အခန်း (၈၀) - တိုက်ပွဲကြီး၏ အကြိုည
ကီးလ်သည် ဝံပုလွေဘုရင်၏ မျက်လုံးများကို စိုက်ကြည့်ရင်း တစ်ခုခုကို သတိထားမိသွားသည်။ သူမသည် ဘေးရှိ အခြားဝံပုလွေများ၏ မျက်လုံးများကိုပါ လိုက်လံစစ်ဆေးပြီးနောက် တိတ်ဆိတ်သွားကာ အတွေးနက်နေတော့သည်။
“ဒီဝံပုလွေတွေက တစ်ခုခု ထူးဆန်းနေတယ် မဟုတ်လား?”
ယု ကလည်း ပြဿနာကို ရိပ်မိပုံရသဖြင့် ကီးလ်ကို တိုးတိုးလေး မေးလိုက်သည်။
“ဟုတ်တယ်... မီးလျှံ မိစ္ဆာဝံပုလွေတွေရဲ့ မျက်လုံးက ကြက်သွေးရောင် ဖြစ်ရမှာ၊ ဒါပေမဲ့ ဒီကောင်တွေရဲ့ မျက်လုံးက အစိမ်းရောင်တွေ ဖြစ်နေတယ်”
ကီးလ်က ပြောရင်း ဝံပုလွေတစ်ကောင်၏ မျက်ခွံကို ဖြဲကြည့်လိုက်သည်။ စိမ်းဖန့်ဖန့် မျက်လုံးများမှာ တောက်ပနေသော်လည်း ၎င်းတို့အထဲတွင် အနီရောင် အရိပ်အယောင်များ စတင်ယှက်သန်းနေပြီ ဖြစ်သည်။
“လေအဟုန်ဝံပုလွေ တွေမှာပဲ စိမ်းဖန့်ဖန့် မျက်လုံး ရှိတာ။ ဒီနေရာကလည်း လေအဟုန်ဝံပုလွေတွေရဲ့ နယ်မြေပဲ... ဒါဆိုရင်တော့...”
ကီးလ်သည် ကောက်ချက်တစ်ခု ချလိုက်သည်။ ဤဝံပုလွေများသည် တစ်စုံတစ်ရာသော မှော်ဓာတ်ဝင်ရောက်စွက်ဖက်မှုကြောင့် အခြေခံတည်ဆောက်ပုံ ပြောင်းလဲသွားခြင်း ဖြစ်သည်။ ၎င်းတို့၏ ခန္ဓာကိုယ်အတွင်းရှိ လေဓာတ်မှော်စွမ်းအင်များ လျော့နည်းသွားပြီး ပြင်းထန်သော မီးဓာတ်မှော်စွမ်းအင်များဖြင့် အစားထိုးခံလိုက်ရခြင်းပင်။
သို့သော် ၎င်းမှာ လုံးဝ ယုတ္တိမရှိပေ။ သားရဲတစ်ကောင်၏ မူလဒြပ်စင်ကို ပြောင်းလဲပစ်ရန်မှာ အတွင်းပိုင်း မှော်ပတ်လမ်းကြောင်း များကိုပါ ပြောင်းလဲပစ်နိုင်လောက်သည့် အလွန်ပြင်းထန်သော စွမ်းအင်မျိုး လိုအပ်သည်။ တစ်စုံတစ်ယောက်က ဤမျှ စွမ်းဆောင်နိုင်ဖို့ဆိုသည်မှာ...
“မီးလျှံ ချီလင် ..”
