အခန်း (၁၅၂) ဒါက တကယ်ပဲ လူမှုအကျိုးပြု လုပ်ငန်းတစ်ခုလား
ဆိုင်မှာမြို့၏ အစည်ကားဆုံးနေရာတွင် တည်ရှိသည်။ ဖွင့်ပွဲကို ခမ်းခမ်းနားနား မလုပ်သော်လည်း ဆိုင်၏ဆွဲဆောင်မှုရှိသော အပြင်အဆင်ကပင် လမ်းသွားလမ်းလာ ကျင့်ကြံသူများကို လှည့်ကြည့်မိစေရန် လုံလောက်လှသည်။
“လန်ယာ စကားပြောခန်းမ”
“ဒီမှာ ဘာရောင်းတာလဲ”
“တစ်ခါမှ မကြားဖူးဘူး ဒါပေမဲ့ လန်ယာဆိုတဲ့ နာမည်ပါတော့ လန်ယာကုန်သည်အသင်းနဲ့ ပတ်သက်နေတာလား မသိဘူး”
လွန်ခဲ့သော ရက်အနည်းငယ်က သတင်းများကြောင့် ဤမြို့များတွင် လန်ယာကုန်သည်အသင်း၏နာမည်မှာ အတော်ပင် ကောင်းမွန်နေပြီ ဖြစ်သည်။
ထို့ကြောင့် ဆိုင်အသစ်သည် လန်ယာနှင့် ပတ်သက်နေကြောင်း သိလိုက်ရသောအခါ လူအများမှာ စူးစမ်းလိုစိတ်ဖြင့် ရပ်ကြည့်ကြတော့သည်။
ကျင့်ကြံသူ မောင်နှံတစ်တွဲမှာပင် ဆိုင်ထဲသို့ ဝင်လာကြသည်။
“ဟူး... အထဲက ကြည့်ကောင်းသားပဲ”
ဆိုင်ထဲတွင် အလွန်ပင် ကျယ်ဝန်းလင်းထိုင်ပြီး ကြမ်းပြင်မှာလည်း မှန်ချပ်ကဲ့သို့ ပြောင်လက်နေသည်။ နံရံများတွင်ညဘက်အလင်းလွှတ်ပုလဲများကို တပ်ဆင်ထားသဖြင့် နူးညံ့သောအလင်းရောင်များ ထွက်ပေါ်နေသည်။
လျှောက်များမှလွဲ၍ ကျန်သည့်နေရာများကို အခန်းငယ်လေးများအဖြစ် စနစ်တကျ ခွဲခြားထားပြီး အခန်းတိုင်းတွင် ကျောက်စိမ်းစင် တစ်ခုစီ ရှိသည်။
ထိုကျောက်စိမ်းစင်၏ အလယ်တွင် စတုရန်းပုံ အပေါက်လေးတစ်ခု ရှိပြီး ထိုအထဲတွင် ငွေရောင်တောက်ပြောင်နေသော ဆက်သွယ်ရေးအဆောင်များ အံဝင်ခွင်ကျ ရှိနေကြသည်။
“ဒါ... ထျန်းဝမ်ဆက်သွယ်ရေးအဆောင် မဟုတ်လား” လူငယ်ကျင့်ကြံသူမှာ မျက်လုံးများ ပြူးသွားသည် “ပြီးတော့ ဒါက လရောင်အဆင့်ပဲ”
သူသည် ကုန်သည်ကြီးသုံးဖွဲ့၏ အဆောင်များကို လဲချင်သော်လည်း ပိုက်ဆံမလောက်သဖြင့် စုနေရဆဲ ဖြစ်သည်။
သူသည် ထျန်းဝမ်အဆောင်များအကြောင်းကို မျက်စိမှိတ်ထားလျှင်ပင် ပြောပြနိုင်လောက်အောင် လေ့လာထားသူ ဖြစ်သည်။
“ညီလေးက အမြင်စူးရှတာပဲ” ကောင်တာနောက်မှ မန်နေဂျာက ထွက်လာပြီး ပြုံးလျက် ပြောလိုက်သည်။
“ဒါတွေက တကယ်ပဲ လရောင်အဆင့်ထျန်းဝမ်အဆောင်တွေပါ”
“ဒီမှာ အဆောင်တွေကို ရောင်းတာလား”
မန်နေဂျာက ခေါင်းခါလိုက်သည် - “မဟုတ်ဘူး မရောင်းဘူး”
“ဒါဆို...”
