အခန်း (၄) ဧကရာဇ်အလားအလာ၊ အနားမှာရှိသော အဘိုးအို

【အမည်: လင်းယန်】

【အသက်: ၁၈ နှစ်】

【လူမျိုး: လူသားမျိုးနွယ်】

【အဆင့်: ဝိညာဉ်စွမ်းအင်စုဆောင်းခြင်း အဆင့် ၉ 】

【ပါရမီ: မဟာဧကရာဇ် ဖြစ်လာနိုင်သော အလားအလာ】

【ထူးခြားချက်: ဧကရာဇ်မီးလျှံ သန့်စင်ခန္ဓာကိုယ် — လောကရှိ မိစ္ဆာမီး၊ ဝိညာဉ်မီးနှင့် မသေမျိုးမီး အမျိုးမျိုး၏မူလအဆီအနှစ်များကို ဝါးမြိုပြီး မိမိ၏ကျင့်ကြံမှုနှင့် ပါရမီကိုမြှင့်တင်နိုင်သည်။ ဤသန့်စင်ခန္ဓာကိုယ်ကို ထိန်းချုပ်ရန် ခိုင်မာသော ကျင့်ကြံမှုနှလုံးသားလိုအပ်သည်။ သို့မဟုတ်ပါက မီးလျှံများကို ဝါးမြိုခြင်းသည် အလွန်အန္တရာယ်များပြီး ကိုယ့်ကိုယ်ကိုယ် ပြန်လည်လောင်ကျွမ်းစေမည့် ဘေးရှိသည်။】

【ရင်းနှီးမြှုပ်နှံမှု အကဲဖြတ်ချက်: အလားအလာ အလွန်ကြီးမားသည်၊ ရင်းနှီးမြှုပ်နှံရန် သင့်တော်သည်။】

【အမည်: တန်ရွှမ်း 】

【အသက်: ၃၂၄၁ နှစ်】

【လူမျိုး: လူသားမျိုးနွယ် (ဝိညာဉ်အကြွင်းအကျန်)】

【အဆင့်: မရှိ (အသက်ရှင်စဉ်က ဘေးဒုက္ခသုံးဆင့်ရင်ဆိုင်ပြီး ကမ္ဘာမြေမသေမျိုးဖြစ်ခဲ့သူ)】

【ပါရမီ: ဆေးဝါးဝိညာဉ်ခန္ဓာ — လောကရှိ ဆေးဖက်ဝင်အပင်များကို ထိန်းချုပ်နိုင်စွမ်း အားကောင်းသည်။ ဆေးလုံးဖော်စပ်ရာတွင် အားစိုက်မှုထက်ဝက်ဖြင့် ရလဒ်နှစ်ဆ ရရှိနိုင်သည်။】

【ရင်းနှီးမြှုပ်နှံမှု အကဲဖြတ်ချက်: အချိန်ကိုက်အကူအညီဖြစ်စေနိုင်သည်၊ ရင်းနှီးမြှုပ်နှံရန် သင့်တော်သည်။】

အမလေး... တော်သေးတာပေါ့၊ ငါ စောစောလာမိလို့။

ဒီကောင်က တိတ်တဆိတ်နဲ့ ဝိညာဉ်စွမ်းအင်စုဆောင်းခြင်းအဆင့် ၉ အထိ ပြန်ရောက်နေပြီ ပဲ။ ပြီးတော့ သူ့အနားမှာအကြံပေးနေတဲ့ အဘိုးကြီးတစ်ယောက်လည်း ရှိသေးတယ်။ အကယ်၍ ငါသာ ရက်နည်းနည်းလောက် နောက်ကျပြီးမှ လာခဲ့ရင်... သူက အခြေခံတည်ဆောက်ခြင်းအဆင့်ကို အောင်မြင်သွားပြီး ဘိယွန်းကျွန်းကနေ ထွက်ပြေးလွတ်မြောက်သွားနိုင်တယ်။ အဲဒီကျရင်တော့ ငါ့အတွက် ခက်ပြီ။ပြီးတော့ စနစ်ရဲ့အကဲဖြတ်ချက်ကို ကြည့်ပါဦး - မဟာဧကရာဇ် အလားအလာ တဲ့။

သိကြတဲ့အတိုင်း ဘေးဒုက္ခရင်ဆိုင်ခြင်းအဆင့်တွေမှာတောင် အဆင့်အတန်း ကွဲပြားမှုတွေ ရှိပါတယ်။ ဘေးဒုက္ခ ၃ ဆင့်၊ ၆ ဆင့်၊ ၉ ဆင့် စသဖြင့်ပေါ့။ ဒါပေမဲ့ မဟာဧကရာဇ်ဆိုတာ ကတော့ ဘေးဒုက္ခ ၃၆ ဆင့်လုံးကို ကျော်ဖြတ်ပြီး မသေမျိုးလောကမှာ ပြိုင်ဘက်ကင်း အထွတ်အထိပ်သို့ ရောက်ရှိသွားသူကို ခေါ်တာပါ။

