အခန်း (၁၂၉)  ဝတ္ထုကဏ္ဍကိုစတင်လိုက်ပြီ

ကုန်သည်ကြီးသုံးဖွဲ့၏ ဆက်သွယ်ရေးအဆောင်များအကြီးအကျယ် ပြုပြင်ပြောင်းလဲမှုမှာ အဓိက မြို့တော်ကြီးများသို့ ပျံ့နှံ့သွားခဲ့သည်။

ဤတစ်ကြိမ်တွင် သူတို့သည် မည်သည့်တန်ဖိုးကိုမဆို ပေးဆပ်ရန် အသင့်ရှိနေကြသည်။

ဝိညာဉ်ကျောက်တုံးများစွာ အသုံးပြုကာ အဆင့်မြင့်ပစ္စည်းကိရိယာကျွမ်းကျင်သူများ၊ အစီအရင်ဆရာများနှင့် အဆောင်ပညာရှင်များကို စုစည်းပြီးအဆောင်များကို အဆင့်မြှင့်တင်ခဲ့ကြသည်။

ယခင်က မောက်မာခဲ့သော သူတို့၏ သဘောထားမှာလည်း လုံးဝပြောင်းလဲသွားပြီး လူထု၏ အကြံပြုချက်များကို နှိမ့်ချစွာ နားထောင်လာကြသဖြင့် ပျက်စီးနေသော ဂုဏ်သိက္ခာကို အနည်းငယ် ပြန်လည် ဆယ်တင်နိုင်ခဲ့သည်။

ရက်အနည်းငယ်အတွင်းမှာပင် ပထမဆုံးသော 【အထူးမွမ်းမံထုတ်ဝေမှု】အဆောင်များသည် ကျင့်ကြံသူများ၏ လက်ထဲသို့ ပြန်လည်ရောက်ရှိလာသည်။

ကြော်ငြာထားသည့်အတိုင်းပင်  ကုန်ကြမ်းများမှာ သိသိသာသာ ကောင်းမွန်လာခဲ့သည်။

ဆန်းရှန်းဖိုရမ်တွင်လည်း စားများ၏ အရေအတွက်နှင့် အရည်အသွေးမှာမြင့်တက်လာခဲ့သည်။ လန်ယာဖိုရမ်၏ အမှတ်ပေးစနစ်ကို အတုယူကာ ဆုကြေးများကို ပိုမိုပေးအပ်လာသဖြင့် အရှုံးခံ၍ လူအများကို ဆွဲဆောင်ခဲ့ကြသည်။

ဤနည်းလမ်းမှာ ရိုးရှင်းသော်လည်း ထိရောက်လှသဖြင့် ဖိုရမ်နှင့် ဖေးရှူးမှာ ပြန်လည် သက်ဝင်လာခဲ့သည်။

သို့သော် ကုန်သည်ကြီးသုံးဖွဲ့မှ လူများ စိတ်အေးလက်အေး ဖြစ်နေစဉ်မှာပင် ထျန်းဝမ်အဆောင်မှာ နောက်ထပ်အဆင့်မြှင့်တင်မှု တစ်ခု ထပ်မံထွက်ပေါ်လာပြန်သည်။

“နောက်ထပ် တစ်ခုလား”

“ထျန်းဝမ်အဆောင်က တကယ်ကို ကောင်းတာပဲ။ တစ်ခါပဲ ပိုက်ဆံပေးရတယ်၊ အမြဲတမ်း အသစ်အသစ်တွေ ဆော့နေရတာပဲ”

“အဆင့်မြှင့်တင်မှုထဲကတစ်ခုက ဝတ္ထုကဏ္ဍတဲ့... ဝတ္ထုဆိုတာ ဘာကြီးလဲ”

“မသိဘူးလေ၊ စောင့်ကြည့်ရမှာပေါ့။ ထျန်းဝမ်က ထုတ်တဲ့အရာတွေက ငါတို့ကို ဘယ်တော့မှ စိတ်မပျက်စေခဲ့ပါဘူး”

ဖုန်းလိုင်ကုန်သည်အဖွဲ့။

“ထျန်းဝမ်အဆောင်မှာ ပုံပြင်စာအုပ်တွေ အများကြီး အဆင့်မြှင့်တင်မှုလုပ်လိုက်တယ် ဟုတ်လား” ထိုက်ရှူးထုံက ထန်ချန်းကို စိုက်ကြည့်ကာ မေးလိုက်သည်။

ထိုက်ရှူးထုံက မျက်မှောင်ကြုတ်ကာ - “လန်ယာရဲ့သခင်လေး ဝမ်မုကတော့ ထူးထူးဆန်းဆန်းတွေ လုပ်ပြန်ပြီ။ ကျင့်ကြံသူတွေ စုဝေးတဲ့ ဖိုရမ်မှာ အဆင့်နိမ့်ကျင့်ကြံသူတွေပဲ ဖတ်တဲ့ ပုံပြင်တွေကို ဘာလို့ တင်တာလဲ”

ထန်ချန်းက - “ဒါက နောက်ထပ် ပရိယာယ်တစ်ခု ဖြစ်နိုင်မလား” ဟု သုံးသပ်ပြသည်။

ထိုက်ရှူးထုံက - “ပရိယာယ် ဖြစ်ဖြစ်၊ မဖြစ်ဖြစ် သူတို့လုပ်ရင် ငါတို့လည်း လိုက်လုပ်ရမယ်။ ငါတို့က ပိုပြီး စုံစုံလင်လင် လုပ်ရမယ်။ထူးဆန်းတဲ့ ပုံပြင်တွေနဲ့ ဒဏ္ဍာရီစာအုပ်တွေ အကုန်စုပြီး ငါတို့ဖိုရမ်မှာ တင်လိုက်” ဟု အမိန့်ပေးလိုက်သည်။

တာလော့ကျင့်စဉ်ဂိုဏ်း။

ယဲ့ဖူသည် သူ၏မိတ်ဆွေ ခယ်လန် နှင့်အတူ လက်ဖက်ရည်သောက်ရင်း စကားပြောနေသည်။ ခယ်လန်မှာ ထိုက်ဟောင်မြို့တော်ရှိ ဆန်းဝူပညာကျောင်းမှ တပည့်ကြီးဖြစ်ပြီး စာပေဖတ်ရှုခြင်းမှလွဲ၍ အခြားဝါသနာ မရှိသူဖြစ်သည်။

ထိုစဉ် ယဲ့ဖူ၏အဆောင်မှာ တုန်ခါလာပြီး အဆင့်မြှင့်တင်မှုတက်လာသည်။ သူသည် စိတ်ဝင်တစားဖြင့် ဖွင့်ကြည့်လိုက်ရာ ဖိုရမ်၏ အပေါ်ဘက်တွင် ဝတ္ထုဆိုသည့် ကဏ္ဍသစ်တစ်ခု ပေါ်လာသည်ကို တွေ့လိုက်ရသည်။

သူ နှိပ်ကြည့်လိုက်သောအခါ စာအုပ်အမည်များစွာ စီတန်းပေါ်လာတော့သည်။

 * ကောင်းကင်ဘုံကိုစစ်ပြိုင်ခြင်း  - (အတွဲ - ၁ တင်ပြီး)

 * တောက်လော့ကမ္ဘာ  - (အတွဲ - ၁ တင်ပြီး)

 * နတ်သမီးလေး၏ကိုယ်ရံတော် - (အတွဲ - ၁ တင်ပြီး)