“ငှားတာပါ”
“ငှားတယ်” နှစ်ယောက်သား ကြောင်သွားကြသည်။ ဆက်သွယ်ရေးအဆောင်ကို ငှားလို့ရသည်လား။
“ဝိညာဉ်သလင်းခဲ ၁၀ တုံးထဲနဲ့ ဒီအဆောင်ကို ၃ နာရီကြာ စိတ်ကြိုက် သုံးလို့ရပါတယ်”
“၃ နာရီကို ၁၀ တုံး ဒါဆို တစ်ရက်ကို ၄၀ တုံးပဲပေါ့” လူငယ်က တွက်ချက်လိုက်သည်။
“အရမ်းမဈေးကြီးဘူးပဲ”
‘ဝိညာဉ်သလင်းခဲဆိုသည်မှာ အနိမ့်စား ဝိညာဉ်ကျောက်တုံးတစ်တုံးကို အစိတ်စိတ် အမွှာမွှာ ဖြတ်ထားသော အသေးစား ငွေကြေးယူနစ် ဖြစ်သည်။
ဝိညာဉ်ကျောက်တုံး တစ်တုံးလျှင် သလင်းခဲ ၁၀၀ နှင့် ညီမျှသည်။ ဆိုလိုသည်မှာ ဤ လန်ယာစကားပြောခန်းမတွင် ဝိညာဉ်ကျောက်တုံး ၃ တုံးခန့် ရှိရုံဖြင့် လရောင်အဆင့် အဆောင်ကို တစ်လပတ်လုံး ခံစားသုံးစွဲနိုင်မည် ဖြစ်သည်။
လူငယ်ကျင့်ကြံသူ လူဘိုသည် အခန်းထဲသို့ ဝင်ကာ လရောင်အဆင့် အဆောင်ကိုကိုင်လိုက်သည်။ သူသည် သူ၏ သူငယ်ချင်း ကျန်းလျန်ထံသို့ ခေါ်ဆိုမှု ပြုလုပ်လိုက်သည်။
“ဟားဟား... ကျန်းလျန် ငါ ဘယ်သူလဲ သိလား”
ကျန်းလျန်မှာ သူ၏သူငယ်ချင်းကို လရောင် အဆင့် အဆောင် နှင့် မြင်လိုက်ရသောအခါ အံ့သြမဆုံး ဖြစ်သွားသည် - “မင်း... အဆောင် အသစ်လဲလိုက်တာလား ဒါက လရောင်အဆင့်ကြီးလေ ပိုက်ဆံတွေ ဘယ်ကရတာလဲ”
လူဘိုက ကြွားချင်သဖြင့် - “ခန့်မှန်းကြည့်လေ” ဟု ပြောလိုက်ရာ ကျန်းလျန်က ဒေါသတကြီးဖြင့် ကျိန်ဆဲတော့သည်။
နောက်ဆုံးတွင်မှ လူဘိုက ဒါကို ဝိညာဉ်သလင်းခဲ ၁၀ တုံးနှင့် ငှားသုံးနေခြင်းဖြစ်ကြောင်း ရှင်းပြလိုက်သည်။
“ဘာ ၁၀ တုံးထဲလား ဘယ်မှာလဲ ငါ့ကို ချက်ချင်းပြော”
လူဘိုက ဟိုင်ယွဲ့စားသောက်ဆိုင်တွင် ၁၀ နပ် ကျွေးရမည်ဟု ဓားပြတိုက်လိုက်သော်လည်း ကျန်းလျန်မှာ တွန့်ဆုတ်မနေတော့ပေ။
အကြောင်းမှာ ဤအဆောင်တွင် ဝတ္ထုအသစ်များကို ကိုယ်တိုင် ဖတ်ရှုနိုင်သလို ရှန်းလျောင်တွင်လည်း နတ်သမီးလေးများနှင့် စကားပြောနိုင်သောကြောင့် ဖြစ်သည်။
ဤသတင်းမှာ မြို့အနှံ့ ပျံ့နှံ့သွားပြီး လန်ယာစကားပြောခန်းမသို့ လူများ တိုးမပေါက်အောင် ရောက်လာကြတော့သည်။
လူများလွန်းသဖြင့် တန်းစီနေရသူများမှာ လမ်းမထက်တွင်သာမက ခေါင်မိုးများပေါ်တွင်ပင် ရှိနေကြသည်။
“မန်နေဂျာ.ဟိုမှာ ဆိုင်ခန်းတွေ အားနေသေးတာပဲ၊ ဘာလို့ ငါတို့ကို ဝင်ခွင့်မပေးတာလဲ” ကျင့်ကြံသူတစ်ဦးက အခန်းအချို့ အားနေသည်ကို မြင်၍ မေးလိုက်သည်။
မန်နေဂျာက တည်ငြိမ်စွာပင် - “အဲဒီအခန်းတွေက အထူးလူတန်းစားတွေအတွက် ဖယ်ထားတာပါ” ဟု ဖြေလိုက်သည်။
“ဘယ်လို အထူးလူတန်းစားလဲ”
“မကြာခင် မင်းတို့ သိရမှာပါ”
တစ်ချိန်တည်းမှာပင် ကုန်သည်ကြီးသုံးဖွဲ့၏ ခန်းမအတွင်း၌ ထန်ချန်းသည် မျက်မှောင်ကြုတ်လျက် ဝမ်မု၏ ရည်ရွယ်ချက်ကို စဉ်းစားနေမိသည်။
“သူတို့က ဒီလောက်ဈေးအနည်းငယ်လေးနဲ့ ငှားစားနေတာ တစ်ရက်ကို ဧည့်သည် တစ်သောင်းလာရင်တောင် ဝိညာဉ်ကျောက်တုံး ဘယ်လောက်မှ မရဘူး။ သူတို့က ပိုနေလို့ လုပ်နေတာလား”
ထိုစဉ် အစေခံတစ်ဦးက ထိတ်လန့်တကြား ပြေးဝင်လာသည် - “သခင်လေးတို့ ပြဿနာကြီးကြီးတက်ပြီ လန်ယာကုန်သည်အသင်းက ကြေညာလိုက်ပါတယ်။ နတ်ဘုရားတင်မြှောက်ခြင်းပွဲတော်မှာ အရည်အချင်းရှိတဲ့ကလေးတိုင်းကို 【ထျန်းဝမ် လစဉ်ကတ်】 တစ်ကတ်စီ လက်ဆောင်ပေးမယ်တဲ့”
“ကျွန်တော်တို့ဆီမှာ စစ်ဆေးဖို့ စီစဉ်ထားတဲ့ သာမန်လူတွေ အကုန်လုံး အဲဒီဘက်ကို ပြေးကုန်ကြပါပြီ”