​အခန်း (၁၇)  ထန်ချန်၏အတိတ်

​"အစ်မ... အစ်မ မရှိတော့ဘူး... အဖေနဲ့ အမေလည်း မရှိတော့ဘူး၊ လူဆိုးတွေ သတ်ပစ်လိုက်တာ"

​နန်းနန်းလေးက နှုတ်ခမ်းလေးကို တင်းတင်းစေ့ထားသော်လည်း မျက်ရည်များက ဝေါခနဲ ကျလာတော့သည်။ ဝမ်မုက ရှုပ်ထွေးသော မျက်နှာပေးဖြင့် ကောင်မလေးကို နှစ်သိမ့်ရန် သူမ၏ ပုခုံးလေးကို ညင်သာစွာ ပုတ်ပေးလိုက်သည်။

​နန်းနန်းလေးတွင် မူလက ပျော်ရွှင်စရာ မိသားစုလေး ရှိခဲ့သည်။ အစ်မတစ်ယောက်နှင့် မိဘနှစ်ပါး ရှိပြီး ကျွန်းငယ်လေးတစ်ခုတွင် ငါးဖမ်းရင်း အေးအေးချမ်းချမ်း နေထိုင်ခဲ့ကြသည်။ သို့သော် တစ်နေ့တွင် သူမ၏မိသားစုတစ်ခုလုံးမှာ ရက်ရက်စက်စက် သတ်ဖြတ်ခံလိုက်ရသည်။ ထိုသတ်ဖြတ်သူမှာ သာမန်လူသတ်သမား မဟုတ်ဘဲ ဝိညာဉ်ကိုပါ အစပျောက်အောင် ဖျက်ဆီးပစ်နိုင်သည့် ရက်စက်လှသော ကျင့်ကြံသူတစ်ဦး ဖြစ်သည်။

​လီယွမ်ဟွာ၏ စုံစမ်းချက်အရ ထိုကျွန်းငယ်လေးမှာ အလွန်ဝေးလံသဖြင့် နန်းနန်းလေး တစ်ယောက်တည်းသာ ကံကောင်းထောက်မစွာ လွတ်မြောက်လာခဲ့ခြင်း ဖြစ်သည်။

​သူမက ဘာလို့ကံမကောင်းဘဲနေမလဲ ဝမ်မု စိတ်ထဲတွင် သက်ပြင်းချလိုက်သည်။ ဒါက ဇာတ်လမ်းထဲကအတိုင်း ကံကြမ္မာသားတော် (သို့မဟုတ်) သမီးတော်တို့ရဲ့ဝမ်းနည်းစရာ အတိတ်ဇာတ်ကြောင်းတွေပဲ။

​နန်းနန်းလေးက သူမ၏အတိတ်ကို ဆက်ပြောပြသည်။ အစကတော့ သူမ၏အစ်မဖြစ်သူက ကမ်းခြေမှာ ဒဏ်ရာပြင်းထန်စွာ ရနေသော အမျိုးသားတစ်ဦးကို ကယ်တင်ခဲ့ရာမှ စတင်ခဲ့ခြင်းဖြစ်သည်။ ထိုအမျိုးသားကို သူတို့မိသားစုက ပြုစုစောင့်ရှောက်ပေးခဲ့ပြီး နောက်ဆုံးတွင် အစ်မဖြစ်သူနှင့် လက်ထပ်ကာကိုယ်ဝန်ပင် ရခဲ့သည်။ နောက်ပိုင်းတွင် ထိုအမျိုးသားက လမ်းစဉ်ရှာဖွေရန်ဟု ဆိုကာ ထွက်ခွာသွားပြီး မိသားစုကို လာခေါ်မည်ဟု ကတိပေးခဲ့သည်။

​သို့သော် သူပြန်လာသည့်နေ့မှာတော့ မိသားစုအတွက် ငရဲခန်းပင်။ ကိုယ်ဝန်အရင့်အမာနှင့် သူမ၏အစ်မကို ခေါင်းဖြတ်သတ်ပြီး အရိုးတွေကိုပင် ချေမှုန်းပစ်ခဲ့သည်။

​"အဲဒီလူရဲ့ နာမည်ကို မင်းမှတ်မိသေးလား"

​"မှတ်မိတာပေါ့" နန်းနန်းလေးက သွားကြိတ်ကာ ပြောလိုက်သည် - "သူ့နာမည်က ထန်ချန် တဲ့"

​ဝမ်မုတစ်ယောက် အံ့ဩလွန်း၍ လျှာပင်သပ်မိသွားသည်။ လောကကြီးမှာ ဒီလိုတိုက်ဆိုင်မှုတွေ ရှိနေပါလား။

​အတိတ်တုန်းက ဝမ်မု၏မိခင် လော့ရွှမ်းရှန်း သည် ဝမ်မု၏ကိုယ်ထဲက ကျိန်စာကို ဖြေရှင်းရန် မိစ္ဆာနတ်ဘုရားတစ်ပါးကို သတ်ခဲ့ဖူးသည်။ ထိုမိစ္ဆာနတ်ဘုရားမှာ လူသားတစ်ဦးနှင့်ရရှိထားသောသားက ကံကောင်းထောက်မစွာဖြင့် ပိန်းလိုင်ကုန်သည်အဖွဲ့ သို့ ရောက်ရှိသွားပြီး သမက်ဖြစ်လာခဲ့သည်။ ထိုသူ၏ နာမည်မှာလည်း ထန်ချန်ပင် ဖြစ်သည်။

​ဝမ်မုက လက်ယမ်းလိုက်သောအခါ ပုံတူပန်းချီကားတစ်ချပ် ပေါ်လာသည် - "သူလား"

