အခန်း (၄၁) - ဒီအချစ်ကျွန်က နည်းနည်းတော့ ထူးဆန်းနေတယ်!

ကိလေသာရမ္မက်ကြီးမည့်ပုံပေါက်သော လူလတ်ပိုင်းအရွယ် အမျိုးသားသည် ကျင်းမိသားစု၏ ဆေးပင်ရှာဖွေရေးအဖွဲ့မှ အဖွဲ့ဝင်ဟောင်းတစ်ဦးဖြစ်သည်။ လက်ရှိတွင် ချီသန့်စင်ခြင်းအဆင့် (၅) သို့ ရောက်ရှိနေပြီး သူ၏ တိုးတက်မှုက ရပ်တန့်နေခဲ့သည်။ သူ၏ ငယ်ရွယ်စဉ်ကာလများ၌ လုံလောက်သော အရင်းအမြစ်များ မရှိခဲ့ဘဲ ယခု အသက်အရွယ်ရလာချိန်တွင် နောက်ထပ်အဆင့်တက်ရန်မှာ ပို၍ပင် ခက်ခဲလာခဲ့သည်။ သူ မည်မျှပင် ကြိုးစားအားထုတ်စေကာမူ သူ၏ တစ်သက်တာလုံး အဆင့် (၅) တွင်သာ တစ်ဆို့နေဖွယ်ရှိပြီး အဆင့် (၆) သို့ ရောက်ရှိရန်မှာမူ မဖြစ်နိုင်တော့ပေ။

ကြိုးစားအားထုတ်မှုက အသီးအပွင့်များ မဖြစ်ထွန်းနိုင်တော့ကြောင်း သဘောပေါက်သွားသောအခါ ထိုအမျိုးသားသည် ပျင်းရိခြင်း၌သာ နစ်မွန်းရန် ရွေးချယ်ခဲ့တော့သည်။ တောင်ပေါ်မှ ဝိညာဉ်ကျောက်တုံးတစ်အိတ်နှင့် ပြန်လာတိုင်း အမျိုးသမီး ကျင့်ကြံသူလေးများအပေါ်၌ ဖြုန်းတီးကာ တစ်ခဏတာ သာယာမှုများတွင် သက်ဆင်းလေ့ရှိသည်။ သူ၏ ခံယူချက်က ရိုးရှင်းပါသည်။ ဘဝက တိုတိုလေးပဲဟာ၊ ဘာလို့ ဆင်းရဲခံနေမှာလဲ။

ယနေ့အစောပိုင်းက ကျင်းဝူချင့်သည် သူ့ကို ခေါ်ယူခဲ့ပြီး ကျင့်ကြံသူတစ်ဦး၏ နောက်ခံအကြောင်းကို စုံစမ်းပေးရန် အကူအညီတောင်းခဲ့သည်။ ကျင်းဝူချင့်က ရုတ်တရက်ကြီး အဘယ်ကြောင့် လူတစ်ဦး၏ နောက်ခံကို စုံစမ်းချင်ရသနည်းဟု ထိုလူလတ်ပိုင်း အမျိုးသားက စပ်စုချင်ခဲ့သည်။ သို့သော် အခြေအနေကို သူ မြင်လိုက်ရသောအခါ အရာအားလုံးက ရှင်းလင်းသွားတော့သည်။

ထိုကောင်မလေး လင်ခဲ့အာပဲလေ။ သူမမှာ ချစ်သူရှိနေသည်။ ထို့အပြင် သူမက ထိုချစ်သူကို လူပုံအလယ်တွင် ပြင်းပြစွာ နမ်းရှိုက်နေခဲ့သည်။

လင်ခဲ့အာက ငယ်ရွယ်ပြီး လှပသည်။ သွယ်လျသော ခါးလေးနှင့် ရှည်လျားသော ခြေတံများရှိပြီး အမြင်အာရုံကို ဖမ်းစားနိုင်သော ကိုယ်ခန္ဓာအချိုးအစားကို ပိုင်ဆိုင်ထားသည်။ သိမ်မွေ့ပြီး ဆွဲဆောင်မှုရှိသော သူမ၏ မျက်နှာလေးက လုံးဝကို ငြင်းဆန်၍မရနိုင်လောက်အောင်ပင်။

