အခန်း (၅၆) - ရည်မှန်းချက်နဲ့ ယုံကြည်ချက်ရှိတဲ့ လက်နက်ဖန်တီးရှင်များ

သူ၏ယခင်ခန္ဓာကိုယ်ပိုင်ရှင်က သန့်စင်ရာမြေအရှင်သခင်၏သားဟူသော အဆင့်အတန်းကို အသုံးချကာ မြောက်ပိုင်းအမှောင်ထု သန့်စင်ရာမြေပြင်ပတွင်သာ ဗိုလ်ကျစိုးမိုးခဲ့သည်မဟုတ်။

ဤ ကျူးရှန်းကျွန်းကို ဥပမာထားကြည့်လျှင်ပင် သိနိုင်သည်။

သူသည် ဤနေရာသို့ မကြာခဏ လာတတ်သည်။ ဆေးဖော်စပ်မှုနန်းဆောင်မှ ဖော်စပ်ထားသော အဖိုးတန်ဆေးဝါးများဖြစ်စေ၊ လက်နက်ဖန်တီးမှုနန်းဆောင်မှ နတ်ဘုရားလက်နက်များနှင့် ရတနာများဖြစ်စေ မပြီးပြတ်သေးသော လက်နက်အမြုတေများပင်ဖြစ်စေ သူမြင်လျှင် အကုန်လုယူသွားတတ်သည်။

သူ ဘယ်တော့မှ ပိုက်ဆံမပေးချေ။

ကျိုးကြောင်းဆင်ခြင်ကြည့်လျှင် ဝမ်မုအဟောင်းသည် ထိုအရာများကို သုံးစရာအကြောင်း လုံးဝမရှိပေ။ သုံးစရာရှိလျှင်ပင် သူ့မှာ အလျှံပယ်ရှိပြီးသားဖြစ်သည်။

ပွင့်ပွင့်လင်းလင်း ပြောရလျှင် သူသည် လုယူချင်၍သာ လုယူခြင်းဖြစ်ပြီး သူ၏အတွင်းစိတ် အားငယ်မှုကို ဖြည့်ဆည်းခြင်းသာ ဖြစ်သည်။ ထိုလူများက သူ့ကိုဒေါသထွက်သော်လည်း ဘာမှမတတ်နိုင်သည်ကို မြင်ရခြင်းက သူ့ကို ကျေနပ်မှုပေးသည်။

ဝမ်မု၏အမြင်အရ ထိုအရာမှာ စိတ်မမှန်သူတစ်ဦးဖြစ်ရန် လမ်းစပင်ဖြစ်နေပြီဖြစ်သည်။

သူ၏စိတ်ဓာတ်မှာ စတင်ပျက်စီးနေပြီဖြစ်သည်။

သူ ဤခန္ဓာကိုယ်ကို လွှဲပြောင်းရယူနိုင်ခဲ့ခြင်းမှာ ကံကောင်းသည်ဟု ဆိုရမည်။ မဟုတ်ပါက ဝမ်မုအဟောင်း၏အနာဂတ်မှာ ကောင်းမည်မဟုတ်ပေ... သူသည် ထိုသို့သော အတွေးများကို ခေါင်းထဲမှ ခါထုတ်လိုက်သည်။

ဝမ်မုသည် လက်နက်ဖန်တီးမှုနန်းဆောင်ထံသို့ တည့်တည့်လျှောက်သွားလိုက်သည်။

အဝေးမှပင် တူထုသံ "ဒေါင်-ဒေါင်" ကို ကြားနေရသည်။ ထိုအသံများသည် စည်းချက်မကျသော်လည်း အားလုံးရောနှောသွားသည့်အခါ ဖရိုဖရဲမဖြစ်ဘဲ ထူးခြားသော စည်းချက်တစ်ခု ရှိနေသည်။

