စိတ်မပါလက်မပါဖြစ်နေသော အကြီးဆုံးတပည့်မ ယွဲ့လင်နှင့် ဖန်ယွမ်တို့သည် တောင်အောက်သို့ ဆင်းလာခဲ့ကြသည်။
ပျက်စီးယိုယွင်းနေသော ကျင့်ကြံရေးကွင်းပြင်တွင်မူ တပည့်သစ် ရာပေါင်းများစွာသည် ဘာလုပ်ရမှန်းမသိဘဲ တစ်ယောက်ကိုတစ်ယောက် ကြည့်နေကြတော့သည်။
"ငါတို့က ဂိုဏ်းထဲဝင်ပြီးပြီဆိုတော့ လမ်းစဉ်ကို ရှာဖွေဖို့ လာတာလေ။ ဘာဖြစ်လို့ ဂိုဏ်းချုပ်က ငါတို့ကို ကျင့်ကြံခွင့်မပေးဘဲ ဂိုဏ်းကို ပြုပြင်ခိုင်းပြီး အခြေခံအဆောက်အအုံတွေ ဆောက်ခိုင်းနေရတာလဲ" ဟု တစ်စုံတစ်ဦးက ဇဝေဇဝဲ မေးလိုက်သည်။
"ဂိုဏ်းချုပ်က ဒီလိုလုပ်တာ ဘာနက်နဲတဲ့ ရည်ရွယ်ချက် ရှိလို့လဲမသိဘူး" ဟု တပည့်သစ်ထဲမှ သန်မာထွားကျိုင်းသော အမျိုးသားတစ်ဦးကလည်း စိတ်ရှုပ်ထွေးစွာ ပြောရှာသည်။
"သူက ငါတို့ကို အလကားလုပ်အားပေးအဖြစ် သုံးနေတာများလား" ဟု တစ်ယောက်က ရုတ်တရက် အော်ပြောလိုက်သည်။
"ငါ ကြားဖူးတယ်... အချို့ဂိုဏ်းတွေက 'အစမ်းလေ့ကျင့်သူတပည့်' ဆိုတဲ့ နာမည်ခံပြီး လူတွေကို စုဆောင်းတယ်... ပြီးတော့ နေ့ရောညပါ အလုပ်ခိုင်းတယ်… သုံးနှစ်ပြည့်ရင် အပြင်စည်းတပည့်အဖြစ် မြှင့်တင်ပေးမယ်လို့ ကတိပေးပြီး သုံးနှစ်ပြည့်တဲ့အခါကျတော့ အဲဒီတပည့်တွေကို ပိုက်ဆံတစ်ပြားမှမပေးဘဲ မောင်းထုတ်ပစ်လိုက်ကြတာ"
အခြားသော ကျင့်ကြံခြင်းဂိုဏ်းများ၏ ရက်စက်သော ဆက်ဆံမှုကို ကြုံတွေ့ဖူးသည့် တပည့်တစ်ဦးက လျှို့ဝှက်ဆန်းကြယ်စွာ ပြောလိုက်ရာ လူအုပ်ကြီး၏ မျက်နှာအမူအရာများ ချက်ချင်း ပြောင်းလဲသွားခဲ့ရတော့သည်။
သို့သော်လည်း သူတို့သည် ချုံးရှင်းဂိုဏ်း၏ တပည့်များ ဖြစ်လာခဲ့ပြီဖြစ်ရာ အများစုမှာ ဂိုဏ်းအပေါ် သံယောဇဉ် စရှိနေကြပြီဖြစ်သဖြင့် ဖန်ယွမ်၏ ရည်ရွယ်ချက်ကို ချက်ချင်း မစွပ်စွဲရဲကြပေ။
သူတို့အားလုံးသည် မျက်မှောင်ကြုတ်ကာ စဉ်းစားနေသော ချန်ကျင်းတောက်ကို လှမ်းကြည့်လိုက်ကြသည်။
"အစ်ကိုကြီး ကျိန်းသောက်... အစ်ကိုက ဝေဖန်ပိုင်းခြားနိုင်စွမ်း ကောင်းတယ်... ဂိုဏ်းချုပ်ရဲ့ ရည်ရွယ်ချက်ကိုလည်း ခန့်မှန်းနိုင်တယ်မလား…ငါတို့ကို နည်းနည်းလောက် ရှင်းပြပေးပါဦး"