လင်းယန်က တကယ့်ကို ကံကြမ္မာရဲ့သူရဲကောင်းပဲ။ သူ့မှာ မဟာဧကရာဇ်ဖြစ်လာမယ့် ပါရမီရှိနေတယ်။ သူ့ကိုသာလွှတ်ပေးလိုက်ရင် နောင်နှစ်အနည်းငယ်အတွင်းမှာ ဝမ်မိသားစုကိုအမြစ်ပြတ်အောင် လုပ်မယ့်သူ ဖြစ်လာလိမ့်မယ်။

ဝမ်မုသည် အသက်ကို ပြင်းပြင်းရှူလိုက်ပြီး သူ၏ မျက်နှာတွင် အကြင်နာဆုံးသော အပြုံးတစ်ခုကို အတင်းဖန်တီးကာ ပြုံးပြလိုက်သည်။

သို့သော် ထိုအပြုံးမှာလင်းယန်၏ မျက်လုံးထဲတွင်မူ မိစ္ဆာတစ်ကောင်၏ရုပ်ဆိုးလှသော အပြုံးကဲ့သို့ပင်။

ဒီတိရစ္ဆာန်ကောင်က အရမ်းယုတ်မာတဲ့ပုံစံနဲ့ပြုံးနေတာပဲ။ သူ ဘာပရိယာယ်တွေ ထပ်သုံးဦးမလို့လဲ ငါ့ရဲ့ယန်အာကိုလည်း လုသွားပြီ၊ ငါ့ကျင့်ကြံမှုကိုလည်း ဖျက်ဆီးခဲ့ပြီးပြီ။ အခုထိ ငါ့ကို မလွှတ်ပေးနိုင်သေးဘူးလား လင်းယန်က ရင်ထဲမှ အော်ဟစ်နေမိသည်။

"သခင်လေး"

ထိုစဉ်မှာပင် ဝက်ဝံကဲ့သို့ ဝတုတ်နေသော မန်နေဂျာက အပြုံးကြီးဖြင့် ရှေ့သို့တိုးလာသည်။

"သခင်လေးရဲ့ညွှန်ကြားချက်အတိုင်း ဒီအမှိုက်ကောင်ကို လွန်ခဲ့တဲ့ သုံးနှစ်လုံးလုံး ကျွန်တော်မျိုး ကောင်းကောင်းကြီး ဧည့်ခံထားပါတယ်။

သခင်လေး စိတ်တိုင်းကျရဲ့လား နှိပ်ဆပ်မှုကို ထပ်တိုးစေချင်သလား သခင်လေး စိတ်ပျက်ရမှာ မဟုတ်ဘူးလို့ ကျွန်တော်မျိုး အာမခံပါတယ်"

ဝမ်မု: .....

ထိုမန်နေဂျာကို ကြည့်ပြီး ဝမ်မုရင်ထဲမှာ ဆဲရေးတိုင်းထွာချင်စိတ်တွေ တဖွားဖွားပေါ် လာသည်။

အမလေး... တကယ့်ဝက်လို အဖော်ပဲ ငါက ရှင်းပြဖို့ စကားလုံးတွေ အများကြီး ပြင်ဆင်လာကာမှ မင်းက ငါ့အတွက် အမုန်းတရားတွေကို နှစ်ဆတိုးအောင် လုပ်ပေးနေတာပဲ။ ငါ့ရဲ့ ဗီလိန်ပုံစံက မခိုင်မာမှာ ကြောက်နေလို့လား။

လင်းယန်က ရိုရိုသေသေ ဒူးထောက်နေသော်လည်း သူ၏မျက်လုံးထဲမှ အမုန်းတရားများကို ဖုံးကွယ်ထား၍ မရတော့ပေ။

"မင်း အခုပဲ ထွက်သွားတော့။" ဝမ်မုက မန်နေဂျာကို အေးစက်စွာ ပြောလိုက်သည်။

မန်နေဂျာမှာ ကြောင်သွားပြီး ဝမ်မု၏ အေးစက်သော အကြည့်ကို မြင်သောအခါ ကြောက်ရွံ့တုန်ရင်သွားသည် - "ဟုတ်... ဟုတ်ကဲ့ပါ၊ ကျွန်တော်မျိုး အခုပဲ သွားပါပြီ။" ထို့နောက် သူသည် လုံးလုံးလေးဖြစ်အောင် ကွေးပြီး ဝေးရာသို့ လိမ့်ထွက်သွားတော့သည်။

ဝက်လို အဖော်ထွက်သွားပြီးနောက် ဝမ်မုသည် လင်းယန်ကို ကြည့်ကာ အတင်းပြုံးလိုက်ပြီး  "လင်းယန်... အကယ်၍ ငါက ပြောမယ်ဆိုရင်..."

