အခန်း (၇၅) - ကြက်သွေးရောင် မီးလျှံကျောက် (၂)
ဝမ်ဒီသည် ယု နှင့် ကီးလ်တို့ကို စံအိမ်၏ မြေအောက်ထပ်သို့ ဦးဆောင်ခေါ်သွားခဲ့သည်။ ထိုနေရာမှာ လုံခြုံစွာ ပိတ်ဆို့ထားပြီး လျှို့ဝှက်ကိစ္စများကို ဆွေးနွေးရန် အကောင်းဆုံးနေရာပင် ဖြစ်သည်။
အပြင်လူများ ခိုးနားမထောင်နိုင်ကြောင်း အကြိမ်ကြိမ် အတည်ပြုပြီးနောက် ဝမ်ဒီသည် ကီးလ်အား ကြက်သွေးရောင် မီးလျှံကျောက် အကြောင်းကို စတင်ပြောပြတော့သည်။
“မစ္စ ကီးလ်... လွန်ခဲ့တဲ့ နှစ်ပေါင်းတစ်ရာကျော်ကတည်းက ငြိမ်သက်နေတဲ့ မီးတောင်တစ်ခု မကြာသေးခင်ကမှ ရုတ်တရက် ပေါက်ကွဲသွားတာကို ခင်ဗျား သတိထားမိမှာပါ?”
ကီးလ်သည် မြေပုံပေါ်ရှိ “လာဒါ” မီးတောင် တည်နေရာကို ကြည့်ကာ ခေါင်းငြိမ့်ပြလိုက်သည် ။
“ဒါကို မကြာသေးခင်ကပဲ ကြားလိုက်ရတယ်။ အမှန်ဆိုရင် ‘လာဒါ’ က ငြိမ်းနေတဲ့ မီးတောင်ဖြစ်သင့်တာ၊ အခုလို ရုတ်တရက် ပေါက်ကွဲတာကတော့ တကယ်ကို မမျှော်လင့်ထားတဲ့ ကိစ္စပဲ။ ဒါပေမဲ့ ဒါက သဘာဝဖြစ်စဉ်တစ်ခုပဲ မဟုတ်လား? ဒီကျောက်မျက်ရတနာနဲ့ ဘာဆိုင်လို့လဲ?”
ကီးလ်က ထိုသို့ပြောသော်လည်း သူမ၏ မျက်ဝန်းများကတော့ မြေပုံပေါ်က မီးတောင်တည်နေရာမှ ခွာမရတော့ပေ။
“ပြဿနာက အဲ့ဒီမှာပဲ။ မီးတောင်ပေါက်ကွဲပြီးတာနဲ့ အင်ပါယာက ကယ်ဆယ်ရေးအဖွဲ့တွေကို ချက်ချင်း စေလွှတ်ခဲ့တယ်၊ ဒါပေါ့... ကျွန်တော်တို့ ကာပယ်လာ မိသားစုလည်း အဲ့ဒီထဲမှာ ပါတာပေါ့”
ဝမ်ဒီက ခပ်ပြုံးပြုံးဖြင့် ပြောလိုက်သည်။
စိတ်ထဲတွင်တော့— ‘ငါတို့ ကာပယ်လာ မိသားစုက အာဏာတင် မဟုတ်ဘူး၊ ကယ်ဆယ်ရေးနဲ့ ကူညီရေး လုပ်ငန်းတွေမှာလည်း ဘယ်သူ့ထက်မဆို ပိုပြီး စွမ်းဆောင်နိုင်တယ်’ ဟု ဂုဏ်ယူနေသည်။ သို့သော် ကီးလ်က ဘာမှ မတုံ့ပြန်သဖြင့် သူဆက်ပြောလိုက်သည် ။
“ကယ်ဆယ်ရေး လုပ်ငန်းတွေ လုပ်နေတုန်း မီးတောင်က တဖြည်းဖြည်း ပြန်ငြိမ်သွားတယ်။ ဒါပေမဲ့ အာရုံခံစားမှု အလွန်ကောင်းတဲ့ ကျွန်တော့် မိသားစုဝင် တစ်ယောက်က မီးတောင်ထဲမှာ တစ်ခုခု ရှိနေတယ်လို့ ခံစားမိခဲ့တယ်။ ဒါနဲ့ ကယ်ဆယ်ရေး လုပ်ငန်းတွေ ပြီးတဲ့အခါ သူက သတ္တိရှိတဲ့ လူအချို့ကို စုစည်းပြီး တခြားလူတွေ မသိအောင် မီးတောင်ပေါ်ကို တက်သွားခဲ့ကြတယ်။ သူတို့ဟာ ဂူတစ်ခုရဲ့ အနက်ရှိုင်းဆုံးနေရာမှာ သားရဲတစ်ကောင်ကို တွေ့ခဲ့ကြတယ်လို့ ဆိုတယ်။ အဲ့ဒီ သားရဲက ခြင်္သေ့ခေါင်း၊ သမင်ဦးချိုနဲ့ နဂါးအမြီး ရှိပြီး တစ်ကိုယ်လုံးမှာလည်း မီးတောက်တွေ ဖုံးလွှမ်းနေတယ်တဲ့”