ကျင်းဝူချင့်က လင်ခဲ့အာကို သဘောကျနေကြောင်း ထိုလူလတ်ပိုင်းအမျိုးသား သိထားသည်မှာ ကြာပြီဖြစ်သည်။

အစပိုင်းတွင် လင်ခဲ့အာသည် အဖွဲ့သို့ ဝင်ရောက်ရန် အချိန်ဆွဲနေခဲ့ရာ အဖွဲ့ခေါင်းဆောင် ကျင်းကျောက်တိဘက်မှ မကျေနပ်မှုအချို့ ဖြစ်ပေါ်ခဲ့ပြီး သူမကို အစားထိုးရန်ပင် စဉ်းစားခဲ့သည်။ ကျင်းဝူချင့်သာလျှင် သူမကို စောင့်ဆိုင်းရန် အတင်းအကြပ် တောင်းဆိုခဲ့ခြင်းဖြစ်ပြီး တစ်လကျော်ကြာသည်အထိပင် ဖြစ်သည်။ ယခုတော့ သူ စောင့်ဆိုင်းခဲ့ရသော အမျိုးသမီးက အခြားအမျိုးသားတစ်ဦးအပေါ် လူသိရှင်ကြား မေတ္တာပြသခဲ့ရုံသာမက လူပုံအလယ်တွင် အနမ်းပင် ဖလှယ်နေခဲ့သည်။ အကယ်၍ ထိုလူလတ်ပိုင်းအမျိုးသားသာ ဖြစ်မည်ဆိုပါက သူ လက်ခံနိုင်ပေလိမ့်မည်။ ရွေးချယ်စရာ အမျိုးသမီး ကျင့်ကြံသူတွေ အများကြီး ရှိနေတာပဲ။ ဘာလို့ တစ်ယောက်တည်းကို တွယ်ကပ်နေမှာလဲ။

သို့သော် ကျင်းဝူချင့်က ငယ်ရွယ်ပြီး စိတ်လိုက်မာန်ပါလုပ်တတ်သူဖြစ်ရာ ယခုအခါတွင် သူက သတ်ဖြတ်လိုစိတ်များပင် ပေါ်ပေါက်နေလေပြီ။

တစ်ဖက်တွင်မူ လူလတ်ပိုင်းအမျိုးသားအနေဖြင့် ယဲ့ချန်၏ နောက်ခံကို သိရှိရန် အခက်အခဲ မရှိခဲ့ပေ။ မည်သို့ပင်ဆိုစေ ယဲ့ချန်က နာမည်ကြီးသည်လေ။ ငွေလမင်း ဈေးတန်း၏ နံပါတ်တစ် အချစ်ကျွန်ဆိုသော နာမည်ကို လူတိုင်းက မြင်ဖူးသည်၊ သို့မဟုတ် ကြားဖူးကြသည်။ ယဲ့ချန်လို ထူးဆန်းသောသူတစ်ဦးသာလျှင် မိမိ၏ အရင်းအမြစ်များအားလုံးကို အမျိုးသမီး ကျင့်ကြံသူများထံသို့ ပေးအပ်နိုင်စွမ်းရှိသည်။

