အခန်း ၁ — ချက်ဂရု ရောက်ရှိလာခြင်း
ချုံဝူတိုင်းပြည်။
ကျီမိသားစု။
ကျီကျန်းသည် အိပ်ရာမှ နိုးလာခဲ့သည်။ အပြင်ဘက်တွင် အစောင့်လုပ်နေသော လှပသည့် အစေခံမိန်းကလေးနှစ်ယောက်ကလည်း သူနိုးလာသည်နှင့် အမြန်နိုးထကာ သူ့အနားသို့ လာပြီး ထူပေးရန် ပြင်ဆင်ကြသည်။
“သခင်လေး”
ကျီကျန်းက ခေါင်းခါလိုက်သည်။
“မလိုပါဘူး။ ကိုယ့်ဘာသာ ထလိုက်မယ်။”
“အဟွတ်”
သူသည် ကိုယ်ကို မတ်မတ်ရပ်လိုက်သော်လည်း ချောင်းဆိုးမိသွားပြန်သည်။ မျက်နှာမှာ ဖြူဖျော့နေပြီး အားအင်လည်း မရှိသည့်အတွက် နောက်ဆုံးတွင် လှပသော အစေခံမိန်းကလေးနှစ်ယောက်ကို အဝတ်အစားဝတ်ပေးရန် ခွင့်ပြုလိုက်ရသည်။
အတွင်းခံအဝတ်အစားအထိ သူတို့မြင်သွားကြသည်။
ဘာပဲဖြစ်ဖြစ် သူက အသက်ဆယ့်ခြောက်နှစ် ရှိနေပြီလေ။
'ဒီကမ္ဘာကို ကူးပြောင်းရောက်ရှိလာတာ သုံးလပဲ ရှိသေးတယ်။ အဲဒီအချိန်မှာ ကောင်းကင်နတ်ဘုရားနှစ်ပါး တိုက်ခိုက်တာနဲ့ ကြားထဲကနေ ဒဏ်ရာရသွားရတယ်။ တော်တော်လေး ကံဆိုးတဲ့သူပဲလို့ ပြောရမယ်။'
‘အဲ့ကံဆိုးတဲ့ကောင်က ငါပဲလေ’
ကျီကျန်းသည် အားနည်းပြီး ချည့်နဲ့နေသဖြင့် လှပသော အစေခံမိန်းကလေးတစ်ယောက်၏ ပွေ့ထူပေးခြင်းကို ခံထားရကာ သူမက ဇွန်းဖြင့် ထမင်းခွံ့ကျွေးနေခဲ့သည်။ ထမင်းစေ့များမှာ ဖောင်းဖောင်းနူးနူးရှိပြီး အလွယ်တကူ စားနိုင်သည့် အစားအစာများကိုသာ ပြင်ဆင်ပေးထားသည်။
သူ့အစာအိမ်က သိပ်မကောင်းတော့ပေ……
ကောင်းကင်နတ်ဘုရားနှစ်ပါး တိုက်ခိုက်ကြစဉ်က သူလည်း ထိခိုက်ခဲ့ရခြင်းဖြစ်သည်။
သို့သော် သေချာပြန်စဉ်းစားကြည့်လျှင် သူ့အစာအိမ်ပြဿနာကို အမှန်တကယ် ဖြစ်စေခဲ့သူမှာ ဒုက္ခသည်များကြားထဲတွင် ပုန်းအောင်းနေသော မကောင်းဆိုးဝါး ကျင့်ကြံသူတစ်ယောက်ပင် ဖြစ်သည်။
ကောင်းကင်နတ်ဘုရားနှစ်ပါး တိုက်ခိုက်မှုကြောင့် မိုင်ထောင်ချီအထိ မီးဘေးနှင့် ရေဘေးများ ဖြစ်ပေါ်လာခဲ့ရာ ဒုက္ခသည် သန်းပေါင်းများစွာတို့သည် နေရပ်စွန့်ခွာ ထွက်ပြေးခဲ့ကြရသည်။