"လွန်ခဲ့တဲ့ သုံးနှစ်က..."

"ငါ မင်းရဲ့ ချစ်သူကို လုခဲ့တာနဲ့ မင်းရဲ့ ကျင့်ကြံမှုကို ဖျက်ဆီးခဲ့တာတွေက မင်းကောင်းစားဖို့အတွက်ပဲလို့ ငါပြောရင် မင်းယုံမလား"

လင်းယန်: ......မင်း... တိရစ္ဆာန်ကောင်း မင်းပြောနေတဲ့ စကားက လူစကားလား။

ဝမ်မု၏စစ်မှန်လှသော မျက်နှာထားကို ကြည့်ပြီး လင်းယန်မှာ ဒေါသထွက်လွန်းသဖြင့် သွေးအန်မတတ် ခံစားလိုက်ရသည်။

ငါ့ချစ်သူကိုလု၊ ငါ့ကျင့်ကြံမှုကိုဖျက်တာက ငါ့အတွက်လို့ ပြောနေတာလား မင်းကော အဲဒီစကားကို မင်းကိုယ်တိုင် ယုံရဲ့လား။

လက်ရှိအခြေအနေအရ လင်းယန်က သည်းခံရမည်။ သူက အတင်းပြုံးလိုက်ပြီး - "ကျွန်တော်... ယုံပါတယ်"

"ဟင့်အင်း... မင်း မယုံဘူး။"

ဝမ်မုက သက်ပြင်းချလိုက်သည် - "မင်းရဲ့ရင်ထဲမှာ နာကျည်းချက်တွေရှိနေတာ ငါမြင်ပါတယ်။ ရပါတယ်၊ ငါ မင်းကိုအပြစ်မတင်ပါဘူး။"

လင်းယန်: "..."

ဘယ်လောက်တောင် အရှက်မရှိလိုက်သလဲ မင်းက ငါ့ကို အပြစ်မတင်ဘူး ဟုတ်လား အေးလေ... ကျေးဇူးတင်လိုက်တာနော်။

"ညီအစ်ကို လင်း"

ဝမ်မုက လင်းယန်၏ပခုံးကို လေးလေးနက်နက် ပုတ်လိုက်သည် - "မင်းက ကမ္ဘာပေါ်မှာ တွေ့ရခဲတဲ့ ကျင့်ကြံခြင်း ပါရမီရှင်တစ်ယောက်ဆိုတာ မင်းသိလား"

လင်းယန်: ...... (တကယ်တော့ ကျွန်တော် ဒါကို လွန်ခဲ့တဲ့ နှစ်လကမှဆရာ့ဆီက သိတာလေ။ မင်းက သုံးနှစ်ကတည်းက သိနေတယ်လို့တော့ မပြောနဲ့ဦး)

ဝမ်မုက ဆက်ပြောသည် - "မင်းမှာ လောကမှာ အစွမ်းထက်ဆုံး မီးဓာတ် သန့်စင်ခန္ဓာကိုယ် ဖြစ်တဲ့ ဧကရာဇ်မီးလျှံသန့်စင်ခန္ဓာကိုယ်ရှိတယ်။ ဒီခန္ဓာကိုယ်က မီးလျှံတွေကိုဝါးမြိုပြီး ကျင့်ကြံနိုင်ပေမဲ့ ကိုယ့်ကိုယ်ကိုယ် လောင်ကျွမ်းစေမယ့် အန္တရာယ်လည်းရှိတယ်။ ခိုင်မာတဲ့ ကျင့်ကြံမှုနှလုံးသားရှိမှပဲ ဒါကို ထိန်းချုပ်နိုင်မှာ။"

"သုံးနှစ်တုန်းက မင်းက ငယ်ငယ်ရွယ်ရွယ်နဲ့ အောင်မြင်နေတဲ့ပါရမီရှင်တစ်ယောက်။ ချစ်သူနဲ့ ပျော်ပါးနေပြီး ဘဝမှာအခက်အခဲ မကြုံဖူးသေးတဲ့သူ။ အဲဒီလိုလူက ဘယ်လိုလုပ် ခိုင်မာတဲ့ နှလုံးသားရှိနိုင်မှာလဲ အဲဒီချစ်သူဆိုတာကလည်း ပျင်းရိပြီး ပကာသနမက်တဲ့သူ။ ငါ့ကို မြင်တာနဲ့ ငါ့ရင်ခွင်ထဲအတင်းတိုးဝင်လာတဲ့ အမျိုးသမီးပဲ။"