ယဲ့ချန်၏ နောက်ခံကို နားလည်သွားပြီးနောက် ထိုလူလတ်ပိုင်းအမျိုးသားသည် တစ်ခဏမျှ တုံ့ဆိုင်းသွားခဲ့သည်။ ယဲ့ချန်က ကျင့်ကြံသူလေလွင့်တစ်ဦး မဟုတ်ပေ၊ သူက ကျင့်ကြံခြင်း မိသားစုတစ်ခု၏ အဖွဲ့ဝင်တစ်ဦးဖြစ်သည်။ ကျင့်ကြံသူလေလွင့်များ၌ နောက်ခံအင်အား မရှိကြပေ။ အကယ်၍ သူတို့ သတ်ဖြတ်ခံရမည်ဆိုပါက ကင်းလှည့်အဖွဲ့များက စုံစမ်းစစ်ဆေးရန်ပင် အချိန်ဖြုန်းနေမည် မဟုတ်ပေ။ အပြစ်ဖို့ရန် အခြားကျင့်ကြံသူတစ်ဦးဦးကိုသာ ရှာဖွေလိုက်ကြမည်ဖြစ်သည်။ သို့သော် မိသားစုဝင် တပည့်တစ်ဦးကတော့ ကွာခြားသည်။ သူ့ကို သတ်ဖြတ်ခြင်းက ပြဿနာများဆီသို့ ဦးတည်သွားနိုင်သည်။

သို့သော် ကျင်းဝူချင့်ကတော့ သတ်ဖြတ်ရန် ဆုံးဖြတ်ချက်ချပြီးနေပြီဖြစ်သည်။ ထိုကိစ္စအတွက် အခကြေးငွေအဖြစ် အလယ်အလတ်အဆင့် ဝိညာဉ်ကျောက်တုံးတစ်တုံးကိုပင် ထုတ်ပေးခဲ့သည်။

ခဏတာ တုံ့ဆိုင်းပြီးနောက် လူလတ်ပိုင်းအမျိုးသားက သဘောတူလိုက်သည်။ တကယ်တမ်းတွင် တောင်ပေါ်၌ သူတို့သည် လူသတ်လုယက်ခြင်းကဲ့သို့သော မကောင်းမှုများကို မကြာခဏ ကျူးလွန်ခဲ့ဖူးသည့်အတွက် စိတ်ပိုင်းဆိုင်ရာ ဝန်ထုပ်ဝန်ပိုး လုံးဝမရှိပေ။ ထို့အပြင် ထိုလူလတ်ပိုင်းအမျိုးသားသည် သူ၏ အရှိန်အဝါကို ဖုံးကွယ်ထားနိုင်သော ကျင့်စဉ်တစ်ခုကို ကျင့်ကြံထားပြီး လှံစွပ်များ ပစ်လွှတ်ရာတွင် ကျွမ်းကျင်သူဖြစ်သည်။

ပစ်လွှတ်ရသော လှံစွပ်များသည် အဆင့်နိမ့် မှော်လက်နက်များဖြစ်ပြီး အသံတိတ်ကာ အလွန်လျင်မြန်ပြီး အကာအကွယ် မှော်မန္တန်များကိုပင် ထိုးဖောက်ဝင်ရောက်နိုင်သည်။ ၎င်းတို့တွင် အဆိပ်လည်း သုတ်လိမ်းထားသည်။ အကယ်၍ ပစ်မှတ်က ပြင်ဆင်မထားပါက လှံစွပ်တစ်ချောင်းတည်းဖြင့်ပင် ၎င်းတို့၏ အသက်ကို အဆုံးသတ်နိုင်သည်။ ချီသန့်စင်ခြင်းအဆင့် (၅) နှင့် လူသတ်ရာတွင် အတွေ့အကြုံများစွာရှိသောကြောင့် လူလတ်ပိုင်းအမျိုးသားက ယုံကြည်မှု ရှိနေသည်။

ယဲ့ချန်လား။ သူက ချီသန့်စင်ခြင်းအဆင့် (၄) သာ ရှိသေးသည်။ သူ၏ ကောင်းမွန်သော အရင်းအမြစ်များအားလုံးကိုလည်း မိန်းမများကို ပေးပစ်ခဲ့သည်။ ထိုအမျိုးသား၏ လက်တစ်ချက် ဝှေ့ယမ်းမှုဖြင့် သူ၏ အသက်ကို အဆုံးသတ်နိုင်သည်။ ကျင်းဝူချင့်သည် သူ၏အစ်မထံမှ သိုလှောင်အိတ်ကိုလည်း ငှားရမ်းလာခဲ့သည်။ ထိုအိတ်ထဲသို့ အလောင်းကို အလွယ်တကူ ထည့်သွင်းကာ နောက်မှ တောင်ပေါ်တွင် စွန့်ပစ်နိုင်သည်။ ဖမ်းမိရန် အန္တရာယ် လုံးဝနီးပါး မရှိပေ။

