အခန်း (၁၀၈) ငါ့ကိုပဲ ပစ်မှတ်ထားနေတာပဲ
မြောက်ပိုင်းအမှောင်ထု သန့်စင်သောမြေမှ အကြီးအကဲများ၏ အစွမ်းကုန် ကြိုးစားအားထုတ်မှုများကြောင့် ဖိုရမ်ပေါ်တွင် အကြီးအကျယ် ရိုက်ခတ်မှုများ ဖြစ်ပေါ်လာခဲ့သည်။
“ဟား... မကြာသေးခင်က ဘာတွေဖြစ်နေတာလဲ ဘာလို့အကြီးအကဲတွေက လမ်းညွှန်ချက်တွေ အလုအယက် တင်နေကြတာလဲ”
“ဖြည်းဖြည်းလုပ်ကြပါ ဆရာကြီးတို့ရာ၊ ကျွန်တော်တို့ ဖတ်လို့တောင် မမှီတော့ဘူး”
“ကြည့်စမ်း... ဒါတွေက မြောက်ပိုင်းအမှောင်ထု သန့်စင်သောမြေက အဆောင်မှူးတွေပဲ တစ်ကမ္ဘာလုံး ရူးကုန်ကြပြီလား”
“အားလုံးပဲ နှစ်သက်ခြင်းခလုတ်နိုပ်ပေးလိုက်ကြပါဦး သူတို့က တကယ့်အလှူရှင်ကြီးတွေပဲ”
“ဝမ်မိသားစုသခင်လေးနဲ့ ပတ်သက်တဲ့သူတွေက တကယ်ကို ကြင်နာတတ်ကြတာပဲနော်...”
တစ်ချိန်တည်းမှာပင်...
မြောက်ပင်လယ်၏ တံငါရွာလေးတစ်ရွာ၌...
လူငယ်တစ်ဦးသည် ပင်လယ်ပြင်ကို မျက်နှာမူကာ တရားထိုင်နေသည်။ သူကား လင်းယန်ပင် ဖြစ်သည်။
“ဆရာ... ကျွန်တော် ကျင့်ကြံခြင်းမှာ ပိတ်ဆို့မှုတစ်ခုနဲ့ တွေ့နေရသလိုပဲ” ဟု လင်းယန်က ဆိုသည်။
သူ၏အတွင်းရှိ ဝိညာဉ်အဘိုးအို တ်န်ရွှမ်က တည်ငြိမ်စွာဖြင့် - “ဒါက ပုံမှန်ပါပဲ မင်းရဲ့ အဆင့်တက်တာက မြန်လွန်းနေတာ။ အခုလို ပိတ်ဆို့မှုနဲ့တွေ့တာက မင်းရဲ့ စိတ်ဓာတ်ကို ပြန်လည် တည်ငြိမ်အောင် လေ့ကျင့်ဖို့ အခွင့်အရေးပဲ” ဟု ဆုံးမလိုက်သည်။
တန်ရွှမ်သည် လင်းယန်ကို ရက်အနည်းငယ်ခန့် ထိုပိတ်ဆို့မှုတွင် ထားကာ စိတ်ဓာတ်ကို အရောင်တင်ပေးရန် ကြံစည်နေခြင်း ဖြစ်သည်။ သို့သော် ရုတ်တရက် လင်းယန်က အော်ဟစ်လိုက်သည်။
“ဆရာ ပိတ်ဆို့မှုကို ဘယ်လို ကျော်ဖြတ်ရမလဲဆိုတာ ကျွန်တော် သိသွားပြီ”
တန်ရွှမ် - “.....”
