အခန်း (၄၄)  ဖောင်ဒေးရှင်းချင်း အတူတူပဲကို ဘာလို့ ဒီလောက် ကွာခြားနေရတာလဲ

နေရာတိုင်းတွင် ပျက်စီးယိုယွင်းနေသည်။

လှည့်ကြည့်လိုက်တိုင်း အလောင်းများကိုမြင်တွေ့နေရပြီး ပင်လယ်ရေကြီးမှု၏ အမှတ်အသားများက နေရာအနှံ့ ကျန်ရစ်ခဲ့သည်။

မြောက်ပိုင်းဒေသတွင် ပင်လယ်မိစ္ဆာကျူးကျော်မှုမှာ ဖြစ်လေ့ဖြစ်ထရှိသော်လည်း အများစုမှာ ကျွန်းငယ်လေးများတွင်သာ ဖြစ်ပွားတတ်သည်။

ထိုနေရာများတွင် အင်အားကြီးကျင့်ကြံသူ မရှိသလောက်ဖြစ်ပြီး ကာကွယ်ရေးစနစ်များကိုလည်း ဖျက်ဆီးရန်မှာ လွယ်ကူသည်။ သူတို့သည် ပစ္စည်းများကို လုယက်၊ လူများကို စားသောက်ပြီးနောက် လူသားမျိုးနွယ်မှ အင်အားကြီး ပညာရှင်များ အင်အားဖြည့်တင်းရန် မရောက်လာမီ အမြန်ဆုတ်ခွာလေ့ရှိကြသည်။

သို့သော် စတားဖောကျွန်းစုမှာမူ ကွဲပြားသည်။ ၎င်းသည် အလတ်စားနှင့် ကျွန်းငယ်လေးများ စုဝေးရာဖြစ်သော်လည်း ပထဝီဝင်အနေအထားအရ အတွင်းပင်လယ်နှင့် အပြင်ပင်လယ် နယ်နိမိတ်ပေါ်တွင် တည်ရှိသည်။ တောင်နှင့်မြောက် ကူးသန်းသွားလာသော ကျင့်ကြံသူများသည် ဤနေရာတွင် ရပ်နားကာ ကုန်သွယ်မှုပြုလုပ်လေ့ရှိကြသဖြင့် ကုန်သွယ်ရေး အလွန်စည်ကားသည်။ ကုန်သည်အဖွဲ့ကြီးများနှင့် ဂိုဏ်းအသီးသီးသည် ဤနေရာကို စောင့်ရှောက်ရန် အင်အားကြီးပညာရှင်များကို အမြဲစေလွှတ်ထားလေ့ရှိသည်။ ထို့ကြောင့် ဤနေရာသည် ကျူးကျော်ရန် အသင့်တော်ဆုံးပန်းတိုင် မဟုတ်ပေ။

သို့သော်လည်း ကျူးကျော်မှုက ဖြစ်ပွားခဲ့သည်။ ၎င်းပြင် အံ့ဩဖွယ်အရှိန်အဟုန်ဖြင့် ကျွန်း၏ ကာကွယ်ရေးအားလုံးကို ဖျက်ဆီးပစ်ခဲ့ကာ အရာအားလုံးကို အပျက်အစီးများအဖြစ် ပြောင်းလဲပစ်ခဲ့သည်။ လွန်ခဲ့သော နှစ်အနည်းငယ်အတွင်း မြောက်ပိုင်းဒေသတစ်ခုလုံးတွင် ဤမျှကြီးမားသော ဘေးအန္တရာယ်မျိုးမှာ အလွန်ရှားပါးလှပေသည်။

အသက်ရှင်ကျန်ရစ်သူမှာ ဆယ်ပုံတစ်ပုံပင် မရှိတော့ချေ။ ကျန်ရှိသူများမှာလည်း အသက်ငင်နေကြပြီ ဖြစ်သည်။ သူတို့သည် အသက်ဆက်ရန် ဆေးလုံးများကို မျိုချခြင်း သို့မဟုတ် လျှို့ဝှက်ကျင့်စဉ်များကို သုံးခြင်းဖြင့် အင်အားဖြည့်တင်းသူများကို မျှော်လင့်တောင့်တနေကြသည်။