ကီးလ်က မလှမ်းမကမ်းရှိ မီးတောင်ကို ကြည့်ရင်း ရေရွတ်လိုက်သည်။
ဒဏ္ဍာရီအရ ချီလင်၏ သွေးကို သောက်သုံးမိသူသည် သာမန်မီးလျှံမှ အရာအားလုံးကို သန့်စင်နိုင်သည့် “နတ်မီးလျှံ” ကို ရရှိနိုင်သည်ဟု ဆိုကြသည်။ ဤဝံပုလွေများသည် ချီလင်၏ သွေးကို သောက်သုံးမိ၍ သဘာဝကို ဆန့်ကျင်ပြီး ဒြပ်စင်ပြောင်းလဲသွားကြခြင်းများလား? သို့သော် ၎င်းမှာ ကီးလ်၏ ခန့်မှန်းချက်သာ ဖြစ်သည်။ ချီလင်ကို ဘယ်သူမှ မမြင်ဖူးသလို ၎င်း၏ သွေးစွမ်းရည်ကိုလည်း အသေအချာ မသိကြပေ။
ကီးလ်က ယု အား အခြေအနေကို ရှင်းပြပြီးနောက် တခြားလူတွေ သံသယမဝင်စေရန် ဝံပုလွေများကို ပြန်လွှတ်ခိုင်းလိုက်သည်။ ယု ကတော့ စိတ်ထဲမှ— ‘ငါ ချီလင်ကို အရင်က မြင်ဖူးပါတယ်၊ အဲ့ဒီသွေးက ဘယ်တုန်းက ဒီလောက် အသုံးဝင်သွားတာလဲ’ ဟု တွေးနေမိသည်။ သို့သော် ပြဿနာမတက်စေရန် ဘာမှမပြောဘဲ ကီးလ်ခိုင်းသည့်အတိုင်း လုပ်လိုက်သည်။
ဝံပုလွေများ ထွက်သွားတော့မှ ဝမ်ဒီတို့အဖွဲ့သည် ကီးလ်တို့အနားသို့ တုန်တုန်ရင်ရင်ဖြင့် ကပ်လာကြသည်။ သူတို့၏ မျက်နှာများမှာ ယခင်ကထက် ပို၍ ပျက်ယွင်းနေသည်။
“မစ္စတာ ယု ... ခင်ဗျားက ဒီဝံပုလွေဘုရင်ကို သိနေတာလား?”
ဝမ်ဒီက နားမလည်နိုင်စွာဖြင့် မေးလိုက်သည်။
“မဟုတ်ပါဘူး၊ ဒါက ကျွန်တော့်ရဲ့ မွေးရာပါ မှော်စွမ်းအင် ကြောင့်ပါ”
ယု က သူ၏ “သားရဲထိန်း” စွမ်းရည်ကို အကြောင်းပြကာ လိမ်လိုက်သည်။ ၎င်းမှာ အဆင့်နိမ့် သားရဲများနှင့် ပတ်သက်ပြီးလှည့်စားရန် အကောင်းဆုံး အကြောင်းပြချက်ပင်။
“မွေးရာပါ မှော်စွမ်းအင် ဟုတ်လား?”
ဝမ်ဒီက ကြောင်သွားပြီး သားဖြစ်သူကို ကြည့်လိုက်သော်လည်း ရိုင်ယန်ကလည်း နားမလည်ဟန်ဖြင့် ခေါင်းခါပြသည်။
“ထပ်မမေးနဲ့တော့။ ဒါက ဆင့်ခေါ်သားရဲတွေနဲ့ မိစ္ဆာသားရဲတွေကို စိတ်ကြိုက် ထိန်းချုပ်နိုင်တဲ့ စွမ်းရည်လို့ပဲ မှတ်ထားလိုက်။ ဒါကြောင့်လည်း သူ့ကို ငါ ခေါ်လာတာ”
ကီးလ်က အကျဉ်းချုံး ရှင်းပြပြီး ယု ကို ဆွဲခေါ်သွားတော့သည်။