ထို့အပြင် လူသေအလောင်းများကို စားသောက်ရင်း အသိစိတ်ရလာသော တောခွေးများလည်း ရှိသေးသည်။ ထိုခွေးများသည် လှိမ့်တက်လာသော အနက်ရောင် အလောင်းချီများကို သယ်ဆောင်ကာ ညအချိန်တွင် ဒုက္ခသည်စခန်းများအတွင်း ဝင်ရောက်ပြီး အသက်ရှင်နေသူများကို စားသောက်ကြသည်။
ကျီကျန်းသည်လည်း ထိုအသက်ရှင်နေသူများထဲမှ တစ်ယောက်ဖြစ်ခဲ့သည်။
သူ့ဖခင်က ငွေအမြောက်အမြား အကုန်အကျခံကာ ကျင့်ကြံသူတစ်ယောက်ကို ငှားရမ်းပြီး ကယ်တင်ပေးခဲ့ခြင်း မရှိပါက ထိုအချိန်ကတည်းက သူ သေဆုံးသွားလောက်ပြီဖြစ်သည်။
သို့သော် ထိုသို့ ကယ်တင်ခံခဲ့ရသည့်တိုင် သူ့ခန္ဓာကိုယ်အတွင်းသို့ အနက်ရောင် အလောင်းချီများ ဝင်ရောက်သွားခဲ့သည်။ ထို့ကြောင့် ယခုအချိန်တွင် နူးညံ့သော အစားအစာများကိုသာ စားနိုင်တော့သည်။
ရေချိုးခြင်းဆိုလျှင် ပို၍ပင်...
ကျီကျန်း၏ မျက်နှာမှာ နီရဲသွားပြီး ရှေ့ဆက်မတွေးရဲတော့ပေ။
“သခင်လေး.... သခင်ကြီး လာတွေ့နေပါတယ်။”
လှပသော အစေခံမိန်းကလေးက ရုတ်တရက် ပြောလိုက်သည်။
ကျီကျန်းက လှည့်ကြည့်လိုက်ရာ သူ့ဖခင် ကျီဖူကွေ့သည် စိုးရိမ်တကြီးဖြင့် ခြေလှမ်းနှစ်လှမ်းကို တစ်လှမ်းစာအဖြစ် လှမ်းလာသကဲ့သို့ အလျင်အမြန် ရောက်ရှိလာသည်။
“သားရေ.... ထဖို့မလိုဘူး။ အခြေအနေ ဘယ်လိုနေလဲ။ နူးညံ့တဲ့အစားအစာတွေ စားရတာ အဆင်ပြေရဲ့လား။ မလုံလောက်သေးဘူးဆိုရင် သားသောက်ဖို့ နို့သွားရှာပေးမယ်။”
ကျီကျန်း၏ မျက်နှာမှာ တောင့်ခဲသွားသည်။
'မဟုတ်သေးဘူးလေ.... အဖေရာ။ ကျွန်တော်က အသက်ဆယ့်ခြောက်နှစ် ရှိနေပြီနော်။ နို့သောက်ရမယ့် အရွယ်လား။ အပြင်ထွက်လို့ ဒီအကြောင်းသာ လူတွေသိသွားရင် လှောင်ကြမှာပေါ့။'
“အဖေ.... ကျွန်တော် အဆင်ပြေပါတယ်။” ကျီကျန်းက အားနည်းသောအသံဖြင့် ပြောလိုက်သည်။
“အဲဒါဆို ကောင်းတာပေါ့။”
ကျီဖူကွေ့က စိုးရိမ်စွာ ခေါင်းညိတ်လိုက်သည်။
“ဒါပေမဲ့ အဖေက အသုံးမကျလို့ သားအစာအိမ်ထဲက အလောင်းချီတွေကို မဖယ်ရှားပေးနိုင်တာ စိတ်မကောင်းစရာပဲ။”
ဝိညာဉ်ဖြစ်သွားသော တောခွေးထံမှ ရရှိသည့် အလောင်းချီမှာ အလွန်ပြင်းထန်လွန်းသည်။ သာမန်လူတစ်ယောက် ထိမိရုံဖြင့်ပင် သွေးအိုင်တစ်အိုင်အဖြစ် ပြောင်းလဲသွားနိုင်သည်။