ယု ၏ တိုးညင်းသော ဟောက်သံလေးမှလွဲ၍ ပတ်ဝန်းကျင်တစ်ခုလုံး တိတ်ဆိတ်သွားသည်။ ဝမ်ဒီသည် မျက်မှောင်ကြုတ်နေသော ကီးလ်ကို တစ်ချက်ကြည့်လိုက်ပြီး ဖြည်းညှင်းစွာ ပြောလိုက်သည် ။
“မီးလျှံ ချီလင် “
သားရဲ၏ အမည်ကို ကီးလ်က ချက်ချင်း ပြောလိုက်သည်ကို ကြားသည့်အခါ ဝမ်ဒီက အံ့ဩတကြီး ချီးကျူးလိုက်သည် ။
“မစ္စ ကီးလ်ဟာ ထိပ်တန်းမှော်ဆရာမဆိုတဲ့ ဂုဏ်နဲ့အညီ တကယ်ကို ထူးချွန်တာပဲ၊ သားရဲရဲ့ ပုံစံကို ကြားရုံနဲ့ ဘာမှန်း ချက်ချင်း သိတာပဲ။ ဟုတ်ပါတယ်... ဒါဟာ ‘မီးလျှံ ချီလင်’ ပဲ! ကျွန်တော်လည်း ဒါကို သိဖို့အတွက် စာအုပ်တွေကြားထဲမှာ နေ့ရောညပါ အချိန်ကုန်ခံပြီး ရှာခဲ့ရတာ”
သို့သော် ကီးလ်သည် မြှောက်ပင့်စကားများကို နှစ်သက်သူ မဟုတ်ပေ။ သူမသည် အတွေးနက်နေဟန်ဖြင့် မျက်မှောင်ကြုတ်ကာ ပြန်ပြောလိုက်သည် ။
“ငါ ချီလင် အကြောင်းကို စိတ်ဝင်စားနေတာ ကြာပြီ။ ဒါပေမဲ့ ချီလင် ဆိုတာ အရှေ့ဘက် တိုက်ကြီး မှာပဲ ရှိတဲ့ ဒဏ္ဍာရီလာ သားရဲလေ။ ငါတို့ အင်ပါယာထဲမှာ ဘာလို့ ရုတ်တရက် ပေါ်လာရတာလဲ?”
လူတိုင်း သိထားကြသည်မှာ အင်ပါယာ တည်ရှိသော တိုက်ကြီးနှင့် အရှေ့ဘက် တိုက်ကြီးတို့မှာ ကျယ်ပြောလှသော သမုဒ္ဒရာကြီးဖြင့် ခြားထားခြင်း ဖြစ်သည်။
“အဲ့ဒါကိုတော့ ကျွန်တော်လည်း မသိဘူး။ ဒါပေမဲ့ အဲ့ဒီ ‘မီးလျှံ ချီလင်’ က တစ်ခုခုကို စောင့်ကြပ်နေပုံရတယ်။ ဒါနဲ့ ချီလင် အပြင်ထွက်သွားတဲ့ အချိန်မှာ ကျွန်တော့်လူတွေက အနားကို ကပ်ကြည့်တဲ့အခါ မီးတောက်တွေ တောက်လောင်နေတဲ့ ကျောက်စိမ်းတစ်ခုကို တွေ့ခဲ့ကြတယ်။ ဒါပေမဲ့ သူတို့ မကောက်ယူနိုင်ခင်မှာပဲ ချီလင်က ပြန်ရောက်လာပြီး သူတို့အားလုံးကို သတ်ပစ်လိုက်တယ်။ ကံကောင်းစွာနဲ့ ကျွန်တော့်ရဲ့ လက်အောက်ငယ်သား တစ်ယောက်ကတော့ ဆုံးဖြတ်ချက်ပြတ်ပြတ်သားသားနဲ့ ချောက်ထဲ ခုန်ချပြီး ထွက်ပြေးနိုင်ခဲ့လို့ အသက်ရှင်ခဲ့တာ။ သူ ပြန်ရောက်လာချိန်မှာလည်း စိတ်တွေ မတည်မငြိမ် ဖြစ်နေလို့ ဘယ်သူမှ ဂရုမစိုက်ခဲ့ကြဘူး။ မကြာသေးခင်က သူ သတိကောင်းကောင်း ပြန်ရလာတော့မှ ဒီအဖြစ်အပျက်ကို သိခဲ့ရတာပါ”
နားထောင်ပြီးနောက် ကီးလ်က တီးတိုး ရေရွတ်လိုက်သည် ။
“မီးတောက်တွေ တောက်လောင်နေတဲ့ ကျောက်စိမ်း... သံသယဖြစ်စရာ မရှိဘူး၊ ဒါဟာ ကြက်သွေးရောင် မီးလျှံကျောက် ပဲ ဖြစ်ရမယ်”
ဝမ်ဒီက ကီးလ် စိတ်ဝင်စားသွားပြီမှန်း သိသဖြင့် ဆက်ပြောသည် ။
“ကျွန်တော်တို့ အခု အဲ့ဒီ ရတနာကျောက်ကို သွားယူဖို့အတွက် အဖွဲ့တစ်ခု စုစည်းနေပါတယ်။ မီးလျှံစုန်းမ အနေနဲ့.. ကျွန်တော်တို့ကို ကူညီပေးဖို့ စိတ်ဝင်စားပါသလား?”