​"ဟုတ်... သူပဲ" နန်းနန်းလေးက ထိုမျက်နှာကို မြင်သည်နှင့် မီးဟုန်းဟုန်းတောက်နေသော အမုန်းတရားများဖြင့် ကြည့်လိုက်သည်။

​အရာအားလုံး ရှင်းသွားပြီ။ ထန်ချန်သည် ဝမ်မိသားစုကို ကလဲ့စားချေရန် ကြိုးစားနေစဉ် ပိန်းလိုင်ကုန်သည်အဖွဲ့၏သမီးတော်နှင့် တွေ့ဆုံခဲ့သည်။ အကယ်၍ သူအိမ်ထောင်ရှိကြောင်း၊ ဇနီးမှာ ကိုယ်ဝန်ရှိနေကြောင်း ပိန်းလိုင်ကုန်သည်အဖွဲ့က သိသွားလျှင် သူ၏ အနာဂတ်မှာ ပျက်စီးသွားပေလိမ့်မည်။ ထို့ကြောင့် နှုတ်ပိတ်ခြင်း အနေဖြင့် သူ၏ဇနီးနှင့် မိသားစုကို ကိုယ်တိုင်သတ်ပစ်ခဲ့ခြင်း ဖြစ်သည်။

​"တိရစ္ဆာန်ထက် ယုတ်မာတဲ့ကောင်ပဲ" ဝမ်မုက ထန်ချန်၏ ပုံကိုကြည့်ပြီး အော်ဆဲလိုက်သည် - "ငါ ဝမ်မုကတော့ ဒီလို လူယုတ်မာမျိုးနဲ့ တစ်မိုးတည်းအောက်မှာ အတူမနေနိုင်ဘူး"

​နန်းနန်းလေးက စိုးရိမ်တကြီးဖြင့် - "ဒါပေမဲ့ အဲဒီလူက အခု အရမ်း အစွမ်းထက်နေပြီလေ"

​ဝမ်မုက နှာခေါင်းရှုံ့လိုက်သည် - "ဘယ်လောက်ပဲ အစွမ်းထက်ပါစေ၊ သူ့ထက်သာတဲ့ ပါရမီရှင် တွေ ရှိလာမှာပဲ ငါက ငါ့ကိုယ်ငါ ပြောတာမဟုတ်ဘူး၊ မင်းကို ပြောတာ"

​"သမီး သမီး... ဖြစ်နိုင်ပါ့မလား" နန်းနန်းလေးက အဆင့်နိမ့် ပါရမီရှင်တစ်ဦးအဖြစ် မိမိကိုယ်ကိုယ် ယုံကြည်မှု မရှိဘဲ ခေါင်းငုံ့သွားသည်။

​ဝမ်မုက ပြုံးလျက် - "မင်းက အဆင့်နိမ့်ဝိညာဉ်အမြစ်ဖြစ်ပေမဲ့ မွေးရာပါကျင့်ကြံခြင်းနားလည်မှု နတ်ဘုရားနှလုံးသား ပါလာတာ။ နည်းနည်းလောက် လမ်းပြပေးလိုက်ရင် မင်းက နဂါးတစ်ကောင်လို ပျံတက်သွားမှာပဲ"

​"ရှင်... သမီးကို လိမ်နေတာ မဟုတ်ဘူးမလား"

​ဝမ်မုက ရယ်မောကာ ဇီရှားကို ညွှန်ပြလိုက်သည် - "သူက ငါ့အနားမှာ ငယ်ငယ်ကတည်းက ရှိနေတဲ့သူပဲ။ ဇီရှား... မင်းရဲ့ရင်ဘတ်ကို လက်နဲ့ဖိပြီး ပြောစမ်း၊ ငါ တစ်ခါလောက်တောင် လူလိမ်ဖူးသလား"

​ဇီရှား: "..."

သူမသည် နန်းနန်းလေးကို တစ်ချက်ကြည့်၊ ဝမ်မုကို တစ်ချက်ကြည့်ပြီးနောက် - "တစ်ခါမှ မလိမ်ဖူးပါဘူး၊ သခင်လေးက ကမ္ဘာပေါ်မှာ အရိုးသားဆုံး လူသားပါ" ဟု ပြောပြီးနောက် အမြန်ကျောခိုင်းကာ ရင်ဘတ်ကို ဖိထားလိုက်သည်။

 အို... ငါ့ရဲ့သိက္ခာတရားတွေ ပျောက်ကုန်ပါပြီ။

​ထိုစဉ် အစောင့်တစ်ဦးက ကုန်သည်အဖွဲ့မှ ပစ္စည်းများ ရောက်လာကြောင်း သတင်းပို့သည်။ ဝမ်မုသည် ကြေးအိုးတစ်လုံးကို ထုတ်ယူလိုက်ရာ အလွန်မွှေးပျံ့သော ရနံ့များ တစ်ခန်းလုံး ပျံ့နှံ့သွားသည်။

​"ဒါ... ဒါ ကျင့်ကြံခြင်းနားလည်မှု လက်ဖက်ရည်ပဲ" လီယွမ်ဟွာက အံ့ဩတကြီး ရေရွတ်လိုက်သည်။

​ဝမ်မုက လက်ဖက်ရည်ကို ဖျော်ပြီး နန်းနန်းလေးအား ကမ်းပေးလိုက်သည် - "ရော့... သောက်လိုက်။ ဒါက မင်းကို ပိုပြီး ဉာဏ်ကောင်းစေလိမ့်မယ်"

​နန်းနန်းလေးက သံသယဖြင့် ကြည့်ကာ - "ဝမ်မု... ရှင် ကလေးကို လိမ်နေတာတော့ မဟုတ်ပါဘူးနော်"

​ဝမ်မု: "..."