ကျင့်ကြံခြင်းလောက၏ အမှောင်ထုနှင့် ရက်စက်မှုကို သိရှိနားလည်ထားသော ကျိုးဖိန်သည်လည်း ထိုသူများထဲမှ တစ်ဦးဖြစ်သည်။ သူသည် စတားဖောကျွန်းစု၏ အဓိကဂိုဏ်းကြီး ၅ ခုအနက် တစ်ခုဖြစ်သော ပင်လယ်ခွဲဂိုဏ်း၏အတွင်းစည်းအကြီးအကဲတစ်ဦး ဖြစ်သည်။ သူ၏ ကျင့်ကြံမှုမှာ နတ်ဘုရားသန္ဓေအဆင့်အစောပိုင်းသို့ ရောက်ရှိနေပြီဖြစ်သည်။

သူ၏ အဆင့်ကြောင့်ပင် စစ်ပွဲဖြစ်ပွားချိန်၌ မိစ္ဆာမျိုးနွယ်များ၏အဓိက ပစ်မှတ်ထားခြင်းကို ခံခဲ့ရသည်။ အကယ်၍ သူငယ်စဉ်က ကံကောင်းထောက်မစွာရရှိခဲ့သော ဝိညာဉ်အသွင်ပြောင်းအဆင့် ပညာရှင်၏အသက်ကယ် အဆောင်လက်ဖွဲ့ သာ မရှိပါက သူ သေဆုံးသည်မှာ ကြာလှပြီဖြစ်သည်။ ယခုမူ သူသည် အသက်မသေသော်လည်း သေလူနှင့် မခြားတော့ချေ။ သူ၏ ဒဏ်ရာမှာ အလွန်ပြင်းထန်ပြီး ဆေးလုံးများ၊ ရတနာများနှင့် သိုလှောင်အိတ်မှာပင် တိုက်ပွဲအတွင်း ပျက်စီးသွားခဲ့ပြီ ဖြစ်သည်။

သူ လမ်းပင် မလျှောက်နိုင်တော့ဘဲ သေမင်းကိုသာ စောင့်နေရသည့်အချိန်တွင်... ကောင်းကင်ယံ၌ ပျံသန်းသည့် သင်္ဘောအုပ်စုကြီးများ ပေါ်လာသည်။ တစ်ဖက်တွင် လန်ယာပရဟိတ ဖောင်ဒေးရှင်းအလံများ လွင့်ထူထားပြီး၊ အခြားတစ်ဖက်တွင်မူ ဖုန်လိုင်ယွမ်ဟိုင် ဖောင်ဒေးရှင်း အလံများ ရှိနေသည်။

ကျိုးဖိန်သည် ဝမ်းသာအားရ ဖြစ်သွားသည်။ ဤဖောင်ဒေးရှင်းသစ် နှစ်ခုအကြောင်းကို သူ ကြားဖူးသည်။ သူတို့သည် ပရဟိတနှင့် ကယ်ဆယ်ရေးကို အဓိကထားသည်ဟု ဆိုကြသည်။ ကျိုးဖိန်သည် ကျင့်ကြံခြင်းလောက၏ အေးစက်မှုကို သိသဖြင့် ဤအဖွဲ့ကြီးများက အလကား ကယ်တင်မည်ဟု လုံးဝမယုံကြည်သော်လည်း၊ ယခုအချိန်တွင် သူ့ကို အသက်ဆက်ပေးနိုင်လျှင် မည်သည့်တန်ဖိုးပေးရပေးရ ထိုက်တန်သည်ဟု ယူဆထားသည်။

မကြာမီပင်။

လန်ယာကုန်သည်အဖွဲ့၏ သင်္ဘောပေါ်မှ ဆင်းလာသူများသည် အဖြူရောင်ဝတ်စုံများကို ဝတ်ဆင်ထားပြီး အလွန်မြန်ဆန်သော လှုပ်ရှားမှုများဖြင့် ဘေးဒဏ်သင့်ရာ ဒေသများသို့ သွားကာ ကုသမှုများ စတင်ကြသည်။ အခြားတစ်ဖက်တွင်မူ ဖုန်လိုင်ယွမ်ဟိုင်မှ လူများသည် အေးအေးလူလူပင် ဆင်းလာကြပြီး ပျက်စီးနေသော မြင်ကွင်းကို ကြည့်ကာ နှာခေါင်းရှုံ့ရင်း ရွံရှာသော စကားအချို့ ဆိုကြသည်။