ထိုအခါမှ ကီးလ်သည် ဝမ်ဒီ၏ ရည်ရွယ်ချက်ကို နားလည်သွားသည်။ ဝမ်ဒီ၏ အဖွဲ့မှာ အစွမ်းမလုံလောက်သဖြင့် သူမ၏ အကူအညီကို လိုချင်နေခြင်း ဖြစ်သည်။
“ငါ ကူညီပေးလို့ ရပါတယ်၊ ဒါပေမဲ့ ငါ့အတွက် ဘာအကျိုးအမြတ် ရမှာလဲ?”
ဝမ်ဒီက ယုံကြည်ချက်ရှိရှိ ပြုံးလျက် ကီးလ်ကို ကြည့်ကာ ပြောလိုက်သည် ။
“ချီလင် က ခင်ဗျားအပိုင်၊ ကျောက်မျက်ရတနာက ကျွန်တော့်အပိုင်။ ဘယ်လိုလဲ?”
ကီးလ်မှာ အစက အံ့ဩသွားသော်လည်း ဝမ်ဒီသည် ချီလင်အကြောင်း သုတေသန လုပ်ထားပြီးဖြစ်သဖြင့် ၎င်း၏ အသုံးဝင်ပုံကိုလည်း သိထားမည်ဖြစ်ကြောင်း နားလည်လိုက်သည်။
ရေခဲနဂါးကဲ့သို့ပင် ချီလင်သည် သဘာဝ မှော်စွမ်းအားများမှ မွေးဖွားလာသော ဒဏ္ဍာရီလာ သားရဲကြီး ဖြစ်သည်။ ၎င်း၏ သွေးသည် မီးဓာတ်မှော်ဆရာများ၏ စွမ်းအားကို ဒြပ်စင်ဆိုင်ရာ ကန့်သတ်ချက်များမှ လွတ်မြောက်စေနိုင်ပြီး၊ သာမန်မီးလျှံ မှ အရာအားလုံးကို သန့်စင်နိုင်စွမ်းရှိသော “နတ်မီးလျှံ” အဖြစ် ပြောင်းလဲပေးနိုင်သည်ဟု ဆိုကြသည်။
ကီးလ်သည် သူမဘေးတွင် ငိုက်မြည်းနေသော ယု ကို တစ်ချက်ကြည့်လိုက်သည်။ သူမသည် ယု ၏ “သားရဲထိန်းကျောင်းသူ” စွမ်းရည်ကို ရွေးချယ်ခဲ့ခြင်းမှာလည်း တစ်နေ့တွင် အရှေ့ဘက်တိုက်ကြီး၌ မီးလျှံ ချီလင်ကို ရှာဖွေရန် ဆုံးဖြတ်ထားသောကြောင့် ဖြစ်သည်။ ချီလင်၏ သွေးကို သောက်သုံးနိုင်မှသာ ကီးလ်၏ မှော်ပညာမှာ မီးဓာတ်၏ ကန့်သတ်ချက်များကို ကျော်လွန်ပြီး လက်ရှိ လူသားမှော်ပညာထက် သာလွန်သော အဆင့်သို့ ရောက်ရှိနိုင်မည် ဖြစ်သည်။
‘ ကြက်သွေးရောင် မီးလျှံကျောက် ကို မရတာတော့ နှမြောစရာပဲ၊ ဒါပေမဲ့ ဒီမှာတင် ချီလင် ရဲ့ သွေးကို ရနိုင်မယ်ဆိုရင်တော့ အရှေ့ဘက်တိုက်ကြီးအထိ သွားနေရမယ့် ဒုက္ခသက်သာသွားတာပေါ့’
ကီးလ်သည် ထရပ်လိုက်ပြီး ဝမ်ဒီကို ကြည့်ကာ ခပ်ပြုံးပြုံးဖြင့် ပြောလိုက်သည် ။
“ဒါဆိုရင်တော့ သဘောတူပြီ။”