ချန်ကျင်းတောက်သည် ထိုအချိန်တွင် မျက် မှောင်ကို တင်းတင်းကြုတ်ထားပြီး သူ၏ မေးစေ့ကို ပွတ်သပ်ရင်း နက်နဲစွာ စဉ်းစားနေရှာသည်။
မကြာမီ... သူ၏ ဦးနှောက်ထဲတွင် အတွေးတစ်ချက် ချက်ချင်း လက်ခနဲ ပေါ်လာခဲ့ပြီး အသိဉာဏ်ပွင့်လင်းခြင်း အရောင်အဝါတစ်ခု သူ၏ မျက်ဝန်းထဲတွင် ထပ်မံ ဖြတ်ပြေးသွားခဲ့ပြန်သည်။
သူသည် သူ၏ ပေါင်ကို ဖြန်းခနဲ ပုတ်လိုက်ပြီး စိတ်လှုပ်ရှားစွာ ပြောလိုက်တော့သည်။
"ငါ သဘောပေါက်သွားပြီ…ဂိုဏ်းချုပ်က ငါတို့ကို သတင်းစကားပါးနေတာပဲ… 'ကိုယ့်အခန်းတစ်ခန်းကိုတောင် သန့်ရှင်းအောင် မလုပ်နိုင်ရင် လောကကြီးတစ်ခုလုံးကို ဘယ်လိုလုပ် သန့်ရှင်းအောင် လုပ်နိုင်မှာလဲ' တဲ့"
"ဆိုးရွားတဲ့ ပတ်ဝန်းကျင်မှာ လမ်းစဉ်အပေါ် ထားရှိတဲ့ စိတ်ဓာတ်ကို ထိန်းသိမ်းရမယ်ဆိုတာ မှန်ပေမဲ့... ကိုယ့်ရှေ့က ဆိုးရွားတဲ့ ပတ်ဝန်းကျင်ကိုတောင် မကျော်လွှားနိုင်ရင် ကိုယ့်စိတ်ထဲက ရှုပ်ထွေးမှုတွေကို ဘယ်လိုလုပ် ကျော်လွှားနိုင်မှာလဲ။ ဂိုဏ်းချုပ်ရဲ့ ရည်ရွယ်ချက်က တကယ့်ကို အံ့မခန်းပဲ"
"တစ်ဆင့်ပြီးတစ်ဆင့် အကွက်ကျကျ ချိတ်ဆက်ထားတာပဲ…ဂိုဏ်းချုပ်က တကယ့်ကို နတ်ဘုရားလို ပုဂ္ဂိုလ်ပဲ"
ဘေးပတ်ဝန်းကျင်ရှိ တပည့်များသည် နားထောင်ရင်း ဆွံ့အသွားကြသည်။ တစ်ခုခုတော့ မှားနေသလို ခံစားရသော်လည်း ချန်ကျင်းတောက်၏ ရူးသွပ်ကြည်ညိုနေသော မျက်ဝန်းများကို မြင်လိုက်ရသောအခါ အလွန်ပင် ယုတ္တိတန်လှသည်ဟု ခံစားလိုက်ရတော့သည်။
"တကယ့်ကို ဂိုဏ်းချုပ်ပဲ"
"လုပ်ကြစို့…ဂိုဏ်းကို ပြုပြင်ကြမယ်"
"စိတ်ရှုပ်ထွေးမှုတွေကို ကျော်လွှားပြီး စိတ်မိစ္ဆာတွေကို အမြစ်ပြတ်ချေမှုန်းကြမယ်"
ခေတ္တမျှအတွင်း ချုံးရှင်းဂိုဏ်းအတွင်းရှိ တပည့်များသည် နောက်ထပ်တစ်ကြိမ် စိတ်ဓာတ်များ အဆမတန် တက်ကြွလာခဲ့ကြပြီး သူတို့၏ မျက်ဝန်းများမှာ အရောင်တောက်လာခဲ့ကာ မည်သူမျှ ဖန်ယွမ်ကို ထပ်မံ၍ မသံသယမဝင်ရဲကြတော့ပေ။