သူ့ရှေ့တွင် ပြန့်ကျဲနေသောအိမ်ခြေ တစ်ရာကျော်ရှိသည်။ အိမ်တိုင်း၏ရှေ့တွင် တပည့်များနှင့် အကြီးအကဲများသည် ရတနာများကို သန့်စင်ခြင်းနှင့် အဖိုးတန်သံရိုင်းများကို ထုရိုက်ခြင်းများဖြင့် အလုပ်ရှုပ်နေကြပြီး ပျော်ရွှင်နေပုံရသည်။

ဝမ်မုသည် အလယ်ဗဟိုရှိအမြင့်ဆုံးအဆောက်အဦးထံသို့ တည့်တည့်လျှောက်သွားသည်။ သူ အနားမရောက်ခင်မှာပင် အခန်း၏ တံခါးနှင့် ပြတင်းပေါက်များမှ ပူပြင်းသော အပူလှိုင်းများ ထွက်ပေါ်နေသည်ကို ခံစားရသည်။ အပူရှိန်ကြောင့် ဟင်းလင်းပြင်ပင် ပုံပျက်နေသလို ခံစားရသည်။

အပြင်တွင်ရပ်နေရင်း ထုရိုက်နေသောအသံများကို အဆက်မပြတ် ကြားနေရသည်။ ထိုစည်းချက်မှာ အလွန်မြန်လှသည် - ဒေါင်၊ ဒေါင်၊ ဒေါင် - ၎င်းက ဝမ်မုကို အပေါ်ပိုင်းဗလာဖြင့် အမျိုးသားတစ်ဦးက ပုခုံးများရိပ်ရိပ်တုန်သွားအောင် မြန်ဆန်စွာ ထုနှက်နေသည့် ပုံရိပ်ကို ပေါ်လာစေသည်။ ပျမ်းမျှအားဖြင့် တစ်စက္ကန့်လျှင် ဆယ်ကြိမ်ထက်မနည်း ထုနှက်နေခြင်းဖြစ်သည်။

သို့သော် ပြတင်းပေါက်အက်ကွဲကြောင်းမှတစ်ဆင့် အတွင်းမှမြင်ကွင်းကို မြင်လိုက်ရသောအခါ ဝမ်မု၏ မျက်လုံးများ လင်းလက်သွားသည်။

၎င်းမှာ အရပ်ရှည်သော အမျိုးသမီးတစ်ဦး ဖြစ်နေသည်။

အပူရှိန် အလွန်ပြင်းသဖြင့် သူမသည် အဝတ်အစား အလွန်ပါးလျစွာ ဝတ်ဆင်ထားသည်။ သူမ၏ ကျောက်စိမ်းကဲ့သို့ ဖြူဝင်းသွယ်လျသော ခြေတံရှည်များမှာ လေထုထဲတွင် လုံးဝပေါ်လွင်နေပြီး ပေါင်ရင်းနားအထိသာ ဖုံးကွယ်ထားသည်။ သူမ၏ အပေါ်ပိုင်းမှာလည်း ထိုနည်းအတိုင်းပင်။

သူမ၏ပြည့်ဖြိုးသော ရင်သားများကို ပါးလွှာသော အတွင်းခံအင်္ကျီဖြင့် စည်းနှောင်ထားပြီး အချိန်မရွေး ပေါက်ထွက်တော့မည့်ပုံ ပေါ်နေသည်။ ၎င်း၏အရွယ်အစားမှာ တင်းတင်း ထက် အနည်းငယ်သာသေးသည်။ သူမ၏ လက်မောင်း၊ ဝမ်းဗိုက်နှင့် ညှပ်ရိုးများမှာ လုံးဝ ပေါ်လွင်နေသည်။ ချွေးစက်များကြောင့် အဝတ်အစားများမှာ ခန္ဓာကိုယ်တွင် ကပ်နေပြီး သူမ၏ပြည့်စုံသော ကိုယ်လုံးကိုယ်ပေါက်မှာ ထင်ထင်ရှားရှား ပေါ်ထွက်နေသည်။

