အခန်း (၁၀၇)  ငါက ဘာလို့ နောက်ဆုံးရောက်နေတာလဲ

တစ်ချိန်တည်းမှာပင်...

မြောက်ပိုင်းအမှောင်ထု သန့်စင်သောမြေရှိ အခြားသောအဆောင်များတွင်လည်း အလားတူအခြေအနေများ ဖြစ်ပျက်နေသည်။

လက်နက်သန့်စင်နန်းဆောင်တွင်...

"ဘာလဲဟ... ငါက နံပါတ် ၂၇ ပဲ ရတာလား ဒီဇယားမှာ တစ်ခုခု မှားနေပြီ"

"ဂိုဏ်းချုပ်... စိတ်မပူပါနဲ့ဦး။ သေချာကြည့်ပါ၊ ဂိုဏ်းချုပ်ရဲ့အဆင့်က တကယ်တော့ အတော်လေး မြင့်ပါတယ်။ အကြီးအကဲထျန်းတန်းနဲ့ အကြီးအကဲ ထျန်းယွမ်တို့တောင် ဂိုဏ်းချုပ်ရဲ့ နောက်မှာပါ..."

"ဟမ်" အကြီးအကဲထျန်းကုန်း၏ မျက်နှာမှာ ချက်ချင်းပင် ပြောင်းလဲသွားပြီး - "အင်း... ငါက သူတို့ထက် အဆင့်မြင့်တာကတော့ သဘာဝကျပါတယ်လေ" ဟု ဆိုကာ ပြုံးလိုက်သည်။ "ဒါနဲ့ ထျန်းဟဲဆိုရင် ဇယားထဲတောင် မပါဘူးမလား"

ဗျူဟာအဆောင်တွင်...

"ငါက နံပါတ် ၄၉ လား.နောက်ဆုံးပဲလား"

"မဟုတ်ပါဘူး ဆရာ။ အကြီးအကဲ ထျန်းဟဲက စာရင်းထဲမှာတောင်မရှိပါဘူး။"

"အော်... ဒါဆိုရင်တော့ တော်သေးတာပေါ့။ စိတ်အေးသွားပြီ"

သားရဲထိန်းသိမ်းရေးနန်းဆောင်တွင်မူ...

သေမင်းတမျှ တိတ်ဆိတ်ငြိမ်သက်နေသည်။

အကြီးအကဲ ထျန်းဟဲသည် အဆောင်ကို စိုက်ကြည့်ရင်း နှုတ်ခမ်းများ တုန်ယင်နေသည်။ "ငါ... ငါဘယ်မှာလဲ"

ဘေးမှ တပည့်ဖြစ်သူမှာ တုန်တုန်ရင်ရင်ဖြင့် - "ဗျာ"

"ဗျာ မနေနဲ့ ငါ့နာမည် ဇယားထဲမှာ ဘယ်နားမှာလဲလို့ မေးနေတာ"

"အဲဒါက... ကျွန်တော်မျိုး... မသိပါဘူးဆရာ"

"ထျန်းတန်းတို့ ထျန်းဝူတို့တောင် ပါသေးတာ၊ ငါက ဘာလို့ မပါရတာလဲ ငါက သူတို့ထက် ဘာနိမ့်လို့လဲ"

"ဖြစ်နိုင်တာက... ဆရာရဲ့လမ်းညွှန်ချက်တွေက အရမ်းနက်နဲလွန်းလို့ အောက်ခြေကျင့်ကြံသူတွေ နားမလည်ကြတာ ဖြစ်မှာပါ."

အကြီးအကဲထျန်းဟဲမှာ ဒေါသတကြီးဖြင့် ဟိုဟိုဒီဒီ လမ်းလျှောက်နေတော့သည်။ သူသည် အဆင့်သတ်မှတ်ချက်ကို ဂရုမစိုက်ဟု ဆိုသော်လည်း အဆောင် ၆ခုတွင် သူတစ်ဦးတည်းသာ စာရင်းမဝင်ခြင်းမှာ သိက္ခာကျစရာပင်။ သူသည် မြေကမ္ဘာနတ်ဘုရားတစ်ဦးဖြစ်ရာ မျက်နှာပျက်၍မဖြစ်ပေ။