ဟုန်ဝူမြို့…
ဟုန်ဝူမြို့သည် ချုံးရှင်းဂိုဏ်း၏ မိုင်တစ်ရာ ပတ်လည်တွင် အစည်ကားဆုံးသော မြို့ကြီး ဖြစ်ပေသည်။
ထိုမြို့တွင် သာမန်လူသားများနှင့် ကျင့်ကြံသူ သန်းပေါင်းများစွာ ရှိနေကြပြီး မရေမတွက်နိုင်သော ကျင့်ကြံခြင်း ဂိုဏ်းခွဲများနှင့် အင်အားစုများသည် ဝင်ငွေရရှိရန်အတွက် ဆိုင်ခန်းများ ဖွင့်လှစ်ထားကြသည်။
ဖန်ယွမ်သည် ကျယ်ပြန့်လှသော ကျောက်ပြားလမ်းမထက်တွင် လက်နှစ်ဖက်ကို နောက်ပစ်လျက် ဖြည်းညှင်းစွာ လမ်းလျှောက်နေပြီး ဘေးတစ်ဖက်တစ်ချက်စီရှိ ဆိုင်ခန်းများကိုမူ အရေးမစိုက်ဘဲ ကျော်ဖြတ်လာခဲ့သည်။
"ယွဲ့လင်... ဒီမြို့မှာ အကောင်းဆုံးနဲ့ အကြီးဆုံးဆိုင်က ဘယ်မှာလဲ"
ယွဲ့လင်သည် လက်ပိုက်လျက် သူ၏နောက်မှ တိတ်ဆိတ်စွာ လိုက်ပါလာခဲ့ခြင်း ဖြစ်သည်။ ထိုစကားကို ကြားလိုက်ရသောအခါ သူမ ဆွံ့အသွားပြီး ဝေးကွာသော နေရာရှိ ရတနာအလင်းတန်းများ ဖြာထွက်နေကာ ဖန်စီကျောက်ပြားများဖြင့် တည်ဆောက်ထားသည့် ကိုးထပ်အဆောင်ကြီးကို လက်ညှိုးထိုးပြလိုက်သည်။
"ထျန်းပေါင်အဆောင်ပါ... ဒါ ဟုန်ဝူမြို့မှာ အကြီးဆုံး ကျင့်ကြံခြင်းဆိုင်ပဲ ဒါပေမဲ့ အထဲက ပစ္စည်းတွေရဲ့ တန်ဖိုးကတော့ အလွန်အမင်း ဈေးကြီးပါတယ်"
မနေ့ညက တပည့်များ စားသုံးခဲ့သော ဝိညာဉ်သားရဲအသားကိုလည်း ထိုထျန်းပေါင်အဆောင်မှ ဝယ်ယူခဲ့ခြင်း ဖြစ်သည်။
"ဈေးကြီးတယ် ဟုတ်လား" ဖန်ယွမ်၏ မျက်လုံးများ ချက်ချင်း အရောင်တောက်သွားခဲ့ကာ…
"အရမ်းကောင်းတာပဲ... အဲဒီကို သွားကြစို့"
ယွဲ့လင်၏ ရင်ထဲတွင် ဒိတ်ခနဲ ဖြစ်သွားခဲ့ပြီး မကောင်းသော နိမိတ်တစ်ခု စိတ်ထဲတွင် စိမ့်ဝင်လာခဲ့သည်။
"ဂိုဏ်းချုပ်... သာမန် စားသောက်ကုန်တွေနဲ့ ဆောက်လုပ်ရေး ပစ္စည်းတွေအတွက်ဆိုရင် အရှေ့ဘက်ဈေးမှာ သွားဝယ်ရင် ရပါတယ်။ အဲဒါဆို ကိုးဆယ်ရာခိုင်နှုန်းမက သက်သာမှာပါ…ဘာဖြစ်လို့ ထျန်းပေါင်အဆောင်ကို သွားဖို့ လိုရတာလဲ"
‘ပိုက်ဆံချွေတာမယ် ဟုတ်လား…ငါသာ ပိုက်ဆံချွေတာလိုက်ရင် ဂိုဏ်းကို ဘယ်လိုလုပ် ဖျက်ဆီးလို့ ရတော့မှာလဲ’
