်နန်လေးသည် သစ်ပင်အောက်တွင် ထိုင်ကာ စာဖတ်နေသည်။ ဝမ်မုကတော့ ကုလားထိုင်ပေါ်တွင် လဲလျောင်းကာ နေပူဆာလှုံရင်း၊ လက်ချောင်းလေးများကို ဘေးတွင် ခေါက်ကာ အေးအေးလူလူ ရှိနေသည်  "အင်း၊ ငါ သိတယ်။"

တင်းတင်းက မေးလိုက်သည်  "ငါတို့လည်း... စျေးနှုန်းတွေ မြှင့်လိုက်ရမလား ပြီးတော့သတင်းတွေရဲ့တိကျမှုကိုလည်း လျှော့ပြီး လက်ခံလိုက်ရမလား"

ဝမ်မုက သူမကို ဇဝေဇဝါ ကြည့်လိုက်သည် - "အကြောင်းရင်းမရှိဘဲ ပိုက်ဆံဖြုန်းရအောင် ငါတို့မှာ ပိုက်ဆံတွေ ပိုနေလို့လား တိကျမှုမရှိတဲ့ သတင်းကို ဝယ်ပြီးဘာလုပ်မှာလဲ အရူးအလုပ်ပဲ ဖြစ်မှာပေါ့။"

"...ဒါပေမဲ့ ဒါက သခင်လေးရဲ့ အစီအစဉ်တွေကို မထိခိုက်နိုင်ဘူးလား"

"နည်းနည်းတော့ ထိခိုက်တာပေါ့၊ ဒါပေမဲ့ အဓိကတော့ မဟုတ်ပါဘူး။"

ဝမ်မုသည် ပျင်းရိစွာဖြင့် အညောင်းဆန့်လိုက်ပြီး -"အကြီးအကဲလီတို့ဆီက ဘာသတင်းရလဲ"

တင်းတင်း ခေါင်းညိတ်ပြသည် - "အခုတင် အစီရင်ခံစာ ရထားပါတယ် စိစစ်ထားတဲ့သတင်း ၁၃ ခုထဲက ၃ ခုကတော့ ရှေးဟောင်းနေရာတွေ ရှိတာ သေချာသွားပါပြီ... အဲဒီထဲက ၂ ခုကတော့ မကြာခင်မှာ ပေါ်လာတော့မှာပါ"

"မကြာခင်ဆိုတာ ဘယ်လောက်လဲ"

"အမြန်ဆုံးဆို ၃ လ ကနေ ၅ လ အထိ အကြာဆုံးဆို ၁ နှစ်လောက်ပေါ့။"

"ကြာလွန်းတယ်။ အဲဒါတွေကို စောစော ပေါ်လာအောင် လုပ်လို့ရမလား"

"ကျွန်မ မေးကြည့်လိုက်ပါ့မယ်။" သူမသည် ဘေးသို့ ခေတ္တဖယ်ကာ ဆက်သွယ်ရေးအဆောင်ဖြင့် လီယွမ်ဟွာကို ဆက်သွယ်လိုက်သည်။

ဝမ်မုကြည့်နေရင်း... သူ လက်နက်သန့်စင်ရေးဆောင်မှာ မှားထားတာတွေကို သတိရသွားသည်။ သူ့တွက်ချက်မှုအရဆိုလျှင် ပထမအသုတ်ကို နောက် ၃ ရက်ဆို ပို့ပေးတော့မည် ဖြစ်သည်။

ဤအတောအတွင်း ဖောင်ဒေးရှင်း၏ ရန်ပုံငွေမှာ အနည်းငယ် လျော့နည်းလာသော်လည်း၊ ကံကောင်းထောက်မစွာဖြင့် လန်ယာကုန်သည်အဖွဲ့မှာနေ့စဉ် ဝိညာဉ်ကျောက်တုံးများစွာ အမြတ်ထွက်နေသဖြင့် အရှုံးခံကာ ခဏတော့ ဆက်သွားနိုင်သည်။ သို့သော် ဤအတိုင်းသာ ကြာသွားလျှင် အရင်းအမြစ်များ အကုန်ကုန်ဆုံးသွားလိမ့်မည်။

အမြဲတမ်းလိုလိုပင်... နာမည်ကောင်းရှိခြင်းက အမြတ်အစွန်းကို တိုးစေသည်မှာ မှန်သော်လည်း၊ နာမည်တစ်ခုတည်းအပေါ် အမှီပြုနေခြင်းက အကန့်အသတ် ရှိလှသည်။ အမြတ်ကို ပိုတိုးချင်လျှင် စျေးကွက်ကို ထိန်းချုပ်နိုင်မည့် ပိုမို ထိရောက်သော နည်းလမ်းများ လိုအပ်သည်။

ခဏအကြာတွင် တင်းတင်း ပြန်လာသည်  "စီနီယာလီကတော့ လွယ်ပါတယ်လို့ ပြောပါတယ်"

ဝမ်မု ခေါင်းညိတ်လိုက်သည် - "ဒါဆို အဲဒါတွေကို အချိန်မတိုင်ခင်ပေါ်လာအောင် လုပ်ခိုင်းလိုက်။ တစ်ချိန်တည်းမှာပဲ ဖောင်ဒေးရှင်းနဲ့ ကုန်သည်အဖွဲ့ကနေ အဲဒီသတင်းကို လူသိရှင်ကြား ထုတ်ပြန်လိုက်ဖြစ်နိုင်သမျှ အကျယ်ပြန့်ဆုံး ပျံ့အောင် လုပ်ပါ။"

"...ဟုတ်ကဲ့ပါ"

