အခန်း (၅၁)  ငါက တစ်ကွက်ပဲသုံးမှာ

ထိုစကားကို ကြားသောအခါ ကောက်အန်းရှီခဏမျှ တိတ်ဆိတ်သွားသည်  "အကယ်၍ လန်ယာသာ မရှိခဲ့ရင် အခြေအနေက ဒီလောက်အထိ ဆိုးမှာ မဟုတ်ဘူး။ ဒါပေမဲ့ သူတို့က အကုန်အလကားပေးနေတာလေ၊ ပြီးတော့ ဝန်ဆောင်မှုကလည်း ငါတို့ထက် အဆပေါင်းများစွာ သာလွန်နေတယ်"

"ငါကိုယ်တိုင်တောင် ဘေးဒုက္ခနဲ့ကြုံရရင် ငါတို့အဖွဲ့ထက် လန်ယာဖောင်ဒေးရှင်းကိုပဲ ရွေးမိမှာပဲ" ပွင့်ပွင့်လင်းလင်း ပြောရလျှင် နှိုင်းယှဉ်ချက်မရှိပါက နာကျင်စရာ မရှိပေ။

ရွှီယန်ရွှမ်းက မျက်မှောင်ကြုတ်လိုက်သည် -"လန်ယာက ဘာတွေတွေးနေတာလဲ သူတို့က ပိုက်ဆံတောင် မရှာတော့ဘူးလား နာမည်ကောင်းရဖို့အတွက်နဲ့ တကယ်ပဲ အရှုံးခံနေတာလား"

ကောက်အန်းရှီက ခါးသက်သက် အပြုံးဖြင့် ခေါင်းခါလိုက်သည် - "အရှုံး ဟုတ်လား အခုအချိန်မှာ လန်ယာကုန်သည်အဖွဲ့ရဲ့ ဂုဏ်သတင်းက အထွတ်အထိပ် ရောက်နေပြီ။ သူတို့ရဲ့ နာမည်ကောင်းက ငါတို့ ကုန်သည်အဖွဲ့ကြီး ၃ ခု ပေါင်းတာထက်တောင် အများကြီး ပိုသာနေပြီ"

"ကျွန်းကြီးတွေမှာရှိတဲ့ ငါတို့ရဲ့ဆိုင်ခွဲတွေက အမြတ်ငွေတွေဟာ နေ့တိုင်း လျော့နည်းလာနေတယ်။"

"ကျင့်ကြံသူတွေရဲ့ ၇၀ ရာခိုင်နှုန်းကျော်ဟာ ကျင့်ကြံခြင်း အရင်းအမြစ်တွေကို ဝယ်ယူတဲ့အခါ လန်ယာကုန်သည်အဖွဲ့ကိုပဲ ပထမဆုံး ရွေးချယ်နေကြပြီ"

"အဲဒီအတွက် သူတို့ပေးဆပ်လိုက်ရတာက ကုန်သည်အဖွဲ့ရဲ့စာရင်းဝင် ဝင်ငွေထဲက တစ်ရာခိုင်နှုန်းပဲ ရှိတာလေ"

ထိုစကားကို ကြားလိုက်ရသောအခါ ထန်ချန်းနှင့် ရွှီယန်ရွှမ်း တို့ပါ တိတ်ဆိတ်သွားကြသည်။

မြောက်ပိုင်းအမှောင်ထုသန့်စင်ရာမြေ နှင့် လန်ယာကုန်သည်အဖွဲ့တို့၏နီးကပ်သော ဆက်ဆံရေးကြောင့် ဤမိုင်သန်းပေါင်းများစွာ ကျယ်ဝန်းသော ပင်လယ်ပြင်သည် လန်ယာကုန်သည်အဖွဲ့၏ အိမ်ကွင်းဟု ဆိုနိုင်သည်။ မူလက သူတို့သည် ပင်လယ်ပြင်တစ်ခုလုံး၏စီးပွားရေး ၉၀ ရာခိုင်နှုန်းခန့်ကို ထိန်းချုပ်ထားခဲ့ခြင်း ဖြစ်သည်။

အခြားသောအင်အားစုများမှာ သူတို့ချန်ထားခဲ့သော အကြွင်းအကျန်များကိုသာ ခွဲဝေယူခဲ့ကြရသော်လည်း ထိုအကြွင်းအကျန်မှာပင် သူတို့ ဝဝလင်လင် စားနိုင်ရန် လုံလောက်လှသည်။