ကျီကျန်း ယခုအချိန်အထိ အသက်ရှင်နေနိုင်ခြင်းမှာလည်း ကျီဖူကွေ့က အစွမ်းထက်ဆေးဝါးများကို အသည်းအသန် တိုက်ကျွေးပေးခဲ့သောကြောင့် ဖြစ်သည်။
ကျီကျန်းလည်း ထိုအကြောင်းကို သိထားသဖြင့် သူ့ဖခင်ကို ပြန်လည်နှစ်သိမ့်ပေးလိုက်သည်။
“ကြီးမားတဲ့ ကံဆိုးမှုတစ်ခု ကြုံရပြီးရင် ကြီးမားတဲ့ ကံကောင်းမှုနောက်က လိုက်လာတတ်ပါတယ် အဖေ။ သိပ်စိတ်မပူပါနဲ့။”
ဘာပဲဖြစ်ဖြစ် သူက အခြားကမ္ဘာမှ ကူးပြောင်းလာသူတစ်ယောက်ပင်။ ကံဆိုးမှုကြီးကြီးမားမား ကြုံရပြီးနောက် ထူးခြားတဲ့ အစွမ်းတစ်ခု ရရှိလာတတ်သည်ဆိုသည့် စည်းမျဉ်းအရ သူ့အနာဂတ်အတွက် မျှော်လင့်ချက် ရှိနေသေးသည်။
ကျီဖူကွေ့ကတော့ သားဖြစ်သူက သူ့ကို နှစ်သိမ့်ပေးနေတာဟုသာ ထင်လိုက်သဖြင်ပ သူက အတင်းပြုံးပြပြီး အစေခံမိန်းကလေးနှစ်ယောက်ကို ကျီကျန်းအား ကောင်းကောင်းမွန်မွန် ဆက်လက်ပြုစုစောင့်ရှောက်ပေးရန် မှာကြားလိုက်သည်။
ထို့နောက် အလျင်အမြန် ထွက်သွားပြန်သည်။
ဒီတစ်ခေါက်တော့ သူ့သားကို ကုသပေးနိုင်မည့် နည်းလမ်းတစ်ခုခု ရှာဖွေရန် ဘယ်ဩဇာအာဏာရှိသူ.... ဘယ်မင်းမှုထမ်း.... ဘယ်မင်းမျိုးမင်းနွယ်ထံ သွားတောင်းပန်ရဦးမည်ကို ဘယ်သူသိနိုင်မလဲ…….
(ဖခင်မေတ္တာဆိုတာ ဒီလိုပါပဲ အပြင်မှာသာ ထုတ်မပြကြတာ)
“သခင်လေး.... ကျွန်မ ခွံ့ကျွေးပေးပါရစေ။”
လှပသော အစေခံမိန်းကလေးက သွယ်လျသော လက်ချောင်းများဖြင့် ဇွန်းကို ကိုင်ထားရင်း နူးညံ့စွာ အသက်မှုတ်ထုတ်ပြီး ပြောလိုက်သည်။
“အင်း။”
ကျီကျန်းက ပါးစပ်ဟကာ နူးညံ့သောအစားအစာကို စားလိုက်သည်။
'ဟူး... ဒီအခြေအနေကို ရောက်နေပြီဆိုမှတော့ အရင်ဆုံး စားထားလိုက်ရုံပေါ့။'
...
အစာစားပြီးနောက် ကျီကျန်းကို နောက်ဖေးဥယျာဉ်သို့ တွန်းပို့ပေးကြသည်။ ဥယျာဉ်ထဲတွင် ပန်းများသည် လှပစွာ ပွင့်ဖူးဝေဆာနေကြသည်။
ကျီကျန်းက နေရောင်အောက်တွင် အနားယူရင်း သူ့အတွက် ထူးခြားသော အစွမ်းတစ်ခုကို တွေးတောနေသည်။
ဒဏ်ရာပြင်းပြင်းထန်ထန် ရရှိခဲ့သည်မှာ သုံးလတောင် ရှိနေပြီဖြစ်သည်။
'ငါ့ရဲ့ အထူးအစွမ်းက ဘယ်မှာလဲ။'
[ ဒင်! ]
‘ဟင်…..’
