အခန်း (၁) - မာဗယ်စကြဝဠာထဲက သစ်သီးဆိုင်
နယူးယော့ခ်မြို့၊ ၇၃ လမ်း။
"နတ်ဆိုးအသီး ဟုတ်လား။ နာမည်ကလည်း ထူးဆန်းလိုက်တာ"
"ဘာတွေများ ရောင်းတာပါလိမ့်"
"ဝင်ကြည့်ရအောင်လေ"
ဒီအသံကို ကြားလိုက်ရချိန်မှာတော့ ရော်ရှက်ခ်တစ်ယောက် စိတ်အားတက်ကြွသွားခဲ့သည်။ သူက ဝင်လာမည့်ဖောက်သည်အား အကောင်းဆုံး ဝန်ဆောင်မှုပေးရန် အသင့်အနေအထားဖြစ်အောင် ကိုယ်နေဟန်ထားကို ချက်ချင်းပင် မတ်မတ်မတ်မတ် ပြင်ရပ်လိုက်သည်။
ခေါင်းလောင်းသံလို ကြည်လင်သည့် အသံရှင်မှာ ဖက်ရှင်ကျကျ ဝတ်ဆင်ထားပြီး ခန္ဓာကိုယ်အချိုးအစား ပြေပြစ်သည့် ရွှေရောင်ဆံပင်နှင့် မိန်းမချောလေးတစ်ဦးဖြစ်ကာ ရော်ရှက်ခ်၏ ဆိုင်ငယ်လေးထဲသို့ ဝင်လာခဲ့သည်။
"ကြိုဆိုပါတယ်"
ရော်ရှက်ခ်က နွေးထွေးသည့် အပြုံးဖြင့် ဖောက်သည်အား ဆီးကြိုနှုတ်ဆက်လိုက်သည်။
"ဆိုင်ဝန်ထမ်းက ဒီလောက်ချောတဲ့ ကောင်လေးဖြစ်နေမယ်လို့ မထင်ထားဘူး" ရွှေရောင်ဆံပင်ပိုင်ရှင်လေးမှာ ပွင့်လင်းရဲတင်းသည့် စရိုက်ရှိပုံရပြီး တွေ့တွေ့ချင်းပင် ရော်ရှက်ခ်အား မျက်စပစ်ပြလိုက်သည်။
"ချီးကျူးတဲ့အတွက် ကျေးဇူးပါ အချောလေး။ မင်းရဲ့အလှတရားကြောင့် ဒီဆိုင်ငယ်လေးမှာ အရောင်အသွေးတွေ ပိုစုံသွားသလိုပဲ" ရော်ရှက်ခ်က ဤသို့သောအခြေအနေမျိုးနှင့် ယဉ်ပါးနေပြီဖြစ်ရာ တည်ငြိမ်စွာဖြင့်ပင် သူမအား ပြုံးပြလိုက်သည်။
ထို့နောက် သူမ၏ အီစီကလီအကြည့်များကိုလည်း အလိုက်တသိ ပြန်လည်တုံ့ပြန်လိုက်သည်။ မိန်းကလေးကလည်း သဘောကျစွာ လက်ခံလိုက်ပြီးနောက် သူမ၏ အကြည့်များက ပြခန်းထဲရှိ ရောင်စုံသစ်သီးများဆီသို့ ရောက်သွားတော့သည်။
"ကောင်လေး ဒါတွေက ဘာအသီးတွေလဲ"
သူမက သစ်သီးများကို အံ့သြတကြီး ကြည့်လိုက်ပြီးနောက် ခဏရပ်ကာ "ဒါတွေက ဟိုအသီးတွေလား" ဟု မေးလိုက်သည်။
"ဟုတ်ပါတယ်။ ဒါတွေက နတ်ဆိုးအသီးတွေပါ။ နာမည်က နည်းနည်း ကြောက်စရာကောင်းပေမဲ့ အရမ်းကို အစွမ်းထက်တဲ့ နတ်ဆိုးအသီးတွေပါ" ရော်ရှက်ခ်က မိန်းကလေးအား စတင်မိတ်ဆက်ပေးလိုက်သည်။
မိန်းကလေးက မျက်ခုံးပင့်လိုက်ပြီး "အစွမ်းထက်တယ် ဆိုတာက အရမ်းအရသာရှိတာကို ပြောတာလား"