သို့သော် လွန်ခဲ့သော နှစ်အနည်းငယ်မှစ၍ ကုန်သည်အဖွဲ့ကြီး ၃ ခု ပေါင်းစည်းကာ မြောက်ပင်လယ်သို့ ဝင်ရောက်လာပြီး အဆက်မပြတ် ကြီးထွားလာခဲ့သည်။ သူတို့သည် နည်းမျိုးစုံဖြင့် စီးပွားရေးအရ ယှဉ်ပြိုင်ခဲ့ကြသည်။ လန်ယာကုန်သည်အဖွဲ့ထံမှ စီးပွားရေး လုပ်ငန်းတော်တော်များများကို အတင်းအဓမ္မ လုယူခဲ့ကြသည်။

အခြေအနေမှာ လန်ယာကုန်သည်အဖွဲ့တစ်ဦးတည်း လွှမ်းမိုးထားရာမှ ယခုအခါနှစ်ဖက် ရင်ဆိုင်နေရသော အနေအထားသို့ ရောက်ရှိလာခဲ့သည်။ ၎င်းမှာ ကုန်သည်အဖွဲ့ကြီး ၃ ခုအတွက် အလွန်ပင် ဂုဏ်ယူစရာ ကောင်းခဲ့သည်။

အဘယ်ကြောင့်ဆိုသော် လန်ယာ၏အိမ်ကွင်းတွင် ပြိုင်ဘက်၏အသားကို အတင်းဖဲ့ယူနိုင်ခြင်းမှာ သာမန်လူ လုပ်နိုင်သည့် အရာမဟုတ်သောကြောင့် ဖြစ်သည်။

သို့သော်လည်း... ယခုရက်ပိုင်းအတွင်း။

လန်ယာသခင်လေးက နတ်ဘုရားတက်လှမ်းပွဲ နှင့် ပရဟိတ ဖောင်ဒေးရှင်းများကို ဆက်တိုက် လုပ်ဆောင်လာခဲ့သည်။ ၎င်းကြောင့် လန်ယာကုန်သည်အဖွဲ့၏ဂုဏ်သတင်းမှာ ကောင်းကင်သို့ ထိုးတက်သွားခဲ့သည်။

ချင်းယွင်ကျွန်းစု ၊ စတားဖောကျွန်းစုနှင့် အတွင်းပိုင်းရှိ ကျွန်းကြီးများ၏ ဈေးကွက်အားလုံးနီးပါးသည် လန်ယာကုန်သည်အဖွဲ့၏လက်ထဲသို့ ပြန်လည် ရောက်ရှိသွားခဲ့ပြီ ဖြစ်သည်။ ဤအခြေအနေမှာ ဆက်လက်ပြန့်နှံ့နေဆဲ ဖြစ်သည်။

အကယ်၍ ဤအတိုင်းသာ ဆက်သွားလျှင် သူတို့ မြောက်ပင်လယ်ဒေသတွင် ခက်ခက်ခဲခဲ တည်ဆောက်ခဲ့ရသမျှ နယ်မြေများအားလုံး အမြစ်ပြတ်သွားတော့မည်မှာ မြင်သာလှသည်။

ထိုသို့ ဖြစ်လာစေရန် လန်ယာကုန်သည်အဖွဲ့ ပေးဆပ်လိုက်ရသည်မှာ... အမြတ်ငွေ၏ တစ်ရာခိုင်နှုန်းသာ ရှိသည်။

ဤသည်ကို တွေးမိသောအခါ ထန်ချန်း၊ ကောက်အန်းရှီ နှင့် ရွှီယန်ရွှမ်း တို့အားလုံး ချွေးစေးများ ထွက်လာကြသည်။

"တကယ့်ကို ပါးနပ်တဲ့ဗျူဟာပဲ"

"ငါတို့ လန်ယာသခင်လေးကို အထင်သေးခဲ့မိတယ်" ကောက်အန်းရှီ၏ မျက်နှာမှာ တည်ကြည်သွားသည်။

"ဒီလူက လူ့သဘာဝကို အသုံးချတဲ့နေရာမှာ အလွန်တော်တယ်။ သူက ပိုက်ဆံတွေကို ရေလို သုံးဖြုန်းနေသလို ထင်ရပေမဲ့ တကယ်တော့ သူက အရင်းအနှီးအနည်းငယ်နဲ့ အကျိုးအမြတ် အမြောက်အမြားကို ရအောင် ယူနေတာပဲ"