‘ငါ့ရဲ့ အထူးအစွမ်း ရောက်လာပြီဟ……’
ကျီကျန်း အလွန်ဝမ်းသာသွားသော်လည်း ချက်ချင်း မစစ်ဆေးသေးပေ။ အရင်ဆုံး အစေခံမိန်းကလေးများကို ထွက်သွားခိုင်းလိုက်ပြီး သူတစ်ယောက်တည်း ကျန်ရှိတော့မှသာ စစ်ဆေးကြည့်လိုက်သည်။
[ အလုံးစုံသော ကောင်းကင်ဘုံ ချက်ဂရုမှ သင့်အား အဖွဲ့ဝင်အဖြစ် ဝင်ရောက်ရန် ဖိတ်ခေါ်နေသည်။ ]
[ သင် လက်ခံပါသလား။ ]
“ချက်ဂရုလား…..”
ကျီကျန်း အံ့ဩသွားခဲ့ရသည်။ သူ့ရဲ့ အထူးအစွမ်းက ဒီလိုပုံစံမျိုး ဖြစ်လိမ့်မည်ဟု မထင်ထားခဲ့ပေ။
[ လက်ခံသည်။ ]
[ ကျီကျန်းသည် အလုံးစုံသော ကောင်းကင်ဘုံ ချက်ဂရုအတွင်းသို့ ဝင်ရောက်လာပြီ။ ]
[ ဒင် ချက်ဂရုခေါင်းဆောင်နေရာတွင် လူမရှိသေးသည့်အပြင် အခြားအဖွဲ့ဝင်များကလည်း ထိုနေရာအတွက် ယှဉ်ပြိုင်ခြင်း မရှိသေးသောကြောင့်... ]
[ သင်သည် အလိုအလျောက် ချက်ဂရုခေါင်းဆောင် ဖြစ်လာပါပြီ။ ]
[ အဖွဲ့ဝင်အသစ်များကို စတင်ရှာဖွေမည်လား။ ]
အလုံးစုံသော ကောင်းကင်ဘုံ ချက်ဂရုဆိုသည်မှာ ကောင်းကင်ဘုံနှင့် လောကပေါင်းများစွာမှ လူများ အဖွဲ့ဝင်အဖြစ် ဝင်ရောက်လာနိုင်သည့် ချက်ဂရုတစ်ခုဖြစ်သည်။
ချက်ဂရုများကို မကြာခဏ အသုံးပြုဖူးသူများဆိုလျှင် ဒီအကြောင်းကို သိကြသည်။
သို့သော် ကျီကျန်းကတော့ မသိသေးပေ။ ထို့ကြောင့် ချက်ဂရုခေါင်းဆောင် ဖြစ်လာပြီးနောက် မိမိရရှိထားသော အခွင့်အာဏာများကို အရင်ဆုံး သေချာစစ်ဆေးကြည့်လိုက်သည်။
ပြီးမှသာ အဖွဲ့ဝင်များကို စတင်ဖိတ်ခေါ်မည်ဖြစ်သည်။
[ ချက်ဂရုခေါင်းဆောင်သည် အဖွဲ့တစ်ခုလုံးကို အသံတိတ်(mute)စေနိုင်သကဲ့သို့ သီးခြားအဖွဲ့ဝင်တစ်ဦးချင်းစီကိုလည်း အသံတိတ်စေနိုင်သည်။ ထို့အပြင် မတူညီသော အဖွဲ့ဝင်များ၏ ကမ္ဘာများအကြား သွားလာနိုင်သည့် လုပ်ဆောင်ချက်ကိုလည်း ထိန်းချုပ်နိုင်သည်။ ]
[ သို့သော် အခြားအဖွဲ့ဝင်တစ်ဦးတွင်လည်း မိမိကမ္ဘာသို့ သွားလာနိုင်မည့် လမ်းကြောင်းကို ဖွင့်ပေးခြင်းအား ငြင်းပယ်ပိုင်ခွင့် ရှိသည်။ ]
ကြည့်ရတာတော့ ဒီချက်ဂရုက အဖွဲ့ဝင်တွေအပေါ် သဘောကောင်းသည့် ပုံစံမျိုးဖြစ်သည်။