ထိုအချိန်တွင် ယဲ့ချန် လမ်းသွယ်လေးထဲသို့ ဝင်သွားသည်ကို မြင်လိုက်ရသောအခါ လူလတ်ပိုင်းအမျိုးသား၏ မျက်နှာပေါ်တွင် ရက်စက်သော အပြုံးတစ်ခု ပေါ်လာပြီး လျင်မြန်စွာ နောက်ယောင်ခံလိုက်လေသည်။ သူ၏ ခြေသံများက အသံလုံးဝ မထွက်ပေ။ လမ်းသွယ်ထဲတွင် ရပ်နေရင်း ယဲ့ချန်က အလျင်စလိုမရှိဘဲ သက်သောင့်သက်သာ လမ်းလျှောက်နေသည်ကို သူ မြင်လိုက်ရသည်။

မှောင်မိုက်သော လမ်းသွယ်လေးထဲတွင် ယဲ့ချန်မှလွဲ၍ အခြားမည်သူမျှ မရှိပေ။ လူလတ်ပိုင်းအမျိုးသားသည် သူ၏ ဝတ်ရုံထဲမှ ရိုးရှင်းပြီး အလှဆင်မထားသော ပစ်လွှတ်ရသည့် လှံစွပ်တစ်ချောင်းကို ထုတ်ယူလိုက်သည်။ သူက သူ၏ ဝိညာဉ်စွမ်းအင်ကို ထည့်သွင်းလိုက်ရာ လှံစွပ်က အနည်းငယ် တောက်ပသွားပြီးနောက် အမှားအယွင်းမရှိ တိကျစွာဖြင့် လျင်မြန်စွာ ပစ်လွှတ်လိုက်သည်။ ၎င်းက အလွန်လျင်မြန်လွန်းလှရာ ချီသန့်စင်ခြင်း အလယ်အလတ်အဆင့် ကျင့်ကြံသူတစ်ဦးပင်လျှင် သေချာစွာ မြင်နိုင်မည်မဟုတ်ပေ။ လေထဲကို တစ်စုံတစ်ရာ ဖြတ်သန်းသွားသော တိုးညှင်းသည့် အသံလေးကိုသာ ကြားနိုင်ပေလိမ့်မည်။

ထိုအချစ်ကျွန် ယဲ့ချန်တွင် ဝိညာဉ်ကျောက်တုံးများ အများအပြား ပါလာမည်မှာ သေချာသည်။ ထို့အပြင် သူက အဂ္ဂိရတ်ပညာရှင်တစ်ဦးဖြစ်ရာ ဆေးလုံးများ အမြောက်အမြားပင် ပါကောင်းပါလာနိုင်သည်။ ယနေ့ညတွင် ထိုလူလတ်ပိုင်းအမျိုးသားသည် ရေခဲဝိညာဉ်နှင့် မီးလျှံအက၏ သာယာမှုများတွင် နစ်မွန်းကာ တစ်ညတာလုံး အကောင်းဆုံးသော သာယာမှုများကို ခံစားရတော့မည်ဖြစ်သည်။

သို့သော် နောက်တစ်ခဏတွင် လူလတ်ပိုင်းအမျိုးသား၏ မျက်နှာပေါ်၌ အံ့အားသင့်မှုများ ပေါ်လာသည်။ အကြောင်းမှာ သူ့ကို ကျောခိုင်းထားသော ယဲ့ချန်ထံမှ ရွှေရောင်အလင်းတန်းများ တောက်ပလာသောကြောင့်ဖြစ်သည်။ သူက ပစ်လွှတ်လိုက်သော လှံစွပ်ကို အမှန်တကယ်ပင် တားဆီးနိုင်ခဲ့သည်။