ဒီနေရာမှာတော့ သူမက သံသယဖြစ်ဟန်ကို ဖုံးကွယ်မထားနိုင်တော့ပေ။ ဒီအရောင်စုံ အရာတွေကို တကယ်ပဲ စားလို့ရတာလား။ အမည်းရောင်ကြီးတောင် ပါသေးသည်။ ဒါက အရမ်းလွန်လွန်းနေပြီ မဟုတ်လား။ မြင်ရုံနဲ့တင် ကြောက်စရာကောင်းနေတာကို စားဖို့ဆိုတာ ဝေလာဝေးပင်။
"မဟုတ်ဘူးဗျ။ ဒီနတ်ဆိုးအသီးတွေကို စားလိုက်တာနဲ့ အင်မတန် အံ့မခန်းနိုင်တဲ့ စူပါစွမ်းအားတွေကို ရရှိလာလိမ့်မယ်လို့ ပြောတာပါ။ ကျွန်တော်ပြောတာ ယုံနိုင်စရာမရှိဘူး ဆိုတာ သိပေမဲ့ ဘုရားစူးရပါစေဗျာ။ ကျွန်တော်ပြောတာတွေ အကုန်လုံးက အမှန်တွေချည်းပါပဲ" ရော်ရှက်ခ်က ရွှေစင်ငွေစင်လို စစ်မှန်သည့် ရိုးသားမှုများ အပြည့်ဖြင့် ယုံကြည်ချက်ရှိရှိ ပြောလိုက်သည်။
"ဝိုး.. ဒါဆို ဒါတွေက မှော်စာအုပ်တွေထဲကလို ကျိန်စာသင့်နေတဲ့ အသီးတွေပေါ့" မိန်းကလေးက ရော်ရှက်ခ်အား လူအတစ်ယောက်လို ကြည့်ကာ လှောင်ပြောင်လိုက်သည်။
ဒီကောင်လေးက ရုပ်ရည်သန့်သလောက် စိတ်ပိုင်းဆိုင်ရာ နည်းနည်း ချို့ယွင်းနေပုံရသည်။ မဟုတ်လျှင် အခြားလူများကို အရူးလို ဘာလို့ လာလုပ်နေမည်နည်း။ စားလိုက်ရင် စူပါစွမ်းအားတွေ ရလာမယ်တဲ့လား။ စားလိုက်ရင် နတ်ပြည်တက်သွားမယ်လို့ ပြောလိုက်တာကမှ ပိုယုံစရာကောင်းဦးမည်။
"နတ်ဆိုးအသီးတွေရဲ့ မူလဇစ်မြစ်ကတော့ လျှို့ဝှက်ချက်တစ်ခုပါပဲ။ ဒါပေမဲ့ မင်းက အဲဒီလို နားလည်ထားတယ် ဆိုရင်လည်း မဖြစ်နိုင်တာတော့ မဟုတ်ဘူး။ ကဲ အချောလေး.. ဒီမှာရှိတဲ့ နတ်ဆိုးအသီးတွေ အကြောင်းကို မိတ်ဆက်ပေးပါရစေ"
ရော်ရှက်ခ်က သူမ၏ အထင်သေးသည့် အကြည့်များကို အလိုအလျောက် လျစ်လျူရှုလိုက်ပြီး အရှက်မရှိ ဆက်ပြောလိုက်သည်။ သူမကလည်း အားနေသည်ဖြစ်ရာ မငြင်းဆန်ဘဲ "ရတာပေါ့" ဟု ပြန်ဖြေလိုက်သည်။ ရော်ရှက်ခ်က ဘယ်လောက်တောင် အာဘောင်အာရင်းသန်သန်နဲ့ လေလုံးထွားနိုင်မလဲ ဆိုတာကို သူမက တကယ် သိချင်နေခဲ့သည်။
"အချောလေး ဒီမှာကြည့်ပါဦး။ ဒီအသီးကို ချောမွေ့-ချောမွေ့ အသီး လို့ ခေါ်တယ်။ ဒီအသီးကို စားလိုက်ရင် လူတစ်ယောက်ရဲ့ အသားအရေက အရမ်းကို ချောမွေ့သွားလိမ့်မယ်"
"ဒါကတော့ လွင့်မျော-လွင့်မျော အသီး ပဲ။ ဒါကို စားပြီးသွားရင် ကိုယ့်ရဲ့ ဆွဲငင်အားကို ထိန်းချုပ်နိုင်တဲ့ စွမ်းအားကို ရရှိမှာဖြစ်ပြီး ထီးလေးတစ်ချောင်းနဲ့တင် လေပေါ်မှာ လွင့်မျောနေနိုင်တယ်"
"ဒီအသီးကတော့..."
