အခန်း (၁၇၁) - ငါထန်ချန်းရဲ့အကောင့်ကို ပိတ်လို့မရဘူး

“အဓိပ္ပာယ်မရှိလိုက်တာ တကယ့်ကို အဓိပ္ပာယ်မရှိတာပဲ”

သူသည် ဒေါသကြောင့် တုန်ရီနေကာ လက်သီးကို ကျစ်ကျစ်ပါအောင် ဆုပ်ထားမိသည် - “ဒီလို အောက်ခြေကျင့်ကြံသူတစ်သိုက်က ငါ့ကိုဆဲရဲတယ်ပေါ့ မင်းတို့တွေ သေတွင်းတူးနေကြတာပဲ”

အကယ်၍ သူတို့က သူ့ကို ရုပ်ဆိုးသည်၊ ကျင့်ကြံမှုနိမ့်သည်၊ ပါရမီမရှိ သို့မဟုတ် ပိုက်ဆံမရှိဟု ဆဲဆိုလျှင် သူ ဂရုစိုက်မည် မဟုတ်ပေ။

သို့သော် သူ့တွင်အမေမရှိဟု ပြောခြင်းနှင့် အိမ်ထောင်ဖက်မိသားစုမှာ ကပ်နေရတဲ့ သမက်ဟု ခေါ်ဆိုခြင်းကိုတော့ သူ လုံးဝ သည်းမခံနိုင်ပေ။

ဒါသည် သူ၏ စရိုက်လက္ခဏာမှအစ ရုပ်ရည်အဆုံး တစ်ကိုယ်ရည်လုံးကို စော်ကားလိုက်ခြင်းပင် ဖြစ်သည်။

ဒါကိုမှ သည်းခံနိုင်ရင် ဘာကိုမှသည်းခံနိုင်တော့မှာ မဟုတ်ဘူး။

ကံမကောင်းစွာဖြင့် သူမည်မျှပင် ဒေါသထွက်နေပါစေ ဆက်သွယ်ရေးအဆောင်မှတစ်ဆင့် ဖိုရမ်ပေါ်တွင် သူ့ကို ဆဲနေသူများကို လိုက်သတ်၍မရပေ။ ဖိုရမ်ပေါ်မှ အချေအတင် စကားများခြင်းမှာ မျက်နှာပြင်ပေါ်တွင်သာ ကျန်ရစ်ခဲ့သည်။

သူသည် အသက်ပြင်းပြင်းရှူကာ ဆက်လက် တုံ့ပြန်လိုက်သည် - “ဦးနှောက်မရှိတဲ့ အရူးတစ်သိုက်ပဲ ငါ့အမြင်မှာတော့ အဲဒီလင်းယန်ဆိုတဲ့လူက လန်ယာကုန်သည်အသင်းက ကြိုတင်စီစဉ်ထားတဲ့ ရုပ်သေးရုပ်ပဲ။

ဒီသန်း ၈၀ ကျော်ဆိုတာ လန်ယာကုန်သည်အသင်းက ဘယ်ဘက်လက်ကနေ ညာဘက်လက်ထဲကို ပိုက်ဆံပြောင်းပြတာပဲ။

မင်းတို့လို အရူးတွေကို လှည့်စားဖို့သုံးတာ နောက်ဆုံးအနေနဲ့ ငါ့ကို ဆဲထားတာတွေကို ပြန်ရုပ်သိမ်းဖို့ သတိပေးလိုက်မယ် မဟုတ်ရင်တော့ မင်းတို့ ကိုယ့်သေတွင်းကိုယ့်တူးတာပဲ”

: ဟားဟားဟား ရယ်ရလွန်းလို့ ဗိုက်တောင်နာတယ်။ သေတွင်းတူးတယ်ဟုတ်လား ထန်ကျန့် ကျမ်းစာတွေ ဖတ်တာများသွားပြီလား မင်းကိုယ်မင်း ထန်တတိယလို့ မှတ်နေတာလား။မင်းအမေကိုပဲ..........။

