အခန်း (၁၀၃) - ပါရမီနိမ့်သူတစ်ဦးကပင် မြေကမ္ဘာနတ်ဘုရား၏ လမ်းညွှန်မှုကို ရရှိနိုင်သလား။

ချိုးယု၏ စကားများကို နားထောင်ရင်း လျူယွမ်ရင်းသည် စိတ်လှုပ်ရှားလွန်းသဖြင့် ပြုံးရယ်နေရာမှ တိတ်တဆိတ် မျက်ရည်ကျမိတော့သည်။

သူမသည် ကျင့်ကြံခြင်းလောကထဲသို့ ခြေတစ်ဖက်သာ လှမ်းရသေးသော်လည်း ဤလောက၏ရက်စက်မှုကို ကောင်းကောင်းသိနားလည်ထားသည်။ ပါရမီနိမ့်သူတစ်ဦးအတွက် ဂိုဏ်းမရှိ၊ ကျောထောက်နောက်ခံမရှိ၊ ဆရာမရှိပါက အားကြီးသူများ၏ နင်းခြေခြင်းကို ခံရမည့် အသားတုံးတစ်ခုမျှသာ ဖြစ်သည်။

အကယ်၍ နတ်ဘုရားတင်မြှောက်ခြင်းပွဲတော် ကသာ အခြေခံကျင့်စဉ်တစ်ခုကို လက်ဆောင်မပေးခဲ့ပါက သူမသည် ခန္ဓာကိုယ်ထဲသို့ ချီစွမ်းအင်ပင် သွင်းနိုင်မည် မဟုတ်ပေ။

သူမသည် ချိုးယုကို အမြဲတမ်း အားကျနေခဲ့ရသည် - သူက ပါရမီမြင့်သည့်အပြင် ရွှေအမြုတေအဆင့်ရှိ ဆရာကြီး၏တပည့်အဖြစ်ပါ လက်ခံခြင်း ခံခဲ့ရသည်။

ယခုမူ ဤဖိုရမ်တွင် ဒဏ္ဍာရီထဲ၌သာ ကြားဖူးသည့် အစွမ်းထက် ပုဂ္ဂိုလ်ကြီးများ၏ လမ်းညွှန်မှုကို သူမ ရရှိနိုင်ပြီ ဖြစ်သည်။ ဤသည်ကို သူမ မည်သို့ စိတ်မလှုပ်ရှားဘဲ နေနိုင်မည်နည်း။

ချိုးယုက သက်ပြင်းချကာ “ဒါက တကယ့်ကို ကောင်းကင်ကပေးတဲ့ ဆုလာဘ်ပဲ” ဟု ဆိုသည်။

လျူယွမ်ရင်းက ခေါင်းခါရင်း - “ဒါက ကောင်းကင်က ပေးတာမဟုတ်ဘူး... လန်ယာကုန်သည်အဖွဲ့ရဲ့ သခင်လေးက ပေးသနားတာပါ။ သူသာမရှိရင် ငါတို့မိသားစုတွေက ပါရမီစစ်ဆေးဖို့တောင် ပိုက်ဆံမတတ်နိုင်ဘူး။ သခင်လေးက ငါတို့ရဲ့ဒုတိယမိဘပဲ”

လျူယွမ်ရင်းသည် ချိုးယုပေးသော ဆက်သွယ်ရေးအဆောင်ကို ငြင်းပယ်လိုက်ပြီး သူမဘာသာ ဝယ်ယူရန် ဆုံးဖြတ်လိုက်သည်။

သူမကဲ့သို့ပင် ဂိုဏ်းမရှိသော ကျင့်ကြံသူ လူငယ်ပေါင်းများစွာမှာလည်း စုပေါင်း၍ ပိုက်ဆံစပ်ကာ ဆက်သွယ်ရေးအဆောင်တစ်ခုကို ဝယ်ယူကြသည်။

သူတို့အားလုံးသည် တောင်ကုန်းတစ်ခုပေါ်တွင် ဝိုင်းထိုင်ကာ ဖိုရမ်ထဲမှ အချက်အလက်များကို လောဘတကြီး ဖတ်ရှုကြတော့သည်။

“အမေ... သားတော့ အောင်မြင်တော့မယ်”

“ဒီလမ်းညွှန်ချက်သာ မရှိရင် ငါ သွေးလေချောက်ချားပြီး သေတော့မှာပဲ...”

လူငယ်များသည် ဖိုရမ်ထဲမှ အဖြေများကို တစ်လုံးမကျန် ကူးယူကြသည်။ တစ်နေရာ၌ ဝူဖုန်းအမည်ရှိ လူငယ်တစ်ဦးမှာ ကျင့်ကြံနေရင်း အမှတ်အသားအချို့၌ နာကျင်မှု ခံစားနေရသော်လည်း ဖိုရမ်တွင် ရှာမတွေ့သဖြင့် မေးခွန်းအသစ်တစ်ခုကို တင်လိုက်သည်။

အခြားတစ်ဖက်တွင်... ကျောက်မိုအမည်ရှိ ရွှေအမြုတေအဆင့်ကျင့်ကြံသူတစ်ဦးသည်လည်း ဖိုရမ်ကို အမြဲစောင့်ကြည့်နေသည်။

သူသည် ဖိုရမ်တွင် အဆင့်၂ သို့ ရောက်ရှိရန် ကြိုးစားနေခြင်းဖြစ်သည်။ အဆင့် ၂ ရောက်ပါက ဈေးဝယ်စင်တာတွင် သူ၏အစွမ်းကို တိုးမြှင့်ပေးနိုင်မည့် လျှို့ဝှက်ကျင့်စဉ်များကို လဲလှယ်နိုင်မည် ဖြစ်သည်။

သို့သော် ဖိုရမ်တွင် အဆင့်တက်ရန်မှာ လွယ်ကူသည်မဟုတ်။ လူကြိုက်များသော ဆောင်းပါးများ ရေးနိုင်မှသာ ရမှတ်များများ ရမည်ဖြစ်သည်။

သူသည် အမှတ်တက်ရန်အတွက် အဖြေမရှိသေးသော မေးခွန်းထူးထူးဆန်းဆန်းများကို လိုက်ရှာနေစဉ် ဝူဖုန်း တင်ထားသော မေးခွန်းကို တွေ့ရှိသွားတော့သည်။

“ဝဲကရက်အနုပညာကို ကျင့်ကြံနေစဉ် လာအိုကုန်း နဲ့ ထျန်းချီ  အမှတ်တွေမှာ နာကျင်မှု ခံစားနေရပါသည်...”

ကျောက်မို၏မျက်ခုံးများ ပင့်တက်သွားသည်  “ဟမ်... ဒါက အသစ်ပဲ”