"ဆိုင်ရှင်.. နင်က ငါ့ကို အရူးလို့ ထင်နေတာလား"
"ဒီလို သဘောမျိုး မဟုတ်ပါဘူးဗျာ။ ကျွန်တော်ပြောတာတွေက နည်းနည်း လွန်လွန်းတယ်လို့ ထင်ကောင်းထင်နိုင်ပေမဲ့.. ကျွန်တော်တို့ဆီက အသီးတိုင်းမှာ မြည်းကြည့်လို့ရတဲ့ နမူနာလေးတွေ ရှိပါတယ်။ မြည်းကြည့်လိုက်တာနဲ့ သိသွားမှာပါ"
ဟုတ်ပါသည်။ ရော်ရှက်ခ်၏ ဆိုင်ရှိ အသီးများတွင် အသုံးပြုသူအား ငါးမိနစ်တိတိ သက်ဆိုင်ရာ စွမ်းအားများကို ပေးစွမ်းနိုင်သည့် အထူးနမူနာများ ရှိသည်။
"ငါက ရူးနေလို့လား"
မိန်းကလေးက ထိုစကားတစ်ခွန်းသာချန်ရစ်ကာ လှည့်ပင်မကြည့်တော့ဘဲ ထွက်သွားတော့ရာ သူမ၏ အေးစက်စက် အသံလေးသာ အဝေးမှ လွင့်ပျံလာခဲ့သည်။
"ဟူး.. နောက်တစ်ခါ ဒီလိုဖြစ်ပြန်ပြီ"
ထွက်ခွာသွားသည့် မိန်းကလေး၏ ကျောပြင်ကို ကြည့်ရင်း ရော်ရှက်ခ် ခါးသီးစွာ ပြုံးလိုက်မိသည်။ လွန်ခဲ့သည့် တစ်လတာကာလအတွင်း သူသည် ဤကဲ့သို့သော အခြေအနေမျိုးကို အကြိမ်ပေါင်းများစွာ ကြုံတွေ့ခဲ့ရပြီးဖြစ်သည်။
လူအများစုမှာ စားရန်ရည်ရွယ်ထားသည့် ထိုရောင်စုံနှင့် ပုံပန်းသဏ္ဌာန် ထူးဆန်းသော အသီးများကို မြင်သည်နှင့် ချက်ချင်းပင် ကြောက်လန့်တကြား ထွက်ပြေးသွားတတ်ကြသည်။ ရော်ရှက်ခ်တွင် မြည်းစမ်းရန် နမူနာများ ရှိသော်လည်း လူအများစုမှာ ထိုကဲ့သို့ ထူးဆန်းသည့် အရာများကို ပါးစပ်ထဲသို့ အလွယ်တကူ ထည့်ရန် မရဲကြပေ။ တစ်ခါတစ်ရံ အနည်းငယ်မျှ စမ်းစားကြည့်သူများ ရှိလျှင်ပင် အသီး၏ အသားကို တစ်ကိုက် ကိုက်လိုက်သည်နှင့် မစင်ကဲ့သို့ ဆိုးရွားလှသည့် အရသာကြောင့် မျိုမချနိုင်ဘဲ ချက်ချင်း ထွေးထုတ်ပစ်တတ်ကြရာ သက်ဆိုင်ရာ စွမ်းအားများကို မရရှိခဲ့ကြပေ။
ဆိုလိုသည်မှာ ရော်ရှက်ခ်အနေဖြင့် တစ်ဖက်လူ မြည်းစမ်းကြည့်ချင်လာအောင် အပြည့်အဝနီးပါး ယုံကြည်လာစေရန် ဖျောင်းဖျရမည် ဖြစ်သည်။ မြည်းစမ်းကြည့်ရန်သာ သက်သက် ဖျောင်းဖျနေခြင်းက အချည်းနှီးသာ ဖြစ်သည်။ သို့သော် အသီးတစ်လုံး စားရုံဖြင့် စူပါစွမ်းအားများ ရရှိနိုင်သည်ဆိုသော အဓိပ္ပာယ်မရှိသည့် စကားကို မည်သည့် ပုံမှန်လူက ယုံကြည်မည်နည်း။
