အခန်း (၁၉)  အခြေခံတည်ဆောက်ခြင်းအဆင့်သို့ ရောက်ရှိခြင်း

【တိန်း~】

【ဂုဏ်ယူပါသည် သင်သည် လီယွမ်ဟွာ အပေါ် ကျင့်ကြံခြင်းနားလည်မှု လက်ဖက်ရည်ကို အောင်မြင်စွာ ရင်းနှီးမြှုပ်နှံနိုင်ခဲ့ပါသည်။ ရင်းနှီးမြှုပ်နှံမှု တိုးတက်မှုနှုန်း ၃၀% သို့ ရောက်ရှိသွားပါပြီ】

【လီယွမ်ဟွာ၏ အနာဂတ် ကျင့်ကြံမှု အကျိုးအမြတ် ပြန်အမ်းငွေ ၃၀% ကို သင် ရရှိပါတော့မည်】

စနစ်၏ ရင်းနှီးမြှုပ်နှံမှု အခက်အခဲမှာ ပစ်မှတ်၏ အစွမ်း၊ အလားအလာနှင့် ပိုင်ဆိုင်မှုစသည့် အချက်များပေါ်တွင် မူတည်သည်။

နန်းနန်းလေးမှာ လက်ရှိတွင် အားနည်းသော်လည်း သူမ၏အလားအလာမှာ ကြောက်ခမန်းလိမ္မာ ကောင်းမွန်လှသဖြင့် ရင်းနှီးမြှုပ်နှံရန် ပို၍ ခက်ခဲသည်။ ထို့ကြောင့် သူမအတွက် ကျင့်ကြံခြင်းနားလည်မှု လက်ဖက်ခြောက် တစ်ပိဿာကျော် ကုန်ဆုံးခဲ့ရခြင်း ဖြစ်သည်။

အမှန်စင်စစ် ကံကြမ္မာသားတော်တိုင်းမှာ ဤသို့ပင် ဖြစ်သည်။ သာမန်လူတစ်ယောက်ကို ပေးလျှင် ပြည့်သွားမည့် ရတနာမျိုးသည် သူတို့အတွက်ဆိုလျှင် တိုးတက်မှု အနည်းငယ်သာ ရှိတတ်သည်။

ဥပမာအားဖြင့် လင်းယန် ကြည့်ပါ။ ပင်လယ်ဝိညာဉ်မီးလျှံကဲ့သို့ ရှားပါးလှသော ရတနာကို ပေးခဲ့သော်လည်း တိုးတက်မှု ၃၀% သာ ရရှိခဲ့သည်။

လီယွမ်ဟွာမှာမူ အစွမ်းထက်သော်လည်း အသက်ကြီးပြီ ဖြစ်သဖြင့် သူ၏ အလားအလာမှာ ကုန်ဆုံးလုနီးပါး ဖြစ်နေပြီ။ ထို့ကြောင့် လက်ဖက်ခြောက် အနည်းငယ်နှင့်ပင် ၃၀% အထိ ရောက်သွားခြင်း ဖြစ်သည်။

ဤနှိုင်းယှဉ်ချက်အရ ဝမ်မုသည် သူ၏ ပိုက်စိပ်တိုက် ရင်းနှီးမြှုပ်နှံမှုနည်းဗျူဟာမှာ မှန်ကန်ကြောင်း ပို၍ ယုံကြည်သွားသည်။ အကယ်၍ ကံကြမ္မသားတော်များချည်းပဲ ရင်းနှီးမြှုပ်နှံမည်ဆိုပါက လန်ယာကုန်သည်အဖွဲ့၏ အရင်းအမြစ်များပင်လျှင် လောက်ငှမည် မဟုတ်ပေ။

ဝိုး—

ရုတ်တရက် လူအုပ်ကြီးဆီမှ အံ့ဩသံများ ထွက်ပေါ်လာသဖြင့် ဝမ်မု အတွေးစပြတ်သွားသည်။

သူ ကြည့်လိုက်သောအခါ စစ်ဆေးရေးကွင်းထဲတွင် အဆင့်မြှင့်မီးဝိညာဉ်အမြစ် ပိုင်ရှင် ပါရမီရှင်တစ်ဦးကို တွေ့ရှိထားခြင်း ဖြစ်သည်။