ရွှီယန်ရွှမ်း၏ အသက်ရှူသံများ မြန်လာပြီး ရင်ဘတ်မှာ နိမ့်ချည်မြင့်ချည် ဖြစ်နေသည် - "ဒါဟာ တကယ့်ကို ကောလာဟလထဲက လူရှုပ်လူပွေရဲ့လက်ချက်လား"

သူတို့ သုံးဦးစလုံးမှာ စီးပွားရေးလောကတွင် ဝါရင့်နေသူများ ဖြစ်ကြသည်။ သို့သော် ယခုတစ်ကြိမ် ပေါင်းစည်းပြီးနောက် လန်ယာသခင်လေး၏လက်ထဲတွင် ဤမျှအရှုံးကြီး ရှုံးလိမ့်မည်ဟု မမျှော်လင့်ထားခဲ့ကြပေ။ ဒါမျိုးက လူရှုပ်လူပွေတစ်ယောက် လုပ်နိုင်တဲ့ အရာလား ဘယ်မိသားစုက လူရှုပ်က ဒီလောက်အထိ စွမ်းဆောင်နိုင်လို့လဲ။

"ငါ့အမြင်အရတော့ သူက အဲဒီလောက်မတော်ပါဘူး"

ထန်ချန်းက အေးစက်သော မျက်နှာဖြင့် ဖြည်းညှင်းစွာ ပြောလိုက်သည် - "ငါတို့ ဒီတစ်ခါ ရှုံးတာက ဝမ်မုကို အထင်သေးခဲ့မိလို့ဆိုတာ ငါဝန်ခံပါတယ်။ ဒါပေမဲ့ အဓိက အကြောင်းရင်းကတော့ သူ့ရဲ့အသုံးမကျတဲ့ လူရှုပ်ပုံစံက လူတွေစိတ်ထဲစွဲနေတာကြောင့်ပဲ... အဲဒါကြောင့် ငါတို့က သူ့ကို အစကတည်းက သတိမထားခဲ့မိဘဲ အခုလို ရှုံးနိမ့်ခဲ့ရတာ"

"ပွင့်ပွင့်လင်းလင်း ပြောရရင် ငါတို့နည်းနည်း ပေါ့ဆသွားတာပဲ"

"အကယ်၍ ငါတို့က သူ့ကိုအစကတည်းက တော်တဲ့ ပြိုင်ဘက်တစ်ယောက်အနေနဲ့ သတ်မှတ်ခဲ့ရင် ဒီလောက် အလွယ်တကူ ရှုံးမှာ မဟုတ်ဘူး"

ထိုစကားကို ကြားသောအခါ ရွှီယန်ရွှမ်း နှင့် ကောက်အန်းရှီ တို့သည် တစ်ဦးကိုတစ်ဦး ကြည့်ကာ ခေါင်းညိတ်လိုက်ကြသည်။ အမှန်တော့ ပြန်စဉ်းစားကြည့်လျှင် ဝမ်မု၏ လုပ်ရပ်များမှာ ခန့်မှန်းရ ခက်ခဲလွန်းသည်တော့ မဟုတ်ပေ။

အကယ်၍ သူတို့နှင့် ယှဉ်ပြိုင်နေသူမှာ စီးပွားရေးလောကတွင် နာမည်ကြီးနေသည့် မြေခွေးအိုကြီးတစ်ယောက်သာဖြစ်ခဲ့လျှင် သူတို့ ဘယ်တော့မှ ပေါ့ဆမည် မဟုတ်ဘဲ အသေးစိတ်ကိစ္စများကိုပါ ပိုမိုကောင်းမွန်အောင် လုပ်ဆောင်နိုင်ခဲ့မည် ဖြစ်သည်။

"ဝက်လိုဟန်ဆောင်ပြီး ကျားကို စားတာက တကယ်ပဲ အသုံးဝင်တာပဲ ငါ ဝန်ခံပါတယ်၊ ငါ သူ့ရဲ့ လှည့်ကွက်ထဲ မိသွားခဲ့တယ်..." ထန်ချန်းက ဖြည်းညှင်းစွာ ထရပ်လိုက်သည်။

