အခန်း (၂)  တျန်းဖုန်း၏နဂါးသတ်ပညာရပ်

အဘယ်ကြောင့် ဝမ်မု ကဲ့သို့သော ကလေးငယ်တစ်ဦး၏လက်ထဲတွင် ဤမျှ အဖိုးတန်သော ရတနာများ ရှိနေရသနည်း။ အဖြေက ရိုးရှင်းပါသည်။ ဝမ်မိသားစု၏ သုံးဆက်မြောက် တစ်ဦးတည်းသော သွေးမျိုးဆက် ဖြစ်သောကြောင့်ပင်။

ဝမ်မုသည် ဖြေရှင်း၍မရသော ကျိန်စာဒဏ်ကို ခံစားနေရသဖြင့် မိသားစုရှိလူကြီးများက သူ့အပေါ် အကြွေးတင်နေသကဲ့သို့ ခံစားနေရသည်။

ဝမ်မုကို ပြန်လည်ဖြည့်ဆည်းပေးရန်အတွက် သူ၏လပြည့်ပွဲတော်မှစ၍ နှစ်စဉ် သူ၏မွေးနေ့တိုင်းတွင် ဝမ်မိသားစုသည်ကြီးကျယ်ခမ်းနားသော ပွဲတော်များကို ကျင်းပပေးလေ့ရှိသည်။ ထိုပွဲတော်များသို့ တက်ရောက်လာသူများသည်လည်း အလွန်အဖိုးတန်လှသော လက်ဆောင်များကို ဆက်သကြရသည်။

ဤရတနာများကို ဝမ်မုအား ပေးကမ်းခြင်းက အကျိုးမရှိဘဲ ဖြုန်းတီးရာရောက်သည်ဟု ထင်သလော။ အဲ့ဒါက အရေးမကြီးပါပေ။ ကလေးငယ်ကသာ ကြိုက်နှစ်သက်မည်ဆိုလျှင် ထိုလူကြီးများသည် ပင်လယ်ထိန်းနဂါးပုလဲများကိုပင် ဘောလုံးကဲ့သို့ ကန်ကစားခိုင်းရန် ဝန်မလေးကြပေ။

ထို့အပြင်...

အဖိုးဖြစ်သူမှအစ ဝမ်မိသားစုဝင်တိုင်းမှာ ရက်စက်ကြမ်းကြုတ်သော ဇာတ်ကောင်များ ဖြစ်ကြသည်။ မိသားစုစားပွဲဝိုင်းသို့ ဧည့်သည်အများကြီး မဖိတ်ကြားသော်လည်း ဝမ်မိသားစုက ဖိတ်ကြားစာမပို့လျှင် သင်က တကယ်ပဲ ဂုဏ်ပြုလက်ဆောင် မပို့ဘဲ နေရဲမည်လော။

ဝမ်မိသားစုကို မည်သူက မည်သည့်လက်ဆောင် ပို့ခဲ့သည်ကို မှတ်မိချင်မှ မှတ်မိပေလိမ့် မည်။ သို့သော် လက်ဆောင်မပို့ခဲ့သည်ကို သူတို့မှတ်မိသွားလျှင် ဘာဖြစ်မည်နည်း။ ၎င်းမှာ ကောင်းကင်မှ မိုးကြိုးပစ်ချလိုက်သကဲ့သို့ သေမင်းတံခါးဝသို့ ရောက်သွားမည့် ဘေးဒုက္ခမျိုး မဟုတ်ပါလော။

မည်သူမျှ ထိုကဲ့သို့ မိမိအသက်ဖြင့် မလောင်းကြေးထပ်ဝံ့ကြပေ။ ထို့ကြောင့် လွန်ခဲ့သော ဆယ်စုနှစ်အတွင်း ဝမ်မိသားစုသည် နှစ်စဉ် မွေးနေ့လက်ဆောင်များကို လက်မလည်အောင် လက်ခံရရှိခဲ့သည်။ လူကြီးများက ခေတ္တထိန်းသိမ်းမထားခဲ့သော ထိုမွေးနေ့လက်ဆောင် များကိုအားကိုးကာ ဝမ်မု၏ခန္ဓာကိုယ်ပိုင်ရှင်ဟောင်းသည် ကြီးမားသော ပိုင်ဆိုင်မှုများကို စုဆောင်းနိုင်ခဲ့သည်။

အပိုပြောခြင်းမဟုတ်...