ထိုအခါမှသာ ကျီကျန်း စိတ်အေးသွားသည်။ ဒီလိုဆိုရင် သူ့ရဲ့ ချက်ဂရုက လူတွေကို အချင်းချင်း အန္တရာယ်ပေးစေသည့် 'ဂူကျင့်ကြံမှု' ပုံစံမျိုး မဟုတ်တာ သေချာသလောက်ပင်။
သူဖိတ်ခေါ်လိုက်သည့် အဖွဲ့ဝင်များထဲတွင် အလွန်ရက်စက်ကြမ်းကြုတ်ပြီး သူ့ကို ချက်ချင်း သန့်စင်ဝါးမြိုပစ်ချင်သည့်သူများ ပါဝင်နေပါကပင် သူတို့ကို မိမိကမ္ဘာထဲသို့ ဝင်ရောက်ခွင့် မပေးဘဲ တားဆီးထားနိုင်သည်။
[ ချက်ဂရုခေါင်းဆောင်သည် အဖွဲ့ဝင်များကို စီမံခန့်ခွဲရာတွင် အကူအညီရစေရန် အုပ်ချုပ်သူ(admin) ကိုလည်း ခန့်အပ်နိုင်သည်။ ထို့အပြင် အခြားအဖွဲ့ဝင်များကို ယာယီဖျောက်ထားပြီး ချက်ဂရုခေါင်းဆောင်တစ်ဦးတည်းကိုသာ မြင်ရအောင်လည်း ပြုလုပ်နိုင်သည်။ ]
ချက်ဂရုက ထပ်မံရှင်းပြပေးလာခဲ့သည်။
ကျင့်ကြံသူများအတွက် အချိန်ဟူသည်မှာ အရေးမကြီးပေ။ ချက်ဂရုခေါင်းဆောင်သည် တစ်နေ့နေ့တွင် နှစ်ပေါင်းများစွာ ပိတ်လှောင်ကျင့်ကြံပြီးနောက် ပြန်နိုးလာချိန်၌ အဖွဲ့ဝင်အများအပြား သေဆုံးနေသည်ကို တွေ့ရနိုင်သည်။
ထိုအခြေအနေမျိုးအတွက် အခြားသူများကို အုပ်ချုပ်သူအဖြစ် ခန့်အပ်ထားနိုင်ပြီး အဖွဲ့ဝင်အများအပြား သေဆုံးသွားသည်ကို သူ့ကိုယ်စား စောင့်ကြည့်ပေးနိုင်သည်ဟု ဆိုလိုခြင်းဖြစ်သည်။
'ဘုရားရေ...'
ကျီကျန်း စကားပင် မပြောနိုင်တော့ပေ။
ဒီလုပ်ဆောင်ချက်က သူ့ရဲ့ အဆက်အသွယ်စာရင်းထဲက လူတွေရဲ့ ပရိုဖိုင်ပုံတွေ တစ်ပုံပြီးတစ်ပုံ မီးခိုးရောင်ပြောင်းသွားတာကို ထိုင်ကြည့်နေရမယ့် လုပ်ဆောင်ချက်ကြီး မဟုတ်ဘူးလား။
ဒါပေမဲ့ ဒီလောက်တောင် လုပ်ဖို့ လိုလို့လား။
ပြီးတော့ ဒီအုပ်ချုပ်သူ ခန့်အပ်တဲ့ လုပ်ဆောင်ချက်ကလည်း……
ကျီကျန်းက မျက်နှာအမူအရာ မပြောင်းဘဲ စစ်ဆေးကြည့်လိုက်သည်။ အုပ်ချုပ်သူကို မထားရှိလျင်လည်း ဘာအမှားအယွင်းမှ ဖြစ်လာမည်မဟုတ်ကြောင်း သိလိုက်ရသည့်အခါ ချက်ချင်းပင် ထိုလုပ်ဆောင်ချက်ကို အသုံးပြုပြီး ဖျောက်ထားလိုက်သည်။
ထိုအချိန်မှစ၍ ဒီချက်ဂရုထဲတွင် ခေါင်းဆောင်တစ်ယောက်တည်းသာ ရှိတော့မည်။