သူမသည် တည်ကြည်သော မျက်နှာထားရှိပြီး လက်ဟန်များမှာ အလွန်မြန်ဆန်စွာ ပြောင်းလဲနေကာ စာလုံးများမှာ မီးဖိုထဲသို့ ပျံဝင်သွားကြသည်။ သူမ ကိုင်ထားသော ဧရာမ ကြေးနီတူကြီးမှာ တောက်ပသော အလင်းတန်းများ ထွက်ပေါ်နေသည်။ သူမသည် ပုံကြမ်းလက်နက်တစ်ခုကို အံ့ဩဖွယ်ကောင်းသော အရှိန်ဖြင့် ရူးသွပ်စွာ ထုနှက်နေပြီး မီးပွားများ တဖွဲဖွဲ ထွက်ပေါ်နေသည်။

ထို့နောက်တွင် သူမက လက်ညှိုးဖြင့် ညွှန်လိုက်ရာ ဘေးမှ အခြားတူကြီး နှစ်လုံးမှာ ပျံတက်လာပြီး ဝိုင်းဝန်းထုနှက်ကြတော့သည်။ ရုတ်တရက် "ဖတ်-ဖတ်-ဖတ်" နှင့် "ဒေါင်-ဒေါင်-ဒေါင်" အသံများမှာ တစ်ခန်းလုံး ပြည့်နှက်သွားပြီး သာယာသော စည်းချက်တစ်ခု ဖြစ်လာသည်။

အတော်ကြာမှ သူမသည် ဖြည်းညှင်းစွာ ရပ်လိုက်သည်။ လက်ဟန်ကို ပြောင်းလဲကာ လက်နက်ပုံကြမ်းကို မီးတောက်ထဲမှ ထုတ်ယူပြီးနောက် တူတစ်လုံးဖြင့် ကိုယ်တိုင် ပြန်လည် ထုနှက်တော့သည်။ သူမ၏ လှုပ်ရှားမှုများမှာ ပြည့်စုံလွန်းလှသည်။ သူမ၏ ဆွဲဆောင်မှုရှိသော ကိုယ်လုံးကိုယ်ပေါက်မှ လက်မောင်းကြွက်သားများသည် တူကို လွှဲလိုက်သည့်အခါ အင်အားအပြည့်ဖြင့် ဖောင်းတက်လာသည်။

ထုနှက်ချက်တိုင်းမှာ ကွက်တိကျလှသည်။ ထိုအသံမှာ နားငြီးစရာ မကောင်းဘဲ ဆွဲဆောင်မှုရှိသော ရသတစ်ခုကို ပေးစွမ်းသည်။ အထူးသဖြင့် သူမ လှုပ်ရှားလိုက်တိုင်း ပြည့်ဖြိုးသော ရင်သားအစုံမှာလည်း လိုက်ပါတုန်ခါနေသဖြင့် ထိုမြင်ကွင်းမှာ အလွန် လှပလှသည်။ ဝမ်မုသည် သင့်တော်သော အချိန်တွင် ချောင်းဟန့်လိုက်သည်။

"ဘယ်သူလဲ"

အမျိုးသမီးသည် သူမ၏ လှုပ်ရှားမှုများကို ရုတ်တရက် ရပ်တန့်ကာ တံခါးဘက်သို့ လှည့်ကြည့်လိုက်သည်။

ဝမ်မုက ပြုံးလျက် ဝင်လာသည် - "ယောင်ယောင်စီနီယာ၊ မတွေ့တာ ကြာပြီနော်"

ရှရယောင်ယောင်။

မြောက်ပိုင်း အမှောင်ထုသန့်စင်ရာမြေ၏ လက်နက်ဖန်တီးမှုနန်းဆောင် သခင်ကြီး၏ တစ်ဦးတည်းသော အမွေခံတပည့် ။