: ကိုယ့်ကိုယ်ကိုယ် အဟုတ်ကြီးမှတ်နေတဲ့ကောင် ရေပန်းစားနေတဲ့ပို့စ်တွေထဲက နံပါတ် ၃ကို သွားဖတ်ကြည့်ဖို့ ငါ အကြံပေးချင်တယ်။

အဲဒါဖတ်ပြီးရင် လင်းယန်က ဘယ်လိုလူလဲဆိုတာ မင်းသိသွားလိမ့်မယ် တစ်ချိန်တည်းမှာပဲ ဝမ်မိသားစုသခင်လေးရဲ့ စိတ်ဓာတ်က မင်းလို ရေမြောင်းထဲက ကြွက်နဲ့ ယှဉ်လို့မရအောင် ဘယ်လောက်မြင့်မြတ်သလဲဆိုတာ သိသွားလိမ့်မယ်။

ထိုတုံ့ပြန်မှုများကို မြင်လိုက်ရသောအခါ ထန်ချန်းမှာ ဒေါသကြောင့် အဆုတ်ပင် ပေါက်ထွက်မတတ် ဖြစ်သွားသည်။

ငါက ထန်တတိယဟုတ်လား တကယ့်ဟာသပဲ တကယ်တော့ အဲဒီထန်တတိယဆိုတာ ငါပဲလေ သူက ငါ့ရဲ့အရိပ်ပဲ မင်းတို့တွေ နားလည်ကြရဲ့လား။

ထို့ပြင်

ထန်သန်းချီ : ငါ့အမေကို ဆဲတာ ရပ်လိုက်စမ်း  မဟုတ်ရင် ငါမင်းတို့ရဲ့တန်ဆာတွေကိုဖြတ်ပစ်မယ်။

【သင်၏ မှတ်ချက်တွင် မသင့်လျော်သော စကားလုံးများနှင့် တားမြစ်ထားသော စကားလုံးများ ပါဝင်နေသည်။ ကျေးဇူးပြု၍ စစ်ဆေးပြီး ထပ်မံကြိုးစားပါ】

ထန်သန်းချီ : ကြောက်တတ်တဲ့ ကြွက်တွေ၊ မင်းတို့ နာမည်နဲ့ နေရပ်ကို ပြောစမ်း။ မင်းတို့ တစ်မိသားစုလုံးကို ငါ လာသတ်မယ်။

【သင်၏မှတ်ချက်တွင် မသင့်လျော်သော စကားလုံးများနှင့် တားမြစ်ထားသော စကားလုံးများ ပါဝင်နေသည်။ ကျေးဇူးပြု၍ စစ်ဆေးပြီး ထပ်မံကြိုးစားပါ】

【သတိပေးချက် - စည်းကမ်းဖောက်ဖျက်မှု အကြိမ်ကြိမ် တွေ့ရှိရသည်။ ကျေးဇူးပြု၍ ဖိုရမ်လမ်းညွှန်ချက်များကို လိုက်နာပြီး ယဉ်ကျေးသော စကားလုံးများကို သုံးပါ။ ဆက်လက်ဖောက်ဖျက်ပါက ဖိုရမ်မှ အနည်းဆုံး ၃ ရက် အကောင့်ပိတ်ပြစ်ဒဏ် ပေးပါမည်】

ထန်ချန် : “...”

သူသည် အသက်ပြင်းပြင်းရှူကာ ထပ်မံတင်ရန် မကြိုးစားတော့ပေ။ နောက်ဆုံးတွင် သူ လုပ်စရာအလုပ်များ ရှိနေသေးသည်။

အကောင့်ပိတ်ခံရလျှင်မကောင်းပေ ထို့ပြင် သိက္ခာရှိလှသော ထန်တတိယမဟုတ်ဘူး၊ သိက္ခာရှိသော ထန်ချန်းတစ်ယောက် အကောင့်ပိတ်ခံရသည်ဆိုလျှင် ဘယ်လို ဖြစ်သွားမလဲ။