အုပ်ချုပ်သူများ မရှိတော့ပေ။
ဒီအချက်အပြင် ချက်ဂရုခေါင်းဆောင် ဖြစ်လာခြင်းကြောင့် ရရှိလာသည့် အဓိကစွမ်းရည်နှစ်ခုမှာ ဒါတွေပင်ဖြစ်သည်။ ကျန်သည့်အရာများကတော့ သိပ်အရေးမကြီးပေ။
ထို့ကြောင့် အချိန်အနည်းငယ်ကြာအောင် စစ်ဆေးကြည့်ပြီး မကျန်ခဲ့တာ သေချာသွားသည့်အခါ ကျီကျန်းက အဖွဲ့ဝင်များကို စတင်ရှာဖွေလိုက်သည်။
'သိုင်းပညာ အဆင့်မြင့်တဲ့ ကမ္ဘာက လူကောင်းတစ်ယောက်ကို ရှာတွေ့ပါစေ။'
ကျီကျန်း မျှော်လင့်တကြီး တွေးလိုက်သည်။
သူသည် သူတစ်ပါးက ဇွန်းဖြင့် ခွံ့ကျွေးမှ စားနိုင်ရသည့် ဘဝကို ငြီးငွေ့နေပြီဖြစ်သည်။ သူ အင်အားကြီးလာချင်သည်။ ကိုယ်တိုင် ရေချိုးနိုင်...... ကိုယ်တိုင် အဝတ်အစားဝတ်နိုင်သည့် ဘဝကို ပြန်လည်ရရှိချင်သည်။
ထို့အပြင် သူကူးပြောင်းရောက်ရှိလာသည့် ကမ္ဘာတွင် ကျင့်ကြံသူများလည်း ရှိသကဲ့သို့ နတ်ဘုရားများလည်း ရံဖန်ရံခါ လူ့လောကအတွင်း ပေါ်ထွက်လာတတ်သည်။
လွန်ခဲ့သော သုံးလက ကောင်းကင်နတ်ဘုရားနှစ်ပါး တိုက်ခိုက်ခဲ့ရာ မိုင်ထောင်ချီအထိ မီးဘေးနှင့် ရေဘေးများ ဖြစ်ပေါ်ခဲ့ခြင်းက အကောင်းဆုံး သက်သေပင်ဖြစ်သည်။
လူအများအပြား သေဆုံးခဲ့ရသည့်အပြင် တောခွေးများပင် လူသေအလောင်းများကို စားသောက်ပြီး ဝိညာဉ်ဖြစ်သွားကာ အနက်ရောင် အလောင်းချီများကို သယ်ဆောင်လျက် ဒုက္ခသည်စခန်းများအတွင်း ဝင်ရောက်ပြီး အသက်ရှင်နေသူများကို စားသောက်ကြသည်။
ဒီလို အန္တရာယ်များပြည့်နှက်နေသည့် ကမ္ဘာတွင် သူက အမြဲတမ်း စိုးရိမ်ထိတ်လန့်နေရသည်။ အခုဆိုလျှင် သူ့ခန္ဓာကိုယ်ထဲသို့ အလောင်းချီများ ဝင်ရောက်နေသည့်အတွက်လည်း အလွန်အားနည်းနေဆဲဖြစ်သည်။
သိုင်းပညာကိုတောင် ကျင့်ကြံနိုင်စွမ်းမရှိတော့ပေ။ ဒီလိုဆိုရင် သူ ဘာလုပ်နိုင်တော့မှာလဲ။
ထို့ကြောင့် သူက သိုင်းပညာအဆင့်မြင့်သည့် ကမ္ဘာမှ လူတစ်ယောက်ကို ရှာတွေ့ရန် မျှော်လင့်နေခြင်းဖြစ်သည်။ ထိုသူသည် လူကောင်းတစ်ယောက်လည်း ဖြစ်ရမည်။
အကြောင်းမှာ သူ့ကို မသိကျွမ်းသည့်တိုင် ကူညီပေးလိုစိတ်ရှိမည့်သူက လူကောင်းတစ်ယောက်သာ ဖြစ်နိုင်သောကြောင့်ပင်။