"ဒီကောင်တွေက အဖိုးတန်တာကို အဖိုးတန်မှန်း မသိကြဘူး ကဲ... ဝူလျန်ကျောက်စိမ်းပြားအလွတ်တစ်ခု ယူခဲ့စမ်း"

သူသည် တစ်ညလုံး မအိပ်ဘဲ အပြင်းအထန် စဉ်းစားကာ လမ်းညွှန်ချက်အသစ်ကို ရေးသားတော့သည်။

သူသည် အောက်ခြေကျင့်ကြံသူများ နားမလည်မည်ကို စိုးရိမ်သဖြင့် အတတ်နိုင်ဆုံး ရိုးရှင်းအောင် အကြိမ်ကြိမ် ပြင်ဆင်ရေးသားသည်။

မကြာမီမှာပင် သူ၏လမ်းညွှန်ချက်ကို တပည့်ဖြစ်သူ ဝူလျန်အား ဖတ်ခိုင်းကြည့်သည်။

"ဝူလျန်... မင်း အရင်ဖတ်ကြည့်စမ်း။ ငါ့တပည့်တွေထဲမှာ မင်းက ဉာဏ်အထုံဆုံး အနည်းဆုံးပဲ။ မင်းနားလည်ရင် အပြင်ကလူတွေလည်း နားလည်မှာပဲ"

ဝူလျန် - "......"

မကြာမီမှာပင် အခြားအဆောင်မှ အကြီးအကဲများမှာလည်း ထျန်းဟဲ၏ဆောင်းပါးအသစ်ကြောင့် ထိတ်လန့်သွားကြသည်။

"ဒီအဘိုးကြီးကတော့ သိက္ခာတွေ အကုန်ချပြီး ရိုးရိုးရှင်းရှင်းကြီး ရေးချလိုက်ပြီပဲ"

"သူက ငါတို့ကို ဇယားထဲကနေ ကန်ထုတ်ဖို့ ကြိုးစားနေတာပဲ... မရဘူး၊ ငါတို့လည်း အသစ်ပြန်ရေးမယ်"

ထိုသို့ဖြင့် မြောက်ပိုင်းအမှောင်ထု သန့်စင်သောမြေမှ အကြီးအကဲများမှာ ဖိုရမ်ပေါ်တွင် အပြင်းအထန် ပြိုင်ဆိုင်ကြတော့သည်။

 ဗျူဟာအဆောင်မှ အကြီးအကဲ ထျန်းယွမ်မှာ နောက်ဆုံးအဆင့်သို့ မရောက်စေရန် တစ်ရက်တည်းမှာပင် ဆောင်းပါး ၅ ခုအထိ တင်ခဲ့သည်။

ဤပြိုင်ဆိုင်မှုကြောင့် ဖိုရမ်ပေါ်တွင် အဆင့်မြင့်လမ်းညွှန်ချက်များစွာ ပေါ်ထွက်လာပြီး အောက်ခြေကျင့်ကြံသူများသာမက အဆင့်မြင့်ကျင့်ကြံသူများပါ အကျိုးကျေးဇူးများစွာ ရရှိခဲ့ကြသည်။

အကြီးအကဲထျန်းဝူက ထိပ်တန်း ၁၀ နေရာထဲသို့ ဆောင်းပါးသစ် ၂ ခုဖြင့် ဝင်ရောက်နိုင်ခဲ့သည်။ သို့သော် သနားစရာကောင်းသော အကြီးအကဲထျန်းဟဲမှာမူ ဇယားထဲသို့ ခေတ္တဝင်နိုင်ခဲ့သော်လည်း အခြားသူများ၏ တိုက်စစ်ကြောင့် ပြန်လည် ထွက်ခွာခဲ့ရပြန်သည်။

အကြောင်းမှာ သားရဲထိန်းသိမ်းရေးပညာကို လေ့လာသူဦးရေမှာ အခြားသော ဆေးဖော်စပ်ခြင်း သို့မဟုတ် လက်နက်ဖော်စပ်ခြင်း ပညာရပ်များထက် သိသိသာသာ နည်းပါးနေသောကြောင့် ဖြစ်ပေတော့သည်။