ဘေးဒုက္ခရင်ဆိုင်ခြင်းအဆင့်ရှိသော မသေမျိုးများပင်လျှင် သူတို့၏ ကြွယ်ဝမှုမှာ ဝမ်မုထက် သာလွန်မည်ဟု အာမမခံနိုင်ပေ။

"ကဲ... ပါးစပ်ဟလိုက်ဦး"

ဝမ်မု ထုတ်ယူလိုက်သော နဂါးပုလဲကို ကြည့်ပြီး ရွှေရောင်ငှက်ကလေးမှာ မျက်လုံးများ ဝိုင်းစက်သွားသည်။

ကျိပိ ကျိပိ~

ကျိပိ ကျိပိ~

၎င်းသည် စိတ်လှုပ်ရှားစွာဖြင့် ခုန်ပေါက်နေပြီး ၎င်း၏မျက်လုံးထဲတွင် တောင့်တမှုနှင့် အလိုချင်ဆုံးသော ဆန္ဒများဖြင့် ပြည့်နှက်နေသည်။ ဝမ်မုသည် ထိုအကောင်ပေါက်လေးကို အကြာကြီး မစောင့်ခိုင်းဘဲ ပင်လယ်ထိန်းနဂါးပုလဲ တစ်လုံးကို ငှက်ကလေး၏ ပါးစပ်ထဲသို့ တိုက်ရိုက်ပစ်ထည့်ပေးလိုက်သည်။

ဝုန်း~

နဂါးပုလဲသည် ငှက်ကလေး၏ ဗိုက်ထဲသို့ ရောက်သွားသည်နှင့် တစ်ပြိုင်နက် ငှက်ကလေး၏ အမွေးအတောင်များမှ ရွှေရောင်အလင်းတန်းများ ပေါက်ကွဲထွက်လာပြီး ၎င်း၏ခန္ဓာကိုယ် မှာ လေထဲသို့ ပျံတက်သွားကာ မူလအစစ်အမှန်ပုံစံသို့ ပြောင်းလဲသွားသည်။

ရှူးးးး~

စူးရှကျယ်လောင်သော အော်မြည်သံသည် မိုင်ပေါင်းထောင်ချီအထိ ပျံ့နှံ့သွားသည်။ ထိုအရှိန်အဝါကြောင့် ပတ်ဝန်းကျင်ရှိ ရေလှိုင်းများမှာ ပွက်ပွက်ဆူလာပြီး ပင်လယ်ငါး များစွာမှာလည်း ထိုအရှိန်အဝါကို ကြောက်လန့်ကာ ချက်ချင်း သတိလစ်သွားပြီး ရေစီးကြောင်းအတိုင်း ပက်လက်ကလေးများ မျောပါသွားကြသည်။

ရွှေရောင်အလင်းတန်းများမှာ ပိုမိုတောက်ပလာသည်။

နောက်ဆုံးတွင် တောက်ပသော ရွှေရောင်နေမင်းကြီးကဲ့သို့ တိုက်ရိုက်ကြည့်ရန်ပင် မဖြစ်နိုင်တော့ဘဲ စူးရှတောက်ပနေတော့သည်။

【ဂုဏ်ယူပါသည်၊ သင်သည် နတ်ဘုရားသားရဲ - ဝမ်ဖူကွေ့ အား အောင်မြင်စွာ ရင်းနှီးမြှုပ်နှံနိုင်ခဲ့ပါပြီ။】

【ဂုဏ်ယူပါသည်၊ သင်သည် ဝမ်ဖူကွေ့ထံသို့ ပင်လယ်ထိန်းနဂါးပုလဲ ၁ လုံး အောင်မြင်စွာ ရင်းနှီးမြှုပ်နှံလိုက်ပြီဖြစ်ရာ ရင်းနှီးမြှုပ်နှံမှုအခြေအနေမှာ ၁၀% သို့ ရောက်ရှိသွားပါပြီ။】