ကျိုးဖိန်ရှိရာ နေရာသို့ အဖွဲ့နှစ်ဖွဲ့လုံး တစ်ပြိုင်နက် ရောက်လာသည်။

"စိတ်မရှိပါနဲ့၊ ငါတို့ အရင်ရောက်တာ" ဖုန်လိုင်ယွမ်ဟိုင်မှ လူငယ်တစ်ဦးက လက်ပိုက်လျက် လန်ယာအဖွဲ့၏ လမ်းကို ပိတ်လိုက်သည်။

"မင်း..." လန်ယာအဖွဲ့မှ လူငယ်တစ်ဦးက ပြန်ပြောချင်သော်လည်း ခေါင်းဆောင်ဖြစ်သူက တားလိုက်သည် - "အထက်က မှာထားတယ်၊ အငြင်းပွားမနေနဲ့၊ လူကယ်ဖို့က ပထမပဲ" ထို့နောက် သူတို့က အခြားတစ်နေရာသို့ လှည့်ထွက်သွားကြသည်။

ကျိုးဖိန်က တွေးမိသည် - ကုန်သည်အဖွဲ့ကြီး ၃ ခု ပေါင်းထားတဲ့ ဖောင်ဒေးရှင်းက ပိုပြီး ဩဇာရှိတာပဲ။ သူတို့ဆီမှာ ပိုကောင်းတဲ့ ဆေးဝါးတွေ ရှိမှာ သေချာတယ်။

မဝေးသော နေရာတွင် လန်ယာဖောင်ဒေးရှင်းမှ မိန်းကလေးတစ်ဦးက ကျင့်ကြံသူတစ်ဦးကို ကူညီနေသည့် အသံကို ကြားရသည်။

"မပူပါနဲ့၊ ရှင် နေကောင်းသွားမှာပါ။ ကဲ... ဒီဆေးလုံးလေး အရင်သောက်လိုက်"

ထိုမိန်းကလေးသည် ကျောက်စိမ်းဟင်းလင်းပြင် ဆေးလုံးကို ထုတ်ပေးလိုက်သည်။ ၎င်းမှာ အလွန်အဖိုးတန်ပြီး ထိရောက်မှု မြင့်မားသော ကုသရေးဆေးလုံး ဖြစ်သည်။

ကျိုးဖိန် အံ့ဩသွားသည် - လန်ယာက ပေးတဲ့ ကယ်ဆယ်ရေး ပစ္စည်းတောင် ဒီလောက်ကောင်းရင်၊ ကုန်သည်အဖွဲ့ကြီး ၃ ခု ပေါင်းထားတဲ့ ဖုန်လိုင်က ပေးမယ့် နတ်ဆေးတွေက ဘယ်လောက်တောင် အစွမ်းထက်လိုက်မလဲ။

မကြာမီ။

ဤနေရာကိုတာဝန်ယူထားသော ဖုန်လိုင်ယွမ်ဟိုင် တပည့်တစ်ဦးက ကျိုးဖိန်၏ ရှေ့တွင် ဆောင့်ကြောင့်ထိုင်လိုက်သည်။ သူက ကျိုးဖိန်၏ ဒဏ်ရာကို ကြည့်ကာ လှောင်ပြုံးကလေး ပြုံးလိုက်သည်။

"စီနီယာ... ခင်ဗျား ဒဏ်ရာက တော်တော်ပြင်းတာပဲ"

"ဟွတ်... ဟွတ်... ကျေးဇူးတင်ပါတယ် မောင်ရင်"

ထိုတပည့်က မည်းနက်နေသော ဆေးလုံးနှစ်လုံးကို ထုတ်ယူကာ ကျိုးဖိန်၏ ပါးစပ်သို့ တေ့ပေးလိုက်သည်။ ထိုခဏ၌ မီးလောင်ထားသော မြက်ခြောက်နံ့ကဲ့သို့ အနံ့ဆိုးတစ်ခုက ကျိုးဖိန်၏ နှာခေါင်းထဲသို့ တိုးဝင်လာသည်။

ကျိုးဖိန်၏ မျက်မှောင်များ ချက်ချင်း ကြုံ့သွားတော့သည်။

ဒါ... ဒါက ဘာကြီးလဲ