"အဲဒီလိုမိန်းမမျိုးက မင်းရဲ့ခန္ဓာကိုယ် နိုးထဖို့နဲ့ မီးလျှံတွေကို ဝါးမြိုဖို့အတွက် အနှောင့်အယှက်ပဲ ဖြစ်လိမ့်မယ် မင်း ဒါကို မထိန်းချုပ်နိုင်ဘူး"

"ရှေးလူကြီးတွေ ပြောသလိုပေါ့  ကောင်းကင်ဘုံက လူတစ်ယောက်ကိုကြီးမြတ်တဲ့ တာဝန်တွေ ပေးတော့မယ်ဆိုရင် အရင်ဆုံး သူ့ရဲ့စိတ်နှလုံးကို နာကျင်စေရမယ်၊ ကြွက်သားတွေကို ပင်ပန်းစေရမယ်၊ ကျင့်ကြံမှုကို ဖျက်ဆီးပစ်ရမယ်... ပြီးတော့ သူ့ရည်းစားနဲ့လည်း အိပ်ပြရမယ်"

"ညီအစ်ကို လင်း... ငါလုပ်ခဲ့သမျှ အားလုံးက မင်းကောင်းဖို့အတွက်ချည်းပဲ"

ဝမ်မု၏စိတ်မကောင်းဖြစ်နေသော မျက်နှာထားကို ကြည့်ပြီး လင်းယန် ခဏမျှ ကြောင်သွားသည်။

"ဆရာ..." လင်းယန်က စိတ်ထဲက မေးလိုက်သည်

"သူပြောတာတွေက အမှန်လား"

တန်ရွှမ်း (အဘိုးကြီး) က ပြန်ဖြေသည် - "ငါသိသလောက်တော့ ဧကရာဇ်မီးလျှံ သန့်စင်ခန္ဓာကိုယ်နဲ့ မီးလျှံတွေကိုဝါးမြိုတာက တကယ် အန္တရာယ်များတယ်။ ကျင့်ကြံမှုနှလုံးသား ခိုင်မာဖို့လည်း တကယ်လိုအပ်တယ်။ လွန်ခဲ့တဲ့ သုံးနှစ်အတွင်း မင်းခံခဲ့ရတဲ့ အရှက်ခွဲမှုတွေက မင်းရဲ့ နှလုံးသားကို တည်ငြိမ်စေဖို့ တကယ်ပဲ အထောက်အကူ ဖြစ်ခဲ့တယ်။"

"ဒါပေမဲ့... ကျင့်ကြံမှုကိုဖျက်၊ ချစ်သူကိုလုပြီး နှလုံးသားကို လေ့ကျင့်ပေးတယ်ဆိုတာ ကတော့... အခုခေတ် လူငယ်တွေက ဒီလောက်တောင်... ဆန်းသစ်နေကြတာလား"

လင်းယန်က ဝမ်မုကို ကြည့်ပြီး ပြောလိုက်သည် - "ဒါပေမဲ့ သခင်လေး... ကျွန်တော်သာ ရွေးချယ်ခွင့်ရှိမယ်ဆိုရင် ဒီလိုသန့်စင်ခန္ဓာကိုယ်မျိုး နိုးထဖို့ထက် ကျွန်တော့်ရဲ့ချစ်သူကို ဆုံးရှုံးမခံချင်ပါဘူး။ ပြီးတော့... ကျွန်တော့်ရဲ့ခန္ဓာကိုယ်က လွန်ခဲ့တဲ့ရက်ပိုင်းကမှ နိုးထခဲ့တာ။ သခင်လေးက သုံးနှစ်ကတည်းက ဘယ်လိုသိနေတာလဲ" ဝမ်မု၏ မျက်လုံးများ ပြာသွားသည်။ သူ၏ ဦးနှောက်မှာ အလွန်လျင်မြန်စွာ အလုပ်လုပ်နေရသည်။

အချိန်အတော်ကြာပြီးနောက် ဝမ်မုက သက်ပြင်းချလိုက်ပြီး - "ကောင်းပြီလေ... ဒီအခြေအနေထိ ရောက်မှတော့ ငါ မဖုံးကွယ်တော့ပါဘူး။"

"ညီအစ်ကို လင်း"

"ငါတို့ကမ္ဘာကြီးက မကြာခင်မှာ ပျက်စီးတော့မယ့် ဘေးဒုက္ခကြီးနဲ့ ရင်ဆိုင်ရတော့မယ်ဆိုတာ မင်းသိလား"