ထို့ကြောင့် ထိုအရူးနှစ်ယောက်ကို ယာယီ လွှတ်ပေးထားရန် သူ ဆုံးဖြတ်လိုက်သည်။ သူသည် ပို့စ်ထဲမှ ထွက်ကာ ရေပန်းစားနေသည့် စာရင်းမှ နံပါတ် ၃ ကို ဖွင့်လိုက်သည်။

ချက်ချင်းပင် 【အံ့ဩစရာပဲ လမ်းပြထီ ပထမဆုရှင်က တကယ်တော့ သူပဲလား】ဆိုသည့် ပို့စ်က သူ၏ အာရုံကို ဖမ်းစားသွားသည်။ ထန်ချန်းက မျက်မှောင်ကြုတ်ကာ နှိပ်ကြည့်လိုက်သည်။

ပို့စ်အတွင်း၌ လင်းယန်၏ ဘဝဇာတ်ကြောင်းကို အသေးစိတ် ရေးသားထားသည်။

အထူးသဖြင့် လင်းယန်နှင့် ဝမ်မုတို့အကြားရှိ ရန်ငြိုးကို ပိုမိုအသေးစိတ် ရေးထားသည်။

အကျဉ်းချုပ်မှာ။

လင်းယန်သည် ငယ်စဉ်ကတည်းက မြောက်ပိုင်းမှောင်မိုက်သန့်စင်နယ်မြေသို့ ဝင်ရောက်ခဲ့ပြီး အတွင်းစည်းတပည့် ဖြစ်လာကာ အနာဂတ် တောက်ပနေသူ ဖြစ်သည်။

သို့သော် သူ၏စေ့စပ်ထားသူ အမျိုးသမီးမှာ အပေါ်ယံမက်မောသူ ဖြစ်ပြီး ဝမ်မိသားစု သခင်လေးနှင့် ဆုံတွေ့ပြီးနောက် သူ့နောက်သို့ အတင်းလိုက်ခဲ့သည်။

ဝမ်မိသားစု သခင်လေးက ထိုအမျိုးသမီး၏ စရိုက်ကို မြင်သဖြင့် လင်းယန်ကို စေ့စပ်ပွဲဖျက်ရန် အကြံပေးခဲ့သည်။ သို့သော် လင်းယန်က ထောင်လွှားပြီး ဝမ်မိသားစု သခင်လေးက သူ့ကို အနိုင်ကျင့်သည်ဟု ထင်ကာ လူရှေ့တွင် သခင်လေးကို တိုက်ခိုက်ခဲ့သည်။

ရလဒ်မှာ သူသည် ဝမ်မိသားစု သခင်လေးအနီးရှိ ပညာရှင်များ၏နှိမ်နင်းခြင်းကို ခံရကာ ကျင့်ကြံမှု ဖျက်ဆီးခံရပြီး အောက်ခြေတပည့်အဖြစ် လျော့ချခံခဲ့ရသည်။

နောက်ပိုင်းတွင် လင်းယန်က ထိုနေရာမှ ထွက်ပြေးလွတ်မြောက်သွားပြီး ပျောက်ကွယ်သွားခဲ့သည်။ မည်သူကမှ ထင်မှတ်မထားဘဲ အခုတော့ ဝိညာဉ်ကျောက်တုံး သန်း ၈၀ ဆုကြီးကို သူကပဲ ဆွတ်ခူးသွားခဲ့ခြင်း ဖြစ်သည်။

ဒါက တကယ့်ကို တိုက်ဆိုင်လွန်းလှသည်ဟု ဆိုရမည်။ မှတ်ချက်များမှာလည်း အလွန်ပင် ဆူညံနေသည်။

: ဒီလို အတိတ်ကြောင်း ရှိခဲ့မယ်လို့ မထင်ထားဘူး။

: ဒီလင်းယန်ကလည်း ကျေးဇူးမသိတတ်ဘူး။ ဝမ်မိသားစု သခင်လေးက သူ့အတွက် စေတနာနဲ့ လုပ်ပေးတာကို သူက အသိအမှတ်မပြုဘူး။