ယဲ့ချန်က အဲဒါကို တားဆီးနိုင်ခဲ့တယ်လား။ တစ်စုံတစ်ရာသော ရတနာအမျိုးအစားတစ်ခု ဖြစ်ရမည်။ ကျင့်ကြံသူလေလွင့်များ ပိုင်ဆိုင်သင့်သည့် အရင်းအမြစ်များအားလုံးကို ဤကျိန်စာသင့် မိသားစုများက သိမ်းဆည်းထားပြီး အလွန်အမင်း ချမ်းသာကြွယ်ဝနေကြသည်။ ယဲ့ချန်လို အသုံးမကျသော အချစ်ကျွန်တစ်ယောက်မှာတောင် ထိုကဲ့သို့သော လျှို့ဝှက်လက်နက် ရှိနေသည်။ တကယ်ကို ဒေါသထွက်စရာပင်။

အခြေအနေများ ရှုပ်ထွေးလာပြီဖြစ်ကြောင်း လူလတ်ပိုင်းအမျိုးသား သဘောပေါက်သွားသည်။ သူက ပစ်လွှတ်လိုက်သော လှံစွပ်ကို ချက်ချင်း ပြန်လည်ရယူရန် ကြိုးစားလိုက်ပြီး ထွက်ပြေးရန် ပြင်ဆင်လိုက်သည်။ အကယ်၍ တစ်ချက်တည်းနှင့် မသတ်နိုင်ခဲ့ပါက သူ ချက်ချင်း ထွက်ပြေးရမည်ဖြစ်သည်။ သို့မဟုတ်ပါက အသံများကြောင့် ကင်းလှည့်အဖွဲ့ ရောက်လာပြီး သူ သေချာပေါက် ဒုက္ခရောက်ရပေလိမ့်မည်။

သို့သော် နောက်တစ်ခဏတွင် သူ၏ မျက်နှာပေါ်၌ ထိတ်လန့်မှုများ ဖြတ်ပြေးသွားသည်။ အကြောင်းမှာ မီတာများစွာ အကွာတွင် ရှိနေခဲ့သော ယဲ့ချန်က ရုတ်တရက် လှည့်လာပြီး အံ့မခန်း အရှိန်အဟုန်ဖြင့် သူ့ဆီသို့ ပြေးဝင်လာသောကြောင့်ဖြစ်သည်။ အံ့ဩစရာအကောင်းဆုံးမှာ ယဲ့ချန်၏ လက်ထဲတွင် စိမ်းပြာရောင် ဓားရှည်တစ်လက်က မည်သည့်နေရာမှန်းမသိ ရုတ်တရက် ထွက်ပေါ်လာခြင်းဖြစ်သည်။

ယဲ့ချန်က ဘယ်လိုလုပ် ဒီလောက်မြန်နေရတာလဲ။ ပြီးတော့ သူ့မှာ သိုလှောင်ရေးပစ္စည်းတွေတောင် ရှိသေးတယ်။ ဒီကျိန်စာသင့် မိသားစုတွေက ဘယ်လောက်တောင် ချမ်းသာနေကြတာလဲ။

ဤသည်က လုံးဝ မျှော်လင့်မထားသော အခြေအနေဖြစ်သော်လည်း လူလတ်ပိုင်းအမျိုးသားက သူ၏ ကာကွယ်ရေး မှော်မန္တန်ကို ချက်ချင်း အသက်သွင်းလိုက်သည်။ သူက တစ်ချက်လောက် ခံယူပြီးနောက် ထွက်ပြေးရန် စီစဉ်ထားသည်။