ဒီကမ္ဘာမှာ ကပ္ပတိန် အမေရိက ရှိနေရင်တောင်မှ ယုံနိုင်စရာ မရှိပေ။
နောက်ထပ် အလွန်အရေးကြီးသည့် အချက်တစ်ခုလည်း ရှိသေးသည်။ အစောပိုင်း ကာလများတွင် သစ်သီးများကို ငွေကြေးဖြင့် ဝယ်ယူနိုင်သော်လည်း ကာလတစ်ခုကြာပြီးနောက် ရွှေဖြင့်သာ ဝယ်ယူရတော့မည် ဖြစ်သည်။ ထိုအချိန်ရောက်လျှင် ငွေရှိလျှင်တောင် ဝယ်နိုင်မည် မဟုတ်တော့ပေ။ ငွေကို ရွှေအဖြစ် အရင်ပြောင်းရမည် ဖြစ်ရာ ယင်းက မျက်မြင်မရသော အတားအဆီးတစ်ခု ထပ်တိုးလာခြင်းပင် ဖြစ်သည်။
"ဒီပုံအတိုင်းဆိုရင် အစပြုသူ မစ်ရှင်ကို ဘယ်တော့များမှ ပြီးနိုင်ပါ့မလဲ" ရော်ရှက်ခ်က တွေးကြည့်ရုံဖြင့် အနည်းငယ် စိုးရိမ်လာသည်။
ယနေ့နံနက်ကပင်။
စတပ်ခ် အင်ဒတ်စထရီ မှ အသစ်ထုတ်လုပ်လိုက်သည့် ဂျယ်ရီကို ဒုံးကျည်အကြောင်း မီဒီယာမျိုးစုံက သတင်းများ အကျယ်တဝင့် ဖော်ပြနေခဲ့ကြသည်။ ဟုတ်သည်။ ဤ သေမင်းတမန် ဒုံးကျည်ကြီးကို ဖန်တီးလိုက်ပြီ ဖြစ်သည်။ ဒါဆိုလျှင် တိုနီ စတပ်ခ် ကို လက်စွပ်ဆယ်ကွင်းဂိုဏ်း (တန်းရင်းစ်) က ပြန်ပေးဆွဲသွားပြီးနောက် အိုင်းယွန်းမန်း အဖြစ်သို့ ပြောင်းလဲသွားမည့်နေ့က သိပ်ဝေးတော့မည် မဟုတ်ပေ။
ထိုအချိန်တွင် မာဗယ် စူပါဟီးရိုး ခေတ်ကြီး တရားဝင် စတင်လာမည်ဖြစ်ပြီး ကမ္ဘာမြေကြီးသည် ဂြိုဟ်သားများ၊ စက်ရုပ်တပ်မတော်များ၊ အခြားအတိုင်းအတာတစ်ခုမှ နတ်ဆိုးများနှင့် အာကာသစက်ရုပ်များ၏ နည်းလမ်းမျိုးစုံဖြင့် ကျူးကျော်ခြင်းကို ခံရတော့မည် ဖြစ်သည်။
သာမန်လူတစ်ယောက်အနေဖြင့် မြေစာပင် ဖြစ်ရုံမှတစ်ပါး အခြားရွေးချယ်စရာ ရှိမည်မဟုတ်ပေ။ ထိုအချိန်ကျလျှင် သူဘယ်လို သေသွားမှန်းတောင် သိလိုက်မည် မဟုတ်ပေ။ ထို့ကြောင့် ရော်ရှက်ခ်၏ တစ်ခုတည်းသော မျှော်လင့်ချက်မှာ စနစ်၏ အစပြုသူ မစ်ရှင်သာ ဖြစ်သည်။
မှန်သည်။ ရော်ရှက်ခ်သည် ဤကမ္ဘာမှလူ မဟုတ်ဘဲ အပြာရောင်ကြယ်မှ ကူးပြောင်းလာသူ တစ်ဦးဖြစ်သည်။ ပြောရလျှင် ယခင်ဘဝက သူ၏ ဘဝမှာ အတော်လေး ကောင်းမွန်ခဲ့သည်။