ဒါဟာ ဝမ်ဒီနဲ့ ရိုင်ယန်တို့အတွက် စိုးရိမ်စရာ ဖြစ်လာသည်။ ‘အကယ်၍ မနက်ဖြန် ကျရင်လည်း ယု က ချီလင်ကို ဒီလိုပဲ အလွယ်တကူ ထိန်းချုပ်လိုက်ရင် ငါတို့ အစီအစဉ်တွေ ပျက်ကုန်တော့မှာပေါ့’ ဟု ဝမ်ဒီက တွေးတောနေသည်။
သို့သော် ရိုင်ယန်ကတော့ အေးဆေးစွာပင် -
“မပူပါနဲ့ အဖေ... ဆရာကြီးက သူ့မှာ အစီအစဉ် ရှိတယ်လို့ ပြောထားတယ်”
ထိုညတွင် သူတို့ စခန်းချကြသည်။ ကီးလ်နှင့် ယု မှာ ဘေးကင်းစေရန် သူတို့ကိုယ်တိုင် ယူလာသော အစားအစာများကိုသာ ချက်ပြုတ်စားသောက်ကြသည်။ ယု ၏ လက်ရာမှာ အလွန်ကောင်းမွန်လှသဖြင့် ကီးလ်မှာ ကျေနပ်နေမိသည်။
အတူပါလာသော စစ်သည်များမှာမူ ယု ကို ကြည့်ကာ မနာလိုဖြစ်နေကြသည်။ သူတို့မှာတော့ အကြမ်းပတမ်း ချက်ထားသော အစာများကို စားရင်း၊ ယု ကတော့ ချောမောလှပသော ဆရာမလေးနှင့်အတူ အရသာရှိသော ဟင်းလျာများကို စားနေသည် မဟုတ်ပါလား။
ထိုညတွင်လည်း ကီးလ်နှင့် ယု တို့ တဲတစ်လုံးတည်းမှာပင် အတူအိပ်ကြသည်။ လမ်းခရီးတစ်လျှောက် ဟန်ဆောင်စေ့စပ်ထားသူများအဖြစ် နေလာခဲ့သဖြင့် ယခုမူ ယု မှာ ယဉ်ပါးနေပြီဖြစ်သည်။ တခါတရံ ညဘက်တွင် ကီးလ်က သူ့ကို မီးမှော်ပညာ သင်ပေးတတ်သလို၊ မှော် ပညာဖြည့်တင်းခြင်းကိုလည်း ပုံမှန်လုပ်ဆောင်ကြသည်။ ယု သည် ကီးလ်၏ အိပ်ပျော်နေသော မျက်နှာလေးကို ကြည့်ရင်း ဖက်ထားချင်စိတ် ပေါက်လာသော်လည်း အိုင်းရှာ၏ “ဆရာမ ကီးလ်ကို ရအောင်ယူပါ” ဆိုသည့် စကားကို သတိရကာ စိတ်ကို ထိန်းလိုက်ရသည်။
...
နောက်တစ်နေ့ မနက်တွင်တော့ အမဲလိုက်အဖွဲ့တစ်ခုလုံးမှာ အားတက်သရော ရှိနေကြသည်။ သူတို့အားလုံး
ကြက်သွေးရောင် မီးလျှံကျောက် ကို သိမ်းပိုက်ရန် ၊ မီးလျှံ ချီလင် ကို အမဲလိုက်ရန် ၊ မီးလျှံစုန်းမ နှင့် သူမ၏ တပည့်ကို အပြတ်ရှင်းရန် စသည့် ရည်မှန်းချက် ပန်းတိုင် သုံးခု ကို အောင်မြင် စွာ လုပ်ဆောင်နိုင်ရန် စိတ်လှုပ်ရှား လျက်ရှိကြသည်။
ဝမ်ဒီကလည်း ယနေ့တွင် လူတိုင်း အားအင်ပြည့်ဝနေစေရန် မှော် ဆေးရည်များကို တိုက်ကျွေးထားသည်။ ဤလူအုပ်ကြီးမှာ ယခုအခါ မာန်ဖီနေသော ဝံပုလွေများကဲ့သို့ပင်။ ကီးလ် အားနည်းသွားမည့် အချိန်ကို စောင့်ဆိုင်းရင်း သူမကို တိုက်ခိုက်ရန် ချောင်းမြောင်းနေကြတော့သည်။