[ ဒင် ]
[ အဖွဲ့ဝင်များကို ရှာဖွေတွေ့ရှိပါပြီ။ ]
[ အဖွဲ့ဝင်အရေအတွက် — ခြောက်ဦး။ ]
[ ချက်ဂရုခေါင်းဆောင် — တစ်ဦး။ ]
“တွေ့ပြီ”
ကျီကျန်း၏ မျက်လုံးများ တောက်ပသွားခဲ့သည်။ သူသည် စိတ်လှုပ်ရှားစွာဖြင့် မိမိရှာဖွေတွေ့ရှိထားသည့် အဖွဲ့ဝင်များက ဘယ်သူတွေလဲဆိုတာကို အမြန်ကြည့်လိုက်သည်။
[ ရှီဟောက်သည် ချက်ဂရုအတွင်းသို့ ဝင်ရောက်လာပါပြီ။ ]
[ ယဲ့ဖန်သည် ချက်ဂရုအတွင်းသို့ ဝင်ရောက်လာပါပြီ။ ]
[ ချူဖုန်းသည် ချက်ဂရုအတွင်းသို့ ဝင်ရောက်လာပါပြီ။ ]
[ ဒင် ]
[ ရှောင်ယန်သည် ချက်ဂရုအတွင်းသို့ ဝင်ရောက်လာပါပြီ။ ]
[ လင်တုန်းသည် ချက်ဂရုအတွင်းသို့ ဝင်ရောက်လာပါပြီ။ ]
[ ဒင် ]
[ ထန်စန်းသည် ချက်ဂရုအတွင်းသို့ ဝင်ရောက်လာပါပြီ။ ]
ဘာ…..
ကျီကျန်း အံ့ဩတုန်လှုပ်သွားသည်။
'နေပါဦး.... ဒီအဖွဲ့ဝင်တွေက နည်းနည်း ထူးဆန်းမနေဘူးလား။'
'ဘာလို့ အားလုံးက ထူးခြားတဲ့သူတွေချည်းပဲလို့ ခံစားနေရတာလဲ။ ထူးခြားလွန်းလို့ ဝတ္ထုစီးရီးတစ်ခုစီရဲ့ အဓိကဇာတ်လိုက်တွေလိုတောင် ထင်ရတယ်။'
'《Shrouding the Heavens》 သုံးပိုင်းတွဲ စီးရီးထဲက ဇာတ်လိုက်တွေ.... 《The Great Ruler》 နှစ်ပိုင်းတွဲ စီးရီးထဲက ဇာတ်လိုက်တွေ...'
'ပြီးတော့ ထန်စန်းရဲ့ စကြဝဠာကြီး...'
'ခဏလေး.... ဒီကောင်က ဘာလို့ အပေါ်က ငါးယောက်နဲ့ တစ်ဖွဲ့တည်း ဖြစ်နေရတာလဲ။'
'ဒါက လုံးဝကို လိုက်ဖက်မနေဘူး မဟုတ်လား။'
ခဏကြာမှ ကျီကျန်းသည် ရုတ်တရက် သဘောပေါက်သွားခဲ့သည်။
သူ့ချက်ဂရုက ဝတ္ထုစီးရီးတွေထဲက အဓိကဇာတ်လိုက်တွေကို ဦးစားပေးရှာဖွေပြီး အဖွဲ့ဝင်အဖြစ် ဖိတ်ခေါ်ပေးသည့် ပုံစံမျိုး ဖြစ်နေပုံရသည်။
ဒီအဖွဲ့ဝင်ခြောက်ယောက်ထဲတွင် ဝတ္ထုငါးအုပ်အထိ ဖြတ်သန်းပြီး အဓိကဇာတ်လိုက်အဖြစ် ပါဝင်ခဲ့သူတစ်ယောက်လည်း ရှိနေသေးသည်။
ကျီကျန်းက မယုံနိုင်သလို တွေးလိုက်မိသည်။
“ဒါဆို ထန်စန်းတစ်ယောက်တည်းက 《Douluo Dalu》 ဝတ္ထုစီးရီး ငါးပိုင်းလုံးကို ကိုယ်စားပြုနေတာလား။”