သို့သော် နောက်တစ်ခဏတွင် သွေးများ ပန်းထွက်သွားတော့သည်။ ယဲ့ချန်၏ စိမ်းပြာရောင် ဓားရှည်ရှေ့တွင် သူ၏ ကာကွယ်ရေး မှော်မန္တန်မှာ စက္ကူပါးလေးတစ်ရွက်ကဲ့သို့ အလွန်တရာမှကို ကြွပ်ဆတ်လွန်းနေသည်။ ယဲ့ချန်ကို အနည်းငယ်မျှပင် တားဆီးနိုင်ခြင်း မရှိခဲ့ပေ။ ဓားက မယုံနိုင်လောက်အောင် လျင်မြန်စွာ ရွေ့လျားသွားပြီး လေတိုက်သံပင် မကြားလိုက်ရပေ။ လှံစွပ်ကို ကိုင်ထားသော လူလတ်ပိုင်းအမျိုးသား၏ လက်မောင်းမှာ ချက်ချင်းပင် ပြတ်တောက်သွားတော့သည်။

အဆင့်မြင့် မှော်လက်နက်လား။ ဒီကျိန်စာသင့် အချစ်ကျွန်မှာ အဆင့်မြင့် မှော်လက်နက် ဘယ်လိုလုပ် ရှိနေရတာလဲ။

ယခုအချိန်တွင် လူလတ်ပိုင်းအမျိုးသားမှာ ထွက်ပြေးရန်သာ စဉ်းစားနိုင်တော့သည်။ သို့သော် ယဲ့ချန်က သူ့ဆီသို့ တဖြည်းဖြည်း နီးကပ်လာရာ ထွက်ပြေးရန် အခွင့်အရေး မရှိတော့ပေ။

ရွှမ်း! ရွှမ်း! ရွှမ်း!

လူလတ်ပိုင်းအမျိုးသား၏ လက်မောင်းများနှင့် ခြေထောက်များက လျင်မြန်စွာ ပြတ်တောက်သွားတော့သည်။ သူ မြေပြင်ပေါ်သို့ လဲကျသွားပြီး သူ၏ ကိုယ်လုံးနှင့် ခေါင်းသာ ကျန်ရစ်တော့သည်။

သွေးများဖြင့် ပြည့်နှက်နေသော မြေပြင်ပေါ်တွင် ခေါင်းတစ်လုံးသာ ကျန်တော့ပြီး ညည်းတွားသံများ ထွက်ပေါ်နေဆဲဖြစ်သော လူလတ်ပိုင်းအမျိုးသားကို ကြည့်ရင်း နတ်ဘုရားလေစိမ်းဓားကို ဆုပ်ကိုင်ထားသော ယဲ့ချန်သည် သက်ပြင်းရှည်ကြီးတစ်ချက် ချလိုက်သည်။ သို့သော် သူ၏ နှလုံးသားကမူ ခုန်မြန်နေဆဲဖြစ်သည်။ ၎င်းက ကျင့်ကြံခြင်းလောကတွင် သူ၏ ပထမဆုံး တိုက်ပွဲဖြစ်ပြီး အတော်လေး စိတ်လှုပ်ရှားစရာ ကောင်းလှသည်။

ဖြစ်ရပ်တစ်ခုလုံးက မျက်စိတစ်မှိတ်အတွင်း ပြီးဆုံးသွားသော်လည်း ယဲ့ချန်မှာ တင်းမာမှုများကို မထိန်းချုပ်နိုင်ခဲ့ပေ။ တကယ်တမ်းတွင် ထိုသူ၏ ခြေထောက်များကို ခုတ်ဖြတ်လိုက်စဉ်က သူက ထောင့်ကို သေချာမထိန်းချုပ်နိုင်ခဲ့ဘဲ အနည်းငယ် အပေါ်ရောက်သွားခဲ့သည်။ ဓားကလည်း အလွန်ထက်မြက်လွန်းလှရာ ထိုလူလတ်ပိုင်းအမျိုးသားကို ချက်ချင်းပင် သင်းကွပ်ပြီးသား ဖြစ်သွားစေသည်။