【ပိုင်ရှင်သည် ဝမ်ဖူကွေ့၏ နောက်ဆက်တွဲ ကျင့်ကြံမှု ရလဒ်အားလုံးမှ ၁၀% ကို ပြန်လည်ရရှိမည် ဖြစ်သည်။】

【ဂုဏ်ယူပါသည် သင်သည် ဝမ်ဖူကွေ့ထံမှ ကျင့်ကြံမှုရလဒ် ပြန်အမ်းငွေကို ရရှိခဲ့ပါသည်။】

【ကျေးဇူးပြု၍ ဆက်လက် ကြိုးစားပေးပါ။】

...သတိပေးချက် အသံထွက်ပေါ်လာသည်နှင့်အမျှ ဝမ်မု၏မူလက ဗလာဖြစ်နေသော ဒန်တျန်အတွင်း၌ နို့နှစ်ရောင် ဝိညာဉ်စွမ်းအင် များသည် လျင်မြန်စွာ စတင်ဖြစ်ပေါ်လာသည်။

တစ်ချိန်တည်းမှာပင် တစ်ခါမျှမခံစားဖူးသော သက်သောင့်သက်သာရှိမှု ခံစားချက်က ဝမ်မု၏ ခန္ဓာကိုယ်တစ်ခုလုံးကို လွှမ်းမိုးသွားရာ သူ မအောင့်နိုင်ဘဲ ညည်းတွားလိုက်မိသည်။

"အားးး..."

"ကောင်းလိုက်တာ ဝမ်ဖူကွေ့ ရေ"

ဝမ်မုသည် ပြုံးလိုက်ပြီး ကျန်ရှိနေသော နဂါးပုလဲ ၉ လုံးကို လေထဲသို့ မြှောက်တင်ပေး လိုက်သည်။

ဝူးးးး~

ရွှေရောင်အလင်းတစ်ချက် ဖြတ်သွားသည်။

နဂါးပုလဲ ၉ လုံးစလုံးကို ရွှေရောင်ငှက်ကလေးက မျိုချလိုက်သည်။ ၎င်း၏ တောင်ပံများမှာ ပိုမိုတောက်ပလာပြီး နေရောင်အောက်တွင် ပြင်းထန်စွာ လောင်ကျွမ်းနေသကဲ့သို့ ဖြစ်လာသည်။

အလွန်အမင်း ပြင်းထန်သော ဖိအားများက အရပ်မျက်နှာအနှံ့သို့ စီးဆင်းသွားပြီး ရေလှိုင်းများကို ဖြစ်ပေါ်စေသည်။

ရွှေအမြုတေအလယ်အဆင့်

ရွှေအမြုတေနောက်ဆုံးအဆင့်

ရွှေအမြုတေအထွတ်အထိပ်

နတ်သားသန္ဓေဦးအဆင့်

...【ဂုဏ်ယူပါသည် သင်သည် ဝမ်ဖူကွေ့ ထံသို့ ပင်လယ်ထိန်းနဂါးပုလဲ ၁ လုံး အောင်မြင်စွာ ရင်းနှီးမြှုပ်နှံလိုက်ပြီဖြစ်ရာ ရင်းနှီးမြှုပ်နှံမှု အခြေအနေမှာ ၂၀% သို့ ရောက်ရှိသွားပါပြီ။】

... (အဆင့်ဆင့် တိုးတက်မှုများ) ...

【ဂုဏ်ယူပါသည် သင်သည် ဝမ်ဖူကွေ့ အပေါ် အကြွင်းမဲ့ ရင်းနှီးမြှုပ်နှံမှုကို အောင်မြင်စွာ အပြီးသတ်နိုင်ခဲ့ပါပြီ (၁၀၀%)】

【ပိုင်ရှင်သည် ဝမ်ဖူကွေ့၏ နောက်ဆက်တွဲ ကျင့်ကြံမှု ရလဒ်အားလုံးမှ ၁၀၀% ကို ပြန်လည်ရရှိမည် ဖြစ်သည်။】

ဝမ်မုက ပြုံးစိစိဖြင့် ပြောလိုက်သည်။ "မျှော်လင့်ထားတဲ့အတိုင်းပဲ၊ ပိုက်ဆံသုံးပြီး အဆင့်မြှင့်တာက အကောင်းဆုံးပဲ"

အမ်...နေပါဦး..