တင်းတင်း၏မျက်နှာမှာ ရှုပ်ထွေးနေသည်။ ဝမ်မု၏လုပ်ရပ်ကို သူမ လုံးဝနားမလည်နိုင်ပေ။ သူတို့သည် ဤသတင်းများကို ပိုက်ဆံပေး ဝယ်ယူခဲ့ရပြီး၊ အပင်ပန်းခံကာ ထိုနေရာများကို စောစော ပေါ်လာအောင် လုပ်ပေးခဲ့သည်။ အကယ်၍ ကုန်သည်အဖွဲ့သုံးဖွဲ့လို အကုန်လုံးကို သိမ်းပိုက်ခြင်း မပြုချင်လျှင်တောင် ဘာကြောင့် သတင်းကို လူတိုင်းသိအောင် ထုတ်ပြန်ပေးရသနည်း ဘာရည်ရွယ်ချက် ရှိလို့လဲ။

စျေးတန်းတစ်ခုအတွင်းရှိ ကျင့်ကြံသူတစ်စု စုဝေးကာ တိုးတိုးတိုးတိုး ပြောနေကြသည် 

"မင်း ကြားပြီးပြီလား တောက်ပသော ကျောက်စိမ်းကျွန်းရဲ့ အနောက်ဘက် မိုင် ၁၅၀ အကွာမှာ နောက် ၃ ရက်ဆိုရင် ရွှေအမြုတေအဆင့်ရှေးဟောင်းနေရာတစ်ခု ပေါ်လာတော့မယ်တဲ့"

"တကယ်လား သတင်းကရောဟုတ်ရဲ့လား"

"မသေချာဘူး၊ ဒါပေမဲ့သတင်းက လန်ယာကုန်သည်အဖွဲ့ကနေ လာတာဆိုတော့ အမှန်ပဲ ဖြစ်မှာပေါ့"

"ထူးတော့ထူးဆန်းတယ် သာမန်လူဆိုရင် ဒီလို လျှို့ဝှက်ချက်မျိုးကို အသက်နဲ့လဲပြီး ဖုံးထားကြမှာပဲ... ဘာလို့ သူတို့က လူသိရှင်ကြား ကြေညာရတာလဲ"

"ကျိုးညီနောင်က ထောင်ချောက်လို့ သံသယရှိနေတာလား"

"သတိထားတာတော့ အကောင်းဆုံးပေါ့။"

"ကျိုးညီနောင်ပြောတာလည်း ဟုတ်ပါတယ်တခြား အင်အားစုတစ်ခုခုကနေ ဒီသတင်း ထွက်လာတာဆိုရင် ဒါဟာ လှည့်ကွက် ဖြစ်နိုင်တယ် ဒါပေမဲ့ လန်ယာဆိုရင်တော့... ငါတို့ ယုံကြည်လို့ရမယ် ထင်တယ်"

"ဟုတ်တယ်၊ လန်ယာကုန်သည်အဖွဲ့ရဲ့ နာမည်က အလွန်ကောင်းတယ်၊ ပြီးတော့ ဖောင်ဒေးရှင်းကလည်း လူပေါင်းများစွာရဲ့ အသက်ကို ကယ်ခဲ့တာပဲ ရွှေအမြုတေ ရှေးဟောင်းနေရာလေး တစ်ခုအတွက်နဲ့ သူတို့ တည်ဆောက်ထားတဲ့ နာမည်ကောင်းကို အပျက်ခံမှာ မဟုတ်ဘူး။"

မြို့တော်တစ်ခုရှိ အရက်ဆိုင်တစ်ခုတွင် -

"နောက်ထပ် ရှေးဟောင်းနေရာတစ်ခု ပေါ်လာဦးမှာလား"

"ဒီရက်ပိုင်း ဘာတွေဖြစ်နေတာလဲ အရင်နှစ်တွေကဆို တစ်နှစ်နေလို့ တစ်ခုတောင် တွေ့ဖို့ခဲယဉ်းတာ အခုတော့ အဆက်မပြတ် ပေါ်နေတာပဲ"

"ငါ ကြားတာကတော့ ကုန်သည်အဖွဲ့ကြီး လေးဖွဲ့က တစ်ခုခုကို ရှာနေကြတာတဲ့ လျှို့ဝှက်နယ်မြေ သတင်းတွေဆိုရင် အကုန်လိုက်ဝယ်နေတာ။ အခြေခံတည်ဆောက်ခြင်းအဆင့်ကျင့်ကြံသူတွေရဲ့ ဂူဗိမာန်တွေကိုတောင် ချန်မထားဘူး..."

"တောက်... တောက်..."

"သတင်းရရင်ရော ဘာထူးမှာလဲ ငါတို့လို အောက်ခြေကျင့်ကြံသူတွေက အခွင့်အရေး ရပါ့မလား မောင်းထုတ်ခံရမှာပဲ ရှိတာ။"

"ဒီတစ်ခါတော့မတူဘူး သတင်းက လန်ယာကုန်သည်အဖွဲ့က လာတာ သူတို့က ဟိုကုန်သည်အဖွဲ့ သုံးဖွဲ့ထက် အများကြီး ပိုကောင်းတယ်။ ကျင့်ကြံသူတိုင်းကို ပါဝင်ခွင့်ပေးမယ်လို့ ကြားတယ်... ပြီးတော့ ပြန်ထွက်လာတဲ့သူတွေကို ဆေးလုံးတွေနဲ့ ရိက္ခာတွေတောင် ထောက်ပံ့ပေးဦးမှာတဲ့"

"ဟင်~ တကယ်ကြီးလား"

ခဏချင်းမှာပင် ရေတွက်မရနိုင်သော ကျင့်ကြံသူများမှာ နောက်တစ်ကြိမ် စိတ်လှုပ်ရှားစွာဖြင့် တက်ကြွလာကြတော့သည်။