“ဆရာကြည့်ပါဦး... ဖိုရမ်ထဲက အကြီးအကဲတစ်ယောက်က ကျွန်တော့်လို အခြေအနေမျိုးကို ဘယ်လိုကျော်ဖြတ်ရမလဲဆိုတာ ရေးထားတယ်”
တန်ရွှမ်သည် ထိုဆောင်းပါးကို ဖတ်ကြည့်ပြီးနောက် ဆွံ့အသွားရသည်။ သူက အလျှော့မပေးဘဲ “အဲဒါက ကျော်ဖြတ်ရုံနဲ့ မပြီးသေးဘူး၊ ကျော်ဖြတ်ပြီးရင်လည်း ခန္ဓာကိုယ်ကို ပြန်လည်အားဖြည့်ဖို့ ဆေးနည်းတွေ လိုသေးတယ်...” ဟု ထပ်မံ အကြောင်းပြချက် ပေးလိုက်ပြန်သည်။
သို့သော် လင်းယန်က ဖိုရမ်ကို ထပ်မံ ပြသလိုက်ပြန်သည် - “ဒီမှာလေ ဆရာ... အကြီးအကဲထျန်းတန်းရေးထားတဲ့ ကျိုယင် ယန်အားဖြည့်စွပ်ပြုတ်ဆေးနည်းက ကျွန်တော့်ရဲ့ နေမင်းဧကရာဇ်ကျင့်စဉ်နဲ့ အတိအကျ ကိုက်ညီနေတာပဲ”
တန်ရွှမ်မှာ ထိုဆေးနည်းကို ကြည့်ကာ ထိတ်လန့်သွားရသည်။ ၎င်းမှာ အလွန်ပင် ပြီးပြည့်စုံလွန်းလှသည်။
“ဒါတွေက အဖိုးတန်တဲ့ လျှို့ဝှက်ချက်တွေ မဟုတ်ဘူးလား ဘာလို့ အလကားလိုက်ဝေနေကြတာလဲ” ဟု သူတွေးမိသည်။
သူသည် ဆရာတစ်ယောက်၏ သိက္ခာကို ဆယ်ရန်အတွက် နောက်ဆုံးလက်နက်အဖြစ် - “ဆေးနည်းရှိရုံနဲ့ မရသေးဘူး၊ ခန္ဓာကိုယ်ထဲ ပျံ့နှံ့အောင် လုပ်မယ့် အထူးလမ်းညွှန်ကျင့်စဉ်လိုသေးတယ်” ဟု ဆိုလိုက်သည်။
သို့သော် လင်းယန်က - “အဲဒါလည်း ဖိုရမ်မှာ တစ်ရက်က တွေ့လိုက်မိတယ် ဆရာ၊ အခုပဲ စမ်းပြမယ်” ဟု ဆိုကာ ချက်ချင်းပင် ကျင့်ကြံပြလိုက်တော့သည်။
တန်ရွှမ်၏ခေါင်းထဲတွင် ဝေဝေဝါးဝါး ဖြစ်သွားပြီး တစ်ခုတည်းသော အတွေးသာ ရှိတော့သည် - “သွားပြီ ဒီဖိုရမ်က ငါ့ကိုပဲ တမင်ပစ်မှတ်ထားပြီး ဖျက်ဆီးနေတာပဲ”
ဖိုရမ်ကို စတင်ခဲ့သည်မှာ တစ်လခွဲခန့် ရှိပြီဖြစ်သည်။ ယခုအခါ မြောက်ပင်လယ်တစ်ခွင်တွင် အလွန်ပင် ရေပန်းစားနေပြီဖြစ်သည်။
အဆင့်မြင့်ကျင့်ကြံသူများက သိက္ခာအတွက် လမ်းညွှန်ချက်များ တင်ကြပြီး၊ အောက်ခြေကျင့်ကြံသူများမှာမူ ထိုလမ်းညွှန်ချက်များကြောင့် အဆင့်များ တရှိန်ထိုး တက်လာကြသည်။
အချို့မှာ ကျင့်ကြံသူသစ်လေးများကို အလုအယက်ရှာဖွေကာ ကိုယ်ပိုင်သင်တန်းကျောင်းများပင် ဖွင့်လှစ်လာကြသည်။
အချို့ကမူ ပိုက်ဆံရှိသဖြင့် ရမှတ်များရရန်အတွက် ဆုလာဘ်ပေးသော မေးခွန်းများကို တမင်ဖန်တီး၍ ရမှတ်ရှာကြသည်။
ဤအပြောင်းအလဲများအားလုံးကြောင့် မြောက်ပင်လယ်ရှိ ကျင့်ကြံသူများ၏ စွမ်းအားမှာ သိသိသာသာ တိုးတက်လာခဲ့သည်။ သို့သော် ဤအရာအားလုံး၏ နောက်ကွယ်မှ အကြီးမားဆုံး အကျိုးအမြတ်ကို ရရှိသူမှာ တစ်ဦးတည်းသာ ရှိသည်။
ဝုန်း
ထျန်းကျွယ်ကျွန်းရှိ ဝိညာဉ်စွမ်းအင်များ ပြည့်နှက်နေသော ရေပူစမ်းထဲ၌ ဝမ်မုသည် မျက်စိမှိတ်လျက် အေးအေးလူလူ လဲလျောင်းနေသည်။
ပတ်ဝန်းကျင်ရှိ ရေများမှာ ရုတ်တရက် ဆူပွက်လာပြီး မြူခိုးများ ထွက်ပေါ်လာသည်။
“ထပ်ပြီး အဆင့်တက်သွားပြန်ပြီပဲ”
ဝမ်မုသည် မျက်လုံးကို ဖြည်းညှင်းစွာ ဖွင့်လိုက်ပြီး သူ၏ခန္ဓာကိုယ်အတွင်းမှ တိုးတက်လာသော စွမ်းအားများကို ခံစားရင်း အပျင်းကြော ဆွဲလိုက်တော့သည်။