ရုတ်တရက် ဝမ်မု၏ မျက်နှာပေါ်ရှိ အပြုံးများ အေးခဲသွားသည်။

တစ်ခုခုတော့ မှားနေပြီ

သူ သံသယဖြစ်စရာတစ်ခုကို တွေ့လိုက်ရသည် "စနစ်... ငါက နဂါးပုလဲ ၁၀ လုံးလုံး ရင်းနှီးမြှုပ်နှံပြီး ရင်းနှီးမြှုပ်နှံမှုအခြေအနေကို ၁၀၀% အထိ တွန်းတင်ခဲ့တာလေ။ ငါက သူနဲ့ထပ်တူညီတဲ့ ကျင့်ကြံမှုရလဒ်ကို ရသင့်တာမဟုတ်ဘူးလား"

【မှန်ကန်ပါသည်။】

ဝမ်မု၏မျက်နှာမှာ မည်းမှောင်သွားသည်- "ဒါဆို ရှင်းပြစမ်း။ သူက ရွှေအမြုတေ အလယ်အဆင့်ကနေ နတ်သားသန္ဓေဦးအဆင့်အထိ တစ်ဟုန်ထိုး တက်သွားတာလေ။ ဘာလို့ငါ့ခန္ဓာကိုယ်ထဲက ဝိညာဉ်စွမ်းအင်က ဝိညာဉ်စွမ်းအင်စုဆောင်းခြင်းအဆင့်အဆင့် ၇ လောက်ပဲ ရှိနေရတာလဲ"

"မင်း ငါ့ကို လိမ်လိုက်တာ မဟုတ်လား"

【စနစ်သည် ထိုသို့ မလုပ်ပါ။】

【စနစ်သည် ထိုသို့ လုပ်မည်မဟုတ်ပါ။】

【စနစ်သည် ထိုကဲ့သို့သော အမျိုးအစား မဟုတ်ပါ။ ပိုင်ရှင်အနေဖြင့်စနစ်၏ ဖြူစင်မှုကို အခြေအမြစ်မရှိ စွပ်စွဲခြင်း မပြုပါနှင့်။】

စနစ်၏တုံ့ပြန်မှုကို ကြားသောအခါ ဝမ်မု၏ နှုတ်ခမ်းများ တွန့်သွားသည်: "ဒါဆို ရှင်းပြလေ။ ငါ့ရဲ့ အကျိုးအမြတ်တွေ ဘယ်ရောက်ကုန်တာလဲ"

【ပိုင်ရှင် ကျေးဇူးပြု၍ အထင်မလွဲပါနဲ့။】

【ပြန်အမ်းပေးသည့် လုပ်ငန်းစဉ်တွင် ပြဿနာမရှိပါ။ ပြန်အမ်းလိုက်သော ဝိညာဉ်စွမ်းအင်နှင့် စွမ်းအားများအားလုံးကိုစနစ်မှ သန့်စင်ပေးပြီး ပိုင်ရှင်အတွက် အစစ်မှန်ဆုံးသော မူလဝိညာဉ်စွမ်းအားအဖြစ် ပြောင်းလဲပေးလိုက်ခြင်း ဖြစ်ပါသည်။】

【သန့်စင်နေစဉ်အတွင်း စွမ်းအင်များကို အလွန်အမင်း ဖိသိပ်လိုက်သောကြောင့် အရည်အသွေး သိသိသာသာ မြင့်တက်လာပြီး အရေအတွက် လျော့နည်းသွားခြင်း ဖြစ်သည်။】

【သို့သော် ပိုင်ရှင်၏ဝိညာဉ်စွမ်းအား အရည်အသွေးမှာ ဘေးဒုက္ခရင်ဆိုင်ခြင်းအဆင့်ရှိသော မသေမျိုးများ၏ စွမ်းအားထက်ပင် ပိုမိုသန့်စင်ပါသည်။】