ဖန်ယွမ်သည် သူမကို မည်သည့်ခံစားချက်မျှမရှိဘဲ တစ်ချက်ကြည့်လိုက်ပြီး စကားနှစ်ခွန်းသာ ဖြည်းညှင်းစွာ ပြောလိုက်သည်။ "လမ်းပြစမ်း"
ယွဲ့လင်သည် စိတ်ထဲတွင် သွားကို ကြိတ်လိုက်မိသော်လည်း နောက်ဆုံးတွင် ဘာမှထပ်မပြောတော့ပေ။
လမ်းအချို့ကို ဖြတ်ကျော်ပြီးနောက် သူတို့နှစ်ဦး ထျန်းပေါင်အဆောင်အတွင်းသို့ လှမ်းဝင်ခဲ့ကြသည်။
သူတို့နှစ်ဦး အဆောင်အတွင်းသို့ ဝင်ဝင်ချင်းမှာပင် လှပကျော့ရှင်းလှသော ခန္ဓာကိုယ်အချိုးအစားနှင့် သပ်ရပ်စွာ ပြင်ဆင်ခြယ်သထားသော အမျိုးသမီးကျင့်ကြံသူတစ်ဦးသည် သူတို့ထံသို့ အပြုံးမျက်နှာဖြင့် လျှောက်လှမ်းလာခဲ့သည်။
သူမကတော့ ထျန်းပေါင်အဆောင်၏ ဒုတိယ တာ၀န်ခံ…လျိုထောင်အာ ဖြစ်ပေသည်။
သူမသည် ယနေ့တွင် အလုပ်မရှိသဖြင့် ပထမထပ်သို့ ဆင်း၍ ကြည့်ရှုနေခြင်း ဖြစ်သည်။ တိုက်တိုက်ဆိုင်ဆိုင်ပင် အခြားသော ဝန်ထမ်းများမှာ ဧည့်သည်များကို ဧည့်ခံခြင်းဖြင့် အလုပ်ရှုပ်နေကြသဖြင့် သူမကိုယ်တိုင် ဧည့်ခံရန် ထွက်လာခဲ့ခြင်း ဖြစ်သည်။
ဖန်ယွမ်နှင့် ယွဲ့လင်တို့ကို မြင်လိုက်ရသောအခါ သူမ၏ မျက်ဝန်းထဲတွင် သတိမထားမိနိုင်သော စိတ်ပျက်မှုတစ်ခု ဖြတ်ပြေးသွားခဲ့သည်။
ဖန်ယွမ်တွင် ထူးခြားဆန်းပြားသော အရှိန်အဝါ ရှိနေသည်ဆိုသော်လည်း သူ၏ ဝတ်စုံမှာ ရိုးရှင်းလှပြီး အဆင့်မြင့်ပစ္စည်းဖြင့် ချုပ်လုပ်ထားပုံမရသည့်အပြင် သူ၏ ကျင့်ကြံခြင်းအရှိန်အဝါမှာလည်း အလွန်ပင် သာမန်ဆန်လွန်းလှသည်။
ယွဲ့လင်မှာမူ 'ချီသန့်စင်ခြင်း' အဆင့်၏ အထွတ်အထိပ်မှာသာ ရှိသေးသဖြင့် သူမ၏ အင်အားမှာလည်း အားကောင်းလှသည်ဟု မဆိုနိုင်ပေ။
သို့သော်လည်း လျိုထောင်အာသည် ပရော်ဖက်ရှင်နယ်အပြုံးကို ဖန်တီးလိုက်ပြီး လှပစွာ ရယ်မောလျက် ပြောလိုက်သည်။
"ကျင့်ကြံဖော် နှစ်ယောက်... ဘာများ ကြည့်ချင်လို့လဲရှင့် ဆေးလုံးတွေလား... ရတနာတွေလား... ဒါမှမဟုတ် ကျင့်စဉ်ကျမ်းစာတွေလား"