: အပေါ်ကလူ ပြောတာ ထူးဆန်းနေပေမဲ့ မှန်တယ်လို့ ငါထင်တယ်။

: ငါ့အမြင်မှာတော့ ဝမ်မိသားစု သခင်လေးက တကယ့်ကို သဘောထားကြီးတာပဲ။ မဟုတ်ရင် သာမန်အတွင်းစည်းတပည့်တစ်ယောက်က သခင်လေးကို တိုက်ခိုက်တာ ကျင့်ကြံမှု ဖျက်ဆီးခံရရုံနဲ့ မပြီးဘူး။

: မှန်တယ်၊ နောက်ပြီး သူ့ဒဏ်ရာတွေ ပြန်ကောင်းလာပြီး ကျင့်ကြံနိုင်တာကို ကြည့်ရင် သခင်လေးက အစွမ်းကုန် မလုပ်ခဲ့ဘူးဆိုတာ သိသာတယ်။

ထန်ချန်၏ မျက်နှာမှာ တွန့်လိမ်သွားပြီး လက်သီးကို ထပ်မံဆုပ်လိုက်မိသည်။ သူသည် ဝေဖန်မှုအချို့ ဖြစ်အောင် လုပ်ချင်ခဲ့ခြင်း ဖြစ်သည်။

လန်ယာကုန်သည်အသင်း၏ နာမည်ကြီးမှုကို လျော့ကျအောင် လုပ်ချင်ခဲ့သည်။ လူအနည်းငယ်က လမ်းပြထီကို သံသယဝင်လာလျှင်ပင် ကောင်းမွန်သော အရာတစ်ခု ဖြစ်လိမ့်မည်။

သို့သော် သူထင်မှတ်မထားဘဲ ထပ်မံ၍ ကျရှုံးခဲ့ရပြန်သည်။ သူသည် စိတ်ပျက်လက်ပျက်ဖြင့် ဖိုရမ်မှ ထွက်ကာ ရှန်းလျောင်ကို ဖွင့်လိုက်သည်။

ထန်သန်းချီ : မမ တစ်ယောက်ယောက်က ကျွန်တော့်ကို ဆဲနေတယ်။

တစ်ချိန်တည်းမှာပင် အခြားသော ပို့စ်များတွင်လည်း လမ်းပြထီနှင့် ပတ်သက်၍ ဆွေးနွေးမှုများမှာ အထွက်အထိပ်သို့ ရောက်နေသည်။

ဆုကြေးများအပြင် လန်ဟွမ်ကျောက်စိမ်းဆောင်၏ ဆုရှင်များအပေါ် ကာကွယ်ပေးမှုများကိုလည်း လူအများက ချီးကျူးနေကြသည်။

: မယုံနိုင်စရာပဲ။ လင်းယန်က သန်း ၈၀ ကျော် ယူသွားတာ ဘယ်သူမှလိုက်မနှောင့်ယှက်ဘူးလား။

: မင်း လန်ဟွမ်ကျောက်စိမ်းဆောင်ကို မသွားခဲ့ဘူးထင်တယ်။ သူတို့က ဆုရှင်အားလုံး လုံခြုံဖို့အတွက် ပညာရှင်တွေကို သီးသန့် စီစဉ်ပေးထားတာ။ ဆုအများကြီး ပေါက်ရင် ထွက်ပြေးဖို့အဆောင်တွေကိုတောင် လက်ဆောင်ပေးတာတဲ့။

: လန်ယာကုန်သည်အသင်းကတော့ အမြဲတမ်း စေ့စပ်သေချာတာပဲ။ ကျွန်တော် ဝိညာဉ်ကျောက်တုံး ၆၀ ကျော် ပေါက်တာတောင် အိမ်ပြန်ဖို့ ကြောက်နေတာ ဒါပေမဲ့ သူတို့က ပညာရှင်တွေနဲ့ ကာကွယ်ပေးတယ် တကယ့်ကို အိပ်မက်တောင် မမက်ဖူးတဲ့ အရာပဲ။