သူ၏ မျက်လုံးများမှာ အေးစက်နေပြီး လက်ထဲမှ လက်ဖက်ရည်ခွက်ကို ချေမွပစ်လိုက်သည် - "ဒါပေမဲ့ ဒီလိုလှည့်ကွက်မျိုးက တစ်ခါပဲ သုံးလို့ရမယ် ဝမ်မု... မင်း ဘယ်လောက်ပဲပုန်းနေပါစေ၊ မင်းဟာ ငါ့ရဲ့ပြိုင်ဘက် မဟုတ်ဘူးဆိုတာကို တစ်နေ့မှာ ငါ သိအောင် လုပ်ပြမယ်"

"... ဟတ်ချိုး~"

ပင်လယ်ကမ်းစပ်တွင် နေဝင်ရိုးရီ အလှကို ကြည့်ရင်း လမ်းလျှောက်နေသော ဝမ်မု တစ်ယောက် ရုတ်တရက် နှာချေလိုက်မိသည်။ ဘယ်သူက ငါ့အတင်း ပြောနေပြန်ပြီလဲ။

"သခင်လေး၊ ပင်လယ်လေက ကြမ်းတယ်၊ အင်္ကျီ ထပ်ဝတ်လိုက်ပါဦး" တင်းတင်းသည် သူမ၏ ခန္ဓာကိုယ် အချိုးအစားကို ပေါ်လွင်စေသော ရဲရဲတောက် အနီရောင် ဝတ်စုံကို ဝတ်ဆင်ထားဆဲ ဖြစ်ပြီး၊ တန်ဖိုးကြီးသားမွေး ဝတ်ရုံကို ဝမ်မု၏ ပုခုံးပေါ်သို့ သေချာ ခြုံပေးလိုက်သည်။

သူတို့နှစ်ဦးမှာ အလွန်နီးကပ်နေသဖြင့် မိန်းကလေးထံမှ သင်းပျံ့သောရနံ့မှာ ဝမ်မု၏ နှာခေါင်းထဲသို့ တိုးဝင်လာသည်။ သူက မျက်လုံးကို အနည်းငယ် မှေးလိုက်ပြီး ရုတ်တရက် ပြောလိုက်သည် - "တင်းတင်း"

တင်းတင်းက ကြောင်သွားပြီး - "ရှင်"

ဝမ်မုက ပြောသည် - "သခင်လေးကို လာတိုက်မိတဲ့အပြစ်က ဘာလဲဆိုတာ မင်းသိလား"

တင်းတင်းက အံ့ဩသွားသည် - "ကျွန်မ... ကျွန်မ မတိုက်မိပါဘူး"

ဝမ်မုက သူမ၏ မျက်လုံးများကို စိုက်ကြည့်ကာ အပိုင်ပြောလိုက်သည် - "မင်း ငါ့ကို တိုက်မိတာ သေချာပါတယ်။"

တင်းတင်းသည် အောက်ကို ငုံ့ကြည့်လိုက်ပြီးမှ ရုတ်တရက် နားလည်သွားသည်။ သူမ၏ ပါးပြင်ပေါ်တွင် ရှက်သွေးများ ဖြာသွားတော့သည်။ သူမသည် ရင်ဘတ်ကို လက်ဖြင့် အမြန်ဖိကာ နောက်သို့ နှစ်လှမ်းဆုတ်လိုက်ပြီး - "သခင်လေး၊ ရှင်က ဒီလိုလူမျိုး ဖြစ်လိမ့်မယ်လို့ ကျွန်မ မထင်ထားခဲ့ဘူး"

ဝမ်မုက အံ့ဩသွားသည် - "မထင်ထားဘူး ဟုတ်လား မင်းတို့ကြားမှာ ငါ့ရဲ့ဂုဏ်သတင်းက အဲလောက်တောင် ကောင်းနေတာလား"

တင်းတင်း: "....."

ဝမ်မုက ရယ်မောလိုက်ပြီး ကမ်းခြေတစ်လျှောက် ဆက်လက် လမ်းလျှောက်သွားသည်။တင်းတင်းက သူ၏ကျောပြင်ကို ကြည့်ကာ သူမ၏ လှပသော မျက်လုံးများထဲတွင် ရှုပ်ထွေးသော အရိပ်အယောင်များ ပေါ်လာသည်။

ရန်ဖင်းရှန်း သူမကို ပြောခဲ့သလိုပင်။ သခင်လေးမှာ အပြင်ပန်း မြင်ရသလို ရိုးရှင်းသူ မဟုတ်ပေ။