ဖန်ယွမ်သည် သူမကိုဖြစ်စေ... စီတန်းထားသော တောက်ပလှသည့် ပစ္စည်းများကိုဖြစ်စေ တစ်ချက်မျှပင် လှည့်မကြည့်ဘဲ လက်ကို တိုက်ရိုက် ဝေ့ယမ်းလိုက်သည်။ "စားသောက်ကုန်တွေ ဝယ်ချင်တယ်... ပြီးတော့ ဆောက်လုပ်ရေး ပစ္စည်းတွေလည်း လိုချင်တယ်"
"စားသောက်ကုန် ဟုတ်လား" လျိုထောင်အာ ခေတ္တမျှ ဆွံ့အသွားသည်။
"ကျင့်ကြံဖော် ဆိုလိုတာက... ဝိညာဉ်သားရဲတွေရဲ့ အသားနဲ့ သွေးကို ပြောတာပါလား"
"အကယ်၍ ဝိညာဉ်သားရဲအသားဆိုရင် အဆင့် (၁) ဝိညာဉ်သားရဲနဲ့ အဆင့် (၂) ဝိညာဉ်သားရဲ ဆိုပြီး ရှိပါတယ်။
အဆင့် (၁) ဝိညာဉ်သားရဲအသားက တစ်ပိဿာကို အနိမ့်စား ဝိညာဉ်ကျောက်တုံး သုံးတုံးခန့် ရှိပြီး... အဆင့် (၂) ဝိညာဉ်သားရဲအသားကတော့ တစ်ပိဿာကို အနိမ့်စား ဝိညာဉ်ကျောက်တုံး ငါးဆယ်ခန့် ကျသင့်မှာပါ..."
"အဆင့် (၂) အသားကိုပဲ ယူမယ်…မင်းတို့ဆီမှာ ရှိသလောက် အကုန်ယူမယ်.. အကုန်လုံးကို ငါ့အတွက် ထုပ်ပိုးပေးလိုက်"
ဖန်ယွမ်သည် အဆင့် (၁) နှင့် အဆင့် (၂) ဝိညာဉ်သားရဲအသားများ၏ ကွာခြားချက်ကို နားမလည်ပေ။
မနေ့ညက ထမင်းတစ်နပ်အတွက် ဝိညာဉ်ကျောက်တုံး နှစ်ထောင်သာ ကုန်ကျခဲ့သဖြင့် အလွန်နည်းပါးသည်ဟု သူ ခံစားရသည်။ ယနေ့ သူကိုယ်တိုင် ထွက်လာခဲ့ပြီဖြစ်ရာ ကျန်ရှိနေသော ဝိညာဉ်ကျောက်တုံး ရှစ်သိန်းကျော်လုံးကို အကုန်ဖြုန်းတီးပစ်ရမည် မဟုတ်ပါသလော။
လျိုထောင်အာ မျက်မှောင် အနည်းငယ် ကြုတ်လိုက်မိသည်။
‘ဒီရုပ်ချောချောနဲ့ အမျိုးသားက ပြဿနာလာရှာနေတာလား’
ထျန်းပေါင်အဆောင်တွင် အဆင့် (၂) ဝိညာဉ်သားရဲအသား ပိဿာပေါင်း သောင်းချီ၍ ရှိနေသဖြင့် အနိမ့်စား ဝိညာဉ်ကျောက်တုံး သိန်းချီ ကျသင့်မည် ဖြစ်ကာ… သူက တကယ်ပဲ ပေးနိုင်လို့လား။
သို့သော်လည်း ယွဲ့လင်မှာမူ ဦးရေပြားများ ထုံကျင်သွားသကဲ့သို့ ခံစားလိုက်ရသဖြင့် ပျာပျာသလဲ ရှေ့သို့ လှမ်းတက်လိုက်တော့သည်။
"စီနီယာ... ကျေးဇူးပြုပြီး ကျွန်မတို့ ဂိုဏ်းချုပ်ရဲ့ လျှောက်ပြောနေတဲ့ စကားတွေကို နားမထောင်ပါနဲ့ သာမန် စားသောက်ကုန်အချို့ပဲ ဝယ်ပါရစေ"
"?"