ယဲ့ချန်က သူ့ကို ချက်ချင်း မသတ်ပစ်ခဲ့ရသည့် တစ်ခုတည်းသော အကြောင်းအရင်းမှာ ထိုလူငယ်ကို သူ မတွေ့ရသေးသောကြောင့်ဖြစ်သည်။ အစောပိုင်းက ထိုလူလတ်ပိုင်းအမျိုးသားသည် ချောင်းကြည့်နေသော လူငယ်၏ဘေးတွင် ရပ်နေခဲ့သည်။ ကြိုးကိုင်သူမှာ ထိုလူငယ်သာ ဖြစ်ရမည်။

ယဲ့ချန်၏ အမြင်တွင် မိန်းမတစ်ယောက်အတွက်နှင့် လူသတ်သမား ငှားရမ်းသည်အထိ လုပ်ဆောင်သော အမျိုးသားများသည် ဦးနှောက်ဖွံ့ဖြိုးမှု အားနည်းနေကြောင်း ထင်ရှားသည်။ ၎င်းက လုံးဝကို မိုက်မဲသော လုပ်ရပ်တစ်ခုဖြစ်သည်။ သို့သော် ထိုကဲ့သို့သော လူမိုက်များက အများဆုံး စိတ်လိုက်မာန်ပါ လုပ်တတ်ကြသည်။ ထို့ကြောင့် သူတို့ကို အမြစ်ပြတ် ရှင်းလင်းပစ်ရမည်ဖြစ်သည်။

တစ်ဖက်လူနှင့် ပတ်သက်၍ ယဲ့ချန် ဘာမှမသိထားသောကြောင့် အသက်ရှင်ကျန်ရစ်သူ တစ်ဦးတစ်ယောက်ကို ချန်ထားရန် လိုအပ်သည်။ ယဲ့ချန်က သူ၏ ဓားကို ပြန်ရုပ်သိမ်းလိုက်ပြီး မေးလိုက်သည်။ "မင်းကို ငါ့ကို သတ်ဖို့ ခိုင်းတဲ့ လူငယ်က ဘယ်သူလဲ"

ထိုအချိန်တွင် လူလတ်ပိုင်းအမျိုးသားမှာ မြေပြင်ပေါ်တွင် လဲနေပြီး သူ၏ မျက်နှာက ပြာနှမ်းနေသည်။ ယမန်နေ့ညကပင် သူသည် ပြည့်တန်ဆာအိမ်တွင် သက်သောင့်သက်သာ လဲလျောင်းနေခဲ့သေးသည်။ ယခု မျက်စိတစ်မှိတ်အတွင်းမှာပင် သူ၏ ခြေလက်များကို ဆုံးရှုံးလိုက်ရလေပြီ။ ယဲ့ချန်က သူ့ကို မသတ်လျှင်တောင် သူ သိပ်ကြာကြာ အသက်ရှင်နိုင်တော့မည် မဟုတ်ပေ။

လူလတ်ပိုင်းအမျိုးသားသည် ယဲ့ချန်ကို နာကြည်းမိသော်လည်း ကျင်းဝူချင့်ကို ပို၍ပင် မုန်းတီးမိသည်။ အကယ်၍ မိန်းမတစ်ယောက်အတွက်နှင့် ကျင်းဝူချင့် ရူးသွပ်မနေခဲ့ပါက သူ ဤကဲ့သို့ ဖြစ်လာမည်မဟုတ်ပေ။ သိုလှောင်အိတ်၊ အဆင့်မြင့် မှော်လက်နက်များနှင့် အမြန်နှုန်းအတွက် မှော်မန္တန်များ၊ ထို့အပြင် ကာကွယ်ရေး ရတနာများပါ ပိုင်ဆိုင်ထားသည်။ ဤမျှများပြားသော အရင်းအမြစ်များဖြင့် ယဲ့ချန်ကို အခြေခံအုတ်မြစ်တည်ဆောက်ခြင်းအဆင့် မိသားစုတစ်ခုမှ တပည့်တစ်ဦးဟု အလွယ်တကူ ထင်မှတ်မှားသွားနိုင်သည်။