ထိုသို့ဖြစ်နေခြင်းပင်။

လူမျိုးစု၊ ခန္ဓာကိုယ်ဖွဲ့စည်းပုံနှင့် ကျင့်ကြံမှုနည်းစနစ်မတူညီသူများထံမှ ရရှိသော စွမ်းအားများကို ဝမ်မုထံသို့တိုက်ရိုက်ထည့်ပေး၍ မရပေ။ သို့မဟုတ်ပါက ၎င်းတို့ ပဋိပက္ခဖြစ်ပြီး ဝမ်မု၏ခန္ဓာကိုယ် ပေါက်ကွဲသွားနိုင်ပါသည်။

ထို့ပြင် ဝမ်မုသည် ယခုအခါဝိညာဉ်စွမ်းအင်စုဆောင်းခြင်းအဆင့် ၇ သာရှိသော်လည်း သူ၏ စွမ်းအားမှာ အလွန်စင်ကြယ်သဖြင့် ဘေးဒုက္ခရင်ဆိုင်ခြင်းအဆင့်ရှိသူများပင် သူ၏ ကျင့်ကြံမှုကို ထိုးဖောက်မြင်နိုင်မည်မဟုတ်ပေ။ အကယ်၍ တိုက်ပွဲဖြစ်လာပါက အဆင့်တူ ကျင့်ကြံသူများကို ကြက်၊ ဝက် သတ်သကဲ့သို့ အလွယ်တကူ နှိမ်နင်းနိုင်ပေလိမ့်မည်။

ဝမ်မုသည် သူ၏ခန္ဓာကိုယ်အတွင်းရှိ ပြောင်းလဲမှုများကို ခံစားနေစဉ် ကောင်းကင်ယံ၌ ရွှေတောင်ပံဂဠုန်မှာ နောက်ထပ်ပြောင်းလဲမှုတစ်ခု ဖြစ်ပေါ်လာပြန်သည်။ ၎င်း၏ မျက်လုံးများမှ တောက်ပသော အလင်းတန်းများ ထွက်ပေါ်လာပြီး ၎င်း၏နောက်ကွယ်တွင် ပေရာချီကြီးမားသော ဂဠုန်ပုံရိပ်ကြီးတစ်ခု ပေါ်ပေါက်လာသည်။

【ဂုဏ်ယူပါသည်၊ ပိုင်ရှင်၏ရင်းနှီးမြှုပ်နှံမှုဖြစ်သော ဝမ်ဖူကွေ့သည် နဂါးပုလဲများကို စားသုံးပြီး အဆီအနှစ်များကို သန့်စင်လိုက်သဖြင့် ၎င်း၏ သွေးမျိုးဆက် နိုးထသွားကာ ပါရမီမှာ - မသေမျိုးအဆင့် သို့ မြင့်တက်သွားပါပြီ။】

【ဂုဏ်ယူပါသည်၊ သင်သည် ဝမ်ဖူကွေ့ထံမှ ကျင့်ကြံမှုရလဒ် ပြန်အမ်းငွေကို ရရှိခဲ့ပါသည်။】

【ဂုဏ်ယူပါသည်၊ သင်သည် ရွှေတောင်ပံ ဂဠုန်၏သွေးမျိုးဆက်ကိုရရှိပြီး ပိုင်ရှင်၏ကိုယ်ပိုင်သွေးနှင့် အပြည့်အဝ ပေါင်းစပ်သွားပါပြီ။ အမြန်နှုန်း၊ ခွန်အားနှင့် အခြားသော အရည်အသွေးများအားလုံး တိုးတက်လာပါသည်။】

【ဂုဏ်ယူပါသည်၊ သင်သည် ရွှေတောင်ပံ ဂဠုန်မျိုးနွယ်၏ အမွေအနှစ်ကျွမ်းကျင်မှုများကို ရရှိပါသည် - ဂဠုန်အသက်ရှူနည်းစနစ်၊ ရွှေရောင်အလင်းရိပ်ရှောင်ကွင်းခြင်း၊ ဂဠုန်၏နဂါးသတ်ပညာရပ်။】