လျိုထောင်အာနှင့် ဖန်ယွမ်တို့သည် ယွဲ့လင်ကို တပြိုင်နက်တည်း လှမ်းကြည့်လိုက်ကြသည်။
ပထမလူ လျိုထောင်အာမှာ အံ့အားသင့်ပြီး သံသယဝင်သွားခြင်း ဖြစ်သည်…
‘ကျင့်ကြံခြင်း အရှိန်အဝါ လုံးဝမရှိတဲ့ ဒီရုပ်ချောချော လူငယ်လေးက တကယ်ပဲ ဂိုဏ်းချုပ်တစ်ယောက် ဖြစ်နေတာလား:
ဒုတိယလူ ဖန်ယွမ်မှာမူ မေးခွန်းထုတ်လိုသော မျက်ဝန်းများဖြင့် ကြည့်လိုက်ခြင်း ဖြစ်သည်..
‘ယွဲ့လင်... မင်း ငါ့ကို အလုပ်လုပ်နည်း ထပ်ပြီး သင်ပေးပြန်ပြီပေါ့ ဟုတ်လား’
ချက်ချင်းဆိုသလိုပင် ယွဲ့လင်က ဖန်ယွမ်ကို ဒေါသတကြီးဖြင့် ပြောလိုက်သည်။
"ဂိုဏ်းချုပ်... တပည့်အများစုက ခန္ဓာကိုယ်ထဲကို ဝိညာဉ်စွမ်းအင် သွင်းယူခြင်းတောင် မပြုလုပ်ရသေးပါဘူး။ အကယ်၍ ရှင်က သူတို့ကို အဆင့် (၂) ဝိညာဉ်သားရဲအသားတွေ ကျွေးလိုက်ရင် သူတို့တွေ ဝိညာဉ်စွမ်းအင်တွေ လွန်ကဲပြီး ခန္ဓာကိုယ် ပေါက်ကွဲသေဆုံးအောင် လုပ်နေတာလား"
"ဒါ့အပြင် အခု ဂိုဏ်းမှာ တပည့်တွေ အများကြီး ရှိနေပြီ…နောင်တစ်ချိန်မှာ ကျင့်ကြံခြင်းအတွက် လိုအပ်တဲ့ ပစ္စည်းတွေဖြစ်တဲ့ 'ချီသန့်စင် ဆေးလုံး' တွေ... 'ဝိညာဉ်စုဆောင်း ဆေးလုံး' တွေ... ကျင့်ကြံရေး ရတနာတွေ... ဝိညာဉ်စိုက်ခင်းတွေနဲ့ ဝိညာဉ်မျိုးစေ့တွေ ဝယ်ဖို့ လိုအပ်ဦးမှာ..."
"ရပြီ... ဆက်မပြောနဲ့တော့"
အဆင့် (၂) ဝိညာဉ်သားရဲအသားကို စားသုံးမိပါက တပည့်သစ်များ ခန္ဓာကိုယ်ပေါက်ကွဲ သေဆုံးနိုင်သည်ဟု ကြားလိုက်ရသောအခါ ဖန်ယွမ်သည် ၎င်းကို မဝယ်ရန် ချက်ချင်း ဆုံးဖြတ်လိုက်သည်။
အကယ်၍ စနစ်က သူ့ကို တပည့်တွေကို သတ်ဖြတ်ဖို့ ကြံစည်မှုနဲ့ အပြစ်ပေးလိုက်ရင် ဘယ်လိုလုပ်မလဲ။ သူ၏ ကျင့်ကြံခြင်း အဆင့်အတန်းကို အနှုတ်လက္ခဏာအထိ တိုက်ရိုက် လျှော့ချပစ်လိုက်ရင် သူ ချက်ချင်း သေသွားနိုင်သည် မဟုတ်ပါသလော။
"လှပတဲ့ မိန်းကလေး... ဒါဆိုရင် အဆင့် (၁) ဝိညာဉ်သားရဲအသားကိုပဲ မင်းတို့ဆီမှာ ရှိသလောက် အကုန်ဝယ်မယ်" ဖန်ယွမ်သည် တောက်ပသော မျက်ဝန်းများဖြင့် လျိုထောင်အာကို ကြည့်ကာ ပြောလိုက်သည်။