အထူးအဆင့်ဝိညာဉ်အမြစ် ဆိုသည်မှာ နတ်ဘုရားသန္ဓေအဆင့်အထိ ရောက်နိုင်သော အလားအလာ ရှိသည်။ ဒါက တကယ့်ကို ထူးခြားလှပေသည်။

"ဒီရက်ပိုင်းအတွင်း လူဘယ်လောက် စစ်ဆေးပြီးပြီလဲ" ဟု ဝမ်မုက မေးလိုက်သည်။

"သတင်းပို့ပါတယ် သခင်လေး၊ လွန်ခဲ့တဲ့ ခုနစ်ရက်အတွင်း ငါးသိန်းရှစ်ထောင်ကျော် စစ်ဆေးပြီးပါပြီ!" ဟု လီယွမ်ဟွာက ချက်ချင်း ပြန်ဖြေသည်။

"လူငါးသိန်းမှာမှ အထူးအဆင့် တစ်ယောက်ပဲလား" ဝမ်မုက မေးစေ့ကို ပွတ်ရင်း ရေရွတ်လိုက်သည်။

သို့သော် လီယွမ်ဟွာကတော့ အကောင်းမြင်နေဆဲပင် - "ဒါက တကယ့်ကို ကောင်းမွန်တဲ့ ရလဒ်ပါ အရင်နှစ်တွေကဆိုရင် ဒီကျွန်းတစ်ခုလုံးကို ရှာရင်တောင် ဆယ်စုနှစ်တစ်ခုမှာ တစ်ယောက်တွေ့ဖို့ မလွယ်ပါဘူး။ ဒါဟာ သခင်လေးရဲ့ ကံကောင်းခြင်းတွေကြောင့်ပါ"

ဝမ်မုက ပြုံးရုံသာ ပြုံးနေလိုက်သည်။ သူ သိသည်မှာ သူ့ကဲ့သို့တစ်အိမ်တက်ဆင်း စစ်ဆေးပေးခြင်းမျိုး မရှိခဲ့လျှင် ဤပါရမီရှင်များမှာ သာမန်လူသားများအဖြစ်သာ ဘဝကုန်ဆုံးသွားကြမည် ဖြစ်သည်။

ထူးခြားသည်မှာ ယခင်က အဆင့်မြင့်ဝိညာဉ်အမြစ်များ ပေါ်လာစဉ်က အလုအယက် ဖြစ်နေကြသော ဂိုဏ်းကြီးများမှာ ယခု အထူးအဆင့် ပေါ်လာသောအခါ ငြိမ်သက်နေကြခြင်းပင်။

"ဘာလို့ သူတို့တွေ မလုကြတာလဲ" ဟု လူအုပ်ထဲမှ တစ်ယောက်က မေးသည်။

"လုရဲပါ့မလားကွာ အဆင့်မြင့်တို့၊ အလယ်အလတ်တို့ကိုတော့ ဝမ်သခင်လေးက ဂရုမစိုက်လို့ ထားပေးတာ ဖြစ်နိုင်ပေမဲ့ အခုလို အထူးအဆင့် ပါရမီရှင်ကိုတော့ ဝမ်မိသားစုကပဲ ယူမှာပေါ့" ဟု အခြားတစ်ယောက်က ခန့်မှန်းလိုက်သည်။

ဝမ်မုက ထိုစကားများကို ကြားသောအခါ ရယ်မောလိုက်ပြီး - "သတင်းလွှင့်လိုက်စမ်း သူတို့ ကြိုက်သလောက် လုခွင့်ရှိတယ်လို့။ ငါ ဝမ်မု စကားအတိုင်းပဲ၊ ဒီပွဲကို ကျင်းပတာက ပါရမီရှိတဲ့သူတိုင်း ကျင့်ကြံခွင့်ရဖို့ပဲ၊ ဝမ်မိသားစုအတွက် မဟုတ်ဘူး"

လီယွမ်ဟွာက အံ့ဩသွားသည် - "တကယ်ကြီး လွှတ်ပေးမှာလား သခင်လေး"