ဇနီးမယားနှင့် သားသမီးမရှိသော လူလတ်ပိုင်းအမျိုးသားသည် ပူပန်စရာမရှိပေ။ သူက မည်သို့ပင်ဖြစ်စေ သေရတော့မည်ဖြစ်ရာ ကျင်းဝူချင့်ကိုပါ ဆွဲချသွားရန် ဆုံးဖြတ်လိုက်သည်။ သူတို့ အတူတူ သေကြမည်ဖြစ်သည်။

"ကျင်းဝူချင့်၊ ကျွန်တော့်ကို ခိုင်းတာ ကျင်းဝူချင့်ပါ။ သူက လင်ခဲ့အာကို လိုချင်နေတာ၊ ဒါပေမဲ့ ခင်ဗျားကြောင့် သူမက တောင်ပေါ်ကို မသွားတော့ဘူးလေ... အဲဒါကြောင့် သူက ခင်ဗျားကို ရှင်းပစ်ချင်နေတာ... သူက အမှတ် (၃၃) လမ်းမည်းက သူ့အစ်မအိမ်မှာ ရှိတယ်။ သူက ချီသန့်စင်ခြင်းအဆင့် (၅) မှာ ရှိပြီး အဆင့် (၆) ကို တက်လုနီးပါးပဲ။ သူ့အစ်မ ကျင်းကျောက်တိက ချီသန့်စင်ခြင်းအဆင့် (၇) မှာ ရှိတယ်"

လူလတ်ပိုင်းအမျိုးသားက ဤမျှလောက် အလွယ်တကူ ပြောပြလိမ့်မည်ဟု ယဲ့ချန် မျှော်လင့်မထားခဲ့ပေ။ သူက အရာအားလုံးကို တစ်ခါတည်း ဖွင့်ဟပြောဆိုသွားသည်။

ကျင်းဝူချင့်လား။ ချီသန့်စင်ခြင်းအဆင့် (၅) ၊ အဆင့် (၆) ကို ရောက်လုနီးပါး။ ပြီးတော့ သူ့မှာ အစ်မရှိသေးတယ်လား။

ယဲ့ချန်သည် အမြစ်ပြတ် ရှင်းလင်းပစ်ချင်သော်လည်း သူ အနိုင်ရမည်မဟုတ်ဟု စိုးရိမ်မိသည်။ သို့သော် တကယ့်တရားခံကို သူကိုယ်တိုင် ရင်ဆိုင်ရန် ယဲ့ချန် စီစဉ်မထားခဲ့ပေ။ အကယ်၍ တစ်စုံတစ်ယောက်က ငွေလမင်း ဈေးတန်းတွင် သူ့ကို သတ်ရန် လုပ်ကြံသူတစ်ဦးကို ငှားရမ်းခဲ့မည်ဆိုပါက သူကိုယ်တိုင်က ကြိုးကိုင်သူနောက်သို့ လိုက်သင့်ပါသလား။ ယဲ့မိသားစု၏ ဆိုင်များအတွက် ပေးဆောင်ထားသော အခွန်အခများက အချည်းနှီး ဖြစ်သွားမည် မဟုတ်ပါလော။ ယဲ့မိသားစု၏ အဖွဲ့ဝင်တစ်ဦးအနေဖြင့် သူ့မှာ မျက်နှာပန်းလှစရာ မရှိဘူးလား။ တရားမျှတမှုက ဘယ်မှာလဲ။ ဥပဒေက ဘယ်မှာလဲ။

ထို့ကြောင့် ယဲ့ချန်သည် ခေါင်းကို မော့ကာ ကျယ်လောင်စွာ အော်ဟစ်လိုက်သည်။ "ကင်းလှည့်အဖွဲ့ရေ၊ မြန်မြန်လုပ်ကြပါဦး။ တစ်ယောက်ယောက်က ကျွန်တော့်ကို သတ်ဖို့ ကြိုးစားနေတယ်ဗျို့!"