လျိုထောင်အာ နောက်ဆုံးတွင် သတိပြန်ဝင်လာခဲ့ပြီး ဖန်ယွမ်ကို ကြည့်ရသည့် အကြည့်မှာ သိသိသာသာ ပြောင်းလဲသွားခဲ့သည်။
ငယ်ရွယ်ပြီး အလားအလာရှိကာ... ရုပ်ရည်လည်း ချောမောလှသည့်အပြင် ရာထူးအဆင့်အတန်းလည်း မြင့်မားပြီး ပိုက်ဆံကိုလည်း လက်ဖားဖား သုံးစွဲနိုင်တဲ့ ဂိုဏ်းချုပ်တစ်ယောက်ပါလား… အို…
"ဂိုဏ်းချုပ်ရှင့်..." လျိုထောင်အာသည် ရှေ့သို့ တစ်လှမ်း တိုးလိုက်ပြီး အပြုံးလေးဖြင့် ပြောလိုက်သည်။
"အဆင့် (၁) ဝိညာဉ်သားရဲအသားဆိုရင် ထျန်းပေါင်အဆောင်မှာ ပိဿာပေါင်း တစ်သိန်းကျော် ရှိပါတယ်… ဒါကို အကုန်ဝယ်မယ်ဆိုရင် အနည်းဆုံးတော့ အနိမ့်စား ဝိညာဉ်ကျောက်တုံး သုံးသိန်းခန့် ကျသင့်မှာပါ…ဂိုဏ်းချုပ်က တကယ်ပဲ အကုန်လုံး လိုချင်တာ သေချာလားရှင့်"
ဖန်ယွမ်သည် သူ၏ရှေ့ရှိ ဆွဲဆောင်မှုရှိလှသော အမျိုးသမီးကို တည်ငြိမ်စွာ ကြည့်လိုက်ပြီး သိုလှောင်အိတ်တစ်လုံးကို သူမ၏ ရင်ခွင်ထဲသို့ ထိုးထည့်ပေးလိုက်သည်။
"ဝယ်မယ်... အကုန်လုံး ယူမယ်"
"ဟမ်..." လျိုထောင်အာသည် သူမ၏ ရင်ဘတ်ပေါ်မှ သိုလှောင်အိတ်ကို ယူကာ သူမ၏ စိတ်အာရုံဖြင့် စစ်ဆေးလိုက်ရာ….ဝိညာဉ်ကျောက်တုံး သုံးသိန်းလုံး တကယ့်ကို အပြည့်အဝ ရှိနေပေသည်။
"ဒါ့အပြင် ဆောက်လုပ်ရေး ပစ္စည်းတွေလည်း လိုချင်တယ် ငါက အကောင်းဆုံးကို မတောင်းဆိုဘူး... အဈေးကြီးဆုံးကိုပဲ လိုချင်တယ်" ဟု ဖန်ယွမ်က ယုံကြည်မှုအပြည့်ဖြင့် ထပ်လောင်း ပြောကြားလိုက်သည်။
ထိုစကား ထွက်လာသည်နှင့်တစ်ပြိုင်နက် လျိုထောင်အာ ဖန်ယွမ်ကို ကြည့်ရသည့် အကြည့်မှာ လုံးဝ ပြောင်းလဲသွားခဲ့ရတော့သည်။
သူမသည် နှလုံးသားထဲမှ လှိုက်လှိုက်လှဲလှဲ ထွက်ပေါ်လာသော မြှောက်ပင့်ခြင်းနှင့် အထင်ကြီးလေးစားခြင်း အစစ်အမှန် ဖြစ်ပေသည်။
ဘေးနားမှ နားထောင်နေသော ယွဲ့လင်မှာမူ သူမ၏ မျက်ခုံးများ နောက်ထပ်တစ်ကြိမ် ပြင်းထန်စွာ တွန့်ကွေးသွားခဲ့ရတော့သည်။