သူမသည် သန့်စင်ရာမြေ၏ပန်းတစ်ရာစာရင်း  တွင် ထိပ်ဆုံး ၁၀ ဦးစာရင်းဝင်ဖြစ်သည်။ ပါရမီရော အလှအပပါ ပြည့်စုံသဖြင့် လူငယ်ထူးချွန်သူများစွာ၏ အိမ်မက်နတ်သမီးပင် ဖြစ်သည်။

ထိုစဉ်မှာပင် ဝမ်မု၏ရှေ့တွင် အချက်အလက်ဇယားတစ်ခု ပေါ်လာသည်။

【အမည် - ရှရယောင်ယောင်】

【မျိုးနွယ် - လူသားမျိုးနွယ်】

【အဆင့် - နတ်ဘုရားသန္ဓေအဆင့်အလယ်ပိုင်း】

【ပါရမီ - နတ်ဘုရားအဆင့်】

【ထူးခြားချက် - ထောင်ချီ သန့်စင်ထားသော လျှို့ဝှက်ခန္ဓာ — လက်နက်ဖန်တီးခြင်းအတွက် မွေးရာပါပါရမီရှင်၊ ထောင်ပေါင်းများစွာသော သန့်စင်ခြင်းများမှတစ်ဆင့် မဟာတရားတော်ကို နားလည်နိုင်သူ။ ရှားပါးသော ပစ္စည်းများကို သန့်စင်ထုနှက်လေလေ ကျင့်ကြံမှု ပိုမိုမြန်ဆန်လေလေ ဖြစ်သည်】

【ရင်းနှီးမြှုပ်နှံမှု အကဲဖြတ်ချက် - ထူးကဲသော အလားအလာရှိသည်၊ ရင်းနှီးမြှုပ်နှံရန် အကြံပြုပါသည်】

လက်နက်ဖန်တီးမှုနန်းဆောင်သခင်ကြီး၏ တစ်ဦးတည်းသော အမွေခံတပည့်ဆိုသည့်အတိုင်းပင်။ နောက်တက်မည့် နန်းဆောင်သခင်ဖြစ်ရန် ၁၀၀ ရာခိုင်နှုန်း သေချာသလောက် ရှိသူဖြစ်သည်။ ထိုမျှငယ်ရွယ်သော အသက်ဖြင့် နတ်ဘုရားသန္ဓေအဆင့်သို့ ရောက်နေခြင်းမှာ အံ့မခန်းပင်။ ဝမ်မု၏ မျက်လုံးများ အနည်းငယ် ကျဉ်းမြောင်းသွားသည်။

"နင်လား" ရှရယောင်ယောင်၏မျက်မှောင်များ အနည်းငယ် ကြုတ်သွားသည်။ သူမသည် ဝမ်မုကို သိပြီးသားဖြစ်ကာ သူ့အပေါ် ကောင်းသော အထင်အမြင် မရှိချေ။ "နင် ဒီကို ဘာလာလုပ်တာလဲ"

ဝမ်မုက ချောင်းနှစ်ချက်ဟန့်ကာ ပြောလိုက်သည် -"ရှရစီနီယာ၊ ငါတို့ စကားမပြောခင် အရင်ဆုံး အဝတ်အစား လဲလိုက်ပါဦးလား"

ထိုစကားကို ကြားမှ ရှရယောင်ယောင်သည် သူမ၏လက်ရှိအခြေအနေကို သတိရသွားသည်။ ရှက်စိတ်နှင့် ဒေါသတို့ကြောင့် သူမ၏ မျက်နှာမှာ နီမြန်းသွားပြီး "လူရမ်းကား" ဟု ဆဲဆိုကာ အတွင်းခန်းထဲသို့ ပြေးဝင်သွားတော့သည်။