ဖောင်ဒေးရှင်းဆိုသည့် တစ်ကွက်တည်းဖြင့် သူသည် ကုန်သည်အဖွဲ့ကြီး ၃ ခု လုယူသွားသော စီးပွားရေး ဝေစုများကို ပြန်လည် ရယူနိုင်ခဲ့သည်။ ယခုရက်ပိုင်းအတွင်း ကျွန်းကြီးများမှ ဝင်ငွေအစီရင်ခံစာများကို သူမ လက်ခံရရှိသောအခါ အံ့ဩမှင်သက်သွားခဲ့ရသည်။

ကုန်သည်အဖွဲ့ကြီး ၃ ခု၏ ကျူးကျော်မှုကို တွန်းလှန်ရန်အတွက် လွန်ခဲ့သော နှစ်များအတွင်း လန်ယာကုန်သည်အဖွဲ့မှ အဆင့်မြင့် အရာရှိများစွာသည် နည်းလမ်းပေါင်းစုံဖြင့် ကြိုးစားခဲ့ကြဖူးသည်။ သို့သော် မအောင်မြင်ခဲ့ချေ။

စီးပွားရေး နည်းဗျူဟာပိုင်းတွင် ကုန်သည်အဖွဲ့ကြီး ၄ ခုစလုံးမှာ တူညီကြသည်။ ငွေအင်အားပိုင်းတွင်လည်း ကုန်သည်အဖွဲ့ကြီး ၃ ခု ပေါင်းလိုက်ပါက လန်ယာထက် အဆပေါင်းများစွာ သာလွန်သည်။ အကယ်၍ မြောက်ပင်လယ် နယ်မြေအတွင်း မဟုတ်ဘဲ မြောက်ပိုင်း အမှောင်ထု သန့်စင်ရာမြေ၏ထောက်ပံ့မှုသာ မရှိခဲ့လျှင် အခြေအနေမှာ ပို၍ ဆိုးရွားနိုင်ခဲ့သည်။

သို့သော် သခင်လေးမှာမူ ဖောင်ဒေးရှင်းအတွက် အစီအစဉ်ကို ရေးဆွဲပြီး အသေးစိတ်ကို ဆုံးဖြတ်ပေးပြီးနောက် ထိုကိစ္စကို တစ်ခါမျှ ပြန်မမေးတော့ပေ ကုန်သည်အဖွဲ့ကြီး ၃ ခု ပေါင်းပြီး ဒုတိယမြောက် ဖောင်ဒေးရှင်းကို တည်ထောင်သည့်တိုင် သူ၏မျက်နှာတွင် စိုးရိမ်ရိပ် အနည်းငယ်မျှ မရှိခဲ့ချေ။ သူတို့ဆီသို့ ဝိညာဉ်ကျောက်တုံး တစ်သောင်းတောင် လက်ဆောင် ပေးလိုက်သေးသည်။ သူ၏အစီအစဉ်ကို သူတို့ ဖျက်ဆီးပစ်မည်ကို သူ စိုးရိမ်ပုံ မရခဲ့ပေ။

နောက်ဆုံးတွင်လည်း သူ ထင်သည့်အတိုင်းပင် ဖြစ်လာခဲ့သည်။ သူတို့ ဘာမှထပ်လုပ်စရာ မလိုဘဲ အပြတ်အသတ် နိုင်ခဲ့သည်။ ဖုန်လိုင်ယွမ်ဟိုင် ဖောင်ဒေးရှင်းမှာ မဖျက်သိမ်းရသေးသော်လည်း နာမည်သာရှိတော့ပြီး အနှစ်သာရ မရှိတော့ချေ။ မည်သူမျှ ထိုအဖွဲ့သို့ ပိုက်ဆံ ထပ်မလှူတော့မှာမှာ သေချာလှသည်။

အကြောင်းရင်း တစ်ခုခုကြောင့်... နေဝင်ရိုးရီ အချိန်တွင် ပင်လယ်ပြင်ကို မျက်နှာမူကာ ရွှေရောင် အလင်းတန်းများ လွှမ်းခြုံနေသော ဝမ်မု၏ကျောပြင်ကို ကြည့်ရင်း တင်းတင်းသည် ဝတ္ထုများထဲမှ လောကကြီးကို ကျောခိုင်းထားသည့် တုနှိုင်းမဲ့ ပညာရှင်ကြီးများကို ပြေးမြင်မိသွားသည်။

 ငါက တစ်ကွက်ပဲ သုံးမှာ။ မင်း အဲဒီအကွက်ကို ပြန်တိုက်နိုင်ရင် မင်းနိုင်တယ်။