ကောလိပ်မှ ဘွဲ့ရပြီးနောက် အခြားသော အတန်းဖော်များကဲ့သို့ သမိုင်းတစ်လျှောက် အခက်ခဲဆုံး အလုပ်အကိုင်ရာသီတွင် သန်းနှင့်ချီသော အခြားလူများနှင့် ယှဉ်ပြိုင်ကာ ကြမ်းတမ်းလှသည့် အလုပ်အကိုင် ဈေးကွက်ထဲတွင် ရုန်းကန်ခဲ့ရခြင်း မရှိပေ။ ရော်ရှက်ခ်က ဘွဲ့ရပြီးသည်နှင့် အိမ်ပြန်ကာ ဖခင်ဖြစ်သူ ချန်ထားရစ်ခဲ့သည့် မျက်မှန်ဆိုင်ကို အမွေဆက်ခံခဲ့သည်။ ပိုက်ဆံ အများကြီး မရသော်လည်း သာမန် ရုံးဝန်ထမ်းတစ်ဦးထက်တော့ သေချာပေါက် ပိုအဆင်ပြေသည်။
ဘွဲ့ရပြီး နှစ်ဝက်အကြာတွင် အဘက်ဘက်မှ ပြည့်စုံသည့် ကောင်မလေးတစ်ဦးနှင့်လည်း ချောချောမွေ့မွေ့ ဖူးစာဆုံခဲ့ကာ နှစ်ကုန်တွင် စေ့စပ်ရန်ပင် စီစဉ်ထားခဲ့ပြီး ဖြစ်သည်။ အရာအားလုံးက ကောင်းမွန်သည့် လမ်းကြောင်းပေါ်တွင် ရှိနေပုံရသော်လည်း ချီရှီးပွဲတော်ကို သူမနှင့်အတူ ဆင်နွှဲနေစဉ် အစာဆိပ်သင့်ပြီး ရော်ရှက်ခ် သေဆုံးသွားလိမ့်မည်ဟု မည်သူက တွေးထင်ထားခဲ့မည်နည်း။
မျက်လုံး ပြန်ဖွင့်လာချိန်တွင်တော့ ရော်ရှက်ခ်တစ်ယောက် မာဗယ်စကြဝဠာထဲသို့ ပြန်လည်မွေးဖွားလာခဲ့ပြီး နတ်ဆိုးအသီး ကုန်သည် ဟုခေါ်သော စနစ်တစ်ခုနှင့် ချိတ်ဆက်မိလျက်သား ဖြစ်နေခဲ့သည်။ သူက နတ်ဆိုးအသီးများကို အောင်မြင်စွာ ရောင်းချနိုင်ပြီး သတ်မှတ်ထားသော ရောင်းအားပစ်မှတ်များကို ပြည့်မီသရွေ့ သက်ဆိုင်ရာ ဆုလာဘ်များကို ရရှိမည်ဖြစ်သည်။
စနစ်က ရော်ရှက်ခ်အား ပေးအပ်ထားသည့် အစပြုသူ မစ်ရှင်မှာ နတ်ဆိုးအသီး တစ်လုံးကို အောင်မြင်စွာ ရောင်းချရန် ဖြစ်သည်။ ရိုးရှင်းပုံရသော်လည်း ရော်ရှက်ခ်တစ်ယောက် တစ်လလုံးလုံး တစ်လုံးမှပင် မရောင်းရသေးပေ။ ဤကိစ္စက ထင်ထားသည်ထက် ပိုခက်ခဲနေခဲ့သည်။
သို့သော်လည်း ပုံမှန်လူတစ်ယောက်ကတော့ နတ်ဆိုးအသီးကို သေချာပေါက် ဝယ်မည်မဟုတ်ပေ။ ဦးနှောက် သိပ်မမှန်သူတစ်ယောက်သာလျှင် ဝယ်ရန် နီးစပ်ပေလိမ့်မည်။
ရော်ရှက်ခ်က သူ့ကိုယ်သူ သရော်ကာ တွေးလိုက်မိတော့သည်။