ဝမ်မုကတော့ မတရားသဖြင့် ခံစားရသလို ပါးစပ်အဟောင်းသား ဖြစ်ကျန်ခဲ့သည်။ အဝတ်အစား သေချာမဝတ်တာက သူမဖြစ်ပြီး သူ့ကို ဘာလို့ အပြစ်တင်တာလဲ သို့သော်လည်း ခုနက ရှုခင်းအချို့ကို မြင်လိုက်ရသည်မှာ အမှန်ဖြစ်သဖြင့် သူ ငြင်းခုံမနေတော့ပေ။

ခဏအကြာတွင် ရှရယောင်ယောင် ပြန်ထွက်လာသည်။ သူမသည် ပွပွယောင်ယောင် အစိမ်းရောင်ဝတ်စုံကို ဝတ်ထားသော်လည်း သူမ၏ လှပသော ကိုယ်လုံးကိုယ်ပေါက်ကိုတော့ ဖုံးကွယ်ထားနိုင်ခြင်း မရှိချေ။

သူမက ဝမ်မုကို အေးစက်စွာ ကြည့်ကာ - "ပြောစရာရှိတာ မြန်မြန်ပြော ပြီးရင် ချက်ချင်း ထွက်သွား"

ဝမ်မုက စိတ်မဆိုးဘဲ တည်ငြိမ်စွာ ပြုံးလိုက်သည်  "ဒီတစ်ခါ ငါလာတာကမင်းတို့ရဲ့ လက်နက်ဖန်တီးမှုနန်းဆောင်နဲ့ စီးပွားရေးလုပ်ချင်လို့ပါ"

"စီးပွားရေး"

ရှရယောင်ယောင်က မျက်မှောင်ကြုတ်ကာ ဝမ်မုကို အထက်အောက် ကြည့်လိုက်သည် - "ဝမ်သခင်လေးက ဒီတစ်ခါတော့ အသိတရားရလာပြီး လုမယ့်အစား ပိုက်ဆံပေးဝယ်ဖို့ ကြံနေတာလား"

ဝမ်မု၏ မျက်နှာထားမှာ မပြောင်းလဲဘဲ ပုံစံကြမ်း တစ်ခုကို ထုတ်ပေးလိုက်သည် - "အရင်ဆုံး ဒါကို ကြည့်လိုက်ပါဦး စီနီယာ။"

ရှရယောင်ယောင် အနည်းငယ် ထူးဆန်းသလို ခံစားရသည်။ သူမရှေ့က ဝမ်မုမှာ လူတစ်ယောက်လုံး ပြောင်းလဲသွားသလိုပင်။ အရင်ကဆိုလျှင် ဤသို့သော လှောင်ပြောင်မှုကို ခံရပါက ဝမ်မုမှာ ဒေါသထွက်ပြီး ပေါက်ကွဲနေပြီ ဖြစ်သည်။

ယခုမူ ဘာမှမဖြစ်သလို ပြုမူနေသည်။ သူမက သံသယဖြင့် ပုံစံကြမ်းကို ယူကြည့်လိုက်သည် - "ဒါက ဆက်သွယ်ရေး အဆောင်လက်ဖွဲ့မဟုတ်လား နည်းနည်းတော့ ထူးထူးခြားခြား ပြင်ထားတာပေါ့။"

ဝမ်မုက ပြုံးကာ - "စီနီယာက တကယ်ကို မျက်စိလျင်တာပဲ ငါကလက်နက်ဖန်တီးမှုနန်းဆောင်ကို ဒီဆက်သွယ်ရေး ကျောက်စိမ်းအဆောင်တွေပြုပြင်မွမ်းမံပေးစေချင်တာ"

ထိုစကားကို ကြားသောအခါ ရှရယောင်ယောင်က နားလည်သွားပြီး ဒေါသထွက်သွားသည် - "ငါက နင် ဒီနေ့ ပြောင်းလဲသွားပြီ ထင်တာ၊ တကယ်တော့ ပိုတောင် ဆိုးလာတာပဲ ငါ့ရဲ့ လက်နက်ဖန်တီးမှုနန်းဆောင်ကို ဘာမှတ်နေတာလဲ။