"လွှတ်ပေးလိုက်ပါ။"

ထိုသတင်း ပျံ့သွားသောအခါ ရင်ပြင်တစ်ခုလုံး ဆူညံသွားတော့သည်။

"ဝမ်သခင်လေးက တကယ့် လူကြီးလူကောင်းပဲ"

"သူက တကယ့်ကို ပြောင်းလဲသွားပြီပဲ"

"ငါ့ရဲ့လျှပ်စီးဂိုဏ်းက ဂိုဏ်းသားအဆင့်နဲ့ ဒီပါရမီရှင်ကို ဖိတ်ခေါ်ပါတယ်"

"ငါတို့ ထိုက်ဟွာဂိုဏ်းကတော့ နတ်ဘုရားသန္ဓေအဆင့် ဆရာကြီးကိုယ်တိုင် တိုက်ရိုက် တပည့်အဖြစ် သင်ကြားပေးမှာပါ"

ဂိုဏ်းကြီးများမှာ အလုအယက် ကမ်းလှမ်းချက်များ ပေးကြတော့သည်။

"ဘာလဲ... မင်းတို့ လီမိသားစုကရော ဒီပါရမီရှင်ကို စိတ်မဝင်စားဘူးလား" ဟု ဝမ်မုက ဘေးက လီယွမ်ဟွာကို မေးလိုက်သည်။

"စိတ်ဝင်စားတာပေါ့ခင်ဗျာ ဒါပေမဲ့ သခင်လေးက ဂိုဏ်းတွေကို လွတ်လွတ်လပ်လပ် ယှဉ်ပြိုင်ခိုင်းထားမှတော့ ကျွန်တော်မျိုးတို့ ဝင်ရှုပ်ရင် သခင်လေးရဲ့စီမံကိန်းကို ပျက်စီးမှာ စိုးလို့ပါ" ဟု လီယွမ်ဟွာက လိမ္မာပါးနပ်စွာ ဖြေသည်။

အမှန်စင်စစ် လီမိသားစုဝင်များထဲတွင်လည်း လက်ရှိ၌ အထူးအဆင့် ဝိညာဉ်အမြစ် ရှိသူ မရှိပေ။ သို့သော် လီယွမ်ဟွာမှာ ဝမ်မု၏မျက်နှာကို ကြည့်နေရသူဖြစ်သဖြင့် မဝင်ရဲခြင်း ဖြစ်သည်။

ဝမ်မုက ပြုံးရုံသာ ပြုံးနေလိုက်သည်။ သူကတော့ လီမိသားစု ဝင်ပြိုင်လည်း ကိစ္စမရှိပေ။ သို့သော် ပြင်ပလူများအမြင်တွင် လီမိသားစုမှာ ဝမ်မု၏ လက်အောက်ခံကဲ့သို့ ဖြစ်နေသဖြင့် လီမိသားစုက ယူလိုက်လျှင် ဝမ်မုကိုယ်တိုင် ယူလိုက်သကဲ့သို့ အထင်ခံရမည်ကို လီယွမ်ဟွာက စိုးရိမ်ခြင်း ဖြစ်သည်။ ဝမ်မုအတွက်ကတော့ အခုအချိန်မှာ နာမည်ကောင်း ပြန်တည်ဆောက်ဖို့က ပိုအရေးကြီးသည်။

နောက်ဆုံးတွင် သတ္တမမြောက်နေ့ ပွဲတော် ပြီးဆုံးသွားခဲ့သည်။

ဝမ်မုနန်းတော်အတွင်းပိုင်းသို့ပြန်ရောက်သောအခါ... ရုတ်တရက်သူ၏ဝမ်းဗိုက်ထဲမှအပူရှိန်တစ်ခုတက်လာသည်။ဝိညာဉ်စွမ်းအင်အမြောက်အမြားမှာသူ၏ခန္ဓာကိုယ်အတွင်းမှပေါက်ကွဲထွက်လာသဖြင့်ဘေးရှိလီယွမ်ဟွာနှင့်ဇီရှားတို့ပင်လန့်သွားကြတော့သည်။