ဒီလို အဆင့်နိမ့်ပြီးဘာနည်းပညာမှမပါတဲ့ အရာမျိုးကို အပြင်ကဘယ်ပန်းပဲဖိုမဆို လုပ်နိုင်တယ်။ နင် ငါတို့ လက်နက်ဖန်တီးမှုနန်းဆောင်ကို စော်ကားနေတာလား"

မြောက်ပိုင်း အမှောင်ထုသန့်စင်ရာမြေ၏ လက်နက်ဖန်တီးမှုနန်းဆောင်သည် မြောက်ပိုင်းဒေသတွင် နံပါတ်တစ် မဟုတ်သော်လည်း ထိပ်ဆုံး ၅ ခုစာရင်းဝင်သည်။ သူတို့တွင် နည်းပညာ မရှိခြင်း မဟုတ်ဘဲ မောက်မာမှု ရှိနေခြင်း ဖြစ်သည်။ သူတို့သည် အပြင်က ပန်းပဲဖိုများလို အဆင့်နိမ့် လက်နက်များကို အမြောက်အမြား လုပ်ပြီး ပိုက်ဆံရှာရန် စက်ဆုပ်ကြသည်။ သူတို့သည် မြင့်မားသော အောင်မြင်မှုများနှင့် လက်နက်ဖန်တီးမှုမှတစ်ဆင့် တာအိုကို ရယူရန် ကြိုးစားနေသူများ ဖြစ်သည်။ သူတို့သည် ရည်မှန်းချက်နှင့် ယုံကြည်ချက်ရှိသော လက်နက်ဖန်တီးရှင်များ ဖြစ်ကြသည်။

ယခု ဝမ်မုက သူတို့ကို ထိုကဲ့သို့ အဆင့်နိမ့် ပစ္စည်းများကို လုပ်ခိုင်းခြင်းမှာ သူတို့အတွက် အလွန် အရှက်ရစရာ ဖြစ်သည်။

သို့သော်လည်း ရှရယောင်ယောင်၏ ဒေါသကို ရင်ဆိုင်ရသော်လည်း ဝမ်မု၏ မျက်နှာထားမှာ မပြောင်းလဲဘဲ ပြုံးနေဆဲပင်  "မလောပါနဲ့ စီနီယာ။ ငါက အများကြီး လိုချင်တာ၊ ပြီးတော့ ပိုက်ဆံလည်း အများကြီး ပေးမှာပါ"

ရှရယောင်ယောင်က ပြတ်ပြတ်သားသား ပြောလိုက်သည် - "စိတ်မကောင်းပါဘူး ဝမ်သခင်လေး။ နင် ချမ်းသာတာလာကြွားချင်ရင် နေရာမှားနေပြီ။ ငါ့ရဲ့ လက်နက်ဖန်တီးမှုနန်းဆောင်ဟာ ဝိညာဉ်ကျောက်တုံး အနည်းငယ်အတွက်နဲ့ ဂုဏ်သိက္ခာကို အပစ်မခံနိုင်ဘူး။ ပြန်တော့"

ထိုစကားကို ကြားသောအခါ ဝမ်မုက သက်ပြင်းချဟန်ဆောင်ကာ လှည့်ထွက်သွားသည်  "ဒါဆိုလည်း မတတ်နိုင်ဘူးပေါ့ ဒါဆို ပစ္စည်းအခုရေ တစ်သန်း အော်ဒါကို တခြားလူကိုပဲ ပေးရတော့မှာပေါ့"

ရှရယောင်ယောင်၏ မျက်လုံးများ ရုတ်တရက် ပြူးသွားသည်။

"သခင်လေး... ခဏလောက် နေပါဦး"